Falala Kia Sihova, Ko E “Otua Oe Fiemalie Kotoabe”
Falala Kia Sihova, Ko E “Otua Oe Fiemalie Kotoabe”
“Fakafetai ki he Otua, moe Tamai a ho tau Eiki ko Jisu Kalaisi, koe Tamai ae gaahi aloofa, moe Otua oe fiemalie kotoabe.”—2 KOL. 1:3, PM.
1. Tatau ai pē pe ko e hā e ta‘umotu‘á, ko e hā e fiema‘u ‘oku ma‘u ‘e he fa‘ahinga ‘o e tangatá?
MEI hotau fanau‘í ‘o faai mai, ‘oku tau ongo‘i e fiema‘u ki ha fakafiemālié. ‘Oku ngāue‘aki ‘e ha pēpē hono ‘ōkani leá ke ‘ai ke tau ‘ilo ‘a e taimi ‘okú ne fiema‘u ai ha fakafiemālié. Mahalo ‘okú ne fiema‘u ke fua ia pe ‘okú ne fiekaia. Na‘a mo e taimi ‘oku tau motu‘a ange aí, ‘oku tau fa‘a ongo‘i e fiema‘u ke hoko ‘o fakafiemālie‘í. ‘Oku tautefito ‘a e hoko ‘a e tu‘ungá ni ‘i he taimi ‘oku tau hokosia ai ha ngaahi tu‘unga faingata‘a.
2. Ko e hā e fakapapau ‘oku ‘omi ‘e Sihova te ne fakafiemālie‘i ‘a e fa‘ahinga ‘oku falala kiate iá?
2 ‘Oku fa‘a lava ‘e he ngaahi mēmipa ‘o e fāmilí mo e ngaahi kaume‘á ke nau ‘omi ha ki‘i fakafiemālie. Kae kehe, ‘i he taimi ‘e ni‘ihi, ko e ngaahi tu‘unga ‘okú ne fakatupunga ke tau loto-mamahi aí ‘oku mahulu atu ia he ngaahi fakalelei‘anga fakaetangatá. Ko e ‘Otuá pē ‘oku lava ke ne ‘omi ‘a e fakafiemālié tatau ai pē pe ko e hā ‘a e lahi ‘o e fakalotomamahi ‘a e tu‘unga nai ‘oku tau ‘i aí. ‘Oku fakapapau‘i mai ‘e he‘ene Folofolá: “‘Oku ofi leva ‘a Sihova ki he kakai kotoa ‘oku tautapa kiate ia; . . . pea ‘oku ongo kiate ia ‘enau kaila.” (Sāme 145:18, 19) ‘Io, “ko e fofonga ‘o Sihova ‘oku lalama ki he kau ma‘oni‘oni, pea ‘oku ne fakaongo ke ma‘u ‘enau tangi.” (Sāme 34:15) Ka ‘o kapau ‘oku tau fiema‘u ke ma‘u e poupou mo e fakafiemālie ‘a e ‘Otuá, kuo pau ke tuku ‘etau falalá kiate ia. Na‘e fakamahino ‘e he tokotaha-tohi-saame ko Tēvitá ‘a e me‘a ko iá ‘i he‘ene hiva: “Koe hufaga foki a Jihova ki he mamahi, koe kalofaga i he gaahi aho fakamamahi. Bea ko kinautolu oku ilo ki ho huafa te nau falala kiate koe: he ko koe, e Jihova, nae ikai te ke jiaki akinautolu oku kumi kiate koe.”—Sāme 9:9, 10, PM.
