ʻOkú Ke Pōtopotoʻi ʻi he Leaʻaki ʻa e “Lea Maa”?

“Teu omi ae lea maa ki he kakai, koeuhi ke nau ui kotoabe ki he huafa o Jihova.”—SEF. 3:9, PM.

 1. Ko e hā ʻa e tufakanga fisifisimuʻa kuo ʻomi ʻe Sihova maʻatautolú?

 KO E tufakanga ko e leá naʻe ʻikai ke tupu ia mei he faʻahinga ʻo e tangatá, ka ʻi hono kehé, ko e tupu ia mei he Tokotaha-Fakatupu ʻo e tangatá, ʻa Sihova ko e ʻOtuá. (Eki. 4:11, 12) Naʻá ne ʻoange ki he ʻuluaki tangatá, ʻa ʻĀtama, ʻo ʻikai ngata pē ʻi he malava ke leá kae toe pehē foki ki he malava ke faʻu mo e ngaahi lea foʻou pea fakalahi atu leva ai ʻa e ngaahi foʻi lea naʻá ne ʻiló. (Sen. 2:19, 20, 23) Kuo fakamoʻoniʻi ko e taha ia he tufakanga fisifisimuʻa moʻoni! Kuo ʻai ai ke malava ʻa e faʻahinga ʻo e tangatá ke fetuʻutaki mo ʻenau Tamai hēvaní pea ke fakahīkihikiʻi ʻa hono huafa lāngilangiʻiá.

 2. Ko e hā ʻoku ʻikai ke kei lea taha ai pē ʻa e faʻahinga ʻo e tangatá?

² Lolotonga ʻa e moʻui ʻa e faʻahinga ʻo e tangatá ʻi he ʻuluaki senituli ʻe 17, naʻe lea ai ʻa e tokotaha kotoa ʻi he lea pē ʻe taha, ʻo “ngutu taha pe.” (Sen. 11:1) Naʻe hoko mai leva ʻa e angatuʻu ʻi he ʻaho ʻo Nimiloté. ʻI he kehe mei he ngaahi fakahinohino ʻa Sihová, naʻe fakatahataha ai ʻa e faʻahinga talangataʻa ʻo e tangatá ʻi he feituʻu naʻe ui ki mui ko Pēpeli, ʻo nau fakapapauʻi ke nau nofo ʻi he feituʻu pē taha. Naʻe kamata ke nau langa ha fuʻu taua lahi fakaʻulia, ʻo ʻikai ʻaí ke ʻave ai ʻa e lāngilangí kia Sihova, ka ke ‘ʻai ke ʻiloa honau hingoá.’ Ko ia naʻe fakapuputuʻuʻi leva ʻe Sihova ʻa e muʻaki lea ʻa e kau angatuʻú pea ʻai kinautolu ke nau lea ʻi he ngaahi lea kehekehe. Naʻe tupu leva mei ai ʻa ʻenau movete holo ʻi he funga ʻo māmaní kotoa.—Lau ʻa e Senesi 11:4-8.

