KO E moʻoni, naʻe ʻikai te u tokanga ki he fuʻu tokosiʻi ʻa e kakai naʻe haʻu ki heʻeku malangá. Ko ha tokotaha mā ʻaupito au talu pē mei heʻeku kei siʻí. Naʻá ku mā ʻaupito ʻou toitoi ʻi he taimi naʻe haʻu ai ʻa e kakaí ki homau ʻapí, naʻa mo e faʻahinga naʻá ku ʻiloʻí.

Ko ia te ke ʻohovale nai ke ʻilo ko e lahi taha ʻo ʻeku ngaahi ngāue ʻi he kautaha ʻa Sihová, naʻe fiemaʻu kiate au ke fetuʻutaki mo e kakai tokolahi, fakatouʻosi ʻa e ngaahi kaungāmeʻa mo e kau sola. ʻE malava fēfē ki ha tokotaha mā ʻoku ʻikai ke ne fuʻu loto-maʻu ke fai ʻa e meʻá ni? ʻOku ʻikai ʻaki haku mālohi tonu. Kuo tokoniʻi maʻu pē au ʻe Sihova ke fai ʻa e meʻa kuo vaheʻi mai ke u faí. Kuó ne fai maʻu pē ki heʻene talaʻofá: “Te u poupou koe ʻe au; ʻio, te u tokoni kiate koe; ʻio, te u pukepuke koe ʻaki ʻa e toʻomataʻu o ʻeku faitotonu.” (ʻAi. 41:10) Ko e tokoni ko ení kuo haʻu maʻu pē ia mei he kau Kalisitiane kehé. Tuku ke u tala atu kiate koe ʻa e niʻihi ʻo kinautolu, ʻo kamata mei heʻeku kei siʻí.

Ko ha ʻaho laʻā ia ʻi he 1940 ʻi he taimi naʻe haʻu ai ʻa Elsie Huntingford ki he faama homau fāmilí ʻi he fakatonga hihifo ʻo Ontario. Koeʻuhí naʻe mā ʻeku tangataʻeikí  hangē ko aú, naʻe fakaava ʻe he fineʻeikí ʻa e matapaá. Naʻá ku tangutu pē mo ʻeku tangataʻeikí ʻi loto ʻo fanongo. Naʻe fakakaukau ʻeku tangataʻeikí ko Tuofefine Huntingford ko ʻene tuʻuaki fakatau ha meʻa, pea naʻá ne hohaʻa naʻa fakatau ia ʻe heʻeku fineʻeikí. Ko ia naʻá ne ʻalu ki he matapaá ʻo tala ange naʻe ʻikai te mau mahuʻingaʻia. Naʻe ʻeke ange ʻe Tuofefine Huntingford, “ʻOku ʻikai ke mou mahuʻingaʻia kimoutolu ʻi ha ako Tohi Tapu?” Naʻe tala ange ʻe he tangataʻeikí, “Ko hono moʻoní ʻoku mau mahuʻingaʻia ai.”

Naʻe mateuteu ʻeku ongo mātuʻá ke tali ʻa e moʻoní ʻi he taimi naʻe ʻaʻahi mai ai kia kimautolu ʻa Tuofefine Huntingford. Naʻá na mālohi ʻaupito ʻi he Siasi Fakatahataha ʻo Kānatá. Kae kehe, naʻá na fili ke mavahe mei he siasí. Ko e hā hono ʻuhingá? Koeʻuhí naʻe fakapipiki ʻe he faifekaú ha lisi ʻo e faʻahinga naʻa nau foaki ʻa e paʻanga ki he siasí ʻi he feituʻu ʻe lava ʻa e tokotaha kotoa ʻo sio ki aí. Ko e hingoa ʻo ʻeku ongo mātuʻá naʻe ofi ki he ngataʻanga ʻo e lisí, ko ia naʻe ʻiloʻi ʻe he tokotaha kotoa naʻá na foaki ʻa e paʻanga siʻisiʻi ange ʻi he niʻihi kehé. Neongo naʻe ʻikai maʻu ʻe heʻeku ongo mātuʻá ha paʻanga lahi, naʻe ʻai kinaua ʻe he kau mātuʻa ʻo e siasí ke na ongoʻi naʻe fiemaʻu ke na foaki ʻa e meʻa lahi ange. Ko e ʻuhinga ʻe taha naʻá na mavahe aí he naʻe tala ange ʻe he faifekau ʻe taha ʻe mole ʻene ngāué kapau te ne akoʻi ʻa e meʻa naʻá ne tui moʻoni ki aí. Ko ia naʻa mau mavahe mei he siasí, ka naʻa mau kei loto ke lotu ki he ʻOtuá pea ako fekauʻaki mo ia.

