1-3. Ko e hā ʻa e ngaahi pole ʻoku hokosia ʻe he ngaahi hoa malí? (Sio ki he ʻuluaki fakatātā ʻi he kupú ni.)

 “KAPAU te ke fai ha feinga loto-moʻoni pea fakahāhā ʻokú ke loto ke lavameʻa hoʻo nofo malí, ʻe lava ke ke maʻu ʻa e tāpuaki ʻa Sihová,” ko e lau ia ʻa ha husepāniti kuó ne nofo mali fiefia ʻi he taʻu ʻe 38. ʻIo, ʻoku malava ki he ngaahi husepānití mo e ngaahi uaifí ke fiefia fakataha pea fepoupouaki lolotonga ʻa e ngaahi taimi faingataʻá.—Pal. 18:22.

² ʻOku anga-maheni ke hokosia ʻe he ngaahi hoa malí ʻa e ngaahi faingataʻa ʻe niʻihi. ʻOku ui eni ʻe he Tohi Tapú ko e “mamahi ʻi honau kakanó.” (1 Kol. 7:28) Ko e hā hono ʻuhingá? Ko e ngaahi palopalema fakaʻahó ʻe lava ke ne fakatupu ʻa e loto-mafasia ʻi ha nofo mali. Koeʻuhí ʻoku nau taʻehaohaoa, ko e ngaahi husepānití mo e ngaahi uaifí ʻoku nau faʻa fefakalotomamahiʻaki pea ʻikai ke nau fetuʻutaki lelei. (Sēm. 3:2, 5, 8) Ko e ngaahi hoa mali tokolahi ʻoku puleʻi kinautolu ʻe he ngāué pea toe tauhi mo e fānau. ʻOku ʻai ʻe he loto-mafasiá mo e ongosiá ke hoko ko ha pole ʻa hono maʻu ha taimi feʻunga ke fakaivimālohiʻi ʻenau nofo malí. Ko e ngaahi palopalema fakapaʻangá, mahamahakí pe ngaahi faingataʻa kehé te ne fakavaivaiʻi māmālie ʻenau feʻofaʻakí mo e fefakaʻapaʻapaʻakí. Pea ko ha nofo mali ʻoku hā mālohi ʻe lava ke maumauʻi ia ʻe he “ngaahi ngāue ʻa e kakanó,” hangē ko e  ʻulungaanga taʻetaau fakaefehokotaki fakasino, faikovi taʻemīngao, fakafili, fekeʻikeʻi, meheka, ʻita tōlili mo e fekīhiaki.—Kal. 5:19-21.

³ Ko e toe kovi angé, ko e kakai ko eni ʻi he “ngaahi ʻaho fakaʻosí” ʻoku nau faʻa siokita mo ʻikai fakaʻapaʻapa ki he ʻOtuá, ʻa e ongo ʻulungaanga ʻe lava ke ne fakameleʻi ha nofo mali. (2 Tīm. 3:1-4) Tānaki atu ki aí, ko ha fili fulikivanu ʻokú ne fakapapauʻi ke fakaʻauha ʻa e ngaahi nofo malí. ʻOku fakatokanga mai ʻa e ʻapositolo ko Pitá: “Ko homou filí, ʻa e Tēvoló, ʻokú ne ʻalu fano holo ʻo hangē ha laione ngungulú, ʻi he kumi ki ha taha ke ne folofua.”—1 Pita 5:8; Fkh. 12:12.

4. ʻE malava fēfē ke maʻu ha nofo mali mālohi mo fiefia?

⁴ ʻOku pehē ʻe ha husepāniti ʻi Siapani: “Naʻá ku loto-mafasia lahi koeʻuhí ko e tuʻunga fakapaʻangá. Pea koeʻuhí naʻe ʻikai ke u fetuʻutaki lelei mo hoku uaifí, naʻá ne loto-mafasia lahi mo ia foki. Tānaki atu ki aí, naʻá ne tofanga ki muí ni mai ʻi ha puke lahi. ʻI ha ngaahi taimi, naʻe ʻai ʻe he loto-mafasia ko ení kimaua ke ma kē.” ʻE ʻi ai ʻa e ngaahi pole ʻe niʻihi ʻi ha nofo mali, ka ʻe lava ke tau ikuʻi ia. ʻI he tokoni ʻa Sihová, ʻe lava ke maʻu ʻe he ngaahi hoa malí ha vahaʻangatae mālohi mo fiefia. (Lau ʻa e Saame 127:1.) Tau lāulea angé ki he founga ʻe nima ke faʻu ai ha nofo mali mālohi mo tuʻuloa. Te tau toe sivisiviʻi ʻa e ʻuhinga ʻoku fiemaʻu ai ʻa e ʻofá ke ʻai ha nofo mali ke mālohi ai pē.

