1. Ko e hā naʻe tupulaki ai ʻa e ʻofa ʻi he vahaʻa ʻo Sīsū mo ʻene Tamaí?

 NAʻE fakamatalaʻi ʻe Sīsū ʻa e vahaʻangatae vāofi ʻokú ne maʻu mo ʻene Tamaí ʻi heʻene pehē: “ʻOku ou ʻofa ʻi he Tamaí” pea “ʻoku ʻofa ʻa e Tamaí ki he ʻAló.” (Sione 5:20; 14:31) Ki muʻa ke haʻu ʻa Sīsū ki he māmaní, naʻá na ngāue fakataha ʻi he taʻu ʻe laui piliona. (Pal. 8:30) Lolotonga ʻa e taimi ko ení, naʻe ako ai ʻe Sīsū ʻa e meʻa lahi fekauʻaki mo e ngaahi ʻulungaanga ʻene Tamaí, pea naʻe tupulaki ʻena feʻofaʻakí.

 2. (a) ʻOku ʻuhinga ki he hā ʻa e ʻofa ʻi ha taha? (e) Ko e hā ʻa e ngaahi fehuʻi te tau lāulea ki aí?

² ʻI he taimi ʻokú ke ʻofa ai ʻi ha taha, ʻokú ke maʻu ʻa e ngaahi ongoʻi loloto ki he tokotaha ko iá. Naʻe hiva ʻa Tēvita: “Teu ofa kiate koe, e Jihova, ko eku malohi.” (Saame 18:1, PM) ʻOku totonu ke pehē ʻa e anga ʻetau ongoʻi ki he ʻOtuá. ʻOkú ne talaʻofa mai kapau te tau talangofua kiate ia, te ne fakahaaʻi mai ʻene ʻofá kia kitautolu. (Lau ʻa e Teutalōnome 7:12, 13.) Ka ʻoku ʻikai lava ke tau sio ki he ʻOtuá, ko ia ʻe lava fēfē ke tau ʻofa kiate ia? ʻOku ʻuhinga ki he hā ʻa e ʻofa kia Sihová? Ko e hā ʻoku totonu ai ke tau ʻofa kiate iá? Pea ʻe lava fēfē ke tau fakamoʻoniʻi ʻoku tau ʻofa ki he ʻOtuá?

3, 4. Ko e hā ʻoku malava ai ke tau ʻofa kia Sihová?

³ ʻOku ʻikai lava ke tau sio ki he ʻOtuá koeʻuhí he “ko e ʻOtuá ko ha  Laumālie.” (Sione 4:24) Naʻa mo ia, ʻoku malava ke ʻofa kia Sihova. Ko e moʻoni, ʻoku fekauʻi kitautolu ʻe he Tohi Tapú ke ʻofa kiate ia. Ko e fakatātaá, naʻe tala ʻe Mōsese ki he kau ʻIsilelí: “Te ke ʻofa ki he ʻEiki ko ho ʻOtua ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ivi.”—Teu. 6:5.

⁴ Ko e hā ʻoku malava ai ke ʻofa ki he ʻOtuá? Naʻá ne fakatupu kitautolu fakataha mo e fiemaʻu ke lotu kiate ia, pea ʻokú ne toe ʻomai kia kitautolu ʻa e malava ke fakahaaʻi ʻa e ʻofá. ʻI he taimi ʻoku tau hoko ai ʻo ʻiloʻi ʻa Sihová, ʻoku tupulaki ʻetau ʻofa kiate iá, pea ʻoku ʻai ai heni kitautolu ke tau fiefia. Ko e meʻa eni naʻe ʻuhinga ki ai ʻa Sīsū ʻi heʻene pehē: “Fiefia ē ka ko kinautolu ʻoku nau lāuʻilo ʻoku ʻi ai ʻenau fiemaʻu fakalaumālié, he ʻoku ʻonautolu ʻa e Puleʻanga ʻo hēvaní.” (Māt. 5:3) ʻI heʻene tohi ko e Man Does Not Stand Alone, naʻe pehē ai ʻe A. C. Morrison ʻoku fakaofo ke sio ki he fekumi maʻu pē ʻa e faʻahinga ʻo e tangatá ki he ʻOtuá mo loto ke tui kiate ia. Hangē ko e tokotaha-tohí, ʻoku mahinoʻi ʻe he tokolahi naʻe fanauʻi ʻa e faʻahinga ʻo e tangatá fakataha mo ha fiemaʻu ke ʻiloʻi ʻa e ʻOtuá.

