ʻOku Siofi Kitautolu ʻe Sihova ki ha Lelei Pē Maʻatautolu

“Oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu ho nau loto kiate ia.”—2 KAL. 16:9, PM.

 1. Ko e hā ʻoku sivisiviʻi ai kitautolu ʻe Sihová?

 KO Sihová ko e Tamai haohaoa. ʻOkú ne ʻiloʻi lelei ʻaupito kitautolu ʻo ne lāuʻilo ʻo aʻu ki he “filioi [ʻetau] fakakaukau.” (1 Kal. 28:9, PM) Kae kehe, ʻoku ʻikai ke ne sivisiviʻi kitautolú koeʻuhi pē ke maʻu haʻatau faihala. (Sāme 11:4; 130:3) Ka, ʻokú ne fiemaʻu anga-ʻofa ke maluʻi kitautolu mei ha meʻa pē te ne maumauʻi nai hotau vahaʻangatae mo iá pe fakameleʻi ʻetau ʻamanaki ki hono maʻu ʻa e moʻui taʻengatá.—Sāme 25:8-10, 12, 13.

 2. ʻOku fakahāhā ʻe Sihova hono mālohí ki ha lelei maʻa hai?

² ʻOku taʻefakatataua ʻa Sihova ʻi he mālohí pea ʻokú ne ʻafioʻi ʻa e meʻa kotoa pē. ʻI he ʻuhinga ko iá, ʻoku lava ai ke ne hoko ʻo tokoni ki heʻene kau mateakí ʻi ha taimi pē ʻoku nau ui ai kiate ia, pea ʻoku malava ke ne tokoniʻi kinautolu he lolotonga honau ngaahi ʻahiʻahí. “Oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu [pe kakato] ho nau loto kiate ia,” ko e lau ʻa e 2 Kalonikali 16:9 (PM). Fakatokangaʻi ʻoku ngāueʻaki ʻe Sihova hono mālohí ki he lelei maʻá e faʻahinga ʻoku tauhi kiate ia ʻaki ha loto kakató, ha loto ʻoku maʻa mo moʻoni ʻi he taumuʻa. ʻOku ʻikai te ne fakahāhā ha tokanga pehē ki he faʻahinga ʻoku nau kākā pe mālualoí.—Sios. 7:1, 20, 21, 25; Pal. 1:23-33.

 ʻAʻeva mo e ʻOtuá

3, 4. ʻOku ʻuhinga ki he hā ʻa e pehē ke ‘aeva moe Otuá,’ pea ko e hā ʻa e ngaahi fakatātā ʻi he Tohi Tapú ʻokú ne tokoniʻi kitautolu ke mahinoʻi iá?

³ Ki he tokolahi, ʻoku ʻikai malava ke fakakaukau atu ʻe fakaʻatā ʻe he Tokotaha-Fakatupu ʻo hotau ʻuniveesi kāfakafá ʻa e faʻahinga ʻo e tangatá ke ʻaʻeva mo ia ʻi ha ʻuhinga fakalaumālie. Ka, ko e meʻa tofu pē ia ʻoku fiemaʻu mai ʻe Sihova ke tau faí. ʻI he ngaahi taimi ʻo e Tohi Tapú, ko ʻĪnoke mo Noa naʻá na ‘aeva moe Otuá.’ (Sen. 5:24; 6:9, PM) Ko Mōsese “naa ne fakakukafi, o hage oku ne mamata kiate ia oku tae ha mai.” (Hep. 11:27, PM) Naʻe ʻiloʻi ʻe Tuʻi Tēvita naʻá ne ʻaʻeva fakatōkilalo fakataha mo ʻene Tamai fakahēvaní. Naʻá ne pehē: “Ko e meʻa ʻi heʻene ʻi hoku toʻomataʻu [ʻa Sihová] ko ia ai ʻe ʻikai te u ngaūe.”—Sāme 16:8.

