ʻOkú Ke Tāimuʻa ʻi Hono Fakahaaʻi ʻa e Fakaʻapaʻapá?

“ʻI he fakaʻapaʻapa mou tāimuʻa kimoutolu.”​—LOMA 12:10.

 1. Ko e hā ʻoku ʻikai ke kei angaʻaki ʻi he ngaahi feituʻu lahi ʻi he māmaní?

 ʻI HE ngaahi feituʻu ʻe niʻihi ʻi he māmaní, ko e tōʻonga anga-maheni ki he fānau īkí ke nau fakaʻapaʻapaʻi ʻa e kakai lalahí ʻaki ʻenau tūʻulutui anga-fakaʻapaʻapa ʻi honau haʻohaʻongá. ʻI he foungá ni, ʻoku ʻikai ai te nau tuʻu ʻo māʻolunga ʻi he faʻahinga ʻoku matuʻotuʻa angé. ʻI he ngaahi sōsaieti ko ení, ʻoku toe fai foki ʻa e vakai ko ha tōʻonga taʻefakaʻapaʻapa ki ha tama ke sītuʻa ki ha tokotaha lahi. Neongo ko e fakaʻapaʻapá ʻoku fakahaaʻi ia ʻi he ngaahi founga kehekehe ʻi he ngaahi sivilaise kehekehe, ko e ngaahi fakahāhā pehē ʻo e fakaʻapaʻapá ʻokú ne ʻomai ai ki heʻetau manatú ʻa e Lao ʻa Mōsesé. Naʻe kau heni ʻa e fekau: “Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa.” (Liv. 19:32) Ko e meʻa fakamamahi he ʻi he ngaahi feituʻu lahi ʻoku ʻikai ke kei angaʻaki ai hono fakahāhā ʻa e fakaʻapaʻapa ki he niʻihi kehé. Ko hono moʻoní, ko e anga-taʻefakaʻapaʻapá ʻa e meʻa ʻoku manakoá.

 2. Ko hai ʻoku tala mai ʻe he Folofola ʻa e ʻOtuá ke tau fakaʻapaʻapa ki aí?

² ʻI he Folofola ʻa e ʻOtuá ko e meʻa mahuʻinga ʻaupito ke fakahaaʻi ʻa e fakaʻapaʻapá. ʻOkú ne tala mai ke tau fakaʻapaʻapa kia Sihova mo Sīsū. (Sione 5:23) ʻOku toe fekauʻi kitautolu ke tau fakahāhā ʻa e fakaʻapaʻapa ki he ngaahi mēmipa ʻo e fāmilí mo e kaungātuí pea pehē ki he niʻihi ʻi tuʻa ʻi he fakatahaʻangá. (Loma 12:10; Ef. 6:1, 2; 1 Pita 2:17) Ko e hā ʻa e ngaahi founga ʻoku tau fakahaaʻi ai ʻoku tau fakaʻapaʻapa kia Sihova? ʻOku anga-fēfē ʻetau fakahāhā ʻa e fakaʻapaʻapa pe ʻapasia loloto ki hotau ngaahi tokoua mo e ngaahi tuofāfine Kalisitiané? Tau vakai angé ki ai pea mo ha ngaahi fehuʻi ʻe niʻihi ʻoku felāveʻi mo ia.

Fakaʻapaʻapa kia Sihova mo Hono Huafá

 3. Ko e hā ʻa e founga mahuʻinga ʻe taha ke fakaʻapaʻapa ai kia Sihová?

³ Ko e founga mahuʻinga ʻe taha ke fakaʻapaʻapa ai kia Sihová ko hono fakahāhā ʻa e ʻapasia totonu ki hono huafá. He ko kitautolú ko e “kakai ke kau ki hono huafa.” (Ng. 15:14) Ko ha lāngilangi moʻoni ke uiʻaki ʻa e huafa ʻo e ʻOtua māfimafi-aoniu ko Sihová. Naʻe pehē ʻe he palōfita ko Maiká: “Ko e ngaahi kakai katoa ʻoku nau ʻaluʻaki taki taha ʻa e huafa ʻo hono ʻotua, pea ko kitautolu te tau ʻaluʻaki ʻa e huafa ʻo Sihova ko hotau ʻOtua, ʻo lauikuonga pea taʻengata.” (Mai. 4:5) ʻOku tau “ʻaluʻaki ʻa e huafa ʻo Sihova” ʻaki ʻetau feinga ke moʻui ʻi he ʻaho taki taha ʻi ha founga ʻoku tapua lelei atu ai ʻa e huafa ʻoku uiʻaki kitautolú. ʻI he hangē ko hono fakamanatu ʻe Paula ki he kau Kalisitiane ʻi Lomá, kapau ʻoku ʻikai ke tau moʻui ʻo fehoanaki mo e ongoongo lelei ʻoku tau malangaʻí, ʻoku “lauʻikovi” ai ʻa e huafa ʻo e ʻOtuá, ʻo ongoongo kovi.​—Loma 2:21-24.

