Ngaahi Fehuʻi mei he Kau Lautohí

Naʻe fakahaaʻi ʻe he ʻapositolo ko Paulá “ʻe toki fakamoʻui ʻa Isileli kotoa.” (Loma 11:26) Naʻá ne ʻuhingá ʻe ului ʻi ha taimi ʻa e kau Siu kotoa pē ki he lotu faka-Kalisitiané?

ʻIkai, ʻoku ʻikai ko e meʻa eni ia naʻe ʻuhinga ki ai ʻa Paulá. ʻI he tuʻunga ko ha puleʻangá, ko e hako tonu ʻo ʻĒpalahamé naʻa nau siʻaki ʻa Sīsū ʻi hono tuʻunga ko e Mīsaiá. Pea ʻi he ngaahi taʻu hili e pekia ʻa Sīsuú, naʻe hoko ai ʻo mahino heʻikai ha ului tokolahi ia ʻa e kau Siú ki he lotu faka-Kalisitiané. Kae kehe, ko e fakamatala ʻa Paula ʻo pehē “ʻe toki fakamoʻui ʻa Isileli kotoa” naʻe moʻoni. ʻI he founga fē?

Naʻe pehē ʻe Sīsū ki he kau taki lotu Siu ʻi hono ʻahó: “ʻE toʻo meiate kimoutolu ʻa e Puleʻanga ʻo e ʻOtua, pea ʻe tuku ki ha kakai ʻoku fua ʻo tāu mo ia.” (Mt. 21:43) Koeʻuhi ko e puleʻanga ʻo ʻIsilelí fakalūkufua naʻa nau siʻaki ʻa Sīsū, ʻe fakahanga ai ʻe Sihova ʻene tokangá ki ha puleʻanga foʻou, ko ha puleʻanga fakalaumālie. Naʻe ui ʻe Paula ʻa e puleʻanga ko ení ko e “Isileli faka-ʻOtua.”—Kal. 6:16.

Ko e ngaahi kupu kehe ʻi he Ngaahi Konga Tohi Tapu Faka-Kalisi Kalisitiané ʻoku fakamoʻoniʻi ai ko e “Isileli faka-ʻOtua” ʻoku faʻu ʻaki ia ʻa e kau Kalisitiane pani ʻe he laumālié ʻe toko 144,000. (Loma 8:15-17; Fkh. 7:4) Ko e kau ki he kulupú ni ʻa e faʻahinga ʻikai ko e Siú ʻoku fakapapauʻi ia ʻe he Fakahā 5:9, 10, ʻa ia ʻoku fakahaaʻi ai ko e kau Kalisitiane paní ko ʻenau haʻu “mei he matakali fulipē mo e lea, mo e faʻahinga mo e puleʻanga.” Ko e kau mēmipa ʻo e ʻIsileli fakalaumālié naʻe fili makehe kinautolu ke nau hoko ko e “puleʻanga mo e ngaahi taulaʻeiki: pea te nau Hau ʻi mamani.” Neongo naʻe siʻaki ʻe Sihova ʻa ʻIsileli ʻi hono tuʻunga ko ha puleʻanga kuo filí, naʻe lava ke hoko ha faʻahinga tāutaha ʻo vā lelei mo ia. Ko e meʻa ia ne hokó he tuʻunga ʻo e kau ʻapositoló mo e muʻaki kau Kalisitiane kehe tokolahi. Ko e moʻoni, ko e kau Siu ko iá, hangē ko e faʻahinga kehe kotoa ʻo e tangatá, naʻe pau ke fakatau kinautolu ʻaki ʻa e taʻataʻa ʻo Sīsū Kalaisí.—1 Tim. 2:5, 6; Hep. 2:9; 1 Pita 1:17-19.

Ko e moʻoniʻi meʻa ko ia ʻa e mole mei he tokolahi taha ʻo e kau Siu tonu ʻi he ʻuluaki senitulí ʻa e faingamālie ke hoko ʻo kaungāpule mo Sīsuú naʻe ʻikai ke taʻofi ai ʻa e taumuʻa ia ʻa e ʻOtuá. Heʻikai ʻaupito lava eni ia, he naʻe fakahaaʻi ʻe Sihova fakafou heʻene palōfitá: “ʻE pehe pe mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.”—Ai. 55:11.

ʻOku hoko moʻoni ia ʻi he fekauʻaki mo e taumuʻa ʻa e ʻOtuá ke fokotuʻu ha kaungāpule ʻe toko 144,000 ke pule fakataha mo hono ʻAló ʻi hēvani. ʻOku fakamahinoʻi ʻe he Tohi Tapú ʻe pani ʻe he ʻOtuá ha fika kakato ko e toko 144,000. Heʻikai tō mei ai ha foʻi tokotaha!—Fkh. 14:1-5.

Ko ia ai, ʻi he taimi naʻe tohi ai ʻe Paula ʻo pehē “ʻe toki fakamoʻui ʻa Isileli kotoa,” naʻe ʻikai ko haʻane tomuʻa tala ʻe ia ha fuʻu ului tokolahi ʻa e kau Siú ki he lotu faka-Kalisitiané. ʻI hono kehé, naʻá ne ʻuhingá ʻe fakahoko ʻa e taumuʻa ʻa e ʻOtuá ke ʻi ai ʻa e kau ʻIsileli fakalaumālie ʻe toko 144,000 ke nau pule fakataha ʻi hēvani mo Hono ʻAló, ʻa Sīsū Kalaisi. ʻI he taimi kotofa ʻa e ʻOtuá, ko e fiká fakakātoa—“ʻa Isileli kotoa”—te nau ʻi ha tuʻunga malu, pea faifai atu pē ʻo nau pule ko e ngaahi tuʻi mo e kau taulaʻeiki ʻi he Puleʻanga faka-Mīsaiá.—Ef. 2:8.

[Fakatātā ʻi he peesi 28]

Ko e kau paní ko ʻenau haʻu “mei he matakali fulipē mo e lea, mo e faʻahinga mo e puleʻanga”