ʻI HE taimi naʻe mavahe ai ʻa e kau ʻIsilelí mei Pāpilone ʻi he taʻu 537 ki muʻa ʻia Kalaisí, naʻe mātuʻaki mahuʻingaʻia ʻa Sihova ʻi heʻenau fononga ʻo foki ki Selusalemá. Naʻá ne tala kia kinautolu: “Fakatonutonu ʻa e hala ʻo e kakai; tanu hake, tanu hake ʻa e hala tanu: Tufi ʻa e maka, ʻo fetuku.” (ʻAi. 62:10) Ko e hā nai naʻa nau faí ke talangofua ai ki he fekau ko ení? Mahalo pē ko ha kulupu ʻo e kau ʻIsilelí naʻa nau ʻalu muʻomuʻa ʻi honau fanga tokouá pea fakafonu ʻa e ngaahi anovaí pe fakatokalelei ʻa e ngaahi konga tokakovi ʻi he halá. Ko e moʻoni ko e feinga ko ení naʻe ʻai ai ke faingofua ange ʻa e fononga ʻo foki ki ʻapí.

ʻI ha founga meimei tatau, ʻoku tau muimui ʻi ha hala ʻi heʻetau tokanga ki he ngaahi vāhenga-ngāue kehekehe ʻi he ngāue ʻa Sihová. Pea ʻoku loto ʻa Sihova ke tau tokanga ki he ngāué ni fakataha mo e ngaahi fakafaingataʻaʻiaʻanga siʻi taha ʻe ala lavá. Ke lavameʻa ʻi he feinga ko iá, te tau lava kotoa ke maʻu ʻaonga mei he faleʻi ko eni ʻoku maʻu ʻi he Tohi Tapú: “Fakatokalelei ʻa e hala ʻoku ʻalu ai ho vaʻe, pea fakatotonu ho ngaahi ʻalunga kotoa pe.”—Pal. 4:26.

ʻOku pehē ʻe he Tohi Tapú: “Ko e langilangi ʻo e fatutangata ʻa honau ivi.” (Pal. 20:29) Ko e tokolahi taha ʻo e kau talavoú ʻoku nau moʻui lelei, iviiviʻia, ʻatamaiʻia mo vēkeveke ke lavameʻa ʻi he moʻuí. ʻOku faʻa sio ʻa e kakai lalahí ki he ngaahi malava mo e ngaahi talēniti ʻo e kau talavoú pea ʻamanekina te nau aʻusia ʻenau malava kakató. ʻE fiefia moʻoni ʻa e kau talavoú kapau te nau ngāueʻaki honau ngaahi talēnití mo e ngaahi malavá ʻi he ngāue ʻa Sihová.

ʻOku houngaʻia foki ʻa e kakai ʻe niʻihi ʻi he māmaní ʻi he ngaahi malava mo e ngaahi talēniti ʻo ʻetau kau talavoú. Ko e fakatātaá, ko e Kau Fakamoʻoni tokolahi ʻoku nau lelei ʻi he akó, ko ia ko e kau faiakó mo e fānau ako kehé ʻoku nau feinga nai ke fakaʻaiʻai kinautolu ke tuli ki he ako māʻolunga angé. Pe ko e kau talavou ʻoku nau lelei ʻi he ngaahi sipotí ʻoku fakalototoʻaʻi nai kinautolu ʻe he niʻihi kehé ke ʻai eni ko ha taumuʻa. Ko koe nai pe ko ha taha ʻokú ke ʻilo ʻoku fehangahangai mo e tuʻunga ko ení. Ko e hā te ne tokoniʻi ha Kalisitiane ke fai ʻa e ngaahi fili fakapotopotó?

 ʻE lava ke tokoniʻi kitautolu ʻe he ngaahi tefitoʻi moʻoni Fakatohitapú ʻi heʻetau muimui ʻi he hala ʻoku taki atu ki ha kahaʻu lavameʻa ʻi he ngāue ʻa Sihová. Ko e fakatātaá, fakakaukau ki he meʻa ʻoku leaʻaki ʻi he Koheleti 12:2 (12:1, PM): “Pea manatu ki he ʻAfifio naʻe ngaohi koe lolotonga hoʻo talavou.” ʻE lava fēfē ke ke manatu pe ko ha talavou ʻokú ke ʻilo kia Sihova?