⁴ Ko e moʻoni, heʻikai malava ke tau fetakinima moʻoni kitautolu mo Sihova ʻo tau ʻaʻeva mo ia. Ka ʻoku malava ke tau fai pehē ʻi ha ʻuhinga fakaefakatātā. Anga-fēfē? ʻOku tohi ʻe he tokotaha-tohi-saame ko ʻĒsafé: “Ko ia ʻoku ta feʻao maʻu: Kuo ke puke hoku toʻomataʻu. Te ke faleʻi au, ʻo taki hala.” (Sāme 73:23, 24) ʻI hono ʻai mahinó, ʻoku tau ʻaʻeva mo Sihova ʻi heʻetau muimui ofi ʻi heʻene akonakí, ʻa ia ʻoku tau maʻu tefito ia fakafou ʻi heʻene Folofola tohí pea fakafou mai ʻi he “tamaioeiki agatonu mo boto.”—Mt. 24:45, PM; 2 Tim. 3:16.

 5. ʻOku anga-fēfē hono siofi ʻe Sihova ʻene kau mateakí ʻi he tuʻunga ko ha tamai ʻofá, pea ʻoku totonu ke fēfē ʻetau ongoʻi kiate iá?

⁵ Koeʻuhi ʻoku lotoʻaki ʻe Sihova ʻa e faʻahinga ʻoku ʻaʻeva mo iá, ʻokú ne siofi kinautolu ʻi hono tuʻunga ko ha tamai ʻofa, ʻo tokanga kiate kinautolu, maluʻi kinautolu, mo akoʻi kinautolu. “Ko au teu fakabotoʻi koe mo akonakiʻi koe i he hala aia te ke alu ai,” ko e folofola ia ʻa e ʻOtuá. “Teu fakahinohino koe aki hoku mata.” (Sāme 32:8, PM) ʻEke hifo kiate koe: ‘ʻOku ou sioloto atu ʻoku ou ʻaʻeva fetakinima mo Sihova, ʻo hangē ko e laú, ʻo fanongo ki hono potó mo ʻiloʻi ʻoku ʻiate au hono fofonga ʻofá? ʻOku hanga ʻe heʻeku lāuʻilo ki heʻene ʻi aí ʻo tākiekina ʻeku ngaahi fakakaukaú, ngaahi leá, mo ʻeku ngaahi ngāué? Pea ʻi he taimi ʻoku ou faihala aí, ʻoku ou sio kia Sihova, ʻo ʻikai ko ha ʻOtua ia ʻoku loto-momoko mo anga-fefeka, ka ko ha Tamai ʻofa mo faimeesi ʻokú ne loto ke tokoniʻi ʻa e kau fakatomalá ke nau toe maʻu ha vahaʻangatae vāofi mo ia?’—Sāme 51:17.

 6. Ko e hā ʻa e meʻa ʻoku fakalaka ai ʻa Sihova ʻi ha mātuʻa fakaetangata?

⁶ ʻI he taimi ʻe niʻihi, ʻoku tokoniʻi nai kitautolu ʻe Sihova naʻa mo e ki muʻa ke tau kamata fou atu ʻi ha ʻalunga ʻoku hala. Ko e fakatātaá, ʻokú ne fakatokangaʻi nai ʻoku kamata hotau loto ʻoku hehema ke kākaá ke holi ki he ngaahi meʻa ʻoku taʻetotonu. (Sel. 17:9) ʻI ha tuʻunga pehē, ʻoku lava ke ne ngāue ʻo vave ʻaupito ange ia ʻi he malava ʻa e ngaahi mātuʻa fakaetangatá koeʻuhi ʻoku malava ʻa hono “lauʻifofonga” ke sio loloto ki loto ʻiate kitautolu, ke sivisiviʻi ʻetau ngaahi fakakaukau taupotu tahá. (Sāme 11:4; 139:4; Sel. 17:10) Fakakaukau atu ki he tali ʻa e ʻOtuá ki ha tuʻunga naʻe hoko ʻi he moʻui ʻa Palukí, ko e sekelitali mo e kaumeʻa ofi ʻo e palōfita ko Selemaiá.

Ko ha Tamai Moʻoni kia Paluki

7, 8. (a) Ko hai ʻa Paluki, pea ko e hā ʻa e ngaahi holi ʻikai lelei naʻe kamata nai ke tupulekina ʻi hono lotó? (e) Naʻe anga-fēfē hono fakahaaʻi ʻe Sihova ʻene tokanga fakatamai kia Palukí?

