1, 2. (a) Fakamatala ki he ʻuhinga naʻe hā ngali ʻi he tuʻunga fakatuʻutāmaki ai ʻa Mōsesé. (Sio ki he ʻuluaki fakatātā ʻi he kupú ni.) (e) Ko e hā naʻe ʻikai ke manavahē ai ʻa Mōsese ki he houhau ʻa e tuʻí?

 NAʻE hoko ʻa Felo ko ha tokotaha-pule anga-kakaha, pea naʻe lotu ki ai ʻa e kau ʻIsipité ʻo hangē ha ʻotuá. ʻOku pehē ʻe he tohi ko e When Egypt Ruled the East, ʻi he vakai ʻa e kau ʻIsipité naʻá ne “poto mo mālohi” ange ʻi ha toe meʻamoʻui fakaemāmani pē. Naʻe loto ʻa Felo ke manavahē ange kiate ia ʻa e kau ʻIsipité, ko ia naʻá ne tui ha kalauni ne ʻi ai ha ʻīmisi ʻo ha ngata ʻoku teu ke uʻu. Ko e ʻīmisi ko ení ko ha fakamanatu ia ko e ngaahi fili ʻo e tuʻí ʻe vave hono fakaʻauhá. Ko ia sioloto atu ki he anga ʻo e ongoʻi ʻa Mōsesé ʻi he taimi naʻe tala ange ai ʻe Sihova: “Kau fekau atu koe kia Felo, ke ʻomi mei Isipite ʻa hoku kakai ko haʻa Isileli.”—ʻEki. 3:10.

² Naʻe ʻalu ʻa Mōsese ki ʻIsipite pea tala kia Felo ʻa e pōpoaki ʻa e ʻOtuá. Naʻe ʻai ai ʻa Felo ke ne houhau ʻaupito. Hili hono tauteaʻi ʻa ʻIsipite ʻaki ʻa e mala ʻe hivá, naʻe houhau ʻaupito ʻa Felo ʻo ne fakatokanga kia Mōsese: “Tokanga kia koe ke ʻoua naʻa ke toe sio ki hoku mata; he ko e ʻaho te ke sio ai ki hoku mata te ke mate ai.” (ʻEki. 10:28) Naʻe mavahe ʻa Mōsese, ka ki muʻa iá, naʻá ne tala ange ʻe mate ʻa e ʻuluaki foha ʻo e tuʻí. (ʻEki. 11:4-8) Naʻe tala ange leva ʻe Mōsese ki he fāmili ʻIsileli kotoa ke tāmateʻi ha kosi pe ko ha sipi tangata pea afuhi hono totó ʻi  honau ngaahi kaumatapaá. Ko e sipi tangatá ko ha monumanu toputapu ia ki he ʻotua ʻIsipite ko Ra. (ʻEki. 12:5-7) ʻE anga-fēfē ʻa e fakafeangai ʻa Feló? Naʻe ʻikai ilifia ʻa Mōsese ia ki he fakafeangai ʻa Feló. Ko e hā hono ʻuhingá? Koeʻuhí naʻá ne maʻu ʻa e tui pea talangofua kia Sihova, ʻo “ʻikai ke ne ilifia ki he houhau ʻa e tuʻí, he naʻá ne hanganaki tuʻu maʻu ʻi heʻene sio atu ko ia ki he Tokotaha ʻa ia ʻoku taʻehāmaí.”—Lau ʻa e Hepelū 11:27, 28.

