1, 2. Ko e hā ʻe lava ke faingataʻa ai ki he faʻahinga ʻoku ngāue mamaʻo mei ʻapí ke fokí? (Sio ki he ʻuluaki fakatātā ʻi he kupú ni.)

 NAʻE ʻi ai ha ngāue lelei ʻa ʻEtuate pea maʻu mo e paʻanga lahi ʻi he taimi naʻá ne ngāue ai ʻi ha fonua mamaʻo mei hono fāmilí. a Ka ʻi he taimi naʻá ne ako ai ʻa e moʻoní, naʻá ne ʻiloʻi ʻoku fiemaʻu ʻe hono fāmilí ʻa e meʻa lahi ange ʻi he paʻangá. Naʻa nau fiemaʻu ia ke ne ʻi ʻapi ʻo tokangaʻi kinautolu. Ko ia naʻá ne foki ki ʻapi.—ʻEf. 6:4.

² Naʻe ʻiloʻi ʻe ʻEtuate naʻe fiemaʻu ʻe Sihova ke ne foki ki hono fāmilí. Ka ʻe ʻikai ke faingofua ia. Naʻe pau ke ne fakaleleiʻi hono vahaʻangatae mo hono uaifí mo e fānaú, pea naʻe pau ke ne maʻu ha paʻanga feʻunga ke tauhiʻaki kinautolu. ʻE anga-fēfē haʻane fai ia? ʻE tokoniʻi kinautolu ʻe he fakatahaʻangá?

 3. ʻOku anga-fēfē hono uesia ʻa e fānaú ʻi he taimi ʻoku nofo mamaʻo ai ʻa e ngaahi mātuʻá?

³ ʻOku fakahaaʻi ʻe ʻEtuate: “Naʻá ku liʻaki ʻeku fānaú ʻi he taimi naʻa nau mātuʻaki fiemaʻu ai ʻeku tatakí mo e ʻofá. Naʻe ʻikai ke u ʻi ai ke lau kia kinautolu ʻa e ngaahi talanoa Fakatohitapú, lotu mo kinautolu, fāʻofua mo vaʻinga mo kinautolu.” (Teu. 6:7) Ko hono ʻofefine lahi tahá, ʻa ʻAna, ʻokú ne manatuʻi: “Naʻá ku ongoʻi taʻemalu fakaeongo ʻi he ʻikai ke  ʻi ʻapi ʻemau tamaí. ʻI he taimi naʻá ne foki mai aí, naʻa mau ʻiloʻi ia ʻi hono matá pē mo e leʻó. Naʻe ʻikai ke ongo fakanatula ʻa e taimi naʻá ne fāʻofua mai ai kiate aú.”

 4. Ko e hā ʻoku faingataʻa ai ki ha tamai ke hoko ko ha ʻuluʻi fāmili lelei ʻi he taimi ʻokú ne nofo mamaʻo ai mei hono fāmilí?

⁴ Ko e fuoloa ange ʻa e nofo mamaʻo ʻa e tamaí mei ʻapí, ko e faingataʻa ange ia kiate ia ke hoko ko ha ʻulu ʻo e fāmilí. Ko e uaifi ʻo ʻEtuaté, ʻa Lupi, ʻokú ne pehē: “Naʻe pau ke u fakahoko ha fatongia ʻe ua—Faʻē mo e Tamai—pea naʻá ku anga ki hono fai ʻa e lahi taha ʻo e ngaahi fili ʻa e fāmilí. ʻI he foki mai ki ʻapi ʻa ʻEtuaté, naʻe pau ke u ako ki he ʻuhinga moʻoni ʻo e anganofo faka-Kalisitiané. Naʻa mo e taimí ni, ʻoku faʻa fiemaʻu ke u fakamanatu kiate au kuo ʻi heni hoku husepānití.” (ʻEf. 5:22, 23) “Naʻe anga pē ʻa e tamaiki fefiné ʻi he ʻalu ki heʻenau faʻeé ʻo poaki ki hono fai ʻa e ngaahi meʻá,” ko e lau ia ʻa ʻEtuaté. “Naʻe pau ke u ako ke takimuʻa ʻi ha founga faka-Kalisitiane.” Naʻe ʻiloʻi ʻe ʻEtuate mo Lupi naʻe fiemaʻu ʻe heʻena fānaú ke sio ki heʻenau ongo mātuʻá ʻokú na fai fakataha ʻa e ngaahi filí.