 4. ʻOku anga-fēfē hoʻo vakai ki he monū ʻo e faifakamoʻoni maʻa Sihová?

⁴ ʻOku tau toe fakaʻapaʻapa foki kia Sihova ʻi heʻetau ngāue faifakamoʻoní. ʻI he kuohilí, naʻe fakaafeʻi ʻe Sihova ʻa e ngaahi mēmipa ʻo e puleʻanga ʻIsilelí ke nau hoko ko ʻene kau fakamoʻoni, ka naʻe ʻikai te nau fakahoko ʻa e ngafa ko iá. (Ai. 43:1-12) Naʻa nau toutou tafoki meia Sihova pea fakamamahiʻi ʻa e “Tapuha ʻo Isileli.” (Sāme 78:40, 41) Faifai atu pē, naʻe mole fakaʻaufuli mei he puleʻangá ʻa e hōifua ʻa Sihová. Kae kehe, ko kitautolu ʻi he ʻaho ní ʻoku tau houngaʻia ʻi he monū ʻo e faifakamoʻoni maʻa Sihova mo ʻai ke ʻiloa ʻa hono huafá. ʻOku tau fai pehē koeʻuhi ʻoku tau ʻofa kiate ia mo fakaʻamu ke fakamāʻoniʻoniʻi ʻa hono huafá. ʻE lava fēfē ke tau fakaʻehiʻehi mei he malangá ʻi heʻetau ʻilo ʻa e moʻoni fekauʻaki mo ʻetau Tamai fakahēvaní mo ʻene ngaahi taumuʻá? ʻOku tau ongoʻi ʻo hangē ko e ʻapositolo ko Paulá ʻi heʻene pehē: “Ko ha fatongia ia kuo hilifaki mai; ʻio, hoto ʻoiaue, ʻo kapau ʻe ʻikai te u malangaʻaki ʻa e Kosipeli!”​—1 Kol. 9:16.

 5. ʻOku anga-fēfē ʻa e fekauʻaki ʻa e tui kia Sihová mo hono fakaʻapaʻapaʻi iá?

⁵ Naʻe pehē ʻe he tokotaha-tohi-saame ko Tēvitá:  “ʻE falala kiate koe ʻa haʻa maheni ki ho huafa; he talaʻehai kuo ke liʻaki, ʻe Sihova, ʻa e kau kumi ki he ʻAfiona.” (Sāme 9:10) Kapau ʻoku tau ʻiloʻi moʻoni ʻa Sihova pea tau fakaʻapaʻapaʻi ʻa e ʻuhinga ʻo hono huafá, te tau falala ai kiate ia ʻo hangē ko ʻene kau sevāniti faitōnunga ʻi he kuohilí. Ko hono maʻu ʻa e falala mo e tui ko eni kia Sihová ko ha toe founga ia ʻe taha ʻo hono fakahāhā ʻa e fakaʻapaʻapa kiate iá. Fakatokangaʻi ʻa hono fakafekauʻaki ʻi he Folofola ʻa e ʻOtuá ʻa e falala kia Sihová pea mo hono fakaʻapaʻapaʻi iá. ʻI he taimi naʻe ʻikai falala ai kiate Ia ʻa ʻIsileli ʻo e kuonga muʻá, naʻe ʻeke ʻe Sihova kia Mōsese: “ʻE tuku ʻafe ʻa e taʻetokaʻi au ʻe he kakai ni? Ko futu mo e ʻikai te nau tui kiate au, neongo e ngaahi fuʻu mana kuo u fai ʻi honau lotolotonga?” (Nom. 14:11) ʻOku toe moʻoni foki eni ʻi he tafaʻaki ʻe tahá. ʻI he falala kia Sihova ke ne maluʻi mo tokoniʻi kitautolu lolotonga ʻa e ngaahi ʻahiʻahí, ʻoku tau fakahāhā ai ʻoku tau fakaʻapaʻapaʻi ia.

