Ko Hono Ikuʻi ʻa e Ngaahi Faingataʻa ʻi he Ngāue Fakafaifekau Fale-ki-he-Falé
Ko Hono Ikuʻi ʻa e Ngaahi Faingataʻa ʻi he Ngāue Fakafaifekau Fale-ki-he-Falé
“Naʻa mau langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.”—1 TES. 2:2, NW.
1. Ko e hā ʻa e ngaahi pole naʻe fehangahangai mo Selemaiá, pea naʻe malava fēfē ke ne ikuʻi ia?
KO Selemaiá ko ha tokotaha ia naʻá ne maʻu ʻa e ngaahi ongoʻi tatau mo kitautolu. ʻI hono fakahaaʻi ʻe Sihova kiate ia ʻa e fekau ke ne hoko ko e “palofita ki he ngaahi puleʻanga,” naʻá ne kalanga: “ʻOiaue, Atonai Sihova, meʻa mai ʻoku ʻikai te u poto ʻi he lea: he ko e tamasiʻi pe au.” Kae kehe, ʻi heʻene falala kia Sihová, naʻá ne tali ʻa e vāhenga-ngāué. (Sel. 1:4-10) Naʻe fekuki ʻa Selemaia ʻo laka hake ʻi he taʻu ʻe 40 mo e taʻemahuʻingaʻiá, taʻetali leleí, manukí pea aʻu ki he ngaohikoviʻi fakaesino. (Sel. 20:1, 2) ʻI he taimi ʻe niʻihi, naʻá ne ongoʻi foʻi ai. Ka neongo ia, naʻá ne kītaki ʻi hono talaki ʻo ha pōpoaki taʻemanakoa ki ha fuʻu kakai taʻefiefanongo. ʻI he mālohi ʻo e ʻOtuá, naʻe lavaʻi ai ʻe Selemaia ʻa e meʻa naʻe ʻikai mei lava ke ne fai ʻiate ia pē.—Lau ʻa e Selemaia 20:7-9.
2, 3. ʻOku anga-fēfē ʻa e fehangahangai ʻa e kau sevāniti ʻa e ʻOtuá he ʻaho ní mo e ngaahi pole meimei tatau mo ia naʻe fehangahangai mo Selemaiá?
2 Ko e tokolahi ʻo e kau sevāniti ʻa e ʻOtuá he ʻaho ní ʻoku lava ke nau mahinoʻi ʻa e ngaahi ongoʻi ʻa Selemaiá. ʻI he fakakaukau atu ki he malava ke malanga fale ki he falé, naʻe fakakaukau ki muʻa ha niʻihi ʻo kitautolu, ‘ko e meʻa eni ia heʻikai ʻaupito te u lava ʻe au ʻo fai.’ Ka, ʻi heʻetau ʻiloʻi ko e finangalo ia ʻo Sihová ke tau fanongonongo ʻa e ongoongo leleí, naʻa tau ikuʻi ai ʻetau manavasiʻí pea tau hoko ʻo femoʻuekina ʻi he malangá. Naʻa mo ia, ko e tokolahi ʻo kitautolu kuo tau fehangahangai mo e ngaahi tuʻunga ʻi heʻetau moʻuí naʻá ne ʻai ke faingataʻa nai ʻi ha taimi, ke hokohoko atu ai ʻa e malangá. ʻOku ʻikai ko ha toe loi ko e meʻa faingataʻa ia ke kamata malanga fale ki he fale pea ke hokohoko atu ʻa e malangá ke aʻu ki he ngataʻangá.—Mt. 24:13.
3 Fēfē kapau kuó ke ako ʻa e Tohi Tapú mo e Kau Fakamoʻoni ʻa Sihová pea maʻu ʻa e ngaahi fakataha ʻa e fakatahaʻangá ʻi ha taimi ka ʻokú ke toumoua ke kamata malanga fale ki he fale? Pe fēfē kapau ko ha Fakamoʻoni ʻosi papitaiso koe ʻokú ke faingataʻaʻia ke kau ʻi he ngāue fale ki he falé, neongo ʻokú ke malava fakaesino ke fai pehē? ʻIlo pau ko e kakai ʻo e puipuituʻa kehekehe ʻoku nau ikuʻi ʻa e ngaahi faingataʻa ʻo e ngāue fakafaifekau fale-ki-he-falé. ʻI he tokoni ʻa Sihová te ke lava pē mo koe.
