1, 2. (a) Ko e hā naʻe pehē ʻe Sīsū ko e fekau hono ua lahi tahá? (e) Ko e hā ʻa e ongo fehuʻi te tau talí?

 ʻI HE taimi naʻe ʻeke ange ai ʻe ha Fālesi kia Sīsū pe ko e hā ʻa e fekau lahi taha ʻi he Laó, naʻe pehē ʻe Sīsū: “Kuo pau ke ke ʻofa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa.” Naʻa tau lāulea ki he ʻuhinga ʻo e meʻá ni ʻi he kupu ki muʻá. Naʻe toe tala ange ʻe Sīsū ʻa e fekau hono ua lahi tahá. Naʻá ne pehē: “Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.”—Māt. 22:34-39.

² Naʻe pehē ʻe Sīsū kuo pau ke tau ʻofa ki hotau kaungāʻapí. Ka ko hai hotau kaungāʻapí? ʻE lava fēfē ke tau fai ʻa e meʻa naʻe leaʻaki ʻe Sīsuú? ʻI he kupu ko ení, te tau tali ai ʻa e ongo fehuʻi ko iá pea te tau sio ai ki hono hanga ʻe heʻetau ʻofa ki hotau kaungāʻapí ʻo fakahōifuaʻi ʻa Sihova pea maʻu ʻaonga ai ʻa e tokotaha kotoa.

3, 4. (a) Ko e hā ʻa e talanoa fakatātā naʻe ngāueʻaki ʻe Sīsū ke fakahaaʻiʻaki ʻa e ʻuhinga ʻo e ʻofa ki hotau kaungāʻapí? (e) Naʻe anga-fēfē hono tokoniʻi ʻe he Samēliá ʻa e tangata naʻe kaihaʻasia, haha pea tuku ʻi he halá ke maté? (Sio ki he ʻuluaki fakatātā ʻi he kupú ni.)

³ ʻOku tau faʻa fakakaukau ki ha kaungāʻapi ko ha tokotaha ʻoku  nofo ofi mai kiate kitautolu. (Pal. 27:10) Ka ʻi he taimi naʻe ʻeke ange ai ʻe ha tangata kia Sīsū: “Ko hai moʻoni ʻa hoku kaungāʻapí?” naʻá ne tali ange kiate ia ʻo ngāueʻaki ʻa e talanoa fakatātā fekauʻaki mo e Samēliá pea fakamatalaʻi ʻa e ʻuhinga ʻo e ʻofa ki he niʻihi kehé. (Lau ʻa e Luke 10:29-37.) Ko ha tangata Siu naʻe kaihaʻasia, haha pea tuku ia ʻi he halá ke mate. Ko ha taulaʻeiki ʻIsileli mo ha Līvai, ʻa ia naʻe totonu ke na hoko ko ha kaungāʻapi leleí, naʻá na sio kiate ia kae ʻikai tokoniʻi ia. Ka, naʻe tokoniʻi ia ʻe ha Samēlia. ʻI he taimi ko iá, ko e tokolahi taha ʻo e kau Siú mo e kau Samēliá naʻa nau fetāufehiʻaʻaki.—Sione 4:9.

⁴ Naʻe lilingi ʻe he Samēliá ʻa e lolo mo e uaine ʻi he ngaahi lavea ʻo e tangatá ke tokoni ke sai hono laveá. Pea naʻá ne ʻave leva ia ki ha fale talifononga pea ʻoange ki he tauhi ʻo e fale talifonongá ʻa e foʻi tēnali ʻe ua. Naʻe tatau eni mo e totongi ʻe maʻu ʻe ha taha ʻi he ʻaho ngāue ʻe ua. (Māt. 20:2) ʻI heʻetau fakakaukau atu ki he lahi ʻo e meʻa naʻe fai ʻe he Samēliá ke tokoniʻi ʻa e tangata laveá, ʻoku tau ʻiloʻi ai naʻá ne maʻu ʻa e ʻofa moʻoni ki hono kaungāʻapí. ʻE lava ke tau hangē ko e Samēliá kapau te tau manavaʻofa mo ʻofa ki he kakaí.