 6. Ko e hā ʻokú ne ueʻi kitautolu ke tau fakahaaʻi ʻa e ʻapasia loloto kia Sihová?

⁶ Naʻe fakahaaʻi ʻe Sīsū ko e fakaʻapaʻapa kia Sihová kuo pau ke haʻu ia mei he lotó. ʻI he lea ki he faʻahinga ʻa ia ko ʻenau lotú naʻe ʻikai fai loto-moʻoní, naʻe lave ʻa Sīsū ki he folofola ko eni ʻa Sihová: “Ko e kakai ni ʻoku nau fakaʻapaʻapa kiate au ʻaki honau loungutu, ka ko honau loto ʻoku fakamamaʻo.” (Mt. 15:8) Ko e ʻapasia loto-moʻoni kia Sihová ʻoku haʻu ia mei he ʻofa moʻoni kiate ia. (1 Sione 5:3) Pea ʻoku tau tauhi foki ʻi heʻetau fakakaukaú ʻa e talaʻofa ʻa Sihova: “Ko kinautolu oku fakaabaaba kiate au, teu fakahikihikiʻi akinautolu.”​—1 Sam. 2:30, PM.

Ko Kinautolu ʻOku Takimuʻá ʻOku Nau Fakahāhā ʻa e Fakaʻapaʻapa ki he Niʻihi Kehé

 7. (a) Ko e hā ʻoku totonu ai ki he ngaahi tokoua fua fatongiá ke nau fakahāhā ʻa e fakaʻapaʻapa ki he faʻahinga ʻoku nau tokangaʻí? (e) Naʻe anga-fēfē ʻa hono fakahāhā ʻe Paula ʻa e fakaʻapaʻapa ki he kaungātuí?

⁷ Naʻe naʻinaʻi ʻa e ʻapositolo ko Paulá ki he kaungātuí: “ʻI he fakaʻapaʻapa mou tāimuʻa kimoutolu.” (Loma 12:10) Ko e ngaahi tokoua ʻoku nau maʻu ʻa e ngaahi tuʻunga fua fatongia ʻi he fakatahaʻangá ʻoku totonu ke nau fokotuʻu ʻa e faʻifaʻitakiʻanga, ʻo “tāimuʻa,” ʻi hono fakahāhā ʻa e fakaʻapaʻapa ki he faʻahinga ʻoku nau tokangaʻí. ʻI he tuʻunga ko iá, ko e faʻahinga ʻoku nau maʻu ʻa e ngaahi fatongia mamafá ʻoku totonu ke nau muimui ʻi he faʻifaʻitakiʻanga naʻe fokotuʻu ʻe Paulá. (Lau ʻa e 1 Tesalonaika 2:7, 8.) Ko e ngaahi tokoua ʻi he ngaahi fakatahaʻanga naʻe ʻaʻahi ki ai ʻa Paulá naʻa nau ʻilo ʻe ʻikai ʻaupito ke kole ange ʻe Paula ke nau fai ʻa e ngaahi meʻa naʻe ʻikai te ne fie fai ʻe ia tonu. Naʻe fakahāhā ʻe Paula ʻa e fakaʻapaʻapa ki he kaungātuí, pea ko e olá naʻa nau fakaʻapaʻapa ai kiate ia. ʻI he taimi naʻe pehē ai ʻe Paula: “Ko ia ʻoku ou kole atu, ke mou hoko ko e kau faʻifaʻitaki kiate au,” ʻoku tau tui naʻe tali loto-lelei ia ʻe he tokolahi koeʻuhi ko ʻene tā sīpinga leleí.​—1 Kol. 4:16.

 8. (a) Ko e hā ʻa e founga mahuʻinga ʻe taha naʻe fakahāhā ai ʻe Sīsū ʻa e fakaʻapaʻapa ki heʻene kau ākongá? (e) ʻE lava fēfē ke muimui ʻa e kau ʻovasia ʻi he ʻaho ní ʻi he faʻifaʻitakiʻanga ʻa Sīsuú?