 5. ʻOku anga-fēfē ʻetau ʻilo ʻe lava ke tau ʻiloʻi ʻa e ʻOtuá?

⁵ ʻE lava ke faifai ange ʻo tau ʻiloʻi ʻa e ʻOtuá? ʻIo, he ʻokú ne loto ke tau maʻu ha vahaʻangatae mo ia. Naʻe fakamahino ia ʻe he ʻapositolo ko Paulá ʻi he taimi naʻá ne lea ai ki ha kulupu ʻi ʻAtenisi ʻo e kuonga muʻá. Naʻe ongoʻi ʻe he tokolahi ʻo kinautolu naʻe fiemaʻu ke nau ʻalu ki ha temipale ke lotu ki he ʻotua fefine ko ʻĀtena. Ka naʻe pehē ʻe Paula ʻe lava ke nau ʻiloʻi ʻa e ʻOtua moʻoni ʻa ia “naʻá ne ngaohi ʻa e māmaní mo e ngaahi meʻa kotoa ʻi aí.” Naʻá ne fakamatalaʻi ʻoku ʻikai ke nofo ʻa e ʻOtuá ʻi ha ngaahi temipale. Ko e kakai ʻoku fekumi ki he ʻOtuá ʻe lava ke nau ʻiloʻi ia, ʻo tatau ai pē pe ko fē ʻa e feituʻu ʻoku nau nofo ai ʻi he māmaní. Naʻá ne pehē leva ko e ʻOtuá “ʻoku ʻikai te ne mamaʻo mei ha taha ʻo kitautolu.” (Ngā. 17:24-27) ʻIo, ʻe lava ke ʻiloʻi ʻe he kakaí ʻa e ʻOtuá. Laka hake ʻi he Kau Fakamoʻoni ʻa Sihova ʻe toko fitu mo e konga miliona kuo nau ʻiloʻi ia, pea ʻoku nau ʻofa moʻoni kiate ia.

 6. Ko e hā “ʻa e fekau lahi tahá mo muʻomuʻá”?

⁶ ʻOku totonu ke mālohi fēfē ʻetau ʻofa kia Sihová? ʻI he taimi naʻe ʻeke ai ʻe ha tangata lotu Fālesi kia Sīsū: “Faiako, ko fē ʻa e fekau ʻoku lahi taha ʻi he Laó?” Naʻe fakahaaʻi mahino ange ʻe Sīsū: “‘Kuo pau ke ke ʻofa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa.’ Ko ʻeni ia ʻa e fekau lahi tahá mo muʻomuʻá.”—Māt. 22:34-38.

 7. ʻOku ʻuhinga ki he hā ʻa e ʻofa ki he ʻOtuá ʻaki hotau (a) “lotó kotoa”? (e) “moʻuí kotoa”? (f) “ʻatamaí kotoa”?

⁷ Ko e hā naʻe ʻuhinga ki ai ʻa Sīsū ʻi heʻene pehē kuo pau ke tau ʻofa ki he ʻOtuá ʻaki hotau “lotó kotoa,” “moʻuí kotoa,” mo e “ʻatamaí kotoa”? Ko hotau “lotó kotoa” ʻoku ʻuhinga iá ki heʻetau ngaahi ongoʻi mo e ngaahi holi moʻoní. Ko ʻetau “moʻuí kotoa” ʻoku ʻuhinga iá kia kitautolu ko ha tokotaha pea kau ai mo e meʻa kotoa ʻoku tau fai ʻi heʻetau moʻuí. Pea ko hotau “ʻatamaí kotoa” ʻoku ʻuhinga iá ki he anga ʻetau fakakaukaú mo e meʻa ʻoku tau fakakaukau ki aí. ʻI he foungá ni, naʻe fakamamafaʻi ai ʻe Sīsū kuo pau ke tau ʻofa kia Sihova ʻaki hotau kotoá mo e meʻa kotoa ʻoku tau maʻú.

