1, 2. (a) Ko e hā ʻa e hokosia ʻoku fakahaaʻi ai ʻa e ʻaonga hono ʻeke ʻa e ngaahi fehuʻi totonú? (Sio ki he ʻuluaki fakatātā ʻi he kupú ni.) (e) Ko e hā ʻoku ʻikai fiemaʻu ai ke tau ilifia ʻi he ngaahi kaveinga faingataʻá?

 KO HA tuofefine Kalisitiane naʻá ne lāulea ki he Tohi Tapú mo hono husepānití, ʻa ia naʻe ʻikai ko ha taha ʻo e Kau Fakamoʻoni ʻa Sihová. Naʻe pehē ʻe he husepānití naʻá ne tui ki he Tolu-Tahaʻi-ʻOtuá. Kae kehe, naʻe ʻiloʻi ʻe he tuofefiné naʻe ʻikai nai te ne ʻiloʻi ʻa e meʻa naʻe akoʻi moʻoni ʻi hono siasí fekauʻaki mo e Tolu-Tahaʻi-ʻOtuá. Ko ia naʻá ne ʻeke fakapotopoto ange, “ʻOkú ke tui ko e ʻOtuá ko e ʻOtua, ko Sīsuú ko e ʻOtua, pea ko e laumālie māʻoniʻoní ko e ʻOtua; neongo ia, ʻoku ʻikai ko e ʻOtua ʻe tolu ka ko e ʻOtua pē taha?” Ko e meʻa fakaʻohovalé, naʻe pehē ʻe he husepānití, “ʻIkai, ʻoku ʻikai te u tui ki ai!” Ko hono olá, naʻá na fetalanoaʻaki loto-māfana pe ko hai moʻoni ʻa e ʻOtuá.

² Ko e hā ʻe lava ke tau ako mei he hokosia ko ení? Ko hono ʻeke ʻa e ngaahi fehuʻi totonu ʻi ha founga fakapotopotó ʻe lava ke mātuʻaki ʻaonga. ʻOku tau ako foki ai ʻoku ʻikai fiemaʻu ke tau ilifia ke lāulea ki he ngaahi kaveinga faingataʻa, hangē ko e Tolu-Tahaʻi-ʻOtuá, afi ʻo helí, pe ko e ʻi ai ha Tokotaha-Fakatupú. Kapau te tau falala kia  Sihova pea ki he ako ʻokú ne ʻomai kia kitautolú, ʻe lava ke tau faiako ai ʻi ha founga ʻe aʻu ki he loto ʻetau kau fanongó. (Kol. 4:6) ʻI he kupu ko ení, te tau lāulea ai ki he founga ke faiako ola lelei ange aí ʻaki (1) hono ʻeke ʻa e ngaahi fehuʻi koeʻuhí ke lava ʻa e tokotahá ʻo ʻomai ʻene fakakaukaú, (2) fakaʻuhinga ʻi he meʻa ʻoku leaʻaki ʻe he Folofolá, mo e (3) ngāueʻaki ʻa e talanoa fakatātā ke fakamahinoʻi ʻa e poiní.

3, 4. Ko e hā ʻoku mahuʻinga ai ke tau ngāueʻaki ʻa e ngaahi fehuʻí ke ʻiloʻi ai ʻa e meʻa ʻoku tui ki ai ha tokotaha? ʻOmai ha fakatātā.

³ ʻE lava ke tokoniʻi kitautolu ʻe he ngaahi fehuʻí ke ʻiloʻi ʻa e meʻa ʻoku tui ki ai ha tokotaha. Ko e hā ʻoku mahuʻinga aí? ʻOku pehē ʻe he Palōveepi 18:13: “Ko ia ʻoku fai ʻene tali ʻi he teʻeki ke ne fanongo, ʻoku hoko ko e fakaʻilonga o ʻene vale mo e meʻa fakama.” Ko ia ʻoku ʻuluaki fiemaʻu ke tau ʻiloʻi ʻa e meʻa ʻoku tui moʻoni ki ai ʻetau tokotaha fanongó. Kapau heʻikai ke tau fai eni, ʻe lava ke tau fakamoleki ha taimi lahi ʻi he feinga ke fakamoʻoniʻi ʻoku hala ʻa e foʻi fakakaukau ko iá pea toki ʻiloʻi leva ʻoku ʻikai pē ke tui ki ai ʻa e tokotahá ia.—1 Kol. 9:26.

