1, 2. ʻOku anga-fēfē ongoʻi ʻa Sihova fekauʻaki mo ʻene kau sevānití taki taha?

 ʻI HE taimi ʻoku sio ai ʻa e ngaahi mātuʻá ki he vaʻinga ʻenau fānaú, ʻoku nau faʻa ʻohovale ʻi he ngaahi malava ʻoku maʻu ʻe heʻenau fānaú. Kuó ke sio foki mo koe ʻi he meʻá ni. ʻE sai nai ha kiʻi tama ʻe taha ʻi he sipotí, lolotonga ia ko e tokotaha ʻoku saiʻia ʻi he tā fakatātaá pe ngaohi ha meʻá. Tatau ai pē pe ko e hā ʻa e ngaahi malava ko iá, ʻoku fiefia ʻa e ngaahi mātuʻá ke tokoniʻi ʻenau fānaú ke aʻusia ʻenau malava kakató, ʻi hono fakalea ʻe tahá, ke fai ʻa e lelei taha te nau malavá.

² ʻI he tuʻunga ko ha mātuʻa ʻofa, ʻoku mahuʻingaʻia ʻa Sihova ʻi heʻene kau sevānití. ʻOku nau “mahuʻinga” kiate ia tautefito koeʻuhí ko ʻenau faitōnunga mo mateaki kiate iá. (Hāk. 2:7, NW) Ka, kuó ke fakatokangaʻi nai ko ho fanga tokouá mo e fanga tuofāfiné ʻoku toe ʻi ai honau ngaahi talēniti mo e ngaahi malava kehekehe lahi. Ko e fakatātaá, ko e fanga tokoua ʻe niʻihi ko ha kau malanga lelei, pea ko e niʻihi ko e kau fokotuʻutuʻu maau lelei. Ko e fanga tuofāfine tokolahi ʻoku nau lelei ʻi he ako ʻa e ngaahi lea mulí pea ngāueʻaki ia ʻi he ngāue fakafaifekaú. Ko e niʻihi kehe ʻoku nau lelei ʻi hono tokangaʻi ʻa e ngaahi fiemaʻu ʻa e kau puké pe fai ha fakalototoʻa ki he faʻahinga ʻoku nau fiemaʻu iá. (Loma 16:1, 12) ʻOku tau houngaʻia lahi ke ʻi he fakatahaʻangá  fakataha mo e kotoa ʻo e fanga tokoua mo e fanga tuofāfine peheé.

 3. Ko e hā ʻa e ongo fehuʻi te tau lāulea ki ai ʻi he kupu ko ení?

³ Ko e kau Kalisitiane ʻe niʻihi, tautefito ki he fanga tokoua kei talavou pe toki papitaisó, te nau ongoʻi nai ʻoku teʻeki ai ke ʻi ai haʻanau kaunga ki he fakatahaʻangá. ʻE lava fēfē ke tau tokoniʻi kinautolu ke aʻusia ʻenau malava kakató? Ko e hā ʻoku totonu ai ke tau feinga ke faʻifaʻitaki kia Sihova pea sio ki he ngaahi ʻulungaanga lelei hotau fanga tokouá?

4, 5. Ko e hā naʻe vakai ki ai ʻa Sihova ʻia Kitioné? Ko e hā ʻoku tau ako mei he faʻifaʻitakiʻanga ʻa Sihová?

⁴ ʻOku fakahaaʻi mai ʻe he Tohi Tapú ʻoku ʻikai ngata pē ʻi he vakai mai ʻa Sihova ki he ngaahi ʻulungaanga lelei ʻene kau sevānití ka ʻokú ne toe vakai mai ki heʻenau malavá. Ko e fakatātaá, naʻe fili ʻe Sihova ʻa Kitione ke ne fakatauʻatāinaʻi ʻa e kau ʻIsilelí mei honau ngaahi filí ʻa e kau Mitianí. Naʻe ongoʻi taʻemahuʻinga ʻa Kitione, ko ia kuo pau pē naʻá ne ʻohovale ʻi he taimi naʻe tala ange ai kiate ia ʻe ha ʻāngelo: “ʻOku ʻiate koe ʻa e ʻEiki, siʻi toʻa teteʻe.” Naʻe ʻikai ongoʻi “toʻa” ʻa Kitione, pea naʻá ne ongoʻi heʻikai malava ke ne fakahaofi ʻa e kakai ʻa e ʻOtuá. Ka naʻe kehe ʻa e vakai ia ʻa Sihova ki he ngaahi meʻá. Naʻá ne sio ki he malava ʻa Kitioné pea ʻilo te Ne malava ke ngāueʻaki ʻa Kitione ke fakahaofi ʻa ʻIsileli.—Lau ʻa e Fakamaau 6:11-16.

