1, 2. (a) Ko hai naʻe ʻuluaki fakatupu ʻe he ʻOtuá, pea naʻe anga-fēfē hono ngāueʻaki ia ʻe Sihová? (e) ʻOku anga-fēfē ʻetau ʻiloʻi ʻoku fokotuʻutuʻu maau ʻa e kau ʻāngeló?

 KO HOTAU Tokotaha-Fakatupú, ʻa Sihova, ʻokú ne fai ʻa e meʻa kotoa pē ʻi ha founga fokotuʻutuʻu maau. ʻUluakí, naʻá ne fakatupu hono ʻAló, ʻa Sīsū. ʻOku ui ʻe he Tohi Tapú ʻa Sīsū “ko Folofola” koeʻuhí ko e fakafofonga mahuʻinga taha ia ʻa e ʻOtuá. ʻOku pehē ai: “ʻI he kamataʻangá naʻe ʻi ai ʻa Folofola, pea ko Folofolá naʻe ʻi ai fakataha mo e ʻOtuá.” Kuó ne tauhi kia Sihova ʻi hēvani ʻi he taʻu ʻe laui miliona. ʻOku toe pehē ʻe he Tohi Tapú fekauʻaki mo Sīsū: “Naʻe hoko mai ʻa e ngaahi meʻa kotoa pē ʻo ʻi ai fakafou ʻiate ia, pea naʻe ʻikai ha momoʻi meʻa ʻe taha ʻe hoko mai ʻo ʻi ai taʻekau ai ia.” Laka hake ʻi he taʻu ʻe 2,000 kuohilí, naʻe fekau hifo ʻe Sihova ʻa Folofola ki he māmaní ko ha tangata haohaoa ko Sīsū Kalaisi. Naʻe fakahoko faitōnunga ʻe Sīsū ʻa e meʻa kotoa pē naʻe kole ange ʻe heʻene Tamaí kiate ia ke ne faí.—Sione 1:1-3, 14.

² Ki muʻa ke ne haʻu ki he māmaní, naʻe ngāue mateaki ʻa Sīsū ko e “tufunga lahi” ʻa e ʻOtuá. (Pal. 8:30) Fakafou ʻia Sīsū, naʻe fakatupu ʻe Sihova ʻa e kau ʻāngelo ʻe laui miliona ʻi hēvani. (Kol. 1:16) ʻOku tala mai ʻe he Tohi Tapú kia kitautolu kuo fokotuʻutuʻu maau lelei ʻe Sihova ʻa e kongakau ʻāngeló. ʻOku pehē ai: “Ko e tokoʻi afe laui afe naʻe fakafeʻao kiate ia, pea ko e tokoʻi mano laui mano naʻe tuʻu ʻi hono ʻao.”—Tan. 7:10; Saame 103:21.

 3. Ko e fetuʻu ʻe fiha ʻoku ʻi aí? ʻOku anga-fēfē hono fokotuʻutuʻu maau ʻa e ngaahi fetuʻú mo e ngaahi palanité?

 ³ ʻI he taimi naʻe fakatupu ai ʻe Sihova ʻa e ʻunivēsí, naʻá ne fakatupu ʻa e ngaahi fetuʻu lahi ʻaupito mo e ngaahi palanite ʻa ia ʻe ʻikai ʻaupito te ke lava ʻo lau kotoa kinautolu. Ko e fetuʻu ʻe fiha ʻoku ʻi aí? Ko e nusipepa ʻe taha, ko e Chronicle, ʻi Houston, Tekisisi, ʻoku līpooti ai ko e hili ha ako ki muí ni, ʻoku fakakaukau he taimí ni ʻa e kau saienisí ʻoku ʻi ai ʻa e ngaahi fetuʻu ʻe 300 sekitiliona ʻi he ʻunivēsí. ʻA ia ko e 3 ʻo muimui atu ai ʻa e foʻi noa ʻe 23! ʻOku fokotuʻutuʻu maau ʻa e ngaahi fetuʻu mo e ngaahi palanite ko ení? ʻIo, ʻoku fokotuʻutuʻu maau ʻa e ngaahi kulupu fetuʻú ko e ngaahi kaniva. Ko e kaniva taki taha ʻoku ʻi ai ʻa e ngaahi palanite mo e ngaahi fetuʻu ʻe laui piliona pe aʻu ki he laui tiliona. Ko e lahi taha ʻo e ngaahi kanivá ʻoku fokotuʻutuʻu maau leva ia ki he ngaahi kulupu ʻoku ui ko e ngaahi pupunga, pea ko e ngaahi pupunga ko ení ʻoku fokotuʻutuʻu maau ia ki he ngaahi kulupu lalahi ange ʻoku ui ko e ngaahi fuʻu pupunga lalahi.

