“Ko Sihova ʻa Hoku Malohinga”

Fakamatala fai ʻe Joan Coville

Naʻe fāʻeleʻi au ʻi Siulai 1925 ʻi Huddersfield, ʻIngilani. Naʻá ku toko taha pē pea naʻá ku mahamahaki. Ko hono moʻoní naʻe faʻa pehē ʻe heʻeku tamaí, “Ko e teʻeki ai pē lave mai ʻa e havilí ko hoʻo puké ia.” Pea naʻe ngali moʻoni ia!

ʻI HEʻEKU kei siʻí, naʻe lotu tōtōivi ai ʻa e kau faifekaú ke ʻi ai ha melino, ka ʻi he taimi naʻe mapuna hake ai ʻa e tau ua ʻa māmaní, naʻa nau lotu ʻo kole ki ha ikuna. Naʻá ku puputuʻu ʻi he meʻá ni pea naʻe fakatupunga ai ke u veiveiua. ʻI he taimi pē ko iá, naʻe haʻu ai ki homau ʻapí ʻa Annie Ratcliffe, ʻa ia ko e Fakamoʻoni ʻa Sihova pē ia ʻe taha naʻe nofo ʻi homau feituʻú.

Ako ʻa e Moʻoní

Naʻe tuku mai ʻe Annie ʻiate kimautolu ʻa e tohi ko e Salvation peá ne fakaafeʻi ʻa e fineʻeikí ke ne kau ki ha fetalanoaʻaki Fakatohitapu ʻa ia ʻe fai ʻi hono ʻapí. a Naʻe kole mai ʻe heʻeku faʻeé ke ma ō ki ai. ʻOku ou kei manatuʻi pē ʻa e ʻuluaki fetalanoaʻaki ko iá. Naʻe fekauʻaki ia mo e huhuʻí, pea ʻi heʻeku ʻohovalé, naʻe ʻikai ʻaupito ke fakapipiko ʻa e fetalanoaʻakí. Naʻe tali ai ʻeku ngaahi fehuʻi lahi. ʻI he uike hono hokó naʻá ma toe ō ai ki ai. ʻI he taimi ko iá, naʻe fakamatalaʻi ai ʻa e kikite ʻa Sīsū fekauʻaki mo e fakaʻilonga ʻo e ngaahi ʻaho fakaʻosí. ʻI he sio ki he ngaahi tuʻunga fakamamahi ʻi he māmaní, naʻá ku mahinoʻi ai pē mo e fineʻeikí ko e moʻoní ia. ʻI he ʻaho tatau pē, naʻe fakaafeʻi ai kimaua ke ma ō ki he Fale Fakatahaʻangá.

ʻI he holó, naʻá ku fetaulaki ai mo ha kau tāimuʻa kei iiki, pea naʻe kau ai ʻa Joyce Barber (Ellis he taimí ni), ʻa ia ʻokú ne kei ngāue mo hono husepānití, ko Peter, ʻi he Pēteli ʻi Lonitoní. Naʻá ku fakakaukau au ko e tāimuʻá ko e meʻa ia naʻe fai ʻe he tokotaha kotoa pē. Ko ia ai, ʻi he taimi pē ko iá naʻá ku kamata malanga ai ʻi he houa ʻe 60 ʻi he māhina kotoa pē, neongo naʻá ku kei ako.

ʻI he māhina ʻe nima ki mui ai, ʻi Fepueli 11, 1940, naʻá ku papitaiso ai mo ʻeku fineʻeikí ʻi ha ʻasemipilī fakasēketi ʻi Bradford. Naʻe ʻikai fakafepakiʻi ʻe he tangataʻeikí ʻa ʻema tui foʻoú, ka naʻe ʻikai ʻaupito ke ne kau ki he moʻoní. ʻI he taimi nai naʻá ku papitaiso aí, naʻe kamata ai ʻa e faifakamoʻoni ʻi he ngaahi tuliki halá. Naʻá ku kau ki ai, ʻou toʻo ha kato makasini mo ha ngaahi papa tuʻuaki. ʻI he Tokonaki ʻe taha, naʻe vaheʻi mai ai ke u tuʻu ʻi he tafaʻaki femoʻuekina taha ʻo ha feituʻu faiʻanga fakatau. Naʻá ku kei manavahē tangata, pea ko e meʻa tofu pē naʻá ku manavahē ki aí ko e meʻa ia naʻe hokó, ne hangē ne fou kotoa mai hoku ngaahi kaungāakó ʻi he tuliki naʻá ku tuʻu aí!