⁵ Naʻe falala kakato ʻa Sihova kia Kitione koeʻuhí naʻá Ne ʻiloʻi ʻene malavá. Ko e fakatātaá, naʻe vakai hifo ʻa Sihova ki he taimi naʻe haha ai ʻe Kitione mo teuteu ʻa e uité, naʻá ne ngāue kotoa ʻaki hono mālohí. Pehē foki, naʻe angamaheniʻaki ke ngāue ʻa e kau ngoué ʻi tuʻa, ka naʻe teuteu ʻe Kitione ʻa e uité ʻi loto ʻi ha tataʻoʻanga uaine koeʻuhi ke ʻoua ʻe sio ʻa e kau Mitianí ki heʻene ngoué ʻo kaihaʻasi. Naʻe vakai ʻa Sihova kia Kitioné ʻo ʻikai ko ha tokotaha ngāue mālohi pē. Ko ha tangata poto ia ʻa ia naʻá ne malava ke mahinoʻi ha tuʻunga pea fai ʻa e ngaahi fili fakapotopoto ke fakaʻehiʻehi mei he fakatuʻutāmakí. ʻIo, naʻe vakai ʻa Sihova ki he ngaahi malava ʻa Kitioné peá ne akoʻi ia.

6, 7. (a) Naʻe anga-fēfē ʻa e kehe ʻa e vakai ʻa Sihova kia ʻĒmosí mei he kau ʻIsileli ʻe niʻihi? (e) Ko e hā ʻoku tau ʻiloʻi ai naʻe ʻikai hala hono fili ʻo ʻĒmosí?

⁶ ʻI he tuʻunga meimei tatau, naʻe vakai ʻa Sihova ki he malava ʻi he palōfita ko ʻĒmosí. Ki he tokolahi, naʻá ne hā ngali ko ha tangata fakalongolongo mo taʻemahuʻinga. Naʻá ne fai ʻa e ngaahi ngāue mātuʻaki faingofua hangē ko ha tauhi-sipi mo e ngāue ʻi he ngoué. Ka naʻe vaheʻi ʻe Sihova ʻa ʻĒmosi ke ne fakatonutonuʻi ʻa e matakali ʻe hongofulu ʻo ʻIsileli ʻa ia naʻe tuku ʻenau lotu kiate Iá. Naʻe fakakaukau nai ʻa e kau ʻIsileli ʻe niʻihi naʻe hala hono fili ʻo ʻĒmosí. Ko e hā hono ʻuhingá?—Lau ʻa e ʻĒmosi 7:14, 15.

⁷ Naʻe haʻu ʻa ʻĒmosi mei ha kolo tuʻu mavahe. Ka naʻá ne ʻilo lahi fekauʻaki mo e ngaahi anga fakafonua mo e kau pule takatakai ʻiate iá, mahalo mei he kau tangata naʻa nau fononga ʻo fou atu ʻi hono koló ʻi he ngaahi meʻa fakapisinisí. Ko e fakatātaá, naʻe ʻilo lahi ʻa ʻĒmosi fekauʻaki mo e ngaahi puleʻanga ofi maí pea mo e ngaahi tuʻunga kovi ʻi ʻIsilelí. (ʻĒm. 1:6, 9, 11, 13; 2:8; 6:4-6) Pehē foki, ko ha tokotaha-hiki tohi lelei ia. Naʻe malava ke ne ngāueʻaki ʻa e ngaahi lea faingofua kae mālohi. Naʻe ʻikai ke ne ilifia ke fakahalaiaʻi ʻa e taulaʻeiki kovi ko ʻAmasaiá. Ko e moʻoni, naʻe fili ʻe Sihova ʻa e tokotaha totonu ke fakahoko ʻene pōpoakí. Naʻá ne vakai ki he ngaahi malava ʻia ʻĒmosi ʻa ia naʻe ʻikai vakai nai ki ai ʻa e niʻihi kehé.—ʻĒm. 7:12, 13, 16, 17.

 8. (a) Ko e hā naʻe talaʻofa ʻe Sihova te ne fai maʻa Tēvitá? (e) Ko e hā ʻoku fakalototoʻa ai ʻa e Saame 32:8 ki he faʻahinga ko ia ʻoku ʻikai nai ke nau falala-pau ki heʻenau ngaahi malavá?