3. Na‘e fakatātaa‘i fēfē ‘e Sīsū ‘a e ‘ofa ‘a Sihova ki Hono kakaí?
3 Ko e kau lotu ‘a Sihová ‘oku mahu‘inga kiate ia. Na‘e fakamahino eni ‘e Sīsū ‘i he‘ene pehē: “‘Ikai ‘oku fakatau ha fanga ki‘i misi ‘e toko nima ki ha konga seniti ‘e ua? pea ‘oku ‘ikai tuku ta‘e manatu hanau toko taha ‘i he ‘afio ‘a e ‘Otua. Ka na‘a mo e ngaahi tu‘oni lou‘ulu ‘omoutolu kuo ‘osi lau fakalāutelau. ‘Oua te mou manavahe: ‘oku mou mahu‘inga ‘i ha fanga misi tokolahi.” (Luke 12:6, 7) Fakafou ‘i he palōfita ko Selemaiá, na‘e tala ‘e Sihova ki Hono kakai he kuonga mu‘á: “Kuo u ‘ofa‘i koe ‘aki ha ‘ofa ta‘engata: ko ia kuo u toloaki ma‘au ‘a e mēsi.”—Sel. 31:3.
4. Ko e hā ‘oku lava ai ke tau falala ki he ngaahi tala‘ofa ‘a Sihová?
4 Ko e falala kia Sihova pea ki hono fakahoko ‘ene ngaahi tala‘ofá ‘e lava ke ‘omi ai kia kitautolu e fakafiemālie he ngaahi taimi fakamamahí. Ko ia ai, ‘oku totonu ke tau ma‘u e falala tatau ki he ‘Otuá ‘o hangē ko ia na‘e fakahaa‘i ‘e Siosiuá, ‘a ia na‘á ne fakahā: “Kuo ‘ikai to kelekele ha momo‘i me‘a ‘e taha ‘i he ngaahi lelei fuape na‘e tala‘ofa ‘e Sihova ko homou ‘Otua ma‘amoutolu; kuo hoko kotoa pe kiate kimoutolu, kuo ‘ikai ke hala ha me‘a ‘e taha.” (Sios. 23:14) ‘Ikai ko ia pē, ‘oku lava ke tau fakapapau‘i neongo kapau ‘oku lōmia fakataimi kitautolu ‘e he ngaahi tu‘unga faingata‘á, “ko e ‘Otua ko e toko taha ‘oku fai ki he‘ene lea” pea he‘ikai ‘aupito te ne li‘aki ‘ene kau sevāniti mateakí.—Lau ‘a e 1 Kolinito 10:13.
5. ‘Oku anga-fēfē malava ke tau fakafiemālie‘i ‘a e ni‘ihi kehé?
5 ‘Oku lave e ‘apositolo ko Paulá kia Sihova ko e “Otua oe fiemalie kotoabe.” “Ke fakafiemālie‘í” ‘oku ‘uhinga iá ke fakanonga ha taha ‘oku ‘i he tu‘unga fakamamahi pe ‘oku loto-mamahi. ‘Oku fai eni ‘aki hono fakanonga hifo ‘ene faingata‘a‘iá pe mamahí pea ‘oange ki ai ha fakafiemālie. ‘Oku fai mo‘oni eni ‘e Sihova. (Lau ‘a e 2 Kolinito 1:3, 4, “PM.”) Ko ‘etau Tamai fakahēvaní ‘oku ‘ikai fakangatangata ia ‘e ha me‘a pe ha taha pea ko ia ai ‘okú ne fa‘iteliha ki ha fa‘ahinga founga pē ‘oku fiema‘u ke tokonaki ai e fakafiemālié ki he fa‘ahinga ‘oku ‘ofa kiate iá. ‘I he‘ene peheé, te tau malava ke fakafiemālie‘i hotau ngaahi kaungātuí ‘i he “mamahi kotoabe.” ‘E lava ke tau fai pehē ‘aki “ae fakafiemalie koia aia oku fakafiemalie‘i aki akitautolu e he Otua.” He fakahaa‘i lelei ē ‘e he me‘á ni ‘a e malava ta‘ealafakatataua ‘a Sihova ke fakafiemālie‘i e fa‘ahinga ‘oku siva ‘enau ‘amanakí!