 8. ʻOku anga-fēfē ʻetau fakahaaʻi ki he ʻOtuá ʻoku tau ʻofa kiate iá?

⁸ ʻOku tau fakahaaʻi ki he ʻOtuá ʻoku tau ʻofa kiate ia ʻaki hotau lotó, moʻuí mo e ʻatamaí kotoa ʻi he taimi ʻoku tau ako tuʻumaʻu ai ʻa e Tohi Tapú, fakahoko lelei ʻa e meʻa kotoa ʻokú ne kole mai kia kitautolú, pea talanoa faivelenga ki he niʻihi kehé fekauʻaki mo e Puleʻangá. (Māt. 24:14; Loma 12:1, 2) ʻI he taimi ʻoku tau fai ai ʻa e ngaahi meʻá ni, ko hotau vahaʻangatae mo iá ʻe tupulaki ʻo mālohi ange. (Sēm. 4:8) ʻOku ʻikai malava ke lisi kotoa ʻa e ngaahi ʻuhinga ʻoku totonu ai ke tau ʻofa ki he ʻOtuá, ka te tau lāulea pē ki ha niʻihi ʻo kinautolu.

 9. Ko e hā ʻokú ke ʻofa ai kia Sihová?

⁹ Ko Sihova hotau Tokotaha-Fakatupú, pea ʻokú ne foaki mai ʻa e meʻa kotoa ʻoku tau  fiemaʻú. Naʻe pehē ʻe Paula: “Fakafou ʻiate ia, ʻoku tau maʻu ai ʻa e moʻuí mo ngaue holo ai mo tau ʻi aí ni.” (Ngā. 17:28) Kuo ʻomai ʻe Sihova ʻa e māmani fakaʻofoʻofa ko ení ke tau nofo ai. (Saame 115:16) ʻOkú ne toe ʻomai ʻa e meʻakai mo e ngaahi meʻa kehe koeʻuhí ke lava ʻo tau moʻui ai pē. Ko e ʻuhinga ia naʻe lava ai ʻa Paula ʻo tala ange ki he kakai ʻi Līsitá ʻoku totonu ke ʻoua te nau lotu ki he ngaahi ʻaitolí ka ʻoku totonu ke nau lotu kia Sihova, ʻa e “ʻOtua moʻuí.” Naʻe lea ʻa Paula fekauʻaki mo e ʻOtuá: “Naʻá ne failelei ʻaki hono foaki mai kiate kimoutolu ʻa e ngaahi ʻuha mei he langí mo e ngaahi faʻahitaʻu mahu, ʻo ne fakafonu homou lotó ke fonu ngutungutu ʻi he meʻakai mo e fiefia.” (Ngā. 14:15-17) ʻOku foaki anga-ʻofa mai ʻe Sihova ʻa e meʻa kotoa ʻoku tau fiemaʻú. Ko ha ʻuhinga lelei ē ke ʻofa ai ki hotau Tokotaha-Fakatupu Maʻongoʻongá!—Koh. 12:1.

10. ʻOku anga-fēfē hoʻo ongoʻi fekauʻaki mo e huhuʻí?

¹⁰ ʻE toʻo atu ʻe he ʻOtuá ʻa e angahala mo e mate naʻa tau maʻu tukufakaholo meia ʻĀtamá. (Loma 5:12) ʻOku pehē ʻe he Tohi Tapú: “Ko e ʻOtuá naʻá ne fakahaaʻi lelei mai ʻene ʻofa ʻaʻaná kiate kitautolu ʻi he moʻoniʻi meʻa ko ia, lolotonga ʻetau kei hoko ko e kau angahalá, naʻe pekia ʻa Kalaisi maʻatautolu.” (Loma 5:8) Kapau ʻoku tau fakatomala moʻoni pea maʻu ʻa e tui ki he feilaulau huhuʻí, ʻe fakamolemoleʻi ʻe he ʻOtuá ʻetau ngaahi angahalá. ʻOku tau houngaʻia loloto ʻia Sihova koeʻuhí ʻokú ne ʻofa lahi ʻiate kitautolu ʻo ne fekau mai hono ʻAló ke pekia maʻatautolu.—Sione 3:16.