 4. Ko e hā ʻoku ʻuhinga lelei ai ke fakakaukau ko e kau sevāniti ʻa e ʻOtuá ʻi he māmaní ʻe fokotuʻutuʻu maau?

⁴ Ko e kau ʻāngelo ʻi hēvaní mo e ngaahi fetuʻu mo e ngaahi palanite ʻi he ʻunivēsí ʻoku fokotuʻutuʻu maau ia ʻi ha founga fakaofo. (ʻAi. 40:26) Ko ia ʻe lava ke tau tui ko hotau Tokotaha-Fakatupú ʻokú ne toe fokotuʻutuʻu maau ʻene kau sevāniti ʻi he māmaní. ʻOku mātuʻaki mahuʻinga ke fokotuʻutuʻu maau lelei kinautolu koeʻuhí ʻoku nau maʻu ʻa e ngāue mahuʻinga ʻaupito ke fai. ʻI he taʻu ʻe laui afe, kuo fokotuʻutuʻu maau ai ʻe Sihova ʻene kakaí koeʻuhí ke lava ʻo nau lotu faitōnunga kiate ia. ʻOku ʻi ai ʻa e ngaahi fakatātā lahi ʻoku fakamoʻoniʻi ai kuó ne ʻiate kinautolu pea “ʻoku ʻikai ko ha ʻOtua ia ʻo e māveuveu, ka ʻo e melino.”—Lau ʻa e 1 Kolinitō 14:33, 40.

 5. Naʻe anga-fēfē hono fakafeʻātungiaʻi ʻa e taumuʻa ʻa e ʻOtuá ki he māmaní?

⁵ ʻI he taimi naʻe fakatupu ai ʻe Sihova ʻa e ʻuluaki ongo meʻa fakaetangatá, naʻá ne tala ange kia kinaua: “Mo fakatupu, mo fakatokolahi, mo fakafonu ʻa mamani, pea ikuna ia: pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Sēn. 1:28) Naʻe ʻikai ke fakatupu fakaʻangataha ʻe Sihova ʻa e kakai ʻe laui miliona. Ko ʻĀtama mo ʻIvi te na maʻu ha fānau, pea ʻe maʻu ʻe heʻena fānaú ha fānau, kae ʻoua kuo mafola atu ʻa e fāmili fakaetangatá ʻi he māmaní. Ko e taumuʻa ʻa e ʻOtuá kia kinauá ke ʻai ʻa e māmaní kotoa ko ha palataisi. ʻI he taimi naʻe talangataʻa ai ʻa ʻĀtama mo ʻIvi ki he ʻOtuá, naʻe fakafeʻātungiaʻi ai ʻa e taumuʻa ko ení ʻi ha vahaʻa taimi. (Sēn. 3:1-6) Ko e tokolahi taha ʻo e fānau ʻa ʻĀtama mo ʻIví naʻe ʻikai te nau tauhi kia Sihova, pea hili ha taimi, “naʻe ʻafioʻi ʻe Sihova kuo fakautuutu ʻa e kovi ʻa e tangata ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.” Koeʻuhí ko e kotoa ʻo e fulikivanu ko ení, “kuo kaʻanga ʻa mamani,” pea “kuo opeope ʻi he fonua ʻa e fakamalohi.” Ko ia ai, naʻe fili ʻa e ʻOtuá ke fakaʻauha ʻa e kotoa ʻo e fulikivanú pea ʻomai ha lōmaki ki he kotoa ʻo e māmaní.—Sēn. 6:5, 11-13, 17.

