Faʻifaʻitaki ki he Anga-Fakatōkilalo mo e Manavaʻofa ʻa Sīsuú
“[Ko] Kalaisi naʻá ne faingataʻaʻia maʻamoutolu, ʻo ne tuku atu ha faʻifaʻitakiʻanga kiate kimoutolu ke mou muimui ofi ʻi hono topuvaʻé.”—1 PITA 2:21.
1. Ko e hā te tau ʻunuʻunu ofi ange ai kia Sihova ʻi heʻetau faʻifaʻitaki kia Sīsuú?
ʻOKU tau faʻa feinga ke faʻifaʻitaki ki he kakai ʻoku tau saiʻia aí. ʻI he kotoa ʻo e faʻahinga ʻo e tangata kuo moʻui maí, ko Sīsū Kalaisi ʻa e tokotaha lelei taha ke faʻifaʻitaki ki aí. Ko e hā hono ʻuhingá? Naʻe pehē ʻe Sīsū: “Ko ia kuó ne mātā aú kuó ne mātā foki ʻa e Tamaí.” (Sione 14:9) ʻOku ʻuhinga ení ʻoku faʻifaʻitaki haohaoa ʻa Sīsū ki he ʻulungaanga ʻene Tamaí. Ko ia ʻi he taimi ʻoku tau ako ai fekauʻaki mo Sīsuú, ʻoku tau ako ai fekauʻaki mo Sihova. Pea ʻi he taimi ʻoku tau faʻifaʻitaki ai kia Sīsuú, ʻoku tau ʻunuʻunu ofi ange ai kia Sihova, ʻa e Tokotaha lahi taha ʻi he ʻunivēsí. He monū lahi ē!
2, 3. (a) Ko e hā naʻe ʻomai ai ʻe Sihova kia kitautolu ʻa e fakamatala fakaikiiki fekauʻaki mo e moʻui ʻa Sīsuú, pea ko e hā ʻoku ʻamanekina mai ʻe hotau ʻOtuá ke tau faí? (e) Ko e hā te tau lāulea ki ai ʻi he kupu ko ení mo e kupu hoko maí?
2 ʻI he Tohi Tapú, kuo ʻomai ai ʻe Sihova kia kitautolu ha fakamatala fakaikiiki fekauʻaki mo e moʻui ʻa Sīsuú. Ko e hā hono ʻuhingá? Koeʻuhí ʻoku finangalo hotau ʻOtuá ke tau ʻilo hono ʻAló ke lava ai ʻo tau faʻifaʻitaki ofi kiate ia. (Lau ʻa e 1 Pita 2:21.) ʻI he Tohi Tapú, ko e faʻifaʻitakiʻanga naʻe tuku mai ʻe Sīsū kia kitautolú ʻoku fakahoa ia ki he topuvaʻe. ʻOku ʻuhinga ia ki he hā? ʻOku finangalo ʻa Sihova ke tau muimui ʻi he topuvaʻe hono ʻAló, ʻa ia ke faʻifaʻitaki kia Sīsū ʻi he meʻa kotoa pē naʻá ne faí. Ko e moʻoni, naʻe haohaoa ʻa Sīsū, ko ia ʻoku ʻikai ʻamanekina mai ʻe Sihova ke tau faʻifaʻitaki haohaoa ki hono ʻAló. Ka, ʻoku finangalo ʻa e ʻOtuá ke tau fai hotau lelei tahá ke faʻifaʻitaki kia Sīsū.
3 Tau sivisiviʻi angé ʻa e niʻihi ʻo e ngaahi ʻulungaanga lelei ʻo Sīsuú. ʻI he kupu ko ení, te tau lāulea ai ki heʻene anga-fakatōkilaló mo ʻene manavaʻofá. ʻI he kupu hoko maí, te tau lāulea ai ki heʻene loto-toʻá mo ʻene ʻiloʻiló. Te tau tali ʻa e fehuʻi ʻe tolu fekauʻaki mo e ʻulungaanga taki taha: ʻOku ʻuhinga ia ki he hā? Naʻe anga-fēfē hono fakahāhā ʻe Sīsū ʻa e ʻulungaanga ko ení? ʻE lava fēfē ke tau faʻifaʻitaki kiate ia?