11, 12. ʻI he ongo founga fē kuo foaki mai ai ʻe Sihova kia kitautolu ʻa e ʻamanakí?

¹¹ Kuo foaki mai ʻe Sihova kia kitautolu ʻa e ʻamanaki ʻo e moʻui taʻengatá. (Loma 15:13) Ko e ʻamanaki ko ení ʻe tokoniʻi ai kitautolu ke tau kātaki ʻi he taimi ʻoku ʻahiʻahiʻi ai ʻetau tuí. ʻOku maʻu ʻe he faʻahinga pani faitōnungá ʻa e ʻamanaki ʻo e moʻui taʻengata ʻi hēvani. (Fkh. 2:10) ʻOku maʻu ʻe he faʻahinga faitōnunga kehé ʻa e ʻamanaki ʻo e moʻui taʻengata ʻi he Palataisi he māmaní. (Luke 23:43) ʻOku anga-fēfē ʻetau ongoʻi fekauʻaki mo ʻetau ʻamanakí? ʻOku fakafonu ai kitautolu ʻaki ʻa e fiefia, melino, mo e ʻofa ki he ʻOtua ʻokú ne foaki mai ʻa e “meʻaʻofa lelei kotoa pē mo e foaki haohaoa kotoa pē.”—Sēm. 1:17.

¹² Kuo foaki mai ʻe Sihova kia kitautolu ʻa e ʻamanaki ʻo e toetuʻú. (Ngā. 24:15) ʻOku tau loto-mamahi ʻaupito ʻi he taimi ʻoku mate ai ha taha ʻoku tau ʻofa ai. Ka ʻoku ʻikai ke tau maʻu ʻa e loto-mamahi tatau ʻa ia ʻoku maʻu ʻe he faʻahinga ko ia “ʻoku ʻikai ʻi ai haʻanau ʻamanakí,” koeʻuhí ʻoku talaʻofa ʻe Sihova te ne fakafoki mai ʻa e kau maté ke moʻui. (1 Tes. 4:13) ʻOku fakatuʻotuʻa atu ʻa Sihova ki he taimi ko iá ʻo laka ange ia ʻia kitautolu. ʻOkú ne loto moʻoni ke fokotuʻu hake ʻa e laui miliona ʻo e kakaí, tautautefito ki he faʻahinga faitōnungá. (Siope 14:15) Sioloto atu ki he anga ʻetau ongoʻí ʻi he taimi te tau sio ai ki he toe fāʻūtaha ʻa e fānaú mo ʻenau ngaahi mātuʻá pea toe fetaulaki ʻa e ngaahi kaungāmeʻa ofí! Naʻe fakakaukau ʻa Sihova ki he toetuʻú, naʻá ne talaʻofa ia, pea te ne ʻai ia ke hoko. ʻOku tau ʻofa lahi kia Sihova koeʻuhí ko e ʻamanaki fakaofo ko ení.

13. ʻOku anga-fēfē ʻetau ʻiloʻi ʻoku tokanga moʻoni mai ʻa e ʻOtuá kia kitautolu?

¹³ ʻOku tokanga moʻoni mai ʻa Sihova kia kitautolu. (Lau ʻa e Saame 34:6, 18, 19; 1 Pita 5:6, 7.) Naʻa mo e ʻahó ni, ʻe lava ke tau ongoʻi malu koeʻuhí ʻoku tau ʻilo ʻoku mateuteu maʻu pē ʻa Sihova ke tokoniʻi ʻa e faʻahinga ʻoku nau faitōnunga kiate iá. (Saame 79:13) Kae sioloto atu ki he lahi ʻo e meʻa ʻe fai ʻe he ʻOtuá maʻatautolu ʻi he kahaʻú. Ko Sīsū ʻa e Tuʻi ʻo e Puleʻanga ʻo e ʻOtuá, pea te ne toʻo atu ʻa e fakamālohí, anga-koví mo e fulikivanú mei he māmaní. Pea ʻe ʻoange ʻe he ʻOtuá ki he kotoa ʻo e faʻahinga talangofua ʻo e tangatá ʻa e melino, pea pehē ki he meʻa kotoa ʻoku nau fiemaʻu ke fiefia ai ʻi he moʻuí. (Saame 72:7, 12-14, 16) ʻI heʻetau fakalaulauloto ki he ngaahi talaʻofa ko ení, ʻe ueʻi ai kitautolu ke ʻofa ki hotau ʻOtuá ʻaki ʻa e kotoa hotau lotó, moʻuí, mālohí mo e ʻatamaí.—Luke 10:27.