 5. Ko e hā naʻe fai ʻe ʻEtuate ke fakaleleiʻi ai hono vahaʻangatae mo hono fāmilí ʻi he taimi naʻá ne foki mai ai ki ʻapí? Ko e hā ʻa e olá?

⁵ Naʻe fai ʻe ʻEtuate ʻa e kotoa naʻá ne malavá ke fakaleleiʻi hono vahaʻangatae mo hono fāmilí pea ke tokoniʻi kinautolu ke langa hake honau vahaʻangatae mo Sihová. Naʻá ne loto ke akoʻi ki heʻene fānaú ʻa e moʻoní ʻaki ʻa e lea mo e faʻifaʻitakiʻanga, ʻo ʻikai ko e lea pē ʻokú ne ʻofa kia Sihova ka ke fakahaaʻi ia. (1 Sio. 3:18) Naʻe tāpuakiʻi ʻe Sihova ʻa e ngaahi feinga ʻa ʻEtuaté? “Ko e sio ki he kotoa ʻene ngaahi feinga ke hoko ko ha tamai leleí mo ʻene feinga ke toe ʻunuʻunu ofi mai kiate kimautolú naʻe hoko ai ha liliu lahi,” ko e tali ia ʻa ʻAná. “ʻI he taimi naʻa mau sio ai ki heʻene kakapa atu ʻi he fakatahaʻangá, naʻa mau ongoʻi fiefia ai. Naʻe feinga ʻa e māmaní ke tohoakiʻi kimautolu ke mamaʻo meia Sihova. Ka naʻa mau sio ki he tokangataha ʻemau ongo mātuʻá ki he moʻoní, ko ia naʻa mau feinga ke fai ʻa e meʻa tatau. Naʻe palōmesi mai ʻa e Tangataʻeikí heʻikai ʻaupito ke ne toe liʻaki kimautolu, pea naʻe pehē. Kapau naʻá ne toe ʻalu, mahalo pē heʻikai ke u ʻi he kautaha ʻa Sihová he ʻahó ni.”

 6. Ko e hā ʻa e lēsoni naʻe ako ʻe he ngaahi mātuʻa tokolahi lolotonga ha tau ʻi he feituʻu Palakaná?

⁶ ʻOku fiemaʻu ʻe he fānaú ʻenau ongo mātuʻá ke nau nofo fakataha. Ko e fakatātaá, ʻi he taimi naʻe hoko ai ha tau ʻi he feituʻu Palakaná, ko e ngaahi mātuʻa Fakamoʻoni tokolahi naʻe ʻikai malava ke nau ʻalu ki he ngāué. Ko hono olá, naʻa nau fakamoleki ʻa e lahi taha honau taimí mo ʻenau fānaú ʻi ʻapi. Naʻa nau vaʻinga mo kinautolu, talanoa mo kinautolu pea ako mo kinautolu. Naʻe saiʻia ai ʻa e fānaú, pea naʻa nau fiefia neongo naʻe fuʻu faingataʻa ʻa e moʻuí lolotonga ʻa e taú. Ko e hā e lēsoní? ʻOku fiemaʻu moʻoni ʻe he fānaú ʻenau ongo mātuʻá ʻo laka ange ia ʻi he paʻangá pe ngaahi meʻaʻofá. Hangē ko e lau ʻa e Tohi Tapú, ʻe maʻu ʻaonga ʻa e fānaú ʻi he taimi ʻe fakamoleki ai ʻe heʻenau ongo mātuʻá ha taimi mo kinautolu pea akoʻi kinautolu.—Pal. 22:6.

7, 8. (a) Ko e hā ʻe fakaʻohovale nai ki he ngaahi mātuʻá ʻi he taimi ʻoku nau foki mai ai ki ʻapí? (e) ʻE lava fēfē ke fakaleleiʻi ʻe he ngaahi mātuʻá honau vahaʻangatae mo ʻenau fānaú?

