ʻOku ʻikai ke fakafepakiʻi fakahangatonu ʻe he Folofolá ia hono fai ʻo e fakamomofí.

ʻOku ʻi ai ʻa e ngaahi fakamatala Fakatohitapu ʻo fekauʻaki mo e ngaahi sino pe hui ʻo e kakai mate naʻe tutu. (Sios. 7:25; 2 Kal. 34:4, 5) ʻOku fakahaaʻi nai heni ko e kakai ko iá naʻe hā ngali ʻikai taau mo hano tanu fakalelei. ʻI he taimi naʻe tutu ai ʻa e ngaahi sino ʻo e kau maté naʻe ʻikai ke ʻuhinga maʻu pē ia naʻe taʻetaau ke tanu kinautolu.

ʻE lava ke tau sio ki he meʻá ni mei he fakamatala ki he mate ʻa Tuʻi Saula mo hono foha ʻe toko tolú. Naʻe mate ʻa e toko faá ʻi heʻenau faitau mo e kau Filisitiá. Ko e taha ʻi he ngaahi fohá ko Sionatane, ʻa e kaumeʻa lelei mo e poupou mateaki ʻo Tēvitá. ʻI he taimi naʻe ʻiloʻi ai ʻe he kau ʻIsileli loto-toʻa naʻa nau nofo ʻi Siepesi-kiliatí ʻa e meʻa naʻe hokó, naʻa nau tānaki mai ʻa e ngaahi sino ʻe faá, ʻo tutu kinautolu pea tanu ʻa e ngaahi huí. Naʻe fakahīkihikiʻi ʻe Tēvita ki mui ʻa e kau ʻIsileli ko iá ki heʻenau ngāué.—1 Sām. 31:2, 8-13; 2 Sām. 2:4-6.

Ko e ʻamanaki Fakatohitapu ki he kau maté ko e toetuʻu—ko hono toe fakamoʻui mai ʻe he ʻOtuá ʻa e tokotahá. Pe ʻoku fakamomofi ha tokotaha mate pe ʻikai, ʻoku ʻikai ke fakangatangata ai ʻa e malava ʻa Sihova ke ne fakamoʻui mai ʻa e tokotahá mo ha sino foʻou. Ko e kau Hepelū faitōnunga ʻe toko tolú ʻa ia naʻa nau fehangahangai mo e mate ʻi ha fōnise afi ʻo hangē ko hono fekauʻi ʻe Tuʻi Nepukanesá naʻe ʻikai fiemaʻu ke nau ilifia he kapau naʻa nau ʻauha, heʻikai malava ʻe he ʻOtuá ke fokotuʻu kinautolu. (Tan. 3:16-18) Naʻe toe moʻoni ia fekauʻaki mo e kau sevāniti faitōnunga ʻa Sihova ʻa ia naʻa nau fehangahangai mo e maté pea fakamomofi ki mui ʻi he ngaahi kemi fakamamahi ʻa e kau Nasí. Ko e kau sevāniti mateaki ʻe niʻihi ʻa e ʻOtuá kuo nau ʻauha ʻi he ngaahi fakapā pomu pe ʻi he ngaahi founga kehe ʻa ia naʻa nau ʻauha ʻosi ai. Ka, ko ʻenau toetuʻú ʻoku papau.—Fkh. 20:13.

ʻOku ʻikai fiemaʻu ia kia Sihova ke fakatahatahaʻi ʻa e sino ki muʻa ʻo ha tokotaha koeʻuhí ke fokotuʻu hake. ʻOku hā ia ʻi hono fokotuʻu hake ʻe he ʻOtuá ʻa e kau Kalisitiane paní ki he moʻui fakahēvaní. Hangē ko Sīsuú, ʻa ia “naʻe fakamoʻui hake ia ʻi he laumālie” ʻoku fokotuʻu hake ʻa e kau Kalisitiane paní ko e tokotaha tatau kae sino fakalaumālie. ʻOku ʻikai ha konga ʻo honau sino fakakakano ki muʻá te nau ʻalu mo ia ki hēvani.—1 Pita 3:18; 1 Kol. 15:42-53; 1 Sio. 3:2.

Ko ʻetau ʻamanaki ki he toetuʻú ʻoku fakatuʻunga ia ʻo ʻikai ʻi he meʻa naʻe hoko nai ki he sino fakakakanó, ka ʻi he tui ki he malava mo e holi ʻa e ʻOtuá ke fakahoko ʻene ngaahi talaʻofá. (Ngā. 24:15) Ko e moʻoni, heʻikai nai ke tau mahinoʻi kakato ʻa e founga kuo fakahoko ai ʻe he ʻOtuá ʻa e mana ʻo e toetuʻú ʻi he ngaahi taimi ʻo e kuohilí pe founga te ne fai pehē ai ʻi he kahaʻú. Ka, ʻoku tau falala kia Sihova. Kuó ne ʻomi “ha fakapapauʻiʻanga” ʻi hono fokotuʻu hake ʻa Sīsuú.—Ngā. 17:31; Luke 24:2, 3.

ʻOku lelei ki he kau Kalisitiané ke nau fakakaukauʻi ʻa e ngaahi meʻa fakasōsiale, ngaahi fakakaukau fakalotofonua, mo e ngaahi fiemaʻu fakalao fekauʻaki mo e tuʻunga ʻo e ngaahi sino ʻo e kau maté. (2 Kol. 6:3, 4) Pea tatau ai pē pe ko e sino ʻo ha tokotaha mate ʻoku fakamomofi pe ʻikai, ko ha fili fakafoʻituitui pe fakafāmili ia.