1. ʻOku mahuʻinga ʻa e founga ʻo ʻetau fakafeangai ki he kakaí ʻi he taimi ʻoku tau talanoa ai kiate kinautolú? ʻOmai ha fakatātā. (Sio ki he ʻuluaki fakatātā ʻi he kupú ni.)

 NAʻE malanga ha ongo meʻa mali ʻi Fisi, ʻo fakaafeʻi ʻa e kakaí ki he Fakamanatu ʻo e pekia ʻa Kalaisí. Naʻá na talanoa ki ha fefine ʻi tuʻa ʻi hono ʻapí ʻi he taimi naʻe kamata ai ke ʻuhá. Naʻe ʻoange ʻe he tokouá mo hono uaifí ki he fefiné ha taha ʻo hona fakamalú ke ne ngāueʻaki. Naʻe maongo moʻoni ki he fefiné pea naʻá ne fili ke maʻu ʻa e Fakamanatú. Naʻá ne pehē ki mui ai naʻe ʻikai ke ne loko manatuʻi ʻa e meʻa naʻe tala ange ʻe he ongo meʻá, ka naʻá ne manatuʻi ʻa e founga anga-ʻofa ʻo ʻena fakafeangai angé. Naʻe muimui ʻa e ongo meʻá ki he meʻa ʻoku faʻa ui ko e Lao Koulá.

 2. Ko e hā ʻa e Lao Koula, pea ʻe lava fēfē ke tau muimui ai?

² Ko e hā ʻa e Lao Koula? Ko e akonaki ia naʻe fai ʻe Sīsū ʻi he taimi naʻá ne pehē ai: “Ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu.” (Māt. 7:12) ʻE lava fēfē ke tau fai ia? ʻUluakí, ʻeke hifo kiate koe, ‘Kapau ko au ʻa e tokotaha ʻe tahá, te u loto ke fēfē ʻa e fakafeangai mai kiate aú?’ Uá, fai ho lelei tahá ke fakafeangai pehē ki he tokotaha ʻe tahá.—1 Kol. 10:24.

3, 4. (a) Fakamatala ki he ʻuhinga ʻoku ngāueʻaki ai ʻa e Lao Koulá ki he founga ʻo ʻetau fakafeangai ki he tokotaha kotoa. (e) Ko e hā te tau lāulea ki ai ʻi he kupu ko ení?

 ³ Naʻe pehē ʻe Sīsū ʻoku totonu ke tau muimui ʻi he Lao Koulá ʻi he fakafeangai pē mo e faʻahinga ʻi he fakatahaʻangá? ʻIkai, naʻá ne lea fekauʻaki mo e founga ʻoku totonu ke tau fakafeangai ai ki he tokotaha kotoa, ʻo kau ai hotau ngaahi filí. (Lau ʻa e Luke 6:27, 28, 31, 35.) Ko ia ʻoku toe mātuʻaki mahuʻinga ke muimui ʻi he laó ʻi he taimi ʻoku tau malanga ai ki he kakaí, koeʻuhí ko e tokolahi ʻo kinautolu te nau tali lelei nai ʻa e ongoongo leleí pea maʻu ʻa e “moʻui taʻengatá”!—Ngā. 13:48.

⁴ Te tau lāulea he taimí ni ki he fehuʻi ʻe fā ke manatuʻi ʻi he taimi ʻoku tau ʻi he ngāue fakafaifekaú ai. Ko hai ʻa e tokotaha ʻoku ou talanoa ki aí? Ko fē feituʻu ʻoku ou talanoa ai ki he kakaí? Ko fē taimi lelei taha ke talanoa ai kia kinautolú? ʻOku totonu ke fēfē ʻa e founga ʻeku talanoa kiate kinautolú? Hangē ko ia te tau sio ki aí, ko e ngaahi fehuʻi ko ení ʻe lava ke ne tokoniʻi kitautolu ke mahinoʻi ʻa e founga ʻoku saiʻia ai ʻa e kakaí ke fakafeangai angé. Pea te tau ʻiloʻi leva ʻa e founga lelei taha ke talanoa ai ki he tokotaha taki taha.—1 Kol. 9:19-23.