Langaʻi ʻa e Loto-Toʻa
4. Ko e hā naʻá ne ʻai ke malava ʻa e ʻapositolo ko Paulá ke leaʻaki ai ʻa e ongoongo leleí ʻi he loto-toʻá?
4 ʻOku ʻikai ha veiveiua ʻokú ke ʻiloʻi ko e ngāue fakamalanga ʻi māmani lahí ʻoku lavaʻi ia, ʻo ʻikai ʻi he mālohi pe poto ʻo e tangatá, ka ʻi he laumālie ʻo e ʻOtuá. (Sak. 4:6) ʻOku toe hoko moʻoni ia ʻi he ngāue fakafaifekau ʻa e kau Kalisitiane tāutahá. (2 Kol. 4:7) Fakakaukau angé ki he ʻapositolo ko Paulá. ʻI he manatu ki ha taimi ʻa ia naʻe ngaohikovia ai ia mo hono kaungā misinalé ʻe he kau fakafepakí, naʻá ne tohi: “Hili ʻema ʻuluaki mamahi mo ngaohikovia . . . ʻi Filipaí, naʻá ma langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.” (1 Tes. 2:2, NW; Ng. 16:22-24) Heʻikai haʻatau teitei fakakaukau ʻe ai ha tangata malanga faivelenga hangē ko Paulá ʻe faifai pea hoko ʻi he taimi ʻe niʻihi ʻa e malangá ko ha fāinga kiate ia. Kae kehe, hangē pē ko kitautolú kotoa, naʻe pau ke falala ʻa Paula kia Sihova koeʻuhi ke ne leaʻaki ai ʻa e ongoongo leleí ʻi he loto-toʻa. (Lau ʻa e Efeso 6:18-20.) ʻE lava fēfē ke tau faʻifaʻitaki ki he faʻifaʻitakiʻanga ʻa Paulá?
5. Ko e hā e founga ʻe taha ʻe lava ke tau langaʻi ai ʻa e loto-toʻa ke malangá?
5 Ko e founga ʻe taha ʻoku tau langaʻi ai ʻa e loto-toʻa ke malangá ko e fakafou he lotu. Naʻe pehē ʻe ha tāimuʻa: “ʻOku ou lotu koeʻuhi ke u lava ʻo lea ʻi he loto-falala, lotu ke u lava ʻo aʻu ki he loto ʻo e kakaí, pea lotu koeʻuhi ke u lava ʻo maʻu ʻa e fiefia ʻi he ngāue fakafaifekaú. He ko e moʻoni, ko e ngāue eni ʻa Sihova, ʻo ʻikai ko haʻatautolu, ko ia ai heʻikai lava ke tau fai ha meʻa ʻo taʻekau ai ʻene tokoní.” (1 Tes. 5:17) Ko kitautolu hono kotoa ʻoku fiemaʻu ke tau lotu hokohoko ʻo kole ʻa e tokoni ʻa e laumālie māʻoniʻoni ʻo e ʻOtuá ke tau malanga ai ʻi he loto-toʻa.—Luke 11:9-13.
6, 7. (a) Ko e hā ʻa e vīsone naʻe maʻu ʻe ʻIsikelí, pea ko e hā hono ʻuhingá? (e) Ko e hā ʻa e lēsoni ʻoku ʻomai ʻi he vīsone ʻa ʻIsikelí ki he kau sevāniti ʻa e ʻOtuá he ʻaho ní?