Fekuki mo e Ngaahi Tupu‘anga ‘o e Fakalotomamahí
6. ‘Omi ha ngaahi fakatātā ‘o e ngaahi me‘a ‘e lava ke ne fakatupunga ‘a e loto-mamahí?
6 ‘Oku fiema‘u kia kitautolu ‘a e fakafiemālie ‘i he ngaahi tafa‘aki lahi ‘o e mo‘uí. Ko e taha ‘o e ngaahi tupu‘anga lahi taha ‘o e mamahí ko e mole ha taha ‘ofeina ‘i he maté, tautefito ki ha hoa mali pe ko ha ki‘i tama ‘ofeina. ‘E toe fiema‘u nai ‘a e fakafiemālié koe‘uhi ko ha taha ‘oku ma‘ukovia ‘e he fakafaikehekehe‘í pe tomu‘a fehi‘á. Ko e mahamahakí, hoholo ke motu‘á, masivá, ngaahi palopalema fakaemalí, pe ngaahi tu‘unga fakalotomamahi ‘o e māmaní ‘e lava ke fakatupulekina ai ha fiema‘u fakafo‘ituitui ki ha fakafiemālie.
7. (a) ‘I he ngaahi tu‘unga fakalotomamahí, ko e hā e fa‘ahinga fakafiemālie ‘oku fiema‘ú? (e) Ko e hā ‘e lava ‘e Sihova ke fai ke faito‘o ha loto ‘oku “lavea mo mafesifesi”?
7 ‘I he ngaahi taimi ‘o e loto-mamahí, ‘e fiema‘u nai kiate kitautolu ‘a e fakafiemālie ‘okú ne fakanonga hotau lotó, hotau ‘atamaí, ‘etau ngaahi ongo‘í, mo ‘etau mo‘ui fakaesinó mo fakalaumālié fakatou‘osi. Ko e fakatātaá, fakakaukau ki he lotó. ‘Oku fakahaa‘i ‘e he Folofola ‘a e ‘Otuá ko hotau lotó ‘e lava ke “lavea mo mafesifesi.” (Sāme 51:17) ‘Oku malava mo‘oni ‘a Sihova ke feangainga mo e tu‘unga ko ení, “he ko e lotomafesi ‘oku ne faito‘o, pea ‘oku ne ha‘iha‘i honau ngaahi kafo.” (Sāme 147:3) Na‘a mo e ngaahi tu‘unga kakahá, ‘e lava ‘e he ‘Otuá ke ne ‘omi ‘a e fakanonga ki ha loto kuo kafo kapau te tau lotu kiate ia ‘i he tui kakato pea tauhi ‘ene ngaahi tu‘utu‘uní.—Lau ‘a e 1 Sione 3:19-22; 5:14, 15.
8. ‘I he taimi ‘oku tau mamahi faka‘atamai aí, ‘e lava fēfē ke tokoni‘i kitautolu ‘e Sihova?
8 Ko hotau ‘atamaí ‘oku fa‘a fiema‘u ke fakafiemālie‘i koe‘uhi ko e ngaahi ‘ahi‘ahi kehekehe ‘e lava ke ne fakatupunga ‘a e mamahi faka‘atamai lahi. ‘I hotau mālohí tonu, ‘oku ngalingali he‘ikai lava ke tau fekuki mo e ngaahi ‘ahi‘ahi ko eni ‘o e tuí. Kae kehe, na‘e hiva ‘a e tokotaha-tohi-sāmé: “I hono lahi o eku gaahi mahalo iate au, oku fakafiefia‘i au i hoo gaahi mea fakafiemalie.” (Sāme 94:19, PM) ‘Ikai ko ia pē, na‘e tohi ‘e Paula: “Neongo pe ko e ha ‘a e me‘a, ‘oua te mou lotomo‘ua ai; ka ‘i he me‘a kotoa pe tuku ke ha ki he ‘Otua ho‘omou ngaahi kole, ‘i he lotu mo e hufia, pea fai mo e fakafeta‘i. Pea ko e nonga ‘a e ‘Otua, ‘a ia ‘oku mama‘o ‘i he tatae ‘a e ‘atamai kotoa pe, te ne malu‘i homou loto mo ho‘omou ngaahi fakakaukau ‘ia Kalaisi Sisu.” (Fili. 4:6, 7) Ko hono lau pea fakalaulauloto ki he ngaahi konga Tohi Tapú ‘e lava ke hoko ia ko e tokoni lahi ‘i he fekuki mo e mamahi faka‘atamaí.—2 Tim. 3:15-17.