ʻI he 1940 ko e fakatahaʻanga ʻa ia naʻá ma kau ki aí naʻe fiemaʻu ke vaeua. Hili hono fakahoko iá, ko e meimei kotoa ʻo hoku toʻumeʻá naʻa nau kau kinautolu ki he fakatahaʻanga ʻe tahá. Naʻá ku lāunga fekauʻaki mo eni ki he ʻovasia tauhí. Naʻá ne  pehē mai, “Kapau ʻokú ke fiemaʻu ha ngaahi kaungāmeʻa kei siʻi, ʻalu ʻo kumi kiate kinautolu ʻi he malaʻe malangá.” Pea ko e meʻa tofu pē ia naʻá ku faí! ʻIkai fuoloa mei ai, naʻá ku fetaulaki ai mo Elsie Noble. Naʻá ne tali ʻa e moʻoní peá ne hoko leva ai ko hoku kaumeʻa tuʻuloa.

Ngāue Tāimuʻá mo Hono Ngaahi Tāpuakí

ʻI he ʻosi mei he akó, naʻá ku ngāue ai ki ha ʻakauniteni. Kae kehe, ʻi heʻeku sio ki he fiefia naʻe maʻu ʻe he kau sevāniti taimi-kakató, naʻe tupulaki ai ʻeku holi ke tauhi kia Sihova ʻi he hoko ko ha tāimuʻá. ʻI Mē 1945, naʻá ku maʻu ai ʻa e fiefia ʻi he kamata ke u ngāue ko ha tāimuʻa makehe. Lolotonga ʻa hoku ʻuluaki ʻaho ʻi he ngāue tāimuʻá, naʻe ʻuha lahi e ʻaho kotoa ko iá. Neongo ia, naʻá ku fiefia ʻaupito ʻi he ʻalu he ngāue fakamalangá ʻo ʻikai haʻaku tokanga ʻe taha ki he ʻuhá. Ko hono moʻoní, ʻi he ʻalu he ʻaho kotoa mo e fakamālohisino maʻu pē heʻeku pasikalá ʻi he ngāue fakafaifekaú naʻe kau ia ki heʻeku moʻui lelei. Neongo kuo teʻeki ai ʻaupito laka hake hoku mamafá ʻi he kilokalami ʻe 42, kuo teʻeki ai ha taimi ʻe taʻofi ai ʻeku ngāue tāimuʻá. ʻI he faai mai ʻa e ngaahi taʻú, kuó u aʻusia tonu ai ʻa e moʻoniʻi meʻa ko ia “ko Sihova ʻa hoku malohinga.”—Sāme 28:7.

ʻI he taumuʻa ko ia ke kamataʻi ha ngaahi fakatahaʻanga foʻoú, naʻe fekauʻi ai au ʻi hoku tuʻunga ko ha tāimuʻa makehé ki he ngaahi kolo naʻe ʻikai ha Kau Fakamoʻoní. Naʻá ku ʻuluaki ngāue taʻu ʻe tolu ʻi ʻIngilani pea hoko atu leva ʻi he taʻu ʻe tolu ʻi ʻAilani. Lolotonga ʻeku tāimuʻa ʻi Lisburn, ʻAilaní, naʻá ku ako ai mo ha tangata ʻa ia ko ha faifekau tokoni ʻi ha siasi Palotisani. ʻI heʻene ako ʻa e moʻoni fekauʻaki mo e ngaahi tokāteline Fakatohitapu tefitó, naʻá ne akoʻi ʻa e ʻilo foʻou naʻá ne maʻú ki hono siasí. Naʻe lāunga ai ʻa e niʻihi ʻo kinautolu ki he kau maʻu mafai ʻi he siasí, pea ko hono moʻoní naʻe fiemaʻu ai ke ne fai ha fakamatala. Naʻá ne pehē ʻokú ne ongoʻi ko hono fatongia faka-Kalisitiane ia ke tala ki he tākangá kuó ne akoʻi kiate kinautolu ʻa e ngaahi loi lahi. Neongo naʻe fakafepaki lahi kiate ia ʻa hono fāmilí, naʻá ne fakatapui ʻene moʻuí kia Sihova pea tauhi faitōnunga kiate ia ʻo aʻu ki heʻene maté.

