ʻOku Totonu ke Fēfē ʻEtau Tōʻongafai ki he Niʻihi Kehé?

“Hange ko ia ʻoku mou loto ke fai ʻe he kakai kiate kimoutolu, mou fai tatau mo ia foki kiate kinautolu.”—LUKE 6:31.

1, 2. (a) Ko e hā ʻa e Malanga ʻi he Moʻungá? (e) Te tau lāulea ki he hā ʻi he kupu ko ení pea mo e kupu hoko maí?

 KO E moʻoni ko Sīsū Kalaisi ʻa e Faiako Lahí. ʻI hono fekauʻi atu ʻe hono ngaahi fili fakalotú ʻa e kau tangata ke nau puke iá, naʻe foki mola mai ʻa e kau ʻōfisá ʻo nau pehē: “ʻA, Teʻeki ha tangata ʻe lea hange ko ia.” (Sione 7:32, 45, 46) Ko e taha ʻo e ngaahi malanga tuʻu-ki-muʻa taha ʻa Sīsuú ko e Malanga ʻi he Moʻungá. ʻOku hiki ia ʻi he vahe 5 ki he 7 ʻo e Kōsipeli ʻa Mātiú, pea ʻoku ʻomai ʻa e fakamatala meimei tatau ʻi he Luke 6:20-49. a

² Mahalo pē ko e fakamatala ʻiloa taha ʻi he malanga ko iá ko e fakamatala ko ia ʻoku faʻa ui ko e Lao Koulá. ʻOku kaunga ia ki he anga ʻo ʻetau tōʻongafai ki he niʻihi kehé. “Hange ko ia ʻoku mou loto ke fai ʻe he kakai kiate kimoutolu, mou fai tatau mo ia foki kiate kinautolu,” ko e lea ia ʻa Sīsuú. (Luke 6:31) Pea ko e ngaahi meʻa lelei moʻoni naʻá ne fai maʻá e kakaí! Naʻe fakamoʻui ʻe Sīsū ʻa e mahakí pea aʻu ʻo ne fokotuʻu ʻa e maté. Kae kehe, naʻe tautefito hono tāpuakiʻi ʻa e kakaí ʻi he taimi naʻa nau tali ai ʻa e ongoongo lelei naʻá ne vahevahe ange kiate kinautolú. (Lau ʻa e Luke 7:20-22.) ʻI he tuʻunga ko e Kau Fakamoʻoni ʻa Sihová, ʻoku tau fiefia ke kau ʻi he ngāue tatau ko hono malangaʻi ʻo e Puleʻangá. (Mt. 24:14; 28:19, 20) ʻI he kupu ko ení mo e kupu hokó, te tau lāulea ai ki he ngaahi lea ʻa Sīsū fekauʻaki mo e ngāué ni pea pehē ki he ngaahi poini kehe ʻi he Malanga ʻi he Moʻungá ʻoku fakamatala ai ki he meʻa ʻoku totonu ke tau fai ki he niʻihi kehé.

Anga-Malū

 3. ʻE fēfē haʻo fakamatalaʻi ʻa e anga-maluú?

³ Naʻe pehē ʻe Sīsū “Oku monuia [pe fiefia ā] ae agamalu: he te nau maʻu ae fonua.” (Mt. 5:5, PM) ʻI he Tohi Tapú, ko e anga-maluú ʻoku ʻikai haʻane kaunga ʻe taha ki he vaivaiʻangá. Ko e anga-ʻofa ʻa ʻetau ngāueʻaki ia ʻi he tali ki he ngaahi fiemaʻu ʻa e ʻOtuá. Ko e fakakaukau ko ení ʻoku tapua atu ia ʻi hotau ʻulungāanga ki he kaungā faʻahinga ʻo e tangatá. Hangē ko ení, ʻoku ʻikai te tau ‘totongi ʻa e kovi ʻaki ʻa e kovi.’—Loma 12:17-19.

