Naʻe ʻIkai Te Mau Ilifia—Naʻe Kau ʻa Sihova mo Kimautolu

FAKAMATALA FAI ʻE EGYPTIA PETRIDOU

ʻI he 1972, naʻe fakatahataha hake ʻa e Kau Fakamoʻoni ʻi Saipaló ki Nikōsia ke fanongo ʻi ha malanga makehe naʻe fai ʻe Nathan H. Knorr, ʻa ia naʻe fuoloa taʻu ʻene takimuʻa ʻi he ngāue fakafaifekau ʻa e Kau Fakamoʻoni ʻa Sihová. Naʻe vave ʻene fakatokangaʻi mai aú, pea ki muʻa ke u maʻu faingamālie ke fakafeʻiloaki atu aú, naʻá ne ʻeke mai: “ʻOku ʻi ai ha ongoongo mei ʻIsipite?” Naʻá ku feʻiloaki mo Tokoua Knorr ʻi he taʻu ʻe 20 ki muʻá ʻi hoku kolo tupuʻangá ʻi ʻAlekisanitulia, ʻIsipite.

NAʻE fāʻeleʻi au ʻi ʻAlekisanitulia ʻi Sanuali 23, 1914, pea ko e lahi taha au ʻi he fānau ʻe toko fā. Naʻa mau tupu hake ʻi ha feituʻu ʻoku ofi ʻaupito ki tahi. Ko ʻAlekisanitulia ʻi he taimi ko iá ko ha kolo fakaʻofoʻofa ia naʻe fio ai ʻa e kakai mei he feituʻu kehekehe, pea naʻe ʻiloa ʻi hono ngaahi langá mo hono hisitōliá. Koeʻuhi ko e fengāueʻaki ʻa e kau ʻIulopé mo e kau ʻAlepeá, ne mau poto ai kimautolu fānaú ʻi he lea faka-ʻAlepeá, faka-Pilitāniá, faka-Falanisē mo e faka-ʻĪtalí pea pehē foki ki heʻemau lea fakafāmilí, ʻa e lea faka-Kalisí.

Hili ʻeku ʻosi mei he akó, naʻá ku ngāue ʻi ha fale vala Falanisē, ʻa ia ne u manako ʻaupito ai ʻi hono tisaini mo tuitui ʻa e ngaahi kofu mahuʻinga ʻoku tui ʻe he kakai fefine tuʻumālié. Naʻá ku faivelenga foki ʻi he lotú peá u manako ke lau ʻa e Tohi Tapú, neongo ʻeku mahinoʻi ʻa e meʻa siʻisiʻi pē ʻi he meʻa naʻá ku laú.

ʻI he taimi nai ko iá—ʻi he konga loto ʻo e 1930 tupú—naʻá ku fetaulaki ai mo ha talavou anga-lelei, ko ha tangataʻifonua Saipalo. Ko Theodotos Petrides ko ha tokotaha ia naʻe sai ʻaupito ʻene tau fangatua fesí, ka naʻá ne toe ako foki ki hono ngaohi ʻo e lolé mo e keké pea naʻe ngāue ʻi ha fale keke ʻiloa. Naʻe ʻofa ʻa Theodotos ʻiate au, ko ha kiʻi fefine siʻisiʻi ʻulu ʻuliʻuli. Naʻá ne faʻa hivehiva hake ha ngaahi hiva ʻeva faka-Kalisi ʻi tuʻa ʻi hoku matapā sioʻatá. Naʻá ma mali ʻi Sune 30, 1940. Ko e ngaahi ʻaho fakafiefia ia. Naʻá ma nofo ʻi ha ʻapaatimeni ʻo hoko hifo pē ʻi he ʻapaatimeni ʻeku faʻeé. Ko ʻema ʻuluaki tamasiʻí, ko John, naʻe fāʻeleʻi ia ʻi he 1941.

