1. Ko e hā ʻa e kautaha naʻá ne fetongi ʻa e puleʻanga ʻo ʻIsilelí ʻi he tuʻunga ko e kakai fili ʻa e ʻOtuá? (Sio ki he ʻuluaki fakatātā ʻi he kupú ni.)

 KO E kakai ʻa Sihova he ʻahó ni ʻi he māmaní ʻoku nau lotu kiate ia ʻi ha founga ʻoku fakahōifua kiate ia. ʻI he kuohilí, ko e kau mēmipa ʻo e puleʻanga ʻo ʻIsilelí ko e kakai fili ʻa e ʻOtuá. Ka naʻa nau tafoki ʻo fakafepaki ki he moʻoní. Naʻe faʻu leva ʻe Sihova ha puleʻanga foʻou ʻaki ʻa e kau muimui ʻo Kalaisí. Naʻa nau hoko ko ha kautaha ʻo fakafofongaʻi ʻa Sihova. Neongo naʻe fakaʻauha ʻa Selusalema ʻi he taʻu 70, naʻe ʻikai ke fakaʻauha ai ʻa e kautaha ko iá. (Luke 21:20, 21) ʻI he ngaahi ʻaho fakaʻosi ko ení, ko e puleʻanga foʻoú ʻoku fokotuʻutuʻu maau ke ne fakafofongaʻi ʻa Sihova. Heʻikai ke fakaʻauha ia ʻi he taimi ʻe toʻo ʻosi atu ai ʻa e māmani ʻo Sētané. (2 Tīm. 3:1) ʻE lava fēfē ke tau fakapapauʻi?

 2. Naʻe anga-fēfē hono fakamatalaʻi ʻe Sīsū ʻa e “mamahi lahi”? ʻE anga-fēfē ʻene kamatá?

² Naʻe tomuʻa tala ʻe Sīsū ʻa e meʻa ʻe hoko ʻi he ngaahi ʻaho fakaʻosí: “ʻE hoko ai ha fuʻu mamahi lahi ʻa ia kuo teʻeki hoko talu mei he kamataʻanga ʻo māmaní ʻo aʻu mai ki he taimí ni,  pea ʻe ʻikai ʻaupito haʻane toe hoko.” (Māt. 24:3, 21) Ko e mamahi ko ení ʻe kamata ia ʻi he taimi ʻe fakaʻauha ai ʻe Sihova ʻa “Pāpilone ko e Lahi,” ʻa e ʻemipaea ʻi māmani ʻo e lotu loí. Te ne ngāueʻaki ʻa e ngaahi puleʻanga fakaetangatá ke fai eni. (Fkh. 17:3-5, 16) Ko e hā ʻe hoko atu aí?

 3. Hili hono fakaʻauha ʻa e lotu loí, ko e hā ʻe hoko ki he kakai ʻa Sihová?

³ Hili hono fakaʻauha ʻa e lotu loí, ko e Kau Fakamoʻoni pē ʻa Sihová ʻa e lotu ʻe toe ʻi he māmaní. Pea ko Sētane leva mo hono māmaní te nau ʻohofi ʻa e kau sevāniti ʻa e ʻOtuá. ʻE hā ngali ko e kakai melino ʻa Sihová ʻoku ʻikai hanau maluʻi. ʻOku pehē ʻe he Tohi Tapú fekauʻaki mo “Koki ʻo e fonua ko Mekoki”: “Te ke ʻalu hake, ʻo tatau mo e afā hoʻo haʻu, te ke hange ha ʻao ke ʻufiʻufi ʻa e fonua, ʻa koe mo ho ngaahi vahengatau, pea ʻe o mo koe ha ngaahi kakai lahi.” Ka ko e ʻoho ko iá ʻe hoko ia ko ha fehālaaki lahi!—ʻIsi. 38:1, 2, 9-12.

4, 5. Ko e hā ʻe fai ʻe Sihova ʻi he taimi ʻe ʻohofi ai hono kakaí?