 4. Ko e hā ʻoku fiefia ai ʻa e kau anga-maluú?

⁴ ʻOku fiefia ʻa e kau anga-maluú koeʻuhi “te nau maʻu ae fonua.” Ko Sīsū ʻa ia naʻe “anga-malū mo loto-fakatōkilalo,” ʻa e tokotaha naʻe “tuʻutuʻuni ko e ʻea ʻe oʻona ʻa e meʻa kotoa pe,” pea ko ia ʻa e Tokotaha tefito te ne maʻu ʻa e fonuá. (Mt. 11:29, NW; Hep. 1:2; Sāme 2:8) Naʻe tomuʻa tala ko e “hakoʻi tangata” faka-Mīsaiá ʻe ʻi ai hono ngaahi kaungāpule ʻi he Puleʻanga fakahēvaní. (Tan. 7:13, 14, 21, 22, 27) ʻI he tuʻunga ko e “kaungā-ea mo Kalaisi,” ko e faʻahinga pani anga-malū ʻe toko 144,000 te nau kau fakataha mo Sīsū ʻi hono maʻu ʻa e fonuá. (Loma 8:16, 17; Fkh. 14:1) Ko e faʻahinga anga-malū kehé ʻe tāpuakiʻi kinautolu ʻaki ʻa e moʻui taʻengata ʻi he māmaní ʻi he malumalu ʻo e Puleʻangá.—Sāme 37:11.

 5. Ko hono maʻu ʻo e anga-malū faka-Kalaisí ʻoku kaunga fēfē ia kiate kitautolu?

⁵ Kapau naʻa tau anga-fefeka, heʻikai fie feohi mo kitautolu ʻa e niʻihi kehé pea te nau fakamamaʻo meiate kitautolu. Kae kehe, ko hono maʻu ʻa e anga-malū faka-Kalaisí ʻokú ne ʻai kitautolu ke hoko ko e ngaahi mēmipa fakamānako mo fakatupu langa hake fakalaumālie ʻo e fakatahaʻangá. Ko e anga-maluú ko e konga ia ʻo e fua ʻoku fakatupu ʻiate kitautolu ʻe he ivi ngāue ʻo e ʻOtuá kapau ʻoku tau ‘moʻui pea laka ʻi he Laumalié.’ (Lau ʻa e Kaletia 5:22-25.) Ko e moʻoni ʻoku tau loto ke lau kitautolu ʻi he faʻahinga anga-malū ʻoku tataki ʻe he laumālie māʻoniʻoni ʻo Sihová!

Fiefia ka ko Kinautolu ʻOku Mohu Mēsí!

 6. “Ko kinautolu ʻoku mohu mēsí” ʻoku nau maʻu ʻa e ngaahi ʻulungāanga tuʻu-ki-muʻa ko e hā?

⁶ ʻI heʻene Malanga ʻi he Moʻungá, naʻe toe pehē  ai ʻe Sīsū: “Fiefia ā ka ko kinautolu ʻoku mohu mēsí, koeʻuhi ʻe fakahaaʻi kiate kinautolu ʻa e mēsí.” (Mt. 5:7, NW) “Ko kinautolu ʻoku mohu mēsí” ʻoku nau maʻu ʻa e manavaʻofa ongongofua pea fakahāhā ʻa e fakaʻatuʻi anga-ʻofa, naʻa mo e fakaʻofaʻia ki he faʻahinga faingataʻaʻiá. Naʻe fakafiemālieʻi fakaemana ʻe Sīsū ʻa e kau faingataʻaʻiá koeʻuhi naʻá ne “ongoʻi fakaʻofaʻia,” pe naʻe “ueʻi ia ʻe he fakaʻofaʻiá.” (Mt. 14:14, NW; Mt 20:34, NW) Ko ia ʻoku totonu ke ueʻi kitautolu ʻe he fakaʻofaʻiá mo e fakaʻatuʻí ke tau mohu meesi.—Sem. 2:13.

