Ko e Hā ʻOkú Ke Loto-Lelei ke Tukuange Atu ka ke Moʻuí?
Ko e Hā ʻOkú Ke Loto-Lelei ke Tukuange Atu ka ke Moʻuí?
“Ko e ha ha meʻa ʻe ʻatu ʻe he tangata ke fakatau ʻaki mai ʻene moʻui?”—MT. 16:26.
1. Ko e hā naʻe talitekeʻi ai ʻe Sīsū ʻa e fakatonutonu ʻa Pitá?
NAʻE ʻikai mei faʻa lava ke tui ʻa Pita ki he meʻa naʻá ne fanongo ki aí. Ko hono Taki ʻofeiná, ʻa Sīsū Kalaisi, naʻá ne “tala fakapatonu” naʻe vavé ni ke Ne faingataʻaʻia pea pekia! ʻI he tali ki aí, naʻe hanga ʻe Pita—ʻoku ʻikai ha veiveiua ko ʻene taumuʻa lelei—ʻo fakatonutonu ʻa Sīsū, ʻo ne pehē: “[“Ke ke anga-ʻofa kiate koe,” NW] mole ke mamaʻo, ʻEiki. ʻE ʻikai ʻaupito hoko ha meʻa pehe kiate koe.” Naʻe sītuʻa ʻa Sīsū kia Pita peá ne sio ki he kau ʻapositolo kehé. ʻOku pau pē ne nau maʻu mo kinautolu foki ʻa e fakakaukau fehālaaki ko ʻení. Naʻá ne pehē leva kia Pita: “Tuʻu ki mui, Setane: ko hoku tūkiaʻanga koe: he ʻoku ʻikai ko e ngāhi meʻa fakaeʻotua ʻoku sio ki ai ho loto, ka ko e ngāhi meʻa fakaetangata.”—Mk. 8:32, 33; Mt. 16:21-23.
2. Naʻe anga-fēfē hono fakamatalaʻi ʻe Sīsū ʻa e ngaahi meʻa naʻe fiemaʻu mei ha ākonga moʻoní?
2 Ko e ngaahi lea hono hoko ʻa Sīsuú naʻá ne tokoniʻi nai ʻa Pita ke sio ki he ʻuhinga ʻo e tali mālohi ange ʻa Sīsū ki heʻene fakatonutonú. Naʻe hanga ʻe Sīsū ʻo ‘ui ae kakaí mo ene kau akogá foki’ peá ne pehē: “Ko ia ia oku loto ke muimui iate au, ke ne jiaki eia ia, kae too ene kavega, o muimui iate au. He ko ia ia oku loto ke kalofaki ene moui, e mole ia: ka ko ia ia e mole ene moui koeuhi ko au moe ogoogolelei, e maʻu eia ia.” (Mk. 8:34, 35, PM) ʻOku hā mahino, naʻe ʻikai ngata pē ʻi he teu atu ke ne feilaulauʻi ʻene moʻuí ka naʻá ne toe ʻamanekina foki ʻa e faʻahinga naʻe muimui ʻiate iá ke nau mateuteu ke feilaulauʻi ʻenau moʻuí ʻi he ngāue ʻa e ʻOtuá. Kapau naʻa nau fai ia, te nau maʻu ha pale lahi fau.—Lau ʻa e Mātiu 16:27.
3. (a) Ko e hā ʻa e ongo fehuʻi naʻe ʻeke ʻe Sīsū ki heʻene kau fanongó? (e) Ko e hā ʻa e meʻa naʻe fakamanatu nai ʻe he fehuʻi hono ua ʻa Sīsuú ki heʻene kau fanongó?
