Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

Ko e taimi fē naʻe tāmateʻi ai ʻa e lami Pāsová ʻi Nīsani 14?

ʻOku pehē ʻe he ngaahi liliu Tohi Tapu ʻe niʻihi naʻe pau ke tāmateʻi “i he vahaʻa ʻo e ongo efiafi ʻe ua,” ʻoku ʻuhingá ʻi he mamalu ʻa e poʻulí pe fakapoʻupoʻuli—hili ʻa e tō ʻa e laʻaá kae ki muʻa ke fakapoʻuli ʻaupitó. (ʻEki. 12:6)—12/15, peesi 18-19.

Ko e hā ʻa e ngaahi tefitoʻi moʻoni Fakatohitapu ʻe lava ke ngāueʻaki ʻe he toʻutupú ke faiʻaki ha ngaahi fili fakapotopoto?

Ko e (1) Fuofua kumi ki he Puleʻangá mo ʻene māʻoniʻoní. (Māt. 6:19-34) (2) Maʻu ʻa e fiefia ʻi he ngāue maʻá e niʻihi kehé. (Ngā. 20:35) (3) Fiefia ʻi he ngāue ki he ʻOtuá ʻi hoʻo kei talavoú. (Koh. 12:1 [12:2], PM)—1/15, peesi 19-20.

ʻE fai fakakū “ʻa e taʻane ʻa e Lamí”? (Fkh. 19:7)

Ko e “taʻane ʻa e Lamí” ʻe fai ia hili hono fakakakato ʻe he Tuʻí, ʻa Sīsū Kalaisi, ʻene ikuná, ʻa ia ko e hili hono fakaʻauha ʻo Pāpilone ko e Lahí mo e tau ʻo ʻĀmaketoné.—2/15, peesi 10.

Ko e hā naʻe “kei ʻamanaki” ai ʻa e kau Siu ʻi he ʻaho ʻo Sīsuú ki he Mīsaiá? (Luke 3:15)

ʻOku ʻikai lava ke tau fakapapauʻi ko e kau Siu ʻi he ʻuluaki senitulí naʻa nau mahinoʻi ʻa e kikite ʻa Taniela fekauʻaki mo e Mīsaiá ʻo hangē ko kitautolú. (Tan. 9:24-27) Neongo ia, kuo nau fanongo nai fekauʻaki mo e fanongonongo fakaeʻāngelo ki he kau tauhi-sipi ʻe niʻihi pe ko e meʻa naʻe leaʻaki ʻe he palōfita fefine ko ʻAná ʻi heʻene sio ki he kiʻi valevale ko Sīsuú ʻi he temipalé. Pehē foki, naʻe haʻu ʻa e kau vavalo fakaʻasitalolosiá ke sio ki he “tokotaha kuo fanauʻi mai ko e tuʻi ʻo e kau Siú.” (Māt. 2:1, 2) Ki mui ai, naʻe fakahaaʻi ʻe Sione ko e Faipapitaisó ʻo pehē ʻe vave ke hā ʻa e Kalaisí.—2/15, peesi 26-27.

ʻE lava fēfē ke tau fakaʻehiʻehi mei hono ʻai ʻetau ʻIó ke hoko ʻo ʻIkaí? (2 Kol. 1:18)

Ko e moʻoni, ko ha meʻa heʻikai lava ke tau mapuleʻi te ne ʻai nai he taimi ʻe niʻihi ke faingataʻa ke tau fai ki heʻetau leá. Ka ʻo kapau ʻoku tau fai ha palōmesi pe ko ha fuakava, ʻoku totonu ke tau fai ʻa e meʻa kotoa te tau malavá ke fakahoko ia.—3/15, peesi 32.

Ko e hā ʻa e ngaahi nunuʻa taʻeʻamanekina ʻe lava nai ke hoko kapau ʻe mavahe ha Kalisitiane mei hono fāmilí ke ngāue paʻanga ʻi ha fonua kehe?

ʻI he taimi ʻoku fili ai ʻa e ngaahi mātuʻá ke ʻoua ʻe nofo fakataha ko ha fāmili, ʻe faingataʻaʻia fakaeongo mo fakaeʻulungaanga nai ʻa e fānaú. Te nau hoko nai ʻo ʻita ki he (ngaahi) mātuʻá. Pea ko e kakai lalahi ʻoku nofo mamaʻo mei honau ngaahi hoá te nau fehangahangai nai mo e ngaahi ʻahiʻahi fakaefehokotaki fakasino.—4/15, peesi 19-20.

Ko e hā ʻa e fehuʻi ʻe fā ʻoku totonu ke tau manatuʻi ʻi he talanoa ki he kakai ʻi heʻetau ngāue fakafaifekaú?

Ko hai kinautolu? Ko fē feituʻu ʻoku ou talanoa ai kia kinautolú? Ko fē taimi ke u talanoa ai kia kinautolú? ʻOku totonu ke fēfē ʻa e founga ʻeku talanoa kiate kinautolú?—5/15, peesi 12-15.

Ko e hā ʻa e lahi ʻo e tāmate ʻa e ifi tapaká?

Lolotonga ʻa e senituli kuo ʻosí, kuó ne tāmateʻi ʻa e kakai ʻe 100,000,000. ʻI he lolotongá ni, ʻokú ne toʻo ʻa e moʻui ʻe 6,000,000 nai ʻi he taʻu.—7/1, peesi 3.

Ko e hā e ʻuhinga naʻe fesiʻi ai ʻa e vaʻe ʻo e kau faihiá ʻi hono fakapoongi kinautolu ʻi ha ʻakaú?

Naʻe fakapoongi ʻe he kau Lomá ʻa e kau faihia ʻe niʻihi ʻi ha ʻakau. Naʻe kole ʻe he kau Siú ke fesiʻi ʻa e vaʻe ʻo e ongo faihia ʻi he tafaʻaki ʻo Sīsuú. Naʻe ʻai ai ke faingataʻa ange ki he kau faihiá ke mānava, ʻo fakavaveʻi ʻenau maté. Ko ia ai, ʻe ʻikai fiemaʻu ai ke nau ʻahoia ʻi he ʻakaú. (Teu. 21:22, 23)—7/1, peesi 7.