 7. Naʻe ueʻi ʻe he fakaʻofaʻiá ʻa Sīsū ke ne fai ʻa e hā?

⁷ ʻI he fetaulaki ʻa Sīsū mo ha fuʻu kakai ʻi heʻene fononga ke maʻu ha mālōloó, “naʻe ueʻi ia ʻe he fakaʻofaʻia kiate kinautolú, koeʻuhí naʻa nau hangē ha fanga sipi ʻoku ʻikai hanau tauhí.” Ko ia ai, “naʻá ne kamata ke akoʻi kiate kinautolu ʻa e ngaahi meʻa lahi.” (Mk. 6:34, NW) Ko ha meʻa fakafiefia moʻoni ia ʻoku tau hokosiá ʻi heʻetau vahevahe atu ʻi he tuʻunga meimei tatau ʻa e pōpoaki ʻo e Puleʻangá ki he niʻihi kehé ʻo talanoa kiate kinautolu fekauʻaki mo e fuʻu meesi ʻa e ʻOtuá!

 8. Ko e hā ʻoku fiefia ai ʻa e faʻahinga ʻoku mohu mēsí?

⁸ ʻOku fiefia ʻa kinautolu ʻoku mohu mēsí koeʻuhi ʻe “fakahaaʻi kiate kinautolu ʻa e mēsí.” ʻI heʻetau faimeesi ki he kakaí, ʻoku nau faʻa tali ʻi ha founga meimei tatau. (Luke 6:38) ʻIkai ngata aí, naʻe pehē ʻe Sīsū: “Kapau te mou fakamolemole ʻa e ngāhi hala ʻa e kakai, pea ʻe fakamolemole kimoutolu ʻe hoʻomou Tamai Fakalangi.” (Mt. 6:14) Ko e faʻahinga pē ʻoku mohu mēsí ʻoku nau ʻiloʻi ʻa e fiefia ʻoku tupu mei he fakamolemoleʻi ʻo e ngaahi angahalá mo e fakahōifua fakaʻotuá.

ʻUhinga ʻOku Fiefia Ai Kinautolu ʻOku “Fakatupu Melino”

 9. ʻE fēfē ʻetau ngāué ʻo kapau ʻoku tau fakatupu melino?

⁹ ʻI he lave ki he ʻuhinga ʻe taha ki he fiefiá, naʻe pehē ʻe Sīsū: “Monūʻiaā [pe fiefia ā] ka ko kinautolu ʻoku fakatupu melino: he ʻe ui ʻa kinautolu ko e ‘ngāhi foha ʻo e ʻOtua.’” (Mt. 5:9) Ko e foʻi lea faka-Kalisi heni naʻe liliu ko e “fakatupu melino” ʻoku ʻuhinga fakafoʻileá ko e “kau fakamelino.” Kapau ko e kau fakamelino kitautolu, heʻikai ke tau fakamolemoleʻi pe kau ʻi ha meʻa pē, hangē ko e talanoa lauʻikovi loi, ʻa ia ʻoku lava ke ne “veteki ha kaumeʻa fetohotohoi.” (Pal. 16:28) ʻI he leá mo e ngāué, te tau tuli ai ki he melinó mo e kakai ʻi loto mo tuʻa ʻi he fakatahaʻanga Kalisitiané. (Hep. 12:14) Te tau fai ʻetau lelei tahá tautefito ke maʻu ai ʻa e melino mo Sihova ko e ʻOtuá.—Lau ʻa e 1 Pita 3:10-12.

10. Ko e hā ʻoku fiefia ai ʻa e kau “fakatupu melino”?

¹⁰ Naʻe pehē ʻe Sīsū ko kinautolu ʻoku “fakatupu melino” ʻoku nau fiefia, “he ʻe ui ʻa kinautolu ko e ‘ngāhi foha ʻo e ʻOtua.’” Koeʻuhi ko hono ngāueʻi ʻa e tui kia Sīsū ko e Mīsaiá, ʻoku maʻu ai ʻe he kau Kalisitiane paní ʻa e ‘mafai ke hoko ko e fanau ʻa e ʻOtuá.’ (Sione 1:12; 1 Pita 2:24) Fēfē ʻa e “fanga sipi kehe” fakatupu melino ʻa Sīsuú? Te nau maʻu ia ko ʻenau “Tamai Taʻengata” lolotonga ʻa ʻene Pule Taʻu ʻe Taha Afe mo hono ngaahi kaungāʻea fakahēvaní. (Sione 10:14, 16; Ai. 9:6 [Ai 9:5, PM]; Fkh. 20:6) ʻI he ngataʻanga ʻo ʻene Pule Taʻu ʻe Taha Afé, ko e kau fakatupu melino ko iá te nau hoko ai ʻi he ʻuhinga kakato tahá ko e fānau fakaemāmani ʻa e ʻOtuá.—1 Kol.1Ko 15:27, 28.