 5. Ko e hā ʻa e ngaahi fehuʻi ʻe lava ke tau ʻeke hifo kiate kitautolú?

⁵ ʻOku tau fetaulaki ʻi heʻetau ngāue fakafaifekaú mo e faʻahinga tāutaha pea ʻoku ʻi ai hono puipuituʻa mo ʻene ngaahi palopalema. (2 Kal. 6:29) ʻI he taimi ʻokú ke talanoa ai ki ha taha, ʻeke hifo kiate koe: ‘Kapau ko au ʻa e tokotaha ʻe tahá, te u loto ke fēfē ʻa e fakafeangai mai kiate aú? Te u loto ke fakavave ha tokotaha ki ha ngaahi fakamulituku fekauʻaki mo au pe fakamāuʻi au ki muʻa ke ne ʻiloʻi aú? Pe te u loto ke ne hoko ʻo ʻiloʻi au ko ha tokotaha?’ Ko e ngaahi fehuʻi ko ení ʻe lava ke ne tokoniʻi kitautolu ke muimui ʻi he Lao Koulá pea fakafeangai ki he tokotaha taki taha ʻi he tuʻunga taautaha.

6, 7. Ko e hā ʻoku totonu ke tau faí kapau ʻoku hā ngali ʻita pe anga-kovi ha taha ʻoku tau fetaulaki mo ia ʻi he ngāue fakafaifekaú?

⁶ Ko e fakatātaá, ʻoku fai ʻe he kau Kalisitiané honau lelei tahá ke ngāueʻaki ʻa e akonaki ʻa e Tohi Tapú ke lea maʻu pē ʻi ha founga anga-ʻofa mo anga-fakaʻapaʻapa. (Kol. 4:6) Ka ʻoku tau taʻehaohaoa. Mahalo ʻoku tau hokosia ha ʻaho kovi pea tau leaʻaki ha meʻa te tau fakaʻiseʻisa ai ʻamui. (Sēm. 3:2) ʻI he taimi ʻoku hoko ai iá, ʻoku tau ʻamanaki ʻe mahinoʻi ʻe he tokotaha ʻe tahá ʻoku ʻikai ke tau faʻa pehē. ʻOku ʻikai ke tau loto ke ne fakamatalaʻi kitautolu ko ha tokotaha anga-kovi. Ko hono manatuʻi ení ʻoku tokoniʻi ai kitautolu ke tau mahinoʻi ko e kakai ʻoku anga-kovi mai kiate kitautolú te nau toe fakaʻiseʻisa nai ʻamui ʻi he meʻa naʻa nau tala maí.

⁷ Kapau ʻoku hā ngali ʻita pe anga-kovi atu ʻa e tokotaha ʻokú mo fetaulakí, ʻe lava ke ke feinga ke mahinoʻi ʻa e ʻuhinga ʻokú ne tōʻonga pehē aí? ʻE lava ke pehē ʻokú ne fehangahangai mo ha tenge ʻi he ngāué pe ʻi he akó? ʻOkú ne puke lahi? Ko e kakai tokolahi ʻa ia naʻa nau loto-mamahi ʻi he ʻuluaki taimi naʻa nau fetaulaki ai mo e Kau Fakamoʻoní kuo nau tali lelei ʻi he taimi ʻoku fakafeangai anga-malū mo fakaʻapaʻapa ange aí.—Pal. 15:1; 1 Pita 3:15.

 8. Ko e hā ʻoku totonu ai ke tau malangaʻi ʻa e pōpoaki ʻo e Puleʻangá ki he “ngaahi faʻahinga kakai kotoa pē”?

⁸ ʻOku tau malanga ki he faʻahinga taautaha kotoa pē. ʻI he ngaahi taʻu siʻi kuohilí, ko e ngaahi hokosia laka hake he 60 kuo pulusi ʻi he kupu hokohoko ʻi he Taua Leʻo ko e “Liliu ʻe he Tohi Tapú ʻa e Moʻuí.” Ko e ngaahi kupu ko ení ʻoku talanoa ai ki he kakai naʻa nau hoko ki muʻa ko e kau kaihaʻa, kau faʻa konā, mēmipa ʻo ha kau kengi, pe kau maʻunimā ʻe he faitoʻo kona tapu. Ko e niʻihi ko e kau politiki, kau taki lotu, pe faʻahinga naʻa nau mahuʻingaʻia pē ʻi heʻenau ngaahi ngāué. Ko e niʻihi naʻa nau ʻulungaanga taʻetaau ʻaupito. Ka ko e kotoa ʻo kinautolú naʻa nau fanongo ki he ongoongo leleí, tali ha ako Tohi Tapu, fai ha ngaahi liliu ʻi heʻenau moʻuí pea haʻu ki he moʻoní. Ko ia ʻoku ʻikai  totonu ke tau fakakaukau heʻikai ʻaupito tali ʻe he kakai pehení ʻa e pōpoaki ʻo e Puleʻangá. (Lau ʻa e 1 Kolinitō 6:9-11.) Ko e “ngaahi faʻahinga kakai kotoa pē” ʻe lava ke nau haʻu ki he moʻoní.—1 Kol. 9:22.