6 Ko e tohi Isikelí ʻoku fakaeʻa ai ʻa e toe meʻa kehe ʻa ia ʻe lava ke ne tokoniʻi kitautolu ke tau lea ai ʻi he loto-toʻá. ʻI ha vīsone, naʻe ʻoange ai ʻe Sihova kia ʻIsikeli ha takainga tohi kuo hiki ʻi he ongo tafaʻakí fakatouʻosi ʻa e “tangilaulau, mo e mapuhoi, mo e ʻoiaue” pea tala ange kiate ia ke ne kai ia, ʻo ne pehē: “Hakoʻi-tangata, fafanga ho kete, mo fakafonu ho toʻotoʻonga ʻi he takainga ni ʻa ia ʻoku ou ʻatu.” Naʻe ʻuhinga ki he hā ʻa e vīsone ko ení? Naʻe fiemaʻu ke makupusi kakato ʻe ʻIsikeli ʻa e pōpoaki naʻe pau ke ne fakahoko atú. Naʻe fiemaʻu ke hoko ia ko hono kakano, hangē ko e laú, ke ne ueʻi ʻa ʻene ngaahi ongoʻi lolotó. ʻOku hoko atu ʻa e palōfitá ʻo fakamatala: “Pea u kai ia, pea ko ʻene hoko ki hoku ngutu naʻe tatau mo e honi melie.” Ko hono talaki ʻa e pōpoaki ʻa e ʻOtuá ki he kakaí ko ha meʻa ifo—ʻo hangē ko hono ʻahiʻahiʻi ʻo e honé—kia ʻIsikeli. Naʻá ne ongoʻi ko ha monū māʻolunga ia ke fakafofongaʻi ʻa Sihova pea ke fakahoko ʻa e ngāue ko eni kuo ʻomai ʻe he ʻOtuá, neongo naʻe ʻuhinga iá ko hono fakahoko ha pōpoaki mālohi ki he kakai taʻefiefanongo.—Lau ʻa e Isikeli 2:8–3:4, 7-9.
7 ʻOku ʻi he vīsone ko ení ha lēsoni mahuʻinga ki he kau sevāniti ʻa e ʻOtuá he ʻaho ní. Ko kitautolu foki ʻoku tau maʻu ha pōpoaki mālohi ke fakahoko atu ki he kakai ʻa ia ʻoku ʻikai te nau houngaʻia maʻu pē ʻi heʻetau ngaahi feingá. Ke hokohoko atu ʻetau vakai ki he ngāue fakafaifekau faka-Kalisitiané ko ha monū kuo ʻomai mei he ʻOtuá, kuo pau ke fafangaʻi lelei fakalaumālie kitautolu. Ko e ngaahi tōʻonga ako fakatamulu pe tōmokosí heʻikai feʻunga ia kiate kitautolu ke tau makupusi kakato ai ʻa e Folofola ʻa e ʻOtuá. ʻE lava ke ke fakaleleiʻi ʻa e tuʻunga pe tōmokosi ʻo hoʻo lau Tohi Tapu fakafoʻituituí mo e ako Tohi Tapú? ʻE lava ke ke toutou fakalaulauloto lahi ange ki he meʻa ʻokú ke laú?—Sāme 1:2, 3.
Kamata ʻa e Fetalanoaʻaki Fakatohitapú
8. Ko e hā ʻa e founga kuó ne tokoniʻi ʻa e kau malanga ʻe niʻihi ʻo e Puleʻangá ke nau kamata ha ngaahi fetalanoaʻaki Fakatohitapu ʻi he ngāue fakafaifekau fale-ki-he-falé?
