1, 2. (a) Ko e hā ʻa e fili naʻe fai ʻe Mōsese ʻi heʻene taʻu 40? (Sio ki he ʻuluaki fakatātā ʻi he kupú ni.) (e) Ko e hā naʻe fili ai ʻa Mōsese ke faingataʻaʻia fakataha mo e kau ʻIsilelí?

 NAʻE ʻiloʻi ʻe Mōsese ʻa e faʻahinga kahaʻu ʻe lava ke tuʻuaki ange ʻe ʻIsipité. Naʻá ne sio ki he ngaahi fale lalahi mo fakaʻofoʻofa ʻo e kau tuʻumālié. Naʻe pusiakiʻi ia ʻe he fāmili ʻo e tuʻí. Naʻe ‘akoʻi ia ʻi he poto kotoa pē ʻo e kau ʻIsipité,’ ʻa ia naʻe kau nai ai ʻa e ʻaati, ako ki he ngaahi meʻa ʻi he ʻataá, fika mo e ngaahi meʻa fakasaienisi kehe. (Ngā. 7:22) Naʻe mātuʻaki faingofua kiate ia ke ne maʻu ha paʻanga, mafai mo e ngaahi monū ʻa ia heʻikai faifai ange ʻo maʻu ia ʻe ha tokotaha ʻIsipite anga-maheni.

² Neongo ʻa e ngaahi faingamālie kotoa naʻe maʻu ʻe Mōsesé, ʻi heʻene taʻu 40 naʻá ne fai ha fili kuo pau pē naʻe faingataʻa ke mahinoʻi ʻe Felo mo hono fāmilí. Naʻá ne fili ke tuku ange hono kahaʻu ʻi ʻIsipité. Naʻá ne loto ke moʻui ko ha tokotaha ʻIsipite anga-maheni? ʻIkai, naʻa mo ia! Naʻá ne fili ke faingataʻaʻia fakataha mo e kau pōpulá. Ko e hā hono ʻuhingá? Naʻe maʻu ʻe Mōsese ʻa e tuí. (Lau ʻa e Hepelū 11:24-26.) Koeʻuhí ko ʻene tuí, naʻe hangē ia naʻe malava ʻa Mōsese ke sio kia Sihová. Naʻá ne maʻu ʻa e tui “ki he Tokotaha ʻa ia ʻoku taʻehāmaí” pea ki hono fakahoko ʻa e ngaahi talaʻofa ʻa e ʻOtuá.—Hep. 11:27.

 3. Ko e hā ʻa e fehuʻi ʻe tolu ʻe tali ʻi he kupu ko ení?

³ Hangē ko Mōsesé, ʻoku fiemaʻu ke tau maʻu ʻa e mata ʻo e tuí ke sio ʻo fakalaka atu ʻi he meʻa ʻoku tuʻuaki mai ʻe he māmaní pea sio ai kia Sihova. Kuo pau ke tau hoko ‘ko e faʻahinga ʻoku maʻu ʻa e tuí.’ (Hep. 10:38, 39) Ke tokoniʻi kitautolu ke fakaivimālohiʻi ʻetau tuí, tau sivisiviʻi  angé ʻa e meʻa ʻoku hiki fekauʻaki mo Mōsese ʻi he Hepelū 11:24-26. ʻI heʻetau fai peheé, feinga ke tali ʻa e ngaahi fehuʻi ko ení: Naʻe anga-fēfē hono tokoniʻi ʻe he tuí ʻa Mōsese ke ne talitekeʻi ʻa e ngaahi holi fakakakanó? ʻI he taimi naʻá ne fehangahangai ai mo e fakafepakí, naʻe anga-fēfē hono tokoniʻi ia ʻe he tuí ke ne fakamahuʻingaʻi hono monū ʻo e tauhi kia Sihová? Pea ko e hā naʻe sio ai ʻa Mōsese ʻo “fakamamaʻu atu ki hono maʻu ʻo e palé”?