 3. Ko e hā ʻa e ngaahi fehuʻi fekauʻaki mo e tui ʻa Mōsese “ki he Tokotaha ʻa ia ʻoku taʻehāmaí” te tau lāulea ki aí?

³ ʻOku fuʻu mālohi hoʻo tuí ʻo hangē ia ʻoku lava ke ke “mamata ki he ʻOtuá”? (Māt. 5:8) Ke fakaivimālohiʻi ʻetau tuí kae lava ʻo tau sio “ki he Tokotaha ʻa ia ʻoku taʻehāmaí” ko ha Tokotaha moʻoni, tau lāulea angé ki he faʻifaʻitakiʻanga ʻa Mōsesé. Naʻe anga-fēfē hono maluʻi ia ʻe heʻene tui kia Sihová mei he manavahē tangatá? Naʻe anga-fēfē ʻene fakahāhā naʻá ne tui moʻoni ki he ngaahi talaʻofa ʻa e ʻOtuá? Pea naʻe anga-fēfē hono hanga ʻe he sio “ki he Tokotaha ʻa ia ʻoku taʻehāmaí” ʻo fakaivimālohiʻi ʻa Mōsese ʻi he taimi naʻá ne ʻi he tuʻunga fakatuʻutāmaki ai mo hono kakaí?

 4. ʻI he taimi naʻe hā ai ʻa Mōsese ʻi he ʻao ʻo Feló, ko e hā nai ʻa e fakakaukau ʻa e faʻahinga naʻe ʻikai haʻanau tuí?

⁴ Ko e faʻahinga naʻe ʻikai haʻanau tuí naʻa nau fakakaukau nai naʻe ʻikai ha mālohi ʻa Mōsese ʻia Felo mālohi. Ko e moʻui mo e kahaʻu ʻo Mōsesé naʻe ʻi he nima ʻo Feló. Naʻa mo Mōsese tonu naʻá ne ʻeke kia Sihova: “Ko hai au ke u ʻalu kia Felo, pea ke u ʻomi ʻa haʻa Isileli mei Isipite?” (ʻEki. 3:11) ʻI he taʻu nai ʻe 40 ki muʻá, naʻe hola ʻa Mōsese mei ʻIsipite ko ha tokotaha hola holo. Naʻá ne fifili nai, ‘Ko ha fakakaukau lelei moʻoni ia ke u foki ki ʻIsipite pea toe ʻai ai ke houhau ʻa e tuʻí?’

5, 6. Ko e hā naʻá ne tokoniʻi ʻa Mōsese ke manavahē kia Sihova, ʻo ʻikai kia Feló?

⁵ Naʻe akoʻi ʻe he ʻOtuá kia Mōsese ha lēsoni mahuʻinga ki muʻa ke ne foki ki ʻIsipité. Naʻe tohi ʻa Mōsese ki mui ai fekauʻaki mo e lēsoni ko iá ʻi he tohi ʻa Siopé: “Koe manavahe kia Jihova, koe boto ia.” (Siope 28:28, PM) Ke tokoni kia Mōsese ke ako ki he manavahē totonú mo ngāue fakapotopotó, naʻe fakahoa ʻe Sihova ʻa e faʻahinga ʻo e tangatá kiate ia tonu, ko e ʻOtua māfimafi-aoniú. Naʻá ne ʻeke: “Ko hai naʻa ne ngaohi ʻa e ngutu ʻo e tangata? pea ko hai naʻa ne ngaohi ʻa e noa, pe ko e tuli, pe ko e ʻā, pe ko e kui? ʻikai ko au, Sihova?”—ʻEki. 4:11.

⁶ Ko e hā ʻa e lēsoní? Naʻe fekauʻi atu ʻe Sihova ʻa Mōsese, ko ia naʻe ʻikai fiemaʻu ia ke ne ilifia. ʻE ʻoange ʻe he ʻOtuá kia Mōsese ʻa e mālohi ke tala ʻa e pōpoaki ʻa e ʻOtuá kia Felo. Pea naʻe ʻikai ko e ʻuluaki taimi eni ia ke ʻi he tuʻunga fakatuʻutāmaki ai ʻa e kau sevāniti ʻa e ʻOtuá ʻi ʻIsipité. Mahalo naʻe manatuʻi ʻe Mōsese ʻa e anga hono maluʻi ʻe Sihova ʻa ʻĒpalahame, Siosifa, pea naʻa mo Mōsese tonu mei he kau Felo kehe naʻe pule ʻi he kuohilí. Naʻe ʻikai ha mālohi ʻo Felo kia Sihova. (Sēn. 12:17-19; 41:14, 39-41; ʻEki. 1:22–2:10) Koeʻuhí naʻe sio ʻa Mōsese “ki he Tokotaha ʻa ia ʻoku taʻehāmaí,” naʻá ne loto-toʻa ʻo ʻalu kia Felo pea tala ange kiate ia ʻa e foʻi folofola kotoa pē ʻo e pōpoaki ʻa Sihová.

