MEI HOTAU KUOHILÍ
“ʻOku Kei Toe Lahi ʻa e Ngāue Utu-Taʻu ke Faí”
Aʻu ʻa George Young ki Rio de Janeiro ʻi Maʻasi 1923
KO E taʻú ko e 1923. ʻOku fonu ʻa e holo koniseti ʻi he Drama and Music Conservatory ʻo São Paulo! ʻE lava ke ke fanongo ki he leʻo papau ʻo George Young? Mei he sētesi ki he sētesi, ko ʻene malangá ʻoku liliu ia ki he lea faka-Potukalí. Ko e kotoa ʻo e toko 585 ʻoku ʻi aí ʻoku nau fanongo tokanga. Ko e ngaahi konga Tohi Tapu faka-Potukalí ʻoku huluʻi ia ʻi ha lā. Ko hono fakaʻosí, ko ha tatau ʻe teau ʻo e kiʻi tohi Millions Now Living Will Never Die! ʻoku tufaki ia ʻi he lea faka-Potukali, faka-Pilitānia, faka-Siamane mo faka-ʻĪtali. ʻOku ola lelei ʻa e malangá! ʻOku ongona atu ʻa e malangá. ʻI he efiafi ʻe ua mei ai, ʻoku toe fonu ʻa e holó ki ha toe malanga ʻe taha. Ka ko e hā naʻe taki atu ki he ngaahi meʻa ko ení?
ʻI he 1867, naʻe hiki ʻa Sarah Bellona Ferguson mo hono fāmilí mei he ʻIunaite Seteté ki Pelēsila. ʻI he 1899, naʻe ʻiloʻi ʻe Sarah naʻá ne maʻu ʻa e moʻoní hili ʻene lau ha ʻū tohi Fakatohitapu naʻe ʻomai ʻe hono tuongaʻane siʻisiʻí ki Pelēsila mei he ʻIunaite Seteté. ʻI he tuʻunga ko ha tokotaha manako lautohí, naʻá ne tukuhau ki he Taua Leʻo faka-Pilitāniá. ʻI he fiefia lahi ʻi he pōpoaki ʻo e Tohi Tapú, naʻá ne tohi kia Tokoua C. T. Russell, ʻo fakamatalaʻi ia tonu ko ha “fakamoʻoni ia ʻoku ʻikai ha taha ʻe fuʻu mamaʻo ke aʻu ki ai.”
Can the Living Talk With the Dead? (Faka-Potukali)
Naʻe fai ʻe Sarah Ferguson hono lelei tahá ke vahevahe ʻa e moʻoni ʻo e Tohi Tapú mo e niʻihi kehé, ka naʻá ne faʻa fifili pe ko hai te ne tokoniʻi lahi ange ia mo hono fāmilí, pehē foki ki he kotoa ʻo e kakai lelei ʻo Pelēsilá. ʻI he 1912, naʻe fakahā kiate ia mei he Pēteli ʻi Brooklyn ʻe ʻalu atu ha taha ki São Paulo mo ha ngaahi tuleki ʻe laui afe naʻe fakakaveinga ko e Where Are the Dead? ʻi he lea faka-Potukalí. ʻI he 1915, naʻá ne pehē naʻe fakaʻohovale maʻu pē kiate ia ʻa e tokolahi ʻo e Kau Ako Tohi Tapú naʻa nau ʻamanekina ʻe vave ke ʻohake kinautolu ki hēvani. ʻI hono fakahaaʻi ʻene fakakaukaú, naʻá ne tohi: “Kae fēfē ʻa Pelēsila mo e kotoa ʻo ʻAmelika Tongá? . . . ʻI he taimi ʻokú ke fakakaukau atu ai ki he fuʻu konga lahi ʻaupito ʻo e māmaní ʻa ʻAmelika Tonga, ʻe faingofua ke sio ʻoku toe lahi ʻa e ngāue utu-taʻu ke faí.” ʻIo, ko e ngāue utu-taʻu lahi ʻaupito ʻe fakahokó!
