Tali ʻa Sihova ki ha Lotu Tōtōivi

“Ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.”—SĀME 83:18, PM.

1, 2. Ko e hā kuo hokosia ʻe he tokolahi, pea ko e hā ʻa e ngaahi fehuʻi ʻe lava ke tau ʻeké?

 ʻI HA ngaahi taʻu he kuohilí, naʻe fakahohaʻasi lahi ai ha fefine ʻe ha meʻa fakamamahi naʻe hoko ʻi hono feituʻú. ʻI hono fāʻeleʻi ʻi ha fāmili Katolika Lomá, naʻá ne ʻalu ki he pātele honau feituʻú ʻo kole tokoni, ka naʻe ʻikai loto ʻa e pātelé ke talanoa mo ia. Ko ia naʻá ne lotu ai ki he ʻOtuá ʻo pehē: “ʻOku ʻikai te u ʻiloʻi koe . . . , ka ʻoku ou ʻiloʻi ʻokú ke ʻi ai. Tuku muʻa ke u ʻiloʻi koe!” ʻI ha taimi nounou mei ai, naʻe ʻaʻahi kiate ia ʻa e Kau Fakamoʻoni ʻa Sihová ʻo ʻoange ʻa e fakafiemālie mo e ʻilo naʻá ne fekumi ki aí. Naʻa nau akoʻi kiate ia fakataha mo e ngaahi meʻa lahi kehe, ko e ʻOtuá ʻoku ʻi ai hono huafa fakafoʻituitui, ko Sihova. ʻI hono ʻiloʻi iá naʻe maongo lahi kiate ia. “Vakai ange,” ko ʻene leá ia, “ko e ʻOtua eni naʻá ku fakaʻamu ke ʻiloʻi talu ʻeku kei siʻí!”

² Kuo hokosia ʻe he tokolahi ʻa e meʻa meimei tatau. ʻOku faʻa hoko, ko ʻenau ʻuluaki sio ʻi he huafa ʻo Sihová ʻi he taimi ko ia naʻa nau lau ai ʻa e Sāme 83:18 ʻi he Tohi Tapú. ʻI he Paaki Motuʻa, ʻoku pehē ai ʻi he veesi ko iá: “Koeuhi ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.” Kae kehe, kuó ke fifili nai ʻi ha taimi pe ko e hā naʻe hiki ai ʻa e Sāme 83? Ko e hā e meʻa ʻe hoko, ʻa ia ʻe pau ai ki he tokotaha kotoa pē ke ne ʻiloʻi ko Sihova ʻa e ʻOtua moʻoni pē tahá? Ko e hā ʻe lava ke tau ako he ʻahó ni mei he saame ko iá? Te tau lāulea ki he ngaahi fehuʻi ko iá ʻi he kupu ko ení. a

Ko ha Faʻufaʻufono ki he Kakai ʻa Sihová

3, 4. Ko hai naʻá ne faʻu ʻa e Sāme 83, pea ko e hā ʻa e fakamanamana ʻokú ne fakamatala ki aí?

³ Fakatatau ki he kiʻi fakamatala ʻi he kamataʻanga ʻo e Sāme 83 (PM), ko e sāmé ni ko ha “Hiva be koe Same a Asafi.” Ko e faʻu hiva ʻo e sāmé ʻoku ngalingali ko ha hako ia ʻo e Līvai ko ʻĒsafé, ko ha faihiva ʻiloa lolotonga e pule ʻa e tuʻi ko Tēvitá. ʻI he sāmé, ʻoku kōlenga ai ʻa e tokotaha-tohi-sāmé kia Sihova ke ne fai ha meʻa koeʻuhi ke pouaki ai Hono tuʻunga-haú pea ʻai ke ʻiloa Hono huafá. ʻOku pau pē naʻe faʻu ʻa e sāmé ʻi ha taimi hili e mate ʻa Solomoné. Ko e hā hono ʻuhingá? Koeʻuhi ʻi he lolotonga e pule ʻa Tēvita mo Solomoné, naʻe fakakaumeʻa ai ʻa e tuʻi Taiá ki ʻIsileli. ʻI he taimi ne faʻu ai ʻa e Sāme 83, naʻe fakafepaki ʻa e kakai Taiá ki ʻIsileli pea naʻa nau kau mo hono ngaahi filí.

