ʻOku ʻIkai Te Ke ʻIlo pe ko Fē ʻE Tupú!

“ʻI he pongipongi to hoʻo tenga, pea ʻi he efiafi ofi ʻa e poʻuli ʻoua taʻofi ho nima: He ʻoku ʻikai te ke ʻilo pe ko e fe ʻe tuʻumalie [pe tupú].”​—KOH. 11:6.

 1. Ko e hā ʻoku fakatou fakaofo ai mo fakatupu ongoʻi fakatōkilalo ke sio tonu ʻi he anga ʻo e tupú?

 KO E tokotaha ngoué ʻoku fiemaʻu ke ne kātaki. (Sem. 5:7) Hili hono tō ʻa e tengá, ʻoku fiemaʻu ke ne tatali ke talamuka ia pea tupu. ʻI he faai atu ʻa e taimí, ʻo ka ʻalomālie, ʻoku kamata ke ʻasi hake ʻa e hulí ʻo avangi hake ʻa e kelekelé. ʻOku nau tupu leva ʻo lalahi pea laku fua mai. ʻI he ikuʻangá, ʻoku maʻu ai ʻe he tokotaha ngoué ha ngoue kuo teu ke toli. Ko e meʻa fakaofo moʻoni ia ke sio tonu ʻi he mana ʻo e tupú. Ko e toe meʻa fakatupu ongoʻi fakatōkilalo foki ke ʻiloʻi ko hai ʻa e Matavai ʻo e tupu ko ení. ʻE lava ke tau tokangaʻi ʻa e tengá. ʻE lava ke tau tokoni ki hono fuʻifuʻí. Ka ko e ʻOtuá pē tokotaha ʻoku lava ke ne ʻai ia ke tupú.​—Fakafehoanaki mo e 1 Kolinito 3:6.

 2. Ko e hā ʻa e ngaahi poini naʻe akoʻi ʻe Sīsū fekauʻaki mo e tupu fakalaumālié ʻi heʻene ngaahi talanoa fakatātā naʻe lāulea ki ai ʻi he kupu ki muʻá?

² Hangē ko ia naʻe lave ki ai ʻi he kupu ki muʻá, naʻe fakatatau ʻe Sīsū ʻa e ngāue malangaʻi ʻo e Puleʻangá ki he tūtuuʻi ʻo e tengá ʻe he tokotaha ngoué. ʻI he talanoa fakatātā fekauʻaki mo e faʻahinga kehekehe ʻo e kelekelé, naʻe fakamamafaʻi ai ʻe Sīsū neongo kapau ʻoku tūtuuʻi ʻe he tokotaha ngoué ha tenga lelei, ko e tuʻunga ia ʻo e loto ʻo e tokotaha ko iá te ne fakapapauʻi pe ʻe tupu ʻa e tengá ʻo motuʻa pe ʻikai. (Mk. 4:3-9) ʻI he talanoa fakatātā ʻo e tangata tūtuuʻi ʻoku mohé, naʻe fakamamafaʻi ai ʻe Sīsū ko e tokotaha ngoué ʻoku ʻikai te ne mahinoʻi kakato ʻe ia pe ʻoku fakafēfē ʻa e tupú. ʻOku pehē eni koeʻuhi ko e tupú ʻoku fakatuʻunga ia ʻi he mālohi ʻo e ʻOtuá, ʻikai ko e ngaahi feinga fakaetangatá. (Mk. 4:26-29) Tau lāulea angé he taimí ni ki ha toe ngaahi talanoa fakatātā ʻa Sīsū ʻe tolu​—ko e tengaʻi mūsitá, ko e lēvaní mo e kupenga tohó. a

Ko e Talanoa Fakatātā ʻo e Tengaʻi Mūsitá

3, 4. ʻOku hanga ʻe he talanoa fakatātā ʻo e tengaʻi mūsitá ʻo fakamamafaʻi mai ʻa e ongo tafaʻaki fē fekauʻaki mo e pōpoaki ʻo e Puleʻangá?