⁴ ʻI he taimi ʻe ʻohofi ai ʻe Sētane mo hono kau muimuí ʻa e kakai ʻa Sihová, ʻe hangē ia haʻanau ʻohofi tonu ʻa Sihová. (Lau ʻa e Sākalaia 2:8.) ʻE anga-fēfē fakafeangai ʻa Sihová? Ko e Hau ʻo e ʻunivēsí te ne fakahaofi leva ʻene kakaí. ʻE ʻikai te ne fakaʻatā kinautolu ke fakaʻauha. Hili hono fakahaofi ʻene kakaí, ʻe kamataʻi ʻe Sihova ʻa e tau ʻo ʻĀmaketoné pea ʻe fakaʻauha ʻosi ʻa e māmani ʻo Sētané.—Fkh. 16:14, 16.

⁵ Naʻe kikiteʻi ʻe Selemaia ko Sihova tonu te ne tauʻi ʻa e ngaahi puleʻangá ʻi ʻĀmaketone: “ʻE talatalaakiʻi ʻe ia ʻa e kakano kotoa; ko e meʻa ki he kau angahala, te ne tuku kinautolu ki he heleta—ko Sihova ia mei he Taʻehamai. Ko e folofola eni ʻa Sihova Sapaoti, Vakai, ko e kovi é ʻe ʻalu mei he puleʻanga ki he puleʻanga, pea ʻe langaʻi hake ha fuʻu afa mei he ngaahi ngataʻanga ʻo mamani. Pea ʻe fokotuʻutuʻu ʻa e ta ʻa Sihova ʻi he ʻaho ko ia mei he ngataʻanga ʻe taha ʻo mamani, ʻo aʻu ki hono ngataʻanga ʻe taha: ʻe ʻikai tengihia kinautolu, pea ʻe ʻikai tanaki, pea ʻe ʻikai tanu; te nau hoko ko e kinohaʻa pe ʻi he funga kelekele.” (Sel. 25:31-33) ʻE fakangata ʻi ʻĀmaketone ʻa e māmani ʻo Sētané. Kae kei tuʻu pē ʻa e kautaha ʻa Sihová.

6, 7. (a) Ko e haʻu mei fē ʻa e fuʻu kakai lahi”? (e) Ko e hā ʻa e ngaahi tupu kuo hoko ʻi he ngaahi taʻu ki mui ní?

⁶ ʻI he ʻahó ni, ko e konga fakaemāmani ʻo e kautaha ʻa e ʻOtuá ʻoku hokohoko atu ʻene tupú koeʻuhí ʻoku fonu ʻi he kakai māʻoniʻoni ʻa ia ʻoku nau maʻu ʻa e hōifua ʻa e ʻOtuá. ʻOku pehē ʻe he Tohi Tapú: “Ko e ongo foʻi fofonga ʻo Sihová ʻokú na siofi ʻa e faʻahinga māʻoniʻoní, pea ko hono ongo telingá ʻokú na fakafanongo ki heʻenau hū tōtōakí.” (1 Pita 3:12) Ko e faʻahinga māʻoniʻoni ko ení ʻoku kau ai “ha fuʻu kakai lahi,” ko ha fuʻu kakai tokolahi, te nau hao atu ʻi he “fuʻu mamahi lahí.” (Fkh. 7:9, 14) Sioloto atu ki he anga hoʻo ongoʻí ʻi he taimi te ke hao atu ai ʻi he fuʻu mamahi lahi ko ení ko ha mēmipa ʻo e fuʻu kakai lahí!