⁴ ʻOku fakahaaʻi ʻe he tokotaha-tohi-sāmé ʻa e puleʻanga ʻe hongofulu naʻa nau faʻufaʻufono ke fakaʻauha e kakai ʻa e ʻOtuá. Ko e ngaahi fili ko iá naʻa nau nofo takatakai kotoa ʻi ʻIsileli pea ko hono fakahokohokó eni: “Ko e ʻu teniti ʻo Itomi mo e kau Isimeʻeli; ko Moape mo haʻa Hekaa: Ko Kipeli, mo Amoni, mo Amaleki: Ko Filisitia, fakataha mo haʻa nofo Taia: ko Asilia foki ʻoku kau mo kinautolu.” (Sāme 83:6-8) Ko e hā e meʻa fakahisitōlia ne hoko ʻoku lave ki ai ʻa e sāmé?  ʻOku fakakaukau ʻa e niʻihi ko e lave ʻa e sāmé ki he ʻohofi ʻo ʻIsileli ʻe he faʻahi fakatahataha ʻa ʻĀmoni, Mōape mo e kau nofo ʻi Moʻunga Seia ʻi he ngaahi ʻaho ʻo Sihosafaté. (2 Kal. 20:1-26) ʻOku tui ʻa e niʻihi kehe ko e lave ia ki he fakafili anga-maheni naʻe hoko ki ʻIsileli mei hono ngaahi kaungāʻapí ʻi he kotoa ʻo hono hisitōliá.

 5. Ko e hā e ʻaonga ʻoku maʻu he ʻahó ni ʻe he kau Kalisitiané mei he Sāme 83?

⁵ Ko e hā pē ʻa e tuʻungá, ʻoku hā mahino naʻe fakamānavaʻi ʻe he ʻOtua ko Sihová ʻa hono hiki ʻa e saame ko ení ʻi ha taimi naʻe ʻi he tuʻunga fakatuʻutāmaki ai ʻa hono puleʻangá. ʻOku toe ʻomai ʻi he sāmé ʻa e fakalototoʻa ki he kau sevāniti ʻa e ʻOtuá ʻi he ʻaho ní, ʻa ia kuo nau fehangahangai ʻi honau hisitōliá kotoa mo e toutou ʻohofi ʻe he ngaahi fili naʻa nau fakapapauʻi ke fakaʻauha kinautolú. Pea te ne fakaivimālohiʻi moʻoni kitautolu ʻi he kahaʻu ofi maí ʻi he taimi ʻe fakatahatahaʻi ai ʻe Koki ʻo Mēkokí ʻa ʻene ngaahi kongakaú ʻi he feinga fakaʻosi ke fakaʻauha ʻa e faʻahinga kotoa ʻoku lotu ki he ʻOtuá ʻi he laumālie mo e moʻoní.—Lau ʻa e Isikeli 38:1 (38:2, “PM”), Is 38:8, 9, 16.

Ko e Tokanga Tefitó

6, 7. (a) Ko e hā ʻoku lotu ki ai ʻa e tokotaha-tohi-sāmé ʻi he ngaahi lea kamata ʻo e Sāme 83? (e) Ko e hā ʻa e meʻa naʻe tokanga muʻomuʻa ki ai ʻa e tokotaha-tohi-sāmé?

⁶ Fanongo angé ki hono fakahaaʻi ʻe he tokotaha-tohi-sāmé ʻa ʻene ngaahi ongoʻí ʻi he lotu: “E Otua, oua naa ke fakalogo be: E Otua, oua naa ke tae afioʻi, bea oua naa ke nofo be. Vakai, oku fakatubu maveuveu e ho gaahi fili: bea ko kinautolu oku fehia kiate koe kuo nau hiki hake ho nau ulu. Naa nau alea fakalilolilo ki hoo kakai . . . He kuo nau fakakaukau i he loto taha: oku nau fuakava o agatuu kiate koe.”—Sāme 83:1-3, 5, PM.