 5. Naʻe anga-fēfē hono fakahāhā ʻe he Kau Fakamoʻoni ʻa Sihová ʻa e ʻofa ki honau kaungāʻapí hili ʻa e Afā Sandy?

⁵ ʻOku tau moʻui “ʻi he ngaahi ʻaho fakaʻosí” ʻa ia ko e kakai tokolahi tahá ʻoku ʻikai ke nau maʻu ʻa e manavaʻofá. Ko e tokolahi ʻoku nau anga-fakamamahi, ʻofa ki he fakamālohí, pea ʻikai maʻu ha ʻofa ki honau kaungāʻapí. (2 Tīm. 3:1-3) Ko e fakatātaá, ʻi ʻOkatopa 2012, naʻe maumauʻi lahi ʻe he Afā Sandy ha feituʻu ʻi he Kolo Niu ʻIoké. Ko e kakai tokolahi naʻe ʻikai haʻanau ʻuhila, hita pe ko e ngaahi meʻa naʻa nau fiemaʻú. Ko e meʻa fakamamahí, ko e kau kaihaʻá naʻa nau kaihaʻa mei he faʻahinga naʻa nau faingataʻaʻiá. Naʻe kehe ʻa e Kau Fakamoʻoni ia ʻa Sihová. Naʻa nau fokotuʻutuʻu ha tokoni ki honau fanga tokoua mo e niʻihi kehe ʻi he feituʻú koeʻuhí ko e kau Kalisitiane moʻoní ʻoku nau ʻofa ki honau kaungāʻapí. Ko e hā ʻa e ngaahi founga kehe ʻe niʻihi ke fakahāhā ai ʻa e ʻofa ki hotau kaungāʻapí?

 6. Ko e hā ʻa e tokoni mei he Tohi Tapú ʻe lava ke tau ʻoange ki hotau kaungāʻapí?

⁶ ʻOange ha tokoni mei he Tohi Tapú. ʻI heʻetau ngāue fakamalangá, ʻoku tau ʻoange ai ki hotau kaungāʻapí ʻa e “fakafiemālie mei he Folofolá.” (Loma 15:4) ʻOku tau fakahāhā ʻa e ʻofa kiate iá ʻi he taimi ʻoku tau ngāueʻaki ai ʻa e Tohi Tapú ke fakamatalaʻi kiate ia ʻa e ongoongo lelei fekauʻaki mo e Puleʻanga ʻo e ʻOtuá. (Māt. 24:14) Ko ha monū ia ke ʻoatu ʻa e pōpoaki ko eni ʻo e ʻamanaki meia Sihova ko e ʻOtuá ki hotau kaungāʻapí.—Loma 15:13.

 7. Ko e hā ʻa e Lao Koula, pea ko e hā ʻe hoko ʻi heʻetau muimui aí?

⁷ Muimui ʻi he Lao Koulá. Naʻe tala mai ʻe Sīsū kiate kitautolu ʻa e Lao Koulá ʻi he taimi naʻá ne pehē ai: “Ko ia ai, ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu. Ko e moʻoni, ko e meʻa eni ʻoku ʻuhinga ki ai ʻa e Laó mo e Kau Palōfitá.” (Māt. 7:12) Ko e “Laó” ʻoku ʻuhinga ia ki he tohi ʻa Sēnesí kia Teutalōnome, pea ko e “Kau Palōfitá” ʻoku ʻuhinga ia ki he ngaahi tohi fakaekikite ʻo e Ngaahi Konga Tohi Tapu Faka-Hepeluú. Naʻe ʻoange ʻe Sihova “ʻa e Laó” mo e “Kau Palōfitá” ki heʻene kakaí koeʻuhí ko ʻene ʻofa ʻia kinautolu pea loto ke nau feʻofaʻaki. ʻI he ʻahó ni foki, ʻoku ʻamanekina ʻe Sihova ke tau ʻofa ki hotau kaungāʻapí. ʻI he tohi ʻa ʻAiseá, ʻoku pehē ʻe Sihova: “Tauhi ʻa e konisitutone, pea fai ʻa e totonu . . . Monuʻiaā [‘fiefia ē,’ NW] ka ko e tangata ʻoku fai ʻa e meʻa ko eni.” (ʻAi. 56:1, 2) Kapau ʻoku tau fakahāhā ʻa e ʻofa ki hotau kaungāʻapí pea muimui ʻi he Lao Koulá, te tau fiefia.