9. ‘E lava fēfē ke tau fekuki mo e mamahi fakaeongó?
9 ‘I he taimi ‘e ni‘ihi, te tau hoko nai ‘o fu‘u loto-si‘i ‘o lava ai ke tau ‘i ha tu‘unga fakatu‘utāmaki ‘o e tō ki he ngaahi ola ‘o e ngaahi ongo‘i tamaki. Mahalo te tau ongo‘i ta‘emalava ke tokanga‘i ha fatongia Fakatohitapu pau pe monū ‘o e ngāué. ‘I hení foki, ‘e lava ‘e Sihova ke fakafiemālie‘i mo tokoni‘i kitautolu. Ke fakatātaa‘i: ‘I he taimi na‘e fekau‘i ai ‘a Siosiua ke taki e kau ‘Isilelí ke tau‘i e ngaahi pule‘anga mālohi fakafilí, na‘e tala ‘e Mōsese ki he kakaí: “Mou loto to‘a, ‘o tu‘u kalikali, ‘oua te mou manavahe, ‘oua te mou teki kiate kinautolu: he ko Sihova ko ho ‘Otua ko ia ia ‘oku ha‘ele mo kimoutolu; ‘e ‘ikai te ne fakatukuhāusia‘i koe, ‘uma‘a ha‘ane li‘aki.” (Teu 31:5, 6) ‘I he poupou ‘a Sihová, na‘e malava ai ‘a Siosiua ke taki atu e kakai ‘a e ‘Otuá ki he Fonua ‘o e Tala‘ofá pea ikuna‘i ‘a e kotoa honau ngaahi filí. Ki mu‘a atu ‘i he Tahi Kulokulá, na‘e hokosia ai ‘e Mōsese ‘a e poupou fakae‘otua meimei tatau.—Eki. 14:13, 14, 29-31.
10. Kapau ‘oku uesia ‘etau mo‘ui fakaesinó ‘e ha mamahi, ko e hā e tokoni ‘e lava ke tau ma‘ú?
10 Ko e ngaahi me‘a fakalotomamahí ‘e lava ke ‘i ai ha nunu‘a kovi ki he‘etau mo‘ui fakaesinó. Ko e mo‘oni, ko e kai fe‘ungá, ma‘u e mālōlō mo fakamālohisino fe‘ungá, pea tauhi ke ma‘á ‘e lava ke ‘i ai ha ola lelei kiate kitautolu. Ko ha vakai fakalaumālie lelei makatu‘unga ‘i he Tohi Tapú ‘e uesia lelei nai ai hotau sinó. Ko ia ai, ‘oku ‘aonga he taimi ‘oku tau tofanga ai ‘i ha mamahí ke tau manatu‘i ‘a e hokosia ‘a Paulá mo ‘ene ngaahi lea fakalototo‘á: “Ko homau anga é, ko e fetekeekina kimautolu mei he potu kotoa pe, kae ‘ikai ‘efitu‘ua; ko e fakapalalauatu‘u kae ‘ikai hē ‘aupito; ko e tulia kae ‘ikai li‘ekina ki he fili; ko e te‘ia kae ‘ikai fakamate.”—2 Kol. 4:8, 9.
11. ‘E lava fēfē ke fakafepaki‘i ‘a e puke fakalaumālié?