14. Ko e hā ʻa e monū lahi kuo foaki mai ʻe he ʻOtuá kia kitautolú?

¹⁴ Kuo foaki mai ʻe Sihova kia kitautolu ʻa e monū lahi ʻo e hoko ko ʻene Kau Fakamoʻoni. (ʻAi.  43:10-12) ʻOku tau ʻofa ki he ʻOtuá koeʻuhí he ʻokú ne ʻomai kia kitautolu ʻa e faingamālie ke poupouʻi hono Puleʻangá pea vahevahe ʻetau ʻamanakí ki he faʻahinga kotoa ʻoku faingataʻaʻiá. ʻOku tau maʻu ʻa e tui mo e falala-pau ʻoku tau fiemaʻú ke faifakamoʻoni ai ki he kakaí fekauʻaki mo e ongoongo leleí. Ko e hā ʻe lava ai ke tau hoko ʻo falala-paú? Ko ʻetau pōpoakí ʻoku haʻu mei he Folofola ʻa e ʻOtuá, ko e Tohi Tapú, pea ko ʻene ngaahi talaʻofá ʻoku hoko maʻu pē ʻo moʻoni. (Lau ʻa e Siosiua 21:45; 23:14.) ʻOku ʻi ai ʻa e ngaahi ʻuhinga lahi ke ʻofa ai kia Sihova. Ka ʻe lava fēfē ke tau fakamoʻoniʻi ʻoku tau fai peheé?

15. ʻE lava fēfē ke tokoniʻi kitautolu ʻe hono ako mo ngāueʻaki ʻa e Folofola ʻa e ʻOtuá?

¹⁵ Ako mo ngāueʻaki maʻu pē ʻa e Folofola ʻa e ʻOtuá. Ko hono fai ení ʻoku fakahaaʻi ai ʻoku tau ʻofa kia Sihova pea loto moʻoni ke tataki kitautolu ʻe heʻene Folofolá. (Saame 119:105) ʻI he taimi ʻoku tau faingataʻaʻia aí, ʻe lava ke tau hoko ʻo fiemālie ʻi he ngaahi talaʻofa anga-ʻofa pehē hangē ko ení: “Ko e loto lavea mo mafesifesi ʻe ʻikai taʻe tokaʻi ʻe he ʻAfiona.” “Ko hoʻo ʻofa, ʻEiki, naʻa ne puke hake. ʻI he lahi ʻa e hohaʻa ʻi hoku loto e ko hoʻo ngaahi fakanaʻa naʻe fakafiefiaʻi hoku laumalie.” (Saame 51:17; 94:18, 19) ʻOku fakahaaʻi ʻe Sihova mo Sīsū ʻa e meesi ki he kotoa ʻo e faʻahinga ʻoku faingataʻaʻiá. (ʻAi. 49:13; Māt. 15:32) ʻI heʻetau ako ʻa e Tohi Tapú, ʻe lava ke tau ako ai fekauʻaki mo e ʻofa ʻa Sihova ʻia kitautolú. ʻOku tokoni eni ke fakalolotoʻi ai ʻetau ʻofa kiate iá.

16. ʻE lava fēfē ke tokoni ʻa e lotu maʻu peé ki he tupulaki ʻetau ʻofa ki he ʻOtuá?