ʻI Larne, ko hoku vāhenga-ngāue tāimuʻa hono ua ia ʻi ʻAilaní, naʻá ku ngāue toko taha ai ʻi he uike ʻe ono, koeʻuhi naʻe ʻalu ʻa hoku hoa tāimuʻá ki he ʻAsemipilī Tupulekina Fakateokalatí ʻi Niu ʻIoke, ʻi he 1950. Ko ha taimi faingataʻa ia kiate au. Naʻá ku fakaʻamu ke ʻi he ʻasemipilií. Neongo ia, lolotonga ʻa e ngaahi uike ko iá, naʻá ku maʻu ai ha ngaahi hokosia fakalototoʻa ʻi he malaʻe malangá. Naʻá ku fetaulaki ai mo ha tangata taʻumotuʻa ʻa ia naʻá ne tali ʻa e taha ʻo ʻetau ʻū tohí laka hake he taʻu ʻe 20 ki muʻa. ʻI he faai mai ʻa e ngaahi taʻú, naʻá ne lau tā tuʻo lahi ia ʻo ne meimei maʻuloto. Naʻá ne tali ʻa e moʻoní fakataha mo hono fohá mo hono ʻofefiné.

Maʻu ʻa e Ako ʻi he Akoʻanga Kiliatí

ʻI he 1951, naʻe fakaafeʻi ai au fakataha mo e kau tāimuʻa kehe ʻe toko hongofulu mei ʻIngilani, ke kau ki he kalasi hono 17 ʻo e Akoʻanga Kiliatí ʻi South Lansing, Niu ʻIoke. ʻOi, he fiefia ē ko au ʻi he fakahinohino Fakatohitapu naʻa mau maʻu lolotonga ʻa e ngaahi māhina ko iá! ʻI he taimi ko iá, ne teʻeki ke kau ʻa e fanga tuofāfiné ʻi he Ako Fakafaifekau Fakateokalati ʻi he ngaahi fakatahaʻanga fakalotofonuá, ka ʻi Kiliati ko kimautolu fanga tuofāfiné naʻa mau maʻu ʻa e ngaahi konga ke fai ai ha malanga mo e fakamatala. Naʻa mau manavasiʻi ʻaupito! ʻI heʻeku ʻuluaki malangá, naʻe tete ai hoku nimá ʻi hono pukepuke ʻeku noutí. Ko e faiakó, ko Tokoua Maxwell Friend, naʻá ne pehē mai ʻi ha fakakata: “Naʻe ʻikai ngata  pē ʻi hoʻo manavasiʻi ʻi he kamatá, ʻo hangē ko ia ʻoku hoko ki he kau malanga lelei kotoa pē, ka naʻá ke manavasiʻi ai pē ʻo aʻu ki heʻene ʻosi.” Lolotonga ʻa e akó, naʻa mau fakalakalaka kotoa ʻi heʻemau malava ke fai ha fakamatala ʻi muʻa ʻi he kalasí. Naʻe vave ʻaupito e ʻosi ʻemau akó, pea naʻe vaheʻi kimautolu, kau maʻu tohi fakamoʻoni akó ki ha ngaahi fonua muli. Ko hoku vāhenga-ngāué ko Taileni!

“Ko e Fonua Fofonga Malimalí”

Naʻá ku fakakaukau ko ha meʻaʻofa ia meia Sihova ʻa hono vaheʻi mai ʻa Astrid Anderson ke hoko ko hoku hoa misinale ʻi Tailení. Naʻe feʻunga mo e uike ʻe fitu ʻema folau ʻi ha vaka uta koloa peá ma toki aʻu ki ai. ʻI heʻema tūʻuta he kolomuʻá, ʻa Bangkok, naʻá ma sio ai ki ha kolo ne moʻumoʻua hono ngaahi māketí pea mo hano halanga vaka fefonongaʻaki. ʻI he 1952, naʻe tokosiʻi hifo ai ʻi he toko 150 ʻa e kau malanga ʻo e Puleʻangá ʻi Taileni.