⁷ Ko e ngaahi mātuʻa ʻe niʻihi te nau ʻohovale nai ʻi he taimi ʻoku nau foki ai ki honau ngaahi fāmilí. ʻOku fakafeangai nai ʻenau fānaú ʻo hangē ia ʻoku ʻikai ke nau tokanga atu ki heʻenau foki maí pe hangē ia ʻoku ʻikai ke nau toe falala ange kiate kinautolú. ʻE pehē nai ʻe he mātuʻá, “ʻE lava fēfē ke ke taʻehoungaʻia pehē hili ia ʻa e meʻa kotoa kuó u fai maʻaú?” Ka ko hono moʻoní, ʻoku mamahi ʻa e kiʻi tamá koeʻuhí ko e mavahe ʻene mātuʻá. ʻE lava fēfē ke fakaleleiʻi ʻe he mātuʻá ʻa e palopalemá?

⁸ Kole kia Sihova ke tokoniʻi koe ke ke mahinoʻi ʻa e anga ʻo e ongoʻi moʻoni ho fāmilí, pea fakahaaʻi kia kinautolu hoʻo tokangá. ʻOku fiemaʻu foki ke ke lea ki ho fāmilí pea fakahaaʻi ʻokú ke kaunga ki he palopalemá. ʻE tokoni nai ha kole fakamolemole moʻoni. ʻI he taimi ʻoku sio ai ho fāmilí ʻokú ke hanganaki feinga ke ʻai ʻa e ngaahi meʻá ke  lelei angé, te nau ʻiloʻi ʻokú ke loto-moʻoni. Kapau te ke kātaki pea ʻoua ʻe foʻi, ʻe kamata nai ho fāmilí ke toe ʻofaʻi mo fakaʻapaʻapaʻi koe.

 9. Ko e hā ʻoku totonu ai ke tau fiemālie ʻi he tuʻunga ʻoku ʻi ai ʻetau moʻuí?

⁹ Naʻe tohi ʻe he ʻapositolo ko Paulá ʻo pehē ʻi he taimi ʻoku ʻikai malava ai ʻe he kau Kalisitiane taʻumotuʻá ke tokangaʻi ʻenau ngaahi fiemaʻú tonu, ko ʻenau fānaú mo e fanga makapuná ʻoku totonu ke nau tokoniʻi kinautolú. Fakatatau kia Paula, ko e meʻa kotoa ʻoku tau fiemaʻu moʻoni ke hoko ai ʻo fiemālie ʻi he tuʻunga ʻoku ʻi ai ʻetau moʻuí ko e meʻakai, vala mo e nofoʻanga. (Lau ʻa e 1 Tīmote 5:4, 8; 6:6-10.) Ke tokonaki maʻa hono fāmilí, ʻoku ʻikai fiemaʻu ia ki ha Kalisitiane ke hoko ʻo tuʻumālie ʻi he māmani ko eni ʻa ia “ʻoku fakaʻaʻau ke mole atu.” (1 Sio. 2:15-17) Kuo pau ke ʻoua te tau fakakaukau ko e paʻangá ʻe lava ke ne solova ʻa e kotoa ʻetau ngaahi palopalemá pe tuku ʻa e “ngaahi loto-moʻua ʻo e moʻuí” ke ne ʻai hotau fāmilí ke mole ʻenau “piki maʻu ki he moʻui moʻoní” ʻi he māmani foʻou ʻa e ʻOtuá!—Luke 21:34-36; 1 Tīm. 6:19; Mk. 4:19.

