Ko e Hā ke Tauhi Maʻu Ai Hoʻo Anga-Tonú?

“Fakamāu au, E Jihova, . . . hage ko eku agatonu.”—SĀME 7:8 (SĀME 7:7), PM.

1, 2. Ko e hā ʻa e ngaahi tuʻunga anga-maheni ʻoku hoko ai ʻa e ngaahi pole ki he anga-tonu ʻa ha Kalisitiane?

 SIOLOTO atu ki ha ngaahi tuʻunga kehekehe ʻe tolu: ʻOku fehangahangai ha tamasiʻi mo e niʻihi ʻo hono kaungāakó. ʻOku nau feinga ke fakamataliliʻi ia ke ne ʻita, ke ne kapekape pe fuhu nai ai. Te ne faisāuni, pe te ne taʻotaʻofi ia tonu pea mavahe mei ai? Ko ha husepāniti ʻokú ne nofo tokotaha ʻi ʻapi ʻo fai ʻene fekumi ʻi he ʻInitanetí. ʻOku ʻasi mai ha puha heʻene komipiutá, ʻo tuʻuaki mai ai ha Uepisaiti fakalielia. ʻE fakataueleʻi ia ʻo ne lomi ki ai, pe te ne fakapapauʻi ke ne fakaʻehiʻehi mei ai? Ko ha fefine Kalisitiane ʻokú ne talanoa mo ha niʻihi pea mafuli ʻa e talanoá ia ki he tuʻunga ʻoku ʻikai lelei, ʻo hoko ko e lau fakatupu maumau fekauʻaki mo ha tuofefine ʻi he fakatahaʻangá. Te ne kau ai, pe te ne feinga ke liliu ʻa e meʻa ʻoku fai ki ai e talanoá?

² Neongo e kehekehe ʻa e ngaahi tuʻunga ko iá, ʻoku ʻi ai e meʻa ʻoku nau tatau ai. ʻOku kau kotoa ki ai ʻa e fāinga ke tauhi maʻu ʻa e anga-tonú ʻi he tuʻunga ko ha Kalisitiané. ʻOkú ke fakakaukau fekauʻaki mo hoʻo anga-tonú ʻi he fehangahangai mo hoʻo ngaahi loto-moʻuá, ngaahi fiemaʻú mo e ngaahi taumuʻa ʻi he moʻuí? ʻI ha tuʻunga fakaʻaho, ʻoku fakakaukau ai ʻa e kakaí ʻo fekauʻaki mo honau fōtungá, ko ʻenau moʻui leleí, ko e ngaahi pole ʻo e kumi ki ha maʻuʻanga moʻui, ko e fetōʻaki ʻi honau vā mo e ngaahi kaungāmeʻá ʻo aʻu ki he vā femanakoʻakí. ʻOku tau fai nai ʻa e tokanga lahi ki he ngaahi hohaʻa peheé. Kae kehe, ko e hā ʻoku mahuʻinga tefito kia Sihova ʻi heʻene fakasio hotau lotó? (Sāme 139:23, 24) Ko ʻetau anga-tonú.

 3. Ko e hā e monū ʻoku ʻomai ʻe Sihova kia kitautolú, pea ko e hā te tau lāulea ki ai ʻi he kupu ko ení?

³ Ko Sihova, ʻa e Tokotaha-Foaki ʻo e ‘foaki lelei mo e meʻaʻofa haohaoá,’ kuó ne ʻomai kia kitautolu taki taha ha ngaahi meʻaʻofa kehekehe. (Sem. 1:17) ʻOku tau fakamālō kiate ia heʻetau maʻu ʻa e ngaahi meʻaʻofa hangē ko ia ko ha sino, ko ha ʻatamai, ko ha tuʻunga moʻui lelei pea mo e ngaahi malava kehekehe. (1 Kol. 4:7) Kae kehe, ʻoku ʻikai ke fakamālohiʻi pē kitautolu ʻe Sihova ke tau fakahāhā ʻa e anga-tonú. ʻOkú ne tuku ke tau fili pē ʻia kitautolu pe te tau fakatupulekina ʻa e ʻulungāangá ni. (Teu. 30:19) ʻOku fiemaʻu leva ke tau sivisiviʻi pe ko e hā ʻa e anga-tonu. Te tau toe lāulea ki he ʻuhinga ʻe tolu ʻoku mahuʻinga lahi ai ʻa e ʻulungāangá ni.