¹⁶ Lotu maʻu pē ki he ʻOtuá. ʻI he taimi ʻoku tau lotu ai ki he ʻOtuá pea sio ki heʻene tali ʻetau ngaahi lotú, ʻoku tupulaki ai ʻetau ʻofa kiate iá. (Saame 65:2) Ko e fakatātaá, kuo tau hokosia nai ʻa e ʻikai te ne fakaʻatā ke ʻahiʻahiʻi kitautolu ʻo fakalaka atu ia ʻi he meʻa ʻoku malava ke tau kātekiná. (1 Kol. 10:13) Kapau ʻoku tau hohaʻa pea lotu loto-moʻoni ki ha tokoni, ʻe lava ke tau hokosia ʻa e “nonga ʻa e ʻOtuá.” Ko e nonga ko ení ko Sihova pē ʻe lava ke ne foaki mai kia kitautolú. (Fil. 4:6, 7) ʻI he taimi ʻe niʻihi te tau leaʻaki nai ha lotu fakalongolongo, ʻo hangē ko ia naʻe fai ʻe Nehemaiá, pea ʻiloʻi ki mui kuo tali ia ʻe Sihova. (Nehe. 2:1-6) Kapau ʻoku tau hanganaki lotu pea sio ki he founga ʻoku tali ai ʻe Sihova ʻetau ngaahi lotú, ʻoku tupulaki ai ʻetau ʻofa kiate iá. ʻI he taimi  ʻoku ʻahiʻahiʻi ai ʻetau tuí, te tau hoko ai ʻo falala-pau ʻe tokoniʻi kitautolu ʻe Sihova ke kātaki.—Loma 12:12.

17. Kapau ʻoku tau ʻofa ki he ʻOtuá, ʻe anga-fēfē ʻetau ongoʻi fekauʻaki mo hono maʻu ʻa e ngaahi fakatahá?

¹⁷ Maʻu maʻu pē ʻa e ngaahi fakataha, ngaahi ʻasemipilī mo e ngaahi fakataha-lahi faka-Kalisitiané. (Hep. 10:24, 25) Naʻe fakatahataha ʻa e kau ʻIsilelí ke fanongo mo ako fekauʻaki mo Sihova koeʻuhí ke nau malava ʻo lotu kiate ia ʻaki ʻa e fakaʻapaʻapa loloto mo talangofua ki heʻene Laó. (Teu. 31:12) Kapau ʻoku tau ʻofa moʻoni kia Sihova, te tau maʻu maʻu pē ʻa e ngaahi fakataha faka-Kalisitiané. (Lau ʻa e 1 Sione 5:3.) Tau fai ʻa e meʻa kotoa te tau malavá ke maʻu ʻa e ngaahi fakatahá kotoa. Kuo pau ke ʻoua ʻaupito ʻe mole ʻa e ʻofa naʻa tau maʻu kia Sihová ʻi he taimi naʻa tau ʻuluaki ako ai fekauʻaki mo iá.—Fkh. 2:4.

18. Ko e hā ʻoku ʻai kitautolu ʻe he ʻofa ki he ʻOtuá ke tau faí?

¹⁸ Talanoa faivelenga fekauʻaki mo e moʻoní ki he niʻihi kehé. (Kal. 2:5) Ko ʻetau ʻofa ki he ʻOtuá ʻokú ne ʻai ke tau loto ke lea ki he niʻihi kehé fekauʻaki mo e Puleʻanga ʻo e ʻOtuá. ʻI ʻĀmaketone, ko e Tuʻi ʻa e ʻOtuá, ʻa Sīsū, te ne taukapoʻi ʻa e totonu ʻa Sihova ke pulé. (Saame 45:4; Fkh. 16:14, 16) ʻOku ʻai ai kitautolu ke tau fiefia lahi ke tokoniʻi ʻa e kakaí ke ako fekauʻaki mo e ʻofa ʻa e ʻOtuá pea mo ʻene māmani foʻou kuo talaʻofá!—Māt. 28:19, 20.