⁷ Ko e hā naʻe tokanga muʻomuʻa ki ai ʻa e tokotaha-tohi-sāmé? Ko e moʻoni, kuo pau pē naʻá ne hohaʻa ʻaupito fekauʻaki mo hono tuʻunga malu fakafoʻituituí pea pehē ki he malu ʻa hono fāmilí. Neongo ia, naʻe fakahangataha ʻa ʻene lotú ki he fakamā naʻe fai ki he huafa ʻo Sihová pea mo e ngaahi fakamanamana ki he puleʻanga naʻe uiʻaki hono huafá. ʻOfa ke tau tauhi maʻu kotoa ha fakakaukau mafamafatatau meimei tatau ʻi heʻetau kātekina ʻa e ngaahi ʻaho fakaʻosi faingataʻa ʻo e māmani motuʻa ko ení.—Lau ʻa e Mātiu 6:9, 10.

 8. Ko e hā e taumuʻa ʻa e ngaahi puleʻangá ʻi heʻenau faʻufaʻufono ki ʻIsilelí?

⁸ ʻOku hiki ʻe he tokotaha-tohi-sāmé ʻa e lea ʻa e ngaahi fili ʻo ʻIsilelí ʻo pehē: “Haʻuā ke tau tuʻusi kinautolu ke ʻoua naʻa toe lau ko e kakai: ʻIo, ke ʻoua naʻa kei manatua ʻa e hingoa ʻo Isileli.” (Sāme 83:4) He fehiʻa moʻoni ē ko e ngaahi puleʻanga ko iá ki he kakai fili ʻa e ʻOtuá! Ka naʻe toe ʻi ai ʻa e taumuʻa ʻe taha ʻo ʻenau faʻufaʻufonó. Naʻa nau mānumanu ki he kelekele ʻo ʻIsilelí pea naʻa nau lea pōlepole: “Ke tau maʻu ae gaahi fale oe Otua moo tautolu.” (Sāme 83:12, PM) Kuo hoko ha meʻa meimei tatau ʻi hotau ʻahó ni? ʻIo!

“Ho ʻAfioʻanga Tapu”

9, 10. (a) ʻI he kuonga muʻá, ko e hā ʻa e ʻafioʻanga tapu ʻo e ʻOtuá? (e) Ko e hā e ngaahi tāpuaki ʻoku maʻu he ʻahó ni ʻe he toenga ʻo e kau paní pea mo e “fanga sipi kehe”?

⁹ ʻI he kuonga muʻá, naʻe lave ai ki he Fonua ʻo e Talaʻofá ko e ʻafioʻanga tapu ʻo e ʻOtuá. Toe fakakaukau angé ki he hiva ikuna naʻe hivaʻi ʻe he kau ʻIsilelí hili hono fakahaofi kinautolu mei ʻIsipité: “Kuo ke taki atu ʻi hoʻo ʻaloʻofa ʻa e kakai ni ne ke huhuʻi; kuo ke tataki ʻi ho malohi ki ho ʻafioʻanga tapu.” (Eki. 15:13) Ki mui ai, ko e “ʻafioʻanga” ko iá naʻe ʻi ai ha temipale fakataha mo hono tuʻunga-taulaʻeiki mo ha kolomuʻa ko Selusalema, fakataha mo ha laine ʻo e haʻa tuʻi ko e hako ʻo Tēvita pea naʻa nau ʻafio ʻi he taloni ʻo Sihová. (1 Kal. 29:23) Naʻe feʻungamālie hono ui ʻe Sīsū ʻa Selusalema “koe kolo ia oe Tuʻi lahi.”—Mt. 5:35, PM.

¹⁰ Fēfē ʻa hotau ʻahó ni? ʻI he 33 T.S., naʻe fanauʻi ai ha puleʻanga foʻou, ko e “Isileli oe Otua.” (Kal. 6:16, PM) Ko e puleʻanga ko iá, naʻe faʻuʻaki ʻa e fanga tokoua pani ʻo Sīsū Kalaisí, naʻá ne fakahoko ʻa e ngāue naʻe ʻikai moʻoni lava ke fai ʻe he ʻIsileli fakakakanó, ʻa ia ko e hoko ko e kau fakamoʻoni ki he huafa ʻo e ʻOtuá. (Ai. 43:10; 1 Pita 2:9) Naʻe fai ʻe Sihova kiate kinautolu ʻa e palōmesi tatau naʻá ne fai ki ʻIsileli ʻo e kuonga muʻá: “Te u nofo ko honau ʻOtua, pea te nau nofo ko hoku kakai.” (2 Kol. 6:16; Liv. 26:12) ʻI he 1919, naʻe ʻomai ai ʻe Sihova ʻa e toenga ʻo e “Isileli oe Otua” ki ha tuʻunga  fakahōifua, pea ʻi he taimi ko iá, naʻa nau maʻu ai ha “fonua” ko ha puleʻanga ʻo e ngāue fakalaumālie ʻa ia kuo nau maʻu ai ha palataisi fakalaumālie. (Ai. 66:8) Kuo kau atu kiate kinautolu talu mei he 1930 tupú, ʻa e laui miliona ʻo e “fanga sipi kehe.” (Sione 10:16) Ko e fiefia mo e lakalakaimonū fakalaumālie ʻa e kau Kalisitiane ko eni ʻi onopōní ʻoku ʻomai ai ʻa e fakamoʻoni mālohi fekauʻaki mo e totonu ʻa e tuʻunga-hau ʻo Sihová. (Lau ʻa e Sāme 91:1, 2.) He ʻita moʻoni ē ko Sētane ʻi he meʻa ko iá!

