1-3. (a) Ko e hā ʻa e ngaahi palopalema ʻoku maʻu ʻe he ngaahi fāmili tokolahi fekauʻaki mo e paʻangá, pea ʻoku anga-fēfē ʻa e feinga ʻa e niʻihi ke fakaleleiʻi iá? (Sio ki he ʻuluaki fakatātā ʻi he kupú ni.) (e) ʻI he taimi ʻoku fakakaukau ai ʻa e ngaahi mātuʻá ke hiki ʻo mamaʻo mei honau fāmilí, ko e hā ʻa e ngaahi hohaʻa ʻoku nau maʻu fekauʻaki mo hono ʻohake ʻenau fānaú?

 ʻI HE ʻaho kotoa pē ʻoku foki mai ki ʻapi ʻa e husepāniti ʻo Maliá, ʻa Sēmisi, ʻokú ne helaʻia ʻi he ngāué. a Ko e mālō pē ʻene maʻu ha paʻanga feʻunga ke feauʻaki ʻenau ngaahi fiemaʻu fakaʻahó. Naʻe loto ʻa Malia ke ʻai ke faingofua ange ʻa e moʻuí ki hono husepānití pea loto ke maʻu ʻe hona foha ko Simí ʻa e ngaahi meʻa lelei ʻe niʻihi ʻoku maʻu ʻe hono kaungāakó. Naʻá ne loto ke tokoniʻi hona kāingá pea toe tātānaki mo ha kiʻi paʻanga ki he kahaʻú. Ko e tokolahi ʻo hono kaungāmeʻá naʻa nau hiki ki he ngaahi fonua kehe koeʻuhí ke lava ai ʻo nau maʻu ha paʻanga lahi ange. Ka ʻi he taimi naʻe fakakaukau ai ʻa Malia fekauʻaki mo e hiki ʻo mamaʻo mei hono fāmilí, naʻe ʻikai te ne fakapapauʻi ʻa e meʻa ʻoku totonu ke ne faí. Ko e hā hono ʻuhingá?

² Naʻe loto-mamahi ʻa Malia ʻi heʻene fakakaukau atu fekauʻaki mo e meʻa ʻe lava ke hoko ʻo kapau te ne mavahe mei hono fāmili ʻofaʻangá. Ko e lotu fakataha kia Sihová ko ha konga tuʻumaʻu ia ʻo ʻenau moʻui fakafāmilí. ʻE lava fēfē ke nau hokohoko fai eni kapau te ne mamaʻo meia kinautolu? ʻI he taimi tatau, naʻá ne fakakaukau fekauʻaki mo e niʻihi naʻa nau mavahe mei honau ngaahi fāmilí, pea hā ngali ʻoku nau kei tauhi  pē kia Sihova. ʻE lava ke ne ʻohake moʻoni hono fohá fakafou ʻi he ʻInitanetí pea akoʻi ia ke tauhi kia Sihova?—ʻEf. 6:4.

³ Naʻe kole faleʻi ʻa Malia. Naʻe ʻikai loto hono husepānití ke ne mavahe, ka naʻá ne pehē heʻikai te ne feinga ke taʻofi ia kapau ʻokú ne loto ke ʻalu. Ko e kau mātuʻa mo ha niʻihi ʻi heʻene fakatahaʻangá naʻa nau fakatokanga ange ke ʻoua te ne ʻalu, ka naʻe tala ange ʻe he fanga tuofāfine ʻe niʻihi: “Kapau ʻokú ke ʻofa ʻi ho fāmilí, te ke ʻalu. ʻE lava ke ke kei tauhi pē kia Sihova.” Neongo naʻá ne veiveiua, naʻe lea māvae ʻa Malia kia Sēmisi mo Simi pea ʻalu ʻo ngāue ʻi ha fonua ʻe taha. “Heʻikai te u ʻalu fuoloa,” ko ʻene palōmesí ia.

 4. Ko e hā ʻoku hiki ai ʻa e kakai tokolahi mei honau fāmilí? Ko hai ʻokú ne faʻa ʻohake ʻa e fānau ʻa e ngaahi mātuʻa ʻoku nau hikí?