11. ʻE fēfē ʻetau tōʻongafai ki he niʻihi kehé kapau ʻoku tataki kitautolu ʻe he “poto ʻoku mei ʻolunga”?

¹¹ Ke maʻu ha vahaʻangatae fekoekoeʻi mo Sihova, “ae Otua oe melino,” kuo pau ke tau faʻifaʻitaki ki hono ngaahi ʻulungāangá, ʻo kau ai ʻa e fakatupu melinó. (Fili. 4:9, PM) Kapau ʻoku tau fakaʻatā ke tataki kitautolu ʻe he “poto ʻoku mei ʻolunga,” te tau tōʻongafai ai ki he niʻihi kehé ʻi ha founga fakatupu melino. (Sem. 3:17) ʻIo, te tau hoko ko e kau fakamelino fiefia.

 “Ke Ulo Atu Hoʻomou Māma”

12. (a) Ko e hā ne leaʻaki ʻe Sīsū fekauʻaki mo e maama fakalaumālié? (e) ʻE lava fēfē ke ulo atu ʻetau māmá?

¹² ʻOku tau tōʻongafai ki he kakaí ʻi he founga lelei taha ʻoku ala lavá ʻi he taimi ʻoku tau tokoniʻi ai kinautolu ke nau maʻu ʻa e maama fakalaumālie mei he ʻOtuá. (Sāme 43:3) Naʻe tala ʻe Sīsū ki heʻene kau ākongá ko kinautolú “ko e māma ʻo mamani” peá ne fakaʻaiʻai kinautolu ke ulo atu ʻenau māmá koeʻuhi ke lava ʻo sio ʻa e kakaí ki heʻenau “ngāhi ngaue lelei,” pe ngaahi tōʻonga lelei ki he niʻihi kehé. ʻE iku eni ki he fakamaama fakalaumālie “ki he kakai,” pe ko e ʻaonga ki he faʻahinga ʻo e tangatá. (Lau ʻa e Mātiu 5:14-16.) ʻI he ʻahó ni, ʻoku ulo atu ʻetau māmá ʻi hono fai ʻa e ngāue lelei ki hotau ngaahi kaungāʻapí pea ʻi he kau ʻi he ngāue ko hono malangaʻi ʻa e ongoongo leleí “ʻi mamani katoa” ʻa ia ko e “ngaahi kakai kotoa pē.” (Mt. 26:13; Mk. 13:10) Ko ha monū moʻoni ia ʻoku tau maʻú!

13. Ko e hā ʻoku fakatokangaʻi ai kitautolú?

¹³ “Ko e kolo ʻoku tuʻu ʻi ha fuga moʻunga ʻoku ʻikai te ne lava ke puli,” ko e lea ia ʻa Sīsuú. Ko ha kolo pē ʻoku tuʻu ʻi ha moʻunga ʻe faingofua ʻa e sio ki aí. ʻI he tuʻunga meimei tatau, ʻoku fakatokangaʻi kitautolu ʻi heʻetau ngaahi ngāue leleí ʻi he tuʻunga ko e kau fanongonongo ʻo e Puleʻangá pea ʻi he ngaahi ʻulungāanga hangē ko e anga-fakanānaá mo e anga-maʻá.—Tai. 2:1-14.

14. (a) ʻE fēfē haʻo fakamatalaʻi ʻa e ngaahi maama ʻi he ʻuluaki senitulí? (e) ʻOku ʻuhinga ki he hā ʻa e ʻikai ke tau fufū ʻa e maama fakalaumālié ʻi ha lalo “puha fua”?