 3. Ko e hā naʻe hoko ʻi he taimi naʻe fakapuputuʻuʻi ai ʻe Sihova ʻa e lea ʻa e kau angatuʻu ʻi Pēpelí?

³ ʻI he ʻahó ni, ko e moʻoni ko e ngaahi lea ʻe laui afe—ʻoku pehē ʻe he niʻihi ʻoku laka hake he lea ʻe  6,800 nai—ʻoku leaʻaki ʻi he māmaní. Ko e lea taki taha ʻi he ngaahi leá ni ʻoku fiemaʻu ki ai ʻa e ngaahi tuʻunga fakaefakakaukau kehekehe. ʻOku hā ngalingali leva, ko e taimi ko ia naʻe fakapuputuʻuʻi ai ʻe Sihova ko e ʻOtuá ʻa e lea ʻa e kau angatuʻu ko iá, naʻá ne toʻo ʻosi mei heʻenau manatú ʻa e lea naʻa nau leaʻaki ki muʻá. Naʻe ʻikai ke ngata pē ʻi heʻene fakahū ki honau ʻatamaí ʻa e ngaahi foʻi lea foʻoú ka naʻá ne toe liliu foki ʻa e tuʻunga fakaefakakaukau ne nau maʻú pea faʻu mo e ngaahi kalama foʻou. Tā neʻineʻi ke ui ʻa e tuʻuʻanga ʻo e tauá ko “Maveuveu,” pe “Pepeli.” (Sen. 11:9) ʻOku mālié, he ko e Tohi Tapú pē taha ʻokú ne ʻomai ha fakamatala fakafiemālie ki he tupuʻanga ʻo e ngaahi lea kehekehe ʻoku tau sio ki ai ʻi he ʻaho ní.

Ko ha Lea Foʻou, ko ha Lea Maʻa

 4. Ko e hā naʻe tomuʻa tala ʻe Sihova ʻe hoko ʻi hotau taimí?

⁴ Hangē ko ia ko e fakatupu tokanga nai ʻa e talanoa ʻa e Tohi Tapú fekauʻaki mo e kau mai ʻa e ʻOtuá ki he meʻa ne hoko ʻi Pēpelí, ʻoku ʻi ai ha meʻa ʻoku toe fakatupu tokanga mo mahuʻinga ange kuo hoko ʻi hotau taimí. Fakafou ʻi heʻene palōfita ko Sēfanaiá, naʻe tomuʻa tala ʻe Sihova: “Teu omi ae lea maa ki he kakai, koeuhi ke nau ui kotoabe ki he huafa o Jihova, ke tauhi kiate ia i he uouagataha.” (Sef. 3:9, PM) Ko e hā ʻa e “lea maa” ko iá, pea ʻe lava fēfē ke tau ako ke pōtopotoʻi ʻi hono leaʻakí?

 5. Ko e hā ʻa e lea maʻá, pea ko e hā kuo hoko mei he liliu ko ʻeni ʻi he leá?

⁵ Ko e lea maʻá ko e moʻoni ia fekauʻaki mo Sihova ko e ʻOtuá pea mo ʻene ngaahi taumuʻá ʻa ia ʻoku maʻu ʻi heʻene Folofolá, ʻa e Tohi Tapú. Ko e “lea” ko iá ʻoku kau ki ai ʻa e mahinoʻi totonu ʻa e moʻoni fekauʻaki mo e Puleʻanga ʻo e ʻOtuá mo e founga te ne fakamāʻoniʻoniʻi ai ʻa e huafa ʻo Sihová, ko ʻene fakatonuhiaʻi ʻa hono tuʻunga-haú pea mo ʻene ʻomi ʻa e ngaahi tāpuaki taʻengata ki he faʻahinga faitōnunga ʻo e tangatá. Ko e hā ʻa e ngaahi ola ʻo e liliu ko ʻeni ʻi he leá? ʻOku tala mai ko e kakaí te nau “ui kotoabe ki he huafa o Jihova” pea te nau “tauhi kiate ia i he uouagataha.” ʻI he kehe mei he meʻa naʻe hoko ʻi Pēpelí, ko e liliu ko ʻeni ki he lea maʻá kuo hoko ai ʻo fakahīkihikiʻi ʻa e huafa ʻo Sihová pea fāʻūtaha ʻa hono kakaí.

Ako ʻa e Lea Maʻá

6, 7. (a) Ko e hā ʻoku kau ki hono ako ha lea foʻou, pea ʻoku anga-fēfē ʻa e kaunga ʻa e meʻá ni ki hono ako ʻa e lea maʻá? (e) Ko e hā te tau lāulea ki ai ʻi he taimi ní?