⁸ Ko e founga ʻe taha ʻoku fakahāhā ai ʻe ha tokoua fua fatongia ʻa e fakaʻapaʻapa ki he faʻahinga ʻokú ne tokangaʻí ko hono ʻoange kiate kinautolu ʻa e ʻuhinga ki he ngaahi kole ʻokú ne faí pe ko e ngaahi tataki ʻokú ne ʻoatú. ʻI he fai peheé, ʻokú ne faʻifaʻitaki ai kia Sīsū. Ko e fakatātaá, ʻi hono tala ange ʻe Sīsū ki heʻene kau ākongá ke nau lotu ki ha kau ngāue tokolahi ange ke fekauʻi ki he utu-taʻú, naʻá ne tala ange ʻa hono ʻuhingá. Naʻá ne pehē: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mt. 9:37, 38) ʻI he tuʻunga meimei tatau, ʻi heʻene tala ki heʻene kau ākongá ke nau “leʻo,” naʻá ne ʻoange ha ʻuhinga. Naʻá ne pehē: “He ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki.” (Mt. 24:42) Naʻe toutou tala ʻe Sīsū ki heʻene kau ākongá ʻo ʻikai ko e meʻa pē naʻe totonu ke nau faí kae pehē foki ki he ʻuhinga ke nau fai ai iá. ʻI he founga ko iá, naʻá ne fakahāhā ai ʻa e fakaʻapaʻapa mo tokaʻi kinautolu. Ko ha faʻifaʻitakiʻanga lelei moʻoni ke muimui ki ai ʻa e kau ʻovasia Kalisitiané!

Fakaʻapaʻapa ki he Fakatahaʻanga ʻa Sihová pea mo ʻEne Tatakí

 9. Ko e hā ʻoku tapua atu ʻe he fakaʻapaʻapa ki he fakatahaʻanga Kalisitiane ʻi māmani lahí pea mo hono kau fakafofongá? Fakamatalaʻi.

⁹ Ke fakaʻapaʻapa kia Sihova, ʻoku toe fiemaʻu foki ke tau fakaʻapaʻapa ki he fakatahaʻanga Kalisitiane ʻi māmani lahí, fakataha mo hono kau fakafofongá. ʻI he taimi ʻoku tau tokanga ai ki he akonaki Fakatohitapu mei he tamaioʻeiki anga-tonú,  ʻoku tau fakahāhā ai ʻa e fakaʻapaʻapa ki he fokotuʻutuʻu ʻa Sihová. ʻI he fakatahaʻanga Kalisitiane ʻi he ʻuluaki senitulí, naʻe sio ʻa e ʻapositolo ko Sioné ki he fiemaʻu ke valokiʻi ʻa e faʻahinga naʻe ʻikai te nau fakaʻapaʻapa ki he faʻahinga kuo fakanofó. (Lau ʻa e 3 Sione 9-11.) ʻOku hā ʻi he lea ʻa Sioné naʻe ʻi ai ha taʻefakaʻapaʻapa ʻo ʻikai ngata pē ki he kau ʻovasia tāutahá kae pehē foki ki heʻenau akonakí mo ʻenau fakahinohinó. ʻOku fakafiefiá, naʻe ʻikai ke pehē ʻa e tokolahi taha ʻo e kau Kalisitiané. ʻI he kei moʻui ʻa e kau ʻapositoló, ʻoku hā mahino naʻe fakahāhā ʻe he ngaahi tokouá fakalūkufua ʻa e ʻapasia loloto ki he faʻahinga naʻe takimuʻá.​—Fili. 2:12.

10, 11. Fakamatalaʻi mei he Tohi Tapú ʻa e ʻuhinga ʻoku totonu ai hono maʻu ʻe he niʻihi ha mafai ʻi he fakatahaʻanga Kalisitiané.