 8. Ko e hā ʻoku totonu ai ke tau ʻofa ki hotau ngaahi filí, pea ko e hā nai ʻe hoko kapau te tau fai pehē?

⁸ ʻOfa ki ho ngaahi filí. Kuo akoʻi maʻu pē kitautolu ʻe Sihova ke tau ʻofa ki hotau ngaahi filí. ʻI he taimi ʻo Sīsuú, naʻe akoʻi ʻe he niʻihi naʻe totonu ki he kakaí ke nau fehiʻa ki honau ngaahi filí. Ka ko e akonaki ʻa Sīsuú: “Hokohoko atu  hoʻomou ʻofa ki homou ngaahi filí pea lotu maʻanautolu ʻoku nau fakatangaʻi kimoutolú.” (Māt. 5:43-45) Naʻe fai ʻe Paula ʻa e akonaki meimei tatau ʻi heʻene pehē: “ʻO kapau ʻoku fiekaia ho filí, fafanga ia; kapau ʻokú ne fieinua, ʻoange ha meʻa ke ne inu.” (Loma 12:20; Pal. 25:21) ʻI ʻIsileli ʻo e kuonga muʻá, naʻe ʻoange ʻe Sihova ki heʻene kakaí ʻa e ngaahi lao ke fakahinohinoʻi kinautolu ke tokoni ki honau ngaahi filí pea aʻu ki he fanga monumanu honau ngaahi filí. (ʻEki. 23:5) ʻI hono ngāueʻaki ʻa e akonaki ko iá, ko e kakai ʻe niʻihi ʻa ia naʻa nau fetāufehiʻaʻaki ki muʻá naʻa nau hoko nai ko e ngaahi kaumeʻa lelei. ʻI he tuʻunga ko e kau Kalisitiané, ko hono fakahāhā ʻa e ʻofa ki hotau ngaahi filí te ne liliu nai ʻa e anga ʻenau ongoʻi mai kia kitautolú. Ko e niʻihi ʻo kinautolu ʻe aʻu nai ʻo nau hoko ko e kau sevāniti ʻa Sihova.

 9. Ko e hā naʻe leaʻaki ʻe Sīsū fekauʻaki mo e fakamelino mo hotau tokouá?

⁹ “Tuli ke melino mo e kakai kotoa pē.” (Hep. 12:14) Kapau ʻoku pau ke tau fakamelino mo e kakai kotoa pē, ko e moʻoni kuo pau ke tau fakamelino mo hotau fanga tokouá. Naʻe pehē ʻe Sīsū: “Kapau leva ʻokú ke haʻu mo hoʻo meʻa foakí ki he ʻōlitá peá ke manatuʻi hake ai ʻoku ʻi ai ha meʻa ʻoku koviʻia ai ho tokouá ʻiate koe, tuku hoʻo meʻa foakí ʻi muʻa ʻi he ʻōlitá peá ke ʻalu. ʻUluaki fakamelino mo ho tokouá, pea ʻi he hili iá, ʻi hoʻo foki maí, fai leva hoʻo foakí.” (Māt. 5:23, 24) ʻI he taimi pē ʻoku ʻi ai ai haʻatau palopalema mo ha taha ʻi hotau fanga tokouá, ʻe lava ke tau fakahāhā ʻa e ʻofa kiate iá ʻaki ʻa e feinga ke fakamelino ʻi he vave taha ʻe ala lavá. ʻI he taimi ʻoku tau fakavave ai ke fakamelinó, ʻe mātuʻaki fakahōifua ia kia Sihova.