⁷ Ko Palukí ko ha sikalaipe pōtoʻi naʻe ngāue faitōnunga fakataha mo Selemaia ʻi he meʻa naʻe hoko ko ha ngafa faingataʻa—ko hono fanongonongo ʻa e fakamaau ʻa Sihova ki Siutá. (Sel. 1:18, 19) ʻI ha tuʻunga, naʻe kamata ai ʻa Paluki, ʻa ia naʻá ne kau nai ki ha fāmili tuʻu-ki-muʻa, ke ne kumi ki ha “ngaahi meʻa lalahi” maʻana. Mahalo naʻe kamata ke ne fakatupulekina ha ngaahi taumuʻa pe ko ha holi ki ha tuʻumālie fakamatelie. Tatau ai pē pe ko e hā, naʻe ʻafioʻi ʻe Sihova ko e fakakaukau fakatuʻutāmaki ko ʻení naʻe tupulekina ia ʻi he loto ʻo Palukí. ʻI he folofola ʻo fakafou ʻia Selemaia, naʻe fakahaaʻi vave ai ʻe Sihova ʻa e meʻá ni, ʻo ne pehē kia Paluki: “ʻOku ke pehe koā, ʻOiaue kita! he kuo hilifaki ʻe Sihova ha mamahi ki hoku loto kuo lavea: ʻoku ou ongosia ʻi heʻeku tautoʻe, pea ʻoku ʻikai te u maʻu ha nonga.” Naʻe pehē leva ʻe he ʻOtuá: “ʻOku ke kumi koā maʻau ha ngaahi meʻa lalahi? ʻOua ʻe kumi.”—Sel. 45:1-5.

⁸ Neongo naʻá ne folofola mālohi kia Paluki, naʻe fai ia ʻe Sihova, ʻo ʻikai ʻi he ʻita, ka ʻi he tokanga fakatamai moʻoni. ʻOku hā mahino, naʻe ʻafioʻi ʻe he ʻOtuá naʻe ʻikai ke hā mei he ngaahi holi ʻa e tangatá ni ha loto ʻoku kovi pe kākā. Naʻe  toe ʻiloʻi ʻe Sihova ko Selusalema mo Siutá naʻá na ʻi hona ngaahi ʻaho fakaʻosí, pea naʻe ʻikai te ne loto ke tūkia ʻa Paluki ʻi he taimi tauhaʻa ko iá. Ko ia ai, ke fakafoki mai ʻene sevānití ki he meʻa moʻoní, naʻe fakamanatu ʻe he ʻOtuá kiate ia ʻokú ne teu ke “ʻomi ha kovi ki he kakano, hono kotoa,” ʻo tānaki atu ki ai kapau ʻe ngāue fakapotopoto ʻa Paluki, te ne moʻui. (Sel. 45:5) Ko hono moʻoní, naʻe pehē ʻe he ʻOtuá: ‘Ke ke tokanga, Paluki. Tauhi maʻu ʻi ho ʻatamaí ʻa e meʻa ʻe vavé ni ke hoko ki Siuta mo Selusalema faihalá. Hanganaki talangofua pea te ke moʻui! Te u maluʻi koe.’ ʻOku hā mahino naʻe aʻu ʻa e folofola ʻa Sihová ki he loto ʻo Palukí, he naʻá ne fai ha tali lelei pea hao ai ʻi he fakaʻauha ʻo Selusalemá, ʻa ia naʻe hoko ʻi he taʻu ʻe 17 ki mui ai.

 9. ʻE anga-fēfē haʻo tali ʻa e ngaahi fehuʻi ʻoku ʻohake ʻi he palakalafí?

⁹ ʻI hoʻo fakakaukau atu ki he fakamatala fekauʻaki mo Palukí, fakakaukau angé ki he ngaahi fehuʻi mo e ngaahi konga Tohi Tapu ko ʻení: Ko e hā ʻoku fakahaaʻi mai ʻe he founga ʻo e fakafeangai ʻa e ʻOtuá kia Palukí ʻo fekauʻaki mo Sihova pea mo ʻene ngaahi ongoʻi ki heʻene kau sevānití? (Lau ʻa e Hepelu 12:9.) Koeʻuhi ko e ngaahi taimi faingataʻa ko ʻeni ʻoku tau moʻui aí, ko e hā ʻe lava ke tau ako mei he akonaki ʻa e ʻOtuá kia Palukí pea mei he tali ki ai ʻa Palukí? (Lau ʻa e Luke 21:34-36.) ʻI he faʻifaʻitaki kia Selemaiá, ʻe lava fēfē ke fakahaaʻi ʻe he kau mātuʻa Kalisitiané ʻa e tokanga ʻa Sihova ki Heʻene kau sevānití?—Lau ʻa e Kaletia 6:1.