⁴ Ko e fakatātaá, te tau lāulea nai mo ha taha ki he kaveinga fekauʻaki mo helí. ʻOku tui ʻa e niʻihi ko helí ko ha feituʻu ʻoku fakamamahiʻi ai ʻa e kakai koví ʻaki ʻa e afi. ʻOku tui ʻa e niʻihi ko e ʻi helí ʻoku ʻuhinga pē ia ko e ʻikai kaumeʻa mo e ʻOtuá. Ko ia ʻe lava ke tau leaʻaki nai ha meʻa hangē ko ení: “Koeʻuhí ʻoku maʻu ʻe he kakaí ha fakakaukau kehekehe fekauʻaki mo e helí, ʻoku fēfē nai hoʻo fakakaukaú?” Hili ʻa e fanongo ki he tokotahá, te tau malava ai ke tokoniʻi ia ke ne mahinoʻi ʻa e meʻa ʻoku akoʻi ʻe he Tohi Tapú.

 5. ʻE lava fēfē ke tokoniʻi kitautolu ʻe he ngaahi fehuʻí ke ʻiloʻi ʻa e ʻuhinga ʻoku tui pehē ai ha tokotaha?

⁵ ʻE lava ke toe tokoniʻi kitautolu ʻe he ngaahi fehuʻi fakapotopotó ke ʻiloʻi ʻa e ʻuhinga ʻoku tui pehē ai ha tokotaha. Ko e fakatātaá, fēfē kapau ko e tokotaha ʻoku tau fetaulaki ʻi he ngāue fakafaifekaú ʻokú ne pehē ʻoku ʻikai ke tui ia ki he ʻOtuá? Te tau fakamahalo nai ʻoku ʻikai ke tui ʻa e tokotahá naʻe fakatupu kitautolu. (Saame 10:4) Neongo ia, ko e kakai ʻe niʻihi, kuo mole ʻenau tui ki he ʻOtuá koeʻuhí kuo nau sio ki he faingataʻaʻia ʻa e niʻihi kehé pe ʻoku nau faingataʻaʻia lahi mo kinautolu foki. ʻOku ʻikai malava ke nau tui ʻe fakaʻatā ʻe ha ʻOtua ʻofa ʻa e faingataʻa peheé. Ko ia ai, kapau ʻoku pehē ʻe ha tokotaha-ʻapi, “ʻOku ʻikai ke u tui ki he ʻOtuá,” ʻe lava ke tau ʻeke ange, “Kuó ke ongoʻi pehē maʻu pē?” Kapau ʻoku pehē ʻe he tokotahá ʻikai, te tau ʻeke ange nai pe naʻe hoko ha meʻa ʻo fakatupunga ai ʻene veiveiua ki he ʻi ai ʻa e ʻOtuá. Ko ʻene talí ʻe tokoniʻi nai ai kitautolu ke ʻiloʻi ʻa e founga lelei taha ke tokoniʻi ai iá.—Lau ʻa e Palōveepi 20:5.

 6. Ko e hā ʻoku totonu ke tau fai hili hono ʻeke ha fehuʻi?

⁶ Hili hono ʻeke ha fehuʻi, ʻoku fiemaʻu moʻoni ke tau fanongo ki he tali ʻa e tokotahá pea ʻai ke ne ʻiloʻi ʻoku tau fakaʻapaʻapaʻi ʻa e anga ʻene ongoʻí. Ko e fakatātaá, koeʻuhí ko ha fakatamaki, ʻokú ne pehē nai ʻokú ne veiveiua ki he ʻi ai ha Tokotaha-Fakatupu ʻofá. ʻUluakí, ʻoku totonu ke tau ʻai ke ne ʻiloʻi ʻoku ʻikai hala ke fifili ki he ʻuhinga ʻoku tau faingataʻaʻia aí. (Hap. 1:2, 3) ʻE lava leva ke tau fakamatalaʻi ʻa e founga ʻoku tau ʻiloʻi ai ʻoku ʻi ai ʻa e ʻOtuá. Kapau te tau anga-kātaki mo anga-ʻofa, te ne loto nai ke ako lahi ange. a