6, 7. (a) Ko e hā naʻe fakahaofi ai ʻe Sihova ʻa Noá? (Sio ki he ʻuluaki fakatātā ʻi he kupú ni.) (e) Ko e hā naʻe hoko ki he kotoa ʻo e kakai naʻe fakafisi ke fanongo kia Noá?

⁶ Naʻe ʻikai fakaʻauha ʻa e tokotaha kotoa pē ʻi he Lōmakí. Ko Noa “naʻe ʻilo ki ai ha hoifua ʻi he finangalo ʻo Sihova” koeʻuhí “ko e tangata angatonu” ia naʻe ‘takaua mo e ʻOtuá.’ Naʻe fekau ʻe Sihova ʻa Noa ke ne langa ha fuʻu ʻaʻake pea ʻoange kiate ia ʻa e kotoa ʻo e ngaahi fakahinohino naʻá ne fiemaʻu ke faiʻaki iá. (Sēn. 6:8, 9, 14-16) Naʻe faʻu ʻa e ʻaʻaké ke tētē ʻi he vaí koeʻuhí ke hao ʻa e kakai mo e fanga manu ʻi aí ʻi he Lōmakí. Naʻe fai tofu pē ʻe Noa mo hono fāmilí ʻa e meʻa naʻe fekau ʻe Sihova ke nau faí. Hili ʻenau fakahū ʻa e fanga manú ki he ʻaʻaké, naʻe “tapuni ʻe Sihova.”—Sēn. 7:5, 16.

⁷ Naʻe fakatokanga ʻa Noa ki he kakaí fekauʻaki mo e Lōmakí, ka ko e tokolahi taha ʻo kinautolú naʻa nau fakafisi ke fanongo. (2 Pita 2:5) ʻI he taʻu 2370 ki muʻa ʻia Kalaisí, naʻe kamata  ʻa e Lōmakí. Naʻe fakaʻauha ʻe Sihova ʻa e “meʻa moʻui kotoa pe,” kae fakahaofi ʻi he ʻaʻaké ʻa e faitōnunga ko Noá, ko hono ngaahi fohá mo honau ngaahi uaifí. (Sēn. 7:23) Ko e tokotaha kotoa pē ʻi he māmaní he ʻahó ni ko e tupu mei he faitōnunga ko Noá mo hono fāmilí. Ka naʻe ʻikai ha taha ʻi he kakai naʻe fakafisi ke fanongo ki he fakatokanga ʻa Noá naʻe hao ʻi he Lōmakí.

 8. Naʻe anga-fēfē hono fokotuʻutuʻu maau ʻe he ʻOtuá ʻene kakaí ʻi he taimi naʻá ne fekau ai ʻa e kau ʻIsilelí ke hū ki he Fonua ʻo e Talaʻofá?