Tapua Mai ʻi he ʻAló ʻa e ʻOfa ʻa e Tamaí

10. ʻOku anga-fēfē hono teuʻi ʻo Sīsū ke ne fakahoko hono tuʻunga ko e ʻUlu ʻo e fakatahaʻanga Kalisitiané?

¹⁰ ʻI he lolotonga ʻo e kuonga ki muʻa ʻi he Kalisitiané, naʻe fakahaaʻi ʻa e ʻofa ʻa Sihova ki hono kakaí ʻo fakafou ʻi heʻene kau palōfitá mo e kau sevāniti faitōnunga kehe. ʻI he ngaahi ʻahó ni, ʻoku mātā ia, ʻo mahulu hake ʻi ha toe meʻa, ʻi he ʻUlu ʻo e fakatahaʻanga Kalisitiané, ʻa Sīsū Kalaisi. (Ef. 1:22, 23) Ko ia ai, ʻi he tohi ʻa Fakahaá, ʻoku fakatātaaʻi ai ʻa Sīsū ko ha lami ʻoku “mata fitu, ʻa ia ko e Laumalie Fitu ʻo e ʻOtua ʻa ia ne fekau atu ki mamani.” (Fkh. 5:6) ʻIo, ʻi hono fakaiviaʻaki ʻa e laumālie māʻoniʻoni kakato ʻo e ʻOtuá, ʻoku maʻu ai ʻe Sīsū ʻa e ʻilo haohaoa. ʻOku toe kau mo Sīsū ʻi hono ʻiloʻi ʻa e meʻa ʻoku ʻi hotau lotó, pea ʻoku ʻikai ha meʻa te ne taʻeʻilo.

11. Ko e hā ʻa e ngafa ʻoku fakahoko ʻe Kalaisí, pea ʻoku anga-fēfē hono tapua mai ʻe heʻene vakai kiate kitautolú ʻa e vakai mai ʻa ʻene Tamaí?

¹¹ Neongo ia, ʻi he hangē ko Sihová, ʻoku ʻikai ko ha polisi fakalangi ʻa Sīsū. ʻOkú ne sivisiviʻi kitautolu ʻi he tuʻunga ko ha tamai ʻofa. Ko e taha ʻo e ngaahi hingoa fakalakanga ʻo Sīsuú, ko e “Tamai Taʻengata,” ʻokú ne fakamanatu mai kiate kitautolu ʻa e ngafa te ne fakahoko ʻi hono foaki ʻa e moʻui taʻengatá ki he faʻahinga kotoa ʻoku nau  ngāueʻi ʻa e tui kiate iá. (Ai. 9:6 [Ai 9:5, PM]) ʻIkai ngata aí, ʻi he tuʻunga ko e ʻUlu ʻo e fakatahaʻanga Kalisitiané, ʻoku malava ai ʻe Kalaisi ke ne ueʻi ʻa e kau Kalisitiane matuʻotuʻa fakalaumālie mo loto-leleí, tautefito ki he kau mātuʻá, ke nau tokonaki mai ʻa e fakafiemālie pe akonaki ki he faʻahinga ʻoku fiemaʻu ki aí.—1 Tes. 5:14; 2 Tim. 4:1, 2.

12. (a) Ko e hā ʻoku fakahaaʻi mai ʻe he ngaahi tohi ki he ngaahi fakatahaʻanga ʻe fitu ʻi ʻĒsia Mainá ʻo fekauʻaki mo Sīsuú? (e) ʻOku anga-fēfē hono fakahaaʻi ʻe he kau mātuʻá ʻa e vakai ʻa Kalaisi ki he tākanga ʻa e ʻOtuá?