 9. Ko e hā ʻoku totonu ai ke tau fakahāhā ʻa e fakaʻapaʻapa ki he ʻapi ʻo e niʻihi kehé?

⁹ ʻOku tau faʻa malanga ki he kakaí ʻi he taimi ʻoku nau ʻi ʻapi aí. (Māt. 10:11-13) Ko hotau ʻapí ʻoku mahuʻinga kia kitautolu, ko ia ʻoku tau saiʻia ʻi he taimi ʻoku fakahāhā mai ai ʻe he niʻihi kehé ʻa e fakaʻapaʻapa ki hotau ʻapí mo ʻetau koloa fakafoʻituituí. ʻOku tau loto ke hoko hotau ʻapí ko ha feituʻu ʻe lava ke tau ongoʻi malu ai pea ʻikai fakahohaʻasi. ʻI he taimi ʻoku tau talanoa ai ki he kakaí, ʻoku totonu ke tau fakahāhā ʻa e fakaʻapaʻapa tatau ki honau ʻapí.—Ngā. 5:42.

10. ʻE lava fēfē ke tau fakaʻehiʻehi mei hono fakalotomamahiʻi ʻa e niʻihi kehé ʻi he taimi ʻoku tau malanga aí?

¹⁰ ʻOku tau moʻui ʻi ha māmani ʻoku fonu ʻi he faihiá, pea ko e ngaahi ʻapi lahi ʻoku nau huʻuhuʻu fekauʻaki mo e kau solá. (2 Tīm. 3:1-5) ʻOku totonu ke ʻoua te tau fai ha meʻa te ne ʻai ʻa e kakaí ke nau huʻuhuʻu fekauʻaki mo kitautolu. Ko e fakatātaá, ʻokú ke tukituki ʻi he matapā ʻi muʻa ʻo e falé. Kapau heʻikai fakaava mai ʻe ha taha, ʻe fakataueleʻi koe ke fakasiosio ʻi he luvá pe lue takai ʻi he ʻapí, ʻo kumi ki he tokotaha-ʻapí. Te ke fai nai eni koeʻuhí ʻokú ke loto ke maʻu ʻa e kakai tokolahi ʻe ala lavá ʻi he taimi ʻokú ke malanga aí. (Ngā. 10:42) ʻOkú ke loto moʻoni ke tokoniʻi ʻa e kakaí ke nau ako ʻa e moʻoni fekauʻaki mo e ʻOtuá. (Loma 1:14, 15) Ka ʻi ho feituʻu ngāué, ʻe fakalotomamahi ia ki he tokotaha-ʻapí? Ko e hā ʻe fakakaukau nai ki ai hono kaungāʻapí? ʻOku fiemaʻu ke tau fakapotopoto pea fakaʻehiʻehi mei hono fai ha meʻa ʻe fakalotomamahiʻi nai ai ʻa e kakai ʻi hotau feituʻu ngāué. Naʻe tohi ʻe he ʻapositolo ko Paulá: “ʻOku ʻikai ʻaupito te mau ʻoatu ha tūkiaʻanga ʻe taha, koeʻuhí ke ʻoua naʻa fakaangaʻi ai ʻemau ngāué.” (2 Kol. 6:3) Ko e kakai ʻi hotau feituʻu ngāué ʻe tohoakiʻi nai ki he moʻoní ʻi he taimi ʻoku tau fakahāhā ai ʻa e fakaʻapaʻapa ki honau ʻapí mo ʻenau koloá.—Lau ʻa e 1 Pita 2:12.

