ʻI ha hiva fakahīkihiki ki he Tokotaha-Fakatupú, naʻe hiva ʻa Tuʻi Tēvita ʻo ʻIsileli ʻo e kuonga muʻá: “ʻE hoku ʻOtua, ʻoku ou manako ke u fai hoʻou finangalo; pea ʻoku ʻi hoku loto fatu hoʻo lao.” (Saame 40:8) Neongo ʻa e ngaahi faingataʻa mo e ngaahi tenge naʻá ne fehangahangai mo ia ʻi he moʻuí, naʻe fiefia moʻoni ʻa Tēvita ʻi hono fai ʻa e finangalo fakaʻotuá. Ko e moʻoni, naʻe ʻikai ko Tēvita pē ʻa e tokotaha-lotu ʻa Sihova ʻa ia naʻá ne fiefia ʻi he tauhi ki he ʻOtua moʻoní.

ʻI hono ngāueʻaki ʻa e ngaahi lea ʻi he Saame 40:8 ki he Mīsaiá pe Kalaisi, naʻe tohi ʻe he ʻapositolo ko Paulá: “ʻI heʻene [Sīsū] haʻu ki he māmaní ʻokú ne pehē: ‘Ko e feilaulaú mo e foakí naʻe ʻikai te ke fiemaʻu, ka naʻá ke teuteu ha sino moʻoku. Naʻe ʻikai te ke hōifua ki he ngaahi feilaulau tutu toʻofuá mo e feilaulau angahalá.’ Peá u toki pehē, ‘Vakai! Kuó u haʻu (ʻi he takainga tohi kuo hiki fekauʻaki mo aú) ke fai ho finangaló, ʻe ʻOtua ē.’”—Hep. 10:5-7.

Lolotonga ʻene ʻi he māmaní, naʻe fiefia ʻa Sīsū ʻi he sio ki he fakatupú, feohi mo e ngaahi kaungāmeʻá pea kai mo kinautolu. (Māt. 6:26-29; Sione 2:1, 2; 12:1, 2) Ka, ko ʻene mahuʻingaʻia tefitó mo e fiefia lahi tahá ko hono fai ʻa e finangalo ʻene Tamaí. Ko hono moʻoní, naʻe pehē ʻe Sīsū: “Ko ʻeku meʻakaí ē ke u fai ʻa e finangalo ʻo ia naʻá ne fekau mai aú pea ke fakaʻosi ʻene ngāué.” (Sione 4:34; 6:38) Mei honau ʻEikí, naʻe ako ʻe he kau ākonga ʻa Sīsuú ʻa e fakapulipuli ʻo e fiefia moʻoní. ʻI he fiefia lahí, naʻa nau loto-lelei mo vēkeveke ke vahevahe ʻa e pōpoaki ʻo e Puleʻangá mo e niʻihi kehé.—Luke 10:1, 8, 9, 17.

Naʻe fekauʻi ʻe Sīsū hono kau muimuí: “Mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu ʻi he huafa ʻo e Tamaí mo e ʻAló mo e laumālie māʻoniʻoní, pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú. Pea vakai, ʻoku ou ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Māt. 28:19, 20) Ko hono fakahoko ʻa e fekau ko ení ʻoku kau ki ai ʻa e ʻaʻahi ki he kakaí ʻi ha feituʻu pē ʻe lava ke maʻu ai kinautolu, fai ha ngaahi toe ʻaʻahi ki he faʻahinga mahuʻingaʻiá pea fai ha ngaahi ako Tohi Tapu mo e faʻahinga peheé. Ko hono fai ʻa e ngāue ko ení ʻe lava ke hoko ia ko ha matavai ʻo e fiefia lahi.

 Tatau ai pē pe ʻoku mahuʻingaʻia ʻa e kakaí ʻi heʻetau pōpoakí pe ʻikai, ko ʻetau tōʻongá ʻoku kaunga tefito ia ki heʻetau maʻu ʻa e fiefia ʻi he ngāue fakafaifekaú. Ko e hā ʻoku tau hokohoko atu ai ke talaki ʻa e ongoongo leleí neongo ʻetau fetaulaki nai mo e taʻemahuʻingaʻiá? Koeʻuhí ʻoku tau ʻiloʻi ko e kau ʻi he malangaʻi ʻo e Puleʻangá mo e ngāue ngaohi ākongá ko ha fakahāhā ia ʻetau ʻofa ki he ʻOtuá mo hotau kaungāʻapí. Ko e moʻoni, ko e ngaahi moʻuí ʻoku ʻi he tuʻunga fakatuʻutāmaki—fakatouʻosi ʻetau moʻuí mo e moʻui hotau ngaahi kaungāʻapí. (ʻIsi. 3:17-21; 1 Tīm. 4:16) Tau lāulea angé ki ha ngaahi poini ʻa ia ʻe lava ke ne tokoniʻi ʻa e tokolahi hotau ngaahi kaungāngāué ke tauhi maʻu pe fakafoʻou ʻenau faivelenga ʻi he ngāue fakafaifekaú ʻi he ngaahi feituʻu ngāue faingataʻá.

Ko hono ngāueʻaki ʻa e ngaahi fehuʻi feʻungamālié ʻi heʻetau ngāue fakafaifekaú ʻoku faʻa iku ki he ngaahi ola lelei. ʻI he pongipongi ʻe taha, naʻe sio atu ʻa Amalia ki ha tangata ʻokú ne lau nusipepa ʻi ha paʻake. Naʻá ne fakaofiofi kiate ia pea ʻeke ange pe naʻá ne lau ha ongoongo lelei. ʻI heʻene tali ange ʻikaí, naʻe pehē ʻe Amalia, “ʻOku ou haʻu mo ha ongoongo lelei fekauʻaki mo e Puleʻanga ʻo e ʻOtuá.” Naʻe langaʻi heni ʻa e mahuʻingaʻia ʻa e tangatá, pea naʻá ne tali ha ako Tohi Tapu. Ko hono moʻoní, naʻe malava ʻa Amalia ke kamataʻi ha ako Tohi Tapu ʻe tolu ʻi he paʻake ko iá.

