ʻOKU fakamatala ʻa e Folofolá ki he ngaahi tuʻunga lahi ʻa ia naʻe hae ai ʻe ha faʻahinga tāutaha honau kofú. Ko ha tōʻonga pehē ʻe hā ngali faikehe nai ia ki he kau lautohi ʻi he ʻaho ní, ka ʻi he lotolotonga ʻo e kau Siú ko hano fakahaaʻi ia ʻo e ongoʻi mālohi naʻe fakatupunga ʻe he ʻikai ha ʻamanaki, mamahi, fakamaaʻi, ʻita, pe langa.

Ko e fakatātaá, ko Lūpeni naʻá ne “hae hono kofu” ʻi he taimi naʻá ne ʻilo ai ko ʻene palani ke fakahaofi hono tokoua ko Siosifá naʻe ʻikai lava koeʻuhí kuo fakatau pōpula ʻa Siosifa ia. Ko ʻena tamaí, ʻa Sēkope, naʻá ne ‘hae hono kofú’ ʻi he taimi naʻá ne pehē ai kuo keina ʻe ha manu fekai ʻa Siosifa. (Sēn. 37:18-35) Ko Siope naʻá ne “hae hifo hono kofu” ʻi he taimi naʻe tala ange ai kiate ia kuo mate kotoa ʻene fānaú. (Siope 1:18-20) Naʻe hā ha talafekau kuo “hae hono kofu” ʻi he ʻao ʻo e Taulaʻeiki Lahi ko ʻĪlaí ke fakahā kiate ia naʻe foʻi ʻa e kau ʻIsilelí ʻi he taú, mate ʻa e ongo foha ʻo ʻĪlaí, pea kuo ʻave ʻa e ʻaʻake ʻo e fuakavá. (1 Sām. 4:12-17) ʻI he taimi naʻe fanongo ai ʻa Siosaia ki hono lau ange ʻa e ngaahi lea ʻo e Laó pea ʻiloʻi ʻa e ngaahi fehālaaki hono kakaí, naʻá ne “hae hifo hono kofu.”—2 Tuʻi 22:8-13.

ʻI hono fakamāuʻi ʻo Sīsuú, ko e Taulaʻeiki Lahi ko Kaiafasí naʻá ne ‘hae hono ngaahi kofu tuʻá’ ʻi heʻene pehē naʻe lea taʻemolumalu ʻa Sīsū ka naʻe hala ʻene fakakaukaú. (Māt. 26:59-66) Ko ha talatukufakaholo fakalāpai naʻe pehē ai ko ha taha pē ʻoku fanongo ki hono lauʻikoviʻi ʻa e huafa fakaʻotuá naʻe pau ke ne hae hono ngaahi kofú. Kae kehe, ko e fakakaukau fakalāpai ʻe taha hili hono fakaʻauha ʻo e temipale ʻo Selusalemá, naʻe pehē ai “ko e ʻahó ni ko ia ʻokú ne fanongo ʻoku lauʻikoviʻi ʻa e Huafa Fakaʻotuá ʻe ʻikai fiemaʻu ia ke ne hae hono ngaahi kofú, telia naʻa ʻosi hono ngaahi kofú hono hae.”

Ko e moʻoni, ko hono hae ʻo e kofu ʻo ha taha naʻe ʻikai ke mahuʻinga ia ʻi he vakai ʻa e ʻOtuá tuku kehe kapau naʻe moʻoni ʻa e mamahi ʻa e tokotahá. Ko ia, naʻe tala ʻe Sihova ki hono kakaí ke nau ‘hae honau lotó, ʻo ʻikai ko honau kofú, pea nau foki kiate ia.’—Sioeli 2:13.