Ko e Hā ʻa e Anga-Tonu?

 4. Ko e hā ʻoku kau ki he anga-tonú, pea ko e hā ʻe lava ke tau ako mei he lao ʻa Sihova ʻo fekauʻaki mo e ngaahi feilaulau monumanú?

⁴ ʻOku hā ngali maʻu ʻe he kakai tokolahi ha fakakaukau taʻepau ʻo fekauʻaki mo e anga-tonú. Ko e fakatātaá, ʻi he pōlepoleʻaki ʻe he kau politikí ʻenau anga-tonú, ʻoku faʻa hā ngali ko ʻenau ʻuhingá ki he faitotonú. ʻOku mahuʻinga ʻa e ʻulungāanga ko iá, ka ko ha konga pē ia ʻo e anga-tonú. Hangē ko ia ʻoku ngāueʻaki ʻi he Tohi Tapú, ʻoku kau ki he anga-tonú ʻa e tuʻunga kakato mo e lelei fakaeʻulungāanga. Ko e ngaahi foʻi lea faka-Hepelū ʻoku felāveʻi mo e “anga-tonú” ko e haʻu ia mei ha tupuʻi lea ʻoku ʻuhingá ko e lelei, kakato, pe taʻemele. Ko e taha ʻo e ngaahi foʻi leá ni ʻoku ngāueʻaki ia fekauʻaki mo e ngaahi feilaulau naʻe fai kia Sihová. Naʻe toki maʻu pē ʻene hōifuá ʻi ha monumanu ʻoku faiʻaki ʻa e feilaulaú ʻo kapau naʻe lelei, pe kakato. (Lau ʻa e Livitiko 22:19, 20.) Naʻe valokiʻi fefeka ʻe Sihova ʻa e faʻahinga naʻa nau talangataʻa fakahangatonu ki heʻene fakahinohinó ʻi heʻenau foaki ʻa e fanga monumanu heke, puke pe kui ke fai ʻaki ʻa e feilaulaú.—Mal. 1:6-8.

5, 6. (a) Ko e hā e ongo fakatātā ʻoku fakahaaʻi ai ʻoku tau faʻa fakamahuʻingaʻi ʻa e meʻa ʻa ia ʻoku kakato pe haohaoá? (e) ʻI he hoko mai ki he faʻahinga taʻehaohaoa ʻo e tangatá, ʻoku ʻuhinga ʻa e anga-tonú ko e haohaoa? Fakamatalaʻi.

⁵ Ko e foʻi fakakaukau ʻo e kumi pea fakamahuʻingaʻi ʻa e meʻa ʻoku kakato, pe haohaoá, ʻoku ʻikai ke ngalikehe. Hangē ko ení, fakaʻuta atu ki ha tokotaha tānaki tohi ʻokú ne maʻu ha tohi mahuʻinga ʻaupito hili haʻane fekumi ʻi ha taimi lōloa ki ai, peá ne toki ʻiloʻi ʻoku mole mei ai ha ngaahi peesi mātuʻaki mahuʻinga. ʻI he siva ʻa e ʻamanakí, te ne toe fakafoki nai ia ki he tukuʻanga tohí. Pe sioloto  atu ki ha fefine ʻokú ne luelue ʻi ha matātahi, ʻo tufi ʻa e niʻihi ʻo e ngaahi ngeʻesi fingota ʻoku ʻomai ki ʻuta ʻe he peaú. ʻI heʻene toʻoa he kehekehe mo e fakaʻofoʻofa ʻo e ngaahi meʻa fakatupu ko ení, ʻokú ne toutou punou hifo ʻo siofi lelei ʻa e ngeʻesi fingota taki taha. Ko fē ʻa e ngeʻesi fingota te ne tauhí? Ko e ngeʻesi fingota ko ē ʻoku kei kakato mo haohaoá. ʻI he tuʻunga meimei tatau, ʻoku kumi ʻa e ʻOtuá ki he kakai ʻoku nau maʻu ʻa e ʻulungāanga ko eni ʻoku kakato pe haohaoá.—2 Kal. 16:9.