10. Ko e hā ʻoku totonu ai ke ʻoua te tau fakamāuʻi ʻa e niʻihi kehé?

¹⁰ ʻOua ʻe fakamāuʻi ʻa e niʻihi kehé. “Tuku hoʻomou faifakamāú koeʻuhi ke ʻoua naʻa fakamāua ai kimoutolu.” Naʻe akoʻi kitautolu ʻe Sīsū ke ʻoua te tau fakamāuʻi ʻa e niʻihi kehé koeʻuhi ko e ngaahi fehālaaki ʻoku nau faí. Naʻá ne toe pehē: “Ko e hā leva ʻokú ke fakasio ai ki he meʻi ʻakau ʻi he mata ʻo ho tokouá kae ʻikai te ke tokanga ki he fuʻu ʻakau lalango ʻi ho mata ʻoʻoú? Pe, ʻe lava fēfē ke ke pehē ki ho tokouá, ‘Tuku ke u toʻo mai ʻa e meʻi ʻakau ʻi ho matá,’ kae vakai ko ha fuʻu ʻakau lalango ena ʻi ho mata ʻoʻoú? ʻA e mālualoi! Tomuʻa toʻo ʻa e fuʻu ʻakau lalango mei ho mata ʻoʻoú, pea te ke toki sio lelei ai ki he anga haʻo toʻo mai ʻa e meʻi ʻakau mei he mata ʻo ho tokouá.” (Māt. 7:1-5) Ko e lēsoní ʻoku totonu ke ʻoua te tau fakaangaʻi ʻa e kakai kehé ʻi he taimi ʻoku nau fai ai ʻa e ngaahi fehālākí koeʻuhí ʻoku tau fai ʻe kitautolu tonu ʻa e ngaahi fehālaaki lahi.

11, 12. Ko e hā ʻa e founga mahuʻinga ke fakahāhā ai ʻa e ʻofa ki hotau kaungāʻapí?

¹¹ ʻOku ʻi ai ʻa e ngaahi founga lahi ke fakahāhā ai ʻa e ʻofa ki hotau kaungāʻapí. Ka naʻe akoʻi kitautolu ʻe Sīsū ko e founga lelei taha ke fai peheé ko hono malangaʻi ʻa e ongoongo lelei ʻo e Puleʻangá. (Luke 8:1) Naʻá ne tala ange ki hono kau muimuí: “Ngaohi ko e kau ākonga ʻa e kakai ʻo e ngaahi puleʻanga kotoa pē.” (Māt. 28:19, 20) ʻI he taimi ʻoku tau talangofua ai kia Sīsuú, ʻe lava ke tau tokoni ai ki hotau kaungāʻapí ke mavahe mei he hala fālahi ʻoku taki atu ki he ʻauhá pea fakahaaʻi kiate ia ʻa e founga ke lue ai ʻi he hala ʻefiʻefi ʻoku taki atu ki he moʻuí. (Māt. 7:13, 14) ʻOku tau ʻiloʻi ko ʻetau ngaahi feingá ʻoku mātuʻaki fakahōifua kia Sihova.

¹² Naʻe tokoniʻi ʻe Sīsū ʻa e kakai tokolahi ke nau mahinoʻi ʻoku nau fiemaʻu ʻa Sihova. (Māt. 5:3) ʻOku tau faʻifaʻitaki kia Sīsū ʻi he taimi ʻoku tau fakamatala ai ki he kakaí fekauʻaki mo e “ongoongo lelei ʻa e ʻOtuá.” (Loma 1:1) ʻOku tau akoʻi kia kinautolu ko e feilaulau ʻa Sīsuú ʻoku ʻai ai ke nau malava ʻo maʻu ʻa e hōifua ʻa Sihová pea kaumeʻa mo ia. (2 Kol. 5:18, 19) Ko hono malangaʻi ʻa e ongoongo leleí ko e founga mahuʻinga moʻoni ia ke fakahāhā ai ʻa e ʻofa ki hotau kaungāʻapí.

13. ʻOku anga-fēfē hoʻo ongoʻí ʻi he taimi ʻokú ke akoʻi ai ʻa e kakaí fekauʻaki mo Sihová?