¹² Ko e mahuʻingaʻia lahi ʻa Kalaisi ʻi he tākangá ʻoku hā ia ʻi he ngaahi tohi ki he kau mātuʻa ʻo e ngaahi fakatahaʻanga ʻe fitu ʻi ʻĒsia Mainá. (Fkh. 2:1–3:22) ʻI aí, ʻoku fakahaaʻi fakatouʻosi ai ʻe Sīsū ʻa ʻene lāuʻilo ki he meʻa naʻe hoko ʻi he fakatahaʻanga taki taha pea mo e lahi ʻo ʻene tokanga ki hono kau muimuí. ʻOku kaungatonu tatau pē ia ʻi he ʻahó ni—pea toe lahi ange—koeʻuhi ko e vīsone ʻi he tohi Fakahaá ʻoku fakahoko ia he lolotonga ʻo e “ʻaho ʻo e ʻEiki.” a (Fkh. 1:10) ʻOku faʻa fakahaaʻi ʻa e ʻofa ʻa Kalaisí ʻo fakafou mai ʻi he kau mātuʻá, ʻa ia ʻoku nau ngāue ko e kau tauhi-sipi fakalaumālie ʻo e fakatahaʻangá. ʻOku malava ke ne ueʻi ʻa e “ngaahi meʻaʻofa [ko ʻeni] ʻi he kau tangata” ke nau fai ʻa e fakafiemālie, fakalototoʻa, pe akonaki ʻi he taimi ʻoku fiemaʻu aí. (Ef. 4:8, NW; Ng. 20:28; lau ʻa e Aisea 32:1, 2.) ʻOkú ke vakai ki heʻenau ngaahi feingá ko ha fakahāhā ia ʻo e mahuʻingaʻia fakafoʻituitui ʻa Kalaisi ʻiate koé?

Tokoni ʻi he Taimi Totonu

13-15. ʻI he founga fē ʻoku fili nai ai ʻa e ʻOtuá ke tali ʻetau ngaahi lotú? ʻOmai ha ongo fakatātā.

¹³ Kuó ke lotu tōtōivi ʻi ha taimi ki ha tokoni pea maʻu ha tali fakafou mai ʻi ha ʻaʻahi fakalototoʻa mei ha tokotaha Kalisitiane matuʻotuʻa fakalaumālie? (Sem. 5:14-16) Pe mahalo pē naʻe haʻu ʻa e tokoní ʻi ha malanga ʻi ha fakataha faka-Kalisitiane pe fakamatala ʻi he taha ʻo ʻetau ʻū tohí. ʻOku faʻa tali ʻe Sihova ʻa e ngaahi lotú ʻi he ongo foungá ni. Ko e fakatātaá, ʻi he hili hono fai ha malanga, naʻe fakaofiofi atu ki ha tokotaha mātuʻa ha tuofefine ʻa ia ʻi he ngaahi uike ki muʻa ʻi he malangá naʻá ne tofanga ai ʻi he fakamaau taʻetotonu lahi ʻaupito. ʻI he ʻikai ke ne lāunga fekauʻaki mo ʻene palopalemá, naʻá ne fakahaaʻi ʻa e houngaʻia loloto ʻi he ngaahi poini fakatohitapu pau ʻi he malangá. Naʻa nau kaungatonu ki hono tuʻungá pea naʻá ne maʻu ai ha fiemālie lahi. He fiefia lahi ē ka ko ia ʻi heʻene maʻu ʻa e fakataha ko iá!

¹⁴ ʻI he fekauʻaki mo e tokoni ʻoku maʻu fakafou ʻi he lotú, fakakaukau angé ki he kau tangata pōpula ʻe toko tolu ʻa ia naʻa nau ʻilo ki he moʻoni ʻo e Tohi Tapú he lolotonga ʻenau nofo pōpulá pea nau hoko ai ko e kau malanga teʻeki papitaiso. Koeʻuhi ko ha tōʻonga fakamālohi naʻe hoko, naʻe toʻo ai ha ngaahi faingamālie mei he kotoa ʻo e kau pōpula ʻi he ʻapi pōpulá. Naʻe langaʻi ʻe he meʻá ni ha angatuʻu. Naʻe fakapapauʻi ai ʻe he kau pōpulá ko e hili ko ia ʻa e kai pongipongi ʻi he pongipongi hono hokó heʻikai te nau fakafoki ʻenau ngaahi peletí, ko ha fakahaaʻi ia ʻo ha fakafetau. Naʻe ʻi ha tuʻunga leva ʻo e fili faingataʻa ʻa e kau malanga teʻeki papitaiso ko ʻeni ʻe toko tolú. Kapau naʻa nau kau ʻi he angatuʻú, te nau maumauʻi ʻa e akonaki ʻa Sihova ʻoku hā ʻi he Loma 13:1. Kapau naʻe ʻikai te nau kau ki ai, te nau ʻamanekina leva ha sāuni mei he kaungā pōpula ʻitá.