ʻOKU ANGA-FAKATŌKILALO ʻA SĪSŪ
4. ʻOku ʻuhinga ki he hā ʻa e hoko ʻo anga-fakatōkilaló?
4 Ko e hā ʻa e anga-fakatōkilalo? Ko e kakai tokolahi ʻoku hīkisiá ʻoku nau fakakaukau ko e anga-fakatōkilaló ko ha fakaʻilonga ia ʻo e vaivai pe ʻikai ha loto-maʻu. Ka ʻoku moʻoni ia? Ko hono moʻoní, ke hoko ʻo anga-fakatōkilaló, ʻoku fiemaʻu ke tau hoko ʻo mālohi mo loto-toʻa. Ko e anga-fakatōkilaló ko e fehangahangai ia ʻo e pōlepolé mo e hīkisiá. Ke hoko ʻo anga-fakatōkilaló, ʻoku ʻuluaki fiemaʻu ke tau maʻu ha fakakaukau totonu fekauʻaki mo kitautolu. Ko e fakatātaá, ʻoku pehē ʻe he tikisinale Fakatohitapu ʻe taha: “Ko e anga-fakatōkilaló ko hono ʻiloʻi ʻa ʻetau māʻulalo moʻoni ʻi he ʻao ʻo e ʻOtuá.” Pehē foki, ʻi heʻetau anga-fakatōkilaló, heʻikai ke tau ongoʻi ai ʻoku tau lelei ange ʻi he kakai kehé. (Loma 12:3) ʻOku ʻikai faingofua ki he faʻahinga taʻehaohaoa ʻo e tangatá ke fakahāhā ʻa e ʻulungaanga ko ení. Ka ʻe lava ke tau ako ke anga-fakatōkilalo kapau te tau fakalaulauloto ki he lahi ʻo Sihová pea faʻifaʻitaki ki he faʻifaʻitakiʻanga ʻa Sīsuú.
5, 6. (a) Ko hai ʻa Maikeli ko e ʻāngelo-pulé? (e) Naʻe anga-fēfē hono fakahāhā ʻe Maikeli ha fakakaukau anga-fakatōkilaló?
5 Naʻe anga-fēfē hono fakahāhā ʻe Sīsū ʻa e anga-fakatōkilaló? Kuo anga-fakatōkilalo maʻu pē ʻa e ʻAlo ʻo e ʻOtuá, fakatouʻosi ʻi he tuʻunga ko ha ʻāngelo mālohi ʻi hēvani pea ʻi he tuʻunga ko ha tangata haohaoa ʻi he māmaní. Tau vakai angé ki ha fakatātā ʻe niʻihi.
6 Ko ʻene fakakaukaú. ʻI he tohi Tohi Tapu ʻa Suté, ʻoku tau lau ai fekauʻaki mo e moʻui ʻa Sīsū ki muʻa peá ne haʻu ki he māmaní. (Lau ʻa e Sute 9.) ʻI he tuʻunga ko Maikeli ko e ʻāngelo-pulé, ko Sīsū naʻá ne ‘fetōkehekeheʻaki mo e Tēvoló’ pea “fakakikihi” mo e tokotaha fulikivanu ko iá “fekauʻaki mo e sino ʻo Mōsesé.” Hili ʻa e mate ʻa Mōsesé, naʻe tanu ʻe Sihova hono sinó ʻi ha feituʻu ke ʻoua ʻe maʻu ia ʻe ha taha. (Teu. 34:5, 6) Mahalo naʻe loto ʻa e Tēvoló ke fakataueleʻi ʻa e kau ʻIsilelí ke ngāueʻaki ʻa e sino ʻo Mōsesé ki he lotu loí. Pe ko e hā pē ʻa e kovi naʻe loto ʻa e Tēvoló ke faí, naʻe taʻofi loto-toʻa ia ʻe Maikeli. ʻOku pehē ʻe he tohi maʻuʻanga fakamatala ʻe taha ko e foʻi lea “fetōkehekeheʻaki” mo e “fakakikihi” ʻoku toe ngāueʻaki ia ke fakamatalaʻi “ha fakakikihi fakalao” pea fakahuʻunga nai naʻe “poleʻi ʻe Maikeli ʻa e ‘totonu ʻa e Tēvoló’ ke ʻave ʻa e sino ʻo Mōsesé.” Neongo ia, naʻe ʻiloʻi ʻe he ʻāngelo-pulé naʻe fakangatangata pē hono mafaí. Ko ia naʻá ne tuku ʻa e keisí kia Sihova, ko e Fakamaau Aoniú, ʻa e toko taha pē ʻokú ne maʻu ʻa e totonu ke fakamāuʻi ʻa Sētané. He fakakaukau anga-fakatōkilaló ē naʻe fakahāhā ʻe Sīsuú!