3 ʻI he taimi tatau pē ko iá, naʻe ʻeke ʻe Sīsū ha ongo fehuʻi fakatupu fakakaukau: “Ko e ha hono ʻaonga ki ha tangata ke maʻu ʻa māmani kātoa ʻi heʻene ngāue, kae mole ai ʻene moʻui?” mo e, “Ko e ha ʻe ʻatu ʻe he tangata ke fakatau ʻaki mai ʻene moʻui?” (Mk. 8:36, 37) Ko e tali ki he ʻuluaki fehuʻí ʻoku ʻosi mahino pē ia ki he fakakaukau ʻa e tangatá. ʻOku ʻikai hano ʻaonga ʻe taha ki ha tangata ke ne maʻu ʻa e māmaní kotoa kapau ʻe mole ʻene moʻuí. ʻOku ʻaonga pē ʻa e koloá kapau ʻoku moʻui ha taha ke ne fiefia ai. Ko e fehuʻi hono ua ʻa Sīsuú: “Ko e ha ʻe ʻatu ʻe he tangata ke fakatau ʻaki mai ʻene moʻui?” naʻá ne fakamanatu nai ki heʻene kau fanongó ʻa e taukave naʻe fai ʻe Sētane ʻi he taimi ʻo Siopé: “ʻE ʻatu ʻe ha tangata ʻene meʻa kotoa telia ʻene moʻui.” (Siope 2:4) ʻE moʻoni nai ʻa e ngaahi lea ʻa Sētané ki he faʻahinga ʻoku ʻikai ke nau lotu kia Sihová. ʻE fai ʻe he tokolahi ha meʻa pē, siʻaki ha faʻahinga tefitoʻi moʻoni pē, koeʻuhí pē ka nau moʻui. Ka ʻoku kehe ʻa e anga ia ʻo e vakai ʻa e Kalisitiané.
4. Ko e hā ʻoku ʻuhinga loloto ange ai ki he kau Kalisitiané ʻa e ongo fehuʻi ʻa Sīsuú?
4 ʻOku tau ʻiloʻi naʻe ʻikai ke haʻu ʻa Sīsū ki he māmaní ke ʻomai kiate kitautolu ʻa e moʻui lelei, koloa, pea mo ha moʻui fuoloa ʻi he māmani ko ʻení. Naʻá ne haʻú ke fakaava ʻa e faingamālie ʻo e moʻui taʻengata ʻi he māmani foʻoú, pea ko e ʻamanaki ʻo e moʻui ko iá ʻa e meʻa ʻoku tau fakamahuʻingaʻi lahí. (Sione 3:16) Ko ha Kalisitiane te ne mahinoʻi ʻoku ʻuhinga ʻa e ʻuluaki fehuʻi ʻa Sīsuú, “Ko e hā hano ʻaonga ki ha tangata ke ne maʻu mai ʻa māmani kātoa kae mole ai ʻa ʻene ʻamanaki ki he moʻui taʻengatá?” Ko e tali ki aí, ʻOku ʻikai hano ʻaonga ʻe taha. (1 Sione 2:15-17) Ke tokoniʻi kitautolu ke tau tali ʻa e fehuʻi hono ua ʻa Sīsuú, te tau ʻeke hifo nai kiate kitautolu, ‘Ko e hā ʻa e lahi ʻoku ou loto-lelei ke feilaulauʻi he taimí ni ke ʻai ke papau ʻa ʻeku ʻamanaki ʻo e moʻui ʻi he māmani foʻoú?’ Ko ʻetau tali ki he fehuʻi ko iá, ʻo hangē ko ia ʻoku hā ʻi heʻetau founga moʻuí, ʻoku fakahaaʻi ai ʻa e mālohi ʻo e ʻamanaki ko iá ʻi hotau lotó.—Fakafehoanaki mo e Sione 12:25.
5. ʻE lava fēfē ke tau maʻu ʻa e meʻaʻofa ʻo e moʻui taʻengatá?
5 Ko e moʻoni, naʻe ʻikai ke pehē ʻe Sīsū ʻe lava ke tau maʻu ʻa e moʻui taʻengatá ko ha totongi ia ʻo ha ngāue te tau fai. Ko e moʻuí—naʻa mo ʻetau moʻui fuonounou ʻi he fokotuʻutuʻu ko ʻení—ko ha meʻaʻofa ia. ʻE ʻikai lava ke tau fakatau mai ia pe fai ha meʻa pē ke tau tuha ai mo ia. Ko e founga pē taha ʻe lava ke tau maʻu ai ʻa e meʻaʻofa ʻo e moʻui taʻengatá ko ʻetau “tui kia Kalaisi Sisu” pea mo Sihova, ʻa e tokotaha “te ne hanga ʻo totongi kiate kinautolu ʻoku kumi hākili kiate ia.” (Kal. 2:16; Hep. 11:6) Neongo ia, ko e tuí kuo pau ke fakahaaʻi ia ʻaki ʻa e ngāue, koeʻuhi “ʻoku mate ʻa e tui ʻo ka mavahe mo e ngaue.” (Sem. 2:26) Ko ia ai, ʻi heʻetau fakalaulauloto lahi ange ki he fehuʻi ʻa Sīsuú, ʻe lelei ke tau fakakaukau fakamātoato ki he lahi ʻo e meʻa ʻoku tau loto-lelei ke tuku ange ʻi he fokotuʻutuʻu ko ʻení pea mo e meʻa ʻoku tau loto-lelei ke fai ʻi he ngāue ʻa Sihová ke fakahaaʻi moʻoni ai ʻoku moʻui ʻa ʻetau tuí.