10. Ko e hā ʻoku fakapotopoto ai ke fakaʻehiʻehi mei he moʻuá?

¹⁰ ʻOku ʻafioʻi ʻe Sihova ʻoku tau fiemaʻu ha paʻanga. Ka heʻikai lava ʻe he paʻangá ke tokoniʻi mo maluʻi kitautolu ʻo hangē ko e poto meia Sihová. (Koh. 7:12; Luke 12:15) ʻI he taimi lahi, ʻoku ʻikai ʻiloʻi ʻe he kakaí ʻa e lahi ʻo e fakamole ʻo e hiki ki ha fonua ʻe tahá. Pea ʻoku ʻikai ha fakapapauʻiʻanga te nau maʻu ha paʻanga ʻi heʻenau aʻu pē ki aí. Ko hono moʻoní, ko ha hiki pehē ʻe lava ke fakatuʻutāmaki. Ko e tokolahi ʻoku nau liʻaki honau fāmilí ʻoku nau foki ki ʻapi ʻoku toe lahi ange ʻa e moʻuá. ʻI he ʻikai malava ke tauhi tauʻatāina ange ki he ʻOtuá, kuo pau ke nau ngāue fakatamaioʻeiki ki he kakai ʻa ia ʻoku nau moʻua paʻanga ki aí. (Lau ʻa e Palōveepi 22:7.) ʻOku fakapotopoto maʻu pē ke tomuʻa fakaʻehiʻehi mei he moʻuá.

11. ʻE lava fēfē ke tokoni ki he fāmilí hono vahevahe lelei ʻenau paʻangá?

¹¹ Naʻe ʻiloʻi ʻe ʻEtuate ke tokangaʻi lavameʻa hono fāmilí hili ʻene foki ki ʻapí, ʻe fiemaʻu ke ne tokanga ki he founga ʻoku nau ngāueʻaki ai ʻa e paʻangá. Ko ia mo hono uaifí ʻokú na vahevahe lelei ʻenau paʻangá ʻo makatuʻunga ʻi he meʻa ʻoku nau fiemaʻu moʻoní. b Ke muimui ʻi he vahevahe ko iá, ʻe ʻikai lava ai ke na toe fakatau ʻa e meʻa naʻá na faʻa fakatau ʻi he taimi naʻe lahi ange ai ʻena paʻangá. Ka ko e kotoa ʻo e fāmilí naʻa nau ngāue fakataha pea naʻe ʻikai ke nau fakamoleki ʻa e paʻangá ʻi he ngaahi meʻa ʻoku ʻikai fiemaʻú. “Ko e fakatātaá,” ko e lau ia ʻa ʻEtuaté, “Naʻá ku fakahikiʻi ʻeku fānaú mei he ʻapiako totongi mamafá pea ʻave kinautolu ki ha ʻapiako totongi maʻamaʻa.” Ko ia mo hono fāmilí naʻa nau lotu maʻana ke maʻu ha ngāue ʻa ia heʻikai fakaheleleuʻi ai ʻenau founga tuʻumaʻu ʻo e lotú. Naʻe anga-fēfē hono tali ʻe Sihova ʻenau ngaahi lotú?

12, 13. Ko e hā naʻe fai ʻe ʻEtuate ke poupouʻiʻaki hono fāmilí, pea naʻe anga-fēfē hono tāpuakiʻi ʻe Sihova ʻene fili ke tauhi ha moʻui faingofuá?

¹² ʻI he ʻuluaki taʻu ʻe uá, naʻe ʻikai loko maʻu ʻe ʻEtuate ha paʻanga feʻunga maʻa hono fāmilí, naʻe pau ke nau ngāueʻaki ʻenau paʻanga naʻe fakahuú, pea naʻá ne helaʻia ʻaupito. Ka ʻoku pehē ʻe ʻEtuate, “Naʻe malava ke mau maʻu ʻa e kotoa ʻo e ngaahi fakatahá pea ʻalu fakataha ʻi he malangá.” Naʻá ne fili heʻikai ke ne toe fakakaukau fekauʻaki mo hono tali ha ngāue ʻa ia te ne fakamavaheʻi ai ia mei hono fāmilí. “ʻI hono kehé,” ko ʻene laú ia, “Naʻá ku ako ke fai ha ngaahi ngāue kehekehe koeʻuhí kapau naʻe ʻikai faingamālie ha ngāue ʻe taha, naʻe lava ke u fai ʻa e ngāue ʻe tahá.”