19. Ko e hā ʻoku totonu ai ke tau houngaʻia ʻi he kau mātuʻa ʻo e fakatahaʻangá?

¹⁹ Fakahaaʻi ʻokú ke houngaʻia ʻi he kau mātuʻa ʻo e fakatahaʻangá. (Ngā. 20:28) ʻOku finangalo maʻu pē ʻa Sihova ke tau maʻu ʻa e lelei tahá, ko ia kuó ne ʻomai kia kitautolu ʻa e kau mātuʻa Kalisitiane. Ko e kau mātuʻá ʻoku nau “hange ha fakaū mei he matangi, mo e toitoiʻanga mei he ʻalotamaki; hange ko e ngaahi mangaʻi vai ʻi ha potu momoa, hange ko e malu ʻo ha makatuʻu kafakafa ʻi ha fonua puhengia.” (ʻAi. 32:1, 2) Fakakaukau atu ki heʻetau ongoʻi malu ʻi he taimi ʻoku tau maʻu ai ha toitoiʻanga mei ha matangi mālohi pe ko ha ʻalotāmaki pe ko e taimi ʻoku tau maʻu ai ha fakamalumaluʻanga mei ha laʻā vevela! ʻI he founga tatau, ʻoku ʻomai ʻe he kau mātuʻá ʻa e tokoni mo e fakalototoʻa ʻoku tau fiemaʻú ke hanganaki tauhi ai kia Sihova neongo ʻa e ngaahi faingataʻa ʻi he moʻuí. Ko e hā ʻoku tau talangofua ai ki he kau mātuʻá? Koeʻuhí ʻoku tau houngaʻia ʻi he “ngaahi meʻaʻofa ʻi he tuʻunga ko e kau tangata” ko ení pea ʻoku tau ʻofa kia Sihova mo Kalaisi, ʻa e ʻUlu ʻo e fakatahaʻangá.—ʻEf. 4:8; 5:23; Hep. 13:17.

20. Kapau ʻokú ke ʻofa ki he ʻOtuá, ko e hā te ke faí?

²⁰ Kuo ʻomai ʻe Sihova kia kitautolu ha “lao haohaoa,” ʻa ia ʻokú ne tala mai ai ʻa e meʻa kotoa pē ʻokú ne loto ke tau faí. (Lau ʻa e Sēmisi 1:22-25.) Kapau ʻokú ke loto ke mālohi ho vahaʻangatae mo Sihová, kuo pau ke ke fai ʻa e meʻa lahi ange ʻi he fanongo pē kiate iá. (Saame 19:7-11) Kuo pau ke ke fai ha ngāue ki he meʻa kuó ke akó. Ko e fakatātaá, koeʻuhí ʻokú ke ʻofa ki he ʻOtuá, te ke fai ha feinga ke talanoa ki he niʻihi kehé fekauʻaki mo ia pea fai ha tali ʻi he ngaahi fakatahá.

21. Ko e hā ʻe lava ke ke fakahoa ki ai hoʻo ngaahi lotu loto-moʻoní?

²¹ ʻOku tau lotu maʻu pē kia Sihova koeʻuhí ʻoku tau ʻofa kiate ia. ʻI ʻIsileli, ko e kau taulaʻeikí naʻa nau tutu ʻinisēnisi kia Sihova ʻi he ʻaho kotoa pē. Naʻe fakahoa ʻe Tuʻi Tēvita ʻene ngaahi lotú ki he ʻinisēnisi ʻi heʻene hiva: “Ke hoko atu ʻeku lotu ki ho ʻao na [Sihova], ʻo hange ko e inisenisi; ʻa e fola hoku ongo nima ni ke hange ko e feilaulau efiafi.” (Saame 141:2; ʻEki. 30:7, 8) Naʻe fanongo ʻa Sihova ki he ngaahi lotu ʻa Tēvitá. Kapau ʻoku tau lotu ʻi ha founga anga-fakatōkilalo, loto-moʻoni mo houngaʻia, ko ʻetau ngaahi lotú leva ʻe hoko foki ʻo hangē ha ʻinisēnisí pea ʻe fakahōifua ia kia Sihova.—Fkh. 5:8.

22. Ko e hā te tau ako ʻi he kupu hoko maí?

²² Naʻe pehē ʻe Sīsū kuo pau ke tau ʻofa ki he ʻOtuá, ka ʻokú ne toe pehē kuo pau ke tau ʻofa ki hotau kaungāʻapí. (Māt. 22:37-39) ʻI he taimi ʻoku tau ʻofa ai kia Sihova mo ʻene ngaahi tefitoʻi moʻoní, te ne tokoniʻi kitautolu ke ʻofa ki hotau kaungāʻapí. Te tau ako fekauʻaki mo e ʻuhinga ʻo e meʻá ni ʻi he kupu hoko maí.