7. Naʻe anga-fēfē hono fakahāhā ʻe Sīsū ʻa e anga-fakatōkilalo ʻi heʻene leá pea ʻi heʻene ngaahi tōʻongá?
7 ʻI he taimi naʻe ʻi māmani ai ʻa Sīsuú, naʻá ne toe fakahāhā ʻa e anga-fakatōkilaló ʻi he anga ʻo ʻene leá pea ʻi he ngaahi meʻa naʻá ne faí. Ko ʻene leá. Naʻe ʻikai ʻaupito fiemaʻu ʻe Sīsū ha tokanga taʻetotonu mei he niʻihi kehé. Ka, naʻá ne loto ke maʻu ʻe heʻene Tamaí ʻa e lāngilangí kotoa. (Mk. 10:17, 18; Sione 7:16) Naʻe ʻikai ʻaupito lea ʻa Sīsū ki heʻene kau ākongá ʻi ha founga naʻe ʻai ai ke nau ongoʻi ngalivale pe māʻulalo. Ka, naʻá ne fakaʻapaʻapaʻi kinautolu pea fakahaaʻi naʻá ne falala kia kinautolu ʻaki hono fakaongoongoleleiʻi kinautolu koeʻuhi ko honau ngaahi ʻulungaanga leleí. (Luke 22:31, 32; Sione 1:47) Ko ʻene ngaahi tōʻongá. Naʻe fili ʻa Sīsū ke moʻui faingofua ʻo ʻikai ha ngaahi meʻa fakamatelie lahi. (Māt. 8:20) Naʻá ne loto-lelei ke fai ʻa e ngāue māʻulalo ʻa ia naʻe ʻikai ke loto-lelei ʻa e niʻihi kehé ke fai. (Sione 13:3-15) Naʻá ne toe fokotuʻu ha faʻifaʻitakiʻanga haohaoa ʻo e anga-fakatōkilaló ʻaki ʻene talangofua. (Lau ʻa e Filipai 2:5-8.) ʻI he ʻikai hangē ko e kakai hīkisiá ʻa ia ʻoku ʻikai te nau saiʻia ke talangofua ki he niʻihi kehé, naʻe anga-fakatōkilalo ʻa Sīsū ʻo fai ʻa e meʻa kotoa naʻe tala ange ʻe Sihova ke ne faí, “ʻo aʻu ki he tuʻunga ʻo e maté.” ʻOku hā mahino ko Sīsū, ʻa e Foha ʻo e tangatá, naʻá ne “loto-fakatōkilalo.”—Māt. 11:29.
FAʻIFAʻITAKI KI HE ANGA-FAKATŌKILALO ʻA SĪSUÚ
8, 9. ʻE lava fēfē ke tau fakahāhā ʻa e anga-fakatōkilaló?