11 Ko e ngaahi ‘ahi‘ahi ‘e ni‘ihi ‘e lava ke ‘i ai ha nunu‘a fakatupu maumau ki he‘etau mo‘ui fakalaumālié. ‘I hení foki, ‘e lava ‘e Sihova ke fakahaofi kitautolu. ‘Oku fakapapau‘i mai he‘ene Folofolá: “‘Oku poupou ‘e Sihova ‘a e kau hinga kotoa pe, pea ko kinautolu ‘oku mapelu ki lalo ‘oku ne pukepuke hake.” (Sāme 145:14) Ki ha tokoni ke fakafepaki‘i ‘a e puke fakalaumālié, ‘oku totonu ke tau kumi tokoni ki he kau mātu‘a Kalisitiané. (Sem. 5:14, 15) Pea ko hono manatu‘i ma‘u pē ‘a e ‘amanaki Fakatohitapu ko e mo‘ui ta‘engatá ‘e lava ke tokoni ia ke fakaivia kitautolu lolotonga ‘a e ngaahi ‘ahi‘ahi ‘o ‘etau tuí.—Sione 17:3.
Ngaahi Fakatātā ‘o e Fakafiemālie Kuo ‘Omai ‘e he ‘Otuá
12. Fakamatala‘i ‘a e anga fakafiemālie ‘a Sihova kia ‘Ēpalahamé.
12 Na‘e fakahaa‘i ‘e ha tokotaha-tohi-saame fakamānava‘i: “Manatu‘i ae folofola ki hoo tamaioeiki, aia kuo ke [Sihova] fakaamanaki‘i au ki ai. Ko hoku fiemalieaga eni i he eku mamahi: he ko hoo folofola kuo ne fakamoui au.” (Sāme 119:49, 50, PM) ‘I he ‘ahó ni, ‘oku tau ma‘u ‘a e Folofola tohi ‘a Sihová, ‘a ia ‘oku ‘i ai e ngaahi fakatātā lahi ‘o e fakafiemālie kuo ‘omai ‘e he ‘Otuá. Hangē ko ení, ko ‘Ēpalahame na‘á ne mātu‘aki mamahi nai he taimi na‘á ne ‘ilo ai na‘e teu faka‘auha ‘e Sihova ‘a Sōtoma mo Komolá. Na‘e ‘eke ‘e he pēteliake faitōnunga ko iá ki he ‘Otuá: “Te ke faka‘auha ‘a e ma‘oni‘oni fakataha mo e angahala?” Na‘e fakafiemālie‘i ‘e Sihova ‘a ‘Ēpalahame ‘aki ‘ene fakapapau‘i ange kapau ko e kakai mā‘oni‘oni pē ‘e toko 50 ‘e lava ‘o ma‘ú, he‘ikai te Ne faka‘auha ‘a Sōtoma. Kae kehe, na‘e toe ‘eke tu‘o nima ‘e ‘Ēpalahame kia Sihova: Fēfē kapau ko e kakai mā‘oni‘oni pē ‘e toko 45? 40? 30? 20? 10? ‘I he taimi taki taha, na‘e mātu‘aki fakapapau‘i anga-kātaki mo anga-lelei ange ‘e Sihova kia ‘Ēpalahame ‘e fakahaofi ‘a Sōtoma. Neongo na‘e ‘ikai pē ke a‘u ki ha kakai mā‘oni‘oni ‘e toko hongofulu ‘i he feitu‘ú, na‘e fakahaofi ‘e Sihova ‘a Lote mo hono ongo ‘ofefiné.—Sen. 18:22-32; 19:15, 16, 26.