11. Ko e hā ʻoku hokohoko atu ko e taumuʻa tefito ia ʻa e ngaahi fili ʻo e ʻOtuá?

¹¹ ʻI he taimi kotoa ʻo e ngataʻangá, kuo fakaʻaiʻai ai ʻe Sētane ʻa ʻene kau fakafofonga ʻi māmaní ke nau fakafepakiʻi ʻa e toenga ʻo e kau paní mo honau takanga ko e fanga sipi kehé. Naʻe hoko ia ʻi ʻIulope Hihifo ʻi he malumalu ʻo e kau Nasí pea ʻi ʻIulope Hahake ʻi he malumalu ʻo e founga-pule faka-Kominiusi ʻa e Sovieti ʻIunioní. Naʻe toe hoko foki ia ʻi he ngaahi fonua kehe lahi, pea ʻe toe hoko pē, tautefito ʻi he lolotonga ʻa e ʻoho fakaʻosi ʻa Koki ʻo Mēkokí. ʻI he ʻoho ko iá, ʻe faʻao mānumanu nai ai ʻe he kau fakafepakí ʻa e kelekele mo e koloa ʻa e kakai ʻa Sihová, hangē ko ia kuo fai ʻe he ngaahi filí ʻi he kuohilí. Kae kehe, ko e taumuʻa tefito maʻu pē ʻa Sētané, ke fakamavahevaheʻi kitautolu ʻi he tuʻunga ko e kakaí koeʻuhi ke ʻoua ʻe toe manatua ʻa hotau hingoa kuo ʻomai ʻe he ʻOtuá. ʻOku anga-fēfē ʻa e tali ʻa Sihova ki he fakafetau pehē ki hono tuʻunga-haú? Toe sio angé ki he ngaahi lea ʻa e tokotaha-tohi-sāmé.

Fakatātā ʻo e Ikuna ʻa Sihová

12-14. Ko e hā ʻa e ongo ikuna fakahisitōlia ofi ki he kolo ko Mekitó ʻoku fakamanatu mai ʻe he tokotaha-tohi-sāmé?

¹² Fakatokangaʻi ʻa e tui mālohi ʻa e tokotaha-tohi-sāmé ki he malava ke fakaikunoa ʻe Sihova ʻa e palani ʻa e ngaahi puleʻanga fakafilí. ʻOkú ne fakakau ʻi he sāmé ʻa e ongo ikuna ʻosi fakapapauʻi ʻa ʻIsileli ʻi hono ngaahi filí ofi ki he kolo motuʻa ko Mekitó, ʻa ia naʻe tuʻu ʻo eʻa mai ʻi he teleʻa ʻo e kolo ko iá. Lolotonga ʻa e taimi māfaná, naʻe lava ke sio ai ʻi he teleʻá ki he tokaʻanga mōmoa ʻo e Vaitafe Kīsoní. Hili ha fuʻu lōvai ʻi he taimi momokó, ʻoku hake ai ʻa e teleʻá ʻi he vaitafé. Mahalo ko e ʻuhinga ia, ʻoku toe ui ai ʻa e vaitafé ko e “ngaahi vai ʻo Mekito.”—Fkm. 4:13; 5:19.