8 ʻE lava fēfē ke tau faʻifaʻitaki ki he anga-fakatōkilalo ʻa Sīsuú? Ko ʻetau fakakaukaú. ʻI he taimi ʻoku tau anga-fakatōkilalo aí, ʻoku tau ʻiloʻi ʻoku fakangatangata pē hotau mafaí. Ko ia ai, ʻoku tau ʻilo ʻoku ʻikai ke tau maʻu ʻa e totonu ke fakamāuʻi ʻa e kakai kehé. Heʻikai ke tau fakaangaʻi kinautolu pe fehuʻia ʻenau ngaahi fakaueʻilotó. (Luke 6:37; Sēm. 4:12) ʻOku tokoniʻi kitautolu ʻe he anga-fakatōkilaló ke fakaʻehiʻehi mei he hoko ʻo “maʻoniʻoni fau.” ʻOku ʻuhinga ení heʻikai ke tau ongoʻi ʻoku tau lelei ange ʻi he faʻahinga ʻoku ʻikai ke nau maʻu ʻa e ngaahi malava pe monū ko ia ʻoku tau maʻú. (Koh. 7:16) Ko e kau mātuʻa anga-fakatōkilaló ʻoku ʻikai ke nau fakakaukau ʻoku nau lelei ange ʻi honau fanga tokouá mo e fanga tuofāfiné. Ka, ko e kau tauhi-sipi anga-ʻofa ko ení ʻoku nau “vakai ki he niʻihi kehé ʻoku nau māʻolunga ange,” ʻa ia ʻoku nau fakakaukau ʻoku mahuʻinga ange ʻa e niʻihi kehé ʻia kinautolu.—Fil. 2:3; Luke 9:48.
9 Fakakaukau atu kia W. J. Thorn, naʻá ne ngāue ko ha ʻovasia fefonongaʻaki ʻo kamata mei he 1894. Hili ʻa e ngaahi taʻu lahi, naʻe vaheʻi ia ke ne tokangaʻi ʻa e fanga moa ʻi he Faama ʻa e Sōsaietí ʻi he fakatokelau ʻo Niu ʻIoké. ʻI he taimi pē naʻá ne ongoʻi ai ʻoku totonu ke ne fai ha ngāue ʻoku mahuʻinga angé, naʻe pehē hifo ʻe Tokoua Thorn kiate ia: “ʻA e kiʻi meʻi efu ko koe. Ko e hā ʻokú ke maʻu ke ke hīkisia ai?” (Lau ʻa e ʻAisea 40:12-15.) He fakakaukau anga-fakatōkilalo ē!
10. ʻE lava fēfē ke tau fakahāhā ʻa e anga-fakatōkilaló ʻi heʻetau leá pea ʻi heʻetau ngaahi tōʻongá?
10 Ko ʻetau leá. Kapau ʻoku tau anga-fakatōkilalo moʻoni, ʻe kaunga ia ki he anga ʻetau lea ki he niʻihi kehé. (Luke 6:45) ʻI he taimi ʻoku tau talanoa ai mo kinautolú, heʻikai ke tau tokangataha pē ki hotau ngaahi monuú mo e ngaahi meʻa kuo tau faí. (Pal. 27:2) ʻI hono kehé, te tau fakaongoongoleleiʻi hotau fanga tokouá mo e fanga tuofāfiné koeʻuhi ko e lelei ʻoku nau faí pea tokangataha ki honau ngaahi ʻulungaanga leleí mo e ngaahi malavá. (Pal. 15:23) Ko ʻetau ngaahi tōʻongá. ʻOku ʻikai feinga ʻa e kau Kalisitiane anga-fakatōkilaló ke hoko ʻo ʻiloa pe mahuʻinga ʻi he māmani ko ení. ʻI hono kehé, ʻoku nau fili ke moʻui faingofua, naʻa mo hono fai ʻa e ngāue māʻulalo, koeʻuhí ke lava ʻo nau tauhi kia Sihova ʻi he lahi taha te nau malavá. (1 Tīm. 6:6, 8) Ko e mahuʻinga tahá, ʻe lava ke tau fakahāhā ʻa e anga-fakatōkilaló ʻaki ʻa e hoko ʻo talangofua. Kuo pau ke tau hoko ʻo anga-fakatōkilalo kae lava ke tau “talangofua ki he faʻahinga ʻoku nau takimuʻa” ʻi he fakatahaʻangá pea tali mo muimui ki he fakahinohino ʻa e kautaha ʻa Sihová.—Hep. 13:17.