³ Ko e talanoa fakatātā ʻo e tengaʻi mūsitá, ʻa ia ʻoku toe lēkooti ʻi he Maʻake vahe 4, ʻokú ne fakamamafaʻi ʻa e meʻa ʻe ua: ʻuluakí, ko e fakaofo ʻo e tupu ʻa e pōpoaki ʻo e Puleʻangá; uá, ko e maluʻi ʻoku fai kia kinautolu ʻoku nau tali ʻa e pōpoakí. Naʻe pehē ʻe Sīsū: “Te u fakatatau ki he hā ʻa e Puleʻanga ʻo e ʻOtua? ʻio, ko e hā nai ha fakatātā te u fai ʻaki ki ai? ʻOku hange ko ha foʻi tengaʻi mūsita; ʻa ia ʻi hono tūtūʻi ki he kelekele ʻoku siʻi ange ʻi he tenga kotoa pē ʻoku tō: kae hili hono tō, ʻoku ne ʻalu hake ʻo hoko ko e lahi ʻi he faʻahinga mohuku kai, pea ʻoku ne vaʻavaʻa lalahi; ko ia ʻoku lava ai ʻae fanga manupuna ʻo e ʻatā ke nofo ʻi hono malu.”​—Mk. 4:30-32.

⁴ ʻOku tau sio heni ʻi hono fakatātaaʻi ʻo e tupu ʻa e “Puleʻanga ʻo e ʻOtua” hangē ko ia ʻoku fakamoʻoniʻi ʻe he mafola ʻa e pōpoaki ʻo e Puleʻangá mo e tupu ʻo e fakatahaʻanga Kalisitiané mei he Penitekosi ʻo e 33 T.S. ʻo faai mai. Ko e tengaʻi mūsitá ko ha kiʻi tenga valevale ia ʻoku lava ke ne  fakafofongaʻi ha meʻa ʻoku mātuʻaki siʻisiʻi. (Fakafehoanaki mo e Luke 17:6.) Ka ʻi he faai atu ʻa e taimí, ʻe lava ke tupu ʻa e mohuku kai ko e mūsitá ʻo aʻu ki he māʻolunga ko e mita ʻe 3 ki he 5, pea vaʻavaʻa mālohi ʻo meimei hangē ia ha fuʻu ʻakaú.​—Mt. 13:31, 32.

 5. Ko e hā ʻa e tupu naʻe hokosia ʻe he fakatahaʻanga Kalisitiane ʻi he ʻuluaki senitulí?

⁵ Ko e tupu ʻo e fakatahaʻanga Kalisitiané naʻe kamata ia ʻi ha tuʻunga siʻisiʻi ʻi he 33 T.S. ʻi he taimi naʻe pani ai ʻa e toko 120 nai ʻaki ʻa e laumālie māʻoniʻoní. ʻI ha vahaʻa taimi mātuʻaki nounou, naʻe hoko ʻa e kiʻi fakatahaʻanga valevale ko eni ʻo e kau ākongá ʻo kau atu ki ai ha kau tui ʻe laui afe. (Lau ʻa e Ngāue 2:41; 4:4; 5:28; 6:7; 12:24; 19:20.) ʻI loto ʻi he hongofuluʻi taʻu ʻe tolu, ko e tokolahi ʻo e kau ngāue utu-taʻú ne mātuʻaki fakautuutu lahi ia ʻo lava ai ke pehē ʻe he ʻapositolo ko Paulá ki he fakatahaʻanga ʻi Kolosé kuo aʻu ʻa e ongoongo leleí ʻo “malangaʻaki ki he meʻa moʻui kotoa pe ʻi he lalo langi.” (Kol. 1:23) He tupu fakaofo moʻoni ia!

6, 7. (a) Ko e hā ʻa e tupu kuo hoko talu mei he 1914? (e) Ko e hā ha toe tupu ʻe hoko?

⁶ Talu hono fokotuʻu ʻo e Puleʻanga ʻo e ʻOtuá ʻi hēvani ʻi he 1914 mo e tupu ʻa e ngaahi vaʻa ʻo e “fuʻu ʻakau” mūsitá ʻo hulu atu ʻi he meʻa ne ʻamanekiná. Kuo mātā ʻe he kakai ʻa e ʻOtuá ʻa hono fakahoko moʻoni ʻo e kikite naʻe lēkooti ʻe ʻAiseá: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi.” (Ai. 60:22) Ko e kiʻi kulupu ko ia ʻo e kau paní naʻe kau ʻi he ngāue ʻo e Puleʻangá ʻi he kamataʻanga ʻo e senituli hono 20, ne halaʻatā ke nau lavelaveʻiloa ʻe aʻu ki he 2008, ko e kau Fakamoʻoni ʻe toko fitu miliona nai ʻe kau atu ʻi he ngāue ko ení ʻi he fonua ʻe 230 tupu. Ko ha tupu fakaofo moʻoni ia, ʻo ala fakahoa ia ki he talanoa fakatātā ʻa Sīsū ki he tengaʻi mūsitá!