¹³ Koeʻuhí ko e fuʻu fuoloa kia ʻEtuate ke totongi ʻosi hono ngaahi moʻuá, naʻe pau ai ke ne totongi ʻa e tupu lahi ʻi he paʻanga naʻá ne noó. Kae kehe, naʻe loto-lelei ʻa ʻEtuate ke fai eni koeʻuhí ke lava ai ke ne tauhi kia Sihova mo hono fāmilí. “ʻOku siʻi hifo ʻi he pēseti ʻe 10 ʻa e meʻa ʻoku ou maʻu he taimi ní ʻi he meʻa naʻá ku maʻu ʻi mulí,” ko e lau ia ʻa ʻEtuaté, “ka naʻe ʻikai ke mau fiekaia. ‘ʻOku ʻikai fakanounou ʻa e nima ʻo Sihova.’ Ko hono moʻoní, naʻa mau fili ke tāimuʻa.” ʻIkai fuoloa mei ai, naʻe  sai ange ʻa e ʻekonōmiká pea naʻe faingofua ange ai kiate ia ke tokangaʻi hono fāmilí.—ʻAi. 59:1.

14, 15. Ko e hā ʻe lava ke fai ʻe he ngaahi fāmilí kapau ʻoku loto honau ngaahi kāingá ke nau fili ʻa e paʻangá kae ʻikai ko e lotu kia Sihová? Ko e hā ʻe hoko nai ʻi he taimi ʻoku tau fokotuʻu ai ha faʻifaʻitakiʻanga leleí?

¹⁴ ʻOku ongoʻi ʻe he kakai ʻe niʻihi kuo pau ke nau foaki ʻa e paʻanga mo e ngaahi meʻaʻofa ki honau ngaahi kāingá mo e kaungāmeʻá. “Ko e konga ia homau anga fakafonuá, pea ʻoku mau fiefia ʻi he foaki atú,” ko e lau ia ʻa ʻEtuaté. Ka ʻokú ne tānaki mai, “ʻOku ʻi ai ha fakangatangata.” ʻOkú ne fakamatalaʻi anga-ʻofa ki hono ngaahi kāingá te ne foaki ange kiate kinautolu ʻa e lahi taha te ne malavá, ka heʻikai te ne liʻaki ʻa e ngaahi fiemaʻu hono fāmilí tonu pe ko ʻenau lotu kia Sihová.

¹⁵ ʻE ʻita nai ha ngaahi kāinga ʻe niʻihi ʻi ha tokotaha ʻokú ne fili ke nofo mo hono fāmilí pe fili ke foki ki ʻapi. ʻE aʻu ʻo nau ui ia ʻoku taʻeʻofa pe siokita. Ko e hā hono ʻuhingá? Koeʻuhí ʻoku ʻamanekina ʻe he ngaahi kāinga ko ení ha paʻanga meiate ia. (Pal. 19:6, 7) Ko e ʻofefine ʻo ʻEtuaté ʻa ʻAna, ʻokú ne pehē kapau ʻe fili ʻe hono fāmilí ʻa e lotu kia Sihová kae ʻikai ko e paʻangá, ʻe mahinoʻi nai ʻe honau ngaahi kāingá ʻa e mahuʻinga ʻo Sihová. Kapau ʻe ʻikai ke nau fai ʻa e fili ko iá, ko honau ngaahi kāingá heʻikai ʻaupito pē nai ke nau malava ʻo mahinoʻi.—Fakafehoanaki mo e 1 Pita 3:1, 2.

16. (a) Ko e hā ʻa e fakakaukau hala ʻe lava ke maʻu ʻe ha taha? (Sēm. 1:22) (e) Ko e hā ʻa e ngaahi fili ʻoku tāpuakiʻi ʻe Sihová?

¹⁶ Ko ha tuofefine ʻa ia naʻá ne mavahe mei hono fāmilí ke ngāue ʻi ha fonua ʻe taha naʻá ne tala ange ki he kau mātuʻá: “Naʻe pau ke mau fai ha ngaahi feilaulau lahi kae malava ke u haʻu ki hení. Naʻe aʻu ʻo pau ke taʻofi ʻe hoku husepānití ʻene ngāue ko ha mātuʻá. Ko ia ʻoku ou ʻamanaki moʻoni ʻe tāpuakiʻi ʻe Sihova ʻa e hiki ko ení.” Kapau ʻoku tau maʻu ʻa e tui pea fai ʻa e ngaahi filí ʻo fehoanaki mo e finangalo ʻo Sihová, ʻoku lava ke tau fakapapauʻi te ne tāpuakiʻi kitautolu. Heʻikai te ne tāpuakiʻi ʻa e ngaahi fili ʻoku fepaki mo hono finangaló. Pea heʻikai fakahōifua kiate ia kapau te tau tukuange ha monū ʻo e ngāué koeʻuhi ko ha ngaahi ʻuhinga hala.—Lau ʻa e Hepelū 11:6; 1 Sione 5:13-15.