ʻOKU MANAVAʻOFA ʻA SĪSŪ
11. Ko e hā ʻa e manavaʻofa?
11 Ko e hā ʻa e manavaʻofa? Ko e foʻi lea “manavaʻofa” ʻokú ne fakamatalaʻi ʻa e ngaahi ongoʻi fakaalaala mo e tokanga. Ko e manavaʻofá ko e fakahaaʻi ia ʻo e ʻofa pea ʻoku meimei tatau ia mo e ngaahi ongoʻi hangē ko e kaungāongoʻi mo e meesi. ʻOku lave ʻa e Tohi Tapú ki he “manavaʻofa kaungāongoʻi,” “manavaʻofa,” mo e “manavaʻofa loloto.” (Luke 1:78; 2 Kol. 1:3; Fil. 1:8) ʻOku pehē ʻe he maʻuʻanga fakamatala Fakatohitapu ʻe taha ko hono fakahāhā ʻa e manavaʻofá ʻoku fakalaka atu ia ʻi he ongoʻi fakaʻofaʻia pē ʻi he faʻahinga ʻoku masivá. ʻOku pehē ai ko e ongoʻi manavaʻofá ʻoku ʻuhinga ia ʻoku tau “tokanga feʻunga pea tokoni” ʻaki hono fai ha meʻa ʻe liliu ai ʻa e moʻui ʻa e kakai kehé ki he lelei ange. Ko e manavaʻofá ko e ʻulungaanga ia ʻokú ne ueʻi ha taha ke ne fai ha meʻa ʻe liliu ai ʻa e moʻui ʻa e niʻihi kehé.
12. Ko e hā ʻokú ne fakahaaʻi naʻe manavaʻofa kaungāongoʻi ʻa Sīsū ki he niʻihi kehé, pea ko e hā naʻe ueʻi ia ʻe heʻene manavaʻofá ke ne faí?
12 Naʻe anga-fēfē hono fakahāhā ʻe Sīsū ʻa e manavaʻofá? Ko ʻene ngaahi ongoʻi mo e ngaahi tōʻonga manavaʻofá. Naʻe manavaʻofa kaungāongoʻi ʻa Sīsū ki he niʻihi kehé. ʻI he taimi naʻá ne sio ai ki he tangi hono kaungāmeʻa ko Melé mo e niʻihi kehé koeʻuhí ko e mate ʻa Lāsalosí, naʻe tangi fakataha ʻa Sīsū mo kinautolu. (Lau ʻa e Sione 11:32-35.) Ko e manavaʻofa ko ia naʻá ne ʻai ia ke ne loto ke fokotuʻu hake ʻa e foha ʻo ha uitoú naʻá ne toe ueʻi ia ke ne fokotuʻu hake ʻa Lāsalosi. (Luke 7:11-15; Sione 11:38-44) Ko e tōʻonga manavaʻofa ko ení naʻe ʻoange nai ai kia Lāsalosi ha faingamālie ke moʻui ʻi hēvani. Ki muʻa aí, naʻe “ongoʻi fakaʻofaʻia” ʻa Sīsū ʻi he fuʻu kakai naʻe haʻu kiate iá. Naʻe ueʻi ia ʻe heʻene manavaʻofa kaungāongoʻí ke “akoʻi kiate kinautolu ʻa e ngaahi meʻa lahi.” (Mk. 6:34) Ko e hokosia ko ení naʻe liliu ai ʻa e moʻui ʻa e faʻahinga naʻa nau muimui ki heʻene ngaahi akonakí! Ko e manavaʻofa ʻa Sīsuú naʻe fakalaka atu ia ʻi ha ongoʻi pē. Ko ʻene manavaʻofá naʻe toe ueʻi ia ke ne tokoniʻi ʻa e masivá.—Māt. 15:32-38; 20:29-34; Mk. 1:40-42.