5, 6. Ko e hā ʻe lava ke fai ʻe he ngaahi husepānití mo e ngaahi uaifí ke fakakau ʻa Sihova ʻi heʻenau nofo malí?

⁵ ʻI he taimi ʻoku mateaki ai mo anganofo ha ongo meʻa kia Sihova, ʻe maʻu ʻe heʻena nofo malí ha fakavaʻe mālohi. (Lau ʻa e Koheleti 4:12.) ʻI he muimui ki he tataki anga-ʻofa ʻa e ʻOtuá, ʻoku fakakau ai ʻe he ngaahi husepānití mo e ngaahi uaifí ʻa e ʻOtuá ʻi heʻenau nofo malí. ʻOku pehē ʻe he Tohi Tapú: “ʻE fanongo ʻe ho telinga ki ha lea mei ho tuʻa, Ko eni ʻa e hala, fou ai; ka ai haʻo afe ki toʻomataʻu, pe ka ai haʻo afe ki toʻohema.” (ʻAi. 30:20, 21) ʻI he ʻahó ni, ʻoku “fanongo” ʻa e ngaahi hoa malí ki he folofola ʻa Sihová ʻi he taimi ʻoku nau lau fakataha ai ʻa e Tohi Tapú. (Saame 1:1-3) ʻOku nau fakaivimālohiʻi lahi ange ʻenau nofo malí ʻaki hono fai maʻu pē ʻa e lotu fakafāmili ʻoku fakafiefia mo fakatupu langa hake. Pea ʻi he taimi ʻoku lotu fakataha ai ʻa e ngaahi hoa malí he ʻaho taki taha, ʻoku nau faʻu ai ha nofo mali ʻa ia ʻe lava ke ne talitekeʻi ʻa e ngaahi ʻoho mei he māmani ʻo Sētané.

⁶ ʻOku pehē ʻe Gerhard mei Siamane: “ʻI ha taimi pē ʻoku fakaʻuliʻulilātaiʻi ai ʻe he ngaahi faingataʻa fakafoʻituituí pe ngaahi taʻefemahinoʻakí ʻema fiefiá, ko e faleʻi mei he Folofola ʻa e ʻOtuá kuó ne tokoniʻi kimaua ke fakatupulekina ʻa e kātaki pea faʻa fakamolemole.” ʻOkú ne toe pehē ko e ongo ʻulungaanga ko ení ʻoku mātuʻaki mahuʻinga ki ha nofo mali lavameʻa. ʻI he taimi ʻoku ngāue mālohi ai ʻa e ngaahi husepānití mo e ngaahi uaifí ke fakakau ʻa e ʻOtuá ʻi heʻenau nofo malí ʻaki ʻa e tauhi fakataha kiate iá, ʻoku nau nofo ofi ai kia Sihova pea fakaivimālohiʻi honau vahaʻangataé.

7. ʻOku totonu ke fēfē ʻa e fakafeangai ha husepāniti ki hono uaifí?

⁷ Ko e founga ʻoku takimuʻa ai ha husepāniti ʻi hono fāmilí ʻe lava ke faʻu ai ha nofo mali mālohi mo fiefia. ʻOku pehē ʻe he Tohi Tapú: “Ko e ʻulu ʻo e tangata kotoa pē ko e Kalaisí; ko e ʻulu leva ʻo ha fefine ko e tangatá.” (1 Kol. 11:3) ʻOku ʻuhinga ia ki he hā? Ko e ngaahi husepānití ʻoku totonu ke nau fakafeangai ki honau ngaahi uaifí ʻi he founga tatau naʻe fakafeangai ai ʻa Sīsū ki heʻene kau ākongá. Naʻe ʻikai ʻaupito ke ne anga-fakamamahi pe anga-fefeka. Naʻe anga-ʻofa, anga-lelei, fakaʻatuʻi, anga-malū mo loto-fakatōkilalo maʻu pē ʻa Sīsū.—Māt. 11:28-30.