⁶ ʻI he taimi ʻoku fie ako ai ʻe ha taha ha lea kehe, kuo pau ke ne fai ʻa e meʻa lahi ange ʻi hono ako maʻuloto pē ʻo ha ngaahi foʻi lea foʻoú. Ko hono ako ha lea foʻou ʻoku kau ki ai ʻa hono ako ha founga foʻou ʻo e fakakaukaú, ko ha ngaahi tuʻunga fakaefakakaukau foʻou. Ko e fakaʻuhingá mo e fakakatá ʻe kehe nai ia ʻi ha lea kehe. Ko e puʻaki ʻo e ngaahi ongo foʻoú ʻe fiemaʻu ki ai hano ngāueʻaki kehe ʻo e ngaahi ʻōkani ki he leá, ʻo hangē ko e ʻeleló. Ko e meʻa tatau pē ʻoku hoko ʻi he taimi ʻoku tau kamata ako ai ʻa e lea maʻá ʻa ia ko e moʻoni ʻi he Tohi Tapú. ʻOku fiemaʻu ʻa e meʻa lahi ange ʻi hono ako pē ha ngaahi akonaki Fakatohitapu tefito ʻe niʻihi. Ke pōtoʻi ʻi he lea foʻou ko ʻení ʻoku kau ki ai hono fakatonutonu ʻetau fakakaukaú mo hono liliu ʻa hotau ʻatamaí.—Lau ʻa e Loma 12:2; Efeso 4:23.

⁷ Ko e hā te ne tokoniʻi kitautolu ke ʻoua ʻe ngata pē ʻi he mahinoʻi ʻa e lea maʻá kae toe pehē foki ke tau pōtopotoʻi ʻi hono leaʻakí? Hangē ko hono ako ha faʻahinga lea pē, ʻoku ʻi ai ʻa e ngaahi founga tefito ʻe niʻihi ʻe lava ke ne tokoniʻi kitautolu ke hoko ʻo pōtoʻi ʻi hono leaʻaki ʻa e lea ʻa ia ko e moʻoni ʻi he Tohi Tapú. Tau vakai angé ki ha niʻihi ʻo e ngaahi sitepu tefito kuo ngāueʻaki ʻe he kakaí ke ako ai ha lea kehe pea te tau sio ai ki he founga ʻe lava ke tokoniʻi ai kitautolu ʻe he ngaahi sitepu ko iá ke tau ako ʻa e lea foʻou fakaefakatātā ko ʻení.

Pōtopotoʻi ʻi he Leaʻaki ʻa e Lea Maʻá

8, 9. Ko e hā kuo pau ke tau faí kapau ʻoku tau fie ako ʻa e lea maʻá, pea ko e hā ʻoku mātuʻaki mahuʻinga ai ʻení?

⁸ Fanongo tokanga. ʻUluakí, ʻe ongo faikehe ʻaupito ha lea foʻou ki ha taha kuo teʻeki ai ke ne fanongo ʻi he lea ko iá. (Ai. 33:19) Ka ʻi hono ako ʻe ha taha ke tokanga lelei ki he meʻa ʻokú ne fanongo ki aí, ʻe kamata leva ai ke ne ʻiloʻi ha ngaahi foʻi lea tāutaha peá ne fakatokangaʻi ʻa e sīpinga ʻo e lea ko iá. ʻI he founga meimei tatau, ʻoku ekinaki mai kiate kitautolu: “Ko e meʻa ia ʻoku totonu ke ʻasili ai ʻetau fakatokanga ki he ngaahi meʻa kuo ongo mai, naʻa ʻiloange te tau ʻauhia atu.” (Hep. 2:1) Naʻe toutou naʻinaʻi ʻa Sīsū ki hono kau muimuí: “Ko ia ʻoku telinga, ke ne ongoʻi.” (Mt. 11:15; 13:43; Mk. 4:23; Luke 14:35) ʻIo, ʻoku fiemaʻu ke tau ‘fanongo ka tau ʻilo’ ʻa e meʻa ʻoku tau fanongo  ki aí kae lava ke tau fakalakalaka ʻi heʻetau mahinoʻi ʻa e lea maʻá.—Mt. 15:10; Mk. 7:14.