ʻI he taimi ko iá, ko e ngāue ʻa e Kau Fakamoʻoni ʻa Sihová naʻe tapui ʻi Kānata, pea naʻe ʻikai malava ke nau malanga tauʻatāina. ʻI he kamatá, naʻe akoʻi kimautolu ʻe Tuofefine Huntingford ʻo ngāueʻaki pē ʻa e Tohi Tapú mo ha kiʻi tohi ʻuliʻuli ʻoku ʻi ai ʻene noutí. Ki mui ai, ʻi he taimi naʻá ne ʻiloʻi ai ʻe ʻikai te mau lavakiʻi iá, naʻá ne ʻomai kia kimautolu ʻa e ʻū tohi Fakatohitapu kehe. Hili ʻa e ako taki taha naʻa mau fūfuuʻi fakalelei ʻa e ʻū tohí. a

Naʻe ngāue faivelenga ʻa Tuofefine Huntingford ʻi he ngāue fakafaifekaú neongo ʻa e fakafepakí mo e ngaahi palopalema kehe. Ko ʻene faivelengá naʻe maongo lahi ia kiate au, pea naʻá ku fili ke tauhi kia Sihova. Naʻe papitaiso ʻeku ongo mātuʻá ʻi he 1948. ʻI he taʻu hono hokó, ʻi heʻeku taʻu 17, naʻá ku papitaiso ʻi ha meʻa ʻaiʻanga inu maʻá e fanga monumanú. Hili ʻeku papitaisó, naʻá ku fakapapauʻi ke hoko ko ha tāimuʻa.

Naʻá ku toumoua ke tāimuʻa leva koeʻuhí naʻá ku fakakaukau naʻe fiemaʻu ke u tomuʻa maʻu ha paʻanga. Ko ia naʻá ku maʻu ha ngāue ʻe ua, ko e taha ʻi ha pangikē pea ko e taha ʻi ha ʻōfisi. Kae kehe, naʻá ku kei siʻi mo taʻetaukei, pea naʻá ku fakamoleki leva ʻa e kotoa ʻo e paʻanga naʻá ku maʻú. Ko ha tokoua ko Ted Sargent naʻá ne faleʻi au ke u loto-toʻa pea tui kia Sihova. (1 Kal. 28:10) Ko e fakalototoʻa anga-ʻofa ko iá naʻá ne tokoniʻi au ke u kamata tāimuʻa ʻi he 1951. Naʻá ku maʻu pē ʻa e paʻanga ʻe 40, ko ha pasikala motuʻa mo ha kato tohi foʻou. Ka naʻe fakapapauʻi maʻu pē ʻe Sihova naʻá ku maʻu ʻa e ngaahi meʻa naʻá ku fiemaʻu moʻoní. Naʻá ku houngaʻia ʻi hono fakalototoʻaʻi au ʻe Ted ke u tāimuʻá. Naʻe iku ki he ngaahi meʻa lelei lahi ʻa e fili ko iá.

ʻI he efiafi ʻe taha ʻi ʻAokosi 1952, naʻá ku maʻu ha telefoni mei he Pēteli ʻi Toronto, Kānatá. Naʻe fakaafeʻi au ke u kamata ngāue ʻi he Pētelí ʻi Sepitema. Neongo naʻá ku mā pea teʻeki ai ʻaupito ke u ʻalu ki he Pētelí ki muʻa, naʻá ku fiefia ʻaupito ke ngāue ai koeʻuhí naʻá ku fanongo ʻi he ngaahi meʻa fakafiefia lahi ʻaupito fekauʻaki mo e Pētelí. ʻI heʻeku aʻu ki aí, naʻá ku ongoʻi lata leva ai.

ʻI he taʻu ʻe ua hili ʻeku aʻu ki Pētelí, naʻá ku hoko ko e sea ʻo e kau mātuʻa ʻi he taha ʻo e fakatahaʻanga ʻi Toronto. Naʻá ku fetongi ʻa Bill Yacos, ʻa ia naʻe motuʻa ange mo taukei ange. Naʻá ku taʻu 23 pē pea ongoʻi hangē ha kiʻi tamasiʻi faama ʻikai taukeí. ʻI ha founga anga-ʻofa mo anga-fakatōkilalo, naʻe fakahaaʻi mai ʻe Tokoua Yacos kiate au ʻa e meʻa ke faí. Naʻe tokoniʻi moʻoni au ʻe Sihova.