¹³ ʻI he kilomita ʻe 15 nai ki he tafaʻaki ʻe taha ʻo e teleʻá mei Mekitó ʻoku tuʻu ai ʻa e moʻunga Molé ʻa ia ʻi he ngaahi ʻaho ʻo Fakamaau Kitioné, naʻe fakataha ai ki he tau ʻa e ngaahi kongakau fakatahataha ʻa e kau Mitianí, kau ʻAmalekí mo e kau tau mei he Hahaké. (Fkm. 7:1, 12) Ko e kiʻi kau tau tokosiʻi ʻa Kitioné naʻe iku ʻo kau ki ai ʻa e kau tangata pē ʻe toko 300, ka ʻi he tokoni ʻa Sihová, naʻa nau ikunaʻi ʻa e fuʻu kongakau ʻa e filí. Anga-fēfē? ʻI he muimui ki he tataki ʻa e ʻOtuá, naʻa nau takatakaiʻi ʻa e ʻapitanga ʻo e filí ʻi he poʻulí ʻo puke ʻa e ngaahi siā naʻe ʻi loto ha ngaahi tūhulu. ʻI hono fai ʻe Kitione ha fakaʻilongá, naʻe haʻaki ʻe heʻene kau tangatá ʻa e ngaahi siaá ʻo ʻasi fakafokifā ʻa e ngaahi tūhulu ne ʻi lotó. ʻI he taimi tatau, naʻa nau ifi ʻenau talupité mo kaila: “Ko e Heleta ʻa Sihova mo Kitione!” Naʻe puputuʻu ʻa e filí, pea naʻa nau hanga hake ai ʻo fetāmateʻaki; naʻe hola ʻo kolosi ʻi he Vaitafe Sioataní ʻa e faʻahinga naʻe moʻuí. Lolotonga ení, naʻe kau atu ʻa e kau ʻIsileli tokolahi ʻi hono tuli ʻo e filí. Naʻe tāmateʻi fakakātoa ai ʻa e kau sōtia ʻa e filí ʻe toko 120,000.—Fkm. 7:19-25; 8:10.

¹⁴ Fakafuofua ki he kilomita ʻe ono ʻo fakalaka atu ʻi he moʻunga Molé, ʻi he tafaʻaki ʻe taha ʻo e teleʻá mei Mekito, ʻoku tuʻu ai ʻa e Moʻunga Tēpoá. Naʻe fakatahatahaʻi ai ki muʻa ʻe Fakamaau Pēlaki ʻa e ngaahi kongakau ʻIsileli ʻe toko 10,000 ke nau tau mo e kau tau ʻa Siapini,  ko e tuʻi Kēnani ʻo Hāsoá, ʻi he angi ʻa ʻene ʻeikitau ko Sīsela. Ko e kau tau Kēnani ko ení naʻe ʻi ai ʻenau saliote tau ʻe 900 naʻe fokotuʻu ʻi hono ngaahi foʻi vaʻé ʻa e ngaahi mataʻihele ukamea lōloa fakatuʻutāmaki. ʻI he fakatahataha ʻa e ngaahi kongakau ʻIsileli naʻe ʻikai lelei ʻenau meʻataú ʻi Moʻunga Tēpoá, naʻe fakataueleʻi ai ʻa e kau tau ʻa Sīselá ke nau haʻu ki he teleʻá. Pea naʻe “veuveuki ʻe Sihova ʻa Sisela mo ʻene ngaahi saliote mo ʻene tau kotoa.” ʻOku ngalingali, naʻe tō fakafokifā ha fuʻu lōvai ʻo ne ʻai ke pikisia ʻa e ngaahi salioté ʻi he pelepelá koeʻuhi ko e hake ʻa e Vaitafe Kīsoní. Naʻe tāmateʻi ai ʻa e kau taú kotoa ʻe he kau ʻIsilelí.—Fkm. 4:13-16; 5:19-21.

15. (a) Ko e hā ʻa e meʻa naʻe lotu ʻa e tokotaha-tohi-sāmé ʻo kole kia Sihova ke ne faí? (e) Ko e hā ʻoku fakamanatu mai kiate kitautolu ʻe he hingoa ʻo e tau fakaʻosi ʻa e ʻOtuá?