“Nae Ikai Fakafiemalie a Kalaisi Eia”
6. Ko e hā ʻa e meʻa naʻe muʻomuʻa kia Sīsuú?
6 ʻI he ʻikai holi ki he meʻa naʻe tuʻuaki mai ʻe he māmaní ʻi hono taimí, naʻe hangataha ʻa Sīsū ia ki he ngaahi meʻa mahuʻingá peá ne talitekeʻi ʻa e tauhele ʻo e tuli siokita ki he meʻa fakamatelié. Ko ʻene moʻuí ko ha moʻui ia ʻo e feilaulau mo e talangofua ki he ʻOtuá. ʻI he ʻikai fai ki hono loto ʻoʻoná, naʻá ne pehē: “ʻOku ou fai maʻuaipē ʻa e ngaahi meʻa ʻoku ne hōhōʻia ai.” (Sione 8:29) Ko e hā ʻa e lahi naʻe loto-lelei ʻa Sīsū ke fai koeʻuhi ke fakahōifuaʻi ʻa e ʻOtuá?
7, 8. (a) Ko e hā ʻa e feilaulau naʻe fai ʻe Sīsuú, pea naʻe anga-fēfē hono fakapaleʻi iá? (e) Ko e hā ʻa e fehuʻi ʻoku totonu ke tau ʻeke hifo kiate kitautolú?
7 ʻI he taimi ʻe taha, naʻe tala ʻe Sīsū ki heʻene kau ākongá: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mt. 20:28) Ki muʻa atu, ʻi he taimi naʻe kamata fakatokanga ai ʻa Sīsū ki hono kau muimuí kuo vavé ni ke ne “tuku” ange ʻene moʻuí, naʻe fakalotoʻi ia ʻe Pita ke ne anga-ʻofa kiate ia. Neongo ia, naʻe tuʻu maʻu pē ʻa Sīsū. Naʻá ne tuku ange loto-lelei ʻene moʻuí, ʻa ʻene moʻui fakaetangata haohaoá, maʻá e faʻahinga ʻo e tangatá. Ko e ola ʻo hono ʻalunga taʻesiokitá, naʻe malu ai ʻa e kahaʻu tonu ʻo Sīsuú. Naʻe fokotuʻu hake ia pea “hakeakiʻi e he nima toomatau oe Otua.” (Ng. 2:32, 33, PM) Naʻá ne hoko ai ko ha faʻifaʻitakiʻanga fisifisimuʻa maʻa kitautolu.
8 Naʻe ekinaki ʻa e ʻapositolo ko Paulá ki he kau Kalisitiane ʻi Lomá ke ʻoua te nau “fakafiemalie kiate” kinautolu pē peá ne fakamanatu ange “nae ikai fakafiemalie a Kalaisi eia.” (Loma 15:1-3, PM) Ko ia ai, ko e hā hono lahi te tau ngāueʻaki ai ʻa e ekinaki ko ia ʻa e ʻapositoló pea mo e lahi ʻoku tau loto-lelei fakafoʻituitui ke feilaulauʻi ʻi he faʻifaʻitaki kia Kalaisí?