ʻI heʻema ʻuluaki sio ki he Taua Leʻo ʻi he lea faka-Tailení, naʻá ma fifili, ‘ʻE malava fēfē ke faifai ange peá ma lava ke lea ʻi he lea ko iá?’ Naʻe faingataʻa tautefito ke leaʻaki ʻa e ngaahi foʻi leá ʻi he fasi totonú. Ko e fakatātaá, ko e foʻi lea khaù ʻi hono leaʻaki ʻi ha fasi naʻe kamata tō māʻolunga pea toki tō hifo ki laló ʻoku ʻuhinga iá ko e “laise,” ka ko e foʻi lea tatau ʻi hono leaʻaki fakataha mo ha leʻo matolú ʻoku ʻuhinga iá ko e “ongoongo.” Ko ia ʻi he taimi naʻá ma ʻalu ai ʻi he ngāue fakamalangá, naʻá ma muʻaki femoʻuekina ai ʻi hono tala ki he kakaí, “ʻOku ou haʻu kiate koe mo e laise lelei” kae ʻikai ko e “ongoongo lelei”! Ka naʻe faifai atu pē—pea ʻi he hili ʻa e kata lahi—naʻá ma poto he leá.

Ko e kakai Tailení ʻoku nau anga-fakakaumeʻa ʻaupito. ʻOku feʻungamālie ai ʻa hono ui ʻa Taileni ko e Fonua Fofonga Malimalí. Ko homa muʻaki vāhenga-ngāué ko e kolo ko Khorat (ko Nakhon Ratchasima ia he taimí ni), ʻa ia naʻá ma ngāue ai ʻi he taʻu ʻe ua. Ki mui ai, naʻe vaheʻi kimaua ki he kolo ko Chiang Mai. Ko e tokolahi taha ʻo e kau Tailení ʻoku nau lotu Puta pea ʻoku ʻikai te nau maheni mo e Tohi Tapú. Naʻá ku ako ʻi Khorat mo e pule pōsiti ʻōfisí. Naʻá ma talanoa ai ʻo fekauʻaki mo e pēteliake ko ʻĒpalahamé. ʻI he ʻosi fanongo ki muʻa ʻa e tangatá ʻi he hingoa ʻĒpalahamé, naʻá ne kamokamo ʻi he loto-māfana. Kae kehe, naʻá ku toki ʻiloʻi ʻe au naʻe ʻikai te ma talanoa kimaua fekauʻaki mo e ʻĒpalahame tatau. Naʻe fakakaukau ʻa e pule pōsiti ʻōfisí ia kia ʻĒpalahame Lincoln, ʻa e palesiteni ki muʻa ʻo ʻAmeliká!

Naʻá ma fiefia ʻi hono akoʻi ʻa e Tohi Tapú ki he kau Taileni loto-totonú, ka ʻi he taimi tatau, naʻe akoʻi kimaua ʻe he kakai Tailení ki he founga ke fiefia ai ʻi he nofo ʻi ha moʻui faingofua. Naʻe mahuʻinga ʻa e lēsoni ko iá, he ʻi he ʻuluaki ʻapi misinale ʻi Khorat, naʻe ʻikai haʻama ʻuhila pe tepi vai. ʻI he ngaahi vāhenga-ngāue peheé, naʻá ma ‘potopotoʻi ai ʻi he nofo mohumeʻá mo e nofo masivá.’ ʻI he hangē ko e ʻapositolo ko Paulá, naʻá ma hokosia ai ʻa e ʻuhinga ʻo e “mafeia ʻa e meʻa kotoa pe ʻiate ia ʻoku ne fakakaukaua” kimauá.—Fili. 4:12, 13.

Hoa Foʻou mo ha Vāhenga-Ngāue Foʻou

ʻI he 1945, naʻá ku ʻaʻahi ai ki Lonitoni. Lolotonga ʻa e ʻaʻahi ko iá, naʻá ku ʻalu ai ki he Misiume Pilitāniá fakataha mo e kau tāimuʻa kehe pea mo e kau ngāue Pēteli. Ko e taha ʻo kinautolu ko Allan Coville, ʻa ia naʻá ne kau ʻi he taimi nounou mei ai ki he kalasi hono 11 ʻi Kiliatí. Naʻe vaheʻi ia ki Falanisē peá ne hoko atu ai ki Pelisiume. b Ki mui mai, lolotonga ʻeku kei ngāue ko ha misinale ʻi Tailení, naʻá ne kole mai ai ke ma mali, pea naʻá ku tali ʻa ʻene kolé.