⁹ Ko e fanongó ʻoku fiemaʻu ki ai ʻa e tokanga lelei, ka ʻoku tuha moʻoni ke fai ha feinga. (Luke 8:18) ʻI heʻetau ngaahi fakataha faka-Kalisitiané, ʻoku tau tokanga lelei ki he meʻa ʻoku fakamatalaʻí, pe ʻoku tau fakakaukau kitautolu ki ha meʻa kehe? ʻOku mātuʻaki mahuʻinga ke tau feinga fakamātoato ke tokanga lelei ki ha konga ʻoku fai mai mei muʻa. He ka ʻikai, ko e moʻoni te tau hoko ai ʻo ongongataʻa ʻi heʻetau fanongó.—Hep. 5:11.

10, 11.(a) Tānaki atu ki he fanongo tokangá, ko e hā kuo pau ke tau faí? (e) Ko e hā ha toe meʻa ʻoku kau ki hono leaʻaki ʻa e lea maʻá?

¹⁰ Faʻifaʻitaki ki he faʻahinga ʻoku nau pōtopotoʻi ʻi he lea ko iá. ʻOku fakalototoʻaʻi ʻa e kau ako ʻo ha lea foʻou ke ʻoua ʻe ngata pē ʻi he fanongo tokangá kae toe pehē foki ke nau feinga ke faʻifaʻitaki, pe muimui, ki he puʻaki lea mo e sīpinga lea ʻa e faʻahinga ʻoku pōtopotoʻi ʻi he lea ko iá. ʻE tokoniʻi ai heni ʻa e kau ako leá ke nau fakaʻehiʻehi mei hono fakatupulekina ha tō kehe ʻi he fasi ʻo e leá ʻa ia te ne ʻai ʻamui ange ke taʻemahino haʻanau feinga ke fetuʻutaki. ʻI hono fakahoa atu ki aí, ʻoku totonu ke tau ako mei he faʻahinga kuo nau pōtoʻi ʻi he “ako” ʻaki ʻa e lea foʻoú. (2 Tim. 4:2) Kole tokoni. Loto-lelei ke tali ʻa e fakatonutonú ʻi he taimi ʻokú ke fai ai ha fehālaaki.—Lau ʻa e Hepelu 12:5, 6, 11.

¹¹ Ko e lea ʻi he lea maʻá ʻoku ʻikai ke ngata pē ʻi he kau ai ʻa e tui ki he moʻoní mo hono ako ʻaki ia ki he niʻihi kehé kae pehē foki ki hono ʻai ke tatau hotau ʻulungāangá mo e ngaahi lao mo e ngaahi tefitoʻi moʻoni ʻa e ʻOtuá. Ke tokoniʻi kitautolu ʻi hono fai ʻení, ʻoku fiemaʻu ke tau faʻifaʻitaki ki he niʻihi kehé. ʻOku kau ki heni ʻa e faʻifaʻitaki ki heʻenau tuí mo ʻenau faivelengá. ʻOku toe kau ki ai foki ʻa e faʻifaʻitaki ki he ʻalunga moʻui kotoa ʻa Sīsuú. (1 Kol. 10:34 [1Ko 11:1, PM]; Hep. 12:2; 13:7) Kapau te tau kīvoi ʻi hono fai ʻení, ʻe hoko ai ʻo fāʻūtaha ʻa e kakai ʻa e ʻOtuá, ʻo fakaʻatā ai kinautolu ke nau lea, ʻo hangē ko e laú, ʻi ha tō tatau ʻi he fasi ʻo e leá.—1 Kol.1Ko 4:16, 17.

12. ʻOku anga-fēfē ʻa e kaunga ʻa e ako maʻulotó ki hono ako ʻo ha lea foʻou?