Ko Janice naʻá ne ʻai hono ʻapi ngāué ko hono feituʻu malanga. ʻI he taimi naʻe fakahāhā ai ʻe ha tokotaha leʻo mo hono kaungāngāué ʻa e mahuʻingaʻia ʻi ha kupu ʻi he Taua Leʻo, naʻe tuʻuaki ange ʻe Janice te ne ʻomai tuʻumaʻu kia kinaua ʻa e makasiní. Naʻá ne fai ʻa e meʻa tatau ki ha kaungāngāue ʻe taha, ʻa ia naʻá ne saiʻia ʻi he ngaahi kaveinga kehekehe ʻoku lāulea ki ai ʻa e Taua Leʻo mo e ʻĀ Hake! Naʻe iku atu heni ke kole ʻe he kaungāngāue ʻe taha ʻa e ngaahi makasiní. “Ko ha tāpuaki ē meia Sihova!” ko e lau ia ʻa Janice. Naʻe faai atu pē ʻo ne maʻu ha kakai ʻe toko 11 ko ʻene tukuʻanga makasini pau ʻi he ngāueʻangá.

Naʻe fokotuʻu ʻe ha ʻovasia fefonongaʻaki ʻo pehē ʻi he ngāue fakafaifekau fale-ki-he-falé, ko e kau malangá ʻoku totonu ke ʻoua te nau fakaʻosi ʻenau fetalanoaʻaki mo ha tokotaha-ʻapi ʻaki ʻenau tala ange pē te nau toki haʻu ʻi ha ʻaho kehe. Ka, ʻe lava ke nau ʻeke ange ki he tokotahá: “Te ke saiʻia ke u fakahaaʻi atu ʻa e founga hono fai ha ako Tohi Tapu?” pe, “Ko fē ʻa e ʻaho mo e taimi te ke saiʻia ke u toe foki mai ai ke hoko atu ʻeta talanoá?” Naʻe pehē ʻe he ʻovasia fefonongaʻakí ʻi hono ngāueʻaki ʻa e founga ko ení, ko e fanga tokoua mo e fanga tuofāfine ʻi he fakatahaʻanga ʻe taha naʻá ne ngāue ai naʻa nau kamataʻi ha ako Tohi Tapu ʻi ʻapi ʻe 44 ʻi he uike ʻe taha.

Ko hono fai leva ʻo e ngaahi toe ʻaʻahí—naʻa mo ha ngaahi ʻaho siʻi mei he ʻuluaki ʻaʻahí—ʻe lava ke ola lelei. Ko e hā hono ʻuhingá? Koeʻuhí ʻi he fai peheé ʻoku fakahaaʻi ai ʻoku tau mahuʻingaʻia moʻoni ʻi hono tokoniʻi ʻa e faʻahinga loto-totonú ke mahinoʻi ʻa e Tohi Tapú. ʻI hono ʻeke ange ki ha fefine ʻa e ʻuhinga naʻá ne tali ai ha ako Tohi Tapu mo e Kau  Fakamoʻoni ʻa Sihová, naʻá ne pehē, “Naʻá ku kamata ako koeʻuhí naʻa nau fakahaaʻi mai kiate au ʻa e mahuʻingaʻia mo e ʻofa moʻoni.”

ʻI loto ʻi ha vahaʻa taimi hili hono maʻu ʻa e Ako Ngāue Tāimuʻá, naʻe fai ʻe Madaí ha ako Tohi Tapu ʻe 15 pea tuku ʻa e toe ako ʻe 5 ki he kau malanga kehé. Ko e niʻihi ʻene kau ako Tohi Tapú naʻe kamata ke nau maʻu tuʻumaʻu ʻetau ngaahi fakatahá. Ko e hā naʻá ne tokoniʻi ʻa Madaí ke kamataʻi ʻa e ngaahi ako lahi peheé? Naʻe fakamanatu ʻe he akó kiate ia ʻa e fiemaʻu ke hokohoko atu ʻene toe fokí kae ʻoua ke ne maʻu ʻa e faʻahinga naʻa nau tomuʻa fakahāhā ʻa e mahuʻingaʻiá. ʻOku pehē ʻe ha Fakamoʻoni ʻe taha ʻa ia kuó ne tokoniʻi ʻa e tokolahi ke ako ʻa e moʻoni ʻo e Tohi Tapú, “Kuó u ako ko e kītaki ʻi hono fai ʻa e ngaahi toe ʻaʻahí ʻa e kī ki hono tokoniʻi ʻa e kakai ʻoku nau loto ke ʻiloʻi ʻa Sihová.”

Ko hono fai ʻa e ngaahi toe ʻaʻahí mo e ngaahi ako Tohi Tapú ʻoku fiemaʻu ʻa e feinga tōtōivi. Kae kehe, ko e ngaahi palé ʻoku laka mamaʻo ia ʻi he ngaahi feinga ʻoku fiemaʻú. ʻI heʻetau tokangataha ki he ngāue fakafaifekaú, ʻe lava ai ke tau tokoniʻi ʻa e niʻihi kehé “ke nau aʻusia ha ʻilo totonu ki he moʻoní,” pea ʻe lava ke ʻuhinga ia ko e fakamoʻui kia kinautolu. (1 Tīm. 2:3, 4) Kia kitautolu, ʻe lava ke iku atu ia ki he fiemālie mo e fiefia taʻehanotatau.