Ko Tokoua Yacos ko ha tangata kaukaua mo malimali anga-fakakaumeʻa. Naʻá ne tokanga moʻoni fekauʻaki mo e kakaí. Naʻá ne ʻofa ʻi he fanga tokouá, pea naʻa nau ʻofa ʻiate ia. Naʻe ʻaʻahi maʻu pē ʻa Tokoua Yacos ki honau ngaahi ʻapí ʻo ʻikai ʻi he taimi pē naʻe ʻi ai ai ʻenau ngaahi palopalemá. Naʻá ne fakalototoʻaʻi au ke fai ʻa e meʻa tatau pea ngāue mo kinautolu ʻi he ngāue fakamalangá. “Ken,” ko ʻene leá ia, “fakahaaʻi ki he fanga tokouá ʻokú ke tokanga fekauʻaki mo kinautolu.”

Kuo tokoniʻi au ʻe Sihova ʻi ha founga makehe talu mei Sanuali 1957. ʻI he māhina ko iá naʻá ku mali ai mo Evelyn, ʻa ia ko ha tokotaha maʻu tohi fakamoʻoni ako ia ʻo e kalasi hono 14 ʻo e Akoʻanga Kiliatí. Ki muʻa ke ma malí, naʻá ne ngāue ʻi he vahefonua lea faka-Falanisē ʻo Quebec. Koeʻuhí naʻe mālohi ʻaupito ʻa e Siasi Katolika Lomá ʻi he feituʻu ko iá, naʻe faingataʻa kia Evelyn ke malanga ai. Ka naʻá ne mateaki kia Sihova pea ʻikai taʻofi ʻene malangá.

Naʻe toe poupouʻi mateaki au ʻe Evelyn. (ʻEf. 5:31) ʻI he taimi ʻe niʻihi naʻe faingataʻa ke fai eni. Ko e fakatātaá, ʻi he ʻaho pē ʻe taha hili ʻema malí, naʻe kole mai ʻa e vaʻá ke u ʻalu ki he Pēteli ʻi Kānatá ki ha fakataha uike ʻe taha. Ka naʻá ma palani ke ʻalu ki Fololita, U.S.A., ʻo hanimuni. Koeʻuhí naʻá ku loto mo Evelyn ke fai ha meʻa pē naʻe kole mai ʻe Sihova kia kimaua, naʻá ma liliu ʻema palaní. Lolotonga ʻa e uike ko iá, naʻe malanga ʻa Evelyn ʻo ofi ki he vaʻá. Neongo naʻe kehe ʻaupito ʻa e feituʻu ngāué mei Quebec, naʻá ne fai hono lelei tahá.

 ʻI he ngataʻanga ʻo e uiké, naʻe hoko ha meʻa taʻeʻamanekina. Naʻe vaheʻi au ko ha ʻovasia sēketi ki he fakatokelau ʻo Ontario. Ko ha husepāniti foʻou au, taʻu 25 pē, pea taʻetaukei ʻaupito. Ka naʻá ma falala-pau ʻe tokoniʻi kimaua ʻe Sihova. Naʻá ma fononga lēlue poʻuli ʻi he uhouhonga ʻo e faʻahitaʻu momoko ʻo Kānatá. Naʻá ma ʻalu lēlue fakataha mo e kau ʻovasia fefonongaʻaki taukei tokolahi naʻa nau foki ki heʻenau ngaahi vāhenga-ngāué. Naʻa nau fakalototoʻaʻi lahi ʻaupito kimaua! Naʻe ʻikai loto ha tokoua ʻe taha ke ma tangutu ʻi ha sea ʻikai lelei ʻi he poó kotoa. Ko ia naʻá ne vilitaki mai ke ma ngāueʻaki hono loki naʻe ʻi ai ha mohenga. ʻI he pongipongi hokó naʻá ma ʻaʻahi ki he kiʻi kulupu ʻi Hornepayne, ʻo hangē ko ia naʻá ku lave ki ai ʻi he kamataʻanga ʻo e kupú. Ko ʻema fuofua vāhenga-ngāué ia, pea ko e toki ʻosi atu pē ia ʻa e ʻaho ʻe 15 ʻema malí.