¹² Ako maʻuloto. Ko e kau ako leá ʻoku fiemaʻu ke nau feinga ke manatuʻi ha ngaahi meʻa foʻou. ʻOku kau ki heni ʻa e ngaahi foʻi lea mo ha ngaahi kupuʻi lea foʻou. Ki he kau Kalisitiané, ko e ako maʻulotó ʻe lava ke hoko ia ko ha tokoni lahi moʻoni ki he hoko ʻo pōtoʻi ʻi he lea maʻá. Ko e moʻoni, ʻe lelei ke tau ako maʻuloto ʻa e hingoa ʻo e ngaahi tohi ʻi he Tohi Tapú mo honau hokohokó. Kuo ʻai ʻe he niʻihi ko ʻenau taumuʻá ia ke maʻuloto ʻa e fakalea ʻo ha ngaahi konga Tohi Tapu pe ko e ngaahi konga Tohi Tapu ko ia ʻoku fekauʻaki mo ha tuʻunga-lea pau. Kuo ʻiloʻi ʻe he niʻihi ʻa e ʻaonga hono maʻuloto ʻa e ngaahi hiva ʻo e Puleʻangá, ko e hingoa ʻo e ngaahi matakali ʻo ʻIsilelí pea mo e kau ʻapositolo ʻe toko 12, pea mo e ngaahi ʻulungāanga ʻo e fua ʻo e laumālié. ʻI he kuonga muʻá, naʻe ako maʻuloto ʻe he kau ʻIsileli tokolahi ʻa e ngaahi sāmé. ʻI onopooni, kuo maʻuloto fakafoʻilea ai ʻe ha kiʻi tamasiʻi ʻe taha ʻo laka hake he ngaahi veesi Tohi Tapu ʻe 80 ʻi he taimi naʻá ne kei taʻu ono aí. ʻE lava nai ke tau ngāueʻaki lelei ange ʻa e pōtoʻi mahuʻinga ko ʻení?

13. Ko e hā ʻoku mātuʻaki mahuʻinga ai ʻa e toutou leaʻakí?

¹³ Ko e toutou leaʻakí ʻoku tokoni ia ki he  manatú, pea ko e toutou fakamanatú ko ha konga tefito ia ʻo ʻetau ako faka-Kalisitiané. Naʻe pehē ʻe he ʻapositolo ko Pitá: “Kuo pau te u fakamanatu ai pe ʻa e ngaahi meʻa ko ia kiate kimoutolu, neongo ʻoku mou lāuʻilo ki ai, pea kuo mou tuʻu ʻi he tokateline ʻoku ʻiate kimoutolu.” (2 Pita 1:12) Ko e hā ʻoku fiemaʻu ai kiate kitautolu ʻa e toutou fakamanatú? Koeʻuhí he ʻoku fakalolotoʻi ai ʻetau mahinó, ʻai ke fā ʻatā ange ʻetau vakaí, pea fakaivimālohiʻi ai ʻetau fakapapau ke nofo maʻu ʻi he ʻalunga fakalaumālié. (Sāme 119:129) Ko hono toutou fakamanatu ʻa e ngaahi tuʻunga mo e ngaahi tefitoʻi moʻoni ʻa e ʻOtuá ʻoku tokoni ai ke tau sivisiviʻi kitautolu pea ke tau faitau mo e hehema ke hoko “ko ha taha fanongo kae ngalo.” (Sem. 1:22-25) Kapau ʻe ʻikai ke tau hanganaki fakamanatu kiate kitautolu ʻa e moʻoní, ʻe tākiekina hotau lotó ʻe ha ngaahi meʻa kehe pea ʻe ʻikai ke tau kei pōtopotoʻi ai ʻi hono leaʻaki ʻa e lea maʻá.