¹³ ʻI he taimi ʻoku tau teuteu lelei ai ki heʻetau ngaahi toe ʻaʻahí mo e ngaahi ako Tohi Tapú, ʻoku malava ai ke tau akoʻi ʻa e kakaí ke talangofua kia Sihova. Ko e niʻihi ʻoku fiemaʻu nai ke nau fai ha ngaahi liliu lahi ʻi heʻenau moʻuí. (1 Kol. 6:9-11) ʻOku ʻai kitautolu ke tau fiefia lahi ʻi he sio ki he anga hono tokoniʻi ʻe Sihova ʻa e faʻahinga anga-fakatōkilaló ke fai ʻa e fakalakalaka pea hoko ko hono ngaahi kaumeʻa. (Ngā. 13:48) ʻI he taimi ʻoku nau ako ai ʻa e Tohi Tapú, ko e kakai ʻoku ʻikai hanau ʻamanakí ʻoku nau hoko ʻo fiefia. Ko ʻenau loto-hohaʻá ʻoku fetongiʻaki ia ʻa e falala-pau kia Sihová. Ko ha monū ia ke fakahāhā ʻa e ʻofa ki hotau kaungāʻapí fakafou ʻi he ngāue makehe ko ení.

14. Naʻe anga-fēfē hono fakamatalaʻi ʻe Paula ʻa e ʻofá ʻi he 1 Kolinitō 13:4-8?

¹⁴ Kapau ʻoku tau ʻofa ki hotau kaungāʻapí ʻi he founga naʻe fakamatalaʻi ʻe Paulá, te tau fakahōifuaʻi ai ʻa Sihova, siʻi ange ai ʻetau ngaahi palopalemá pea hoko ʻo fiefia. Ko e meʻa naʻe tohi ʻe Paula ʻi he 1 Kolinitō 13:4-8 te ne akoʻi mai kia kitautolu ʻa e ngaahi founga kehe ke ʻofa ai ki hotau kaungāʻapí ʻo hangē pē ko ʻetau ʻofa kiate kitautolú.—Lau.

15. (a) Ko e hā ʻoku totonu ai ke tau kātaki mo anga-leleí? (e) Ko e hā ʻoku totonu ai ke ʻoua te tau meheka pe pōlepolé?

¹⁵ “Ko e ʻofá ʻoku kātaki mo anga-lelei.” ʻOku kātaki mo anga-lelei ʻa Sihova ki he kakai kotoa pē neongo ʻoku nau taʻehaohaoa. Ko ia ʻoku fiemaʻu ke tau kātaki mo anga-lelei ʻi he taimi ʻoku fai ai ʻe he niʻihi kehé ʻa e ngaahi fehālaaki, neongo kapau ʻoku nau taʻeʻofa mo anga-kovi mai kia kitautolu. ʻOku pehē ʻe he Tohi Tapú “ko e ʻofá ʻoku ʻikai te ne meheka.” ʻOku maʻu nai ʻe hotau fanga tokoua ʻe niʻihi ʻa e ngaahi monū ʻi he fakatahaʻangá pe ngaahi meʻa kehe ʻoku ʻikai ke tau maʻu. Ka ʻo kapau ʻoku tau ʻofa moʻoni ki hotau fanga tokouá, heʻikai te tau meheka kia kinautolu. Pehē foki, ʻoku totonu ke ʻoua te tau pōlepole pe hīkisia fekauʻaki mo kitautolu. ʻOku tala mai ʻe he Tohi Tapú kia kitautolu ʻoku fehiʻa ʻa Sihova ʻi he faʻahinga ʻoku “mata hihiki, mo e loto fielahi.”—Pal. 21:4.

16, 17. Ko e hā ʻa e ngaahi founga ke fakahāhā ai ʻa e ʻofa ki hotau kaungāʻapí ʻoku fakamatalaʻi ʻi he 1 Kolinitō 13:5, 6?