⁷ Ka ʻoku tuʻu ai ʻa e tupú? ʻIkai. Ko e kakai ʻo e Puleʻanga ʻo e ʻOtuá ʻe faai atu pē ʻo nau kāpui ʻa e māmaní kotoa. Ko e kau fakafepaki kotoa pē ʻe ʻosi toʻo atu ia. ʻE ʻikai hoko eni ia ko ha ola ʻo e ngaahi feinga fakaetangatá ka koeʻuhi ko e kau mai ʻa e ʻEiki Hau ko Sihová ki he ngaahi meʻa ʻo e māmaní. (Lau ʻa e Taniela 2:34, 35.) Te tau toki sio ai ki hono fakahoko fakaʻosi ʻo ha toe kikite ʻe taha naʻe lēkooti ʻe ʻAisea: “ʻE fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.”​—Ai. 11:9.

 8. (a) Ko hai ʻoku fakafofongaʻi ʻe he fanga manupuna ʻi he talanoa fakatātā ʻa Sīsuú? (e) Ko e hā ʻoku maluʻi kitautolu mei ai naʻa mo e taimí ni?

⁸ ʻOku pehē ʻe Sīsū ko e fanga manupuna ʻo e ʻataá te nau lava ʻo nofo ʻi he malumalu ʻo e Puleʻanga ko ení. Ko e fanga manupuna ko ení ʻoku ʻikai ke nau fakafofongaʻi ʻa e ngaahi fili ko ē ʻo e Puleʻangá ʻoku nau feinga ke kai ʻa e tenga leleí, ʻo hangē ko ia ko e fanga manupuna ʻi he talanoa fakatātā ʻo e tangata tūtuuʻi ko ia naʻá ne fakamofele ʻa e tengá ʻi he faʻahinga kehekehe ʻo e kelekelé. (Mk. 4:4) Ka, ʻi he talanoa fakatātā ko ení ʻoku fakafofongaʻi ʻe he fanga manupuná ia ʻa kinautolu kau loto-totonu ʻoku kumi ki he maluʻanga ʻi loto ʻi he ʻātakai ʻo e fakatahaʻanga Kalisitiané. Naʻa mo e taimí ni, ko e faʻahingá ni ʻoku nau malu mei he ngaahi tōʻonga fakatupu ʻuli fakalaumālié mo e ngaahi ngāue taʻemaʻa ʻo e māmani fulikivanu ko ení. (Fakafehoanaki  mo e Aisea 32:1, 2.) ʻOku pehē hono fakatatau ʻe Sihova ʻa e Puleʻanga Faka-Mīsaiá ki ha fuʻu ʻakau ʻo ne fakahā fakaekikite: “ʻI he moʻunga taukakapa ʻo Isileli te u hunuki ia, pea te ne fakavaʻavaʻa atu, mo fai fua, pea te ne hoko ko e fuʻu sita langilangiʻia, pea ʻe nofo ʻi hono malu ʻa e ngaahi manupuna fulufulu kehekehe; ʻio ko e fuʻu malumalu ʻo hono ngaahi vaʻa te nau nofo ai.”​—Isi. 17:23.

Ko e Talanoa Fakatātā ʻo e Lēvaní

9, 10. (a) Ko e hā ʻa e poini naʻe fakamamafaʻi ʻe Sīsū ʻi he talanoa fakatātā ʻo e lēvaní? (e) ʻI he Tohi Tapú, ko e hā ʻoku faʻa fakafofongaʻi ʻe he lēvaní, pea ko e hā ʻa e fehuʻi fekauʻaki mo e lave ko ia ʻa Sīsū ki he lēvaní te tau lāulea ki aí?