 7. Ko e hā kuo pau ke tau fai ke hoko ʻo ola lelei ai ʻi heʻetau ngāue fakafaifekaú?

⁷ Ko e Tohi Tapú ʻetau meʻangāue mahuʻinga taha ʻi he ngāue fakafaifekaú. ʻOkú ne tokoniʻi kitautolu ke tau “maʻu ʻa e malava kakato, kuo teuʻi kakato ki he ngāue lelei kotoa pē.”  (2 Tīm. 3:16, 17) Ke hoko ʻo ola lelei ʻi he ngāue fakafaifekaú, kuo pau ke tau fai ʻa e meʻa lahi ange ʻi hono lau pē ʻa e ngaahi konga Tohi Tapu lahi. ʻOku fiemaʻu ke tau ʻilo ʻa e founga ke fakaʻuhinga ai ʻi he meʻa ʻoku leaʻaki ʻe he ngaahi konga Tohi Tapú mo e founga ke fakamatalaʻi ai iá. (Lau ʻa e Ngāue 17:2, 3.) Ke fakatātaaʻi, tau lāulea ki he fakatātā ʻe tolu.

8, 9. (a) Ko e hā ʻa e founga ʻe taha ke fakaʻuhinga ai mo ha tokotaha ʻokú ne tui ʻoku tatau ʻa Sīsū mo e ʻOtuá? (e) Kuo anga-fēfē hoʻo tokoniʻi ʻa e kakaí ke nau fakaʻuhinga ʻi he kaveinga ko ení?

⁸ Fakatātā 1: ʻI heʻetau ngāue fakafaifekaú, ʻoku tau fetaulaki ai mo ha tokotaha ʻokú ne tui ʻoku tatau ʻa Sīsū mo e ʻOtuá. Ko e hā ʻa e ngaahi konga Tohi Tapu te tau ngāueʻaki ke fakaʻuhinga ai mo e tokotaha-ʻapí? Te tau kole ange nai kiate ia ke ne lau ʻa e ngaahi lea ʻa Sīsū ʻi he Sione 6:38: “Kuó u ʻalu hifo mei he langí ke fai, ʻo ʻikai ki hoku lotó, ka ki he finangalo ʻo ia naʻá ne fekau mai aú.” Hili hono lau ʻa e veesi ko iá, ʻe lava ke tau ʻeke ange ki he tokotahá: “Kapau ko Sīsū ʻa e ʻOtuá, ko hai naʻá ne fekau hifo ia mei he langí? ʻIkai ʻe lahi ange ʻa e Tokotaha ko iá ʻia Sīsū? He ko ē, ʻoku māʻolunga ange ʻa e tokotaha ʻokú ne fai ʻa e fekauʻi maí ʻi he tokotaha ʻoku fekauʻí.”

⁹ ʻE lava ke tau toe lau ʻa e Filipai 2:9, ʻa ia ʻoku fakamatalaʻi ai ʻe he ʻapositolo ko Paulá ʻa e meʻa naʻe fai ʻe he ʻOtuá hili ʻa e pekia ʻa Sīsū pea toetuʻú. ʻOku pehē ʻe he vēsí naʻe ʻoange ʻe he ʻOtuá kia Sīsū “ha tuʻunga māʻolunga peá ne foaki anga-lelei ange kiate ia ʻa e hingoa ʻa ia ʻoku māʻolunga ia ʻi he hingoa kehe kotoa pē.” Ke tokoniʻi ʻa e tokotahá ke fakaʻuhinga ʻi he konga Tohi Tapu ko iá, te tau ʻeke ange nai: “Kapau naʻe tatau ʻa Sīsū mo e ʻOtuá ki muʻa ke ne pekiá pea ʻoange kiate ia ʻe he ʻOtuá ki mui ai ha tuʻunga māʻolunga ange, ʻikai ʻe ʻai ai ʻa Sīsū ia ʻo māʻolunga ʻi he ʻOtuá? Ka, ʻe lava fēfē ke māʻolunga ha taha ʻi he ʻOtuá?” Ko e faʻahinga fakaʻuhinga ko ení ʻe tokoniʻi nai ai ʻa e kakai loto-totonu ʻa ia ʻoku nau fakaʻapaʻapaʻi ʻa e Folofola ʻa e ʻOtuá ke nau fie ako lahi ange.—Ngā. 17:11.

10. (a) ʻE anga-fēfē nai haʻatau fakaʻuhinga mo e tokotaha ʻoku tui ki he afi ʻo helí? (e) Kuo anga-fēfē hoʻo tokoniʻi ʻa e kakaí ke fakaʻuhinga ʻi he kaveinga ko ení?