¹⁴ Naʻe lea ʻa Sīsū fekauʻaki mo hono tutu ʻo ha maama pea tuku, ʻo ʻikai ʻi ha lalo puha, ka ʻi ha tuʻunga maama koeʻuhí ke ulo atu ia ki he faʻahinga kotoa ʻoku ʻi he falé. Ko ha maama anga-maheni ʻi he ʻuluaki senitulí ko ha ʻaiʻanga meʻa ʻumea ia mo hano vavae ʻa ia naʻá ne mimisi hake ʻa e huhuʻá (faʻa ngāueʻaki ʻa e lolo ʻōlivé) ke hokohoko atu ai ʻa ʻene uló. ʻI hono faʻa fokotuʻu ʻi ha tuʻuʻanga papa pe mētalé, naʻe ‘ulo ai ki he kakai kotoa pe ʻoku ʻi he falé’ ʻa e māmá. Naʻe ʻikai tutu ʻe he kakaí ha maama pea tuku ʻi ha lalo “puha fua”—ko ha ʻaiʻanga meʻa lahi naʻe malava ke hao ai ʻa e lita nai ʻe hiva. Naʻe ʻikai loto ʻa Sīsū ke fufū ʻe heʻene kau ākongá ʻenau maama fakalaumālié ʻi ha puha fua fakaefakatātā. Ko ia kuo pau ke ulo atu ʻetau māmá, ʻo ʻoua ʻaupito ʻe fakaʻatā ʻa e fakafepakí pe fakatangá ke ne ʻai ke tau fufū ʻa e moʻoni Fakatohitapú pe tuku tauhi pē ʻia kitautolu.

15. ʻOku anga-fēfē hono ueʻi ʻe heʻetau “ngāhi ngaue lelei” ʻa e kakai ʻe niʻihi?

¹⁵ ʻI he hili ʻene lave ki ha maama ʻoku uló naʻe tala ai ʻe Sīsū ki heʻene kau ākongá: “Pehē foki, ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” Koeʻuhi ko ʻetau “ngāhi ngaue lelei” ʻoku “fakamāloʻia” ai ʻe he niʻihi ʻa e ʻOtuá ʻaki ʻenau hoko ko ʻene kau sevāniti. Ko ha fakaueʻiloto moʻoni ia kiate kitautolu ke tau hanganaki ‘ulo ko e ngaahi maamaʻanga ʻi mamani’!—Fili. 2:15.

16. ʻI he hoko “ko e māma ʻo mamani” ʻoku fiemaʻu ai ʻa e hā meiate kitautolu?

¹⁶ ʻI he hoko “ko e māma ʻo mamani” ʻoku fiemaʻu ai ke tau kau ʻi he ngāue malangaʻi ʻo e Puleʻangá mo e ngaohi-ākongá. Ka ʻoku fiemaʻu meiate kitautolu ha toe meʻa kehe. “Mou laka ʻo tāu mo e fanau ʻa maama,” ko e tohi ia ʻa e ʻapositolo ko Paulá, “he ko e fua ʻo e maama ʻoku fou ʻi he lelei kotoa pe mo e totonu mo e moʻoni.” (Ef. 5:8, 9) ʻOku fiemaʻu ke tau hoko ko e ngaahi faʻifaʻitakiʻanga ʻoku ulo ʻo e ʻulungāanga fakaʻotuá. Ko e moʻoni, kuo pau ke tau tokanga ki he akonaki ʻa e ʻapositolo ko Pitá: “Mou ʻai ke tāu hoʻomou fakafeangai ki he Senitaile; koeʻuhi, ʻi he meʻa ʻoku nau lauʻikovi ai kimoutolu, tokua ko e faikovi, ke nau mamata ki hoʻomou ngaahi ngaue lelei, pea langaʻi ai  ʻenau fakahikihikiʻi ʻa e ʻOtua ʻi he ʻaho ʻo e aʻahi.” (1 Pita 2:12) Ka ko e hā ʻoku totonu ke fai kapau ʻe tupulekina ha ngaahi vā fetēleni ʻi he kaungātuí?

‘Fakalelei mo Ho Kaingá’

17-19. (a) Ko e hā ʻa e “feilaulau” ʻoku lave ki ai ʻi he Mātiu 5:23, 24? (e) ʻOku mahuʻinga fēfē ke fakalelei mo ha tokoua, pea naʻe anga-fēfē hono fakahaaʻi eni ʻe Sīsuú?

