ʻOKU fakaʻilongaʻi ʻi he taʻú ni ʻa e taʻu 100 ʻo e ʻuluaki huluʻi ʻo e “Tulama-ʻAta ʻo e Fakatupu,” ko ha faiva fakaueʻiloto naʻe faʻu ke langa hake ʻa e tui ki he Tohi Tapú ko e Folofola ʻa e ʻOtuá. ʻI ha kuonga naʻe holoki ai ʻa e tui ʻa e tokolahi ʻe he tui ki he ʻevalūsiō, fakaangaʻi lahi mo e tui veiveiuá, naʻe pouaki ʻe he “Tulama-ʻAta” ʻa Sihova ko e Tokotaha-Fakatupú.

Ko Charles T. Russell, naʻe takimuʻa ʻi he Kau Ako Tohi Tapú, naʻá ne fekumi maʻu pē ki ha ngaahi founga ola lelei taha mo vave taha ke fakamafola ai ʻa e moʻoni Fakatohitapú. Naʻe ʻosi ngāueʻaki ʻe he Kau Ako Tohi Tapú ʻa e mālohi ʻo e ʻū tohi kuo pulusí ʻo laka hake ʻi he taʻu ʻe 30. Naʻe maʻu ʻenau tokangá he taimí ni ʻe ha founga foʻou​—ko e heleʻuhila.

ʻI he 1890 tupú naʻe huluʻi ai ha heleʻuhila fakalongolongo ki he kakaí. Talu mei he 1903, naʻe huluʻi ai ha faiva fakalotu ʻi ha fale lotu ʻi ha Kolo Niu ʻIoke. Ko e kautaha heleʻuhilá naʻe kei foʻou ʻi he 1912 ʻi he taimi naʻe kamata loto-toʻa ai ʻe Russell ke teuteu ʻa e “Tulama-ʻAta.” Naʻá ne ʻiloʻi ko e founga fetuʻutaki ko ení ʻe lava ke fakahaaʻi atu ai ʻa e moʻoni Fakatohitapú ʻi ha founga heʻikai malava ʻataʻatā pē ʻe he ʻū tohi kuo pulusí.

Ko e faiva houa ʻe valu ʻo e “Tulama-ʻAta,” naʻe faʻa fakahoko ʻi he konga ʻe fā, ʻo fakakau ai ʻa e ngaahi malanga Fakatohitapu kuo hiki nounou ʻe 96 naʻe fai ʻe ha tokotaha-malanga ʻiloa mo leʻo-lelei ʻo e kuonga ko iá. Naʻe fakakau ha fasi mālie ʻi he ngaahi konga lahi. Naʻe tā ʻe ha kau ngāue pōtoʻi ʻa e leʻo mo e fasi naʻe hikí ʻi he ngaahi kalamafoni, ʻai ke fehoanaki ʻa e ongó mo e ngaahi silaiti fakalanu mo e filimi fakatātaaʻi ʻo e ngaahi talanoa Fakatohitapu ʻiloa.

Ko e lahi taha ʻo e filimí mo e lahi ʻo e ngaahi laʻi silaití naʻe ʻomai mei he ngaahi kautaha fakakomēsiale. Ko e kau ʻaati fakapalōfesinale ʻi Filatelifia, Niu ʻIoke, Pālesi mo Lonitoni naʻa nau tā valivali nimaʻi ʻa e ngaahi laʻi silaiti mo e filimi kotoa pē. Ko e ngaahi timi ngāue ʻi he Loki ʻAati he Pētelí naʻa nau fai foki ʻa e ngāue lahi ʻo e tā valivalí, ʻo toutou fetongi ʻa e  ngaahi silaiti maumaú. Tānaki atu ki he ngaahi filimi naʻe fakataú, ko e kau mēmipa ʻo e fāmili Pētelí naʻa nau faitā ofi holo pē ʻi Yonkers, Niu ʻIoke, ʻi heʻenau ʻetiʻi ʻa e ngaahi konga ʻa ʻĒpalahame, ʻAisake, mo e ʻāngelo naʻá ne taʻofi ʻa ʻĒpalahame mei hono feilaulauʻi tonu hono fohá.​—Sēn. 22:​9-​12.