⁴ ʻOku ʻikai loto ʻa Sihova ke fiekaia ʻene kau sevānití. (Saame 37:25; Pal. 30:8) ʻI he kotoa ʻo e hisitōliá, kuo hiki ʻa e kakai ʻa Sihová ke hao mei he masivá. Ke fakaʻehiʻehi mei he fiekaiá, naʻe fekau atu ʻe Sēkope hono ngaahi fohá ki ʻIsipite ke fakatau mai ha meʻakai. b (Sēn. 42:1, 2) ʻI hono kehé, ko e tokolahi taha ʻoku nau hiki he ʻaho ní ʻoku ʻikai ke nau fiekaia, ko ia ko e hā ʻoku nau hiki aí? Ko e tokolahi ʻoku lahi ʻaupito honau moʻuá. ʻOku nofo nai ʻa e niʻihi ʻi ha feituʻu ʻoku fuʻu tōlalo fakaʻekonōmika. Koeʻuhí ko ʻenau loto ke maʻu ha ngaahi meʻa lelei angé mo maʻu ha moʻui fiemālie angé, ʻoku nau hiki nai mei honau fāmilí ki ha feituʻu ʻoku faingofua ange ai ke maʻu ʻa e paʻangá. Ko e ngaahi mātuʻa ʻoku hiki ʻo mamaʻo mei ʻapí ʻoku nau faʻa tuku ʻenau fānaú ke ʻohake ʻe ha niʻihi kehe, hangē ko ha mātuʻa kehe, ko ha taha lahi ange ʻi he fānaú, fanga kui, ngaahi kāinga kehe, pe ngaahi kaungāmeʻa. Neongo ʻoku fakamamahi ke mavahe mei honau fāmilí, ko e tokolahi ʻoku hiki ʻo ngāue mamaʻo mei ʻapí ʻoku nau ongoʻi ʻoku ʻikai haʻanau toe fili.

5, 6. (a) Ko e hā naʻe akoʻi ʻe Sīsū fekauʻaki mo e fiefiá mo e maluʻangá? (e) Ko e hā ʻa e ngaahi meʻa fakamatelie naʻe akoʻi ʻe Sīsū ki hono kau muimuí ke nau lotu fekauʻaki mo iá? (f) ʻOku anga-fēfē hono tāpuakiʻi kitautolu ʻe Sihová?

⁵ ʻI he ʻaho ʻo Sīsuú, naʻe masiva ʻa e kakai tokolahi. Naʻa nau ongoʻi nai kapau naʻa nau maʻu ha paʻanga lahi ange, te nau fiefia ange mo malu ange. (Mk. 14:7) Ka naʻe ʻikai loto ʻa Sīsū ke nau falala ki he ngaahi meʻa fakataimi ko iá. Naʻá ne loto ke nau falala kia Sihova, ʻa ia ko ʻene ngaahi tāpuakí ʻoku tuʻuloá. ʻI heʻene Malanga ʻi he Moʻungá, naʻe akoʻi ai ʻe Sīsū ko e fiefia mo e maluʻanga moʻoní ʻoku haʻu ia mei heʻetau kaumeʻa mo Sihová, ʻo ʻikai mei he ngaahi meʻa ʻoku tau maʻú pe mei heʻetau ngaahi feingá tonu.

⁶ ʻI heʻene sīpinga lotú, naʻe ʻikai ke akoʻi mai ʻe Sīsū ke tau lotu ki ha moʻui fiemālie. Ka, naʻá ne akoʻi kitautolu ke lotu ki ha “mā ki he ʻaho ko ení.” Naʻe akoʻi mahino ʻe Sīsū ʻene kau fanongó: “Tuku ʻa e faʻoaki koloa maʻamoutolu ʻi māmaní.” Naʻá ne tānaki mai: “Kae faʻoaki koloa maʻamoutolu ʻi hēvani.” (Māt. 6:9, 11, 19, 20) ʻOku lava ke tau falala ʻe tāpuakiʻi kitautolu ʻe Sihova ʻo hangē ko ʻene talaʻofá. Ko e tāpuaki ʻa e ʻOtuá ʻoku kau ki ai ʻa e meʻa lahi ange ʻi heʻene hōifuá. Ko ha fakapapauʻiʻanga ia te ne ʻomai kia kitautolu ʻa e meʻa kotoa pē ʻoku tau fiemaʻu moʻoní. Ko e founga pē taha ke maʻu ai ʻa e fiefia mo e maluʻanga moʻoní ko e falala ki heʻetau Tamai anga-ʻofá, ʻa Sihova, kae ʻikai ko e paʻangá.—Lau ʻa e Mātiu 6:24, 25, 31-34.