8. ʻE lava fēfē ke maʻu ʻe ha husepāniti ʻa e ʻofa mo e fakaʻapaʻapa hono uaifí?

⁸ Ko e ngaahi husepāniti Kalisitiané ʻoku ʻikai fiemaʻu ke nau kounaʻi ʻa e fakaʻapaʻapa ʻa honau  ngaahi uaifí. Ka, ʻoku nau ‘hokohoko atu ʻi he fai fakakaukauʻi ʻa ʻenau tokanga kiate kinautolú’ pea “ʻoange kiate kinautolu ʻa e ngeia ʻo hangē ko e fai ki ha ipu vaivai ange, ʻa ia ko e fefiné.” (1 Pita 3:7; fakamatala ʻi lalo) ʻI he kakaí pe fakaekinaua, ʻoku totonu ki he ngaahi husepānití ke nau ngāueʻaki ʻa e ngaahi lea fakaʻapaʻapa pea fakahāhā ʻa e manavaʻofa. ʻI he anga ʻenau fakafeangai mo e lea ki honau ngaahi uaifí, ʻoku fakahaaʻi ai ʻe he ngaahi husepānití ko honau ngaahi uaifí ʻoku mahuʻinga kia kinautolu. (Pal. 31:28) ʻI he taimi ʻoku fakafeangai anga-ʻofa ai ha husepāniti ki hono uaifí, ʻe ʻofa mo fakaʻapaʻapaʻi ia ʻe he uaifí pea ʻe tāpuakiʻi ʻe Sihova ʻena nofo malí.

9. ʻE lava fēfē ke fakahāhā ʻe ha uaifi ʻokú ne anganofo?

⁹ Ko e ʻofa taʻesiokita kia Sihova ʻa ia ʻoku makatuʻunga ʻi heʻene ngaahi tefitoʻi moʻoní te ne tokoniʻi kitautolu ke fakatōkilaloʻi kitautolu “ʻi he malumalu ʻo e toʻukupu māfimafi ʻo e ʻOtuá.” (1 Pita 5:6) Ko ha founga mahuʻinga ke fakahāhā ai ʻe ha uaifi ʻa e fakaʻapaʻapa ki he mafai ʻo Sihová ko e ngāue fakataha mo hono husepānití. ʻOku pehē ʻe he Tohi Tapú: “Ko kimoutolu ngaahi uaifi, mou anganofo ki homou ngaahi husepānití, he ʻoku taau ia ʻi he ʻEikí.” (Kol. 3:18) Ko e moʻoni heʻikai nai ke saiʻia ha uaifi ʻi he ngaahi fili kotoa hono husepānití. Ka ʻo kapau ko ʻene ngaahi filí ʻoku ʻikai fepaki mo e ngaahi lao ʻa e ʻOtuá, ko ha uaifi anganofo te ne loto ke ngāue fakataha mo hono husepānití.—1 Pita 3:1.

10. Ko e hā ʻoku mahuʻinga ai ʻa e anganofo anga-ʻofá?

¹⁰ Kuo ʻoange ʻe Sihova ki he ngaahi uaifí ha ngafa lāngilangiʻia ʻi he fāmilí. Ko ha uaifi ko e “kaumeʻa” ia ʻo hono husepānití. (Mal. 2:14) ʻI he taimi ʻoku fai ai ʻe ha ongo meʻa ha fili fakafāmili, ʻoku tala ange anga-fakaʻapaʻapa ʻe ha uaifi ʻa ʻene fakakaukaú mo e anga ʻene ongoʻí, ka ʻokú ne nofoʻaki anganofo. Ko ha husepāniti fakapotopoto te ne fanongo lelei ki he meʻa ʻe leaʻaki ʻe hono uaifí. (Pal. 31:10-31) Ko e anganofo anga-ʻofá ʻe lava ke ne ʻomai ʻa e fiefia, melino mo e feongoongoi ki he fāmilí. Ko hono olá, ko e ngaahi husepānití mo e ngaahi uaifí ʻe lava ke nau  ongoʻi fiemālie koeʻuhí ʻoku nau ʻilo ʻoku nau fakahōifuaʻi ʻa e ʻOtuá.—ʻEf. 5:22.