⁹ Ko e tupú ʻoku ʻikai faʻa hā mai ia ki he sio ʻa e tangatá. ʻI heʻene talanoa fakatātā hono hokó, ʻoku fakamamafaʻi ai ʻe Sīsū ʻa e poini ko ení. ʻOkú ne pehē: “ʻOku tatau ʻa e Puleʻanga ʻo Hevani mo ha levani ʻa ia naʻe toʻo ʻe ha fefine, ʻo tuku fufū ʻi ha tatanga mahoaʻa ʻe tolu, kaeʻoua ke fai levani hono kotoa.” (Mt. 13:33) Ko e hā ʻoku fakafofongaʻi ʻe he lēvani ko ení, pea ʻoku anga-fēfē ʻene felāveʻi mo e tupu ʻo e Puleʻangá?

¹⁰ ʻI he Tohi Tapú, ʻoku faʻa ngāueʻaki ʻa e lēvaní ke fakafofongaʻi ʻa e angahala. Naʻe lave ʻa e ʻapositolo ko Paulá ki he lēvaní ʻi he founga ko ení ʻi heʻene lea fekauʻaki mo e tākiekina fakatupu mele ʻo ha taha angahala ʻi he fakatahaʻanga ʻi Kolinitō ʻo e kuohilí. (1 Kol. 5:6-8) Naʻe ngāueʻaki heni ʻe Sīsū ʻa e lēvaní ke fakafofongaʻi ʻa e tupu ʻo ha meʻa ʻoku ʻikai lelei?

11. Naʻe fēfē hono ngāueʻaki ʻo e lēvaní ʻi ʻIsileli ʻo e kuohilí?

¹¹ Ki muʻa ke tali ʻa e fehuʻi ko iá, ʻoku fiemaʻu ke tau ʻiloʻi ʻa e foʻi moʻoni tefito ʻe tolu. ʻUluakí, neongo naʻe ʻikai ke fakaʻatā ʻe Sihova ha lēvani lolotonga ʻa e taimi kātoanga ʻo e Pāsová, ʻi he ngaahi taimi kehe ʻe niʻihi naʻá ne hōifua ia ki he ngaahi feilaulau naʻe ʻi ai ha lēvani. Naʻe ngāueʻaki ʻa e lēvaní ʻo fekauʻaki mo e ngaahi feilaulau-ʻofá, ʻa ia naʻe foaki loto-lelei ai ʻe he taha feilaulaú ʻene feilaulaú ʻi he laumālie ʻo e fakafetaʻi ki he ngaahi tāpuaki lahi ʻa Sihová. Ko e keinanga ko ení ko e taimi ia ʻo e fiefia.​—Liv. 7:11-15.

12. Ko e hā ʻoku lava ke tau ako mei hono ngāueʻaki ʻe he Tohi Tapú ha ngaahi meʻa ke ne fakafofongaʻi ha meʻa kehe?

¹² Uá, neongo ʻe fakahuʻunga kovi nai ha meʻa he Tohi Tapú ʻi he taimi ʻe taha, ʻi ha toe taimi kehe ʻe ngāueʻaki ia ke fakafofongaʻi ha meʻa ʻoku lelei. Ko e fakatātaá, ʻi he 1 Pita 5:8, ʻoku fakatatau ai ʻa Sētane ki ha laione, ʻo fakatātaaʻi hono natula fakatuʻutāmaki mo fakailifiá. Ka ʻi he Fakahā 5:5, ʻoku fakatatau ai ʻa Sīsū ia ki ha laione​—“ko e Laione ʻoku mei he matakali ʻo Siuta.” ʻI he tuʻunga ki muí, ʻoku ngāueʻaki ai ʻa e laioné ko ha fakatātā ʻo e fakamaau loto-toʻa.