8 Ki he kau malanga tokolahi, ko e konga faingataʻa taha ʻo e ngāue fakafaifekau fale-ki-he-falé ko e kamata ʻo e fetalanoaʻaki mo e tokotaha-ʻapí. Ko ia ai, ʻi he ngaahi feituʻu ʻe niʻihi ko ha pole ia ke kamata ha fetalanoaʻaki. ʻOku ongoʻi fiemālie ange ʻa e kau malanga ʻe niʻihi ʻi heʻenau lea ki he kakaí ʻi he matapaá kapau ʻoku kamata ʻe nau tuʻuakí ʻaki ʻa e ngaahi lea siʻisiʻi kuo filifili lelei pea ʻoange leva ki he tokotaha-ʻapí ha tuleki, hangē ko ia ʻoku fokotuʻu ʻi he puha ʻoku ʻoatu hení. Ko e kaveinga ʻo e tulekí pe ko hono fakatātā fakalanú te ne puke nai ʻa e tokanga ʻa e tokotaha-ʻapí, ʻo fakaʻatā ai ke tau lave nounou ki he taumuʻa ʻo ʻetau ʻaʻahí pea ke langaʻi ai ha fehuʻi. Ko e ʻai ke kiʻi kehe ʻo e founga ko ení ko hono fakahaaʻi ki he tokotaha-ʻapí ʻa e ngaahi tuleki kehekehe ʻe tolu pe fā pea fakaafeʻi ia ke ne fili ʻa e taha ʻokú ne mahuʻingaʻia aí. Ko e moʻoni, ko ʻetau taumuʻá ʻoku ʻikai koeʻuhi pē ke tufaki ʻa e ngaahi tulekí pe ke ngāueʻaki ia ʻi he matapā kotoa pē ka ke kamata ha fetalanoaʻaki Fakatohitapu ʻa ia ʻe taki atu ai ki he ngaahi ako Tohi Tapu.
9. Ko e hā ʻoku mahuʻinga ai ʻa e teuteu leleí?
9 Ko e hā pē ʻa e founga ʻokú ke ngāueʻakí, ko e teuteu leleí te ne tokoniʻi koe ke ke mateuteu mo faivelenga ʻi he ngāue fakafaifekau fale-ki-he-falé. Naʻe pehē ʻe he tāimuʻa ʻe taha: “ʻOku ou maʻu ʻa e fiefia lahi ange kapau ʻoku ou teuteu lelei. ʻOkú ne ʻai au ke u fie fakahāhā ʻeku tuʻuakí.” Naʻe pehē ʻe he toe tāimuʻa ʻe taha, “ʻI heʻeku ʻai ke u maheni mo e ʻū tohi ʻoku teu ke u tuʻuakí, ʻoku ou hoko ai ʻo faivelenga ʻi hono ngāueʻakí.” Lolotonga ʻoku ʻi ai ʻa e ʻaonga ʻo hono fakamanatu fakalongolongo ʻa e meʻa te ke leaʻakí, ʻoku ʻiloʻi ʻe he tokolahi ʻoku ʻaonga lahi ange ke ʻahiʻahiʻi leʻo-lahi ʻenau tuʻuakí. Ko e fai peheé ʻoku tokoniʻi ai kinautolu ke ʻoatu ʻenau lelei tahá kia Sihova.—Kol. 3:23; 2 Tim. 2:15.
10. Ko e hā ʻe lava ke fai ke ʻai ai ʻa e ngaahi fakataha ki he ngāue fakamalangá ke ola lelei mo ʻaongá?
10 Ko e ngaahi fakataha ʻaonga ki he ngāue fakamalangá ʻoku tokoni ia ke tau hoko ai ʻo ola lelei mo fiefia ʻi he ngāue fakafaifekau fale-ki-he-falé. Kapau ʻoku lave hangatonu ʻa e konga tohi fakaʻahó ki he ngāue fakamalangá, ʻe lau nai ia pea lāulea nounou ki ai. Kae kehe, ko e tokoua ʻokú ne fai ʻa e fakataha ki he ngāue fakamalangá ʻoku totonu ke ne vaheʻi ʻa e taimi feʻunga ke lāulea ai pe fakatātaaʻi ha tuʻuaki faingofua ʻa ia ʻoku feʻungamālie ki he feituʻu ngāué pe ke lāulea ai ki ha fakamatala ʻaonga kehe ʻa ia ʻe lava ke ngāueʻaki ʻi he ngāue fakafaifekaú ʻi he ʻaho ko iá. ʻE teuʻi lahi ange ʻi he meʻa ko ení ʻa e faʻahinga ʻoku ʻi aí ke nau fai ha fakamoʻoni ola lelei. ʻI he teuteu lelei ki muʻá, ko e kau mātuʻá mo e niʻihi kehe ʻoku nau fai ʻa e ngaahi fakataha ko ení ʻe lava ke nau fakahoko ai eni pea kei fakaʻosi ʻa e fakatahá ʻi loto ʻi he taimi kuo vaheʻi ki aí.—Loma 12:8.