Tau lāulea angé ki he talanoa fekauʻaki mo ha tokoua kei talavou ʻi ʻAfilika Hihifo ko ʻĒliki. a Naʻá ne saiʻia ʻi he soká. ʻI heʻene taʻu 15, naʻá ne vaʻinga ʻi ha timi fakafonua. ʻE ngalingali te ne maʻu ha faingamālie ke maʻu ha akoʻi lelei taha ʻi ʻIulope, naʻa mo e hoko nai ko ha tokotaha soka fakapalōfesinale. Lolotonga ʻa e taimi ko ení, naʻe kamata ke ako Tohi Tapu ʻa ʻĒliki mo e Kau Fakamoʻoni ʻa Sihová. ʻE anga-fēfē haʻane malava ke “manatu” kia Sihova? Pea ko e hā ʻe lava ke tau ako mei heʻene hokosiá?

Mei heʻene ako Tohi Tapú, naʻe ako ai ʻe ʻĒliki ko e ʻOtuá te ne fakaleleiʻi ʻa e ngaahi palopalema kotoa ʻa e faʻahinga ʻo e tangatá. Ko hono olá, naʻá ne ʻiloʻi ko hono fai ʻa e finangalo ʻo e ʻOtuá naʻe mahuʻinga mamaʻo ange ia ʻi he soká. Ko ia naʻá ne papitaiso pea ngāueʻaki hono taimí mo e iví ʻi he ngāue ʻa Sihová. Faifai atu pē, naʻá ne hoko ko ha sevāniti fakafaifekau, ʻo tokoni ki he fakatahaʻangá. Pea ʻi he ʻikai ke maʻu ha ako ke vaʻinga soka fakapalōfesinalé, naʻá ne maʻu ki mui ha ako faka-Kalisitiane ʻi he Ako Fakatohitapu Maʻá e Fanga Tokoua Taʻemalí.

Kapau naʻá ne hoko ko ha tokotaha vaʻinga soka fakapalōfesinale, naʻe mei tuʻumālie mo ʻiloa nai ʻa ʻĒliki. Ka naʻá ne ʻiloʻi ʻoku moʻoni ʻa e Tohi Tapú ʻi heʻene pehē: “Ko e koloa ʻa e koloaʻia ko hono kolo malohi ia; pea ʻi heʻene lau aʻana ko e fuʻu ʻa maʻolunga.” (Pal. 18:11) ʻE lava ʻe he paʻangá ke ne kākaaʻi ʻa e kakaí. ʻOku ʻikai ke ne ʻoange kia kinautolu ha maluʻanga moʻoni. ʻI hono kehé, ko e faʻahinga ʻoku feinga ke nau hoko ʻo koloaʻiá ʻoku nau faʻa ‘hokohokaʻi kinautolu ʻaki ʻa e ngaahi mamahi lahi.’—1 Tīm. 6:9, 10.

Ko e kau talavou tokolahi ʻoku nau ongoʻi fiefia mo malu ʻi he ngāue taimi-kakató. ʻOku pehē ʻe ʻĒliki: “Kuó u kau ʻi ha fuʻu ‘timi’ tokolahi ʻo e kau sevāniti taimi-kakato ʻa Sihova. Ko e timi lelei taha ia ʻoku lava ke u kau ki aí, pea ʻoku ou fakamālō kia Sihova ʻi hono fakahaaʻi mai kiate au ʻa e founga pē taha ki he fiefia mo e lavameʻa moʻoni ʻi he moʻuí.”

Fēfē koe? ʻI he ʻikai fokotuʻu ʻa e ngaahi taumuʻa ʻi he māmani ko ení, ʻe lava ke ke muimui ʻi ha hala ʻa ia te ne tokoniʻi koe ke maʻu ʻa e ngaahi faingamālie lahi ange ʻi he ngāue ʻa Sihová? ʻE lava ke ke fai ha ngaahi feinga moʻoni ke hoko ko ha tāimuʻa?—Sio ki he puha “ Maʻu ʻa e Ngaahi ʻAonga ʻOku ʻikai Maʻu ʻi he ʻUnivēsití.”

Lolotonga ʻa e ʻaʻahi ki he ʻōfisi vaʻa ʻi he ʻIunaite Seteté, naʻe sio ai ha ongo meʻa mali ʻe taha ʻi he fiefia ʻa e kau Pētelí. Ki mui ai, naʻe tohi ʻe he tuofefiné: “Naʻá ma hoko ʻo fuʻu fiemālie ʻi heʻema founga-tuʻumaʻú.” Ko ia naʻe fili ʻa e ongo meʻa malí ke ngāueʻaki lelei ange hona taimí mo e iví ʻi he ngāue ʻa Sihová.