¹⁰ Kuo fakaʻuhinga ʻa e niʻihi koeʻuhi naʻe tala ʻe Sīsū ki heʻene kau ākongá “ko kimoutolu ko e ngāhi tokoua kotoa pe,” ʻoku ʻikai totonu ai ke ʻi ai ha ngaahi tuʻunga mafai ʻi he fakatahaʻanga Kalisitiané. (Mt. 23:8) Kae kehe, fakatouʻosi ʻa e Ngaahi Konga Tohi Tapu Faka-Hepeluú mo e Faka-Kalisí ʻoku ʻi ai ʻa e ngaahi fakatātā lahi ʻo e kau tangata naʻe ʻi ai honau mafai naʻe tuku kiate kinautolu ʻe he ʻOtuá. Ko e hisitōlia ʻo e kau pēteliake, kau fakamaau mo e ngaahi tuʻi ʻo e kau Hepelū ʻo e kuonga muʻá ʻoku ʻomai ai ʻa e fakamoʻoni feʻunga ʻoku ʻomai ʻe Sihova ʻa e fakahinohinó fakafou ʻi he kau fakafofonga fakaetangata. ʻI he taimi naʻe ʻikai fakaʻapaʻapa totonu ai ʻa e kakaí ki he faʻahinga tāutaha ne fakanofó, naʻe akonekina kinautolu ʻe Sihova.​—2 Tuʻi 1:2-17; 2:19, 23, 24.

¹¹ ʻI ha tuʻunga meimei tatau, naʻe tali ʻe he kau Kalisitiane ʻi he ʻuluaki senitulí ʻa e mafai ʻo e kau ʻapositoló. (Ng. 2:42) Ko e fakatātaá, naʻe ʻoange ʻe Paula ʻa e fakahinohino ki hono ngaahi tokouá. (1 Kol. 16:1; 1 Tes. 4:2) Kae kehe, naʻá ne toe fakamoʻulaloa loto-lelei ki he faʻahinga naʻe ʻi ai honau mafai kiate iá. (Ng. 15:22; Kal. 2:9, 10) Ko e moʻoni, naʻe maʻu ʻe Paula ʻa e vakai totonu ki he mafai ʻi he fakatahaʻanga Kalisitiané.

12. Ko e hā ʻa e ongo lēsoni fekauʻaki mo e mafaí ʻe lava ke tau ako mei he ngaahi fakatātā ʻi he Tohi Tapú?

¹² ʻOku tafaʻaki ua ʻa e lēsoni ʻoku tau akó. ʻUluakí, ʻoku Fakatohitapu ki he “tamaioeiki agatonu mo boto” fakafou ʻi hono Kulupu Pulé ke fakanofo ha kau tangata ki ha ngaahi tuʻunga fua fatongia, pea ʻoku fakanofo leva ʻa e kau tangata ʻe niʻihi ke nau maʻu ʻa e mafai ki he kau tangata kehe kuo fakanofó. (Mt. 24:45-47, PM; 1 Pita 5:1-3) Ko hono uá, ko kitautolu hono kotoa, kau ai ʻa e kau tangata kuo fakanofó ʻoku totonu ke tau fakaʻapaʻapa ki he faʻahinga ʻoku ʻi ai honau mafai kia kitautolú. Ko e hā leva ʻa e ngaahi founga ʻe lava ke tau fakaʻapaʻapa ai ki he faʻahinga ʻoku nau maʻu ʻa e ngaahi tuʻunga tauhi ʻi he fakatahaʻanga Kalisitiane ʻi māmani lahí?

Fakahā ʻa e Fakaʻapaʻapa ki he Kau ʻOvasia Fefonongaʻakí

13. ʻE lava fēfē ke tau fakahāhā ʻa e fakaʻapaʻapa ki he kau fakafofonga ʻi onopooni ʻo e fakatahaʻanga Kalisitiané?

¹³ Naʻe fakahā ʻe Paula: “ʻOku mau kole kiate kimoutolu, kāinga, ke mou ʻilo ʻa kinautolu ʻoku fakafitefitaʻa ʻiate kimoutolu, pea ʻoku ʻanautolu homou puleʻi ʻi he ʻEiki, mo homou tākitalaʻi. Pea ke mou tokanga ʻofa ʻaupito ʻaupito kiate kinautolu, koeʻuhi ko siʻenau ngaue. Mou fekoekoeʻi.” (1 Tes. 5:12, 13) Ko e kau ʻovasia fefonongaʻakí ʻoku lau moʻoni kinautolu ʻi he faʻahinga “ʻoku fakafitefitaʻa.” Ko ia, tau ʻoange kiate kinautolu ʻa e “tokanga ʻofa ʻaupito ʻaupito.” Ko e founga ʻe taha ʻo e fai peheé ko hono tali loto-kakato ʻa ʻenau akonakí mo e fakalototoʻá. ʻI he taimi ʻoku fakahoko mai ai ʻe ha ʻovasia pehē ha fakahinohino  mei he tamaioʻeiki anga-tonú, ko e “poto ʻoku mei ʻolunga” te ne ueʻi kitautolu ke tau mateuteu ke talangofua.​—Sem. 3:17.