Ko e Mālohi ʻo e Fanongó
11, 12. ʻOku lava fēfē ke tokoniʻi kitautolu ʻe he fanongo kaungāongoʻí ke aʻu ai ki he kakaí mo e ongoongo leleí? ʻOmai ha fakatātā.
11 ʻOku ʻikai ko e teuteu leleí pē ka ko ha mahuʻingaʻia lahi fakafoʻituitui ʻi he niʻihi kehé ʻokú ne tokoniʻi kitautolu ke kamata ha ngaahi fetalanoaʻaki Fakatohitapu pea aʻu ai ki he kakaí ʻi he ngāue fakafaifekaú. Ko e founga ʻe taha ʻoku tau fakahāhā ai ʻa e mahuʻingaʻia ko iá ko e anga ʻo ʻetau fanongó. Naʻe pehē ʻe ha ʻovasia fefonongaʻaki: “Ko e anga-kātaki mo fakahāhā ha loto-lelei ke fanongo ki he kakaí ʻoku ʻi ai hono mālohi fakaofo ke ne tohoakiʻi mai ai kinautolu pea ko ha fakahāhā fisifisimuʻa ia ʻo e mahuʻingaʻia māfana fakafoʻituitui.” Ko e fanongo kaungāongoʻí ʻe lava ke hoko ko e kī ia ʻokú ne fakaava ʻa e loto ʻo ha tokotaha-ʻapi, ʻo hangē ko ia ʻoku fakahaaʻi ʻi he hokosia hono hokó.
12 ʻI ha tohi naʻe pulusi ke lau ʻe he kakaí ʻi he nusipepa Le Progrès, ʻo Saint-Étienne ʻi Falanisē, naʻe fakamatalaʻi ai ʻe ha fefine ʻa e ʻaʻahi ʻa e ongo meʻa ʻe toko ua ʻa ia naʻá na tukituki ʻi hono matapaá ʻikai fuoloa mei heʻene faingataʻaʻia ʻi he mole fakamamahi ʻa ʻene kiʻi taʻahine māhina tolu ʻi he maté. “Naʻá ku ʻiloʻi he taimi ko iá ko e ongo Fakamoʻoni ʻa Sihova kinaua,” ko ʻene tohí ia. “Naʻá ku mateuteu ke fekau lelei pē ke na ō, ka naʻá ku fakatokangaʻi atu ha polosiua naʻá na tuʻuaki. Naʻe fekauʻaki ia mo e ʻuhinga ʻoku fakangofua ai ʻe he ʻOtuá ʻa e faingataʻá. Ko ia naʻá ku fakaafeʻi ai kinaua ki loto fakataha mo e taumuʻa ke fakahalaki ʻena ngaahi fakaʻuhingá. . . . Naʻe nofo mai ʻa e ongo Fakamoʻoní ʻo laka siʻi ʻi he houa ʻe tahá. Naʻá na fanongo kiate au fakataha mo e kaungāongoʻi lahi, pea ʻi he taimi naʻá na mavahe aí, naʻá ku ongoʻi sai ange ʻaupito ʻou loto ai ke na toe ʻaʻahi mai.” (Loma 12:15) Naʻe faai atu pē ʻo tali ʻe he fefiné ni ha ako Tohi Tapu. ʻOku lava ke ʻiloʻi ko e meʻa naʻá ne manatuʻi fekauʻaki mo e ʻuluaki ʻaʻahi ko iá, ʻoku ʻikai ko e meʻa naʻe leaʻaki ʻe he ongo Fakamoʻoní, ka ko e anga ʻo ʻena fanongó.
13. ʻE lava fēfē ke tau feʻunuaki ʻetau tuʻuaki ʻo e ongoongo leleí ki he faʻahinga tāutaha ʻoku tau fetaulaki mo iá?
