Ko ha Fakaleleiʻanga Moʻoni

NAʻE loto ʻa e kau talavou ʻe toko tolu ʻi ʻAfilika Lotoloto ke nau maʻu ʻa e fakataha-lahi fakavahe ʻi honau feituʻú. Te nau aʻu fēfē nai ki aí? ʻOku meimei kilomita ʻe 90 hono mamaʻó ʻi ha hala tokakovi, mo efua, pea naʻe ʻikai haʻanau meʻalele. Naʻa nau fakakaukau leva ke kole ʻa e pasikala ʻe tolu ka naʻe ʻikai ke maʻu ha ngaahi pasikala ʻe feʻunga mo e fonongá.

Naʻe ʻiloʻi ʻe ha mātuʻa ʻi he fakatahaʻanga fakalotofonuá ʻenau palopalemá pea naʻá ne foaki ange ʻene pasikalá tonu—naʻe kei ngāue lelei pē neongo ʻene motuʻá. Naʻá ne fakamatala ai ki he anga ʻene fokotuʻutuʻu mo ha niʻihi kehe ʻi he kuohilí ke fai ha aʻu ki ha fakataha-lahi. Naʻe fokotuʻu ange ʻe he mātuʻá ke nau vahevahe pē hono ngāueʻaki ʻa e pasikala ko ia ʻe tahá. Ko ha fakaleleiʻanga faingofua, ka ʻe fiemaʻu ki ai ha fokotuʻutuʻu maau. ʻE lava fēfē ke ola lelei ʻa e fokotuʻutuʻu ko ení?

Ke ʻoua ʻe velahiá, naʻe fetaulaki pongipongia ʻa e kau talavoú ni ʻo fakaheka ʻenau kató ʻi he pasikalá. Naʻe ʻaka muʻomuʻa atu leva ʻa e ʻuluaki toko tahá, pea muimui fakavave atu leva ai ʻa e toko ua ko eé. ʻI he mita nai ʻe 500, naʻe tuʻu leva ʻa e tokotaha heká pea fakafalala atu ʻa e pasikalá ʻi ha fuʻu ʻakau. Kae kehe, naʻá ne tau ʻa e pasikalá ke lava ʻo sio mai ki ai ʻa e ongo ua naʻe lue laló koeʻuhi ke ʻoua naʻa “kaihaʻasi” ia ʻe ha sola. Naʻe lue lalo atu leva ʻa e ʻuluaki tokotaha naʻe heká ʻo hoko atu ʻa e fonongá.

ʻI he aʻu mai ʻa e toko ua ko eé ki he pasikalá, naʻe heka leva ʻa e toko taha kae kei hoko atu pē ʻa e lue ʻa e toko taha ko eé ʻi ha toe mita ʻe 500 pe ofi ki ai kae ʻoua ke aʻu ki hono taimi heká. Ko ia, ʻi hono fai ʻo ha fokotuʻutuʻu lelei pea fakapapauʻí, naʻe malava ai ʻe he toko tolú ni ʻo fakasiʻisiʻi e mamaʻo ʻo ʻenau lué mei he kilomita ʻe 90 ki he kilomita pē nai ʻe 60. Naʻe ʻaonga moʻoni ʻa e feingá. Naʻa nau fetaulaki mo honau fanga tokoua mo e tuofāfine Kalisitiané ʻi he fakataha-lahí mo nau fiefia ʻi hono maʻu ʻo e kātoanga kai fakalaumālié. (Teu. 31:12) ʻI he taʻú ni, ʻe lava ke ke fai ʻa e meʻa kotoa te ke malavá ke ke maʻu ʻa e fakataha-lahi fakavahe ʻi ho feituʻú?