ʻI he 1920 nai, ko e kau kauvaka kei talavou Pelēsila ʻe toko valu naʻa nau maʻu ʻa e ngaahi fakataha ʻe niʻihi ʻa e fakatahaʻangá ʻi he Kolo Niu ʻIoké lolotonga hono fakaleleiʻi honau vaka taú. ʻI he foki ki Rio de Janeiro, naʻa nau vahevahe ʻenau ʻamanaki Fakatohitapu naʻa nau toki akó ki he niʻihi kehé. ʻIkai fuoloa mei ai, ʻi Maʻasi 1923, ko George Young, ko ha pilikimi, pe ʻovasia fefonongaʻaki, naʻá ne aʻu ki Rio de Janeiro, ʻa ia naʻá ne maʻu ai ha faʻahinga mahuʻingaʻia. Naʻá ne fokotuʻutuʻu ke liliu ha ʻū tohi ʻe niʻihi ki he lea faka-Potukalí. Naʻe vave ʻa e fononga ʻa Tokoua Young ki São Paulo, pea ki ha kolo naʻe nofo ai ʻa e toko 600,000 nai. ʻI aí naʻá ne fai ai ha malanga pea tufaki ai mo e fanga kiʻi tohi Millions, ʻo hangē ko ia naʻe lave ki ai ʻi he kamataʻanga ʻo e kupu ko ení. “ʻI heʻeku tokotahá,” ko ʻene fakamatalá ia, “Naʻá ku fakafalala kakato ki he tuʻuaki ʻi he nusipepá.” Ko e “ʻuluaki ngaahi malanga eni maʻá e kakaí naʻe tuʻuaki atu ʻi hono fakaʻatā ʻe he I.B.S.A. ʻi Pelēsilá.” a
Naʻe huluʻi ʻi ha lā ʻa e ngaahi konga Tohi Tapú lolotonga ʻa e malanga ʻa Tokoua Young
ʻI ha līpooti ʻi Pelēsila, naʻe pehē ʻi he Watch Tower ʻo Tīsema 15, 1923: “ʻI heʻemau fakakaukau atu ko e ngāue ʻi aí naʻe kamata ʻi Sune 1 pea teʻeki maʻu ha ʻū tohi ʻi he taimi ko iá, ʻoku fakaofo ʻa e anga hono tāpuakiʻi ʻe he ʻEikí ʻa e ngāué.” Naʻe hoko atu ʻa e līpōtí ke pehē ko e malanga maʻá e kakai ʻa Tokoua Young ʻi São Paulo ko e 2 ia ʻi he malanga ʻe 21 naʻe fai mei Sune 1 ki Sepitema 30, mo e kau fanongo kotoa ʻe toko 3,600. ʻI Rio de Janeiro, ko e pōpoaki ʻo e Puleʻangá naʻe faai atu pē ʻo mafolalahia. Pea ʻi ha ngaahi māhina siʻi pē, laka hake ʻi heʻetau ʻū tohi ʻe 7,000 naʻe tufaki atu ʻi he lea faka-Potukalí! ʻIkai ko ia pē, ko e Taua Leʻo faka-Potukalí naʻe kamata ia ʻi he ʻīsiu ʻo Nōvema-Tīsema 1923.
Ko Sarah Bellona Ferguson, ʻa e ʻuluaki tukuhau ki he Taua Leʻo faka-Pilitāniá ʻi Pelēsila
Naʻe ʻaʻahi ʻa George Young kia Sarah Ferguson, pea naʻe pehē ʻe he Watch Tower: “Naʻe haʻu ʻa e tuofefiné ki he fale-talifonongá, pea naʻá ne kiʻi moʻutāfuʻua. ʻI hono puke ʻa e nima ʻo Tokoua Young, pea sio fakamamaʻu ki hono matá, faifai atu pē naʻá ne pehē: ‘Ko ha pilikimi moʻoni koe?’” Ko ia mo e niʻihi ʻene fānaú naʻe faai atu pē ʻo nau papitaiso. Ko hono moʻoní, naʻá ne tatali ʻi he taʻu ʻe 25 ke papitaiso! Ko e Watch Tower ʻo ʻAokosi 1, 1924, naʻe lave ai ko e toko 50 naʻe papitaiso ʻi Pelēsila, ko e tokolahi tahá ʻi Rio de Janeiro.