¹⁷ ʻI heʻene Malanga ʻi he Moʻungá, naʻe fakatokanga ai ʻa Sīsū ki heʻene kau ākongá fekauʻaki mo hono tukulotoʻi ʻa e ʻita mo e fehiʻa ki ha tokoua. ʻI hono kehé, naʻe fiemaʻu ke nau vave ke tuli ki he melinó mo ha tokoua ʻoku mamahi. (Lau ʻa e Mātiu 5:21-25.) Tokanga lelei ki he akonaki ʻa Sīsuú. Kapau ʻokú ke ʻave hoʻo meʻaʻofá ki he ʻōlitá pea manatuʻi hake ai ʻoku ʻi ai ha meʻa ʻe koviʻia ai ho tokouá ʻiate koe, ko e hā naʻe fiemaʻu ke ke faí? Naʻe pau ke ke tuku hoʻo feilaulaú ʻi he veʻe ʻōlitá ka ke ʻalu ʻo fakalelei mo ho tokouá. Hili hono fai iá, ʻe lava leva ke ke foki ʻo foaki ʻa hoʻo feilaulaú.

¹⁸ Ko e “feilaulau” naʻe faʻa faí ko ha foaki fakaefeilaulau ia ʻoku ʻoatu nai ʻe ha tokotaha ʻi he temipale ʻo Sihová. Ko e ngaahi feilaulau monumanú naʻe mahuʻinga ʻaupito, he naʻe fekauʻi ia ʻe he ʻOtuá ko e konga ʻo e lotu ʻa ʻIsilelí ʻi he malumalu ʻo e Lao ʻa Mōsesé. Ka ʻo kapau naʻá ke manatuʻi hake ʻoku ʻi ai ha meʻa naʻe koviʻia ai ho tokouá ʻiate koe, ko hono fakaleleiʻi ʻa e meʻá naʻe fiemaʻu fakavavevave ange ia ʻi hono foaki hoʻo feilaulaú. “Tuku pe hena hoʻo feilaulau ʻi he veʻe olita, pea ke mole atu,” ko e lea ia ʻa Sīsuú. Tomuʻa ‘fakalelei mo ho kaingá [pe tokouá], peá ke toki haʻu ʻo ʻatu hoʻo feilaulaú.’ Ko e fakalelei mo ha tokouá naʻe pau ke tomuʻa fai ia ʻi hono fakahoko ha fatongia naʻe fokotuʻu mai ʻi he Laó.

¹⁹ Naʻe ʻikai fakangatangata ʻe Sīsū ʻa ʻene fakamatalá ki ha ngaahi feilaulau tefito pea mo ha ngaahi angahala pau. Ko ia ai, ko ha faʻahinga feilaulau pē naʻe pau ke toloi ia kapau naʻe manatuʻi ʻe ha taha ʻoku ʻi ai ha meʻa ʻoku koviʻia ai ʻiate ia ʻa hono tokouá. Kapau ko e feilaulaú ko ha monumanu moʻui, naʻe pau ke tuku pē “ʻi he veʻe olita” feilaulau tutú ʻi he lotoʻā temipale ʻo e kau taulaʻeikí. Hili hono solova ʻa e palopalemá, naʻe foki leva ʻa e tokotaha fakatupu mamahí pea naʻe fai ʻa e feilaulaú.

20. Ko e hā ʻoku totonu ai ke tau ngāue ke fakaleleiʻi vave ʻa e ngaahi meʻá kapau ʻoku tau ʻita ʻi ha tokoua?

²⁰ Mei he vakai ʻa e ʻOtuá, ko hotau vahaʻangatae mo hotau fanga tokouá ko ha konga mahuʻinga ia ʻo e lotu moʻoní. Ko e ngaahi feilaulau monumanú naʻe taʻeʻuhinga ia kia Sihova kapau ko e faʻahinga naʻa nau foaki iá naʻe ʻikai te nau tōʻongafai ʻi he founga totonu ki honau kaungā faʻahinga ʻo e tangatá. (Mai. 6:6-8) Ko ia ai, naʻe ekinaki ʻa Sīsū ki heʻene kau ākongá ke nau “fakalelei vave.” (Mt. 5:25, PM) Naʻe tohi ʻe Paula ʻa e meʻa meimei tatau: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.” (Ef. 4:26, 27) Kapau ʻoku totonu pē ʻetau ʻitá, ʻoku totonu ke tau ngāue vave ke fakaleleiʻi ʻa e meʻá koeʻuhi ke ʻoua te tau ʻi ha tuʻunga ʻita ai pē ʻo  fakaʻatā ai ke ngāueʻaongaʻaki ia ʻe he Tēvoló kiate kitautolu.—Luke 17:3, 4.