⁸ Laka hake ʻi he taʻu ʻe 800 hili ʻa e Lōmakí, naʻe fokotuʻutuʻu maau ʻe he ʻOtuá ʻa e kau ʻIsilelí ki ha puleʻanga. Naʻá ne fokotuʻutuʻu maau ʻa e tafaʻaki kotoa pē ʻenau moʻuí, tautefito ki he founga ʻoku totonu ke nau lotu ai kiate iá. Ko e fakatātaá, naʻá ne vaheʻi ʻa e niʻihi ʻo kinautolu ke hoko ko e kau taulaʻeiki mo e kau Līvai. Naʻá ne toe fokotuʻutuʻu maau ʻa e kau fefine ʻe niʻihi ke “fakataha ki he matapa ʻo e Teniti Feʻiloakiʻanga.” (ʻEki. 38:8) Naʻe fekau ʻe Sihova ki mui ai ʻa e puleʻangá ke nau ʻalu ʻo nofo ʻi Kēnani. Ka ko e tokolahi taha ʻo e kau ʻIsilelí naʻa nau ilifia pea fakafisi ke ʻalu, ko ia naʻá ne tala ange kia kinautolu: “Tangi ʻeku moʻui haʻamou hu ki he fonua, ʻa ia naʻa ku hiki ai hoku nima ke tuku moʻomou nofoʻanga; ko Kelepi pe ko e foha ʻo Sifune, mo Siosiua ko e foha ʻo Nuni.” Ko Siosiua pē mo Kēlepi naʻá na ʻomi ha ongoongo lelei hili ʻa e asiasi ki he Fonua ʻo e Talaʻofá. (Nōm. 14:30, 37, 38) Ki mui ai, naʻe vaheʻi ʻe Sihova kia Siosiua ke ne tataki ʻa e kau ʻIsilelí. (Nōm. 27:18-23) Ki muʻa pē ke tataki ʻe Siosiua kinautolu ki Kēnaní, naʻe tala ange ʻe Sihova kiate ia: “Ke ke lototoʻa, mo tuʻu kalikali; ʻoua te ke manavahe, pea ʻoua te ke tailiili; he ko Sihova ko ho ʻOtua te ne ʻiate koe ʻi he meʻa kotoa ʻoku ke ʻalu ki ai.”—Sios. 1:9.

 9. Naʻe anga-fēfē ongoʻi ʻa Lēhapi fekauʻaki mo Sihova mo ʻene kakaí?

⁹ Naʻe kau ʻa Sihova ko e ʻOtuá mo Siosiua ʻi ha feituʻu pē naʻá ne ʻalu ki ai. Ko e fakatātaá, ʻi he taʻu 1473 ki muʻa ʻia Kalaisí, naʻe ʻapitanga ʻa e kau ʻIsilelí ʻo ofi ki he kolo Kēnani ko Sielikoó. Naʻe fekau atu ʻe Siosiua ʻa e ongo tangata ke na asiasi ʻi Sielikō, ʻa ia naʻá na fetaulaki ai mo e paʻumutu ko Lēhapí. Naʻe feinga ʻa e kakai tangata ʻi he koló ke puke ʻa e ongo asiasí, ka naʻe fūfuuʻi kinaua ʻe Lēhapi ʻi hono funga  falé. Naʻá ne tala ange ki he ongo asiasi ʻIsilelí: “ʻOku ou ʻilo kuo foaki ʻe Sihova ʻa e fonua ni kiate kimoutolu . . . he kuo mau fanongo ki he fakamatuʻu ʻe Sihova ʻa e Tahi Kulokula ʻi homou ʻao . . . pea mo e meʻa naʻa mou fai ki he ongo tuʻi Amoli.” Naʻá ne tānaki atu: “Ko homou ʻOtua ko Sihova ko ia ʻoku ʻOtua ʻi langi ʻi ʻolunga, pea ki mamani ʻi lalo.” (Sios. 2:9-11) Naʻe poupouʻi ʻe Lēhapi mo hono fāmilí ʻa e kakai fili ʻa Sihová. Ki mui ai, ʻi he taimi naʻe ikunaʻi ai ʻe he kau ʻIsilelí ʻa Sielikoó, naʻe fakapapauʻi ʻe Sihova naʻe hao ʻa Lēhapi mo hono fāmilí. (Sios. 6:25) Naʻe fakaʻapaʻapaʻi lahi ʻe he faitōnunga ko Lēhapí ʻa Sihova mo ʻene kautahá.