⁶ Kae kehe, te ke fifili nai pe ʻoku fiemaʻu ke haohaoa ʻa e anga-tonú. Koeʻuhi ko e maumau kuo hoko kia kitautolu ʻi he angahalá mo e taʻehaohaoá, te tau hehema nai ke fakakaukau kia kitautolu ʻoku tau mei hangē ko ha tohi taʻekakato pe ko ha ngeʻesi fingota kuo mapakipaki. ʻOku pehē ʻi he taimi ʻe niʻihi ʻa hoʻo ongoʻí? Fakapapauʻi ange ʻoku ʻikai ʻamanekina mai ʻe Sihova ia ke tau haohaoa ʻi he tuʻunga kakato tahá. ʻOku ʻikai ʻaupito te ne ʻamanekina mai meia kitautolu ha meʻa ʻoku lahi ange ʻi he meʻa ʻoku tau malava ke faí. a (Sāme 103:14; Sem. 3:2) Neongo ia, ʻokú ne ʻamanekina mai ke tau tauhi maʻu ʻetau anga-tonú. ʻI heʻene peheé, ʻoku ʻi ai ha faikehekehe ʻi he vahaʻa ʻo e haohaoá mo e anga-tonú? ʻIo. Ke fakatātaaʻi: ʻOku ʻofa ha talavou ʻi ha finemui ʻa ia ʻoku teu ke ne mali mo ia. ʻE fakavalevale ke ne ʻamanekina ʻe haohaoa ʻa e finemuí. Kae kehe, ʻe fakapotopoto ke ne ʻamanekina ʻoku ʻofa loto-kakato ʻiate ia ʻa e finemuí, ʻa ia ko e maʻu ʻe he finemuí ʻa e ʻofa fakaemanako kiate ia tokotaha pē. ʻI he founga meimei tatau, ko Sihová “ko ha ʻOtua ʻokú ne kounaʻi ʻa e anga-līʻoa maʻataʻatā.” (Eki. 20:5, NW) ʻOku ʻikai te ne ʻamanekina mai ke tau haohaoa, ka ke tau ʻofa kiate ia ʻaki e kotoa ʻo hotau lotó, ʻo fai kiate ia pē toko taha ʻa e lotú.

7, 8. (a) Ko e hā ʻa e faʻifaʻitakiʻanga naʻe fokotuʻu ʻe Sīsū ʻo fekauʻaki mo e anga-tonú? (e) Ko e hā e ʻuhinga totonu ʻo e anga-tonú ʻi he mahino Fakatohitapú?

⁷ Te tau manatu nai ki he tali ʻa Sīsū ʻi hono ʻeke ange kiate ia pe ko e hā ʻa e lao mahuʻinga taha ʻi he ngaahi laó kotoa. (Lau ʻa e Maake 12:28-30.) Naʻe ʻikai ngata pē ʻi hono ʻoange ʻe Sīsū ʻa e talí; naʻá ne moʻui ʻo tatau mo e meʻa naʻá ne leaʻakí. Naʻá ne fokotuʻu ʻa e faʻifaʻitakiʻanga māʻolunga taha ʻi he ʻofa kia Sihova ʻaki hono ʻatamaí, lotó, moʻuí mo e mālohí kotoa. Naʻá ne fakahaaʻi ko e anga-tonú ʻoku fakahaaʻi ia, ʻo ʻikai ʻi he lea pē, ka ʻi he ngaahi ngāue lelei ʻa ia ʻoku tupu mei he ngaahi fakaueʻiloto maʻa. Ko ʻetau tauhi anga-tonú ʻoku fiemaʻu ai ke tau muimui ʻi he topuvaʻe ʻo Sīsuú.—1 Pita 2:21.

⁸ Ko e ʻuhinga leva eni ʻo ʻetau anga-tonú ʻi he mahino Fakatohitapú: ko e līʻoa ʻaki ʻa e kotoa ʻo e lotó ki he Tokotaha ʻi hēvani ʻe taha, ko e ʻOtua ko Sihová, pea ki hono finangalo mo e taumuʻa kuo fakahāʻí. Ko e tauhi maʻu ʻo e anga-tonú ʻoku ʻuhinga iá te tau feinga ʻo hiliō he meʻa kotoa ʻi heʻetau moʻui fakaʻahó, ke fakahōifuaʻi ʻa e ʻOtua ko Sihová. Ko ʻetau ngaahi meʻa muʻomuʻa ʻi he moʻuí ʻe tapua atu ai ʻa e ngaahi meʻa ʻoku muʻomuʻa kiate iá. Tau lāulea angé ki he ʻuhinga ʻe tolu ʻoku mātuʻaki mahuʻinga ai ení.