⁸ ʻOku ʻiloʻi ʻe Sihova ʻa e ngaahi malava ʻa e kotoa ʻene kau sevānití, pea ʻokú ne loto ke tokoniʻi kitautolu taki taha ke fai ʻa e lelei taha te tau malavá. Ko e fakatātaá, naʻe talaʻofa ʻe Sihova te ne tataki ʻa Tēvita pea ʻoange kiate ia ʻa e faleʻi  naʻá ne fiemaʻú. (Lau ʻa e Saame 32:8.) Ko e hā ʻoku fakalototoʻa ai eni kia kitautolú? Neongo heʻikai nai ke tau falala-pau kia kitautolu, ʻe lava ke tokoniʻi kitautolu ʻe Sihova ke tau fai ʻa e meʻa lahi ange ʻi he meʻa ʻoku tau sioloto atu ki aí. Hangē pē ko ha faiako lelei ʻokú ne tataki nai ha tokotaha ako taʻetaukei ʻi heʻene laka kotoa pē, ko Sihova ʻokú ne tataki kitautolu koeʻuhí ke tau lava ʻo aʻusia ʻetau malava kakató. Pea te ne ngāueʻaki nai hotau fanga tokouá mo e fanga tuofāfiné ke tokoniʻi kitautolu ke fai ʻa e meʻa ko iá. ʻI he ngaahi founga fē?

 9. ʻE lava fēfē ke tau “tokanga” ki he ngaahi meʻa hotau fanga tokouá mo e fanga tuofāfiné?

⁹ Naʻe fakalototoʻaʻi ʻe Paula ʻa e kotoa ʻo e kau Kalisitiané ke “tokanga” ki he ngaahi meʻa honau fanga tokouá mo e fanga tuofāfiné. (Lau ʻa e Filipai 2:3, 4.) Ko e hā naʻe kau ʻi he akonaki ko ení? ʻOku totonu ke tau fakatokangaʻi ʻa e ngaahi malava hotau fanga tokouá pea lave ki ai. ʻOku anga-fēfē hoʻo ongoʻi ʻi he taimi ʻoku fakatokangaʻi ai ʻe ha taha hao ʻulungaanga lelei? ʻOkú ke fie fai ha fakalakalaka lahi ange. ʻOku moʻoni tatau pē mo hotau fanga tokouá. Kapau te tau vaheʻi ha taimi ke fakatokangaʻi ʻa e ngaahi feinga ʻoku fai ʻe hotau fanga tokouá, ʻe fakalototoʻaʻi ai kinautolu ke fai ha fakalakalaka pea lavameʻa ʻi heʻenau ngāue kia Sihová.

10. Ko hai ʻoku tautefito ʻenau fiemaʻu ʻetau tokangá?

¹⁰ ʻI he taimi ʻe niʻihi, ʻoku tau fiemaʻu kotoa ʻa e tokanga mei he niʻihi kehé. Ka ko e fanga tokoua kei talavou pe toki papitaisó ʻoku tautefito ʻa e fiemaʻu ke nau ongoʻi ʻoku nau kaunga ki he fakatahaʻangá. ʻE tokoniʻi heni kinautolu ke mahinoʻi ko ha konga mahuʻinga kinautolu ʻo e kakai ʻa Sihová. ʻOku fakalototoʻaʻi ʻe he Tohi Tapú ʻa e fanga tokoua ko ení ke nau taau ki he ngaahi fatongia lahi ange. (1 Tīm. 3:1) Ka ʻo kapau ʻoku ʻikai ke nau ongoʻi ʻoku fakahoungaʻi ʻa e ngāue ʻoku nau faí, ʻe fakalotosiʻiʻi nai ʻe he meʻá ni kinautolu mei hano fai ha meʻa lahi ange ʻi he ngāue ʻa Sihová.

11. (a) Naʻe anga-fēfē hono tokoniʻi ʻe ha mātuʻa ha tokoua kei talavou ke fai ha fakalakalaka? (e) Ko e hā ʻokú ke ako mei he hokosia ʻa Julien?