⁷ Ko e fuʻu kakai lahi ko ení ʻoku faʻuʻaki ia ʻa e kakai mei he ngaahi puleʻanga kotoa pē. Ko e ngāue fakamalangá ʻokú ne fakatahatahaʻi fakataha mai kinautolú. Naʻe tomuʻa tala ʻe Sīsū: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai leva ʻa e ngataʻangá.” (Māt. 24:14) Ko e ʻuhinga ia ʻoku hoko ai ʻa e malangaʻi ʻo e ongoongo lelei ʻo e  Puleʻanga ʻo e ʻOtuá ko e ngāue tefito ʻa e kakai ʻa e ʻOtuá. Ko hono olá, ko e kakai ʻe laui miliona ʻoku nau lotu kia Sihova “ʻi he laumālie mo e moʻoni.” (Sione 4:23, 24) Ko e fakatātaá, ʻi he 2003 ki he 2012, laka hake ʻi he kakai ʻe toko 2,707,000 naʻa nau fakatapui kia Sihova pea papitaiso. ʻI he ʻahó ni, ʻoku ʻi ai ʻa e Kau Fakamoʻoni ʻe toko 7,900,000 tupu pea ʻi he taʻu taki taha ʻoku toe ʻi ai mo e laui miliona ʻoku nau maʻu ʻa e Fakamanatu ʻo e pekia ʻa Kalaisí. ʻOku tau fiefia he ʻoku tupu vave ʻa e fuʻu kakai lahí, pea ʻoku tau ʻilo ʻoku ʻai ia ʻe Sihova ke tupu.—1 Kol. 3:5-7.

 8. Ko e hā ʻoku tupu fakautuutu ai ʻa e kautaha ʻa Sihová?

⁸ Kuo fili ʻe Sihova ha kautaha ke fakafofongaʻi ia. Pea ʻoku tupu vave ʻaupito ia. (Lau ʻa e ʻAisea 43:10-12.) Naʻe tomuʻa tala ʻe ʻAisea fekauʻaki mo e ngaahi ʻaho fakaʻosí: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi: Ko au Sihova te u fakavave ia ʻi hono taimi.” (ʻAi. 60:22) Ko e toenga ʻo e kau paní, ʻa e “ʻIsileli ʻa e ʻOtuá,” naʻa nau hangē ha “kiʻi siʻi,” ka naʻe tāpuakiʻi ʻe Sihova ʻenau ngāue fakamalangá. ʻOku nau toe tokolahi ange ʻi hono ʻomai ʻa e kau pani lahi ange ki he kautaha ʻa e ʻOtuá. (Kal. 6:16) ʻI he faai mai ʻa e ngaahi taʻú, ko e laui miliona ʻoku nau maʻu ʻa e ʻamanaki fakaemāmaní kuo nau tali foki ʻa e moʻoní.

 9. Ko e hā kuo pau ke tau fai ke maʻu ʻaonga ai mei he talaʻofa ʻa e ʻOtuá ki ha kahaʻu fakaofó?

⁹ Kuo talaʻofa ʻe Sihova ha kahaʻu fakaofo maʻa kitautolu kotoa, tatau ai pē pe ko ha kau pani pe fuʻu kakai lahi kitautolu. Ke maʻu ʻaonga mei he talaʻofa ko ení, kuo pau ke tau talangofua ki heʻene ngaahi fekaú. (ʻAi. 48:17, 18) Ko e fakatātaá, naʻe fiemaʻu ʻe Sihova ʻa e kau ʻIsilelí ke nau talangofua ki heʻene Laó. Ko e Laó te ne maluʻi mo akoʻi kinautolu ki he founga ke maʻu ai ha fāmili fiefiá mo e ngaahi kaumeʻa leleí, founga ke faitotonu ai ʻi he ngaahi pisinisí mo e founga ke fakafeangai lelei ai ki he niʻihi kehé. (ʻEki. 20:14; Liv. 19:18, 35-37; Teu. 6:6-9) ʻOku tatau pē mo kitautolu he ʻaho ní. Ko e ngaahi fekau ʻa e ʻOtuá ʻokú ne maluʻi kitautolu pea ʻoku lelei kia kitautolu. ʻOku ʻikai ke fuʻu faingataʻa kia kitautolu ke talangofua ki ai. (Lau ʻa e 1 Sione 5:3.) ʻI he taimi ʻoku tau talangofua ai ki aí, ʻe fakafiefia ange ʻetau moʻuí, pea ko e mahuʻinga angé, ʻe tupu ʻo mālohi ange ʻetau tui kia Sihová.—Tai. 1:13.