 7. Naʻe anga-fēfē hono maluʻi ʻe he tui kia Sihová ha tuofefine ʻe taha?

⁷ Ko e tui kia Sihová naʻá ne toe maluʻi ha tuofefine ko Ella mei he hoko ʻo manavahē tangatá. ʻI he 1949 naʻe puke ia ʻi ʻEsitōnia ʻe he KGB (Kōmiti Maluʻi ʻa e Puleʻanga Sovietí). Naʻa nau vete kotoa hono valá, pea siofi leva ia ʻe he kau ʻōfisa polisi kei talavoú. “Naʻá ku ongoʻi fakamāʻia,” ko ʻene laú ia. “Ka, ʻi he hili ʻeku lotu kia Sihová, ne kamata ke u maʻu ʻa e nonga mo e fiemālie.” Pea naʻe tuku toko taha leva ʻa Ella ʻi ha kiʻi pilīsone siʻisiʻi mo fakapoʻuli ʻi ha ʻaho ʻe tolu. ʻOkú ne pehē: “Naʻe kaikaila ʻa e kau ʻōfisá: ‘Te mau fai ia koeʻuhí naʻa mo e huafa Sihová ke ʻoua ʻe toe manatua ʻi ʻEsitōnia! ʻE ʻave koe ki ha kemi, pea ko e niʻihi kehé ʻe ʻave ki Saipīlia!’ ʻI he manukí, naʻa nau tānaki mai, ‘ʻOku ʻi fē ho Sihová?’” ʻE manavahē tangata ʻa Ella pe falala kia Sihova? ʻI hono fakafehuʻí, naʻe ʻikai ke ne ilifia ke tala ange kia kinautolu: “Naʻá ku fakakaukau lahi ki he meʻá ni, pea ʻe laka ange ke u nofo pilīsone ʻo ʻikai maumauʻi hoku vahaʻangatae mo e ʻOtuá ʻi haʻaku ʻatā pea  mole ʻene hōifuá.” Naʻe moʻoni tofu pē ʻa Sihova kia Ella ʻo hangē ko e kau tangata naʻe tuʻu ʻi muʻa ʻiate iá. Naʻá ne mateaki ai pē kia Sihova koeʻuhí naʻá ne tui kiate ia.

8, 9. (a) Ko e hā ʻokú ke fiemaʻú koeʻuhí ke ikuʻi ai ʻa e manavahē tangatá? (e) Kapau ʻoku fakataueleʻi koe ke ke hoko ʻo manavahē tangata, ko e hā ʻoku totonu ke ke tauhi ke māʻalaʻala ʻi hoʻo fakakaukaú?

⁸ Kapau ʻokú ke maʻu ha tui kia Sihova, ʻe lava ke ke ikuʻi hoʻo ngaahi manavaheé. Kapau ʻe feinga ʻa e kau maʻu mafaí ke taʻofi koe mei he lotu ki he ʻOtuá, ʻoku ngali hā nai ko hoʻo moʻuí mo e kahaʻú ʻoku ʻi honau nimá. ʻE aʻu nai ʻo ke ʻeke hifo kiate koe: ‘Ko ha fakakaukau lelei moʻoni ia ke u hokohoko tauhi kia Sihova pea ʻai ke ʻita ʻa e kau maʻu mafaí?’ Manatuʻi: ʻI he tui ki he ʻOtuá, ʻe lava ke ke ikuʻi ai ʻa e manavahē tangatá. (Lau ʻa e Palōveepi 29:25.) ʻOku ʻeke ʻe Sihova: “Ko hai tu koe ke ke manavahe ki ha tangata meʻa vaivai, ʻa ia te ne mate, ʻio, ki ha hakoʻi tangata, ʻa ia ʻoku tuku ko e musie pe?”—ʻAi. 51:12, 13.