ʻOku Fiemaʻu ʻe Sihova ʻEtau Lelei Tahá
9. Ko e hā ʻoku fai moʻoni ʻe ha Kalisitiane ʻi he taimi ʻokú ne fakatapui ai ki he ʻOtuá?
9 ʻI ʻIsileli ʻo e kuonga muʻá, naʻe fakahaaʻi mahino ai ʻe he Lao ʻa Mōsesé ko e kau tamaioʻeiki Hepeluú naʻe pau ke fakatauʻatāinaʻi kinautolu ʻi he taʻu hono fitu ʻo ʻenau ngāué pe ʻi he lolotonga ʻo e taʻu Siupelí. Kae kehe, naʻe toe ʻi ai ha fili ʻe taha maʻa kinautolu. Kapau naʻe hoko ʻo ʻofa ha tamaioʻeiki ʻi hono ʻeikí, naʻe lava ke ne fili ke nofo ai pē ko e tamaioʻeiki ki he fāmili ko iá ʻi he toenga ʻo ʻene moʻuí. (Lau ʻa e Teutalonome 15:12, 16, 17.) ʻOku tau fai ʻa e fili meimei tatau ʻi he taimi ʻoku tau fakatapui ai ki he ʻOtuá. ʻOku tau tali loto-lelei ke fai ʻa e finangalo ʻo e ʻOtuá, ʻo ʻikai muimui ʻi heʻetau ngaahi hehemá pē. ʻI he fai peheé, ʻoku tau fakahāhā ai ʻetau ʻofa loloto kia Sihová pea mo ʻetau holi ke tauhi kiate ia ʻo taʻengatá.
10. ʻI he founga fē ko e meʻa ai ʻa kitautolu ʻa e ʻOtuá, pea ʻoku totonu ke fēfē ʻa e kaunga ʻa e moʻoniʻi meʻa ko iá ki heʻetau fakakaukaú mo e tōʻongá?
10 Kapau ʻokú ke lolotonga ako ʻa e Tohi Tapú mo e Kau Fakamoʻoni ʻa Sihová, kau ʻi hono malangaʻi ʻa e ongoongo leleí, pea maʻu ʻa e ngaahi fakataha faka-Kalisitiané, ʻoku fakaongoongoleleiʻi atu koe. ʻOku mau ʻamanaki pē ʻe vavé ni haʻo ongoʻi ʻokú ke fie fakatapui koe kia Sihova peá ke ʻeke ʻa e fehuʻi naʻe ʻeke ʻe he ʻItiopeá kia Filipé: “ʻOku ai ha meʻa ʻoku taʻofi ki haku papitaiso?” (Ng. 8:35, 36) ʻE hangē leva ho vahaʻangatae mo e ʻOtuá ko e kau Kalisitiane ʻa ia naʻe tohi ki ai ʻa Paula ʻo pehē: “ʻOku ʻikai ʻamoutolu ʻa kimoutolu . . . He naʻe fakatau kimoutolu ʻaki ha totongi.” (1 Kol. 6:19, 20) Tatau ai pē pe ʻoku tau maʻu ʻa e ʻamanaki fakahēvaní pe ko e ʻamanaki ki māmaní, kapau kuo tau ʻosi fakatapui kitautolu kia Sihova, ko e meʻa kitautolu ʻAʻana. Tā he mahuʻinga ē, ke lōmia ʻa e ngaahi holi siokitá pea ‘ʻoua ʻe hoko ko e popula ʻa e kakaí’ pe tangatá! (1 Kol. 7:23) He monū moʻoni ia ke hoko ko ha sevāniti mateaki kia Sihova ʻo hoko ʻo ngāueʻaki ki hono finangaló!
11. Ko e hā ʻa e feilaulau ʻoku fakalototoʻaʻi ʻa e kau Kalisitiané ke nau faí, pea ʻoku ʻuhinga moʻoni ia ki he hā, ʻo hangē ko ia naʻe fakatātaaʻi ʻe he ngaahi feilaulau ʻi he malumalu ʻo e Lao ʻa Mōsesé?
11 Naʻe naʻinaʻi ʻa Paula ki hono ngaahi kaungātuí: “Mou ʻatu ʻa e ngaahi sino ʻomoutolu ko e feilaulau, ke moʻui, ke tapu ki he ʻOtua, ke fakahōifua kiate ia—ko e fakaloto e ʻo hoʻomou fai e lotu.” (Loma 12:1) Ko e ngaahi lea ko iá naʻá ne fakamanatu nai ki he kau Kalisitiane Siú ʻa e ngaahi feilaulaú ʻa ia ko ha konga ia ʻo ʻenau lotú ki muʻa ke nau hoko ko e kau muimui ʻo Sīsuú. ʻOku pau pē naʻa nau ʻiloʻi ʻi he malumalu ʻo e Lao ʻa Mōsesé, ko e ngaahi monumanu naʻe ʻomai ki he feilaulau ʻi he ʻōlita ʻo Sihová naʻe fiemaʻu ki ai ʻa e lelei taha ʻe ala maʻú. Ko ha monumanu pē naʻe mele naʻe ʻikai tali ia. (Mal. 1:8, 13) Ko e meʻa tatau pē ʻi he taimi ʻoku tau foaki atu ai hotau sinó ko ha ‘feilaulau moʻui.’ ʻOku tau ʻoatu ʻetau lelei tahá kia Sihova, kae ʻikai ko ha kiʻi toenga pē ʻi he hili ʻetau fakalato kotoa ʻetau ngaahi holi fakafoʻituituí. ʻI heʻetau fakatapui kitautolu ki he ʻOtuá, ʻoku tau foaki fakaʻaufuli atu ai ʻetau moʻuí kiate ia—ʻo kau ai ʻa hotau mālohí, koloá mo e malavá. (Kol. 3:23) ʻOku anga-fēfē ʻetau fai ʻení?