 7. (a) Ko hai kuo ʻoange ki ai ʻe Sihova ʻa e fatongia ke ʻohake ʻa e fānaú? (e) Ko e hā ʻoku fiemaʻu ai ki he ongo mātuʻá fakatouʻosi ke na tokoni ki hono ʻohake ʻena fānaú?

⁷ Ko hono fai ʻa e finangalo ʻo e ʻOtuá ʻoku kau ki ai ʻa e tokangaʻi hotau ngaahi fatongia fakafāmilí ʻi he founga ʻoku fiemaʻu mai ʻe Sihová. Ko e fakatātaá, ko e Lao ʻa Mōsesé naʻe fekauʻi ai ʻa e ngaahi mātuʻá ke nau akoʻi ʻenau fānaú tonu ke tauhi kia Sihova. Ko e kau Kalisitiane ʻoku nau loto ke fakahōifuaʻi ʻa Sihová kuo pau ke nau fai foki eni. (Lau ʻa e Teutalōnome 6:6, 7.) Kuo ʻoange ʻe he ʻOtuá ʻa e fatongia ko ení ki he ongo mātuʻá, ʻo ʻikai ki he fanga kuí pe ko ha toe taha kehe. Naʻe pehē ʻe Tuʻi Solomone: “Tama, fanongo ki he akonaki ʻa hoʻo  tamai, pea ʻouae hiki mei he ngaahi tala ʻa hoʻo faʻe.” (Pal. 1:8) ʻOku fiemaʻu ʻe Sihova ke nofo fakataha ʻa e ngaahi fāmilí koeʻuhí ke lava ʻa e ongo mātuʻá fakatouʻosi ʻo akoʻi mo tataki ʻena fānaú. (Pal. 31:10, 27, 28) ʻI he taimi ʻoku fanongo ai ʻa e fānaú ki he talanoa ʻenau ongo mātuʻá fekauʻaki mo Sihová pea sio ki he anga ʻena tauhi kiate ia ʻi he ʻaho kotoa pē, ʻe lava ke ako ʻe he fānaú ke fai ʻa e meʻa tatau.

8, 9. (a) Ko e hā ʻa e ngaahi liliu ʻoku faʻa hoko ʻi he taimi ʻoku nofo mavahe ai ha mātuʻa mei he fāmilí? (e) ʻI he taimi ʻoku ʻikai nofo fakataha ai ʻa e ongo mātuʻá mo e fānaú, ʻe lava fēfē ke fakatuʻutāmaki eni ki ha fāmili?

⁸ Ko e tokolahi ʻoku fakakaukau ke mavahe mei honau fāmilí ʻoku nau ʻiloʻi ʻe fakatupunga nai ʻe heʻenau filí ʻa e ngaahi palopalema ʻe niʻihi. Ka ʻoku taʻemalava ke ʻiloʻi pau ʻa e anga hono uesia ʻe he fili ko iá ho fāmilí. (Pal. 22:3) c ʻI he mavahe atu pē ʻa Maliá, naʻe kamata ke ne faingataʻaʻia ʻi he mamahi fakaeongo ʻo e mamaʻo mei hono fāmilí. Naʻe faingataʻaʻia foki hono husepānití mo hono fohá. Naʻe toutou ʻeke ange kiate ia ʻe kiʻi Simi, “Ko e hā naʻá ke liʻaki ai aú?” Naʻe palani ʻa Malia ke ne mamaʻo pē ʻi ha ngaahi māhina siʻi, ka ʻi he ʻosi atu ʻa e ngaahi taʻu, naʻá ne hohaʻa ʻi he sio ki he anga ʻo e liliu hono fāmilí. Naʻe ʻikai kei hoko ʻa Simi ko e kiʻi tamasiʻi naʻá ne ʻiloʻí. Naʻe ʻikai ke ne kei talanoa ange kiate ia pea ʻikai toe vēkeveke ke tala ange ʻene ngaahi ongoʻí. ʻOku pehē ʻe Malia, “Naʻe mole atu ʻene ʻofa ʻiate aú.”