Naʻá ma mali ʻi Brussels, Pelisiume, ʻi Siulai 9, 1955. Naʻá ku fakaʻānaua maʻu pē ke u ʻalu ki Pālesi ʻi heʻeku hanimuní, ko ia naʻe fokotuʻutuʻu ai ʻe Allan ke ma maʻu ha ʻasemipilī ʻi ai ʻi he uike hoko maí. Kae kehe, ʻi heʻema aʻú atu pē, naʻe kole leva ʻa Allan ke ne tokoni ʻi he tuʻunga ko ha tokotaha fakatonulea ʻi he kotoa ʻo e ʻasemipilií. ʻI he ʻaho kotoa pē, naʻe pau ai ke ne mavahe pongipongia, pea naʻá ma toki foki pē ki homa nofoʻangá kuo fuoloa e poʻulí. Ko ia naʻá ku fakahoko ai ʻeku hanimuní ʻi Pālesi, ka naʻá ku meimei sio pē ai kia Allan ʻi he mamaʻó—ki he peletifōmú! Neongo ia, naʻá ku fiefia ʻi he sio ki hono ngāueʻaki ʻa hoku husepāniti foʻoú ke ne ngāue maʻa hono fanga tokouá mo e fanga tuofāfiné, pea naʻe ʻikai haʻaku veiveiua ʻo kapau ko Sihova ʻa e tokotaha mahuʻinga taha ʻi heʻema nofo malí, te ma fiefia moʻoni.

 Naʻe toe ʻave au ʻi heʻeku nofo malí ki ha feituʻu ngāue fakamalanga foʻou—ko Pelisiume. Ko e meimei meʻa pē naʻá ku ʻilo fekauʻaki mo Pelisiumé ko ʻene hoko ko ha malaʻe tau ʻi he ngaahi tau lahi, ka naʻe vave ʻeku ʻiloʻi ko e tokolahi taha ʻo e kau Pelisiumé ko hono moʻoní ʻoku nau ʻofa ki he melinó. Ko ʻeku vāhenga-ngāué naʻe toe ʻuhinga aí naʻe pau ke u ako ʻa e lea faka-Falaniseé, ʻa ia ʻoku leaʻaki ʻi he tafaʻaki fakatonga ʻo e fonuá.

ʻI he 1955 naʻe ʻi ai ʻa e kau malanga ʻe toko 4,500 ʻi Pelisiume. ʻI he meimei taʻu ʻe 50, naʻá ku ngāue ai mo Allan ʻi he Pētelí pea ʻi he ngāue fefonongaʻakí. Ko e fuofua taʻu ʻe ua mo e kongá, naʻá ma fononga pasikala ai, ʻo hake mo hifo ʻi he moʻungá, ʻo tatau ai pē ʻi he ʻuha mo e laʻā. ʻI he faai mai ʻa e ngaahi taʻú, naʻá ma mohe ai ʻi he ngaahi ʻapi kehekehe ʻo e kaungā Fakamoʻoni laka hake he 2,000! Naʻá ku faʻa feʻiloaki mo e fanga tokoua mo e fanga tuofāfine ʻa ia naʻe ʻikai te nau sino mālohi ka naʻa nau ngāue kia Sihova ʻaki honau iví kotoa. Ko ʻenau faʻifaʻitakiʻangá naʻe fakalotolahiʻi ai au ke ʻoua te u foʻi ʻi heʻeku ngāué. ʻI he ngataʻanga ʻo e uike taki taha naʻá ma ʻaʻahi ai ki ha fakatahaʻangá, naʻá ma ongoʻi langa hake maʻu pē ai. (Loma 1:11, 12) Naʻe hoko ʻa Allan ko ha kaumeʻa moʻoni. He moʻoni ē ko e ngaahi lea ʻi he Koheleti 4:9, 10: “ʻOku ngutuhuaange ke toko ua ʻi heʻete toko taha; . . . he kapau te na to, ʻe lava ʻe he taha ke ʻohake hono kaumeʻa”!