11. Ko e hā ʻoku tau saiʻia ai ʻi he taimi ʻoku fakaʻapaʻapaʻi ai ʻe he niʻihi kehé hotau taimí?

¹¹ Ko e tokolahi taha ʻo kitautolú ʻoku tau femoʻuekina ʻaupito. Ke fakahoko ʻa e meʻa kotoa pē, ʻoku fiemaʻu ke tau palani tokamuʻa pea fakataimitēpileʻi lelei hotau taimí. (ʻEf. 5:16; Fil. 1:10) Kapau ʻe liliu ʻe ha meʻa taʻeʻamanekina ʻetau taimi-tēpilé, te tau ongoʻi ʻita nai. Ko ia ai, ʻoku tau saiʻia ʻi he taimi ʻoku fakaʻapaʻapaʻi ai ʻe he niʻihi kehé hotau taimí pea mahinoʻi foki ʻoku ʻikai nai ke tau maʻu ha taimi lahi ke fakamoleki mo kinautolu. ʻE lava fēfē ke tokoniʻi kitautolu ʻe he Lao Koulá ke fakahāhā ʻoku tau fakaʻapaʻapaʻi ʻa e taimi ʻo e kakai kehé?

12. ʻE lava fēfē ke tau fili ʻa e taimi lelei taha ke talanoa ai ki he kakai ʻi hotau feituʻu ngāué?

¹² Ko fē taimi lelei taha ke talanoa ai ki he kakaí? ʻEke hifo kiate koe: ‘ʻI hoku feituʻu ngāué, ko fē taimi ʻoku faʻa ʻi ʻapi ai ʻa e kakaí? Ko fē taimi te nau fie fanongo aí?’ ʻE lelei ke feʻunuʻaki ʻetau taimi-tēpilé ke talanoa kia kinautolu ʻi he ngaahi taimi ko iá. ʻI he ngaahi feituʻu ʻe niʻihi ʻi he māmaní, ʻoku lelei tahá ke ʻalu mei he fale ki he falé ʻi he efiafí pe efiafi poʻulí. Kapau ʻoku pehē ia ʻi ho feituʻú, ʻe lava ke ke palani ke talanoa ki he kakaí lolotonga ʻa e taimi ko ia ʻo e ʻahó? (Lau ʻa e 1 Kolinitō 10:24.) ʻE tāpuakiʻi ʻe Sihova ha feilaulau pē ʻoku tau fai kae lava ke tau malanga ki he kakaí ʻi ha taimi ʻe lelei taha kia kinautolú.

13. ʻE lava fēfē ke tau fakahāhā ʻa e fakaʻapaʻapa ki he tokotaha-ʻapí?

¹³ ʻE lava fēfē ke tau toe fakahāhā ʻoku tau fakaʻapaʻapaʻi ʻa e tokotaha-ʻapí? ʻI he taimi ʻoku tau maʻu ai ha taha ʻoku fanongo ki heʻetau pōpoakí, ʻoku totonu ke tau fai ha fakamoʻoni lelei ka ʻoku totonu ke ʻoua te tau talanoa mo ia ʻo  fuʻu fuoloa. Kuo palani nai ʻa e tokotaha-ʻapí ke fai ha meʻa kehe ʻoku mahuʻinga kiate ia. Kapau ʻokú ne pehē ʻoku femoʻuekina, ʻe lava ke tau tala ange heʻikai te tau fuʻu fuoloa. Pea ʻoku totonu leva ke tau fai ʻa e meʻa naʻa tau tala angé pea fakanounou pē. (Māt. 5:37) ʻI he ʻosi ʻetau fetalanoaʻakí, ʻe lelei ke tau ʻeke ange pe ko fē taimi lelei taha kia kitautolu ke toe foki atu aí. ʻOku pehē ʻe he kau malanga ʻe niʻihi: “Te u saiʻia ke toe foki mai kiate koe. ʻE sai pē kapau te u tā mai pe ʻoatu ha pōpoaki ki muʻa ke u haʻú?” ʻI he taimi ʻoku tau fakaʻapaʻapaʻi ai ʻa e kakai ʻoku nau femoʻuekina mo ʻi ai ʻenau ngaahi palaní, ʻoku tau muimui ai ki he faʻifaʻitakiʻanga ʻa Paulá. Naʻe ʻikai ke ne fai ʻa e meʻa naʻe lelei taha kiate iá, ka naʻá ne fai ʻa e meʻa naʻe lelei taha ki he “tokolahí, koeʻuhi ke fakahaofi ai kinautolu.”—1 Kol. 10:33.