13. Ko e hā ʻoku hanga ʻe he talanoa fakatātā ʻa Sīsū ki he lēvaní ʻo fakahā fekauʻaki mo e tupu fakalaumālié?

¹³ Tolú, ʻi he talanoa fakatātā ʻa Sīsuú, naʻe ʻikai te ne pehē ʻoku hanga ʻe he lēvaní ʻo fakameleʻi ʻa e tatanga mahoaʻá kotoa, ʻo taʻeʻaonga ai. Ko ʻene lave pē ʻana ki hono ngaohi anga-maheni ʻo e maá. Naʻe fai ʻuhinga hono tānaki atu ʻe he uaifi-tauhi-ʻapí ʻa e lēvaní, pea naʻe ola lelei ai. Ko e lēvaní naʻe puli ia ʻi he tatanga mahoaʻá. Ko ia ai, ko e ngāue ʻa e lēvaní naʻe puli ia mei he mata ʻo e uaifí-tauhi-ʻapí. ʻOku fakamanatu mai heni ʻa e tangata ʻokú ne tūtuuʻi ʻa e tengá pea mohe ia he poʻulí. Naʻe pehē ʻe Sīsū naʻe “tupu pē ʻa e tenga ʻo ʻalu hake, kae mole ke mamaʻo haʻane ʻilo [ʻe he tangatá] pē ʻoku fakafēfē.” (Mk. 4:27) He founga faingofua moʻoni ia ke fakatātaaʻiʻaki ʻa e ngāue taʻehāmai ʻa e tupu  fakalaumālié! He ʻikai nai lava ke tau sio ki he tupú ʻi he kamatá, ka ʻe faai atu pē ʻo hā mahino hono ngaahi olá.

14. Ko e hā ʻa e tafaʻaki ʻo e ngāue fakamalangá ʻoku fakatātaaʻi ʻe he foʻi moʻoni ko ia ko e lēvaní ʻokú ne fakatupu ʻa e mahoaʻá kotoa?

¹⁴ ʻOku ʻikai ngata pē ʻi he taʻehāmai ʻa e tupu ko ení ki he mata fakaetangatá ka ʻoku toe hūhū takai holo. Ko e toe tafaʻaki eni ʻe taha ʻoku fakamamafaʻi ʻe he talanoa fakatātā ʻo e lēvaní. ʻOku fakatupu ʻe he lēvaní ʻa e mahoaʻá kotoa, kātoa ʻa e “tatanga mahoaʻa ʻe tolu.” (Luke 13:21) Hangē ko e lēvaní, ko e ngāue malangaʻi ʻo e Puleʻangá ʻa ia ʻokú ne ueʻi ʻa e tupu ko ení, kuo fakautuutu ia ʻo aʻu ki ha tuʻunga kuo malangaʻi ai ʻa e Puleʻangá “ʻo aʻu ki he ngataʻanga ʻo māmani.” (Ng. 1:8; Mt. 24:14) Ko ha monū maʻongoʻonga moʻoni ia ke kau atu ʻi he tokoni ki he tupu fakaʻulia ko eni ʻo e ngāue ʻo e Puleʻangá!

Ko e Kupenga Toho

15, 16. (a) Fakanounouʻi mai ʻa e talanoa fakatātā ʻo e kupenga tohó. (e) Ko e hā ʻoku fakafofongaʻi ʻe he kupenga tohó, pea ko e hā ʻa e tafaʻaki ʻo e tupu ʻo e Puleʻangá ʻoku fakahuʻunga ki ai ʻa e talanoa fakatātā ko ení?

¹⁵ Ko e meʻa ʻoku mahuʻinga ange ʻo ʻikai ko e tokolahi ʻo e faʻahinga ʻoku taku ko e kau ākonga ʻa Sīsū Kalaisí, ko e tuʻunga lelei ʻo e kau ākonga ko iá. ʻOku fakahuʻunga ʻe Sīsū ʻa e tafaʻaki ko eni ʻo e tupu ʻa e Puleʻangá ʻi he ʻene fai ha toe talanoa fakatātā ʻe taha, ko e talanoa fekauʻaki mo ha kupenga toho. Naʻá ne pehē: “ʻOku tatau foki ʻa e Puleʻanga ʻo Hevani mo ha uloa [pe kupenga toho] ne to ʻi tahi, ʻo ne haʻo ʻa e ngāhi faʻahinga ika kotoa.”​—Mt. 13:47.

¹⁶ Ko e kupenga tohó, ʻa ia ʻokú ne fakafofongaʻi ʻa e ngāue malangaʻi ʻo e Puleʻangá, ʻokú ne haʻo ʻa e ika ʻo e faʻahinga kotoa pē. ʻOku hoko atu ʻa Sīsū ʻo pehē: “Pea ʻi heʻene fonu [ʻa e kupenga tohó] naʻa nau toho hake ki he matāʻoneʻone, ʻo nau nofo hifo ʻo faʻo kato ʻa e ʻaonga, kae liʻaki ʻa e kovi [pe ʻikai ʻaongá]. ʻE pehe ʻi he fakaʻosi ʻo mamani: ʻe ʻalu atu ʻa e kau angelo, pea te nau vaheʻi mai ʻa e kakai kovi mei he lotolotonga ʻo e failelei, pea te nau laku kinautolu ki he fonise afi. Ko e potu ia ʻe toki hoko ai ʻa e tangi mo e fengaiʻitaki ʻo e nifo.”​—Mt. 13:48-50.