14. ʻOku anga-fēfē hono ʻoatu ʻe he fakatahaʻangá ʻa e fakamoʻoni ʻo e fakaʻapaʻapa loto-moʻoni ki he kau ʻovasia fefonongaʻakí, pea ko e hā hono olá?

¹⁴ Fēfē leva kapau ʻoku fakahinohino mai ke tau fai ʻa e ngaahi meʻá ʻi ha founga ʻoku kehe mei he meʻa ʻoku tau anga ki aí? Ko hono fakahāhā ʻa e fakaʻapaʻapá ʻe fiemaʻu nai ai ʻi he taimi ʻe niʻihi ke tau fakafepakiʻi ʻa e fakaʻaiʻai ke pehē, “ʻOku ʻikai ko e founga ia ʻoku mau fai ai heni ʻa e ngaahi meʻá” pe, “ʻE lava nai ia ʻi he ngaahi feituʻu kehé kae ʻikai ʻi heʻemau fakatahaʻangá.” ʻI hono kehé, ʻoku tau feinga ke talangofua. Ko hono tauhi maʻu ʻi heʻetau fakakaukaú ʻoku ʻa Sihova ʻa e fakatahaʻangá pea ko Sīsū ʻa hono ʻUlú ʻe tokoni ia ke tau fai pehē. ʻI he taimi ʻoku tali fiefia ai pea fakahoko ʻe he fakatahaʻangá ʻa e fakahinohino mei ha ʻovasia fefonongaʻaki, ko e fakamoʻoni ia ʻo e fakaʻapaʻapa loto-moʻoní. Naʻe fakaongoongoleleiʻi ʻe he ʻapositolo ko Paulá ʻa e ngaahi tokoua ʻi Kolinitoó ʻi heʻenau fakahāhā ʻa e talangofua anga-fakaʻapaʻapa ki he fakahinohino naʻe fai ʻe he mātuʻa ʻaʻahi ko Taitusí. (2 Kol. 7:13-16) ʻI he ʻahó ni, ʻoku pehē ʻa e malava ke tau fakapapauʻi ko e laumālie loto-lelei ʻoku tau ngāueʻaki ai ʻa e tataki ʻoku tau maʻu mei he kau ʻovasia fefonongaʻakí ʻoku tokoni lahi ia ki he fiefia ʻoku tau hokosia ʻi heʻetau ngāue fakamalangá.​—Lau ʻa e 2 Kolinito 13:11.

“Fakaʻapaʻapa ki he Tangata Taki Taha”

15. Ko e hā ʻa e ngaahi founga ʻoku tau fakahāhā ai ʻa e fakaʻapaʻapa ki he kaungātuí?

¹⁵ Naʻe tohi ʻe Paula: “ʻOua naʻa haʻaki valokiʻi ha motuʻa, ka ke fai fakaoleole pe ʻo hange ko hoʻo tamai; fai ki he kau talavou ʻo hange ko ho tokoua; ki he kau fineʻeiki ʻo hange ko hoʻo faʻe; ki he kau finemui ʻo hange ko ho tuofefine, ʻo matuʻaki angamaʻa. Tokangaʻi ʻa e kau fefine uitou ʻoku paea moʻoni.” (1 Tim. 5:1-3) ʻIo, ʻoku naʻinaʻi mai ʻa e Folofola ʻa e ʻOtuá ke tau fakaʻapaʻapa ki he tokotaha kotoa pē ʻi he fakatahaʻanga Kalisitiané. Fēfē kapau ʻoku ʻi ai ha fetōkehekeheʻaki fakafoʻituitui ʻiate koe mo ho tokouá pe tuofefiné? ʻE taʻofi nai ai koe mei hoʻo fakahoko ho fatongia ke fakaʻapaʻapa ki ho kaungā Kalisitiané? Pe ʻe lava ke ke fakatonutonu ʻa hoʻo fakakaukaú ʻaki hoʻo vakai ki he ngaahi ʻulungāanga fakalaumālie ʻo e sevāniti ko ia ʻa e ʻOtuá? ʻOku tautefito ki he faʻahinga ʻoku maʻu mafaí ʻa e totonu ke nau tauhi maʻu ha fakakaukau fakaʻapaʻapa ki honau ngaahi tokouá​—ʻo ʻoua ʻe “fakafieʻeiki . . . ki he fanga sipi.” (1 Pita 5:3) Ko e moʻoni, ʻi he fakatahaʻanga Kalisitiané, ʻa ia ʻoku fakaʻilongaʻiʻaki ʻa e ʻofa moʻoni ʻoku ʻi hono ngaahi mēmipá, ʻoku tau maʻu ai ʻa e ngaahi faingamālie lahi ke fefakaʻapaʻapaʻaki.​—Lau ʻa e Sione 13:34, 35.