10. Ko e hā naʻe tala ange ʻe Sīsū ki he kau taki lotu Siú, pea ko e hā naʻá ne lea pehē ai kia kinautolú?

¹⁰ Lolotonga ʻa e hoko ʻa e faitōnunga ko Siosiuá ko honau takimuʻá, naʻe lavameʻa pea ikunaʻi ʻe he kau ʻIsilelí ʻa e fonua ko Kēnaní, mei he kolo ki he kolo. Ka ki mui ai, laka hake ʻi ha vahaʻa taimi ko e taʻu ʻe 1,500, naʻe toutou taʻefaitōnunga ʻa e kau ʻIsilelí. ʻI he taimi naʻe haʻu ai ʻa Sīsū ki he māmaní, naʻe hoko ʻa e kau ʻIsilelí ʻo mātuʻaki talangataʻa kia Sihova mo ʻene kau palōfitá ʻo ui ai ʻe Sīsū ʻa e kau ʻIsileli naʻe nofo ʻi Selusalemá ko e kau “fakapoongi ʻo e kau palōfitá.” (Lau ʻa e Mātiu 23:37, 38.) Naʻe siʻaki ʻe Sihova ʻa e kau taki lotu Siú koeʻuhí ko ʻenau talangataʻá. Naʻe tala ange ʻe Sīsū kia kinautolu: “Ko e Puleʻanga ʻo e ʻOtuá ʻe toʻo ia meiate kimoutolu pea ʻe foaki ia ki ha puleʻanga ʻokú ne ʻomi hono ngaahi fuá.”—Māt. 21:43.

11, 12. (a) Ko e hā ʻa e fakamoʻoni naʻe kamata ke hōifua ʻa Sihova ʻi ha kautaha foʻou kae ʻikai ko e puleʻanga ʻIsilelí? (e) Ko hai naʻe kau ki he kautaha foʻou ko ení?

¹¹ Taimi nounou hili ʻa e haʻu ʻa Sīsū ki he māmaní, naʻe siʻaki ʻe Sihova ʻa e puleʻanga ʻIsilelí. Ka ʻe kei ʻi ai pē ʻene kautaha ʻo e kau sevāniti faitōnunga ʻi he māmaní ʻa ia ʻoku nau talangofua kia Kalaisi mo ʻene ngaahi akonakí. ʻI he ʻaho ʻo e Penitekosí ʻi he taʻu 33, naʻe kamata ke hōifua ʻa Sihova ʻi ha kautaha foʻou kae ʻikai ko e puleʻanga ʻIsilelí. Ko e kau ākonga ʻe toko 120 nai ʻa Sīsuú naʻa nau fakatahataha fakataha pea “fakafokifā naʻe ongo mai ha longoaʻa mei he langí ʻo hangē ko e mumuhu mai ʻa ha fuʻu matangi mālohí, pea naʻá ne fakafonu kotoa ʻa e fale.” Pea “naʻe hā kiate kinautolu ʻa e ngaahi uloʻi afi naʻe hangē ha ngaahi ʻeleló pea naʻe movetevete atu, ʻo nofo taki taha ʻi he tokotaha tāutaha ʻo kinautolu, pea naʻa nau hoko ʻo fonu kotoa ʻi he laumālie māʻoniʻoní pea kamata ke nau lea ʻi he ngaahi lea kehekehe.” (Ngā. 2:1-4) Ko e meʻa fakaofo ko ení ʻoku fakahaaʻi taʻetoeveiveiua ai naʻe poupouʻi ʻe Sihova ʻa e kautaha foʻou ko eni ʻo e kau ākonga ʻa Kalaisí.

¹² ʻI he ʻaho tatau ko iá, ko e kakai ʻe toko 3,000 nai naʻe kau atu ki he kautaha foʻou ʻa Sihová. ʻOku toe pehē ʻe he Tohi Tapú “naʻe hokohoko atu hono tānaki fakaʻaho mai ʻe Sihova kiate kinautolu ʻa e faʻahinga kuo fakamoʻuí.” (Ngā. 2:41, 47) Naʻe lavameʻa ʻaupito ʻa e kau ākonga ʻa Sīsuú ʻi heʻenau ngāue fakamalangá ʻo pehē ai ʻe he Tohi Tapú: “Naʻe tupu ai pē ʻa e folofola ʻa e ʻOtuá, pea naʻe mātuʻaki liuliunga lahi ai pē ʻa e tokolahi ʻo e kau ākongá ʻi Selusalema.” Ko e kakai loto-totonu tokolahi, kau ai ʻa e kau taulaʻeiki tokolahi, naʻa nau tali ʻa e akonaki ʻa Kalaisí. (Ngā. 6:7) Ki mui ai, ʻi he taimi naʻe ʻomai ai ʻe Sihova ʻa e kakai naʻe ʻikai ko e kau Siú ki he fakatahaʻanga Kalisitiané, naʻe fakamoʻoniʻi lahi ange ai naʻá ne poupouʻi ʻa e kautaha foʻoú.—Lau ʻa e Ngāue 10:44, 45.