11. Ko e hā ʻoku mātuʻaki mahuʻinga ai ʻa e fakamolemolé?

¹¹ Ke faʻu ha nofo mali tuʻuloa, ko e ngaahi husepānití mo e ngaahi uaifí kuo pau ke nau ako ke fefakamolemoleʻaki. ʻI he taimi ʻoku “hokohoko atu ʻa e fekātakiʻaki mo e fefakamolemoleʻaki loto-lelei” ʻa e ngaahi hoa malí, ʻoku nau fakaivimālohiʻi ai honau vahaʻangataé. (Kol. 3:13) Kae kehe, ʻoku fakavaivaiʻi ha nofo mali ʻi he taimi ʻoku fakafisi ai ʻa e ongo meʻá ke fakangaloʻi ʻa e ngaahi fehālaaki ʻi he kuohilí pea ngāueʻaki ia ke tauʻaki fakaanga. Hangē pē ko e lava ʻe ha papā ke ne fakavaivaiʻi ha fale, ko e loto-mamahí mo e ʻitá ʻe ʻai ai ke toe faingataʻa ange ki ha ongo meʻa ke fefakamolemoleʻaki mo ngāue fakataha. Ka ʻoku toe mālohi ange ha nofo mali ʻi he taimi ʻoku fefakamolemoleʻaki ai ha husepāniti mo ha uaifi, ʻo hangē ko e fakamolemoleʻi kinautolu ʻe Sihová.—Mai. 7:18, 19.

12. ʻE anga-fēfē hono ʻufiʻufi ʻe he ʻofá “ha fuʻufuʻunga angahala”?

¹² Ko e ʻofa moʻoní “ʻoku ʻikai te ne hanganaki fakalau ʻa e koví.” Ko hono moʻoní, “ko e ʻofá ʻokú ne ʻufiʻufi ha fuʻufuʻunga angahala.” (1 Kol. 13:4, 5; lau ʻa e 1 Pita 4:8.) Ko ia kapau ʻoku tau ʻofa ki he niʻihi kehé, ʻoku ʻikai ke fakangatangata ʻa e lahi ʻo ʻetau fakamolemolé. ʻI he taimi naʻe ʻeke ai ʻe he ʻapositolo ko Pitá pe ʻoku totonu ke tuʻo fiha ʻene fakamolemoleʻi ha taha, naʻe tali ʻe Sīsū: “Aʻu ki he tuʻo fitungofulu-mā-fitu.” (Māt. 18:21, 22) Ko e hā ʻa e ʻuhinga ʻa Sīsuú? Naʻá ne ʻuhingá ʻoku ʻikai ke ʻi ai ha fakangatangata ki he lahi ʻoku totonu ke fakamolemoleʻi ʻe ha Kalisitiane ʻa e niʻihi kehé.—Pal. 10:12. a

13. ʻE lava fēfē ke tau tauʻi ʻa e hehema ʻo e hoko ʻo taʻefakamolemolé?

¹³ ʻOku pehē ʻe Annette mei Siamane: “Kapau ʻoku ʻikai loto ha ongo meʻa ke fakamolemole, ʻe tupulaki ʻa e ʻitá mo e taʻefalalá pea ʻe fakameleʻi ai ha nofo mali. Ko e hoko ʻo fakamolemolé ʻokú ne fakaivimālohiʻi ʻa e haʻi ʻo e nofo malí pea tohoakiʻi ke mo vāofi ange.” Hoko ʻo fakamālō pea fakahāhā ʻa e houngaʻia. Kumi ki he ngaahi meʻa ke fakaongoongoleleiʻi ai ho hoa malí. ʻI he fai peheé, ʻe malava ai ke ke tauʻi ʻa e hehema ʻo e hoko ʻo taʻefakamolemolé. (Kol. 3:15) Ko hono olá, te ke maʻu ʻa e nonga ʻo e ʻatamaí, fāʻūtaha mo e hōifua ʻa e ʻOtuá.—Loma 14:19.

14, 15. Ko e hā ʻa e Lao Koula, pea ʻe lava fēfē ke fakaivimālohiʻi ha nofo mali ʻi hono ngāueʻaki iá?