¹⁰ Fakatātā 2: Ko ha tokotaha-ʻapi ʻoku faingataʻa ke ne tui ʻe ʻikai fakamamahiʻi taʻengata ʻa e kakai koví ʻi he afi ʻo helí. ʻOkú ne tui nai ki he afi ʻo helí koeʻuhí ʻokú ne loto ke tauteaʻi ʻa e kakai fulikivanú ko e ngaahi meʻa kovi naʻa nau faí. ʻE anga-fēfē nai haʻatau fakaʻuhinga mo e tokotaha ʻokú ne ongoʻi peheé? ʻUluakí, ʻe lava ke tau fakapapauʻi ange kiate ia ko e faʻahinga fulikivanú ʻe tauteaʻi. (2 Tes. 1:9) ʻE lava leva ke tau ʻai ia ke ne lau ʻa e Sēnesi 2:16, 17, ʻa ia ʻoku fakahaaʻi ai ko e tautea ʻo e angahalá ko e mate. Te tau fakamatalaʻi nai koeʻuhi ko e nunuʻa ʻo e angahala ʻa ʻĀtamá, ʻoku angahalaʻia ai ʻa e kotoa ʻo e faʻahinga ʻo e tangatá.  (Loma 5:12) ʻE lava ke tau pehē naʻe ʻikai leaʻaki ʻe he ʻOtuá ha meʻa fekauʻaki mo e tautea ʻi he afi ʻo heli. ʻE lava ke tau lau leva ʻa e Sēnesi 3:19. ʻI he veesi ko iá, naʻe tala ai ʻe he ʻOtuá kia ʻĀtama ko e tautea ki heʻene angahalá ko ʻene toe foki ki he efu. Te tau ʻeke ange nai, “Naʻe totonu hono tala ange kia ʻĀtama te ne foki ki he kelekelé kapau naʻá ne ʻalu moʻoni ki ha afi ʻo heli?” Ko ha fehuʻi pehē ʻe tokoni nai ia ki ha tokotaha loto-totonu ke fakaʻuhinga ʻi he kaveinga ko ení.

11. (a) Ko e hā ʻa e founga ʻe taha ke fakaʻuhinga ai mo ha tokotaha ʻokú ne tui ʻoku ʻalu ʻa e kakai lelei kotoa pē ki hēvani? (e) Kuo anga-fēfē hoʻo tokoniʻi ʻa e kakaí ke fakaʻuhinga ʻi he kaveinga ko ení?

¹¹ Fakatātā 3: ʻI heʻetau ngāue fakafaifekaú, ʻoku tau fetaulaki mo ha tokotaha ʻokú ne tui ʻoku ʻalu ʻa e kakai lelei kotoa pē ki hēvani. Ko e fakakaukau ko ení te ne uesia ʻa e anga hono mahinoʻi ʻe he tokotaha-ʻapí ʻa e Tohi Tapú. Ko e fakatātaá, kapau naʻe ʻai ke tau lau ʻa e Fakahā 21:4, ʻe fakamahalo nai ʻa e tokotahá ʻoku fakamatalaʻi ʻe he veesi ko ení ʻa e moʻui ʻi hēvaní. (Lau.) ʻE lava fēfē ke ke fakaʻuhinga mo ia? ʻI he ʻikai ngāueʻaki ha ngaahi veesi lahi angé, ʻe lava ke tau tokangataha ki ha kupuʻi lea ʻi he Fakahā 21:4. ʻOku pehē ai “ʻe ʻikai ke toe ʻi ai ha mate.” Ko ia ʻe lava ke tau ʻeke ange, “ʻOkú ke loto-tatau ko ha meʻa ʻe ʻikai ke toe ʻi ai, kuo pau pē naʻe ʻuluaki ʻi ai ki muʻa?” Te ne pehē nai ʻio. ʻE lava leva ke tau pehē ʻoku ʻikai ha mate ʻi hēvani. ʻOku mate ʻa e kakaí ʻi heni pē ʻi he māmaní. ʻOku ʻuhinga lelei leva ko e Fakahā 21:4 ʻokú ne fakamatalaʻi ʻa e ngaahi tāpuaki ʻi heni ʻi he māmaní.—Saame 37:29.