Naʻe tala ange ʻe he kaungāmeʻa ʻo Tokoua Russell ki he mītiá ko e founga ko ení ʻe “mahuʻingaʻia ʻa e laui afe taʻefaʻalaua ʻi he Folofolá, ʻo laka ange ia ʻi ha meʻa [naʻe] fai ki ha fakalakalaka fakalotu ʻi he kuohilí.” Naʻe fiefia ʻa e haʻa faifekaú ʻi ha feinga foʻou pehē ke aʻu ki he fuʻu kakai fiekaia fakalaumālié? ʻI hono kehé, ko e kau faifekau ʻo e Puleʻanga-Haʻa-Kalisitiané ʻi he tuʻunga fakalūkufuá naʻa nau fakaangaʻi ʻa e “Tulama-ʻAta,” naʻe aʻu ʻo ngāueʻaki ʻe he niʻihi ʻa e loi pe ngaahi founga taʻemīngao ke taʻofi ʻa e kakaí mei heʻenau sio aí. ʻI he feituʻu ʻe taha, naʻe felotoi ai ʻa e kau faifekaú ke tuʻusi ʻa e ʻuhilá.

Kae kehe, naʻe fonu ʻa e falé ʻi he kau mamata taʻetotongi ʻi he “Tulama-ʻAta.” ʻI he ʻIunaite Seteté, naʻe aʻu ki he kolo ʻe 80 ʻi he ʻaho taki taha naʻa nau fakaʻatā ke hulu ai ʻa e “Tulama-ʻAta.” Ko e tokolahi naʻa nau ʻohovale ko e fuofua taimi ia ke nau sio ai he ‘heleʻuhila leá.’ ʻI he ʻata vavé, naʻe malava ai ke nau mamata ʻi hano fofoaʻi hake ha kiʻi manupuna mei hono ngeʻesí mo ha matala hake ha matalaʻiʻakau. Ko e fakamatala fakasaienisi ʻo e ʻahó ʻokú ne fakamamafaʻi ʻa e fakaofo ʻo e poto ʻo Sihová. Hangē ko ia naʻe lave ki ai ʻi he kamatá, ko e sio kia Tokoua Russell ʻi heʻene fakamatalaʻi mai ʻa e “Tulama-ʻAta,” naʻe aʻu ʻo fakakaukau ai ha tokotaha-mamata ko e tokotaha-malangá “ko Tokoua Russell tofu pē ia!”

Naʻe fakamatalaʻi ʻe he faʻutohi mo mataotao he faivá ko Tim Dirks ʻo pehē ko e “Tulama-ʻAta” “ko e ʻuluaki faiva lahi ia naʻe ʻalu fakataha ai ʻa e ongó (lea kuo hikí), ngaahi ʻatá, mo e ngaahi silaiti lanu maama fakaʻofoʻofa.” Ko e muʻaki ngaahi filimi ʻi he “Tulama-ʻAta” naʻe ngāueʻaki ai ʻa e niʻihi ʻo e ngaahi founga ko ení ka naʻe ʻikai fakakau kotoa kinautolu ʻi ha filimi ʻe taha, tautautefito ki he filimi ʻoku ʻi ai ʻa e kaveinga Fakatohitapú. Pea naʻe ʻikai ha filimi ai naʻe tokolahi ange hono kau mamatá—ko e fakakātoá ko e hiva miliona nai ʻi ʻAmelika Tokelau, ʻIulope, ʻAositelēlia mo Nuʻu Sila lolotonga ʻa e ʻuluaki taʻú pē!

Naʻe ʻuluaki huluʻi ʻa e “Tulama-ʻAta” ʻi Sanuali 11, 1914, ʻi he Kolo Niu ʻIoké. Hili ʻa e māhina ʻe fitu naʻe hoko mai ʻa e fakatamaki naʻe ui ki mui ko e Tau I ʻa Māmaní. Ka ko e fuʻu kakai takatakai he māmaní naʻa nau fakatahataha maʻu pē ke mamata ʻi he “Tulama-ʻAta,” ʻo maʻu ai ʻa e fiemālie mei hono ngaahi konga fakaʻofoʻofa fekauʻaki mo e ngaahi tāpuaki ʻo e Puleʻangá ʻe hoko maí. Tatau ai pē pe ko e hā te ke fakahoa ki ai ʻa e taʻu 1914, ko ha faiva makehe moʻoni ʻa e “Tulama-ʻAta.”