13 ʻI he taimi ʻoku tau fanongo kaungāongoʻi aí, ko hono moʻoní ʻoku tau fakaʻatā ai ʻa e kakaí ke nau tala mai ʻa e ʻuhinga ʻoku nau fiemaʻu ai ʻa e Puleʻangá. ʻOku ʻai ʻe he meʻá ni kitautolu ki he tuʻunga lelei ʻaupito ange ke vahevahe atu ai ʻa e ongoongo leleí kiate kinautolu. Ngalingali kuó ke ʻiloʻi ko e kau ʻevangeliō ola leleí ʻoku meimei ko e kau fanongo pōtoʻi. (Pal. 20:5) ʻOku nau fakahāhā ha mahuʻingaʻia moʻoni ʻi he kakai ʻoku nau fetaulaki ʻi he ngāue fakafaifekaú. ʻOku nau hiki ʻo ʻikai ngata pē ʻi honau hingoá mo e tuʻasilá kae toe pehē foki ki he ngaahi meʻa ʻoku nau mahuʻingaʻia aí mo ʻenau ngaahi fiemaʻú. ʻI he taimi ʻoku fakahāhā ai ʻe ha taha ha hohaʻa ki ha meʻa tefito, ʻoku nau fai ʻa e fekumi pea foki vave ki ai ke vahevahe ʻa e meʻa kuo nau ʻiló. ʻI he hangē ko e ʻapositolo ko Paulá, ʻoku nau feʻunuʻaki ʻenau tuʻuaki ʻo e pōpoaki ʻo e Puleʻangá ki he faʻahinga tāutaha ʻoku nau fetaulaki mo iá. (Lau ʻa e 1 Kolinito 9:19-23.) Ko e mahuʻingaʻia loto-moʻoni peheé ʻoku tohoakiʻi mai ai ʻa e kakaí ki he ongoongo leleí pea tapua atu ai ʻi he tuʻunga fakaofo ʻa e “aloofa ogogofua a ho tau Otua.”—Luke 1:78, PM.
Tauhi Maʻu ha Fakakaukau Pau
14. ʻI heʻetau fakahoko ʻetau ngāue fakafaifekaú, ʻe lava fēfē ke tau tapua atu ʻa e ngaahi ʻulungāanga ʻo Sihová?
14 Kuo fakangeingeiaʻi ʻe Sihova kitautolu ʻi hono ʻomai ʻa e tauʻatāina ke filí. Neongo ko ia ʻa e ʻOtua Māfimafi-Aoniú, ʻoku ʻikai te ne fakamālohiʻi ha taha ke tauhi kiate ia ka ʻokú ne ongoʻi ʻa e kakaí makatuʻunga ʻi he ʻofa, ʻo tāpuakiʻi ʻa e faʻahinga ʻoku nau tali ʻi he houngaʻia ʻa ʻene ngaahi tokonaki fakaofó. (Loma 2:4) ʻI he tuʻunga ko ʻene kau faifekaú, ʻoku totonu ke tau mateuteu ke tuʻuaki ʻa e ongoongo leleí ʻi ha founga ʻoku tuha mo hotau ʻOtua mohu mēsí ʻi he taimi taki taha ʻoku tau fai ai ha fakamoʻoní. (2 Kol. 5:20, 21; 6:3-6) ʻI he taumuʻa ko iá, ʻoku fiemaʻu ke tau tauhi maʻu ha fakakaukau pau ki he kakai ʻi hotau feituʻu ngāué. Ko e hā ʻe lava ke ne tokoniʻi kitautolu ke tau lavaʻi ai ʻa e tuʻunga faingataʻa ko ení?
15. (a) Naʻe fakahinohinoʻi ʻe Sīsū ʻa ʻene kau ʻapositoló ke nau fai ʻa e hā kapau ʻe talitekeʻi ʻe he kakaí ʻa e pōpoakí? (e) Ko e hā ʻe lava ke ne tokoniʻi kitautolu ke tau tokangataha ki hono kumi ʻa e faʻahinga tāú?