ʻI ha ngaahi taʻu siʻi ki mui ai, naʻe toe liliu ʻema moʻuí. ʻI he konga ki mui ʻo e 1960, ʻi he taimi naʻá ku ngāue ai ko ha ʻovasia fakavahé, naʻe fakaafeʻi au ki he kalasi hono 36 ʻo e Akoʻanga Kiliatí, ʻa ia naʻe kamata ʻi Fepueli 1961. Naʻá ku fiefia ʻaupito ke maʻu ʻa e faingamālie ke ako ʻa e Tohi Tapú ʻi he māhina ʻe 10. Ka naʻá ku toe loto-mamahi koeʻuhí ko Evelyn, hangē ko e ngaahi uaifi tokolahi kehé, naʻe ʻikai ke fakaafeʻi ke kau ki ai. Naʻe pau ke ne fai ha tohi ʻo pehē ai naʻá ne loto-lelei ke nofo pē ʻi Kānata lolotonga ʻeku kau ki he kalasí ʻi Brooklyn, Niu ʻIoke. Neongo naʻá ne tangi ʻi he fakakaukau atu ki heʻeku mavahe meiate ia ʻi ha fuʻu taimi fuoloa, naʻá ma loto-tatau ʻoku totonu ke u ʻalu ki Kiliati. Naʻe fiefia ʻa Evelyn ʻi heʻeku maʻu ʻa e ako mahuʻinga ko ení.

Lolotonga ʻeku ʻi Brooklyn, naʻe ngāue ʻa Evelyn ʻi he Pēteli ʻi Kānatá. Naʻá ne maʻu ʻa e monū ʻo e loki fakataha mo ha tuofefine pani ko Margaret Lovell. Ko e moʻoni, naʻá ma taʻelata ʻaupito. Ka naʻe tokoniʻi kimaua ʻe Sihova ke ma hangataha pē ki heʻema vāhenga-ngāué. Naʻe loto-lelei ʻa Evelyn ke fai ʻa e ngaahi feilaulau maʻa Sihova, pea naʻe maongo lahi eni kiate au.

Hili ʻeku ʻi Kiliati ʻi he māhina pē ʻe tolu, naʻá ku maʻu ha tohi fakaafe meia Tokoua Nathan Knorr, ʻa ia naʻá ne takimuʻa ʻi he ngāue fakamalanga ʻi māmani lahí. Naʻá ne fakaafeʻi au ke foki ki Kānata ke faiako ʻi he Ako Fakafaifekau ʻo e Puleʻangá. Naʻá ne tala mai ngalingali heʻikai ʻaupito toe fakaafeʻi au ki he Akoʻanga Kiliatí hili ʻeku faiako ʻi he kalasi ʻi Kānatá. Naʻe fakamatalaʻi ʻe Tokoua Knorr naʻe ʻikai pau ia ke u tali ʻa e vāhenga-ngāué. Ka, ʻe lava ke u fili ke fakaʻosi ʻa e Akoʻanga Kiliatí pea mahalo leva ʻe vaheʻi au ki ha fonua muli ko ha misinale. Naʻá ne pehē ʻe lava ke u talanoa ki hoku uaifí pea toki fai ha fili.

Naʻe ʻikai fiemaʻu ia ke u ʻeke kia Evelyn, koeʻuhí naʻá ku ʻosi ʻiloʻi ʻa e anga ʻene ongoʻí. Naʻá ma fakakaukau maʻu pē ʻoku totonu ke ma ʻalu ki ha feituʻu pē ʻe vaheʻi kimaua ki ai ʻe he kautaha ʻa Sihová, neongo kapau ʻoku ʻikai ko e vāhenga-ngāue ia ʻokú ma saiʻia aí. Ko ia naʻá ku tala ange leva kia Tokoua Knorr, “Ko e hā pē ʻa e meʻa ʻoku loto ʻa e kautaha ʻa Sihová ke ma faí, te ma fiefia ke fai ia.”