13. Na‘e fakahaa‘i fēfē ‘e ‘Ana na‘á ne falala kia Sihová?
13 Ko e uaifi ‘o ‘Elikena ko ‘Aná na‘á ne fiema‘u lahi ha‘ane tama. Ka na‘á ne pa‘a, pea na‘e fakalotomamahi eni kiate ia. Na‘á ne lotu kia Sihova fekau‘aki mo e me‘a ko iá, pea na‘e pehē ange ‘e he Taula‘eiki Lahi ko ‘Īlaí: “Tauange mo e ‘Otua ‘o Isileli ke ne tali ‘a e kole kuo ke fai.” Na‘e fakafiemālie‘i ‘e he me‘á ni ‘a ‘Ana, “pea na‘e ‘ikai toe pehe hono fofonga.” (1 Sam. 1:8, 17, 18) Na‘e falala ‘a ‘Ana kia Sihova, ‘o tuku atu ‘i he falala-pau ‘a e ngaahi me‘á ki hono ongo to‘ukupú. Neongo na‘e ‘ikai te ne ‘ilo ‘a e ola ‘e hokó, na‘e hokosia ‘e ‘Ana ‘a e nonga ‘i loto. ‘I he faai mai ‘a e taimí, na‘e tali ‘e Sihova ‘ene lotú. Na‘e hoko ‘o ne feitama pea fā‘ele‘i ha foha, ‘o fakahingoa ia ko Sāmiuela.—1 Sam. 1:20.
14. Ko e hā na‘e fiema‘u ai kia Tēvita ‘a e fakafiemālié, pea ko hai na‘á ne hanga ki aí?
14 Ko Tu‘i Tēvita ‘o ‘Isileli ‘o e kuonga mu‘á ko ha toe fakatātā ia ‘e taha ‘o ha tokotaha na‘e fakafiemālie‘i ‘e he ‘Otuá. Koe‘uhi ko Sihová ‘okú ne ‘sio ki he lotó,’ ‘i he taimi na‘á ne fili ai ‘a Tēvita ke hoko ko ha tu‘i ‘Isileli ‘i he kaha‘ú, na‘á ne ‘ilo na‘e loto-mo‘oni mo lī‘oa ‘a Tēvita ki he lotu mo‘oní. (1 Sam. 16:7; 2 Sam. 5:10) Kae kehe, ki mui ai, na‘e fai ‘e Tēvita ‘a e tono mo Patisepa pea feinga ke fakapuliki e angahalá ‘aki hono ‘ai ke mate hono husepānití. ‘I he taimi na‘e ‘ilo‘i ai ‘e Tēvita ‘a e mafatukituki ‘ene angahalá, na‘á ne lotu kia Sihova: “Ke ke tamate‘i ‘eku ngaahi angahala ke hoa mo e lahi ‘o ho‘o ‘alo‘ofa. Ke ke matu‘aki fo au mei he‘eku hia, pea ‘ai ke u ma‘a mei he‘eku angahala. He ‘oku ou ‘ilo‘i ‘eku talangata‘a, pea ‘oku ma fe‘ao ma‘u pe mo ‘eku angahala.” (Sāme 51:1-3) Na‘e fakatomala mo‘oni ‘a Tēvita, pea na‘e fakamolemole‘i ia ‘e Sihova. Kae kehe, na‘e pau ke fehangahangai ‘a Tēvita mo e ngaahi nunu‘a ‘ene faihalá. (2 Sam. 12:9-12) Neongo ia, ko e ‘alo‘ofa ‘a Sihová ko ha matavai ia ‘o e fakafiemālie ki he‘ene sevāniti anga-fakatōkilaló.
15. Ko e hā e tokoni na‘e ‘oange ‘e Sihova kia Sīsū ki mu‘a pē ke ne pekiá?
15 ‘I he‘ene ‘i māmaní, na‘e fehangahangai ai ‘a Sīsū mo e ngaahi tu‘unga faingata‘a lahi. Na‘e faka‘atā ‘e he ‘Otuá e ngaahi ‘ahi‘ahi ko eni ‘o e tuí, pea na‘e tauhi ma‘u ‘e Sīsū ‘ene anga-tonú ‘i he tu‘unga ko ha tangata haohaoa na‘e falala ma‘u pē kia Sihova mo pouaki Hono tu‘unga-haú. ‘I he teu ke lavaki‘i mo fakapōngí, na‘e lotu ‘a Sīsū kia Sihova: “Ke ‘oua na‘a fai hoku loto ka ko ho‘ou pē.” Na‘e hā mai leva ha ‘āngelo kia Sīsū ‘o fakaivimālohi‘i ia. (Luke 22:42, 43) Na‘e ‘oange ‘e he ‘Otuá kia Sīsū ‘a e fakafiemālie, mālohi, mo e poupou na‘e fiema‘u kiate ia ‘i he taimi ko iá.