15 Naʻe fakahinohinoʻi ʻe Sīsū ʻa hono kau muimuí ke ʻoua te nau hoko ʻo hohaʻa tōtuʻa kapau ʻe talitekeʻi ʻe he niʻihi ʻa e pōpoakí ka ʻi hono kehé ke nau tokangataha ki hono kumi ʻa e faʻahinga tāú. (Lau ʻa e Mātiu 10:11-15.) Ko hono fokotuʻu ha ngaahi taumuʻa iiki kae ala aʻusiá ʻe lava ke ne tokoniʻi kitautolu ke tau fai eni. ʻOku fakatatau ʻe ha tokoua ʻe taha ʻa ia tonu ki ha tokotaha kumi koloa. Ko ʻene motó eni, “ʻOku ou fakatuʻotuʻa atu te u maʻu ha koula ʻi ha taimi he ʻahó ni.” Ko e taumuʻa ʻa ha tokoua ʻe taha “ke feʻiloaki mo ha tokotaha lelei ʻi he uike taki taha pea toe foki ʻi loto ʻi ha ngaahi ʻaho siʻi ke fakatupulekina ʻa e mahuʻingaʻiá.” ʻOku feinga ʻa e kau malanga ʻe niʻihi ke vahevahe atu ʻa e konga Tohi Tapu ʻe taha pe lahi ange ki he tokotaha-ʻapi taki taha ʻo ka malava. Ko e hā ʻa e taumuʻa ala aʻusia ʻe lava ke ke fokotuʻu maʻaú?
16. Ko e hā ʻa e ngaahi ʻuhinga ʻoku tau maʻu ke hanganaki malanga aí?
16 Ko e lavameʻa ʻo e ngāue fakafaifekau fale-ki-he-falé ʻoku ʻikai fakatuʻunga ʻataʻatā ia ʻi he tali ʻa e kakai ʻi he feituʻu ngāué. Ko e moʻoni, ko e ngāue fakamalangá ʻoku fakahoko ai ha ngafa mātuʻaki mahuʻinga ʻi hono fakahaofi ʻo e faʻahinga loto-totonú, ka ʻoku toe fakahoko ai ʻa e ngaahi taumuʻa mahuʻinga kehe. ʻOku ʻomai ʻe he ngāue fakafaifekau faka-Kalisitiané ha faingamālie ke tau fakahāhā ai ʻetau ʻofa kia Sihová. (1 Sione 5:3) ʻOkú ne ʻai ke tau malava ʻo kalofi ʻa e halaia ʻi he totó. (Ng. 20:26, 27) ʻOkú ne fakatokanga ki he kau fakaʻotuamaté “kuo hokosia ʻa e taimi oʻene fakamāu [ʻa e ʻOtuá].” (Fkh. 14:6, 7) Hiliō he meʻa kotoa, fakafou ʻi hono malangaʻi ʻa e ongoongo leleí, ʻoku fakahīkihikiʻi ai ʻa e huafa ʻo Sihová ʻi māmani kotoa. (Sāme 113:3) Ko ia ai, pe ʻoku fanongo ʻa e kakaí pe ʻikai, kuo pau ke tau hanganaki fakaongo atu ʻa e pōpoaki ʻo e Puleʻangá. Ko e moʻoni, ko ʻetau ngaahi feinga kotoa ke fanongonongo ʻa e ongoongo leleí ʻoku fakaʻofoʻofa ia ʻi he vakai mai ʻa Sihová.—Loma 10:13-15.
17. ʻE vavé ni ke ʻiloʻi taʻealataʻofi ʻe he kakaí ʻa e hā?