17. Ko e vahevaheʻi ko ia ʻoku lave ki ai ʻi he talanoa fakatātā ʻo e kupenga tohó ko e lave ia ki he vahaʻa taimi fē?

¹⁷ Ko e lave koā ʻa e vahevaheʻi ko ení ki he fakamāuʻi fakaʻosi ʻo e sipí mo e kosí ʻa ē naʻe pehē ʻe Sīsū ʻe hoko ʻi he taimi te ne ʻi hono lāngilangí aí? (Mt. 25:31-33) ʻIkai. Ko e fakamaau fakaʻosi ko iá ʻe hoko ia ʻi he haʻu ʻa Sīsū lolotonga ʻa e mamahi lahí. Ko hono kehé, ko e vahevaheʻi ia ko eni ʻoku lave ki ai ʻa e talanoa fakatātā ʻo e kupenga tohó ʻoku hoko ia lolotonga ʻo e “fakaʻosi ʻo mamani.” b Ko e taimi eni ʻa ē ʻoku tau lolotonga moʻui aí​—ʻa e ngaahi ʻaho ʻoku taki atu ki he mamahi lahí. Ko ia ʻoku anga-fēfē leva hono fai ʻo e ngāue vahevaheʻí ʻi he taimi ní?

18, 19. (a) ʻOku fēfē ʻa e ngāue vahevaheʻi ʻoku lolotonga fakahoko he taimi ní? (e) Ko e ha ʻa e sitepu ʻoku totonu ke laka ai ʻa kinautolu kau loto-totonú? (Sio foki ki he fakamatala ʻi lalo ʻi he peesi 21.)

¹⁸ ʻOku ʻi ai moʻoni ʻa e laui miliona ʻo e ika fakaefakatātā mei he tahi ʻo e faʻahinga  ʻo e tangatá kuo tohoaki ki he fakatahaʻanga ʻa Sihova ʻi onopōní. Ko e niʻihi kuo nau ʻalu ki he Fakamanatú, ko e niʻihi kuo omi ki heʻetau ngaahi fakatahá, pea ko e niʻihi ʻoku nau fiefia ke ako ʻa e Tohi Tapú. Ka ʻoku fakamoʻoniʻi kotoa ʻa e fakahingá ni ko e kau Kalisitiane moʻoni? Mahalo pē ko kinautolú ʻoku “toho hake ki he matāʻoneʻone,” ka ʻoku tala mai ʻe Sīsū ko kinautolu pē ʻoku “ʻaonga” ʻe faʻo kató, ʻa ia ʻokú ne fakafofongaʻi ʻa e ngaahi fakatahaʻanga Kalisitiané. Ka ko e ika ʻoku ʻikai ʻaongá ʻoku liʻaki, pea ʻe iku atu ia ʻo laku ki ha fōnise afi fakaefakatātā ko hono ʻuhingá ko e fakaʻauha ʻi he kahaʻú.

¹⁹ Ka ko e ika ʻoku ʻikai ʻaongá, ʻa e tokolahi ko ē naʻe ako ki muʻa ʻa e Tohi Tapú mo e kakai ʻa Sihová kuo tuku ʻenau akó. Ko e niʻihi ne fanauʻi mai ʻe ha ongo mātuʻa Kalisitiane kuo ʻikai ʻaupito te nau fie hoko ko e kau muimui molomolo muivaʻe ʻo Sīsū. Kuo nau taʻeloto ke fai ha fili ke tauhi ʻa Sihova, pe hili haʻanau tauhi kiate ia ʻi ha taimi kuo tuku leva ʻenau fai peheé. c (Isi. 33:32, 33) Ka ʻoku mātuʻaki mahuʻinga ke hanga ʻe he faʻahinga ʻoku loto-totonú ʻo fakaʻatā kinautolu ke faʻo ki he ngaahi fakatahaʻanga hangē ha kató ki muʻa ʻi he ʻaho fakamaau fakaʻosí pea nofo maʻu ʻi ha feituʻu malu.

20, 21. (a) Ko e hā kuo tau ako mei hono fakamanatu ʻo e ngaahi talanoa fakatātā ʻa Sīsū fekauʻaki mo e tupú? (e) Ko e hā ʻokú ke fakapapau ke faí?