Naʻe taulōfuʻu ki he ongo meʻa malí ke fai ʻa e ngaahi liliu ʻoku fiemaʻú. Ka ʻi he ʻaho ʻe taha, naʻá na lāulea ki he meʻa naʻe leaʻaki ʻi he Sione 8:31: “Kapau te mou nofo maʻu ʻi heʻeku leá, ko e moʻoni ko e kau ākonga kimoutolu ʻaʻaku.” Naʻá na ʻiloʻi ke hoko ko e ongo ākonga moʻoni ʻa Sīsuú, naʻe pau ke na fai ʻa e ngaahi feilaulau. Naʻá na fakaʻuhinga: “Ko e hā pē ha meʻa te ma fai ke fakafaingofuaʻi ai ʻa e moʻuí ʻoku tuha ia mo e feilaulau.” Naʻá na fakatau atu hona fuʻu falé, tuku atu mo e ngaahi meʻa kehe ʻoku ʻikai fiemaʻu, pea hiki ki ha fakatahaʻanga ʻoku fiemaʻu tokoni. ʻI he taimi ní ʻokú na tāimuʻa. ʻOkú na tokoni foki ki hono langa ʻa e ngaahi Fale Fakatahaʻanga pea ngāue pole ʻi he ngaahi fakataha-lahi fakavahé. ʻOkú na ongoʻi fēfē fekauʻaki mo e ngaahi liliu naʻá na faí? “ʻOkú ma ʻohovale ʻi he fiefia kuó ma maʻu mei he moʻui faingofua angé, ʻo fai pē ʻa e meʻa ʻoku fakalototoʻaʻi mai ʻe he kautaha ʻa Sihová ke ma faí.”

Naʻe tohi ʻe Solomone: “Ko e meʻa ki ho mata, ke sio fakahangatonu muʻa, pea fakamamaʻu ho laumata ki he meʻa ʻoku ke hanga ki ai.” (Pal. 4:25) ʻOku ʻuhinga eni ki he hā? Kuo pau ke tau nofoʻaki tokangataha ki he hala ʻe taki atu ai kitautolu ki he ngaahi faingamālie lahi ange ʻi he ngāue ʻa Sihová. ʻOku totonu ke tau fakaʻehiʻehi mei he ngaahi fakahohaʻa ʻe lava ke ne taʻofi kitautolu mei hono fokotuʻu pea aʻusia ʻetau ngaahi taumuʻá.

Ko e hā nai ʻa e taumuʻa te ke fokotuʻú? Mahalo ʻe lava ke ke hū ki he ngāue taimi-kakató. Pe ʻe lava nai  ke ke hiki ki ha fakatahaʻanga ʻoku lahi hono feituʻu ngāué kae tokosiʻi pē ʻa e kau malangá. Kapau ko ha tokoua koe, te ke malava nai ke ngāue ʻi ha fakatahaʻanga ʻoku fiemaʻu lahi ange ai ʻa e kau mātuʻá pe kau sevāniti fakafaifekaú. ʻE lava ke ke talanoa ki hoʻo ʻovasia sēketí ke ʻilo pe ko fē ʻa e ngaahi fakatahaʻanga ʻi ho feituʻú ʻoku fiemaʻu tokoní. Kapau te ke saiʻia ke ngāue ʻi ha feituʻu mamaʻo mei ho ʻapí, ʻe lava ke ke ʻeke ha fakamatala lahi ange fekauʻaki mo e ngaahi fakatahaʻanga mamaʻo ʻoku fiemaʻu tokoní. b

Tau toe fakakaukau angé fekauʻaki mo e meʻa ʻoku fakamatalaʻi ʻi he ʻAisea 62:10. Naʻe fiemaʻu ke aʻu ʻa e kau Siú ki Selusalema, ko ia ko e niʻihi ʻo kinautolu naʻa nau ngāue mālohi ʻaupito ke teuteu ʻa e halá. ʻI he ʻahó ni, ʻoku fiemaʻu foki ke ke hokohoko atu ʻi hono fai ʻa e ngaahi feinga ke aʻusia hoʻo ngaahi taumuʻá. ʻOua ʻaupito ʻe foʻi. ʻI he tokoni ʻa Sihová ʻe lava ai ke ke aʻusia ʻa e ngaahi taumuʻa ko iá. Kole kiate ia ha poto ʻi he taimi ʻokú ke feinga ai ke toʻo atu ha faʻahinga fakafaingataʻaʻiaʻanga pē. Faifai atu pē, te ke sio ai ki he founga ʻe lava ʻe he ʻOtuá ʻo tokoniʻi koe ke “fakatokalelei ʻa e hala ʻoku ʻalu ai ho vaʻe.”—Pal. 4:26.