¹⁶ Ko e ʻofá “ʻoku ʻikai te ne fai ha tōʻonga taʻefeʻunga.” Kapau ʻoku tau fakahāhā ʻa e ʻofa ki hotau kaungāʻapí, heʻikai te tau loi kiate ia pe kaihaʻa meiate ia pe fai ha faʻahinga meʻa pē ʻe fakalotomamahiʻi ai ʻa Sihova. Pehē foki, heʻikai te tau siokita, koeʻuhí ko e ʻofá “ʻoku ʻikai te ne kumi ki heʻene lelei pē ʻaʻana.” Ko ia te tau fai maʻu pē ʻa e meʻa ʻoku lelei taha ki hotau kaungāʻapí.—Fil. 2:4.

¹⁷ Ko e ʻofá “ʻoku ʻikai te ne hoko ʻo ʻitangofua. ʻOku ʻikai te ne hanganaki fakalau ʻa e koví.” Kapau ʻe fai mai ʻe ha taha ha meʻa taʻeʻofa kia kitautolu, ʻoku ʻikai ke tau hoko ʻo ʻita vave. ʻOku  totonu ke ʻoua te tau tauhi ha lēkooti ʻo e ngaahi taimi kotoa ʻoku fakalotomamahiʻi ai kitautolu ʻe ha taha. (1 Tes. 5:15) Kapau ʻoku tau tukulotoʻi ha ʻita, ʻe lava ke hoko ʻetau ʻitá ʻo vela hangē ha afí, ʻo fakatuʻutāmaki ai kia kitautolu pea mo e niʻihi kehé. (Liv. 19:18) ʻI hono kehé, ʻoku totonu ke tau fakamolemoleʻi pea fakangaloʻi. Ko e ʻofá “ʻoku ʻikai te ne fiefia ʻi he taʻemāʻoniʻoní.” Kapau ʻoku ngaohikoviʻi ha tokotaha ʻoku fehiʻa ʻia kitautolu, ʻoku ʻikai ke tau fiefia ʻi he sio ki heʻene faingataʻaʻiá.—Lau ʻa e Palōveepi 24:17, 18.

18. Ko e hā ʻoku tau ako fekauʻaki mo e ʻofá mei he 1 Kolinitō 13:7, 8?

¹⁸ Naʻe tohi ʻe Paula ko e ʻofá “ʻokú ne ʻūkuma ʻa e ngaahi meʻa kotoa pē.” ʻI he taimi ʻoku tau ʻofa ai ki hotau kaungāʻapí, te tau fakamolemoleʻi ia ʻi he taimi ʻokú ne fai ai ha meʻa ʻoku fakalotomamahi kia kitautolu. Naʻe toe pehē ʻe Paula ko e ʻofá ʻoku “tui ʻi he ngaahi meʻa kotoa pē.” ʻOku tau tui ki he meʻa ʻoku tau lau ʻi he Tohi Tapú pea houngaʻia ʻi hono akoʻi kitautolu ʻe he kautaha ʻa Sihová. Ko e ʻofá ʻoku “ʻamanaki ʻi he ngaahi meʻa kotoa pē.” ʻOku tau maʻu ʻa e ʻamanaki koeʻuhí ʻoku tau falala ki he ngaahi meʻa kotoa pē kuo talaʻofa mai ʻe Sihova kia kitautolú. Pea koeʻuhí ʻoku tau ʻofa ki he kakaí, te tau fai hotau lelei tahá ke tala kia kinautolu ʻetau ʻamanakí. (1 Pita 3:15) ʻI he taimi ʻoku tau fehangahangai ai mo e ngaahi tuʻunga mātuʻaki faingataʻá, ʻoku tau lotu pea ʻamanaki ki he ngaahi ola lelei tahá. Neongo kapau ʻe faihala mai ha taha pe fakatangaʻi kitautolu, ʻoku tau kātekina pē. Hangē ko e lau ʻa Paulá, ko e ʻofá ʻokú ne “kātekina ʻa e ngaahi meʻa kotoa pē.” Naʻá ne toe pehē: “Ko e ʻofá heʻikai ʻaupito ke kaʻanga ia.” Ko e faʻahinga ʻoku nau talangofua kia Sihová te nau fakahāhā ʻa e ʻofa ki honau kaungāʻapí ʻo taʻengata.