¹¹ ʻOku pehē ʻe ha mātuʻa ko Ludovic ʻi he taimi ʻoku fakahāhā ai ha mahuʻingaʻia loto-moʻoni ki ha tokoua, ʻoku vave ange ʻene fakalakalaká. Ko ha tokoua pehē ko Julien. Naʻe fakatokangaʻi ʻe Ludovic naʻe mā ʻa Julien, pea ʻi he taimi naʻá ne feinga ai ke fai ha meʻa lahi ange ʻi he fakatahaʻangá, naʻe taʻepauʻia ʻa Julien ʻiate ia pea tōʻonga ʻi ha founga faikehe. ʻOku pehē ʻe Ludovic, “Ka naʻe lava ke u sio naʻá ne anga-lelei ʻaupito mo loto moʻoni ke tokoni.” Ko ia ʻi he ʻikai fakaangaʻi ʻa Julien, naʻe hangataha ʻa Ludovic ki hono ngaahi ʻulungaanga leleí pea fakalototoʻaʻi ia. Ko hono olá, naʻe malava ke taau ʻa Julien ke hoko ko ha sevāniti fakafaifekau pea hoko ki mui ange ko ha tāimuʻa tuʻumaʻu.

12. Ko e hā kuo pau ke tau fai kae malava ke tau tokoniʻi hotau fanga tokouá? ʻOmai ha fakatātā.

¹² Kapau ʻoku tau loto ke tokoniʻi hotau fanga tokouá ke aʻusia ʻenau malava kakató, ʻoku fiemaʻu ke tau sio fakalaka atu ʻi honau ngaahi vaivaiʻangá. ʻOku fiemaʻu ke tau sio ki honau ngaahi ʻulungaanga leleí mo e ngaahi malavá. Naʻe malava ke fai eni ʻe Sīsū ki he ʻapositolo ko Pitá. ʻI he taimi ʻe niʻihi, naʻe hā ngali naʻe ʻikai falalaʻanga ʻa Pita. Ka naʻe sio ʻa Sīsū ki hono ngaahi ʻulungaanga leleí pea ʻoange kiate ia ʻa e hingoa ko e Pitá, ʻa ia ʻoku ʻuhingá “Ko ha Konga Maka.” Ko ia ai, naʻe pehē ʻe Sīsū te ne hoko ʻo tuʻumaʻu hangē ha maká.—Sione 1:42.

13, 14. (a) Naʻe anga-fēfē ʻa e vakai ʻa Panepasa ki he kiʻi talavou ko Maʻaké? (e) Naʻe anga-fēfē ʻa e maʻu ʻaonga ʻa Alexandre mei he tokoni naʻá ne maʻu mei ha mātuʻa? (Sio ki he ʻuluaki fakatātā ʻi he kupú ni.)

¹³ Tau toe fakamanatu angé ʻa e faʻifaʻitakiʻanga ʻa Panepasa mo Maʻaké. (Ngā. 12:25) Ko Maʻake naʻe totonu ke ne tokanga ki he ngaahi fiemaʻu ʻa Paula mo Panepasá lolotonga ʻenau ʻuluaki fononga fakamisinalé. Kae fakafokifā, ʻi he taimi naʻa nau aʻu ai ki he feituʻu ko  Pamifīliá, naʻe liʻaki kinaua ʻe Maʻake. Naʻe tuku ʻa Paula mo Panepasa ke na fononga atu ʻi ha feituʻu fakatuʻutāmaki. (Ngā. 13:5, 13) Ko e hā naʻe fai ʻe Panepasá? ʻOku hā ngali naʻá ne hangataha ki he ngaahi ʻulungaanga lelei ʻo Maʻaké, ʻikai ki hono ngaahi vaivaiʻangá. Naʻe ʻikai ke ne vakai kia Maʻake ʻoku taʻefalalaʻanga. ʻI hono kehé, naʻe akoʻi ki mui ʻe Panepasa ʻa Maʻake, pea ko hono olá, naʻá ne hoko ko ha Kalisitiane matuʻotuʻa. (Ngā. 15:37-39) ʻI he ngaahi taʻu ki mui angé, naʻe ʻi Loma ʻa Maʻake ʻo tokoni kia Paula, ʻa ia naʻá ne ʻi pilīsone. Pea ʻi he taimi naʻe tohi ai ʻa Paula ki he kau Kolosé, naʻá ne lea lelei fekauʻaki mo Maʻake. (Kol. 4:10) ʻE lava ke ke sioloto atu ki he fiefia kuo pau naʻe ongoʻi ʻe Panepasa ʻi he taimi naʻe kole ai ʻe Paula ʻa e tokoni ʻa Maʻaké?—2 Tīm. 4:11.