17. Ko e hā ʻoku totonu ai ke tau kumi ki he tataki ʻa Sihová ki muʻa ke fai ʻa e ngaahi filí, pea ʻe lava fēfē ke tau fai eni?

¹⁷ Kumi ki he tataki ʻa Sihová ki muʻa ke ke fai ha fili koeʻuhí ke ʻoua te ke fakaʻiseʻisa ʻamui ange. Lotu ʻo kole ʻa e laumālie māʻoniʻoní, potó  pea mo e tatakí. (2 Tīm. 1:7) ʻEke hifo kiate koe: ‘Ko e hā ʻa e lahi ʻoku ou loto-lelei ke feilaulauʻí kae malava ke u tauhi kia Sihová? Te u fanongo ki heʻene fakahinohino ke nofo fakataha mo hoku fāmilí, neongo kapau ʻoku ʻuhinga iá te mau maʻu ha moʻui ʻikai fuʻu fiemālie ange?’ (Luke 14:33) Kole tokoni mei he kau mātuʻá, pea muimui ʻi heʻenau faleʻi Fakatohitapú. Kapau te ke fai eni, ʻokú ke fakahaaʻi ai ʻokú ke falala ki he talaʻofa ʻa Sihova ke tokoniʻi koé. Heʻikai tala atu ʻe he kau mātuʻá ia ʻa e meʻa ke ke faí, ka te nau tokoniʻi koe ke ke fai ha ngaahi fili fakapotopoto ʻe taki atu ki ha moʻui fiefia.—2 Kol. 1:24.

18. Ko e fatongia ʻo hai ke poupouʻi ʻa e fāmilí? Ko e hā ʻa e tokoni ʻe lava ke tau faí?

¹⁸ ʻOku ʻamanekina ʻe Sihova ʻa e ngaahi ʻuluʻi fāmilí ke nau poupouʻi honau ngaahi fāmilí ʻi he taimi kotoa pē. ʻOku totonu ke tau lotu mo fakaongoongoleleiʻi ʻa e faʻahinga ʻoku nau tokanga ki he fatongia ko iá ʻo ʻikai liʻaki honau ngaahi fāmilí, naʻa mo e taimi ʻoku fakataueleʻi ai kinautolu ke mavahe pe tala ange ʻe he niʻihi kehé ke nau fai peheé. Tānaki atu ki heʻetau ngaahi lotú, ʻoku tau maʻu ha faingamālie ke fakamoʻoniʻi ʻetau ʻofa ki he fanga tokoua faitōnunga ko ení ʻi he taimi ʻoku hoko ai ha ngaahi fakatamaki pe hoko ha ngaahi meʻa fakafaitoʻo fakavavevave. (Kal. 6:2, 5; 1 Pita 3:8) ʻE lava ke ke tokoni kia kinautolu ke kumi ha ngāue ofi mai pe ʻoange kiate kinautolu ha meʻa kehe ʻoku nau fiemaʻu fakavavevave, hangē ko ha paʻanga pe meʻakai? Kapau ko ia, heʻikai nai fiemaʻu ke nau mavahe mei honau fāmilí ke kumi ha ngāue ʻi ha feituʻu ʻe taha.—Pal. 3:27, 28; 1 Sio. 3:17.

19, 20. Ko e hā ʻoku lava ai ke fakapapauʻi ʻe he kau Kalisitiané ʻe tokoniʻi kinautolu ʻe Sihová?