Ngāueʻaki Fakapotopoto ʻa Ho Taimí
12, 13. Ko e hā ʻa e founga ʻe taha ʻe lava ke tau ʻoatu ai kia Sihova ʻetau lelei tahá?
12 Ko e founga ʻe taha ke ʻoange ai kia Sihova ʻetau lelei tahá ko ʻetau ngāueʻaki fakapotopoto hotau taimí. (Lau ʻa e Efeso 5:15, 16.) ʻOku fiemaʻu ki ai ʻa e mapuleʻi-kitá. Ko e tākiekina ʻa e māmaní fakataha mo e taʻehaohaoa tukufakaholó ʻokú ne fakahehemaʻi kitautolu ke tau ngāueʻaki ʻataʻatā pē hotau taimí ki he meʻa ʻoku tau fiefia aí pe ki heʻetau maʻu ʻaonga fakafoʻituituí. Ko e moʻoni, “ko e meʻa kotoa ʻoku ai hano taimi,” ʻo kau ai ʻa e mālōlō fakatupu fiefiá pea mo e ngāue paʻanga ke malava ke fakahokoʻaki hotau ngaahi fatongia faka-Kalisitiané. (Koh. 3:1) Kae kehe, ʻoku fiemaʻu ki ha Kalisitiane ʻosi fakatapui ke ne mafamafatatau pea ngāueʻaki fakapotopoto hono taimí.
13 ʻI he ʻaʻahi ʻa Paula ki ʻAtenisí, naʻá ne fakatokangaʻi “ko e kau Atenisi kotoa pe, mo e muli naʻe ʻāunofo ai, naʻe ʻikai te nau fai ha meʻa kehe, ka ko e nofo pe ke lau meʻa foʻofoʻou, pe ke fanongo meʻa pehē.” (Ng. 17:21) ʻI he ʻahó ni, ʻoku fakamoleki noaʻia ai ʻe he tokolahi honau taimí ʻi he tuʻunga meimei tatau. Ko e ngaahi fakalelu ʻi onopooni ʻo kau ai ʻa e mamata televīsoné, vaʻinga he ngaahi keimi vitioó pea mo e vakavakai holo ʻi he ʻInitanetí. ʻOku ʻalu pē ke toe lahi ange ʻa e ngaahi meʻa ʻe lava ke ne fakahohaʻasi kitautolu ʻo mole noa ai ʻa e taimí. Kapau te tau fakavaivai ki he ngaahi meʻá ni, te tau liʻaki nai ai ʻetau ngaahi fiemaʻu fakalaumālié. Te tau hoko nai ai ʻo tui ʻoku tau fuʻu femoʻuekina kitautolu ke tokanga ki he “ngaahi meʻa ʻoku lelei lahi” angé—ʻa e ngaahi meʻa ʻoku fekauʻaki mo e tauhi kia Sihová.—Fili. 1:9, 10.