14. Ko e hā te ne tokoniʻi kitautolu ʻi heʻetau ako ʻa e lea maʻá?

¹⁴ Lau leʻo-lahi. (Fkh. 1:3) ʻOku feinga ʻa e kau ako lea ʻe niʻihi ke ako fakalongolongo ha lea foʻou ʻiate kinautolu pē. ʻOku ʻikai ke maʻu ai heni ʻa e ngaahi ola lelei tahá. ʻI hono ako ʻa e lea maʻá, ʻe fiemaʻu nai ʻi he taimi ʻe niʻihi ke tau lau “leʻo-siʻi” ia ke tokoni ki heʻetau tokangá. (Lau ʻa e Sāme 1:1, 2. a) ʻI hono fai ʻení ʻe maongo loloto ange ai ki hotau ʻatamaí ʻa e meʻa ʻoku tau laú. ʻI he faka-Hepeluú, ko e kupuʻi lea “lau leʻo-siʻi” ʻoku fekauʻaki vāofi ia mo e fakalaulaulotó. Hangē pē ko e fiemaʻu ʻa e fakamolū meʻakaí kae ʻaonga kakato kiate kitautolu ʻa e meʻakai ʻoku tau kaí, ʻoku fiemaʻu ʻa e fakalaulaulotó ka tau mahinoʻi lelei ʻa e meʻa ʻoku tau laú. ʻOku tau vaheʻi ha taimi feʻunga ke fakalaulauloto ai ki he meʻa ʻoku tau akó? Hili hono lau ʻa e Tohi Tapú, kuo pau ke tau fakakaukau lahi fekauʻaki mo e meʻa kuo tau laú.

15. ʻE lava fēfē ke tau ako ʻa e “kalama” ʻo e lea maʻá?

¹⁵ ʻAnalaiso ʻa e kalamá. ʻI ha tuʻunga, ʻoku ʻaonga ke ako ʻa e kalamá, pe sīpinga ʻo e ngaahi foʻi leá ʻi ha sētesi, pea mo e ngaahi lao ʻo ha lea foʻou ʻoku tau ako. ʻOku fakaʻatā ai ʻe he meʻá ni ke tau mahinoʻi ʻa e faʻunga ʻo e lea ko iá, ʻo ʻai ai kitautolu ke tau lava ʻo lea lelei. Hangē pē ko e ʻi ai ʻa e sīpinga ʻo e ngaahi foʻi leá ʻi ha sētesi ʻo ha lea, ko e lea maʻa ʻa ia ko e moʻoni Fakatohitapú ʻoku ʻi ai ʻa e “sīpinga ʻo e ngaahi lea fakatupu moʻui.” (2 Tim. 1:13, NW) ʻOku fiemaʻu ke tau muimui ki he “sīpinga” ko iá.

16. Ko e hā ʻa e hehema ʻoku fiemaʻu ke tau ikuʻí, pea ʻe lava fēfē ke tau fai ʻeni?

 ¹⁶ Hokohoko atu ke fakalakalaka. ʻE feʻunga nai ʻa e ako lea ʻa ha taha ke ne lava ʻo fai ha ngaahi fetalanoaʻaki faingofua ka ʻe faai atu pē ʻo ʻikai ke ne kei fakalakalaka. ʻE lava ke malanga hake ha palopalema meimei tatau ʻi he faʻahinga ʻoku nau leaʻaki ʻa e lea maʻá. (Lau ʻa e Hepelu 5:11-14.) Ko e hā ʻe lava ke ne tokoniʻi kitautolu ke tau ikuʻi ʻa e hehema ko ʻení? ʻAi ke ke loto-lelei ke fakalahi atu ʻa hoʻo ʻilo ki he lea ko ʻení. “Koia foki, ke tuku ki mui ae gaahi uluaki akonaki a Kalaisi, ka tau fai atu ki he haohaoa; ke oua naa toe ai ae tuuga oe fakatomala mei he gaahi gaue mate, bea moe tui ki he Otua, ae akonaki oe gaahi babitaiso, moe hilifaki oe nima, moe toetuu oe mate, moe fakamāu taegata.”—Hep. 6:1, 2, PM.