1. Ko ʻEtau Anga-Tonú mo e ʻĪsiu ʻo e Tuʻunga-Haú

 9. ʻOku anga-fēfē ʻa e felāveʻi ʻa ʻetau anga-tonu fakafoʻituituí mo e ʻīsiu ʻo e tuʻunga-hau fakalevelevá?

⁹ Ko e tuʻunga-hau ʻo Sihová ʻoku ʻikai fakatuʻunga ia ʻi heʻetau anga-tonú. Ko hono tuʻunga-haú ʻoku totonu, taʻengata pea fakaleveleva. ʻE pehē maʻu pē ia, ʻo tatau ai pē pe ko e hā ʻoku leaʻaki pe fai ʻe ha meʻa fakatupu. Kae kehe, ko e tuʻunga-hau ʻo Sihová kuo lauʻikoviʻi lahi ia ʻi langi pea ʻi he māmaní. Ko ia ʻoku fiemaʻu ai ke fakatonuhiaʻi ʻa hono tuʻunga-pulé—ʻo fakamoʻoniʻi ʻoku totonu, faitotonu mo anga-ʻofa—ʻi he ʻao ʻo e meʻamoʻui ʻatamai poto kotoa pē. ʻI he tuʻunga ko e Kau Fakamoʻoni ʻa Sihová, ʻoku tau manako ke talanoa ki he tuʻunga-hau fakaleveleva ʻo e ʻOtuá mo ha taha pē ʻe fie fanongo. Ka ʻe lava fēfē ke tau tuʻu ʻo poupouʻi ʻa e ʻīsiu ko ení? ʻOku anga-fēfē ʻetau fakahāhā ʻoku tau fili ʻa Sihova ko hotau Hau? ʻAki hono tauhi maʻu ʻa e anga-tonú.

10. Ko e hā e tukuakiʻi kuo fai ʻe Sētane fekauʻaki mo e anga-tonu ʻa e faʻahinga ʻo e tangatá, pea te ke saiʻia ke fēfē hoʻo tali ki aí?

¹⁰ Fakakaukau angé ki he anga ʻo e kau ki ai ʻa hoʻo anga-tonú. Ko Sētané ko hono moʻoní kuó ne taukaveʻi heʻikai ha tangata ʻe tuʻu ʻo poupouʻi ʻa e tuʻunga-hau ʻo e ʻOtuá, ʻa ia heʻikai ha taha ʻe tauhi kia Sihova ʻi he ʻofa taʻesiokita. ʻI he ʻao ʻo ha fuʻu fakatahataha ʻo e ngaahi meʻamoʻui laumālié, naʻe  pehē ange ai ʻe he Tēvoló kia Sihova: “Ko e kili pe ia telia ha kili: ʻio, ʻe ʻatu ʻe ha tangata ʻene meʻa kotoa telia ʻene moʻui.” (Siope 2:4) Fakatokangaʻi naʻe ʻikai fakangatangata ʻe Sētane ʻa e lea tuku hifo ko iá ki he tangata māʻoniʻoni pē ko Siopé ka naʻá ne fakalea ia ki he faʻahinga ʻo e tangatá fakalūkufua. ʻOku feʻungamālie ai ʻa hono ui ʻe he Tohi Tapú ʻa Sētane ko e “fakakovi o ho tau kaiga” pe fanga tokouá. (Fkh. 12:10, PM) ʻOkú ne manukiʻi ʻa Sihova ʻaki ʻa e taukaveʻi ko e kau Kalisitiané—ʻo kau ai mo koe—heʻikai te nau faitōnunga ai pē. ʻOku taukaveʻi ʻe Sētane te ke lavakiʻi ʻa Sihova koeʻuhi pē ke fakahaofi hoʻo moʻuí. ʻOku fēfē hoʻo ongoʻi fekauʻaki mo e ngaahi tukuakiʻi pehē kuo fai kiate koé? ʻIkai te ke tali lelei ha faingamālie ke fakamoʻoniʻi ai ko Sētané ko ha tokotaha loi? ʻI hono tauhi maʻu hoʻo anga-tonú, ʻe lava ke ke fai ai ʻa e meʻa tofu pē ko iá.

11, 12. (a) Ko e hā ʻa e ngaahi faʻifaʻitakiʻanga ʻoku fakatātaaʻi ai ʻa e anga ʻo e felāveʻi ʻa ʻetau ngaahi fili ʻi he meʻa fakaʻahó mo e ʻīsiu ʻo e anga-tonu fakafoʻituituí? (e) Ko e hā ko ha monū ai ʻa e tauhi maʻu ʻo e anga-tonú?