¹⁵ ʻOku kōlenga ʻa e tokotaha-tohi-sāmé kia Sihova ke ne fai ʻa e meʻa meimei tatau ki he ngaahi puleʻanga ʻoku nau fakamanamanaʻi ʻa e moʻui ʻa ʻIsileli ʻi hono taimí. ʻOkú ne lotu ʻo pehē: “Fai kiate kinautolu ʻo hange ko hoʻo fai ki Mitiani; ʻo hange ko hoʻo fai kia Sisela, ʻo hange ko hoʻo fai kia Siapini ʻi vaitafe Kisoni: ʻA ia naʻe fakaʻauha ʻi Enitoa; naʻa nau hoko ko e kinohaʻa ki he ngoueʻanga.” (Sāme 83:9, 10) ʻOku mahuʻingá, he ko e faitau fakaʻosi ʻa e ʻOtuá mo e māmani ʻo Sētané ʻoku ui ia ko Hāmaketone (ko hono ʻuhingá ko e “Moʻunga Mekito”), pe ʻĀmaketone. ʻOku fakamanatu mai ʻe he hingoa ko iá ʻa e ngaahi tau fakaofo naʻe hoko ofi ki Mekitó. Ko e ikuna ʻa Sihova ʻi he ngaahi tau ko ia ʻi he kuonga muʻá ʻoku fakapapauʻi mai ai ʻa ʻene ikuna papau ʻi he tau ʻo ʻĀmaketoné.—Fkh. 16:13-16.

Lotu ke Fakatonuhiaʻi ʻa Sihova

16. Kuo anga-fēfē ʻa e ‘fonu ʻi he ma’ he ʻahó ni ʻa e mata ʻo e kau fakafepakí?

¹⁶ ʻI he kotoa ʻo e “kuonga fakamui” ko ení, kuo taʻofi ai ʻe Sihova ʻa e ngaahi feinga kotoa ke fakaʻauha ʻosi ʻa hono kakaí. (2 Tim. 3:1) Ko hono olá, kuo mā ʻa e kau fakafepakí. Naʻe tomuʻa fakahaaʻi ʻa e meʻá ni ʻi he Sāme 83:16 ʻi he pehē ai: “Fakafonu honau mata ʻi he ma: Ke nau kumi ki ho huafa, ʻe Sihova.” ʻI he fonua ki he fonua, kuo taʻelavameʻa fakaʻaufuli ai pē ʻa e kau fakafepakí ʻi heʻenau feinga ke fakasīlongoʻi ʻa e Kau Fakamoʻoni ʻa Sihová. ʻI he ngaahi fonua ko iá, ko e tuʻu maʻu mo e kātaki ʻa e kau lotu ʻa e ʻOtua moʻoni pē tahá kuo hoko ia ko ha fakamoʻoni ki he faʻahinga loto-totonú, pea ko e tokolahi kuo nau ‘kumi ai ki he huafa ʻo Sihová.’ ʻI ha ngaahi fonua ʻa ia naʻe fakatangaʻi kakaha ai ki muʻa ʻa e Kau Fakamoʻoni ʻa Sihová, ʻoku ʻi ai he taimí ni ʻa e laui mano, naʻa mo e laui kilu, ʻo e kau fakahīkihiki fiefia ʻo Sihova. Ko ha ikuna moʻoni ia kia Sihova! Pea he meʻa fakamā moʻoni ki hono ngaahi filí!—Lau ʻa e Selemaia 1:19.

17. Ko e hā e tuʻunga mahuʻinga ʻoku fehangahangai mo e faʻahinga ʻo e tangatá, pea ko e hā e ngaahi lea ʻe vavé ni ke tau manatuʻí?

¹⁷ Ko e moʻoni, ʻoku tau ʻiloʻi ʻoku teʻeki ai ke ʻosi ʻa e faitaú. Pea ʻoku tau hokohoko atu ʻi hono malangaʻi ʻa e ongoongo leleí—ʻo aʻu ki he kau fakafepakí. (Mt. 24:14, 21) Kae kehe, ko e faingamālie ʻoku ʻatā he taimí ni ki he kau fakafepaki peheé ke nau fakatomala pea maʻu ʻa e fakamoʻuí kuo vavé ni ke ngata. Ko hono fakamāʻoniʻoniʻi ʻa e huafa ʻo Sihová ʻoku mahuʻinga mamaʻo ange ia ʻi he fakamoʻui ʻo e tangatá. (Lau ʻa e Isikeli 38:23.) ʻI he fakatahataha ʻa e ngaahi puleʻangá ʻi he feinga fakaemāmani lahi ke fakaʻauha ʻa e kakai ʻa e ʻOtuá naʻe tomuʻa talá, te tau manatuʻi ai ʻa e ngaahi lea ko eni ʻo e lotu ʻa e tokotaha-tohi-sāmé: “Tuku ke nau  bubutuu mo mamahi o taegata; io, tuku ke ma mo auha akinautolu.”—Sāme 83:17, PM.