16, 17. (a) Ko e hā ʻoku mahuʻinga ai ke tau fakaʻapaʻapa ʻo ʻikai ngata pē ki he faʻahinga ʻoku tau malanga ki aí kae pehē foki ki he kau fakafepakí? (e) ʻOku anga-fēfē ʻetau “fakaʻapaʻapa ki he tangata taki taha”?

 ¹⁶ Ko e moʻoni, ʻoku ʻikai ke fakangatangata ʻetau fakaʻapaʻapá ki he faʻahinga ko e konga ʻo e fakatahaʻanga Kalisitiané. Naʻe tohi ʻa Paula ki he kau Kalisitiane ʻi hono ʻahó: “Lolotonga ʻoku ta faingamalie ta ngaue ʻaonga ki he kakai kotoa pe.” (Kal. 6:10) Ko e moʻoni, ko hono ngāueʻaki ʻa e tefitoʻi moʻoni ko iá ʻe malava ke hoko ko ha pole kapau ʻoku ngaohikoviʻi kitautolu ʻe ha kaungāngāue pe kaungāako. ʻI he ngaahi mōmeniti peheé, ʻoku fiemaʻu ke tau manatuʻi ʻa e lea ko ení: “ʻOua te ke haʻaki hohaʻa koeʻuhi ko e kau faihala.” (Sāme 37:1) Ko hono ngāueʻaki ʻa e akonaki ko iá ʻe tokoni ia ke tau fakafeangai fakaʻapaʻapa ai pē ki he kau fakafepakí. ʻI he tuʻunga meimei tatau, ʻi heʻetau ʻalu atu ʻi he ngāue fakamalangá, ko ha vakai fakatōkilalo kiate kitautolu ʻe malava ke tokoni ia ke tau tali ʻaki ʻa e “anga-vaivai mo e ʻapasia loloto” ki he tokotaha kotoa. (1 Pita 3:15, NW) Naʻa mo hotau fōtungá mo hotau valá ʻe malava ke fakahaaʻi ai ʻoku tau fakaʻapaʻapa ki he faʻahinga ʻoku tau malanga ki aí.

¹⁷ Ko e moʻoni, pe ko ʻetau feangai mo hotau kaungātuí pe ko e faʻahinga ʻi tuʻa ʻi he fakatahaʻangá, ʻoku tau loto ke tau feinga ke ngāueʻaki ʻa e ekinaki: “Mou fakaʻapaʻapa ki he tangata taki taha; mou ʻofa ki he haʻa lotu; mou manavahe ki he ʻOtua; mou fakaʻapaʻapa ai pe ki he tuʻi.”​—1 Pita 2:17.

ʻE Fēfē Haʻo Tali?

ʻE lava fēfē ke ke fakahāhā ʻa e fakaʻapaʻapa totonu:

• Kia Sihova?

• Ki he kau mātuʻa ʻi he fakatahaʻangá mo e kau ʻovasia fefonongaʻakí?

• Ki he mēmipa taki taha ʻo e fakatahaʻangá?

• Ki he faʻahinga ʻokú ke malanga ki aí?

[Fehuʻi ki he Ako]

[Fakatātā ʻi he peesi 23]

Naʻe fakaʻapaʻapaʻi ʻe he kau Kalisitiane ʻi he ʻuluaki senitulí ʻa e tokangaʻi naʻe fai ʻe he kulupu pulé

[Fakatātā ʻi he peesi 24]

Ko e kau mātuʻa ʻi he fonua kotoa pē ʻoku nau fakaʻapaʻapa ki he kau ʻovasia fefonongaʻaki ʻoku fakanofo ʻe he Kulupu Pulé