10. Ko e hā ʻoku totonu ai ke tau fakapapauʻi ʻoku tau ako tuʻumaʻu ʻa e Tohi Tapú pea vaheʻi ha efiafi ki he lotu fakafāmilí?

¹⁰ Ko e konga fakaemāmani ʻo e kautaha ʻa e ʻOtuá ʻoku ngaʻunu ki muʻa ʻi he ngaahi founga lahi. ʻOku tokoniʻi ai kitautolu ke tau mahinoʻi ʻo toe māʻalaʻala ange ʻa e moʻoni Fakatohitapú. Ko e meʻa tofu pē ia naʻe talaʻofa mai ʻi he Tohi Tapú: “Ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie.” (Pal. 4:18) Ka ko kitautolu taki taha ʻoku totonu ke tau ʻeke hifo: ‘ʻOku ou lāuʻilo ki he ngaahi liliu fakamuimui ʻi he ngaahi founga ʻoku tau mahinoʻi ai ʻa e ngaahi konga Tohi Tapu pau? ʻOku ou lau fakaʻaho ʻa e Tohi Tapú? ʻOku ou vēkeveke ke lau ʻa e tohi foʻou taki taha? ʻOku ou vaheʻi ha efiafi he uike kotoa pē ki he lotu fakafāmilí?’ ʻOku ʻikai ko ha ngaahi meʻa eni ʻoku faingataʻa ke fai, ka kuo pau ke tau vaheʻi ha taimi ki ai. ʻOku mātuʻaki mahuʻinga ke tau hokohoko atu ke ako ʻa e Folofola ʻa e ʻOtuá, ngāueʻaki ia pea ngaʻunu ki muʻa fakataha mo e kautaha ʻa e ʻOtuá. Kuo pau ke tau fai eni tautefito he taimí ni ʻi he ofi ʻaupito ko ia ʻa e mamahi lahí!

11. Ko e hā ʻoku ʻalu ai ʻa e kakai ʻa Sihová ki he ngaahi fakatahá, ngaahi ʻasemipilií mo e ngaahi fakataha-lahí?

 ¹¹ ʻOku fakalototoʻaʻi kitautolu ʻe he kautaha ʻa Sihová ke muimui ʻi he akonaki ʻa Paulá: “Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa hono fakatahatahaʻi fakataha ʻo kitautolú, ʻo hangē ko ia ʻoku angaʻaki ʻe he niʻihi, kae fefakalototoʻaʻaki, pea toe ʻāsili angé ʻi hoʻomou sio ko ia ki he fakaofiofi mai ʻa e ʻahó.” (Hep. 10:24, 25) Naʻe fakatahataha maʻu pē ʻa e kau ʻIsileli ʻo e kuonga muʻá ke lotu kia Sihova pea ke ne akoʻi kinautolu. Ko e Kātoanga Falelouʻakau ʻi he taimi ʻo Nehemaiá ʻa e taha ʻi he ngaahi kātoanga fakafiefia ko ení. (ʻEki. 23:15, 16; Nehe. 8:9-18) ʻI he ʻahó ni, ʻoku ʻi ai foki ʻetau ngaahi fakataha, ngaahi ʻasemipilī, mo e ngaahi fakataha-lahi. ʻOku totonu ke tau feinga ke maʻu ʻa e kotoa ʻo e ngaahi fakataha ko ení koeʻuhí ʻoku tokoniʻi ai kitautolu ke nofo ofi kia Sihova pea fiefia ʻi heʻetau ngāue kiate iá.—Tai. 2:2.

12. ʻOku totonu ke fēfē ʻetau ongoʻi fekauʻaki mo e ngāue fakamalangá?