¹⁵ ʻI he taʻemalava ke nau fetuʻutaki ʻiate kinautolú, naʻe lotu ʻa e kau tangata ʻe toko tolú ni ki ha poto. ʻI he pongipongi hono hokó, ne ʻilo ai ʻe he toko tolú ni naʻa nau fili ki he fakaleleiʻanga tatau tofu pē—heʻikai te nau kai pongipongi. ʻI he taimi ne haʻu ai ʻa e kau leʻó ki mui ai ke tānaki ʻa e ʻū peletí, naʻe ʻikai ha meʻa ia ke fakafoki atu ʻe he kau  tangata ʻe toko tolú. He fiefia ē ko kinautolu ʻi he ofi ʻiate kinautolu ʻa e tokotaha “Tali lotu”!—Sāme 65:2.

Hanga Atu ki he Kahaʻú mo e Loto-Falala

16. ʻI he founga fē ʻoku fakahāhaaʻi ai ʻe he ngāue fakamalangá ʻa e tokanga ʻa Sihova ki he faʻahinga hangē ha sipí?

¹⁶ Ko e ngāue fakamalanga ʻi māmani lahí ko e toe fakamoʻoni ia ʻo e tokanga ʻa Sihova ki he faʻahinga loto-totonú, ʻi ha feituʻu pē ʻoku nau nofo ai. (Sen. 18:25) Ko Sihova, ʻi heʻene faʻa ngāueʻaki ha tataki fakaeʻāngeló, ʻoku lava ke ne tataki ai ʻene kau sevānití ki he faʻahinga hangē ha sipí—neongo kapau ʻoku nofo ʻa e faʻahingá ni ia ʻi ha ngaahi feituʻu ʻoku teʻeki ai ke aʻu ki ai ʻa e ongoongo leleí. (Fkh. 14:6, 7) Ko e fakatātaá, fakafou ʻi ha ʻāngelo, naʻe tataki ai ʻe he ʻOtuá ʻa Filipe, ko ha ʻevangeliō ʻo e ʻuluaki senitulí, ke ne kumi ki ha ʻōfisa ʻItiopea ʻo fakamatalaʻi kiate ia ʻa e Tohi Tapú. Ko e hā hono olá? Naʻe tali ʻe he tangatá ʻa e ongoongo leleí pea hoko ko ha tokotaha muimui ʻosi papitaiso ʻo Sīsū. b—Sione 10:14; Ng. 8:26-39.

17. Ko e hā ʻoku ʻikai totonu ai ke tau loto-moʻua tōtuʻa fekauʻaki mo e kahaʻú?

¹⁷ ʻI he ngaʻunu atu ʻa e ngaahi meʻa ʻo e fokotuʻutuʻu lolotongá ki hono ngataʻangá, ʻe hokohoko atu ʻa e “langā” naʻe tomuʻa talá. (Mt. 24:8) Ko e fakatātaá, ʻoku ʻalu lahi hake nai ʻa e ngaahi totongi ʻo e meʻakaí koeʻuhi ko e fakautuutu ʻa e fiemaʻú, kovi ʻa e ʻeá, pe fetōʻaki fakaʻekonōmiká. ʻOku hoko nai ʻo faingataʻa ange ke maʻu ha ngāue, pea ʻoku hoko nai ai ʻo tofanga ʻa e kau ngāué ʻi he tenge mālohi ke ngāue ʻi ha ngaahi houa lahi ange. Pe ko e hā pē meʻa ʻoku hokó, ko e faʻahinga kotoa ʻoku nau hanganaki fakamuʻomuʻa ʻa e ngaahi meʻa fakalaumālié pea tauhi maʻu ha ‘mata huʻufatahá’ ʻoku ʻikai fiemaʻu ia ke nau loto-moʻua tōtuʻa. ʻOku nau ʻiloʻi ʻoku ʻofa ʻa e ʻOtuá ʻiate kinautolu pea te ne tokangaʻi kinautolu. (Mt. 6:22-34) Ko e fakatātaá, fakakaukau atu ki he founga ʻo e tokonaki ʻa Sihova maʻa Selemaia ʻi he taimi ʻo e ngataʻanga taʻemanonga ʻo Selusalema ʻi he 607 K.M.