14. Ko e hā ʻa e ngaahi fehuʻi ʻoku tuha ke tau fakakaukau fakamātoato ki ai?
14 Ko ia ai, ʻi he tuʻunga ko e sevāniti ʻosi fakatapui ʻa Sihova, ʻeke hifo angé kiate koe, ‘ʻOku kau ʻi heʻeku taimi-tēpile fakaʻahó ʻa e taimi ki he lau Tohi Tapú, fakalaulaulotó pea mo e lotú?’ (Sāme 77:12; 119:97; 1 Tes. 5:17) ‘ʻOku ou vaheʻi ha taimi ki he teuteu ki he ngaahi fakataha faka-Kalisitiané? ʻOku ou fakalototoʻaʻi ʻa e niʻihi kehé ʻaki hono fai ha ngaahi tali ʻi he lolotonga ʻa e ngaahi fakatahá?’ (Sāme 122:1; Hep. 2:12) ʻOku fakahaaʻi ʻe he Folofola ʻa e ʻOtuá naʻe fakamoleki ʻe Paula mo Panepasa ʻa e taimi ‘fuoloa ʻo malanga mālohi ʻi he falala ki he ʻEikí.’ (Ng. 14:3) ʻE lava ke ke fengaʻunuʻaki ʻa e ngaahi tuʻunga ʻokú ke ʻi aí ke fakamoleki ha taimi lahi ange, ʻo aʻu ki ha taimi “fuoloa,” ʻi he ngāue fakamalangá, ʻo hoko nai ko ha tāimuʻa?—Lau ʻa e Hepelu 13:15.
15. ʻOku anga-fēfē hono ngāueʻaki fakapotopoto ʻe he kau mātuʻá ʻa honau taimí?
15 ʻI he taimi naʻe ʻaʻahi ai ʻa e ʻapositolo ko Paulá mo Panepasa ki he fakatahaʻanga Kalisitiane ʻi ʻAniteoké, “naa nau nonofo ai moe kau akoga o fuoloa” koeʻuhi ke fakalototoʻaʻi kinautolu. (Ng. 14:28, PM) ʻOku ngāueʻaki ʻe he kau mātuʻa anga-ʻofa ʻi he ʻaho ní ʻi he founga meimei tatau ʻa e taimi lahi ke fakaivimālohiʻi ʻa e niʻihi kehé. Tānaki atu ki heʻenau ngāue fakafaifekaú, ʻoku ngāue mālohi ʻa e kau mātuʻá ke tauhi ʻa e tākangá, kumi ki ha fanga sipi kuo mole, tokoniʻi ʻa e mahamahakí, pea tokangaʻi ʻa e ngaahi fatongia lahi kehe ʻi he fakatahaʻangá. Kapau ko ha tokoua ʻosi papitaiso koe, ʻoku fakaʻatā koe ʻe he ngaahi tuʻunga ʻokú ke ʻi aí ke ke kakapa atu ki he ngaahi monū ngāue lahi ange ko ʻení?
16. Ko e hā ʻa e ngaahi founga ʻe niʻihi ʻe lava ke tau ‘ngaue ʻaonga ai kiate kinautolu ʻoku ʻi he famili ʻo e lotú’?
16 Kuo maʻu ʻe he tokolahi ʻa e fiefia he tokoni ʻi he tokonaki maʻá e faʻahinga kuo nau faingataʻaʻia ʻi ha mole mei he ngaahi fakatamaki tupu mei he tangatá pe ngaahi fakatamaki fakanatulá. Ko e fakatātaá, ko ha tuofefine ʻi hono taʻu 60 tupú ʻa ia ʻokú ne ngāue ʻi Pēteli naʻá ne fononga mamaʻo ʻi ha ngaahi taimi ke pole ko ha tokotaha ngāue tokoni. Ko e hā naʻá ne ngāueʻaki ai ʻene taimi mālōloó ʻi he founga ko iá? ʻOkú ne pehē: “Neongo ʻoku ʻikai haʻaku faʻahinga pōtoʻi makehe, naʻe hoko ko ha monū ke fai ha faʻahinga meʻa pē naʻe fiemaʻu. Naʻá ku maʻu ʻa e fakalototoʻa lahi ʻi he sio ki he tui mālohi ʻa hoku fanga tokouá mo e fanga tuongaʻané ʻa ia kuo nau tofanga ʻi he ngaahi mole fakamatelie lahi.” ʻIkai ko ia pē, ʻoku tokoni ʻa e laui afe ʻi māmani lahi ke langa ʻa e ngaahi Fale Fakatahaʻanga mo e ngaahi Holo ʻAsemipilī. ʻI he kau ʻi he ngaahi ngāue ko iá, ʻoku tau ‘ngaue ʻaonga ai kiate kinautolu ʻoku ʻi he famili ʻo e lotú.’—Kal. 6:10.