Ako ʻa e Ngaahi Moʻoni mei he Tohi Tapú

ʻI ha vahaʻa taimi, naʻe ʻikai ke fiemālie ʻa Theodotos ʻi he lotu ne ma ʻi aí, pea naʻá ne ʻeke ʻa e ngaahi fehuʻi fekauʻaki mo e Tohi Tapú. Naʻe ʻikai ke u ʻiloʻi, kuó ne kamata ako ʻe ia ʻa e Tohi Tapú mo e Kau Fakamoʻoni ʻa Sihová. ʻI he ʻaho ʻe taha, lolotonga ʻeku ʻi ʻapi mo ʻema kiʻi pēpeé, naʻe tukituki mai ha fefine ʻi he matapaá ʻo ne ʻomai kiate au ha kaati naʻe hiki ai ha pōpoaki Fakatohitapu. ʻI heʻeku feinga ke anga-fakaʻapaʻapá, ne u kiʻi tuʻu ʻo lau ia. Naʻá ne tuʻuaki mai leva ha ngaahi tohi Fakatohitapu. Ko e meʻa fakaʻohovalé, ko e ngaahi tohi tatau pē ʻeni naʻe ʻomi ʻe Theodotos ki ʻapí!

“ʻOku ou ʻosi maʻu ʻe au ʻa e ngaahi tohi ko ʻení,” ko ʻeku tala angé ia. “Kātaki ʻo hū mai.” Naʻá ku ʻeke taʻetuku leva ha ngaahi fehuʻi lahi fakaʻulia ki he  tokotaha Fakamoʻoní, ko Eleni Nicolaou. ʻI he anga-kātakí, naʻá ne ngāueʻaki ʻa e Tohi Tapú ke ne ʻomai ʻa e talí. Naʻá ku saiʻia ai. Fakafokifā, naʻe kamata ke u mahinoʻi ʻa e pōpoaki ʻa e Tohi Tapú. Lolotonga ʻa e kiʻi longo hifo ʻema talanoá, naʻe fakatokangaʻi ʻe Eleni ha laʻi tā ʻo hoku husepānití. “ʻOku ou ʻiloʻi ʻa e tangata ko eé!” ko ʻene leá mai ia. Naʻe maʻu lelei ai ʻa e kiʻi fakapulipuli ʻa Theodotos. Naʻá ku ʻohovale. Naʻe ʻalu toko taha ʻa Theo ki he ngaahi fakatahá—ʻo ʻikai te ne teitei tala mai kiate au! ʻI he foki mai ʻa Theodotos ki ʻapi ʻi he ʻaho ko iá, naʻá ku tala ange ai kiate ia: “Ko e feituʻu ko ia naʻá ke ʻalu ki ai ʻi he Sāpate kuo ʻosí—te u ʻalu mo koe ki ai ʻi he uiké ni!”

ʻI he ʻuluaki fakataha ne u ʻalu ki aí, naʻe lāulea ai ha kau tangata ʻe toko hongofulu nai ki he tohi Tohi Tapu ʻa Maiká. Naʻá ku fanongo vēkeveke ki he meʻa kotoa pē! Talu mei ai, mo e ʻaʻahi mai ʻa George mo Katerini Petraki ʻi he efiafi Falaite kotoa pē ke ako ʻa e Tohi Tapú mo kimaua. Ko ʻeku tamaí, mo e toko lahi taha ʻo ʻemau fānaú naʻa nau fakafepaki ki heʻema ako mo e Kau Fakamoʻoní, ka naʻe ʻikai ke hohaʻa ki ai ʻa hoku tehiná, neongo naʻe ʻikai ʻaupito te ne hoko ko ha Fakamoʻoni. Kae kehe, naʻe tali ʻe heʻeku fineʻeikí ʻa e moʻoni mei he Tohi Tapú. ʻI he 1942, naʻá ku papitaiso fakataha ai mo ʻeku fineʻeikí mo Theodotos ʻi he tahi ʻi ʻAlekisanitulia ʻi hono fakahaaʻi ʻa ʻemau fakatapui kia Sihová.