16. Ko e hā ‘e lava ke fai ‘e he ‘Otuá fekau‘aki mo e mamahi ‘oku tau hokosia nai kapau ‘oku tau fehangahangai mo e maté ‘i he tu‘unga ko e kau tauhi anga-tonú?
16 Neongo kapau ‘e faifai pea tau fehangahangai tonu mo e maté koe‘uhi ko ‘etau tu‘u ma‘u ko e kau Kalisitiané, ‘e lava pea ‘e tokoni‘i kitautolu ‘e Sihova ke tau tauhi ma‘u ‘etau anga-tonu kiate iá. ‘Ikai ko ia pē, ‘oku fakafiemālie‘i kitautolu ‘e he ‘amanaki ‘o e toetu‘ú. Pea he fakatu‘otu‘a atu ē ko kitautolu ki he ‘aho ‘e “fakaka‘anga” ai ‘a e fili fakamuí, ‘a mate! (1 Kol. 15:26) Ko e kau sevāniti mateaki ‘a e ‘Otuá kuo nau maté, pea pehē ki ha ni‘ihi kehe, ‘oku nau ‘i he manatu ta‘ealamangalo ‘a Sihová pea ‘e toe fokotu‘u hake kinautolu. (Sione 5:28, 29; Ng. 24:15) Ko e falala-pau ki he tala‘ofa ‘a Sihova ki ha toetu‘ú ‘oku ‘omi ai kia kitautolu ‘a e fakafiemālie mo ha ‘amanaki papau he lolotonga e ngaahi taimi ‘o e fakatangá.
17. ‘E lava fēfē ‘e Sihova ‘o fakafiemālie‘i kitautolu he taimi ‘oku mate ai ha taha ‘ofeina?
17 He fakafiemālie ē ke ‘ilo ko hotau ngaahi ‘ofa‘anga kuo mohe he taimí ni ‘i he fa‘itoka anga-maheni ‘o e fa‘ahinga ‘o e tangatá ‘oku nau ma‘u e ‘amanaki ‘o e toe mo‘ui ‘i ha māmani fo‘ou fakaofo ‘oku ‘atā mei he ngaahi tupu‘anga kotoa ‘i onopooni ‘o e mamahí! Pea ko ha monū ē ki he “fu‘u kakai lahi” ‘o e kau sevāniti ‘a Sihova te nau hao atu he ngata‘anga ‘o e fokotu‘utu‘u fulikivanu ko ení ke talitali lelei mo ako‘i e fa‘ahinga te nau toetu‘u mai ke mo‘ui ‘i he māmaní!—Fkh. 7:9, 10.
‘Oku ‘i Lalo e Nima Ta‘engata ‘o e ‘Otuá
18, 19. Kuo fakafiemālie‘i fēfē e kau sevāniti ‘a e ‘Otuá he taimi ‘oku fakatanga‘i ai kinautolú?
18 ‘I he ngaahi lea ‘o ha hiva mālohi mo fakalotomāfana, na‘e fakapapau‘i ‘e Mōsese ki he kakai ‘Isilelí: “Koe Otua taegata ko ho hufaga, bea oku i lalo iate koe ae nima tologa taegata.” (Teu. 33:27, PM) Na‘e tala ki mui ‘e he palōfita ko Sāmiuelá ki he kau ‘Isilelí: “‘Oua te mou afe mei he muimui kia Sihova, ka mou tauhi ki he‘ene ‘Afio aki ‘a e kotoa ‘o homou loto; . . . tala‘ehai ‘e li‘aki ‘e he ‘Eiki hono kakai telia hono fu‘u huafa.” (1 Sam. 12:20-22, PM) ‘O ka tau ka pīkitai ai pē kia Sihova ‘i he lotu mo‘oní, he‘ikai ‘aupito te ne li‘aki kitautolu. Te ne ‘omai ma‘u pē kia kitautolu e poupou ‘oku tau fiema‘ú.