¹² ʻI he tuʻunga ko e kau mēmipa ʻo e kautaha ʻa Sihová, kuo pau ke tau malangaʻi ʻa e ongoongo leleí. Ko ha monū lahi eni kiate kitautolu. Ko hono moʻoní, ʻoku ui ʻe he Tohi Tapú ʻa e ngāue ko ení ʻoku “toputapu.” (Loma 15:16) ʻI he taimi ʻoku tau malanga aí, ʻoku tau ngāue fakataha mo e “Tokotaha Māʻoniʻoni,” ʻa Sihova. (1 Pita 1:15; 1 Kol. 3:9) ʻOku tau toe kau ʻi hono fakalāngilangiʻi ʻa e huafa māʻoniʻoni ʻo Sihová. ʻOku ʻomai ai kia kitautolu ʻa e fiefia ke malangaʻi ʻa e “ongoongo lelei lāngilangiʻia ʻo e ʻOtua fiefiá.”—1 Tīm. 1:11.

13. ʻOku makatuʻunga ʻi he hā ʻetau moʻuí mo ʻetau kaumeʻa mo Sihová?

¹³ ʻOku loto ʻa Sihova ke tau maʻu ʻa e meʻa lelei tahá. Ko e ʻuhinga ia ʻokú ne loto ai ke tau nofo ofi ange kiate ia pea mo ʻene kautahá. ʻOku tau fehangahangai mo e fili tatau hangē ko ia ko e kau ʻIsilelí ʻi he taimi naʻe tala ange ai ʻe Mōsese kiate kinautolu: “Kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako, ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia: he ko ia ia hoʻo moʻuiʻanga.” (Teu. 30:19, 20) Fili ki he moʻuí. ʻOfa kia Sihova pea mateaki maʻu pē kiate ia mo ʻene kautahá.

14. Naʻe anga-fēfē ongoʻi ʻa e tokoua ʻe taha fekauʻaki mo e kautaha ʻa e ʻOtuá?

¹⁴ Ko Tokoua Pryce Hughes, ʻa ia naʻá ne ako ʻa e moʻoní ki muʻa ʻi he 1914, naʻá ne nofoʻaki mateaki kia Sihova mo ʻEne kautahá ʻi he kotoa ʻene moʻuí. ʻI he taimi naʻá ne fakamatala ai ki heʻene moʻuí, naʻá ne pehē ko e lēsoni mahuʻinga taha naʻá ne akó ke nofo ofi ki he kautaha ʻa Sihová pea ʻoua ʻe falala ki he ngaahi fakakaukau fakaetangatá. Naʻe tokoniʻi ʻe he meʻá ni ia ke ne kātekina ʻa e ngaahi ʻahiʻahiʻi ʻo ʻene tuí ʻi he kotoa ʻene moʻuí. Naʻe pehē ʻe Tokoua Hughes ko e founga pē ke maʻu ai ʻa e hōifua ʻa Sihová ko e muimui maʻu pē ki he fakahinohino ʻene kautahá.

15. Ko e hā ʻa e faʻifaʻitakiʻanga Fakatohitapu ʻoku akoʻi mai ai ʻa e founga ʻoku totonu ke tau fakafeangai ai ʻi he taimi ʻoku fai ai ʻa e ngaahi fakatonutonu ki heʻetau mahinó?

¹⁵ ʻOku fiemaʻu ʻe Sihova ke tau poupouʻi ʻene kautahá pea tali ʻa e ngaahi fakatonutonú ʻi he founga ʻoku tau mahinoʻi ai ʻa e moʻoni ʻo e Tohi Tapú mo e founga ke tau malanga aí. ʻI he ʻuluaki senitulí, ko e kau Kalisitiane Siu ʻe niʻihi naʻa nau loto ke kei muimui pē ʻi he Laó. (Ngā. 21:17-20) Ka naʻe fakatonutonuʻi kinautolu ʻe Paula pea tokoniʻi kinautolu ke sio ko e feilaulau  huhuʻi ʻa Sīsuú ʻo ʻikai ko e ngaahi feilaulau monumanú, naʻá ne ʻai ke malava ʻo fakamolemoleʻi ʻa e ngaahi angahalá. (Hep. 10:5-10) Ko e tokolahi ʻo e kau Kalisitiane Siu ko ení naʻa nau tali ʻa e akonaki ʻa Paulá pea liliu ʻenau fakakaukaú. ʻE lava ke tau ako ha lēsoni mahuʻinga mei heʻenau faʻifaʻitakiʻangá. Kuo pau ke tau ako fakalelei ʻa e Tohi Tapú mo ʻetau ʻū tohí, pea ʻi he taimi ʻoku fai ai ʻe he kautaha ʻa Sihová ʻa e ngaahi fakatonutonú, ʻoku fiemaʻu ke tau tali anga-fakatōkilalo ia.