²⁰ Ko ia, ko e hā kuo tau ako mei heʻetau fakamanatu nounou ko eni ʻo e ngaahi talanoa fakatātā ʻa Sīsū fekauʻaki mo e tupú? ʻUluakí, hangē ko e tupu ʻa e tengaʻi mūsitá, kuo ʻi ai ʻa e tupu fakamanavahē ʻi he ngaahi meʻa ʻo e Puleʻangá ʻi heni ʻi māmani. Heʻikai lava taʻofi ʻe ha meʻa ʻa e mafola ʻa e ngāue ʻa Sihová! (Ai. 54:17) Tānaki atu ki aí, kuo tokonaki mai ha maluʻanga fakalaumālie kia kinautolu kuo kumi “ke nofo ʻi hono malu [ʻo e fuʻu mūsitá].” Uá, ko e ʻOtuá ia ʻokú ne ʻai ia ke tupú. Hangē pē ko e puli ʻa e hūhū ʻa e lēvaní ʻi he mahoaʻá kotoa, ko e tupu ko ení kuo ʻikai faʻa ala ʻiloʻi ia mo mahinoʻi, ka ʻoku mafola pē ia! Tolú, ʻoku ʻikai ko kinautolu kotoa pē ʻoku nau tali iá kuo fakamoʻoniʻi ʻoku nau ʻaongá. Ko e niʻihi kuo hangē ko e ika ʻoku ʻikai ʻaonga ko ē ʻi he talanoa fakatātā ʻa Sīsuú.

²¹ Ka ko e meʻa fakalototoʻa moʻoni foki, ke sio ki he faʻahinga tokolahi ʻoku ʻaonga kuo tohoaki mai ʻe Sihova! (Sione 6:44) Kuo iku eni ki ha tupu fakatuputupulangi ʻi he fonua ki he fonua. Ko e lāngilangi kotoa pē ki he tupu ko ení ʻoku ʻa e ʻOtua ko Sihová ia. ʻI he fakamoʻoni ki he meʻá ni, ʻoku totonu ke ueʻi ai ʻa e tokotaha taki taha ʻo kitautolu ke talangofua ki he ekinaki ko ia ne hiki he laui senituli kuohilí: “ʻI he pongipongi to hoʻo tenga, . . . he ʻoku ʻikai te ke ʻilo pe ko e fe ʻe tuʻumalie [pe tupú], ʻa é pe ko é; pea naʻa fakatou lelei.”​—Koh. 11:6.

[Fakamatala ʻi lalo]

ʻE Fēfē Haʻo Tali?

• Ko e hā ʻoku hanga ʻe he talanoa fakatātā ʻa Sīsū fekauʻaki mo e tengaʻi mūsitá ʻo akoʻi mai fekauʻaki mo e tupu ʻa e Puleʻangá mo e malu fakalaumālié?

• Ko e hā ʻoku hanga ʻe he lēvani ʻi he talanoa fakatātā ʻa Sīsuú ʻo fakafofongaʻí, pea ko e hā ʻa e moʻoni fekauʻaki mo e tupu ʻo e Puleʻangá ʻoku fakamamafaʻi ʻe Sīsuú?

• Ko e hā ʻa e tafaʻaki ʻo e tupu ʻo e Puleʻangá ʻoku fakamahino mai ʻi he talanoa fakatātā ʻo e kupenga tohó?

• ʻE lava fēfē ke tau fakapapauʻi ke kei nofo maʻu ai pē ʻi he haʻohaʻonga ʻo e faʻahinga kuo ‘faʻo kató’?

[Fehuʻi ki he Ako]

[Fakatātā ʻi he peesi 18]

Ko e hā ʻoku hanga ʻe he talanoa fakatātā fekauʻaki mo e tengaʻi mūsitá ʻo akoʻi mai fekauʻaki mo e tupu ʻa e Puleʻangá?

[Fakatātā ʻi he peesi 19]

Ko e hā ʻoku tau ako mei he talanoa fakatātā ʻo e lēvaní?

[Fakatātā ʻi he peesi 21]

Ko e hā ʻoku fakatātaaʻi ʻe hono vahevaheʻi ʻo e ika ʻoku ʻaongá mei he ika ʻoku ʻikai ʻaongá?