12. Ko e hā naʻe ngāueʻaki ai ʻe Sīsū ʻa e ngaahi talanoa fakatātaá?

¹² Naʻe ngāueʻaki ʻe Sīsū ʻa e ngaahi talanoa fakatātā ʻi he taimi naʻá ne malanga aí. (Lau ʻa e Mātiu 13:34, 35.) Naʻe tokoni ʻa e ngaahi talanoa fakatātā ko ení ke fakahaaʻi pe naʻe loto-totonu ʻene kau fanongó mo loto moʻoni ke tauhi kia Sihova. (Māt. 13:10-15) Naʻe toe ngāueʻaki ʻe Sīsū ʻa e ngaahi talanoa fakatātaá koeʻuhí ke lava ʻa e kakaí ʻo manatuʻi ʻa e meʻa naʻá ne akoʻí pea ke fiefia he fanongo kiate iá. ʻE lava fēfē ke tau ngāueʻaki ʻa e ngaahi talanoa fakatātaá ʻi heʻetau faiakó?

13. Ko e hā ʻa e talanoa fakatātā ʻe lava ke ke ngāueʻaki ke akoʻi ʻoku māʻolunga ʻa e ʻOtuá ʻia Sīsū?

¹³ ʻOku lelei tahá ke ngāueʻaki ʻa e ngaahi talanoa fakatātā faingofua. Ko e fakatātaá, kapau ʻoku tau loto ke akoʻi ko e ʻOtuá ʻoku māʻolunga ʻia Sīsū, ʻe lava ke tau ʻahiʻahiʻi ʻa e talanoa fakatātā ko ení: ʻUluakí, ʻe lava ke tau lave ko e ʻOtuá mo Sīsū fakatouʻosi naʻe fakahoa hona vahaʻangataé ki ha Tamai mo ha Foha. (Luke 3:21, 22; Sione 14:28) Hokó, ʻe lava ke tau ʻeke: “Ko e hā ʻa e faʻahinga vahaʻangatae fakafāmili te ke ngāueʻaki ke fakahaaʻi ʻoku tatau ha ongo meʻa ʻe toko ua?” ʻE pehē nai ʻe he tokotaha-ʻapí ko ha ongo tautehina pe ongo māhanga. ʻE lava ke tau pehē leva: “Ko ha fakatātā lelei ʻaupito ia. Kapau ʻoku faingofua ke tau ngāueʻaki ʻa e fakatātā peheni, ko e hā naʻe ʻikai ke ngāueʻaki ai ʻe Sīsū, ʻa e Faiako Lahí ʻa e talanoa fakatātā tatau? ʻI hono kehé, naʻá ne pehē ko e ʻOtuá ko ʻene Tamaí ia. ʻI hono fai ení, naʻe tokoniʻi ai ʻe Sīsū kitautolu ke tau sioloto atu ʻoku lahi ange ʻa e ʻOtuá pea maʻu ʻa e mafai lahi ange ʻiate ia.”

14. Ko e hā ʻa e talanoa fakatātā ʻoku fakahaaʻi ai ʻoku ʻikai ʻuhinga lelei ke ngāueʻaki ʻe he ʻOtuá ʻa e Tēvoló ke ne fakamamahiʻi ʻa e kakaí ʻi he afi ʻo helí?