¹⁴ Ngalingali ʻokú ke loto ke fakafeangai atu kiate koe ʻi he founga fakangeingeia mo fakaʻapaʻapa. ʻOkú ke houngaʻia ʻi he taimi ʻoku fanongo atu ai ʻa e niʻihi kehé kiate koe pea tokanga fekauʻaki mo e anga hoʻo ongoʻí. Ka kuó ke fanongo ʻi ha tokotaha ʻoku pehē, “Te u fai pē kiate ia ʻa e meʻa naʻá ne fai mai kiate aú”? ʻI he taimi ʻe niʻihi ʻoku mahino ʻa e fakafeangai ko ení. Kae kehe, ʻoku tala mai ʻe he Tohi Tapú: “ʻOua te ke pehe, ‘Hange ko ʻene fai kiate au ʻe pehe ʻeku fai kiate ia.’” (Pal. 24:29) Naʻe akoʻi ʻe Sīsū ʻa e kakaí ki he founga lelei taha ke fakaleleiʻi ai ʻa e ngaahi tuʻunga faingataʻá. Ko e meʻa naʻe leaʻaki ʻe Sīsuú ʻoku faʻa ui ko e Lao Koulá: “Hangē tofu pē ko ia ʻoku mou loto ke fai atu ʻe he kakaí kiate kimoutolú, fai pehē pē kiate kinautolu.” (Luke 6:31) Naʻe ʻuhinga ʻa Sīsuú ʻoku totonu ke tau fakafeangai ki he kakaí ʻi he founga te tau saiʻia ke fakafeangai mai ʻaki kia kitautolú, ʻo ʻikai ko e founga ʻenau fakafeangai maí. ʻOku ʻuhinga ení ʻoku fiemaʻu ke tau ʻoatu ki heʻetau nofo malí ʻa e meʻa ʻoku tau fakaʻamu ke maʻu mei aí.

¹⁵ ʻOku fakaivimālohiʻi ʻe he ngaahi hoa malí honau vahaʻangataé ʻi he taimi ʻoku nau fetokangaʻaki moʻoni ai ki heʻenau ngaahi ongoʻí.  “Kuó ma feinga ke ngāueʻaki ʻa e Lao Koulá,” ko e lau ia ha husepāniti ʻi ʻAfilika Tonga. “Ko e moʻoni, ʻoku ʻi ai ʻa e ngaahi taimi naʻá ma loto-mamahi, ka naʻá ma ngāue mālohi ke fefakafeangaiʻaki ʻi he founga naʻá ma saiʻia ke fakafeangai mai ʻakí—ʻi he founga fakaʻapaʻapa mo fakangeingeia.”

16. Ko e hā ʻoku ʻikai ʻaupito totonu ke fai ʻe ha husepāniti mo ha uaifi?

¹⁶ ʻOua ʻe fakaeʻa ʻa e ngaahi vaivaiʻanga ho hoa malí ki he niʻihi kehé pe hanganaki lāunga fekauʻaki mo ha tōʻonga ʻoku fakalotomamahi kiate koe, naʻa mo e fakakataʻaki. Manatuʻi ko e nofo malí ʻoku ʻikai ko ha feʻauhi ke fakamoʻoniʻi pe ko hai ʻoku mālohi angé, ko hai ʻe lava ke kaila leʻo-lahi angé pe ko hai ʻe lava ke ne leaʻaki ʻa e meʻa ʻe fakalotomamahi tahá. Ko e moʻoni, ʻoku tau taʻehaohaoa kotoa pea fakalotomamahiʻi ʻa e niʻihi kehé ʻi he taimi ʻe niʻihi. Ka ʻoku ʻikai ʻaupito ke ʻi ai ha ʻuhinga lelei ki ha ongo meʻa ke ʻai ha meʻa ʻe fakamāʻia ai ha taha ʻia kinaua, ke na ngāueʻaki ha ngaahi lea fakalotomamahi pe ko e kovi angé ko e tauteke pe tautā.—Lau ʻa e Palōveepi 17:27; 31:26.

17. ʻE lava fēfē ke ngāueʻaki ʻe he ngaahi husepānití ʻa e Lao Koulá?