⁹ Tauhi ke māʻalaʻala ʻi hoʻo fakakaukaú ʻa hoʻo Tamai māfimafi-aoniú. ʻOkú ne ʻafioʻi ʻa e faʻahinga kotoa ʻoku faingataʻaʻiá koeʻuhí ko e ngaohikovia taʻetotonú. ʻOkú ne ongoʻi manavaʻofa kia kinautolu pea tokoniʻi kinautolu. (ʻEki. 3:7-10) Neongo kapau ʻoku fiemaʻu ke ke taukapoʻi hoʻo tuí ki he kau ʻōfisa māʻolungá, “ʻoua ʻe hoko ʻo loto-moʻua pe ʻe fēfē pe ko e hā ha meʻa te mou leaʻaki, he ko e meʻa te mou leaʻakí ʻe ʻoatu ia kiate kimoutolu ʻi he houa ko iá,” ko e lau ia ʻa e Tohi Tapú. (Māt. 10:18-20) Ko e kau pule mo e kau ʻōfisa fakaetangatá ʻoku ʻikai ke ʻi ai hanau mālohi ʻi hono fakahoa atu kia Sihová. Kapau te ke fakaivimālohiʻi hoʻo tuí he taimí ni, ʻe lava ke ke sio kia Sihova ko ha Tokotaha moʻoni ʻokú ne vēkeveke ke tokoniʻi koe.

10. (a) Ko e hā ʻa e ngaahi fakahinohino naʻe ʻoange ʻe Sihova ki he kau ʻIsilelí ʻi he māhina ko Nīsani 1513 ki muʻa ʻia Kalaisí? (e) Ko e hā naʻe talangofua ai ʻa Mōsese ki he ngaahi fakahinohino ʻa e ʻOtuá?

¹⁰ ʻI he māhina ko Nīsani 1513 ki muʻa ʻia Kalaisí, naʻe ʻoange ʻe Sihova ʻa e fakahinohino kia Mōsese mo ʻĒlone ke tala ki he kau ʻIsilelí ke toʻo ha sipi pe kosi tangata moʻui lelei, tāmateʻi ia pea afuhi hono totó ʻi honau ngaahi kaumatapaá. (ʻEki. 12:3-7) Neongo naʻe teʻeki ai fai pehē ʻa e kau ʻIsilelí ki muʻa, naʻe tohi ki mui ʻe he ʻapositolo ko Paulá ʻo pehē naʻe maʻu ʻe Mōsese ʻa e tuí pea “naʻá ne fai ai ʻa e pāsová pea mo hono afuhi ʻo e totó, ke ʻoua ʻe hanga ʻe he tokotaha faifakaʻauhá ʻo tāmateʻi ʻa ʻenau ʻuluaki tamá.” (Hep. 11:28) Naʻe ʻiloʻi ʻe Mōsese ʻe hoko moʻoni ʻa e ngaahi talaʻofa ʻa Sihová, pea naʻá ne tui ʻe mate ʻa e ngaahi ʻuluaki foha kotoa pē ʻi ʻIsipité.

11. Ko e hā naʻe fakatokanga ai ʻa Mōsese ki he niʻihi kehé?

¹¹ Naʻe talangofua ʻa Mōsese ʻo fakatokanga ki he ngaahi fāmili ʻIsileli kehé ʻa ia naʻe ʻi he tuʻunga fakatuʻutāmaki honau ngaahi ʻuluaki fohá, neongo ko hono ongo fohá naʻe hā mahino naʻá na ʻi Mitiani, ʻo malu mo mamaʻo ʻaupito mei he “tokotaha faifakaʻauhá.” (ʻEki. 18:1-6) a Koeʻuhi ko e ʻofa ʻa Mōsese ki hono kaungātangatá, naʻá ne ui mai leva “ʻa e Kau Matuʻa ʻo Isileli, ʻo ne lea kiate kinautolu, ʻo pehe, . . . tamateʻi ʻa e Pasova.”—ʻEki. 12:21.