⁹ ʻI he taimi ʻoku ʻikai ke nofo fakataha ai ʻa e ongo mātuʻá mo e fānaú ko ha fāmilí, ko ʻenau ngaahi ongoʻí pea naʻa mo e ngaahi tuʻunga ki he tonú mo e halá ʻe lava ke uesia. d Ko e kei siʻi ange ʻa e fānaú pea fuoloa ange ʻenau mamaʻo mei heʻenau ongo mātuʻá, ko e lahi ange ia ʻa e fakatuʻutāmaki ʻe lava ke hokó. Naʻe fakamatalaʻi ʻe Malia kia Simi naʻá ne fai ʻa e feilaulau ke tokoniʻi ia, ka kia Simi naʻe hangē nai ia ʻoku ʻikai toe ʻofa ʻene faʻeé ʻiate iá. ʻI he kamatá, naʻá ne ʻita ʻi heʻene pulí. Ka ki mui ai, ʻi he ʻaʻahi mai kiate ia ʻene faʻeé, naʻá ne ʻita ʻi heʻene ʻi aí. ʻI he tuʻunga meimei tatau mo e fānau tokolahi ʻoku nofo mamaʻo mei heʻenau ngaahi mātuʻá, naʻe tui ʻa Simi ʻoku ʻikai ʻaupito kei maʻu ʻe heʻene faʻeé ʻa e totonu ke ne ʻofa mo talangofua ki ai.—Lau ʻa e Palōveepi 29:15.

10. (a) ʻI he taimi ʻoku ʻoange ai ʻe he ongo mātuʻá ʻa e ngaahi meʻaʻofá kae ʻikai ko hona taimí mo e tokangá, ko e hā ʻe lava ke hoko ki heʻena fānaú? (e) Ko e hā ʻoku tō mei ai ha fāmili ʻi he taimi ʻoku mamaʻo ai ha mātuʻa?

¹⁰ Koeʻuhí naʻá ne mamaʻo meia Simi, naʻe feinga ʻa Malia ke ʻai ʻa e ngaahi meʻá ke lelei ange ʻaki hono ʻomai kiate ia ʻa e paʻanga mo e ngaahi meʻaʻofa. Ka naʻá ne ʻiloʻi ko ʻene teke ia hono fohá ke toe mamaʻo ange. Naʻá ne akoʻi ia ke ʻofa ʻi he paʻangá ʻo lahi ange ia ʻi hono fāmilí pe naʻa mo Sihova. (Pal. 22:6) Ko e meʻa fakamamahí, naʻe tala ange ʻe Simi kiate ia ke ʻoua te ne foki mai kae hokohoko atu pē hono ʻomai ʻa e ngaahi meʻaʻofá.  Naʻe fakaʻosiʻaki ʻe Malia heʻikai lava ke ne ʻohake hono fohá fakafou ʻi he faitohi, telefoni, pe talanoa he ʻInitanetí. ʻOkú ne pehē, “Heʻikai lava ke ke fāʻofua pe ʻuma ki hoʻo kiʻi tamá ki muʻa ke ne mohé fakafou ʻi he ʻInitanetí.”

11. (a) ʻOku anga-fēfē hono uesia ha nofo mali ʻe he nofo vāmamaʻo koeʻuhí ko e ngāué? (e) Ko fē ʻa e taimi naʻe ʻiloʻi ai ʻe Malia naʻe fiemaʻu ke ne fakataha mo hono fāmilí?