¹⁷ ʻI he ngaahi anga fakafonua ʻe niʻihi, ʻoku fakamamahiʻi ʻe he kakai tangatá pe tā honau ngaahi uaifí ke fakamoʻoniʻi ʻoku nau mālohi. Ka ʻoku pehē ʻe he Tohi Tapú: “Koia oku fakatotoka ki he ita oku lelei hake ia i ha taha oku malohi; bea behe foki ia oku faa bule ki hono loto i ha taha oku hamu ha kolo.” (Pal. 16:32, PM) ʻOku fiemaʻu ki ha tokotaha ha mālohi lahi ʻi loto ke fakahāhā ʻa e mapuleʻi-kita ʻo hangē ko Sīsū Kalaisí, ʻa e moʻungaʻi tangata lahi taha kuo moʻui maí. Ko ha tangata ʻoku anga-fakamamahi pe tā hono uaifí ko ha tangata vaipalo ia ʻe mole hono vahaʻangatae mo Sihová. Ko e tokotaha-tohi-saame ko Tēvitá, ʻa ia ko ha tangata mālohi mo loto-toʻa, naʻá ne pehē: “Mou tetetete, ʻo ʻouae faihala. Fakalaulauloto ʻi homou mohenga ʻouae lea.”—Saame 4:4.

18. Ko e hā ʻoku mahuʻinga ai ke hanganaki fakahāhā ʻa e ʻofá?

¹⁸ Lau ʻa e 1 Kolinitō 13:4-7. Ko e ʻofá ko e ʻulungaanga mahuʻinga taha ia ʻi ha nofo mali. ʻOku pehē ʻe he Tohi Tapú: “Mou kofuʻaki kimoutolu ʻa e manavaʻofa kaungāongoʻi loloto, anga-lelei, anga-fakatōkilalo, anga-malū, mo e kātaki. Ka, tuku kehe ʻa e ngaahi meʻá ni kotoa, mou kofuʻaki kimoutolu ʻa e ʻofá, he ko ha fakamaʻu haohaoa ia ʻo e fāʻūtahá.” (Kol. 3:12, 14) ʻOku fiemaʻu ki he ngaahi husepānití mo e ngaahi uaifí ke fakahāhā ʻa e ʻofa taʻesiokita pea faʻifaʻitaki kia Sīsū Kalaisi, ʻa ia naʻá ne loto-lelei ke feilaulauʻi ʻa ia tonu maʻá e niʻihi kehé. Kapau ʻoku makatuʻunga ha nofo mali ʻi ha ʻofa pehē, ʻe hoko ʻo mālohi neongo ha faʻahinga tōʻonga fakatupu ʻita, puke lahi ʻaupito, ngaahi palopalema fakapaʻanga mo e ngaahi palopalema mo e fāmili-ʻi-he-fonó.

19, 20. (a) ʻE lava fēfē ke faʻu lavameʻa ʻe he ngaahi hoa malí ha nofo mali mālohi mo fiefia? (e) Ko e hā te tau lāulea ki ai ʻi he kupu hokó?

¹⁹ Ko e ʻofá, mateakí mo e feinga loto-moʻoní ʻoku fiemaʻu ki ha nofo mali lavameʻa. ʻI he taimi ʻoku hoko ai ha ngaahi palopalema, ko e ongo meʻa malí ʻoku ʻikai totonu ke na foʻi ʻi heʻena nofo malí. ʻOku totonu ke na fakapapauʻi ke na ʻunuʻunu ke toe vāofi ange. Ko e ngaahi hoa mali ʻoku nau ʻofa kia Sihova pea feʻofaʻakí ʻoku totonu ke nau fakapapauʻi ke fakaleleiʻi ʻenau ngaahi palopalemá, koeʻuhí “ko e ʻofá heʻikai ʻaupito ke kaʻanga ia.”—1 Kol. 13:8; Māt. 19:5, 6; Hep. 13:4.

²⁰ ʻOku tautefito ʻa e faingataʻa ke faʻu ha nofo mali mālohi mo fiefiá ʻi he “ngaahi taimi fakalilifu” ko ení. (2 Tīm. 3:1) Ka ʻi he tokoni ʻa Sihová, ʻoku malava ia. Ka, ʻoku pau ke toe tauʻi ʻe he ngaahi hoa malí ʻa e māmani kuo maʻunimā ʻe he fehokotaki fakasinó. ʻI he kupu hokó, tau sio angé ki he founga ʻe lava ke tauhi ai ʻe he ngaahi husepānití mo e ngaahi uaifí ʻenau nofo malí ke mālohí.