¹¹ Ko e ʻīsiu ʻo hoʻo anga-tonú ʻokú ne ʻai ai ʻa e ngaahi tōʻonga mo e ngaahi fili fakaʻahó ke mātuʻaki mahuʻinga. Toe fakakaukau angé ki he ngaahi tuʻunga ʻe tolu naʻe lave ki ai ki muʻá. Ko e hā ʻe hoko ko e ʻalunga ia ʻo e anga-tonú? Ko e tamasiʻi naʻe fakamataliliʻi ʻe hono kaungāakó ʻoku fakataueleʻi lahi ia ke ne ʻita kia kinautolu, ka ʻokú ne manatuʻi ʻa e ekinaki ko ení: “Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he Houhau: he kuo tohi, ʻOku aʻaku ʻa e sauni; ko au te u ʻatu hono tuha—ko e folofola e ʻa e ʻEiki.” (Loma 12:19) ʻOkú ne mavahe leva mei ai. Ko e husepāniti ʻokú ne ngāueʻaki ʻa e ʻInitanetí ʻe lava pē ke ne sio ki he fakatātā fakalanga holi fakaefehokotaki fakasinó, ka ʻokú ne manatuʻi ʻa e tefitoʻi moʻoni ʻoku hā ʻi he ngaahi lea ʻa Siopé: “Naʻa ma alea mo hoku mata, ʻo u fai tuʻutuʻuni ki ai; Pea fefe ai haʻaku sio kovi ki ha taʻahine?” (Siope 31:1) ʻI he tuʻunga meimei tatau, ʻoku fakafisi ʻa e tangatá ke sio ki he ngaahi ʻata fakalieliá, ʻo ne fakaʻehiʻehi mei he fakatātā peheé ʻo hangē pē ko ha meʻa ʻoku koná. Ko e fefine ʻoku talanoa ʻi ha kulupu ʻa ia te ne fanongo nai ai ki ha kiʻi lau fakatupu maumaú ʻokú ne taʻotaʻofi ia mei ai, ʻi heʻene manatu ki he fakahinohino: “ʻE, ta taki taha fai ʻa e meʻa ʻe ʻao mo hota kaungaʻapi, ʻa e meʻa ʻe ʻaonga ki hono langa hake.” (Loma 15:2)  Ko e lau ʻoku malava ke ne fakamafolá ʻoku ʻikai ke fakatupu langa hake ia. Heʻikai hā lelei ai ʻa hono tokoua Kalisitiané; pea heʻikai ke hōifua ki ai ʻa ʻene Tamai hēvaní. Ko ia ʻokú ne mapuleʻi ai hono ʻeleló pea liliu ʻa e meʻa ʻoku fai ki ai e talanoá.

¹² ʻI he ngaahi tuʻunga ko iá taki taha, ʻoku fai ai ʻe he Kalisitiané ha fili ʻa ia ko hono moʻoní ʻokú ne pehē ai: ‘Ko Sihova ʻa hoku Pulé. Te u feinga ʻi he meʻá ni ke fai ʻa e meʻa ʻokú ne hōifua ki aí.’ ʻOkú ke fakakaukau ʻi he tuʻunga pehē ki hoʻo ngaahi fili mo e fakapapau fakafoʻituituí? Kapau ko ia, ʻe lava moʻoni ke ke talangofua ki he ngaahi lea fakalotomāfana ʻoku lēkooti ʻi he Palovepi 27:11 (PM): “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.” Ko ha monū moʻoni ē ʻoku tau maʻú ʻi hono ʻai ke fiefia ʻa e loto ʻo e ʻOtuá! ʻIkai ʻoku taau ʻa ʻetau feinga kotoa ke tauhi maʻu ʻetau anga-tonú?

2. Ko e Makatuʻunga ki he Fakamaau Fakaʻotuá

13. ʻOku anga-fēfē hono fakahaaʻi ʻi he ngaahi lea ʻa Siope mo Tēvitá ko e anga-tonú ʻa e makatuʻunga ʻoku fakamāuʻi mei ai ʻe Sihova kitautolú?