¹⁴ ʻOku manatuʻi ʻe ha mātuʻa ko Alexandre ʻa e founga naʻe tokoniʻi ai ia ʻe ha tokoua: “ʻI heʻeku kei siʻí, ko hono fai ha lotu ʻi he kakaí ko ha fāinga lahi ia kiate au. Naʻe fakahaaʻi mai ʻe ha mātuʻa kiate au ʻa e founga ke u mateuteu aí pea hoko ʻo fiemālie lahi angé. ʻI he ʻikai toe taʻevaheʻi mai ke u lotú, naʻá ne ʻomai ʻa e ngaahi faingamālie ke lotu maʻu pē ʻi he ngaahi fakataha ki he ngāue fakamalangá. ʻI he faai atu ʻa e taimí, naʻá ku loto-maʻu lahi ange.”

15. Naʻe anga-fēfē hono fakahāhā ʻe Paula naʻá ne mahuʻingaʻia ʻi hono fanga tokouá?

¹⁵ Ko e hā ʻokú ke fai ʻi he taimi ʻokú ke sio ai ki he ngaahi ʻulungaanga lelei ʻi he kau Kalisitiane kehé? ʻOkú ke fakaongoongoleleiʻi kinautolu? ʻI he Loma vahe 16, naʻe fakahaaʻi ai ʻe Paula ʻa hono fanga tokoua mo e fanga tuofāfine ʻe toko 20 tupu koeʻuhí ko e ngaahi ʻulungaanga naʻá ne mahuʻingaʻia ai. (Loma 16:3-7, 13) Ko e fakatātaá, naʻe fakaongoongoleleiʻi ʻe Paula ʻa ʻAnitalonaika mo Sūnia koeʻuhí kuó na ngāue kia Kalaisi ʻo fuoloa ange ʻiate ia pea koeʻuhí ko ʻena kātakí. Naʻe lave foki ʻa Paula ki he faʻē ʻa Lūfusí koeʻuhi ko e tokanga ʻofa naʻá ne fai ange kiate iá.

16. Ko e hā ʻa e ola ʻe lava ke tau maʻu ʻi he taimi ʻoku tau fakaongoongoleleiʻi ai ʻa e fānaú?

¹⁶ Ko kitautolu foki ʻe lava ke tau maʻu ha ngaahi ola lelei ʻi he taimi ʻoku tau fakaongoongoleleiʻi ai ʻa e niʻihi kehé. Fakakaukau ki he faʻifaʻitakiʻanga ʻa Rico, ko ha kiʻi tamasiʻi ʻi Falanisē ʻa ia ko ʻene tamaí naʻe ʻikai ke tauhi kia Sihova. Naʻe loto-siʻi ʻaupito ʻa Rico koeʻuhí naʻe ʻikai loto ʻene tamaí ke ne papitaiso. Naʻá ne ilifia naʻa faifai kuó ne tatali ke fuʻu lahi kae toki fai pehē. Naʻe toe loto-mamahi ʻa Rico he naʻe fakakataʻaki ia ʻe he fānau ʻi he ʻapiakó koeʻuhí ko ʻene ngaahi tuí. Ka ko ha mātuʻa ko Frédéric naʻá ne fakaongoongoleleiʻi ʻa Rico, ʻo tala ange kiate ia ko e fakafepaki ʻokú ne fehangahangai mo iá naʻe ʻuhinga iá naʻá ne loto-toʻa feʻunga ke malanga. Ko hono ola ʻo e ngaahi lea anga-ʻofa ko ení, naʻe fakapapauʻi ʻe Rico ke hokohoko atu ʻene fakalakalaká, pea naʻá ne fakaleleiʻi hono vahaʻangatae mo ʻene tamaí. Naʻe papitaiso ʻa Rico ʻi heʻene taʻu 12.

17. (a) ʻE lava fēfē ke tau tokoniʻi hotau fanga tokouá ke foaki honau lelei tahá kia Sihová? (e) Naʻe anga-fēfē hono tokoniʻi ʻe ha misinale ʻa e fanga tokoua kei talavoú? Ko e hā ʻa e olá?