¹⁹ ʻOku fakapapauʻi mai ʻe Sihova: “Tuku ke hoko hoʻomou founga moʻuí ʻo ʻataʻatā mei he ʻofa ki he paʻangá, lolotonga ia hoʻomou fiemālie pē ʻi he ngaahi meʻa lolotongá. He kuó ne [ʻOtua] pehē: ‘ʻE ʻikai ʻaupito te u mavahe meiate koe pea ʻe ʻikai ʻaupito te u liʻaki koe.’ Ko ia te tau mātuʻaki loto-lahi ai ke pehē: ‘Ko Sihova ʻa hoku tokoní; ʻe ʻikai te u ilifia. Ko e hā ʻe lava ke fai mai ʻe he tangatá kiate au?’” (Hep. 13:5, 6) ʻOku anga-fēfē ʻetau fakahoko eni ʻi he moʻuí tonu?

²⁰ Ko ha mātuʻa ʻi ha fonua masiva ʻokú ne pehē ʻoku faʻa fakaongoongoleleiʻi ʻe he kakaí ʻa e fiefia ʻa e Kau Fakamoʻoni ʻa Sihová. ʻOkú ne pehē ʻoku nau fakatokangaʻi foki naʻa mo e Kau Fakamoʻoni masivá ʻoku nau teunga lelei maʻu pē pea maʻu ʻa e ngaahi meʻa ʻoku nau fiemaʻú. Ko e meʻa tofu pē eni naʻe talaʻofa ʻe Sīsuú. (Māt. 6:28-30) ʻOku ʻofa ʻa Sihova ʻiate kitautolu pea fai ʻa e meʻa ʻoku lelei tahá maʻa kitautolu. ʻOkú ne mahuʻingaʻia ʻaupito ʻi he kotoa ʻo ʻene kau sevānití pea ʻokú ne mateuteu maʻu pē ke ‘fakaha hono malohí’ koeʻuhí ke ne tokoniʻi kitautolu. (2 Kal. 16:9, PM) Ko e ʻuhinga ia kuó ne ʻomai ai kia kitautolu ʻa e ngaahi fekau fekauʻaki mo e moʻui fakafāmilí mo e founga ke tokangaʻi ai ʻetau ngaahi fiemaʻú. ʻI he taimi ʻoku tau talangofua ai ki he ngaahi fekau ko ení, ʻoku tau fakahaaʻi ai kia Sihova ʻoku tau ʻofa mo falala kiate ia. “Ko e meʻa ʻeni ʻoku ʻuhinga ki ai ʻa e ʻofa ki he ʻOtuá, ko ʻetau tauhi ʻene ngaahi fekaú; pea ko ʻene ngaahi fekaú ʻoku ʻikai ke fakamafasia.”—1 Sio. 5:3.

21, 22. Ko e hā kuó ke fili ai ke falala kia Sihová?

²¹ ʻOku pehē ʻe ʻEtuate ʻokú ne ʻiloʻi ko e taimi naʻá ne mavahe ai mei hono uaifí mo e fānaú heʻikai lava ke toe maʻu mai. Ka ʻoku ʻikai ke ne nōfoʻi ʻi heʻene ngaahi fakaʻiseʻisá. Ko e tokolahi ʻo e faʻahinga naʻá ne ngāue mo ia ki muʻá ʻoku nau tuʻumālie kae ʻikai fiefia. ʻOku palopalemaʻia lahi honau ngaahi fāmilí. Kae kehe, ko hono fāmilí ʻoku nau fiefia ʻaupito! Neongo ʻoku nau masiva, ko e fāmili ʻo ʻEtuaté mo e ngaahi fāmili kehe ʻi hono fonuá ʻoku nau falala ʻe tokoniʻi kinautolu ʻe Sihova. ʻOkú ne pehē, “ʻOku mau hokosia kotoa ʻa e moʻoni ʻo e talaʻofa ʻa Sīsuú.”—Lau ʻa e Mātiu 6:33.

²² Mātuʻaki loto-lahi! Fili ke talangofua kia Sihova pea falala kiate ia. ʻE lava ke ke hoko ko ha ʻuluʻi fāmili lelei kapau te ke ʻofa kia Sihova, ki ho hoa malí, mo hoʻo fānaú. ʻE malava ke ke fakamoʻoniʻi ai ko Sihova ʻa ho Tokoní.