¹³ ʻOku tau ʻiloʻi ʻoku fakamafeia kitautolu ʻe he anga-tonú ke tau poupouʻi ʻa e tuʻunga-hau ʻo Sihová. Ko ia ai, ko e makatuʻunga ia ʻe lava ke fakamāuʻi ai kitautolu ʻe he ʻOtuá. Naʻe mahinoʻi lelei ʻe Siope ʻa e foʻi moʻoni ko ení. (Lau ʻa e Siope 31:6.) Naʻe ʻiloʻi ʻe Siope ʻoku fua ʻe he ʻOtuá ʻa e faʻahinga kotoa ʻo e tangatá ʻi he “[meʻafua] totonu,” ʻo ngāueʻaki ʻa ʻEne tuʻunga haohaoa ʻo e fakamaau totonú ke ʻiloʻi ai pe ʻoku tau anga-tonu. Naʻe leaʻaki ʻe Tēvita ʻa e meʻa meimei tatau: “E fakamāu e Jihova ae kakai: ke ke fakamāu au, E Jihova, o fakatatau ki he eku maonioni, bea hage ko eku agatonu oku iate au. . . . He oku ahiahiʻi e he Otua maonioni ae gaahi loto moe gaahi koga loto [pe kofuuá].” (Sāme 7:8, 9 [Sāme 7:7-9], PM) ʻOku tau ʻiloʻi ʻe lava ke ʻafio ʻa e ʻOtuá ki he tuʻunga taupotu taha ʻo e tokotaha ʻi lotó, ʻa e ‘lotó mo e kofuuá.’ Ka ʻoku fiemaʻu ke tau manatuʻi ʻa e meʻa ʻokú ne kumi ki aí. Hangē ko ia naʻe leaʻaki ʻe Tēvitá, ʻe fakamāuʻi kitautolu ʻe Sihova ʻo fakatatau ki heʻetau anga-tonú.

14. Ko e hā ʻoku totonu ai ke ʻoua ʻaupito te tau pehē ko hotau natula taʻehaohaoa mo angahalaʻiá ʻe taʻofi ai kitautolu mei he tauhi maʻu ʻo ʻetau anga-tonú?

¹⁴ Fakaʻuta atu ki hono kumi he ʻahó ni ʻe he ʻOtua ko Sihová ʻa e ngaahi loto ʻe laui piliona ʻo e faʻahinga ʻo e tangatá. (1 Kal. 28:9) ʻOku tuʻo fiha ʻene maʻu ha taha ʻoku tauhi maʻu ʻene anga-tonu faka-Kalisitiané? ʻOku ʻi ha tuʻunga tātātaha moʻoni! Kae kehe, ʻoku ʻikai totonu ke tau pehē ʻoku tau fuʻu taʻehaohaoa kitautolu ke tauhi maʻu ʻetau anga-tonú. ʻI hono kehé, ʻoku tau maʻu ʻa e ʻuhinga lelei ke tau hangē ko Tēvita mo Siopé, ʻo falala ʻe ʻiloʻi kitautolu ʻe Sihova ʻoku tau tauhi maʻu ʻetau anga-tonú, neongo ʻa ʻetau taʻehaohaoá. Manatuʻi, ko e haohaoá ʻoku ʻikai ko e fakapapauʻiʻanga ia ʻo ʻetau tauhi anga-tonú. Ko e kau haohaoa pē ʻe toko tolu ʻi he faʻahinga ʻo e tangatá naʻa nau ʻaʻeva ʻi he māmani ko ení, pea ko e toko ua ai, ʻa ʻĀtama mo ʻIvi, naʻe ʻikai ke na lava ʻo tauhi maʻu ʻena anga-tonú. Neongo ia, kuo lavameʻa ʻa e laui miliona ʻo e faʻahinga taʻehaohaoa ʻo e tangatá ʻi hono fai iá. ʻE lava ke pehē pē mo koe.