16. (a) Ko e hā ʻe fakaofo ai ʻa e moʻui ʻi he Palataisí? (e) Ko e hā ʻokú ke fakatuʻotuʻa atu ki ai ʻi he māmani foʻoú?

¹⁶ Ko e faʻahinga kotoa ʻoku nau nofoʻaki mateaki kia Sihova mo ʻene kautahá te nau maʻu ʻa e ngaahi tāpuaki. Ko e kau paní te nau ngāue ko ha ngaahi tuʻi fakataha mo Sīsū Kalaisi ʻi hēvani. (Loma 8:16, 17) Ko e faʻahinga ʻoku nau ʻamanaki ke moʻui ʻi he māmaní ʻoku nau fakatuʻotuʻa atu ke moʻui taʻengata ʻi he Palataisí. Ko e kotoa ʻo e kakai ʻa Sihova takatakai ʻi he māmaní ʻoku nau maʻu ʻa e faingamālie makehe ke tala ki he niʻihi kehé ʻa e ʻamanaki ko ení. (2 Pita 3:13) “ʻE maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” (Saame 37:11) ʻE maʻu ʻe he kakaí ha ngāue fakafiemālie. “Te nau langa fale, ʻo nofo ai.” (ʻAi. 65:21, 22) Heʻikai toe fakafeangai kovi ha taha ki he niʻihi kehé. Heʻikai toe masiva ha taha, pea ʻe maʻu ʻe he tokotaha kotoa ʻa e meʻakai feʻunga ke kai. (Saame 72:13-16) Ko e lotu loí heʻikai te nau toe akoʻi ʻa e ngaahi loi fekauʻaki mo e ʻOtuá, koeʻuhí ʻe ʻikai ke toe ʻi ai. (Fkh. 18:8, 21) ʻE fokotuʻu mai ʻa e kau maté pea maʻu ʻa e faingamālie ke moʻui taʻengata ʻi he māmaní. (ʻAi. 25:8; Ngā. 24:15) Kapau te tau fakaivimālohiʻi hotau vahaʻangatae mo Sihová pea hokohoko atu ke ngaʻunu ki muʻa fakataha mo ʻene kautahá, ko e ngaahi talaʻofa fakaofo ko ení ʻe hoko moʻoni mai kia kitautolu.

17. ʻOku totonu ke fēfē ʻetau ongoʻi fekauʻaki mo Sihova mo ʻene kautahá?

¹⁷ ʻOku vavé ni ke ngata ʻa e fokotuʻutuʻu ʻa Sētané. Ke haó, kuo pau ke tau hanganaki tauhi ke mālohi ʻetau tuí pea mateaki ʻi heʻetau lotu kia Sihová mo ʻene kautahá. ʻOku tau ongoʻi ʻo hangē ko Tēvitá ʻi he taimi naʻá ne hiva ai: “Kuo u kole meia Sihova ha meʻa pe taha, ko ia pe te u kumi ki ai; ke u nofo ʻi he fale ʻo Sihova ʻi he ʻaho kotoa o ʻeku moʻui, ke siofi ʻa e fakaʻofoʻofa ʻo e ʻEiki, mo fakalaulauloto ʻi hono palasi.” (Saame 27:4) Fakatauange kia kitautolu taki taha ke tau nofo ofi ai pē kia Sihova pea ngaʻunu ki muʻa fakataha mo ʻene kautahá.