ʻOkú Ke Mateuteu ke Taukapoʻi Hoʻo Tuí?

KUÓ KE fehangahangai ʻi ha taimi mo ha tuʻunga ʻa ia naʻá ke ongoʻi ai kuo pau ke ke taukapoʻi ʻa hoʻo tuí? Fakakaukau angé ki he meʻa naʻe hoko kia Susana, ko ha tuofefine taʻu 16 ʻi Palakuei. ʻI heʻene kalasi ʻēfika ʻi he akoʻanga māʻolungá, naʻe fai ai ha fakamatala ʻo pehē ʻoku ʻikai ke tali ʻe he Kau Fakamoʻoni ʻa Sihová ʻa e “Fuakava Motuʻá,” Sīsū Kalaisi, pe ko Mele. Naʻe toe taukaveʻi ai ko e Kau Fakamoʻoní ko e faʻahinga loto-māfana tōtuʻa ʻa ia ʻe sai ange kiate kinautolu ke nau mate ʻi hono tali ʻa e tokangaʻi fakafaitoʻo ʻoku ʻoatú. Ne mei fēfē hoʻo tali ki aí?

Naʻe lotu ʻa Susana kia Sihova pea hiki hake hono nimá. Ko e mei tuku ia ʻa e kalasí, ko ia naʻá ne kole ai ki heʻene faiakó ke fakangofua ange ke ne fai ha fakamatala ʻo fekauʻaki mo ʻene ngaahi tui ʻi he tuʻunga ko e taha ʻo e Kau Fakamoʻoni ʻa Sihová. Naʻe tali lelei ʻene kolé ʻe he faiakó. Lolotonga ʻa e uike ʻe ua hoko maí, naʻe teuteu ai ʻa Susana ki heʻene fakamatalá ʻo ngāueʻaki ʻa e polosiua ʻoku fakakaveinga ko e Kau Fakamoʻoni ʻa Sihová—Ko Hai Kinautolu? Ko e Hā ʻOku Nau Tui ki Aí?

Naʻe aʻu eni ki he ʻaho ke fai ai ʻa e fakamatalá. Naʻe fakamatalaʻi ai ʻe Susana ʻa e tupuʻanga ʻo e hingoa Kau Fakamoʻoni ʻa Sihová. Naʻá ne toe fakamatala ki heʻetau ʻamanaki ki he kahaʻú mo e ʻuhinga ʻoku ʻikai ke tau tali ai ʻa e huhu totó. Naʻá ne fakaafeʻi leva ʻa e kalasí ke nau ʻeke ha ngaahi fehuʻi. Ko e tokolahi taha ʻo e kau akó naʻa nau hiki honau nimá. Naʻe maongo ki he faiakó ʻa e ngaahi tali Fakatohitapu ʻa e kiʻi taʻahiné ki he ngaahi fehuʻí.

Ko e tokotaha ako ʻe taha naʻá ne fakamatala, “naʻá ku ʻi ha Fale Fakatahaʻanga ʻi he taimi ʻe taha, pea naʻe halaʻatā ke ʻi ai ha ʻīmisi ʻe taha.” Naʻe fiemaʻu ʻe he faiakó ke ne ʻiloʻi ʻa e ʻuhingá. Naʻe lau ai ʻe Susana ʻa e Sāme 115:4-8 mo e Ekisoto 20:4. ʻI heʻene ʻohovalé, naʻe pehē ange ʻe he faiakó, “ʻOku anga-fēfē ʻa e fonu ʻīmisi homau ngaahi fale lotú lolotonga ia ʻoku fakahalaiaʻi ʻe he Tohi Tapú ʻa hono ngāueʻakí?”

Ko e fetalanoaʻaki fehuʻi mo e talí naʻe hokohoko atu ia ʻo feʻunga mo e miniti ʻe 40. ʻI hono ʻeke ʻe Susana ki he kalasí pe ʻoku nau loto ke sio ʻi he foʻi vitiō ko e No Blood—Medicine Meets the Challenge, naʻe tali ʻio ʻa e tokotaha kotoa ki ai. Ko ia ai, naʻe fakataimitēpileʻi ʻe he faiakó ha toe kalasi ki he ʻaho hono hokó. Hili hono hulu ʻa e foʻi vitioó, naʻe fakamatalaʻi ʻe Susana ʻa e ngaahi faitoʻo fetongi ʻa ia ʻoku ala tali ki he niʻihi ʻo e Kau Fakamoʻoni ʻa Sihová. ʻI he fekauʻaki mo e meʻa ko iá, naʻe pehē ʻe he faiakó: “Naʻe ʻikai te u ʻiloʻi ʻoku lahi ʻaupito ʻa e ngaahi faitoʻo fetongí; pea naʻe ʻikai te u lāuʻilo ki he ngaahi ʻaonga ʻo e faitoʻo taʻekau ai ha totó. Ko e ngaahi faitoʻó ni—ʻe ala maʻu pē ia ʻe he Kau Fakamoʻoni ʻa Sihová?” ʻI heʻene fanongo ʻoku ʻikaí, naʻe pehē ʻe he faiakó, “Ko e taimi hoko mai ʻe haʻu ai ha Kau Fakamoʻoni ʻa Sihova ki hoku matapaá, te u talanoa mo kinautolu.”