14-16. (a) Ko e hā ʻoku totonu ai ke tau tala mahino ki he tokotaha-ʻapí ʻa e ʻuhinga ʻo ʻetau ʻaʻahí? ʻOmai ha fakatātā. (e) Ko e hā kuo ʻiloʻi ʻe ha ʻovasia fefonongaʻaki ʻe taha ʻoku ola lelei?

¹⁴ Sioloto atu ʻoku telefoni atu ha taha kiate koe ka ʻoku ʻikai te ke ʻiloʻi ʻa e leʻo ʻo e tokotaha ʻoku tā atú. Ko ha sola ia, ka ʻokú ne ʻeke atu pe ko e hā ʻa e meʻakai ʻokú ke saiʻia aí. Te ke fifili nai pe ko hai ʻoku tā atú mo e meʻa ʻokú ne fiemaʻu moʻoní. ʻOku ʻikai te ke loto ke anga-kovi, ko ia te ke talanoa nai mo ia ʻi ha kiʻi taimi nounou, kae ngalingali te ke fakangata leva ʻa e fetalanoaʻakí. ʻI he taimí ni sioloto atu ʻoku telefoni atu ʻa e tokotaha tatau ka ʻokú ne tala atu pe ko hai ia pea ko ʻene ngāué ke tokoniʻi ʻa e kakaí ke kai ʻa e meʻakai fakatupu moʻui leleí. ʻOkú ne tala atu anga-ʻofa  kiate koe ʻokú ne maʻu ha ngaahi fakamatala ʻe tokoni nai kiate koe. Ngalingali te ke loto ke fanongo kiate ia. Ko hono moʻoní, ʻoku tau saiʻia ʻi he taimi ʻoku tala mai ai ʻe he kakaí pe ko hai kinautolu ʻi he taimi ʻoku nau lea mai ai kia kitautolú. ʻE lava fēfē ke tau fakahāhā ʻa e fakaʻapaʻapa pehē ki he kakai ʻoku tau fetaulaki mo iá?

¹⁵ ʻI he ngaahi feituʻu ngāue lahi, ʻoku totonu ke tau tala mahino ki he tokotaha-ʻapí ʻa e ʻuhinga ʻo ʻetau ʻaʻahí. Ko e moʻoni ʻoku tau maʻu ʻa e fakamatala ʻaonga ʻa ia ʻoku fiemaʻu ʻe he tokotaha-ʻapí. Kae sioloto atu ʻoku ʻikai ke tau tala ange pe ko hai kitautolu mo e ʻuhinga ʻetau ʻi aí kae kamata pē ʻetau tuʻuakí ʻaki ha fehuʻi hangē ko ení: “Kapau ʻe lava ke ke solova ha faʻahinga palopalema ʻi he māmaní, ko e hā ia?” ʻOku tau ʻeke ʻa e fehuʻí ke ʻiloʻi ʻa e fakakaukau ʻa e tokotahá kae lava ke tau ngāueʻaki ʻa e Tohi Tapú ʻi heʻetau fetalanoaʻakí. Kae kehe, ʻe fifili nai ʻa e tokotaha-ʻapí: ‘Ko hai ʻa e sola ko ení, pea ko e hā ʻokú ne ʻeke mai ai ʻa e fehuʻi ko ení? ʻOku ʻuhinga koā eni ki he hā?’ ʻOku tau loto ke fiefia ʻa e tokotaha-ʻapí ʻi he talanoa mo kitautolú. (Fil. 2:3, 4) Ko ia ʻe lava fēfē ke tau fai eni?