18. Naʻe anga-fēfē hono fakamoʻoniʻi ʻe Sihova ʻene ʻofa kia Selemaiá he lolotonga ʻo e ʻākoloʻi ʻo Selusalemá?

¹⁸ ʻI he lolotonga ʻo e konga ki mui ʻo hono ʻākoloʻi ʻe Pāpilone ʻa Selusalemá, naʻe tuku pilīsone ai ʻa Selemaia ʻi he Lotoʻā ʻo e Kaʻaté. Te ne maʻu fēfē ha meʻakai? Kapau naʻá ne tauʻatāina, naʻe mei lava ke ne kumi ki haʻane meʻakai. Kae kehe, naʻe fakatuʻunga fakaʻaufuli ia ʻi he faʻahinga takatakai ʻiate iá, ʻa ia ko e tokolahi tahá naʻa nau fehiʻa ʻiate ia! Ka naʻe falala ʻa Selemaia ia ʻo ʻikai ki he tangatá ka ki he ʻOtuá, ʻa ia naʻá ne talaʻofa te ne tokangaʻi ia. Naʻe fai ʻa Sihova ki heʻene leá? ʻAupito! Naʻá ne fakapapauʻi ʻoku maʻu fakaʻaho ʻe Selemaia “ha foʻi ma . . . kaeʻoua ke ʻosiʻosingamalie ʻa e ma ʻi he kolo.” (Sel. 37:21) Ko Selemaia, pea pehē kia Paluki, ʻĒpeti-meleki, mo e niʻihi kehe, naʻa nau hao ʻi he taimi ʻo e honge, mahaki, pea mo e maté.—Sel. 38:2; 39:15-18.

19. ʻI heʻetau hanga atu ki he kahaʻú, ko e hā ʻoku totonu ko ʻetau fakapapaú ia?

¹⁹ ʻIo, “ko e ongo foʻi fofonga ʻo e ʻEiki [pe Sihova] ʻoku na siofi ʻa e maʻoniʻoni; pea ko hono ongo telinga ʻoku fakafanongo ki haʻanau lotu.” (1 Pita 3:12) ʻOkú ke fiefia ʻi he fakasio tokanga mai ʻa hoʻo Tamai fakahēvaní? ʻOkú ke ongoʻi malu mo hao ʻi he ʻilo ʻoku siofia koe ʻe hono fofongá ki haʻo lelei? Ko ia ai, fakapapauʻi ke hokohoko atu hoʻo ʻaʻeva mo e ʻOtuá—tatau ai pē pe ko e hā ʻe hoko mai ʻi he kahaʻú. ʻOku lava ke tau fakapapauʻi ʻe hokohoko atu maʻu ai pē ʻa e sio lelei mai mo e tokanga fakatamai ʻa Sihova ki he kotoa ʻo ʻene kau mateakí.—Sāme 32:8; lau ʻa e Aisea 41:13.

[Fakamatala ʻi lalo]

ʻE Lava Ke Ke Fakamatalaʻi?

• ʻE lava fēfē ke tau fakahāhā ʻoku tau ‘ʻaʻeva mo e ʻOtuá’?

• Naʻe anga-fēfē hono fakahāhaaʻi ʻe Sihova ʻene ʻofá kia Palukí?

• ʻI he tuʻunga ko e ʻUlu ʻo e fakatahaʻanga Kalisitiané, ʻoku anga-fēfē hono tapua mai ʻe Sīsū ʻa e ngaahi ʻulungāanga ʻo ʻene Tamaí?

• ʻI he ngaahi founga fē ʻe lava ke tau fakahāhā ai ʻoku tau falala ki he ʻOtuá ʻi he lolotonga ʻa e ngaahi taimi faingataʻá ni?

[Fehuʻi ki he Ako]

[Fakatātā ʻi he peesi 9]

ʻI he hangē ko Selemaia mo Palukí, ʻoku tapua mai ʻe he kau mātuʻa Kalisitiane ʻi he ʻaho ní ʻa e tokanga ʻa Sihová

[Fakatātā ʻi he peesi 10]

ʻE anga-fēfē nai hono tokonaki mai ʻe Sihova ʻa e tokoní ʻi he taimi totonú?