¹¹ Naʻe toe uesia ʻa e vahaʻangatae ʻo Malia mo Sihová. Naʻá ne fakamoleki ʻa e taimi mo ʻene fakatahaʻangá ʻi ha ʻaho pē taha ʻi he uike pe siʻi ange. Naʻe uesia foki hono vahaʻangatae mo hono husepānití. Naʻe pau ke ne fakafepakiʻi hono pule ngāué ʻa ia naʻá ne loto ke na fehokotaki fakasinó. Pea koeʻuhí ʻoku ʻikai malava ʻa Sēmisi mo Malia ke na talanoa ki heʻena ngaahi palopalemá, ʻokú na talanoa ki he niʻihi kehé fekauʻaki mo ʻena ngaahi ongoʻí peá na meimei fai ha tono. Naʻe ʻiloʻi ʻe Malia neongo naʻe ʻikai te na fai ha tono, naʻe ʻi he tuʻunga fakatuʻutāmaki ʻena nofo malí. ʻOku fakahinohinoʻi ʻe he Tohi Tapú ʻa e ngaahi hoa malí ke na fetokangaʻaki ki heʻena ngaahi fiemaʻu fakaeongó mo fakaefehokotaki fakasinó. Koeʻuhí naʻe fuʻu nofo vāmamaʻo ʻa Malia mo Sēmisi, ʻoku ʻikai lava ke na fevahevaheʻaki ʻa e taimi mo e tokanga fakaekinaua ʻa ia ʻoku totonu ke maʻu ʻe ha hoa mali. (Hiva. 1:2; 1 Kol. 7:3, 5) Pea ʻoku ʻikai lava ke na lotu fakataha mo hona fohá kia Sihova. ʻOku pehē ʻe Malia, “ʻI he taimi naʻá ku ako ai ʻi ha fakataha-lahi ko e lotu fakafāmili tuʻumaʻú ʻoku mātuʻaki mahuʻinga ia ke mau hao ai ʻi he ʻaho lahi ʻo Sihová, naʻá ku mahinoʻi naʻe fiemaʻu ke u foki ki ʻapi.” Naʻe pau ke ne toe langa hake hono vahaʻangatae mo hono fāmilí pea mo Sihová.

12. Ko e hā ʻa e faleʻi mei he Tohi Tapú ʻe lava ke ne tokoniʻi ʻa e faʻahinga ʻoku nofo mamaʻo mei honau fāmilí?

¹² ʻI he taimi naʻe fili ai ʻa Malia ke foki ki ʻapí, naʻe ʻoange ʻe he niʻihi kiate ia ʻa e faleʻi lelei pea ʻoange ʻe he niʻihi ʻa e faleʻi kovi. Naʻe fakaongoongoleleiʻi ia ʻe he kau mātuʻa ʻi heʻene fakatahaʻangá. Naʻe feinga ʻa e niʻihi ke fakalotoʻi ia ke ne nofo pea tala ange heʻikai lava ke ne maʻu ha paʻanga feʻunga ʻi heʻene foki ki ʻapí. “Te ke toe foki mai pē ki heni ʻi ha taimi nounou,” ko ʻenau tala angé ia. ʻI he ʻikai fai ʻa e ngaahi lea fakalotosiʻi peheé, ʻoku totonu ki he kau Kalisitiané ke nau “fakafokifoki mai ʻa e fakakaukau lelei ʻa e kau fefine taʻu siʻi angé ke nau ʻofa ki honau ngaahi husepānití, ke nau ʻofa ki heʻenau fānaú,” pea ke nau “ngāue ʻi ʻapi,” pe tokangaʻi honau fāmilí tonu. ʻI he founga ko ení, ʻe ʻikai ke ʻoatu ai ʻe he kau Kalisitiané ha luma ki he huafa ʻo e ʻOtuá.—Lau ʻa e Taitusi 2:3-5.

13, 14. Ko e hā ʻoku fiemaʻu ai kia kitautolu ʻa e tui ke fakafepakiʻiʻaki ʻa e ngaahi fakaʻamu ʻa e fāmilí? ʻOmai ha fakatātā.