 ʻI ʻEpeleli 1961, naʻá ku foki ki Kānata ke faiako ʻi he Ako Fakafaifekau ʻo e Puleʻangá. Ki mui ai, naʻe fakaafeʻi au mo Evelyn ke ngāue ʻi he Pēteli ʻi Kānatá. Pea naʻá ma ʻohovale ʻaupito ʻi hono fakaafeʻi au ke maʻu ʻa e kalasi hono 40 ʻo Kiliatí, ʻa ia ʻe kamata ʻi he 1965. Naʻe toe fiemaʻu ke fai ʻe Evelyn ha tohi ʻo pehē naʻá ne loto-lelei ke nofo pē ʻi Kānata lolotonga ʻeku ʻalu ki he akó. Kae kehe, ʻi ha ngaahi uike siʻi pē hili ʻeku maʻu ʻa e tohi fakaafé, naʻe toe fakaafeʻi ʻa Evelyn ki Kiliati. Naʻá ma fiefia ʻaupito!

Hili ʻema aʻu ki he Akoʻanga Kiliatí, naʻe pehē ʻe Tokoua Knorr ʻe ʻave kimaua ki ʻAfilika mo e kotoa ʻo e kau ako kehe ʻa ia naʻa nau ʻi he kalasi lea faka-Falaniseé. Naʻá ma ʻohovale ʻi he taimi naʻe toe vaheʻi ai kimaua ki Kānatá. Naʻá ku taʻu 34 pē, pea naʻe vaheʻi au ko e ʻovasia ʻo e vaʻá. ʻI he taimi naʻá ku fakamanatu ai kia Tokoua Knorr ʻoku ou fuʻu kei siʻí, naʻá ne tokoniʻi au ke u ongoʻi falala-pau lahi ange. Mei he kamataʻangá pē, naʻá ku feinga ke talanoa ki he niʻihi ʻoku lahi ange ʻenau taukeí ki muʻa ke fai ʻa e ngaahi fili mahuʻingá.

Lolotonga ʻa e ngāue kia Sihova ʻi Pētelí, naʻá ku maʻu ʻa e faingamālie fakafiefia ke ako mei he niʻihi kehé. Naʻá ku fakaʻapaʻapaʻi mo fakamahuʻingaʻi ʻa e kau mēmipa kehe ʻo e Kōmiti Vaʻá. Kuó u toe ako ha meʻa lahi mei he fanga tokoua mo e fanga tuofāfine lelei ʻe lauingeau, kei siʻi mo e taʻumotuʻa, ʻa ia kuó u fetaulaki mo ia ʻi heni ʻi he vaʻá pea ʻi he fakatahaʻanga kehekehe ʻa ia naʻá ma ngāue aí.

ʻI Pēteli, kuó u toe maʻu ai ʻa e faingamālie ke faiako pea tokoniʻi ʻa e niʻihi ke fakaivimālohiʻi ʻenau tui kia Sihova. Naʻe tala ange ʻe he ʻapositolo ko Paulá kia Tīmote: “Hokohoko atu ʻi he ngaahi meʻa naʻá ke ako.” Naʻe toe pehē ʻe Paula: “Ko e ngaahi meʻa ko ia naʻá ke fanongo ai meiate aú ʻa ia naʻe poupou ki ai ha kau fakamoʻoni tokolahi, tuku atu ʻa e ngaahi meʻá ni ki ha kau tangata faitōnunga, ʻa ia, ko e meʻa leva ʻe hokó, te nau hoko ai ʻo taau feʻunga ke akoʻi ʻa e niʻihi kehé.” (2 Tīm. 2:2; 3:14) Kuó u ʻi Pēteli ʻi he taʻu eni ʻe 57. Kuo ʻeke mai ʻe he niʻihi ʻa e meʻa kuó u akó. Ko ʻeku talí ʻoku faingofua: Fai maʻu pē ʻa e meʻa ʻoku loto ʻa e kautaha ʻa Sihová ke ke faí. Pea falala ʻe tokoniʻi koe ʻe Sihova.

ʻOku ou kei manatuʻi lelei ʻa e taimi naʻá ku aʻu ai ki Pētelí. Ko ha kiʻi talavou mā mo taʻetaukei au. Lolotonga ʻa e ngaahi taʻu kotoa ko ení, kuo tokoniʻi au ʻe Sihova. Kuó ne faʻa ngāueʻaki ʻa e fanga tokoua mo e fanga tuofāfine anga-ʻofa ke tokoniʻi au ʻi he taimi ʻoku ou fiemaʻu lahi taha aí. ʻI he foungá ni, ʻoku tala mai ʻe Sihova kiate au: “ʻOua ʻe manavahe; ko au ʻoku ou tokoniʻi koe.”—ʻAi. 41:13.