Tāpuaki mei ha Moʻui ʻo e Ngāue ʻi he ‘Malohinga ʻo Sihová’

ʻI he faai mai ʻa e ngaahi taʻú, naʻá ku maʻu ai mo Allan ʻa e ngaahi hokosia fakafiefia lahi ʻi hono tokoniʻi ʻa e niʻihi kehé ke nau tauhi kia Sihova. Hangē ko ení, ʻi he 1983 naʻá ma ʻaʻahi ai ki he fakatahaʻanga Falanisē ʻi Antwerp, ʻa ia naʻá ma nofo ai mo ha fāmili ʻa ia naʻa nau toe talitali ʻa Benjamin Bandiwila, ko ha tokoua kei talavou mei Sāie (Lepupilika Temokalati ʻo Kongó ia he taimí ni). Naʻe hiki ʻa Benjamin ki Pelisiume ke kumi ki ha ako māʻolunga ange. Naʻá ne tala mai kia kimaua, “ʻOku ou fakaʻamua moʻoni ʻa e moʻui ʻokú mo maʻú, ʻi hono līʻoa kakato ki he ngāue ʻa Sihová.” Naʻe tali ange ʻe Allan: “ʻOkú ke pehē ʻokú ke fakaʻamua ʻa e moʻui ʻokú ma maʻú; lolotonga ia ʻokú ke tuli koe ki ha ngāue fakamāmani. ʻOkú ke fakakaukau ʻoku hoamālie?” Ko e fakamatala hangatonu ko ia naʻe faí naʻá ne ʻai ʻa Benjamin ke ne fakakaukau fekauʻaki mo ʻene moʻuí. Ki mui ai ʻi heʻene foki ki Sāié, naʻá ne kamata ngāue tāimuʻa, pea ʻokú ne ngāue he lolotongá ni ko ha mēmipa ʻo e Kōmiti Vaʻá.

ʻI he 1999, naʻe fai ai ʻa hoku tafa ke toʻo ha mataʻi pala mei hoku mongá. Talu mei ai mo e kilokalami pē ʻe 30 hoku mamafá. Ko ha “hina kelekele” ngāvaivai moʻoni au. Neongo ia, ʻoku ou houngaʻia ʻi hono ʻomai kiate au ʻe Sihova ʻa e “makehe atu ʻo e mafai.” Hili ʻa hoku tafá, naʻá ne ʻai ke u toe malava ʻo ʻalu fakataha mo Allan ʻi he ngāue fefonongaʻakí. (2 Kol. 4:7) Pea ʻi Maʻasi 2004, naʻe mālōlō ai ʻa Allan ʻi he lolotonga ʻene mohé. ʻOku ou ongoʻi ʻaupito ʻene pulí, ka ʻoku ou fiemālie ʻi heʻeku ʻiloʻi ʻokú ne ʻi he manatu ʻa Sihová.

ʻI he ʻahó ni, ʻi hoku taʻu 83, ʻoku ou sio atu ai ki he taʻu laka hake he 63 ʻo e ngāue taimi-kakató. ʻOku ou kei longomoʻui pē ʻi he ngāue fakafaifekaú, ʻi hono fai ha ako Tohi Tapu ʻi ʻapi pea ʻi hono ngāueʻaki ʻa e ngaahi faingamālie ʻi he ʻaho ki he ʻaho ke lea ai ʻo fekauʻaki mo e taumuʻa fakaofo ʻa Sihová. ʻI he taimi ʻe niʻihi ʻoku ou fifili ai, ‘Naʻe mei fēfē ʻeku moʻuí kapau naʻe ʻikai te u kamata tāimuʻa ʻi he 1945?’ ʻI he taimi ko iá, ko ʻeku mahamahakí naʻe hā ngali ko ha ʻuhinga lelei ia ke ʻoua ʻe fai pehē ai. Kae kehe, he houngaʻia moʻoni ē ko au ʻi heʻeku fai ʻa e ngāue tāimuʻá ʻi heʻeku kei siʻí! Kuó u hokosia fakafoʻituitui ʻa e monū ko ia ʻo kapau te tau fakamuʻomuʻa ʻa Sihova, te ne hoko ko hotau mālohinga.

[Fakamatala ʻi lalo]

[Fakatātā ʻi he peesi 18]

Mo hoku hoa misinale ko Astrid Anderson (ʻi he toʻomataʻú)

[Fakatātā ʻi he peesi 18]

ʻI he ngāue fefonongaʻakí mo hoku husepānití, 1956

[Fakatātā ʻi he peesi 20]

Mo Allan ʻi he 2000