Uesia ʻEmau Moʻuí

ʻI he 1939, naʻe kamata ʻa e Tau II ʻa Māmaní, pea naʻe vave ʻene fakalalahí. ʻI he konga ki muʻa ʻo e 1940 tupú, naʻe aʻu mai ai ʻa e Seniale Siamane ko Erwin Rommel mo ʻene kongakau heka tangikē taú ki El Alamein ʻa ia naʻe ofi maí, pea naʻe fonu ʻa ʻAlekisanitulia ʻi he kau ʻōfisa fakakautau Pilitānia. Naʻa mau tānaki ʻa e meʻakai tolonga lahi ʻaupito. ʻI he taimi ko iá naʻe kole ai kia Theodotos ke ne tokangaʻi ʻa e fale keke foʻou ʻa ʻene pule ngāué ʻi Port Taufiq ofi ki Suez, ko ia ne mau hiki leva ki ai. Naʻe kamata kumi mai kiate kimautolu ha ongo Fakamoʻoni lea faka-Kalisi. Neongo naʻe ʻikai te na ʻilo ʻa homau tuʻasilá, naʻá na malanga mei he fale ki he fale ʻo aʻu ʻo na maʻu mai kimautolu.

Lolotonga ʻemau ʻi Port Taufiq, naʻa mau ako Tohi Tapu ai mo Stavros mo Giula Kypraios mo ʻena ongo leká, ko Totos mo Georgia, pea mau hoko ʻo kaungāmeʻa lelei. Naʻe manako ʻaupito ʻa Stavros ʻi hono ako ʻa e Tohi Tapú ʻo ne liliu ai ʻa e ngaahi uasi ʻi hono falé ke tōmuiʻaki ʻa e houa ʻe taha koeʻuhí ke ʻoua te mau maʻu atu ʻa e lēlue fakaʻosi naʻe ʻalu ki ʻapí ka mau nofo fuoloa ange. Naʻe aʻu ʻemau talanoá ki he tuʻapoó.

Naʻa mau nofo ʻi Port Taufiq ʻi he māhina ʻe 18, hili iá ne mau foki ki ʻAlekisanitulia ʻi he puke ʻa ʻeku faʻeé. Naʻá ne mālōlō ʻi he 1947, pea naʻá ne kei faitōnunga pē kia Sihova. Naʻa mau toe ongoʻi ʻa e anga hono fakalototoʻaʻi kimautolu ʻe Sihova fakafou ʻi he feohi fakatupu langa hake mo e ngaahi kaungāmeʻa Kalisitiane matuʻotuʻá. Naʻe toe malava foki ke mau fakaaʻu atu ʻa e anga-talitali kakaí ki he kau misinale naʻa nau folau ki honau ngaahi vāhenga ngāue mulí ʻi he taimi naʻe tukuvakā ai ʻa e  vaka ne nau omi aí ʻi ha kiʻi vahaʻa taimi ʻi ʻAlekisanitulia.

Ngaahi Meʻa Fakafiefia mo e Ngaahi Faingataʻa

ʻI he 1952, naʻá ku fāʻeleʻi ai ʻema tamasiʻi fika uá, ko James. ʻI homa tuʻunga ko e mātuʻá, naʻá ma fakatokangaʻi ʻa e mahuʻinga ʻo hono ʻohake ʻema ongo tamaikí ʻi ha ʻātakai fakatupu langa hake fakalaumālie, ko ia ne ma ʻai ai ke ʻataʻatā homa ʻapí ki he ngaahi fokotuʻutuʻu ako Tohi Tapu tuʻumaʻu peá ma faʻa talitali mo e kau faifekau taimi-kakató. ʻI heʻene peheé, naʻe fakatupulekina ʻe homa foha lahí, ʻa John, ʻa e manako ʻi he ngaahi moʻoni ʻi he Tohi Tapú, pea ʻi heʻene kei taʻu hongofulu tupu siʻí, naʻá ne kamata tāimuʻa. ʻI he taimi tatau, naʻá ne ʻalu ki ha kalasi poʻuli ke fakakakato ʻa ʻene ako fakaʻatamaí.