¹⁶ Ko e meʻa eni ʻoku fai ʻe ha ʻovasia fefonongaʻaki ʻe taha: Hili ʻa e fakafeʻiloaki ki he tokotaha-ʻapí, ʻokú ne ʻoange kiate ia ha tatau ʻo e tuleki Te Ke Fieʻilo ki he Moʻoní? pea pehē: “ʻOku mau ʻoange eni ki he tokotaha kotoa ʻi ho feituʻú he ʻahó ni. ʻOku fakamatalaʻi ai ʻa e fehuʻi ʻe ono ʻa ia ʻoku ʻeke ʻe he kakai tokolahi. Ko hoʻo tatau eni.” ʻOku pehē ʻe he tokouá ʻi he taimi ʻoku nau ʻiloʻi ai ʻa e ʻuhinga ʻo ʻene ʻaʻahi kiate kinautolú, ko e tokolahi taha ʻo e kakaí ʻoku nau hā ngali fiemālie pea ʻoku faingofua ange ke hoko atu ʻa e fetalanoaʻakí. ʻOku ʻeke leva ʻe he tokouá ki he tokotahá: “Kuo faifai ange peá ke fakakaukau fekauʻaki mo ha taha ʻo e ngaahi fehuʻí ni?” Kapau ʻe fili ʻe he tokotaha-ʻapí ha taha, ʻoku fakaava ʻe he tokouá ʻa e tulekí pea lāulea ki he meʻa ʻoku leaʻaki ʻe he Tohi Tapú fekauʻaki mo e fehuʻi ko iá. Ka ʻikai, ʻoku fili ʻe he tokouá ha fehuʻi pea hoko atu ʻa e fetalanoaʻakí ʻo ʻikai fakamaaʻi ʻa e tokotaha-ʻapí. Ko e moʻoni, ʻoku ʻi ai ʻa e ngaahi founga lahi ke kamataʻi ai ha fetalanoaʻaki. ʻI he ngaahi feituʻu ʻe niʻihi, ʻoku fiemaʻu ke tau muimui ʻi ha ngaahi anga-fakafonua pau ʻi he taimi ʻoku tau fakafeʻiloaki ai ki he kakaí ki muʻa ke tau tala ange ʻa e ʻuhinga ʻetau ʻi aí. ʻOku fiemaʻu ke tau mahinoʻi ʻoku mahuʻinga ke feʻunuʻaki ʻetau tuʻuakí kae lava ke fie fanongo mai ʻa e kakaí ki heʻetau pōpoakí.

17. Ko e hā ʻa e ngaahi founga ʻa ia ʻe lava ke tau muimui ai ʻi he Lao Koulá ʻi heʻetau malangá?

¹⁷ Ko e hā kuo tau ako ʻa ia ʻe lava ke ne tokoniʻi kitautolu ke muimui ʻi he Lao Koulá ʻi heʻetau malangá? ʻOku tau fakafeangai ki he tokotaha taki taha ʻi he tuʻunga taautaha. ʻOku tau fakahāhā ʻa e fakaʻapaʻapa ki he ʻapi mo e koloa fakafoʻituitui ʻa e tokotaha-ʻapí. ʻOku tau fai hotau lelei tahá ke malanga ʻi he taimi ʻoku ʻi ʻapi ai ʻa e kakaí pea ʻi ai nai mo ha kiʻi taimi ke fanongo mai kia kitautolu. ʻOku tau fakafeʻiloaki ʻetau pōpoakí ʻi ha founga ʻe ʻai ai ʻa e kakai ʻi hotau feituʻu ngāué ke nau fie fanongó.

18. Ko e hā ʻoku lelei ai ke fakafeangai ki he faʻahinga ʻi hotau feituʻu ngāué ʻo hangē ko e meʻa ʻoku tau loto ke fakafeangai mai ʻaki kiate kitautolú?

¹⁸ ʻI he taimi ʻoku tau fakafeangai ai ʻi ha founga anga-ʻofa ki he faʻahinga ʻi hotau feituʻu ngāué pea fakakaukau fekauʻaki mo ʻenau ongoʻí, ʻoku tau fakahaaʻi ai ʻoku tau ngāueʻaki ʻa e ngaahi tefitoʻi moʻoni Fakatohitapú, ʻa ia ʻoku ʻoatu ai ʻa e lāngilangí ki heʻetau Tamai fakahēvaní. (Māt. 5:16) Ko e kakai tokolahi ange te nau fie ako nai ʻa e moʻoní ʻi he taimi ʻoku tau fakafeangai fakaʻapaʻapa ai kiate kinautolú. (1 Tīm. 4:16) Tatau ai pē pe ko e hā ʻa e tali ʻa e kakaí ki he pōpoaki ʻo e Puleʻangá, te tau ʻiloʻi kuo tau fai hotau lelei tahá ʻi heʻetau ngāue fakafaifekaú. (2 Tīm. 4:5) Tuku ke tau faʻifaʻitaki ki he ʻapositolo ko Paulá, ʻa ia naʻá ne tohi: “ʻOku ou fai ʻa e meʻa kotoa pē maʻá e ongoongo leleí, ke u vahevahe atu ai ia ki he niʻihi kehé.” (1 Kol. 9:23) ʻOfa ke tau muimui kotoa ʻi he Lao Koulá ʻi he taimi ʻoku tau talanoa ai ki he niʻihi kehé.