19, 20. Ko e hā ʻa e ngaahi konga Tohi Tapu ʻoku akoʻi mai ai kuo pau ke tau hanganaki fakahāhā ʻa e ʻofá ki hotau kaungāʻapí?

¹⁹ Kapau ʻoku tau muimui ʻi he akonaki ʻa e Tohi Tapú, te tau ʻofa maʻu pē ki hotau kaungāʻapí ʻo hangē pē ko ʻetau ʻofa kiate kitautolú. (Māt. 22:39) ʻOku ʻamanekina mai ʻe Sihova mo Sīsū ke tau fai eni. Kuo pau ke tau ʻofa ki he kakai kotoa pē, tatau ai pē pe ko ʻenau haʻu mei fē pe ko e hā honau anga fakafonuá. ʻI he taimi pē ʻoku faingataʻa ai ke fakahāhā ʻa e ʻofa ki hotau kaungāʻapí, ʻe lava ke tau lotu kia Sihova pea kole hono laumālie māʻoniʻoní. ʻOku tau ʻilo ʻe fakahōifua eni kia Sihova pea te ne tokoniʻi kitautolu.—Loma 8:26, 27.

²⁰ Ko e fekau ke ʻofa ki hotau kaungāʻapí ʻoku mātuʻaki mahuʻinga he ʻoku ui ia ko e “lao fakatuʻí.” (Sēm. 2:8) ʻI he Lao ʻa Mōsesé, naʻe ʻoange ʻe Sihova ki heʻene kakaí ʻa e ngaahi fekau lahi ʻa ia naʻe akoʻi ai kinautolu ke ʻofa ki honau kaungāʻapí. Ki mui ai, naʻe fakamānavaʻi ʻe Sihova ʻa Paula ke tohi: “ʻIlonga ha toe fekau kehe pē ʻoku ʻi ai, ʻoku fālute kotoa ia ʻi he leá ni: ‘Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.’”—Loma 13:8-10.

21, 22. Ko e hā ʻoku totonu ai ke tau ʻofa ki he ʻOtuá mo hotau kaungāʻapí?

²¹ Naʻe tokoniʻi kitautolu ʻe Sīsū ke tau mahinoʻi lahi ange pe ko hai hotau kaungāʻapí ʻi he taimi naʻá ne pehē ai ko ʻene Tamaí “ʻokú ne fakahopo ʻene laʻaá ki he kakai fulikivanú mo e kakai leleí pea ʻokú ne ʻomai ʻa e ʻuhá ki he kakai māʻoniʻoní mo e taʻemāʻoniʻoní.” (Māt. 5:43-45) Naʻe akoʻi mai ʻe Sīsū kia kitautolu ʻoku totonu ke tau fakahāhā ʻa e ʻofa ki he kakai kotoa pē, tatau ai pē pe ʻoku nau māʻoniʻoni pe taʻemāʻoniʻoni. Hangē pē naʻe lave ki ai ki muʻá, ko e founga mahuʻinga ke fakahāhā ai ʻa e ʻofa ki hotau kaungāʻapí ko hono akoʻi ia fekauʻaki mo Sihova mo hono Puleʻangá. Kapau ʻe ngāueʻaki ʻe hotau kaungāʻapí ʻa e meʻa ʻokú ne ako mei he Tohi Tapú, ʻe lava ke ne maʻu ʻa e fiefia lahi ʻo e hoko ko e kaumeʻa ʻo e ʻOtuá.

²² Kuo tau ʻosi ako ki he ʻuhinga ʻoku totonu ai ke tau ʻofa kia Sihova ʻaki hotau lotó, moʻuí mo e ʻatamaí kotoa. Kuo tau ako foki ki he founga ʻe lava ke tau fakahāhā ai ʻa e ʻofa ki hotau kaungāʻapí. Kapau ʻoku tau ʻofa kia Sihova mo hotau kaungāʻapí, ʻoku tau talangofua ai ki he ongo fekau lahi tahá. Hiliō he meʻa kotoa, ʻoku tau fakahōifuaʻi ai ʻetau Tamai fakahēvani anga-ʻofá, ʻa Sihova.