ʻIkai fuoloa mei ai, naʻe sivi ʻo ʻiloʻi kuo maʻu ʻe Theodotos ha mahaki mafatukituki ʻo e mafú pea naʻe fiemaʻu ai ke taʻofi ʻa ʻene ngāué. Naʻe kei taʻu fā pē homa foha ko James. Ko e hā ʻa e meʻa ke ma faí? ʻIkai naʻe talaʻofa ʻe Sihova: “ʻOua ʻe manavahe, he ʻoku ou ʻiate koe”? (Ai. 41:10) Sioloto atu ki heʻema ʻohovalé mo ʻema fiefiá ʻi he 1956 ʻi hono fakaafeʻi kimaua ke ma ngāue ko e ongo tāimuʻa ʻi Ismailia, ofi ki he Kanali Suez! Ko e ngaahi taʻu hoko mai aí ko e moʻoni ko e ngaahi taʻu faingataʻa ia ʻi ʻIsipite, pea naʻe fiemaʻu ʻa e fakalototoʻá ki homau fanga tokoua Kalisitiané.

ʻI he 1960 naʻe pau ai ke mau mavahe mei ʻIsipite ʻo taki taha pē ha kiʻi kato siʻisiʻi. Naʻa mau hiki ki Saipalo, ʻa e motu naʻe tupu hake ai hoku husepānití. ʻI he taimi ko ʻení, naʻe puke lahi ʻaupito ʻa Theodotos pea ʻikai lava ai ke ne ngāue. Kae kehe, naʻe anga-lelei ha tokoua Kalisitiane mo hono uaifí ʻo tuku mai ke mau nofo ʻi hona fale ʻe taha. Ko e meʻa fakamamahí, naʻe mālōlō hoku husepānití hili ʻa e taʻu ʻe ua mei ai, pea naʻe toe pē au mo James. Ko John, ʻa ia naʻe haʻu mo ia foki ki Saipalo, naʻe ʻosi mali ia pea ʻi ai mo hono fāmili ke ne tokangaʻi.

Tokangaʻi Lolotonga ha Ngaahi Taimi Faingataʻa

ʻI he taimi ko iá naʻe anga-lelei mai ai ʻa Stavros mo Dora Kairis ke mau nofo mo kinautolu ʻi honau ʻapí. Naʻá ku tūʻulutui ʻo fakamālō kia Sihova ʻi heʻene toe tokangaʻi mai ʻema fiemaʻú. (Sāme 145:16) ʻI he taimi naʻe fili ai ʻa Stavros mo Dora ke fakatau atu hona falé kae langa ha fale foʻou mo ha Fale Fakatahaʻanga ʻi lalo ai, naʻá na anga-lelei ʻo fakalahi atu ki ai ha loki ʻe ua maʻaku mo James.

Naʻe faifai atu pē pea mali ʻa James, pea naʻá ne ngāue tāimuʻa mo hono uaifí ʻo aʻu ki hono toki fāʻeleʻi  ʻa e lahi taha ʻi heʻena fānau ʻe toko faá. ʻI he 1974, hili ʻa e taʻu ʻe ua mei he ʻaʻahi fakangalongataʻa ʻa Tokoua Knorr, naʻe ʻi ai ʻa e fuʻu maveuveu lahi fakapolitikale ʻi Saipalo. a Naʻe tokolahi ʻa e kakai ʻo kau ai ʻa e Kau Fakamoʻoní, naʻa nau hola ʻosi mei honau ngaahi ʻapí pea pau ai ke nau toe kamata foʻou. Naʻe kau ai ʻa hoku foha ko John. Naʻá ne hiki mo hono uaifí mo e fānau ʻe toko tolú ki Kānata. Neongo ia, ʻi he taimi tatau pē, ne mau fiefia ke sio ki he tupulaki ʻi he fika ʻo e kau malanga ʻo e Puleʻangá ʻi Saipalo.