 4. Ko e hā naʻe mahinoʻi ʻe Mōsese fekauʻaki mo e ‘fiefia ʻi he angahalá’?

⁴ ʻI he mata ʻo e tuí, naʻe malava ai ʻe Mōsese ke ne mahinoʻi ko e ‘fiefia ʻi he angahalá’ naʻe fakataimi pē. Naʻe kehe nai ʻa e sio ʻa e niʻihi kehé ki he ngaahi meʻá. Ko e hā hono ʻuhingá? Naʻa nau sio ki ʻIsipite, ko ha feituʻu naʻe anga-maheni ai ʻa e tauhi ʻaitolí mo e fakahaʻele faʻahikehé, naʻe hoko ko ha hau ʻi māmani, lolotonga ʻa e faingataʻaʻia ʻa e kakai ʻa Sihová ʻi he tuʻunga ko e kau pōpula. Ka naʻe ʻilo ʻe Mōsese ʻe lava ʻe he ʻOtuá ke liliu ʻa e tuʻungá. Neongo ko e faʻahinga naʻe tokangataha ki hono fakatōliʻa ʻenau ngaahi holí tonu naʻa nau hā ngali lavameʻa, naʻe tui ʻa Mōsese ʻe fakaʻauha ʻa e fulikivanú. Ko hono olá, naʻe ʻikai ke fakataueleʻi ia ʻe he “fiefia fakataimi ʻi he angahalá.”

 5. Ko e hā te ne tokoniʻi kitautolu ke talitekeʻi ʻa e “fiefia fakataimi ʻi he angahalá”?

⁵ ʻE lava fēfē ke ke talitekeʻi ʻa e “fiefia fakataimi ʻi he angahalá”? ʻOua ʻaupito naʻa ngalo ko e fiefia ʻoku maʻu ʻi he angahalá ʻoku taimi nounou pē. ʻE tokoniʻi koe ʻe he tuí ke ke sio “ʻoku fakaʻaʻau ke mole atu ʻa e māmaní pea pehē ki he holi ʻaʻaná.” (1 Sio. 2:15-17) Fakalaulauloto ki he kahaʻu ʻo e kau faiangahala taʻefakatomalá. ʻOku nau ʻi he “ngaahi potu ʻoku hekengofua . . . kuo kai ʻo ʻosi kinautolu ʻe he ʻu ilifia.” (Saame 73:18, 19) ʻI he taimi ʻoku fakataueleʻi ai koe ke faiangahalá, ʻeke hifo, ‘Ko e hā ʻa e kahaʻu ʻoku ou loto ke maʻú?’

 6. (a) Ko e hā naʻe fakafisi ai ʻa Mōsese “ke ui ia ko e foha ʻo e ʻofefine ʻo Feló”? (e) ʻOkú ke fakakaukau ko e hā naʻe fai ai ʻe Mōsese ʻa e fili totonú?

⁶ Ko e tui ʻa Mōsesé naʻá ne tataki foki ʻene fili fekauʻaki mo e ngāué. “ʻI he tuí, ko Mōsese, ʻi heʻene tupu haké, naʻá ne fakafisi ke ui ia ko e foha ʻo e ʻofefine ʻo Feló.” (Hep. 11:24) Naʻe ʻikai fakaʻuhinga ʻa Mōsese ʻo pehē naʻe mei malava ke ne maʻu ha tuʻunga mahuʻinga ʻi he lotoʻā fakatuʻí pea tauhi leva ki he ʻOtuá ʻaki hono ngāueʻaki ʻene paʻangá mo e mafaí ke tokoniʻi hono fanga tokoua ʻIsilelí. Naʻe fakapapauʻi ʻe Mōsese ke ʻofa kia Sihova ʻaki hono lotó, moʻuí, mo e mālohí kotoa. (Teu. 6:5) Ko e fili ʻa Mōsesé naʻá ne hao ai mei he faingataʻa lahi. ʻI he fakaʻosí, naʻe ʻave ʻe he kau ʻIsilelí ʻa e lahi ʻo e ngaahi koloa ʻo ʻIsipité. (ʻEki. 12:35, 36) Naʻe ngalivale ʻa Felo pea naʻá ne melemo. (Saame 136:15) Kae fēfē ʻa Mōsese? Naʻe ngāueʻaki ia ʻe he ʻOtuá ke ne tataki ʻa e kotoa ʻo e puleʻanga ʻIsilelí ke nau hao. Naʻe lavameʻa moʻoni ʻene moʻuí.