ʻI he taimi ní, ko e ʻosi nai ia ʻa e taʻu ʻe 90 mei ai, ʻoku ʻikai fiemaʻu ke tau ʻeke: “Kae fēfē ʻa Pelēsila mo e kotoa ʻo ʻAmelika Tongá?” Laka hake he Kau Fakamoʻoni ʻa Sihova ʻe toko 760,000 ʻoku nau malangaʻi ʻa e ongoongo leleí ʻi Pelēsila. Pea ʻi he kotoa ʻo ʻAmelika Tongá ko e pōpoaki ʻo e Puleʻangá ʻoku fanongoa ia he taimí ni ʻi he lea faka-Potukalí, faka-Sipeiní mo e ngaahi lea tuʻufonua lahi. ʻI he 1915, naʻe moʻoni ʻa Sarah Ferguson, ‘Naʻe kei toe lahi ʻa e ngāue utu-taʻu ke faí.’—Mei hotau kuohilí ʻi Pelēsila.
a Ko e I.B.S.A. ʻoku ʻuhinga ia ki he Kautaha Ako Tohi Tapu Fakavahaʻapuleʻangá.
Te Ke Fie Vakai Foki ki Heni
KO E TAUA LE‘O—PULUSINGA AKO
Founga ‘o Hono Tūtuu‘i ‘a e ‘Uluaki Ngaahi Tenga ‘o e Pule‘angá ‘i Potukali
Ko e hā e ngaahi fakafaingata‘a‘ia‘anga na‘e iku‘i ‘e he mu‘aki kau malanga ‘o e Pule‘angá ‘i Potukalí?
KO E TAUA LE‘O—PULUSINGA AKO
Fakamafola ‘e he Malanga Ma‘á e Kakaí ‘a e Ongoongo Leleí ‘i ‘Ailani
Ko e hā na‘á ne fakatuipau‘i ‘a C. T. Russell ko e ngoué “kuo maau pea ‘oku tatali mai ki hano utu”?
KO E TAUA LE‘O—PULUSINGA AKO
“‘E Fai ‘Afē ‘Etau ‘Asemipilī Hokó?”
Ko e hā na‘á ne ‘ai ha ki‘i fakataha-lahi na‘e fai ‘i he Kolo Mekisikoú, ‘i he 1932 ke fu‘u makehé?
KO E TAUA LE‘O—PULUSINGA AKO
“Fonu Homau Lotó ‘i he Faivelenga mo e ‘Ofa Lahi Ange ‘i ha Toe Taimi ki Mu‘a”
Hili ‘enau fakataha-lahi ‘i he 1922, na‘e anga-fēfē hono ngāue‘aki ‘e he kau Ako Tohi Tapú ‘a e fale‘i ke “tu‘uaki ‘a e Tu‘í mo hono pule‘angá”?
KO E TAUA LE‘O—PULUSINGA AKO
“‘Oku ‘Ikai ha Hala Ia ‘e Fu‘u Tokakovi pe Fu‘u Lōloa”
Lolotonga ‘a e konga ki mui ‘o e 1920 tupú mo e konga ki mu‘a ‘o e 1930 tupú, na‘e fakahāhā ‘e he kau tāimu‘a faivelengá ‘enau fakapapau ke ‘ave ‘a e ongoongo lelei ‘o e Pule‘anga ‘o e ‘Otuá ki he kolo ‘uta lahi faka‘ulia ‘o ‘Aositelēliá.
KO E TAUA LE‘O—PULUSINGA AKO
“Kau Malanga ʻo e Puleʻangá ʻi Pilitānia—Tuʻu Hake!!”
Naʻe ʻikai ke ʻi ai ha tupu lahi ʻi he tokolahi ʻo e kau malanga ʻo e Puleʻangá ʻi Pilitānia ʻi ha taʻu ʻe hongofulu! Ka naʻe anga-fēfē liliu ʻa e ngaahi meʻá?