Tōʻongafai Maʻu Pē ki he Niʻihi Kehé ʻi he Anga-Fakaʻapaʻapa

21, 22. (a) ʻE lava fēfē ke tau ngāueʻaki ʻa e akonaki ʻa Sīsū ʻa ia kuo tau toki ʻosi lāulea ki aí? (e) Ko e hā te tau lāulea ki ai ʻi he kupu hoko maí?

²¹ Ko ʻetau vakaiʻi ʻa e ngaahi fakamatala pau naʻe fai ʻe Sīsū ʻi heʻene Malanga ʻi he Moʻungá ʻoku totonu ke tokoniʻi ai kitautolu ke tau tōʻongafai ki he niʻihi kehé ʻi he anga-lelei mo e anga-fakaʻapaʻapa. Neongo ko kitautolu kotoa ʻoku tau taʻehaohaoa, ʻe lava ke tau ngāueʻaki ʻa e akonaki ʻa Sīsuú koeʻuhi ʻoku ʻikai te ne ʻamanekina ha meʻa lahi meiate kitautolu ʻi he meʻa ʻoku tau malava ke faí, pea ʻoku pehē pē mo ʻetau Tamai fakahēvaní. ʻI he lotu, feinga moʻoni, pea mo e tāpuaki ʻa e ʻOtua ko Sihová, ʻe lava ke tau hoko ai ʻo anga-malū, faimeesi mo fakatupu melino. ʻE lava ke tau tapua atu ʻa e maama fakalaumālie ko ia ʻoku ulo atu ke lāngilangiʻia ai ʻa Sihová. ʻIkai ngata aí, ʻe lava ke tau fakamelino mo hotau tokouá ʻi he taimi ʻoku fiemaʻu aí.

²² Ko e lotu ʻoku ala tali ʻe Sihová ʻoku kau ki ai ʻa e tōʻongafai totonu ki hotau kaungāʻapí. (Mk. 12:31) ʻI he kupu hoko maí, te tau lāulea ai ki he ngaahi fakamatala kehe ʻi he Malanga ʻi he Moʻungá ʻa ia ʻoku totonu ke ne tokoniʻi kitautolu ke hanganaki failelei ai ki he niʻihi kehé. Kae kehe, hili ʻa e fakalaulauloto ki he ngaahi poini ko eni naʻe maʻu mei he malanga tuʻu-ki-muʻa ʻa Sīsuú, ʻe lava ke tau ʻeke hifo kiate kitautolu, ‘ʻOku fēfē ʻeku tōʻongafai ki he niʻihi kehé?’

[Fakamatala ʻi lalo]

[ʻE Fēfē Haʻo Tali?]

• ʻOku ʻuhinga ki he hā ʻa e hoko ʻo anga-maluú?

• Ko e hā ʻoku fiefia ai ʻa “kinautolu ʻoku mohu mēsí”?

• ʻE lava fēfē ke tau ʻai ke ulo atu ʻetau māmá?

• Ko e hā ʻoku totonu ai ke tau vave ke ‘fakalelei mo hotau tokouá’?

[Fehuʻi ki he Ako]

[Fakatātā ʻi he peesi 4]

Ko hono talaki ʻa e pōpoaki ʻo e Puleʻangá ko ha founga mātuʻaki mahuʻinga ia ke ulo atu ai ʻetau māmá

[Fakatātā ʻi he peesi 5]

Ko e kau Kalisitiané kuo pau ke nau hoko ko e faʻifaʻitakiʻanga ʻo e ʻulungāanga fakaʻotuá

[Fakatātā ʻi he peesi 6]

Fai hoʻo lelei tahá ke fakalelei ai mo ho tokouá