 7. (a) Fakatatau ki he Mātiu 6:19-21, ko e hā ʻoku totonu ai ke tau palani ki ha kahaʻu taʻengatá? (e) Ko e hā ʻa e hokosia ʻoku fakahaaʻi ai ʻa e faikehekehe ʻi he palani ki ha kahaʻu fakataimí mo e palani ki ha kahaʻu taʻengatá?

⁷ Kapau ko ha sevāniti kei siʻi koe ʻa Sihova, ʻe lava fēfē ke tokoniʻi koe ʻe he tuí ke ke fili ha ngāue? Palani ki he kahaʻú. Tui ki he ngaahi talaʻofa ʻa e ʻOtuá pea “faʻoaki,” pe palani, ki ha kahaʻu taʻengata, ʻo ʻikai ko ha kahaʻu fakataimi. (Lau ʻa e Mātiu 6:19-21.) Ko ha fili eni naʻe pau ke fai ʻe Sophie, ko ha taʻahine talēniti hula. Naʻe tuʻuaki ange kiate ia ʻe he ngaahi kautaha hula ʻi he ʻIunaite Seteté ha ngaahi sikolasipi mo ha ngaahi faingamālie ngāue lelei. ʻOkú ne pehē “naʻe fakafiefia ʻaupito ke hoko ʻo fakalāngilangiʻi.” Naʻe aʻu ʻo ne pehē naʻá ne ongoʻi naʻá ne lelei ange ʻi he kau hula kehé. Ka naʻe ʻikai ke ne fiefia. Naʻe sio leva ʻa Sophie ʻi he foʻi vitiō ko e Young People Ask—What Will I Do With My Life? ʻOkú ne pehē: “Naʻá ku ʻilo naʻe ʻomai ʻe he māmaní ʻa e lavameʻa mo e fakalāngilangi mei he kau poupoú ʻo fakafetongiʻaki ʻeku lotu ʻaufuatō kia Sihová.” Ko ia naʻá ne lotu fakamātoato kia Sihova pea tuku ange leva ʻa e hulá. ʻOku anga-fēfē ʻene ongoʻi fekauʻaki mo ʻene filí? “ʻOku ʻikai te u toe fakaʻamua ʻeku moʻui ki muʻá. ʻI he ʻahó ni, ʻoku ou fiefia pēseti ʻe 100. ʻOku ou tāimuʻa mo hoku husepānití. ʻOku ʻikai te ma ʻiloa, pea ʻoku siʻisiʻi ʻaupito ʻema meʻa fakamatelié. Ka ʻokú ma maʻu ʻa Sihova, ko e kau ako Tohi Tapu, mo e ngaahi taumuʻa fakalaumālie. ʻOku ʻikai haʻaku fakaʻiseʻisa ʻe taha.”

 8. Ko e hā ʻa e akonaki Fakatohitapu ʻe lava ke ne tokoniʻi ha tokotaha kei siʻi ke ne fili ʻa e meʻa ke fai ʻaki ʻene moʻuí?