12. Ko e hā ʻa e pōpoaki kuo tala mai ʻe Sihova ke tau malangaʻí?

¹² ʻI he tokoni ʻa e kau ʻāngeló, ʻoku fanongonongo ai ʻe he kakai ʻa Sihová ʻa e pōpoaki mahuʻinga ko ení: “Mou manavahē ki he ʻOtuá pea ʻoange kiate ia ʻa e lāngilangí, koeʻuhi kuo hoko mai ʻa e houa ʻo ʻene fakamāú, pea ko ia ai, lotu ki he Tokotaha naʻá ne ngaohi ʻa e langí pea mo e māmaní mo e tahí mo e ngaahi matavaí.” (Fkh. 14:7) Kuo pau ke tau malangaʻi ʻa e pōpoaki ko iá he taimí ni. Kuo pau ke tau fakatokanga ki hotau ngaahi kaungāʻapí ke nau mavahe mei Pāpilone ko e Lahi, ʻa ia, ko e lotu loí, koeʻuhí ke ʻoua te nau “maʻu ha konga ʻo hono ngaahi tauteá.” (Fkh. 18:4) Ko e kau Kalisitiane paní, fakataha mo e tokoni ʻa e “fanga sipi kehe,” ʻoku nau kōlenga ki he kakaí ke nau hoko ko e ngaahi kaumeʻa ʻo e ʻOtuá.—Sione 10:16; 2 Kol. 5:20.

13. Ko e hā te ne tokoniʻi koe ke tupulaki hoʻo holi ke malangaʻi ʻa e ongoongo leleí?

 ¹³ ʻOku tau tuipau ko e ‘houa ʻo e fakamāú’ kuo hoko mai. ʻOku tau tuipau foki ko e ngāue fakamalangá ʻoku fakavavevave ia ʻo hangē pē ko hono folofolaʻaki ʻe Sihová. ʻI ha vīsone, ko e ʻapositolo ko Sioné naʻá ne “mamata ki ha kau ʻāngelo ʻe toko fā ʻoku nau tuʻu ʻi he ngaahi tuliki ʻe fā ʻo e māmaní, ʻo nau puketuʻu ʻa e ngaahi matangi ʻe fā ʻo e māmaní.” (Fkh. 7:1) ʻOkú ke sio ki he kau ʻāngelo ko iá ʻoku nau mateuteu ke tukuange mai ʻa e ngaahi matangi fakaefakaʻauha ʻo e mamahi lahí ki he māmani ko ení? Kapau ʻokú ke sio ki he kau ʻāngelo ko iá ʻaki ho mata ʻo e tuí, te ke ongoʻi falala-pau fekauʻaki mo hono malangaʻi ʻa e ongoongo leleí ki he niʻihi kehé.

14. Ko e hā ʻoku tau loto ai “ke seseʻe ʻa e angahala mei hono ʻalunga kovi”?

¹⁴ Kuo tau ʻosi hoko ko ha kaumeʻa ʻo Sihova mo maʻu ʻa e ʻamanaki ʻo e moʻui taʻengatá, ka ʻoku tau mahinoʻi ko hotau fatongia ia “ke seseʻe ʻa e angahala mei hono ʻalunga kovi ke ne moʻui.” (Lau ʻa e ʻIsikeli 3:17-19.) Ko e moʻoni, ʻoku ʻikai ko e ʻuhinga pē eni ʻo ʻetau malangá. ʻOku tau malanga koeʻuhí ʻoku tau ʻofa kia Sihova mo ʻofa ki hotau kaungāʻapí. ʻI he talanoa fakatātā ʻa Sīsū fekauʻaki mo e Samēliá, naʻá ne akoʻi mai ai ke tau mahinoʻi ʻa e ʻuhinga moʻoni ʻo e fakahāhā ʻo e ʻofá mo e mēsí. Te tau ʻeke hifo nai kiate kitautolu: ‘ʻOku ou hangē ko e Samēliá, pe ʻoku ou hangē ko e taulaʻeikí mo e Līvaí? ʻOku ou vēkeveke maʻu pē ke fai ha fakamoʻoni, pe ʻoku ou fai ha ngaahi kalofanga ke ʻoua ʻe malanga ki he niʻihi kehé?’ (Luke 10:25-37) Kapau ʻoku tau maʻu ʻa e tui ki he ngaahi talaʻofa ʻa e ʻOtuá pea ʻofa ki hotau kaungāʻapí, te tau loto ai ke fai hotau lelei tahá ʻi he ngāue fakamalangá ki muʻa ke fuʻu tōmui.