19 ‘Oku ‘oatu ta‘emamotu ‘e he ‘Otuá ki hono kakaí ‘a e tokoni mo e fakafiemālie ‘oku fiema‘u he kuonga fakamui faingata‘a ko ení. Laka hake ‘i ha senituli, ko e laui afe hotau ngaahi kaungātui ‘i he kotoa e māmaní kuo fakatanga‘i pea tuku pilīsone koe‘uhi pē ko ‘enau tauhi kia Sihová. Ko ‘enau ngaahi hokosiá ‘oku fakamo‘oni‘i ai ‘i he ngaahi taimi ‘o e ‘ahi‘ahí, ‘oku fakafiemālie‘i mo‘oni ‘e Sihova ‘ene kau sevānití. Ko e fakatātaá, ko e taha hotau fanga tokoua ‘i he Sovieti ‘Iunioni ki mu‘á na‘e tautea ki he ta‘u ‘e 23 ‘i he pilīsoné koe‘uhi ko ‘ene tuí. Neongo ia, na‘e ma‘u ha founga ke a‘u ai e me‘akai fakalaumālié kiate ia koe‘uhí ke lava ‘o fakaivimālohi‘i mo fakafiemālie‘i ia. Na‘á ne pehē: “Lolotonga e ngaahi ta‘u kotoa ko iá, na‘á ku ako ke falala kia Sihova pea ma‘u e mālohi meiate ia.”—Lau ‘a e 1 Pita 5:6, 7.
20. Ko e hā ‘oku lava ai ke tau fakapapau‘i he‘ikai li‘aki kitautolu ‘e Sihová?
20 Tatau ai pē pe ko e hā e me‘a te tau toki fehangahangai nai mo iá, ‘e lelei ke tau manatu‘i e ngaahi lea fakafiemālie ‘a e tokotaha-tohi-sāmé: “E ikai liaki e Jihova hono kakai.” (Sāme 94:14, PM) Neongo ‘etau fiema‘u fakafo‘ituitui ke fakafiemālie‘í, ‘oku tau toe ma‘u e monū ma‘ongo‘onga ko hono ‘oatu e fakafiemālie ki he ni‘ihi kehé. Hangē ko ia te tau sio ki ai he kupu hokó, ‘e lava ke tau kau hono fakafiemālie‘i e fa‘ahinga ‘oku mamahi ‘i he māmani faingata‘a‘ia ko ení.
‘E Fēfē Ha‘o Tali?
• Ko e hā e ngaahi me‘a ‘e ni‘ihi ‘e lava ke ne fakatupunga ke tau mamahí?
• ‘Oku fēfē hono fakafiemālie‘i ‘e Sihova ‘ene kau sevānití?
• Kapau ‘oku tau fehangahangai mo e maté, ko e hā ‘e lava ke ne fakafiemālie‘i kitautolú?
[Fehu‘i ki he Ako]
[Puha/Fakatātā ‘i he peesi 25]
FOUNGA KE FEKUKI AI MO E NGAAHI ME‘A ‘E LAVA KE UESIA AI HOTAU . . .
▪ lotó Sāme 147:3; 1 Sione 3:19-22; 5:14, 15
▪ ‘atamaí Sāme 94:19; Fili. 4:6, 7
▪ ngaahi ongo‘í Eki. 14:13, 14; Teu. 31:6
▪ mo‘ui fakaesinó 2 Kol. 4:8, 9
▪ mo‘ui fakalaumālié Sāme 145:14; Sem. 5:14, 15