 ⁸ ʻOku ʻiloʻi ʻe Sihova ʻa e lelei taha maʻaú. Naʻe pehē ʻe Mōsese: “Ko e ha fua ʻa e meʻa ʻoku tangi ki ai ʻe Sihova ko ho ʻOtua meiate koe? ʻaʻeni pe, ke ʻapasia ki he ʻEiki ko ho ʻOtua, ke fou ʻi hono ngaahi hala, pea ke ʻofa kiate ia, pea ke tauhi kia Sihova ko ho ʻOtua ʻaki ʻa e kotoa ʻo ho loto mo e kotoa ʻo ho laumalie, ke tauhi ʻene ngaahi tuʻutuʻuni mo ʻene ngaahi fekau, ʻa ia ʻoku ou fokotuʻu atu he ʻaho ni maʻao lelei.” (Teu. 10:12, 13) Lolotonga hoʻo kei siʻí, fili ha ngāue te ne ʻai koe ke ke malava ai ke tauhi pea ʻofa kia Sihova “ʻaki ʻa e kotoa ʻo ho loto mo e kotoa ʻo ho laumalie.” ʻE lava ke ke falala-pau ko ha fili pehē ʻe hoko ia ko e “lelei” maʻau.

 9. Fakamatalaʻi ʻa e ʻuhinga naʻe faingataʻa nai ai kia Mōsese ke fakahoko ʻene ngāué.

⁹ Naʻe lau ʻe Mōsese “ʻa e lumaʻi ʻo e Kalaisí ko e ngaahi koloa ia ʻoku lahi ange ia ʻi he ngaahi koloa ʻo ʻIsipité.” (Hep. 11:26) ʻI he potu folofola ko ení, ʻoku lave ai kia Mōsese ko e “Kalaisí,” pe “Tokotaha Pani.” ʻOku ʻuhinga ení naʻe fili ia ʻe Sihova ke ne tataki atu ʻa ʻIsileli mei ʻIsipite. Naʻe ʻilo ʻe Mōsese ko hono fai ení ʻe faingataʻa. Naʻe aʻu ʻo ne fehangahangai mo e “lumaʻi,” ʻa ia, ko e fakafepaki. Ki muʻa ange, ko e taha ʻo e kau ʻIsilelí naʻá ne manukiʻi ʻa Mōsese ʻaki ʻene pehē: “Ko hai naʻa ne fakanofo koe ko e ʻeiki mo e fakamāu kiate kimautolu?” (ʻEki. 2:13, 14) Ki mui ai, naʻe ʻeke tonu ʻe Mōsese kia Sihova: “Pea fefe ʻa e tokanga ʻa Felo kiate au?” (ʻEki. 6:12) Ke mateuteu ki he fakafepakí, naʻe lotu ʻa Mōsese kia Sihova fekauʻaki mo ʻene ngaahi manavaheé mo e ngaahi hohaʻá. Naʻe anga-fēfē hono tokoniʻi ʻe Sihova ʻa Mōsese ke ne lavameʻa ʻi heʻene ngāue faingataʻá?

10. Naʻe anga-fēfē hono ʻoange ʻe Sihova kia Mōsese ʻa e meʻa naʻá ne fiemaʻú ke fakahokoʻaki ʻene ngāué?

¹⁰ ʻUluakí, naʻe talaʻofa ʻe Sihova kia Mōsese: “Te u ʻiate koe.” (ʻEki. 3:12) Uá, naʻe ʻoange ʻe Sihova kiate ia ʻa e ʻamanaki mo e fakalototoʻa ʻaki hono fakamatalaʻi ha ʻuhinga ʻe taha Hono huafá tonu: “KO AU KO AU AI PE.” a (ʻEki. 3:14) Tolú, naʻá ne ʻoange kia Mōsese ʻa e mālohi ke fai ʻa e ngaahi mana, pea naʻe fakamoʻoniʻi heni ko Mōsesé naʻe fekauʻi moʻoni atu ʻe he ʻOtuá. (ʻEki. 4:2-5) Faá, naʻe fili ʻe Sihova ʻa ʻĒlone ke ne lea maʻa Mōsese pea tokoniʻi ia ke fakahoko ʻene ngāué. (ʻEki. 4:14-16) ʻI he ngataʻanga ʻene moʻuí, naʻe fakapapauʻi moʻoni ʻe Mōsese ʻoku tokoniʻi ʻe he ʻOtuá ʻEne kau sevānití ke nau fakahoko ha ngāue pē ʻokú Ne ʻoange kia kinautolu. Naʻe mātuʻaki falala-pau ʻa Mōsese kia Sihova ʻo ne malava ke ne tala kia Siosiua: “Ko Sihova ko ia ia ʻoku haʻele muʻomuʻa ʻiate koe; te ne ʻiate koe ʻe ia, ʻe ʻikai te ne fakatukuhāusiaʻi koe, ʻumaʻa haʻane liʻaki: ʻoua ʻe manavahe, pea ʻoua ʻe lotosiʻi.”—Teu. 31:8.