17. Ko e hā ʻoku mahuʻinga ai ʻa e tōʻongaʻaki ʻa e ako tuʻumaʻú? Fakatātaaʻi.

¹⁷ Vaheʻi ha ngaahi taimi ako pau. Ko e ngaahi taimi ako nounou kae fai tuʻumaʻú ʻoku lelei ange ia ʻi he ngaahi taimi ako lōloa kae tātātaha hono faí. Fai ʻa hoʻo akó ʻi he taimi ʻokú ke tokanga aí kae ʻikai ko e taimi ʻe ala fakahohaʻasi ai koé. Ko hono ako ha lea foʻou ʻoku hangē ia ko hano fakaʻataʻatā ha foʻi hala ʻi ha loto vaotā. Ko e lahi ange hono ʻaluʻi ʻo e foʻi halá, ko e faingofua ange ia ʻa e fonongá. Kapau ʻe fuoloa hono taʻengāueʻaki ʻa e foʻi halá, ʻe vave ʻa e tupu hake ʻa e vaó ʻo pulia ai. Ko ia ʻoku mātuʻaki mahuʻinga ai ʻa e kīvoí mo e fai tuʻumaʻú! (Tan. 6:16, 20) ʻI he leaʻaki ʻa e lea maʻa ko e moʻoni ʻi he Tohi Tapú, “hanganaki ʻā pea fai tuʻumaʻu” ia fakataha mo e faʻa lotu.—Ef. 6:18, NW.

18. Ko e hā ʻoku totonu ke tau leaʻaki ai ʻi he faingamālie kotoa pē ʻa e lea maʻá?

¹⁸ Leaʻaki! Leaʻaki! Leaʻaki! Ko ha niʻihi ʻoku nau ako ha lea foʻou te nau toumoua nai ke leaʻaki ʻa e lea ko iá koeʻuhi ko ʻenau mā pe manavasiʻi naʻa hala ʻenau leá. ʻE taʻofi ai kinautolu ʻe he meʻá ni mei he hoko ʻo fakalakalaká. ʻI he taimi ʻoku ako ai ha lea, ʻoku moʻoni e laú, ʻe ʻikai ke te poto kae ʻoua leva kuó te toutou leaʻaki ia. Ko e lahi ange hono leaʻaki ʻe he tokotaha ako leá ʻa e lea foʻoú, ko ʻene fiemālie ange ia ʻi hono leaʻakí. ʻOku pehē pē ʻa e fiemaʻu ke tau leaʻaki ʻa e lea maʻá ʻi he faingamālie kotoa pē. “ʻOku fai ʻa e tui ʻaki ʻa e loto ke maʻu ʻa e fakatonuhia, ka ʻoku fai ʻa e fakaha ʻaki ʻa e ngutu ke maʻu ʻa e fakamoʻui.” (Loma 10:10) ʻOku ʻikai ngata pē ʻi heʻetau fai ha “fakaha” ʻi he taimi ʻo ʻetau papitaisó ka ʻoku tau toe fai pehē ʻi heʻetau lea ʻo fekauʻaki mo Sihova ʻi he faingamālie kotoa pē, ʻo kau ai ʻa e taimi ʻoku tau ʻalu ai ʻi he ngāue fakafaifekaú. (Mt. 28:19, 20; Hep. 13:15) ʻOku fakaʻatā ʻe heʻetau ngaahi fakataha faka-Kalisitiané ke tau fai ha ngaahi fakahāhā mahino mo hangatonu ʻi he lea maʻá.—Lau ʻa e Hepelu 10:23-25.

Ngāueʻaki Fāʻūtaha ʻa e Lea Maʻá ke Fakahīkihikiʻi ʻa Sihova

19, 20. (a) Ko e hā ʻa e meʻa fakaofo kuo lavaʻi ʻe he Kau Fakamoʻoni ʻa Sihová ʻi hotau ʻahó ni? (e) Ko e hā hoʻo fakapapaú?