¹³ Ko e tokolahi ʻoku nau mavahe mei honau fāmilí ke ngāue ʻi mulí kuo nau tupu hake ʻi he ngaahi anga fakafonua ʻoku fakaʻapaʻapaʻi ai ʻa e ngaahi talatukufakaholó mo e ngaahi kāingá, tautautefito ki he ngaahi mātuʻá, ʻo laka ange ia ʻi ha toe meʻa. ʻOku fiemaʻu ʻa e tui mālohi ki ha Kalisitiane ke ne fakafepakiʻiʻaki ʻa e ngaahi fakaʻamu  ʻa e fāmilí ʻi he taimi ʻoku ʻikai fakahōifua ai kia Sihova ʻa e ngaahi fakaʻamu ko ení.

¹⁴ Fakakaukau ki he talanoa fekauʻaki mo Kaliná: “ʻI he taimi naʻe fāʻeleʻi ai hoku foha ko Toní, naʻá ku ngāue mo hoku husepānití ʻi muli, pea naʻá ku toki kamata ako ʻa e Tohi Tapú.” Naʻe ʻamanekina ʻe he tokotaha kotoa ʻi he fāmilí ke fakafoki ʻe Kalina ʻa Toni ki heʻene ongo mātuʻá kae ʻoua kuo lava ke ne maʻu mo hono husepānití ha paʻanga lahi ange. ʻI he taimi naʻe pehē ai ʻe Kalina te ne ʻohake pē ʻe ia ʻa Toní, ko hono ngaahi kāingá, kau ai hono husepānití, naʻa nau ui ia ʻokú ne fakapikopiko pea kataʻi ia. Naʻe pehē ʻe Kalina: “ʻI he taimi ko iá, naʻe ʻikai ke u mahinoʻi kakato ʻa e hala ʻo e tuku ʻa Toni ʻi heʻeku ongo mātuʻá ʻi ha ngaahi taʻu siʻi. Ka naʻá ku ʻiloʻi naʻe ʻomai ʻe Sihova ʻa e ngāue ko hono ʻohake homa fohá kia kimaua—ʻa ʻene ongo mātuʻá.” ʻI he taimi naʻá ne toe feitama aí, naʻe fekauʻi ʻe hono husepāniti taʻetuí ke fakatooki ia. Ko e fili lelei naʻe fai ʻe Kalina ki muʻá naʻe teuʻi lelei ai ia, ko ia naʻe malava ai ke ne fai ha toe fili ke fakahōifua kia Sihova. ʻI he ʻahó ni, ko ia mo hono husepānití pea mo ʻena fānaú ʻoku nau fiefia kotoa ʻi heʻenau nofo fakatahá. Kapau naʻe ʻave ʻe Kalina ha taha pe fakatouʻosi ʻene fānaú ke ʻohake ʻe he niʻihi kehé, ko e olá naʻe mei lava ke kehe ʻaupito.

15, 16. (a) Naʻe anga-fēfē hono ʻohake ʻa Vika ʻi heʻene kei siʻí? (e) Ko e hā naʻá ne fili ai ke ʻoua ʻe ʻohake hono ʻofefiné ʻi he founga tataú?

¹⁵ ʻOku pehē ʻe ha Fakamoʻoni ko Vika: “ʻI ha ngaahi taʻu siʻi, naʻe ʻohake au ʻe heʻeku kui fefiné, lolotonga ia hono tauhi ʻe heʻeku ongo mātuʻá ʻa hoku tokoua siʻisiʻí. Ka ʻi he taimi naʻá ku toe fakataha ai mo ʻeku ongo mātuʻá, naʻe liliu ʻeku ngaahi ongoʻi kia kinauá. Naʻe ongoʻi tauʻatāina hoku tokouá ke fakahaaʻi ʻene ongoʻí kiate kinaua, ke fāʻofua mo kinaua, pea maʻu ʻa e vahaʻangatae vāofi mo kinaua. Naʻá ku ongoʻi vāmamaʻo mei heʻeku ongo mātuʻá, pea naʻa mo ʻeku fuʻu lahí, naʻe faingataʻa ke u fakahaaʻi ʻeku ngaahi ongoʻi moʻoní kia kinaua. Naʻá ku fakapapauʻi ange mo hoku tokouá ki heʻema ongo mātuʻá te ma tokangaʻi kinaua ʻi heʻena motuʻá. Ka te u fai ia ʻo fakafatongia pē, lolotonga ia ʻoku tokangaʻi kinaua ʻe hoku tokouá ʻi he ʻofa.