11. Ko e hā naʻe fakamahuʻingaʻi ai ʻe Mōsese ʻene ngāué?

¹¹ ʻI he poupou ʻa Sihová, naʻe fakamahuʻingaʻi ai ʻe Mōsese ʻene ngāue faingataʻá ʻo lahi ange ia ʻi he “ngaahi koloa ʻo ʻIsipité.” ʻOku ʻikai ha meʻa ia ʻe tatau mo e tauhi ki he ʻOtua aoniú. Ko e hā ʻa e mahuʻinga ʻo e hoko ko ha pilinisi ʻi ʻIsipite ʻo fakahoa ki hono fili ʻe Sihova ke tataki ʻa ʻIsilelí? Naʻe fakapaleʻi ʻa Mōsese ʻi hono maʻu ʻa e fakakaukau totonú. Naʻá ne maʻu ha vahaʻangatae vāofi mo Sihova, ʻa ia naʻá ne ʻoange kiate ia ha “fuʻu fakangeingei” pe mālohi ke tataki ʻa e kau ʻIsilelí ki he Fonua ʻo e Talaʻofá.—Teu. 34:10-12.

12. Ko e hā ʻa e ngaahi monū kuo ʻomai ʻe Sihova kia kitautolú?

¹² ʻOku tau maʻu foki ha ngāue. Kuo vaheʻi mai ʻe Sihova kia kitautolu “ha ngāue,” ʻo hangē ko ia naʻá ne vaheʻi ki he ʻapositolo ko Paulá mo e niʻihi kehé. (Lau ʻa e 1 Tīmote 1:12-14.) Ko kitautolu kotoa ʻoku tau maʻu ʻa e monū ke malangaʻi ʻa e ongoongo leleí. (Māt. 24:14; 28:19, 20) ʻOku ngāue ʻa e niʻihi ko e kau faifekau taimi-kakato. Ko e fanga tokoua ʻosi papitaiso matuʻotuʻá ʻoku nau ngāue maʻá e niʻihi kehé ʻi he fakatahaʻangá ko e kau sevāniti fakafaifekau mo e kau mātuʻa. Kae kehe, ko ho  fāmili taʻetuí mo e niʻihi kehé te nau fehuʻia nai ʻa e mahuʻinga ʻo e ngaahi monū ʻokú ke maʻú. ʻOku aʻu nai ʻo nau fakaangaʻi koe koeʻuhí ko e ngaahi feilaulau ʻokú ke fai maʻa Sihová. (Māt. 10:34-37) Kapau te nau fakalotosiʻiʻi koe, ʻe lava ke ke kamata fakakaukau ko e ngaahi feilaulau ko ení ʻoku ʻikai ke ʻaonga pe ʻikai lava ke ke fakahoko hoʻo ngāué. Kapau ʻe hoko ia kiate koe, ʻe anga-fēfē hono tokoniʻi koe ʻe he tuí ke ke kātakí?

13. ʻOku anga-fēfē hono tokoniʻi ʻe Sihova kitautolu ke fakahoko ʻa e ngaahi ngāue ʻokú ne ʻomai kia kitautolú?