3. Fiemaʻu ʻAupito Ia ki Heʻetau ʻAmanakí

15. Naʻe anga-fēfē hono fakahaaʻi ʻe Tēvita ko e anga-tonú ʻoku fiemaʻu ʻaupito ia ki heʻetau ʻamanaki ki he kahaʻú?

¹⁵ Koeʻuhi ko e anga-tonú ʻoku makatuʻunga mei ai hono fakamāuʻi kitautolu ʻe Sihová, ʻoku fiemaʻu ʻaupito ia ki heʻetau ʻamanaki ki he kahaʻú. Naʻe ʻiloʻi ʻe Tēvita ʻoku moʻoni eni. (Lau ʻa e Sāme 41:12, “PM.”) Naʻá ne koloaʻaki ʻa e ʻamanaki ko hono maʻu ʻa e tokanga hōifua ʻa e ʻOtuá ʻo taʻengata. ʻI he hangē ko e kau Kalisitiane moʻoni he ʻaho ní, naʻe ʻamanaki ʻa Tēvita ke moʻui taʻengata, ʻo hokohoko atu ʻene ʻunuʻunu ke toe ofi ange ai pē ki he ʻOtua ko Sihová lolotonga ʻene tauhi kiate iá. Naʻe ʻilo ʻe Tēvita ʻa e mahuʻinga ke ne tauhi maʻu ʻene anga-tonú kapau ʻokú ne fie sio ki hono fakahoko ʻo e ʻamanaki ko iá. ʻI he tuʻunga meimei tatau, ʻoku poupouʻi kitautolu ʻe Sihova, ʻo akoʻi kitautolu, tataki kitautolu pea tāpuakiʻi kitautolu ʻi heʻetau tauhi maʻu ʻetau anga-tonú.

16, 17. (a) Ko e hā ʻokú ke fakapapauʻi maʻu pē ai ke tauhi maʻu hoʻo anga-tonú? (e) Ko e hā e ngaahi fehuʻi ʻe lāulea ki ai ʻi he kupu hoko maí?

¹⁶ ʻOku fiemaʻu ʻa e ʻamanakí ki heʻetau fiefia lolotongá.  ʻE lava ke ne ʻomai kia kitautolu ʻa e fiefia ʻoku tau fiemaʻu ke hokohoko atu ai ʻi he ngaahi taimi faingataʻá. ʻE lava foki ke maluʻi ʻe he ʻamanakí ʻetau fakakaukaú. Manatuʻi, ʻoku fakatatau ʻe he Tohi Tapú ʻa e ʻamanakí ki ha tatā. (1 Tes. 5:8) Hangē ko hono maluʻi ʻe ha tatā ha ʻulu ʻo ha sōtia ʻi he taú, ʻoku maluʻi ʻe he ʻamanakí hotau ʻatamaí mei he fakakaukau taʻepau mo fakatuʻatamaki ʻoku pouaki ʻe Sētane ʻi he māmani motuʻa tei mate ko ení. ʻOku fakaʻofa moʻoni ʻa e moʻuí ʻo ka ʻikai haʻatau ʻamanaki. ʻOku fiemaʻu ke tau sivisiviʻi faitotonu kitautolu, ʻo fakakaukau fakalelei ki he tuʻunga ʻo ʻetau anga-tonú tonu mo e ʻamanaki ʻoku fehokotaki mo iá. ʻOua naʻa ngalo ʻi he tauhi anga-tonú, ʻokú ke pouaki ai ʻa e tuʻunga-hau ʻo Sihová pea maluʻi ʻa hoʻo ʻamanaki mahuʻinga ki he kahaʻú. ʻOfa ke ke tauhi maʻu ai pē ʻa hoʻo anga-tonú!

¹⁷ Koeʻuhi ko e fuʻu mahuʻinga ʻa e anga-tonú, ʻoku fiemaʻu ke tau lāulea ki ha toe ngaahi fehuʻi. ʻOku anga-fēfē ʻetau fakatupulekina ʻa e anga-tonú? ʻE lava fēfē ke tau tauhi maʻu ia? Pea ko e hā ʻe lava ke fai kapau naʻe ʻikai tauhi maʻu ia ʻe ha taha ʻi ha taimi? ʻE lāulea ʻi he kupu hoko maí ki he ngaahi fehuʻi ko ení.

[Fakamatala ʻi lalo]

ʻE Fēfē Haʻo Tali?

• Ko e hā ʻa e anga-tonu?

• ʻOku anga-fēfē ʻa e felāveʻi ʻa e anga-tonú mo e ʻīsiu ʻo e tuʻunga-hau fakalevelevá?

• ʻOku anga-fēfē hono ʻomai ʻe he anga-tonú ha makatuʻunga ki heʻetau ʻamanakí?

[Fehuʻi ki he Ako]

[Fakatātā ʻi he peesi 5]

Ko e moʻui ʻi he ʻaho kotoa pē ʻoku ʻomai ai ʻa e ngaahi pole lahi ki heʻetau anga-tonú