15. Ko e hā naʻe ongoʻi ai ʻe he kau ʻIsilelí kuo nau fihiá?

¹⁵ Ko e tui ʻa Mōsese “ki he Tokotaha ʻa ia ʻoku taʻehāmaí” naʻá ne tokoniʻi ia ʻi he taimi naʻe ʻi he tuʻunga fakatuʻutāmaki ai ʻa e kau ʻIsilelí hili ʻenau mavahe mei ʻIsipité. ʻOku pehē ʻe he Tohi Tapú: “Pea tangaki hake ʻa haʻa Isileli, pea ta ko Isipite é ʻoku tulimui mai; pea naʻa nau manavahe fuʻu; pea kaila ʻa haʻa Isileli kia Sihova.” (ʻEki. 14:10-12) Naʻe totonu ke ʻamanekina ʻe he kau ʻIsilelí ʻa e tuʻunga ko ení. Naʻe tomuʻa tala ʻe Sihova: “Te u fakafefeka ʻa e loto ʻo Felo, pea te ne tuli kiate kinautolu; pea te u langilangiʻia ʻia Felo, mo ʻene fuʻu hosite kotoa; pea ʻe ʻilo ʻe he kau Isipite ko Sihova au.” (ʻEki. 14:4) Neongo ʻa e fakatokanga ʻa Sihová, naʻe ʻikai ke maʻu ʻe he kau ʻIsilelí ha tui. Ko e meʻa pē naʻe lava ke nau sio ki aí ko hono taʻofi ʻe he Tahi Kulokulá honau halá, ko e fakaofi vave mai ʻi mui ʻa e ngaahi saliote tau ʻa Feló, pea mo ha tokotaha tauhi-sipi taʻu 80 ʻokú ne taki kinautolu. Naʻa nau ongoʻi kuo nau fihia.

16. Naʻe anga-fēfē hono fakaivimālohiʻi ʻe he tuí ʻa Mōsese ʻi he Tahi Kulokulá?

¹⁶ Naʻe ʻikai ke ilifia ʻa Mōsese. Ko hono mata ʻo e tuí naʻe sio ia ki ha meʻa naʻe mālohi ange ʻi ha tahi pe ko ha kau tau. Naʻe lava ke ne mamata ki he “fakamoʻui ʻa Sihova,” pea naʻá ne ʻiloʻi ʻe faitau ʻa Sihova maʻá e kau ʻIsilelí. (Lau ʻa e ʻEkisoto 14:13, 14.) Ko e tui ʻa Mōsesé naʻá ne fakaivimālohiʻi mo fakalototoʻaʻi ʻa e kakai ʻa e ʻOtuá. ʻOku pehē ʻe he Tohi Tapú: “ʻI he tuí naʻa nau ʻalu atu ai ʻi he Tahi Kulokulá ʻo hangē ia haʻanau ʻalu ʻi ha fonua mōmoá, ka ʻi he feinga ʻa e kau ʻIsipité ke nau fai iá, naʻe lōmekina ai kinautolu ʻe he tahí.” (Hep. 11:29) Hili iá, “nae manavahe ae kakai kia Jihova, o tui kia Jihova, mo ene tamaioeiki ko Mosese.”—ʻEki. 14:31, PM.