¹⁹ He mei fakafiefia ē ke ʻi Selusalema ʻi he pongipongi Sāpate ʻo Sīvani 6, ʻi he taʻu 33 T.S.! Pongipongia ʻi he ʻaho ko iá, ki muʻa siʻi pē pea hoko ʻa e hivá, ko e faʻahinga naʻa nau fakatahataha ʻi ha loki ʻi ʻolunga naʻe hoko ha mana ʻo nau kamata ke “lea ʻi he ngaahi lea kehe.” (Ng. 2:4) ʻI he ʻahó ni, ko e tufakanga fakaemana ʻo e lea kehekehé ʻoku ʻikai kei maʻu ia ʻe he kau sevāniti ʻa e ʻOtuá. (1 Kol.1Ko 13:8) Neongo ia, ʻoku talaki ʻe he Kau Fakamoʻoni ʻa Sihová ʻa e ongoongo lelei ʻo e Puleʻangá ʻo laka hake he ngaahi lea kehekehe ʻe 430.

²⁰ He houngaʻia ē ko kitautolu he tatau ai pē pe ko e hā ʻa e lea ʻoku tau anga ki aí, ʻoku tau fāʻūtaha kotoa ʻi hono leaʻaki ʻa e lea maʻa ʻa ia ko e moʻoni ʻi he Tohi Tapú! ʻI ha tuʻunga, ko hano fetongi ʻeni ʻo e meʻa naʻe hoko ʻi Pēpelí. ʻI he hangē pē ʻoku tau lea tahá, ʻoku ʻoatu ʻe he kakai ʻa Sihová ʻa e fakahīkihikí ki hono huafá. (1 Kol.1Ko 1:10) ʻOfa ko ʻetau fakapapaú ia ke hokohoko atu ʻa e tauhi “uouagataha” mo hotau fanga tokoua mo e fanga tuofāfine ʻi māmani lahí ʻi heʻetau ako ke tau pōtopotoʻi ai pē ʻi hono leaʻaki ʻa e lea maʻá, ke lāngilangiʻia ai ʻetau Tamai hēvaní, ʻa Sihova.—Lau ʻa e Sāme 150:1-6.

[Fakamatala ʻi lalo]

ʻE Fēfē Haʻo Tali?

• Ko e hā ʻa e lea maʻá?

• Ko ʻetau leaʻaki ʻa e lea maʻá ʻoku kau ki ai ʻa e hā?

• Ko e hā te ne tokoniʻi kitautolu ke tau pōtopotoʻi ʻi hono leaʻaki ʻa e lea maʻá?

[Fehuʻi ki he Ako]

[Puha ʻi he peesi 23]

ʻAi ke Lelei Ange ʻa Hoʻo Pōtopotoʻi ʻi Hono Leaʻaki ʻa e Lea Maʻá ʻAki ʻa e

◆ fanongo tokanga.

Luke 8:18; Hep. 2:1

◆ faʻifaʻitaki ki he faʻahinga ʻoku nau pōtopotoʻi ʻi he lea ko iá.

1 Kol. 10:34 [1Ko 11:1, PM]; Hep. 13:7

◆ ako maʻuloto pea toutou leaʻaki.

Sem. 1:22-25; 2 Pita 1:12

◆ lau leʻo-lahi.

Sāme 1:1, 2; Fkh. 1:3

◆ ʻanalaiso ʻa e “kalamá.”

2 Tim. 1:13

◆ hokohoko atu ke fakalakalaka.

Hep. 5:11-14; 6:1, 2

◆ vaheʻi ha ngaahi taimi ako pau.

Tan. 6:16, 20; Ef. 6:18

◆ leaʻaki ia.

Loma 10:10; Hep. 10:23-25

[Fakatātā ʻi he peesi 24]

ʻOku fāʻūtaha ʻa e kakai ʻa Sihová ʻi hono leaʻaki ʻa e lea maʻá