17 Neongo ʻoku taʻetokanga ʻa e tokolahi he ʻahó ni ki heʻetau ngāue fakamalangá, ʻe vave ke nau hoko ʻo vakai ki ai ʻi ha mahino kehe. (Mt. 24:37-39) Naʻe fakapapauʻi ʻe Sihova kia ʻIsikeli ʻi he taimi ʻe hoko moʻoni ai ʻa e ngaahi fakamaau naʻá ne fanongonongó, ko e fale angatuʻu ʻo ʻIsilelí te nau “ʻilo na e ai ha palofita naʻe hoko kiate kinautolu.” (Isi. 2:5) ʻI he tuʻunga meimei tatau, ʻi he taimi ʻe fakahoko ai ʻe he ʻOtuá ʻene ngaahi fakamaau ki he fokotuʻutuʻu ʻo e ngaahi meʻa lolotongá kuo pau ke ʻilo taʻealataʻofi ʻe he kakaí ko e pōpoaki naʻe malangaʻi ʻe he kau Fakamoʻoni ʻa Sihová ʻi he ngaahi feituʻu kakaí pea mei he fale ki he falé naʻe tupu moʻoni ia mei he tahaʻi ʻOtua moʻoní, ʻa Sihova, pea ko e Kau Fakamoʻoní naʻa nau ngāue moʻoni ko ʻene kau fakafofonga. Ko ha monū ē ʻoku tau maʻu ke fataki ʻa hono huafá pea talaki ʻa ʻene pōpoakí ʻi he ngaahi taimi mahuʻinga ko ení! ʻI hono mālohí, ʻofa ke tau hokohoko atu ai hono ikuʻi ʻa e ngaahi faingataʻa ʻi he ngāue fakafaifekau fale-ki-he-falé.
ʻE Fēfē Haʻo Tali?
• ʻE lava fēfē ke tau langaʻi ʻa e loto-toʻa ke malangá?
• Ko e hā ʻe lava ke ne tokoniʻi kitautolu ke kamata ha fetalanoaʻaki Fakatohitapu ʻi he ngāue fakafaifekau fale-ki-he-falé?
• ʻE lava fēfē ke tau fakahāhā ʻa e mahuʻingaʻia loto-moʻoni ʻi he niʻihi kehé?
• Ko e hā ʻe lava ke ne tokoniʻi kitautolu ke tauhi maʻu ha fakakaukau pau ki he kakai ʻi hotau feituʻu ngāué?
[Fehuʻi ki he Ako]
[Puha/Fakatātā ʻi he peesi 9]
Ko ha Founga ke Kamata ai ʻa e Fetalanoaʻaki Fakatohitapú
Ke kamatá:
◼ Hili hoʻo lea fakafeʻiloaki ki he tokotaha-ʻapí, te ke ʻoange nai kiate ia ha tuleki pea pehē, “Ko e taumuʻa ʻeku ʻaʻahi mai he ʻaho ní, ke vahevahe atu ha fakakaukau fakalototoʻa ʻi he kaveinga mahuʻinga ko ení.”
◼ Pe te ke tuʻuaki nai ha tuleki pea pehē, “ʻOku ou ʻaʻahi nounou mai he ʻaho ní koeʻuhi ʻoku ou mahuʻingaʻia ke ʻiloʻi pe ko e hā hoʻo fakakaukau fekauʻaki mo e kaveinga ko ení.”
Kapau ʻoku tali ʻa e tulekí:
◼ ʻI he ʻikai ha longo lōloá, ʻeke ha fehuʻi fakatupu fakakaukau faingofua makatuʻunga ʻi he kaveinga ʻo e tulekí.
◼ Fanongo tokanga, ʻo feinga ke mahinoʻi ʻa e ngaahi fakakaukau ʻa e tokotaha-ʻapí. Fai ha fakamālō ki heʻene ngaahi fakamatalá.
Ke hokohoko atu ʻa e fetalanoaʻakí:
◼ Lau pea fetalanoaʻaki ki he konga Tohi Tapu ʻe taha pe lahi ange, ʻo feʻunuʻaki hoʻo fakamatalá ki he meʻa ʻoku mahuʻingaʻia ai mo fiemaʻu ʻe he tokotahá.
◼ ʻI hono fakahāhā ha mahuʻingaʻiá, tuʻuaki ha tohi pea fakahāhā ha ako Tohi Tapu ʻo ka malava. Fokotuʻutuʻu ke toe foki ki ai.