13. Ko e hā ʻa e ngāue naʻe ʻoange ʻe he ʻOtuá ki heʻene kautaha foʻoú?

¹³ Naʻe ʻikai ha veiveiua fekauʻaki mo e ngāue naʻe ʻoange ʻe he ʻOtuá ke fai ʻe he kau muimui ʻo Kalaisí. Lolotonga ʻene ʻi māmaní, naʻe fokotuʻu ʻe Sīsū ʻa e faʻifaʻitakiʻanga maʻa kinautolu. Taimi nounou hili ʻene papitaisó, naʻe kamata malanga ʻa Sīsū fekauʻaki mo e “Puleʻanga ʻo hēvaní.” (Māt. 4:17) Naʻe akoʻi ʻe Sīsū ʻene kau ākongá ke nau fai ʻa e ngāue tatau. Naʻá ne tala ange foki kia kinautolu te nau hoko ko e kau fakamoʻoni fekauʻaki mo ia “ʻi Selusalema, ʻi he kotoa ʻo Siuteá  mo Samēlia, pea ki he feituʻu taupotu taha ʻo e māmaní.” (Ngā. 1:8) Naʻe mahinoʻi ʻe he kau ākonga ʻa Sīsuú ʻa e meʻa naʻe totonu ke nau faí? ʻIo! ʻI he taimi ʻe taha, naʻe tala ange ʻe Paula mo Panepasa ki he kau Siú ʻe malanga he taimí ni ʻa e kau ākonga ʻa Sīsuú ki he kakai ʻo e ngaahi puleʻanga kehé. Naʻe pehē ʻe Paula mo Panepasa: “Kuo fai mai ʻe Sihova ha fekau kiate kimautolu fakafou ʻi he ngaahi leá ni, ‘Kuó u fokotuʻu koe ko ha maama ki he ngaahi puleʻangá, ke ke hoko ko ha fakamoʻui ʻo aʻu ki he feituʻu taupotu taha ʻo e māmaní.’” (Ngā. 13:14, 45-47) Talu mei he ʻuluaki senitulí, kuo tala ʻe he kautaha ʻa e ʻOtuá ki he niʻihi kehé fekauʻaki mo e meʻa kuo fai ʻe Sihova ke fakahaofi ai ʻa e faʻahinga ʻo e tangatá.

14. Ko e hā naʻe hoko ki Selusalema ʻi he ʻuluaki senitulí, ka ko hai naʻe haó?

¹⁴ Ko e tokolahi taha ʻo e kau Siú naʻe ʻikai ke nau tali ʻa e ongoongo lelei fekauʻaki mo Sīsuú, pea naʻe ʻikai ke nau fanongo ʻi he taimi naʻe tala ange ai ʻe Sīsū kia kinautolu fekauʻaki mo ha fakatamaki ʻe hoko ki Selusalemá. Naʻá ne fakatokanga ki heʻene kau ākongá: “ʻI hoʻomou sio kuo ʻātakaiʻi ʻa Selusalema ʻe he kau taú, mou ʻilo leva kuo ofi hono fakaʻauhá. Tuku leva ki he faʻahinga ʻi Siuteá ke nau kamata hola ki he ngaahi moʻungá, tuku ki he faʻahinga ʻi loto Selusalemá ke nau hiki mei ai, pea tuku ki he faʻahinga ʻi he ngaahi feituʻu ʻutá ke ʻoua te nau hū ki ai.” (Luke 21:20, 21) Hangē tofu pē ko ia naʻe tomuʻa tala ʻe Sīsuú, naʻe fakaʻauha ʻa Selusalema. Naʻe angatuʻu ʻa e kau Siú ki he kau Lomá, pea ʻi he taʻu 66, naʻe ʻātakaiʻi ʻe he kau tau Lomá ʻa Selusalema pea teu pē ke fakaʻauha ia. Ka naʻe mavahe fakafokifā ʻa e kau taú, pea naʻe ʻoange ai ha faingamālie ki he kau muimui ʻo Sīsuú ke nau mavahe mei Selusalema mo Siutea. Naʻe hola ʻa e tokolahi ʻo kolosi atu ʻi he Vaitafe Sioataní pea ʻalu hake ki he ngaahi moʻungá. ʻI he taʻu 70, naʻe toe foki mai ʻa e kau tau Lomá ʻo fakaʻauha ʻa Selusalema. Ko e hā naʻe hoko ki he kau Kalisitiané? Naʻa nau hao koeʻuhí naʻa nau fanongo ki he fakatokanga ʻa Sīsuú.