Ko e lāulea miniti ʻe 20 naʻe muʻaki  teuteu ki ai ʻa Susana naʻe toki ʻosi ia ʻi he houa ʻe tolu. ʻI ha uike ki mui ai, naʻe fai ai ʻe ha kau ako kehe ha fakamatala fekauʻaki mo ʻenau ngaahi tuí ʻi he tuʻunga ko e ngaahi mēmipa ʻi honau siasí. ʻI he fakamulitukú, naʻe langaʻi hake ai ʻa e ngaahi fehuʻi lahi, ka ko e kau ako naʻe kau ki aí naʻe ʻikai lava ke nau taukapoʻi ʻenau tuí. Naʻe ʻeke ange ʻe he faiakó kiate kinautolu, “ʻOku anga-fēfē ʻa e ʻikai te mou malava ke taukapoʻi hoʻomou tuí ʻo hangē ko homou kaungāako ʻa ia ko e taha ʻo e Kau Fakamoʻoni ʻa Sihová?”

Ko e talí eni: “ʻOku nau mātuʻaki ako ʻe kinautolu ʻa e Tohi Tapú. ʻOku ʻikai te mau fai ia ʻe kimautolu.”

ʻI heʻene hanga kia Susana, naʻe pehē ange ʻe he faiakó: “ʻOkú ke ako moʻoni ʻa e Tohi Tapú pea fai ha feinga ke fai ki he meʻa ʻoku leaʻaki aí. ʻOkú ke tuha mo e fakaongoongolelei.”

Naʻe mei lava ke fakalongolongo pē ʻa Susana. Ka ʻi heʻene leá, naʻá ne muimui ai ki he faʻifaʻitakiʻanga lelei ʻa ha kiʻi taʻahine ʻIsileli ʻoku ʻikai fakahaaʻi hono hingoá ʻa ia naʻe taki pōpula ʻe he kau Sīliá. Naʻe hoko ʻa e kiʻi taʻahine ko iá ʻo ʻi he fale ʻo e ʻeiki-tau Sīlia ko Neamaní, ʻa ia naʻá ne puke ʻi ha mahaki-kili palakū. Naʻe lea ʻa e kiʻi taʻahiné, ʻo ne pehē ki hono pule fefiné: “Taumaiā naʻe ʻi he ʻao ʻo e palofita ʻoku ʻi Samelia ʻa e tangataʻeiki! te ne fakamaʻa ia mei heʻene kilia.” Naʻe ʻikai lava ke taʻotaʻofi ʻe he kiʻi taʻahiné ʻa ʻene faifakamoʻoni fekauʻaki mo e ʻOtua moʻoní. Naʻe iku eni ki he hoko ʻa hono pulé, ʻa Neamani, ko ha tokotaha lotu kia Sihova.—2 Tuʻi 5:3, 17.

ʻI he founga meimei tatau, naʻe ʻikai lava ke taʻotaʻofi ia ʻe Susana mei heʻene faifakamoʻoni fekauʻaki mo Sihova pea mo hono kakaí. ʻI heʻene tamuʻomuʻa ke taukapoʻi ʻa ʻene tuí ʻi he taimi naʻe fehuʻia aí, naʻe talangofua ai ʻa Susana ki he fekau Fakatohitapu: “Mou ʻai ke tapuhā ʻa Kalaisi ʻi homou loto, ko e ʻEiki pe ia: ʻo mou ʻosi teu ai pe ke fai ha fakamatala kiate ia fuape te ne ʻeke kiate kimoutolu ʻa e ʻuhinga ʻo e ʻamanaki ʻoku mou maʻu; kae fai ʻi he angavaivai mo e tailiili.” (1 Pita 3:15) ʻOkú ke mateuteu ke taukapoʻi hoʻo tuí pea tamuʻomuʻa ʻi he taimi ʻe maʻu ai ha faingamālié?

[Fakatātā ʻi he peesi 17]

Ko e ngaahi meʻangāué ni ʻe lava ke ne tokoniʻi koe ke ke taukapoʻi hoʻo tuí