¹⁷ ʻI he taimi taki taha ʻoku tau fakaongoongoleleiʻi ai hotau fanga tokouá ki ha meʻa lelei naʻa nau fai, ʻe aʻu ʻo ueʻi lahi ange ai kinautolu ke foaki honau lelei tahá kia Sihova. Ko Silivia, ʻa ia kuó ne ngāue ʻi ha ngaahi taʻu ʻi he Pēteli ʻi Falaniseé, ʻokú ne pehē ʻe lava foki mo e  fanga tuofāfiné ke nau fakaongoongoleleiʻi ʻa e fanga tokouá. a ʻOku aʻu ʻo ne ongoʻi ko hono fatongia ia ke fai pehē. (Pal. 3:27) ʻI he ngaahi taimi lahi, ʻoku fakatokangaʻi ʻe he fanga tuofāfiné ha ngaahi fakaikiiki ʻoku ʻikai nai ke fakatokangaʻi ʻe he fanga tokouá. Ko ia ʻi he taimi ʻoku fakaongoongoleleiʻi ai ʻe he fanga tuofāfiné ʻa e fanga tokouá ki heʻenau ngaahi feingá, ʻe lava ke tānaki atu eni ki he meʻa ʻoku leaʻaki nai ʻe he fanga tokoua taukeí kia kinautolú. Ko Jérôme, ko ha misinale ʻi Kiana Falanisē, kuó ne tokoniʻi ʻa e fanga tokoua kei talavou tokolahi ke fokotuʻu ʻa e taumuʻa ʻo e hoko ko ha kau misinalé. ʻOkú ne pehē ʻi he taimi ʻokú ne fakaongoongoleleiʻi ai ʻa e fanga tokoua kei talavoú ki ha meʻa pau naʻa nau fai ʻi he ngāue fakafaifekaú pe fai ha tali lelei, ʻoku nau hoko ai ʻo loto-maʻu lahi ange pea fakaleleiʻi ai ʻenau ngaahi malavá.

18. Ko e hā ʻoku lelei ai ke ngāue fakataha mo e fanga tokoua kei talavoú?

¹⁸ ʻE lava ke tau toe fakalototoʻaʻi ʻa e kau Kalisitiané ke fai ha fakalakalaka ʻaki ʻa e ngāue fakataha mo kinautolu. Ko e fakatātaá, ʻe kole nai ʻe ha mātuʻa ki ha tokoua kei talavou ke pulusi mai ha fakamatala mei he jw.org ʻa ia ʻe ʻaonga ki he faʻahinga taʻumotuʻa ʻoku ʻikai haʻanau komipiutá. Pe te ke kole nai ki ha tokoua kei talavou ke tokoni atu ʻi hono fakamaʻa pe monomono ʻa e Fale Fakatahaʻangá. ʻI he taimi ʻokú ke fai ai ha feinga ke ngāue fakataha mo e kau talavoú, te ke maʻu ai ha faingamālie ke fakatokangaʻi ʻenau ngaahi malavá, fakaongoongoleleiʻi kinautolu pea sio ki heʻenau fokotuʻú.—Pal. 15:23.

19, 20. Ko e hā ʻoku totonu ai ke tau tokoniʻi ʻa e niʻihi kehé ke fai ha fakalakalaká?

¹⁹ Naʻe fili ʻe Sihova ʻa Siosiua ke ne taki ʻa e kau ʻIsilelí. ʻI he taimi ko iá, naʻe fekauʻi ʻe he ʻOtuá ʻa Mōsese ke ne akoʻi, “poupou” mo “tokoniʻi” ʻa Siosiua. (Lau ʻa e Teutalōnome 3:28.) ʻI he ʻahó ni, ʻoku tokolahi ʻa e kakai ʻoku nau kamata ke lotu kia Sihova. ʻOku tau fiemaʻu ʻa e fanga tokoua taau ke takimuʻa ʻi he kautahá. Ko ia ko e faʻahinga kotoa ʻi he fakatahaʻangá kuo pau ke nau tokoniʻi ʻa e fanga tokoua kei talavou pe toki papitaisó ke aʻusia ʻenau malava kakató. Ko hono olá, ʻe toe tokolahi ange ʻa e fanga tokoua te nau hū ki he ngāue taimi-kakató, pea ko e tokolahi ange ʻo kinautolu ʻe “taau” ke faiakó.—2 Tīm. 2:2.

²⁰ Tatau ai pē pe ʻoku tokolahi ʻetau fakatahaʻangá mo lahi ai ha fanga tokoua taukei pe ko ha konga kitautolu ʻo ha kiʻi kulupu tokosiʻi, ʻe lava ke tau tokoni ki he ngaahi fiemaʻu ʻi he kahaʻú ʻa e kautahá. Ke fai ení, kuo pau ke tau faʻifaʻitaki kia Sihova pea sio ki he lelei ʻi he niʻihi kehé.