15. Ko e hā naʻe kau atu ai ʻa e kakai tokolahi ki he fakatahaʻanga Kalisitiané?

¹⁵ ʻI he ʻuluaki senitulí, naʻe fakatangaʻi ʻa e kau Kalisitiané pea ʻahiʻahiʻi ʻenau tuí. Neongo ʻa e meʻá ni, naʻe hoko ʻa e kakai tokolahi ange ko e kau Kalisitiane. (Ngā. 11:19-21; 19:1, 19, 20) Ko e hā naʻe hoko ai iá? Koeʻuhí naʻe maʻu ʻe he fakatahaʻanga Kalisitiané ʻa e hōifua ʻa e ʻOtuá.—Pal. 10:22.

16. Ko e hā naʻe pau ke fai ʻe he kau Kalisitiane kotoa pē ke tauhi ke mālohi ʻenau tuí?

¹⁶ Ke tauhi ke mālohi ʻenau tuí pea nofoʻaki fāʻūtahá, ko e kotoa ʻo e kau Kalisitiané naʻe pau ke nau fai ha feinga fakafoʻituitui. Naʻe pau ke nau ako ʻa e Folofolá, maʻu maʻu pē ʻa e ngaahi fakatahá, pea faivelenga ʻi he ngāue fakafaifekaú. Naʻe fokotuʻutuʻu maau lelei ʻa e ngaahi fakatahaʻangá. Naʻe ʻi ai ʻa e kau mātuʻa mo e kau sevāniti fakafaifekau naʻa nau loto-lelei ke tokoniʻi kinautolu, pea naʻe maʻu ʻaonga ʻa e ngaahi fakatahaʻangá mei he ngāue mālohi ʻa e fanga tokoua ko ení. (Fil. 1:1; 1 Pita 5:1-4) Pehē foki, naʻa nau fiefia ʻi he ʻaʻahi ʻa e kau ʻovasia fefonongaʻakí, hangē ko Paulá. (Ngā. 15:36, 40, 41) ʻOku fakaofo ke sio ki he meimei tatau ʻetau lotu he ʻaho ní mo e kau Kalisitiane ʻi he ʻuluaki senitulí. ʻOku tau mātuʻaki houngaʻia ʻi hono fokotuʻutuʻu maau maʻu pē ʻe Sihova ʻene kau sevānití! a

17. Ko e hā ʻe lāulea ki ai ʻi he kupu hoko maí?

¹⁷ ʻOku tau moʻui ʻi he ngaahi ʻaho fakaʻosí, pea ko e māmani ʻo Sētané ʻe vavé ni ke fakaʻauha. Neongo ia, ko e konga fakaemāmani ʻo e kautaha ʻa e ʻOtuá ʻoku ngaʻunu vave ange ki muʻa ʻi ha toe taimi. ʻOkú ke ngaʻunu ki muʻa fakataha mo e kautaha ʻa Sihová? Ko e kupu hoko maí ʻe fakahaaʻi ai ʻa e founga ʻe lava ke ke fai ai ení.