ʻI he kamata toho ʻeku penisoní, naʻe malava leva ke u kau kakato ange ki he ngāue fakafaifekaú. Ka ʻi he ngaahi taʻu siʻi ki muʻá, naʻá ku pā kālava peá u hiki ai ʻo nofo mo ʻeku tamasiʻi ko James mo hono fāmilí. Ki mui ai, ʻi he ʻalu ke toe kovi ange ʻa ʻeku puké, naʻe fakatokoto au ʻi falemahaki ʻi he ngaahi uike pea ʻave leva au ki ha ʻapi tauhiʻanga vaivai. Neongo ʻa e felāngaakí, ʻoku ou faifakamoʻoni ki he kau nēsí, kau mahakí mo e kau ʻaʻahí. ʻOku ou toe fakamoleki toko taha foki ʻa e ngaahi houa lahi ʻi he akó, pea ʻi he anga-lelei ʻa hoku fanga tuongaʻane fakalaumālié, ʻoku malava ke u maʻu ai ʻa e Ako Tohi ʻa e Fakatahaʻangá ʻa ia ʻoku ofi mai.

Fiemālie ʻi Hoku Ngaahi Taʻu Fakatōtō Laʻaá

ʻOku ou maʻu ʻa e fiemālie ʻi he fanongo ki he ongoongo fekauʻaki mo e faʻahinga ʻa ia naʻá ma maʻu mo Theodotos ʻa e monū ke tokoniʻí. Ko e toko lahi ʻo ʻenau fānaú mo e fanga makapuná ʻoku nau ʻi he ngāue fakafaifekau taimi-kakató—ko e niʻihi ʻoku nau ngāue ʻi ʻAositelēlia, Kānata, ʻIngilani, Kalisi mo Suisalani. ʻI he ʻahó ni, ʻoku nofo hoku foha ko John mo hono uaifí mo ʻena tamasiʻí ʻi Kānata. Ko ʻena taʻahine lahí mo hono husepānití ʻokú na tāimuʻa. Ko ʻena taʻahine siʻisiʻi tahá mo hono husepānití, ko Linda mo Joshua Snape, naʻe fakaafeʻi kinaua ke na kau ʻi he kalasi hono 124 ʻi he Akoʻanga Kiliatí.

ʻOku nofo he taimí ni ʻa ʻeku tamasiʻi ko James mo hono uaifí ʻi Siamane. Ko e toko ua ʻo ʻena fānau tangatá ʻokú na ngāue ʻi Pēteli—ʻa ia ko e taha ʻi ʻAtenisi, Kalisi, pea ko e taha ʻi Selters, Siamane. Ko ʻena tamasiʻi siʻisiʻi tahá, mo ʻena taʻahiné mo hono husepānití, ʻoku nau tāimuʻa ʻi Siamane.

He lahi ē ko e ngaahi talanoa ke tala ki heʻeku fineʻeikí mo hoku ʻofaʻanga ko Theodotos ʻi he taimi te na moʻui mai ai ʻi he toetuʻú! Te na fiefia ke sio ki he tofiʻa lelei naʻá na tuku mai maʻa hona fāmilí. b

[Fakamatala ʻi lalo]

[Fakamatala ʻi he peesi 24]

Naʻa mau toe ongoʻi ʻa e anga hono fakalototoʻaʻi kimautolu ʻe Sihova fakafou ʻi he feohi fakatupu langa hake mo e ngaahi kaungāmeʻa Kalisitiane matuʻotuʻá

[Mape ʻi he peesi 24]

(Ki he konga tohi kuo fokotuʻu, sio ki he tohi)

SAIPALO

NIKŌSIA

TAHI METITELENIANÉ

ʻISIPITE

KAILO

ʻAlekisanitulia

El Alamein

Ismailia

Suez

Port Taufiq

Kanali Suez

[Maʻuʻanga]

Based on NASA/Visible Earth imagery

[Fakatātā ʻi he peesi 23]

Ko au mo Theodotos ʻi he 1938

[Fakatātā ʻi he peesi 25]

Ko ʻeku tamasiʻi ko John mo hono uaifí

[Fakatātā ʻi he peesi 25]

Ko ʻeku tamasiʻi ko James mo hono uaifí