¹⁴ Tau lāulea ki ha fakatātā ʻe taha. ʻOku tui ʻa e niʻihi naʻe tuku ʻe he ʻOtuá ʻa Sētane ke ne puleʻi ʻa heli. ʻE lava fēfē ke tau tokoniʻi ha mātuʻa ke ne sio ʻe ʻikai ʻuhinga lelei ke ngāueʻaki ʻe he ʻOtuá ʻa e Tēvoló ke ne fakamamahiʻi ʻa e kakaí ʻi he afi ʻo helí? ʻE lava ke tau ʻeke, “Ko e hā te ke faí kapau naʻe hoko ʻo mātuʻaki angatuʻu hoʻo kiʻi tamá pea naʻá ne fai ha ngaahi meʻa kovi lahi?” ʻE pehē nai ʻe he mātuʻá te ne fakatonutonu ʻene kiʻi tamá. Te ne toutou feinga  nai ke tokoniʻi ʻa e kiʻi tamá ke taʻofi ʻa hono fai ʻa e meʻa ʻoku koví. (Pal. 22:15) Te tau ʻeke nai, “Ko e hā te ke faí kapau ʻoku ʻikai liliu hoʻo kiʻi tamá?” ʻE pehē nai ʻe he ngaahi mātuʻa tokolahi ʻe faifai atu pē ʻo nau tauteaʻi ʻa e kiʻi tamá. ʻE lava ke tau ʻeke leva, “Fēfē kapau naʻá ke ʻiloʻi ko ha tokotaha kovi naʻá ne tākiekina hoʻo kiʻi tamá ke ne fai ʻa e ngaahi meʻa ʻoku koví?” ʻOku ʻikai ha veiveiua, ʻe ʻita ʻa e mātuʻá ʻi he tokotaha ko iá. Fakaʻosí, ke ʻai ke māʻalaʻala ʻa e poini ʻo e talanoa fakatātaá, te tau ʻeke nai, “ʻI hono ʻiloʻi naʻe tākiekina ʻe ha tokotaha kovi hoʻo kiʻi tamá, te ke kole ki he tokotaha ko iá ke ne tauteaʻi hoʻo kiʻi tamá?” Ko e moʻoni, ko e talí ko e ʻikai. Ko Sētane ʻa e tokotaha ʻokú ne tākiekina ʻa e kakaí ke fai ʻa e ngaahi meʻa ʻoku koví. Ko ia ʻoku hā mahino, heʻikai ngāueʻaki ʻe he ʻOtuá ʻa Sētane ke ne tauteaʻi ʻa e kakai ko ení.

15, 16. (a) Ko e hā ʻoku totonu ai ke ʻoua te tau ʻamanekina ʻe tali ʻe he tokotaha kotoa pē ʻa e pōpoaki ʻo e Puleʻangá? (e) ʻOku fiemaʻu ke ke hoko ko ha faiako lelei ʻaupito ka ke malava ai ʻo faiako ola lelei? Fakamatalaʻi. (Sio foki ki he puha “ Ko ha Meʻangāue ke Tokoniʻi Kitautolu ke Fai ha Tali.”)

¹⁵ Neongo kapau ʻoku tau ʻeke ʻa e ngaahi fehuʻi totonu, fakaʻuhinga ʻi he founga lelei tahá, pea ngāueʻaki ʻa e ngaahi talanoa fakatātā lelei, ʻe ʻikai tali ʻe he tokotaha kotoa pē ʻa e pōpoaki ʻo e Puleʻangá. (Māt. 10:11-14) Ko ha tokosiʻi pē naʻa nau tali ʻa e ngaahi akonaki ʻa Sīsuú neongo ko ia ʻa e Faiako lahi taha kuo moʻui mai ki he māmaní!—Sione 6:66; 7:45-48.

¹⁶ Fēfē kapau ʻoku tau ongoʻi ʻoku ʻikai ko e kau faiako lelei ʻaupito kitautolu? Naʻa mo ia, ʻe lava ke tau hoko ʻo ola lelei ʻi heʻetau malangá. (Lau ʻa e Ngāue 4:13.) ʻOku fakapapauʻi mai kia kitautolu ʻe he Tohi Tapú “ko e faʻahinga kotoa pē naʻe hehema totonu ki he moʻui taʻengatá” te nau tali ʻa e ongoongo leleí. (Ngā. 13:48) Ko ia tau hoko ʻo mafamafatatau. ʻOku totonu ke tau feinga ke fakaleleiʻi ʻetau faiakó ka ʻoku totonu ke ʻoua te tau loto-siʻi ʻi he taimi ʻoku ʻikai tali ai ʻe he faʻahinga ʻoku tau talanoa ki aí ʻa e ongoongo leleí. Kapau ʻoku tau falala kia Sihova mo e ako ʻokú ne ʻomai kia kitautolú, te tau hoko ai ko e kau faiako lelei ange, pea te tau fakatou maʻu ʻaonga ai mo e faʻahinga ʻoku fanongo mai kia kitautolú. (1 Tīm. 4:16) ʻE lava ke tokoniʻi kitautolu ʻe Sihova ke ‘tali ki he tokotaha taki taha.’ ʻI he kupu hoko maí, te tau ako ai ki he founga ke lavameʻa ai ʻi heʻetau ngāue fakafaifekaú ʻaki ʻa e muimui ki he meʻa ʻoku faʻa ui ko e Lao Koulá.