18, 19. (a) Ko e hā ʻoku tatali ki he kau fakafepaki ʻosi fakapapauʻi ki he tuʻunga-hau ʻo Sihová? (e) ʻOku anga-fēfē hono ueʻi koe ʻe he fakatonuhiaʻi fakaʻosi ʻoku ofí ni ʻo e tuʻunga-hau ʻo Sihová?

¹⁸ ʻOku tatali mai ha ngataʻanga fakamā ki he kau fakafepaki loto-taʻeʻunua ki he tuʻunga-hau ʻo Sihová. Ko e Folofola ʻa e ʻOtuá ʻoku fakahaaʻi ai ko e faʻahinga ʻoku “taʻetalangofua ki he Kosipeli”—pea ʻoku tāmateʻi ʻi ʻĀmaketone ʻi he ʻuhinga ko ení—te nau tofanga ʻi he “fakaʻauha taʻengata.” (2 Tes. 1:7-9) Ko honau fakaʻauhá mo e hao ʻa e faʻahinga ʻoku lotu kia Sihova ʻi he moʻoní ʻe hoko ko e fakamoʻoni fakatuipau ia ko Sihova ʻa e ʻOtua moʻoni pē tahá. ʻI he māmani foʻoú, heʻikai ngalo ai ʻa e ikuna kāfakafa ko iá. Ko e faʻahinga te nau foki mai ʻi he “toetuʻu ʻa e angatonu mo e angahala” te nau ako ai ki he ngāue kāfakafa ʻa Sihová. (Ng. 24:15) ʻI he māmani foʻoú, te nau sio ai ki he fakamoʻoni fakatuipau ʻo e fakapotopoto ʻa e moʻui ʻi he malumalu ʻo e tuʻunga-hau ʻo Sihová. Pea ko e kau anga-vaivai ʻi honau lotolotongá ʻe vave ʻenau tuipau ko Sihova ʻa e ʻOtua moʻoni pē tahá.

¹⁹ Ko ha kahaʻu fakaofo ē kuo teuteu ʻe heʻetau Tamai hēvani anga-ʻofá maʻa ʻene kau lotu faitōnungá! ʻIkai ʻoku ueʻi ai koe ke ke lotu ke vavé ni hono ʻomai ʻe Sihova ha tali aofangatuku ki he lotu ʻa e tokotaha-tohi-sāmé kia Sihová: “Tuku ke ma mo auha [ʻa ho ngaahi filí]. Koeuhi ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.”—Sāme 83:17, 18, PM.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā e tuʻunga naʻe fehangahangai mo ʻIsileli ʻi he taimi naʻe hiki ai ʻa e Sāme 83?

• Ko e hā naʻe tokanga tefito ki ai ʻa e tokotaha-tohi ʻo e Sāme 83?

• Ko hai ʻoku fakafili tefito ki ai ʻa Sētane ʻi he ʻaho ní?

• ʻE anga-fēfē hono tali aofangatuku ʻe Sihova ʻa e lotu ʻoku fakahaaʻi ʻi he Sāme 83:18?

[Fehuʻi ki he Ako]

[Mape ʻi he peesi 15]

(Ki he konga tohi kuo fokotuʻú, sio ki he tohi)

ʻOku anga-fēfē ʻa e fekauʻaki mo hotau kahaʻú ʻa e ngaahi tau naʻe fai ofi ki Mekito ʻo e kuonga muʻá?

Vaitafe Kīsoni

Haloseti

Mo. Kāmeli

Teleʻa ʻo Sisilili

Mekito

Tānaka

Mo. Kilipoa

Vai ko Hāloti

Mole

ʻEnitoa

Mo. Tēpoa

Tahi Kāleli

Vaitafe Sioatani

[Fakatātā ʻi he peesi 12]

Ko e hā naʻá ne ueʻi ha tokotaha-tohi-saame ke ne faʻu ha lotu tōtōiví?