¹³ Kōlenga kia Sihova ki heʻene poupoú, ʻo maʻu ʻa e tui te ne tokoniʻi koe. Tala kiate ia hoʻo ngaahi manavaheé mo e ngaahi hohaʻá. Hiliō he meʻa kotoa, ko Sihova naʻá ne ʻoatu kiate koe ʻa e ngāue ko ení, pea ʻe lava ke ke fakapapauʻi te ne tokoniʻi koe ke lavameʻa. Anga-fēfē? ʻI he ngaahi founga tatau naʻá ne tokoniʻi ai ʻa Mōsesé. ʻUluakí, ʻoku talaʻofa ʻe Sihova: “Te u poupou koe ʻe au; ʻio, te u tokoni kiate koe; ʻio, te u pukepuke koe ʻaki ʻa e toʻomataʻu o ʻeku faitotonu.” (ʻAi. 41:10) Uá, ʻokú ne fakamanatu atu kiate koe te ke lava ʻo falala ki heʻene ngaahi talaʻofá: “Te u lea pe, ka ʻoku ʻou fakahoko foki; naʻa ku teu, pea u fai foki.” (ʻAi. 46:11) Tolú, ʻoku ʻoatu kiate koe ʻe Sihova “ʻa e mālohi ʻoku mahulu atu ia ʻi he tuʻunga anga-mahení” ke ke lavameʻa ʻi hoʻo ngāué. (2 Kol. 4:7) Faá, ke tokoniʻi koe ke ke kātaki ʻi hoʻo ngāué, ʻoku ʻoatu kiate koe ʻe heʻetau Tamai ʻofá ha fetokouaʻaki ʻi māmani lahi ʻo e kau lotu moʻoni ʻoku nau “hanganaki fefakalototoʻaʻaki mo felangahakeʻaki.” (1 Tes. 5:11) ʻI he taimi ʻoku ʻoatu ai kiate koe ʻe Sihova ʻa e meʻa ʻokú ke fiemaʻu ke lavameʻa ai ʻi hoʻo ngaahi ngāué, ʻe hoko ai ʻo mālohi ange hoʻo tuí. Ko hono olá, te ke fakamahuʻingaʻi ai ʻa e ngaahi ngāue ʻokú ke maʻú ʻo lahi ange ʻi ha meʻa pē ʻoku lava ke tuʻuaki atu ʻe he māmaní.

14. Ko e hā naʻe fakapapauʻi ai ʻe Mōsese ʻe fakapaleʻi iá?

¹⁴ Ko Mōsesé naʻá ne “sio fakamamaʻu atu ki hono maʻu ʻo e palé.” (Hep. 11:26) Neongo naʻe lahi ʻa e ngaahi fakaikiiki fekauʻaki mo e kahaʻú ʻa ia naʻe ʻikai ʻilo ki ai ʻa Mōsese, naʻá ne fakaʻatā ʻa e kiʻi ʻilo naʻá ne maʻú ke tataki ʻene ngaahi filí. Hangē ko ʻene kui ko ʻĒpalahamé, naʻe falala-pau ʻa Mōsese ʻe lava ʻe Sihova ke fokotuʻu hake ʻa e kau maté. (Luke 20:37, 38; Hep. 11:17-19) Ko ʻene falala-pau ki he ngaahi talaʻofa ʻa e ʻOtuá naʻe tokoniʻi ai ʻa Mōsese ke ʻoua te ne ongoʻi ko e taʻu ʻe 40 ʻo ʻene hoko ko e tokotaha hola holó mo e taʻu ʻe 40 ʻo ʻene ʻi he toafá ko ha moʻui taʻeʻaonga ia. Neongo naʻe ʻikai te ne ʻiloʻi ʻa e founga tofu pē ʻe fakahoko ai ʻe Sihova ʻa e kotoa ʻo ʻEne ngaahi talaʻofá, naʻá ne maʻu ʻa e tui lahi ʻaupito kia Sihova ʻo hangē ia naʻe malava ʻa Mōsese ke sio ki hono pale ʻi he kahaʻú.

15, 16. (a) Ko e hā ʻoku fiemaʻu ai ke tau tokangataha ki hotau palé? (e) Ko e hā ʻa e ngaahi tāpuaki ʻokú ke fakatuʻotuʻa atu ki ai ʻi he malumalu ʻo e pule ʻa e Puleʻanga ʻo e ʻOtuá?