“ʻOku Ou ʻIate Kimoutolu ʻe Au ʻi he Ngaahi ʻAho Kotoa Pe”
17. Ko e hā te ke ʻoatu fakafoʻituitui ke maʻu mai ʻaki ʻa e moʻui taʻengatá?
17 Ko e sōsaieti ʻo e faʻahinga ʻo e tangatá ʻa ia kuo nau mamaʻo mei he ʻOtuá ʻoku vavé ni ke mole atu. ʻOku ʻikai te tau ʻiloʻi papau ʻa e taimi ʻe hoko ai ʻa e meʻa ko iá. Neongo ia, ʻoku tau ʻiloʻi “kuo fakanounou ʻa e kuonga” pea “kuo kamata liliu ʻa e anga ʻo e maama ko eni.” (Lau ʻa e 1 Kolinito 7:29-31.) ʻOku ʻai ai ʻe he meʻá ni ke toe mahuʻinga ange ʻa e fehuʻi ʻa Sīsuú: “Ko e ha ha meʻa ʻe ʻatu ʻe he tangata ke fakatau ʻaki mai ʻene moʻui?” Kuo pau ke tau fai ha faʻahinga feilaulau pē ʻoku fiemaʻu mai ʻe Sihova koeʻuhi ka tau maʻu ʻa e “moʻui moʻoni.” (1 Tim. 6:19) Ko e moʻoni, ʻoku mahuʻinga ʻaupito ke talangofua ki he ekinaki ʻa Sīsū ke hokohoko atu ʻa e ‘muimui kiate iá’ pea ke “fuofua kumi ae buleaga.”—Mt. 6:31-33, PM; Mt 24:13.
18. Ko e hā ʻe lava ke tau falala pau ki aí, pea ko e hā hono ʻuhingá?
18 Ko e moʻoni, ko e muimui kia Sīsuú ʻoku ʻikai ke faingofua maʻu pē, pea ko e moʻoni hangē ko e fakatokanga ʻa Sīsuú, kuo mole ai ʻa e moʻui ʻa e niʻihi ʻi he fokotuʻutuʻu ko ʻení. Ka neongo ia, ʻi he hangē ko Sīsuú, ʻoku tau fakaʻehiʻehi mei he tauhele ke “anga-ʻofa” kiate kitautolú. ʻOku tau maʻu ʻa e tui ki he meʻa naʻá ne fakapapauʻi ki hono kau muimui pani ʻi he ʻuluaki senitulí: “ʻOku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani.” (Mt. 28:20) Ko ia ai, tau ngāueʻaki leva hotau taimí mo e malavá ki he kakato taha ʻe ala lavá ʻi he ngāue toputapú. ʻI heʻetau fai peheé, ʻoku tau fakahāhā ai ʻetau falala pau ʻe fakatolonga atu kitautolu ʻe Sihova ʻi he mamahi lahí pe toe fokotuʻu hake kitautolu ki he moʻui ʻi he māmani foʻoú. (Hep. 6:10) ʻE hā leva mei ai ʻa ʻetau fakamahuʻingaʻi lahi ʻa e meʻaʻofa ʻo e moʻuí.
Ko e Hā Hoʻo Ngaahi Talí?
• Naʻe anga-fēfē hono fakahāhā ʻe Sīsū ʻa e loto-lelei fisifisimuʻa ke tauhi ki he ʻOtuá pea ki he tangatá?
• Ko e hā ʻoku totonu ai ke te siʻaki kitá, pea ʻoku anga-fēfē hono fai ʻení?
• ʻI ʻIsileli ʻo e kuonga muʻá, ko e faʻahinga feilaulau fēfē pē naʻe ala tali ʻe Sihová, pea ʻoku anga-fēfē ʻene kaunga ia kiate kitautolu ʻi he ʻaho ní?
• ʻI he ngaahi founga fē ʻe lava ke tau ngāueʻaki fakapotopoto ai hotau taimí?
[Fehuʻi ki he Ako]
[Fakatātā ʻi he peesi 26]
Naʻe fai maʻu pē ʻe Sīsū ʻa e ngaahi meʻa naʻe fakahōifua ki he ʻOtuá
[Fakatātā ʻi he peesi 28]
Ko e kau ʻIsileli houngaʻiá naʻa nau ʻoatu honau lelei tahá ke pouaki ʻa e lotu moʻoní
[Fakatātā ʻi he peesi 29]
ʻOku tau fakahōifuaʻi ʻa e ʻOtuá fakafou ʻi heʻetau ngāueʻaki fakapotopoto hotau taimí