¹⁶ “ʻI he taimi ní ʻoku loto ʻeku faʻeé ke ʻoange hoku ʻofefiné kiate ia ke ne tauhi hake, ʻo hangē pē ko ia ko ʻene ʻave au ki heʻene faʻeé.” Naʻe fakafisi anga-ʻofa ʻa Vika. Ko ia mo hono husepānití naʻá na loto ke ʻohake ʻena kiʻi tamá tonu ke ʻofa kia Sihova. “ʻOku ʻikai te u loto ke maumauʻi hoku vahaʻangatae ʻi he kahaʻú mo hoku ʻofefiné,” ko e lau ia ʻa Viká. Kuó ne ʻilo ko e founga pē ke lavameʻa aí ko e ʻofa kia Sihova mo ʻene ngaahi tefitoʻi moʻoní ʻo laka ange ia ʻi he ngaahi meʻá pea naʻa mo e fāmilí. Naʻe fakahaaʻi māʻalaʻala ʻe Sīsū: “ʻOku ʻikai lava ha taha ke ngāue fakatamaioʻeiki ki ha ʻeiki ʻe toko ua,” ki he ʻOtuá pea ki he Koloá.—Māt. 6:24; ʻEki. 23:2.

17, 18. (a) Ko e hā ʻa e fili ʻoku maʻu maʻu pē ʻe he kau Kalisitiané? (e) Ko e hā ʻa e ngaahi fehuʻi te tau lāulea ki ai ʻi he kupu hoko maí?

¹⁷ Ko ʻetau Tamaí, ʻa Sihova, kuó ne talaʻofa ke ʻomai kia kitautolu ʻa e meʻa kotoa pē ʻoku tau fiemaʻu moʻoní kapau te tau fakamuʻomuʻa ʻi heʻetau moʻuí ʻa e Puleʻangá mo ʻene māʻoniʻoní. (Māt. 6:33) Koeʻuhí ko e talaʻofa ko ení, ko e kau Kalisitiane moʻoní ʻoku nau maʻu maʻu pē ha fili. Naʻa mo e taimi ʻoku tau fehangahangai ai mo e ngaahi palopalema faingataʻa tahá, ʻoku ʻi ai maʻu pē ha founga ke fakahōifuaʻi ai ʻa Sihova pea muimui ʻi he ngaahi tefitoʻi moʻoni Fakatohitapú. ʻOku talaʻofa mai ʻe Sihova te ne ʻomai kia kitautolu “ha haoʻanga.” (Lau ʻa e 1 Kolinitō 10:13.) Ko ʻetau ngaahi lotú mo e talangofuá ʻoku fakahaaʻi ai kia Sihova ʻoku tau falala kiate ia. (Saame 37:5, 7) ʻE ʻafioʻi ʻe Sihova ʻetau ngaahi feingá pea ʻomai kia kitautolu ʻa e meʻa kotoa pē ʻoku tau fiemaʻú. Te ne ʻai ʻetau moʻuí ke “monuʻia.”—Fakafehoanaki mo e Sēnesi 39:3.

¹⁸ Ka ko e hā ʻe lava ke tau fai ke fakaleleiʻi ai ʻa e maumau naʻe fakatupunga ʻe he nofo māvahevahé? ʻE lava fēfē ke tau tokangaʻi ʻa e fiemaʻu fakamatelie hotau fāmilí ʻo ʻikai nofo mamaʻo meia kinautolu? Pea ʻe lava fēfē ke tau tokoniʻi anga-ʻofa ʻa e niʻihi kehé ke nofo fakataha mo honau ngaahi fāmilí? Ko e kupu hoko maí ʻe lāulea ki he ngaahi fehuʻi ko ení.