 ¹⁵ ʻOkú ke “sio fakamamaʻu atu” ki ho palé? Hangē ko Mōsesé, ʻoku teʻeki ai pē ke tau ʻiloʻi pau ʻa e founga ʻe hoko moʻoni ai ʻa e ngaahi talaʻofa ʻa e ʻOtuá. Ko e fakatātaá, ʻoku ʻikai ke tau “ʻilo pe ko fē ʻa e taimi kuo kotofá” ki he mamahi lahí. (Mk. 13:32, 33) Neongo ʻoku ʻikai ke tau ʻiloʻi ʻa e meʻa kotoa pē, ʻoku tau ʻilo lahi ange fekauʻaki mo e Palataisi ʻi he kahaʻú ʻi he meʻa naʻe ʻilo ʻe Mōsesé. Kuo ʻomai ʻe Sihova ʻa e ngaahi talaʻofa feʻunga fekauʻaki mo e faʻahinga moʻui ʻi he malumalu ʻo e pule hono Puleʻangá ʻa ia ʻe lava ke tau sio “fakamamaʻu atu” ki ai, ʻa ia, ko e lava ke tau ʻai ki hotau ʻatamaí ha fakatātā mahino ʻo e māmani foʻoú. Kapau te tau maʻu ʻa e fakatātā mahino ko ení, te tau loto moʻoni ke fuofua kumi ki he Puleʻangá. Ko e hā hono ʻuhingá? Fakakaukau ki he meʻá ni: Te ke fakatau ha meʻalele kapau naʻe siʻisiʻi ʻaupito hoʻo ʻilo fekauʻaki mo iá? ʻIkai ʻaupito! ʻI he founga tatau, ʻe ʻikai ke tau ngāueʻaki ai ʻetau moʻuí ke tuli ki ha ʻamanaki ʻoku ʻikai ke moʻoni kia kitautolu. Ko ʻetau tuí ʻoku totonu ke ne tokoniʻi kitautolu ke tau sio ki ha fakatātā mahino mo pau fekauʻaki mo ʻetau moʻui ʻi he malumalu ʻo e pule ʻa e Puleʻangá.

¹⁶ Ke maʻu ʻi ho ʻatamaí ha fakatātā mahino fekauʻaki mo e Puleʻanga ʻo e ʻOtuá, sio “fakamamaʻu atu,” ʻa ia, ko e sioloto atu ki hoʻo moʻui ʻi he Palataisí. Ko e fakatātaá, ʻi he taimi ʻokú ke ako ai ʻa e moʻui ʻa e faʻahinga ʻi he Tohi Tapú ʻa ia naʻa nau moʻui ki muʻa ʻia Sīsuú, fakakaukau fekauʻaki mo e meʻa te ke ʻeke nai kia kinautolu ʻi he taimi te nau toetuʻu mai aí. Sioloto atu ki he meʻa te nau ʻeke atu nai kiate koe fekauʻaki mo hoʻo moʻui ʻi he lolotonga ʻo e ngaahi ʻaho fakaʻosí. Sioloto atu ki hoʻo fiefia ke feʻiloaki mo ho ngaahi kāinga mei he taʻu ʻe lauingeau kuohilí pea akoʻi kia kinautolu ʻa e meʻa kotoa kuo fai ʻe he ʻOtuá maʻa kinautolú. Sioloto atu ki hoʻo fiefia ʻi hoʻo ako fekauʻaki mo e fanga manu fekai tokolahi ʻi hoʻo vakai atu kia kinautolu ʻi ha māmani melino. Fakalaulauloto ki he ofi ange hoʻo ongoʻi kia Sihová ʻi hoʻo faai atu ʻo haohaoá.

17. ʻE lava fēfē ke hanga ʻe ha fakatātā mahino fekauʻaki mo hotau pale ʻi he kahaʻú ʻo tokoniʻi kitautolu he ʻahó ni?