17. Ko e hā ʻa e meʻa ʻe hoko ʻi he kahaʻú te ne siviʻi ʻetau tuí?

¹⁷ ʻOku vavé ni ke hā ngali ʻi ha tuʻunga fakatuʻutāmaki ʻetau moʻuí. ʻI he taimi ʻe kamata ai ʻa ʻĀmaketoné, ʻe fakaʻauha ʻe he ngaahi puleʻanga ʻo e māmani ko ení ʻa e ngaahi kautaha fakalotu ʻa ia naʻa nau mālohi ange ʻiate kitautolú. (Fkh. 17:16) ʻI ha kikite, ʻoku pehē ai ʻe Sihova ʻe ʻikai ke ʻi ai hatau maluʻi, hangē ha “fonua tukuʻuta, . . . ʻoku nofo taʻe hanau ʻa, ʻo ʻikai hanau songo pe lau matapa.” (ʻIsi. 38:10-12, 14-16) Ko e faʻahinga ʻoku ʻikai ke nau tui kia Sihová te nau fakakaukau nai ʻoku ʻikai hatau haoʻanga. ʻE fēfē hoʻo fakafeangaí?

18. Fakamatalaʻi ʻa e ʻuhinga ʻe lava ai ke tau nofoʻaki mālohi lolotonga ʻa e mamahi lahí.

¹⁸ ʻOku ʻikai fiemaʻu ke tau ilifia. He ko e hā? Koeʻuhí naʻe tomuʻa tala ʻe Sihova ʻe ʻikai ngata pē ʻi hono ʻohofi hono kakaí ka te ne fakahaofi foki kinautolu. “Ko e meʻa ʻe hoko ʻi he taimi ko ia, ʻa e taimi ʻoku ʻalu ai ʻa Koki ki he kelekele ʻo Isileli—ko Atonai Sihova ia mei he Taʻehamai—ʻe toki pupū hake ʻeku ʻita ʻi hoku ihu. ʻIo, kuo u lea ʻi heʻeku fuaʻa, ʻi he kakaha o ʻeku houhau.” (ʻIsi. 38:18-23) ʻE fakaʻauha ʻe he ʻOtuá ʻa e kotoa ʻo e faʻahinga ʻoku nau loto ke fakaʻauha ʻa e kakai ʻa Sihová. Kapau ʻokú ke tui ʻe maluʻi koe ʻe Sihova lolotonga hono “ʻaho lahi mo fakalilifu,” ʻe malava ai ke ke “mamata ki he fakamoʻui ʻa Sihova” pea nofoʻaki mālohi.—Sioeli 2:31, 32.

19. (a) Naʻe vāofi fēfē ʻa e vahaʻangatae ʻo Sihova mo Mōsesé? (e) Kapau ʻokú ke talangofua kia Sihova “ʻi ho hala kotoa pe,” ko e hā ʻa e tāpuaki te ke maʻú?

¹⁹ Mateuteu he taimí ni ki he ngaahi meʻa fakatoʻoaloto ko iá ʻaki ʻa e hokohoko atu ke ‘tuʻu maʻu ʻi he sio atu ko ia ki he Tokotaha ʻa ia ʻoku taʻehāmaí’! Hoko ko ha kaumeʻa vāofi ange ʻo Sihova ʻaki ʻa e ako mo e lotu maʻu pē. Naʻe maʻu ʻe Mōsese ha kaumeʻa vāofi mo Sihova pea naʻe ngāueʻaki ia ʻe Sihova ʻi ha founga fakaofo ʻaupito he ʻoku pehē ʻe he Tohi Tapú naʻe ʻafioʻi ʻe Sihova “mata ki he mata” ʻa Mōsese. (Teu. 34:10, PM) Ko Mōsesé ko ha palōfita tuʻu-ki-muʻa ia. Kapau ʻokú ke maʻu ʻa e tui, ko koe foki ʻe lava ke ke maʻu ha kaumeʻa vāofi pehē mo Sihova ʻo hangē ia ʻoku lava ke ke sio moʻoni kiate iá. Kapau ʻokú ke talangofua kiate ia “ʻi ho hala kotoa pe,” ʻo hangē ko ia ʻoku tala mai ʻe he Folofola ʻa e ʻOtuá ke tau faí, “ʻe fakatonutonu ʻe ia ho ngaahi ʻalunga.”—Pal. 3:6.