¹⁷ Ko hono maʻu ha fakatātā mahino ʻi hotau ʻatamaí fekauʻaki mo hotau pale ʻi he kahaʻú ʻoku tokoniʻi ai kitautolu ke tau kātaki, ke maʻu ʻa e fiefia, pea fai ha ngaahi fili. Naʻe tohi ʻa Paula ki he kau Kalisitiane paní: “Kapau ʻoku tau ʻamanaki ki he meʻa ʻoku ʻikai ke tau sio ki aí, ʻoku tau hanganaki tatali vēkeveke atu ki ai fakataha mo e kātaki.” (Loma 8:25) Ka ʻoku ʻikai ke ngāueʻaki pē eni ki he kau paní. ʻOku ngāueʻaki ia ki he kau Kalisitiane kotoa ʻoku nau maʻu ʻa e ʻamanaki ʻo e moʻui taʻengatá. Neongo ʻoku teʻeki ai ke tau maʻu hotau palé, ʻoku mātuʻaki mālohi ʻetau tuí ʻo tau hanganaki tatali anga-kātaki atu ai ki hono “maʻu ʻa e palé.” Hangē ko Mōsesé, ʻoku ʻikai te tau ongoʻi ko e ngaahi taʻu ʻoku tau fakamoleki ʻi he ngāue kia Sihová ko ha fakamole taimi. ʻI hono kehé, ʻoku tau fakapapauʻi ko e “ngaahi meʻa ʻoku hā maí ʻoku fakataimi pē, ka ko e ngaahi meʻa ʻoku taʻehāmaí ʻoku taʻengata.”—Lau ʻa e 2 Kolinitō 4:16-18.

18, 19. (a) Ko e hā kuo pau ai ke tau faitau ke ʻai ke mālohi ʻetau tuí? (e) Ko e hā te tau lāulea ki ai ʻi he kupu hoko maí?

¹⁸ ʻOku fakaʻatā kitautolu ʻe he tuí ke tau sio ki he “fakahāhā hā mahino ʻo e ngaahi meʻa moʻoni ʻoku ʻikai mātā.” (Hep. 11:1) Ko ha tokotaha fakakakano ʻoku ʻikai te ne maʻu ʻa e mata ʻo e tuí, ko ia ʻoku ʻikai te ne mahinoʻi ʻa e mahuʻinga ʻo e ngāue kia Sihová. Ko e monū ko ení ko e “koto vale” ia ki ha tokotaha pehē. (1 Kol. 2:14) ʻOku tau ʻamanaki ke moʻui taʻengata pea sio ʻi he toetuʻú, ʻa e meʻa ʻoku ʻikai pē malava ʻa e kakai ʻi he māmani ko ení ʻo sioloto atu ki aí. Hangē ko e kakai tangata ʻe niʻihi ʻi he ʻaho ʻo Paulá ʻa ia naʻa nau ui ia ko ha ‘siana valelau noaʻia’ taʻeʻilo, ʻoku fakakaukau ʻa e kakai tokolahi he ʻahó ni ko e ʻamanaki ʻoku tau malangaʻí ʻoku mātuʻaki taʻeʻaonga.—Ngā. 17:18.

¹⁹ Koeʻuhí ʻoku ʻātakaiʻi kitautolu ʻe ha māmani ʻoku ʻikai ʻi ai ha tui, kuo pau ke tau faitau ke ʻai ke mālohi ʻetau tuí. Kōlenga kia Sihova “ke ʻoua naʻa ʻosi hoʻo tuí.” (Luke 22:32) Hangē ko Mōsesé, ʻai ke māʻalaʻala ʻi he ʻatamaí ʻa e ngaahi nunuʻa ʻo e angahalá, ko e monū ʻo e ngāue kia Sihová, mo e ʻamanaki ʻo e moʻui taʻengatá. Ko e kotoa ia ʻo e meʻa ʻoku tau ako mei he faʻifaʻitakiʻanga ʻa Mōsesé? ʻIkai. ʻI he kupu hoko maí, te tau lāulea ai ki he anga hono tokoniʻi ʻe he tuí ʻa Mōsese ke ne sio ki he “Tokotaha ʻa ia ʻoku taʻehāmaí.”—Hep. 11:27.