13. Naʻe anga-fēfē ʻa e lea manavaʻofa ʻa Sīsū ki he niʻihi kehé? (Sio ki he ʻuluaki fakatātā ʻi he kupú ni.)
13 Ko ʻene ngaahi lea manavaʻofá. Ko e kaungāongoʻi ʻa Sīsuú naʻá ne ueʻi ia ke lea ʻi he manavaʻofa ki he niʻihi kehé, tautautefito ki he faʻahinga ngaohikoviá. ʻI he toʻo lea mei he ʻAiseá, naʻe pehē ʻe he ʻapositolo ko Mātiú fekauʻaki mo Sīsū: “Heʻikai ha kaho ʻoku mapelu te ne laiki, pea heʻikai ha vavae maama ʻoku tamatemate te ne tāmateʻi.” (ʻAi. 42:3; Māt. 12:20) ʻOku ʻuhinga ia ki he hā? Naʻe ʻikai ke leakoviʻi pe ngaohikoviʻi ʻe Sīsū ʻa e kakaí. ʻI hono kehé, naʻá ne lea ʻi ha founga naʻe fakaivifoʻou kia kinautolu. Naʻá ne malangaʻi ha pōpoaki ʻo e ʻamanaki ki he “loto mafesi.” (ʻAi. 61:1) Naʻá ne fakaafeʻi ʻa e kakai naʻe “ongosia mo mafasiá” ke haʻu kiate ia kae lava ke nau maʻu ʻa e “fakaivifoʻou.” (Māt. 11:28-30) Naʻá ne talaʻofa ki heʻene kau ākongá ʻoku tokanga anga-ʻofa ʻa e ʻOtuá ki he tokotaha taki taha ʻo ʻEne kau lotú, kau ai ʻa e ‘faʻahinga siʻí,’ pe faʻahinga naʻe vakai ki ai ʻa e māmaní ʻoku ʻikai ke nau mahuʻingá.—Māt. 18:12-14; Luke 12:6, 7.
FAʻIFAʻITAKI KI HE MANAVAʻOFA ʻA SĪSUÚ
14. ʻE lava fēfē ke tau fakahāhā ʻa e ongoʻi manavaʻofa ki he niʻihi kehé?
14 ʻE lava fēfē ke tau faʻifaʻitaki ki he manavaʻofa ʻa Sīsuú? Ko ʻetau ngaahi ongoʻi manavaʻofá. ʻOku tala mai ʻe he Tohi Tapú kia kitautolu ke tau ngāue ʻo fakahāhā “ʻa e manavaʻofa kaungāongoʻi loloto,” neongo ʻoku ʻikai ke hoko fakanatula mai ia. Ko e ngaahi ongoʻi ko ení ko e konga ia ʻo e “angaʻitangata foʻoú” ʻa ia ʻoku ʻamanekina ʻe Sihova ke kofuʻaki ʻe he kau Kalisitiane kotoa pē. (Lau ʻa e Kolose 3:9, 10, 12.) ʻE lava fēfē ke ke fakahāhā ʻa e ngaahi ongoʻi manavaʻofá? ʻOku pehē ʻe he Tohi Tapú: “Fakaava atu ke ʻatā homou lotó.” (2 Kol. 6:11-13) Fanongo lelei ʻi he taimi ʻoku tala atu ʻe ha taha ʻa e anga ʻo ʻene ongoʻí mo e meʻa ʻokú ne hohaʻa ki aí. (Sēm. 1:19) Fakakaukauloto atu ki ai pea ʻeke hifo kiate koe: ‘Kapau naʻá ku ʻi hono tuʻungá, ʻe anga-fēfē ʻeku ongoʻí? Ko e hā te u fiemaʻú?’—1 Pita 3:8.
15. Ko e hā ʻe lava ke tau fai ke tokoniʻi ai ʻa e faʻahinga ʻoku nau mamahi nai pe faingataʻaʻiá?
15 Ko ʻetau ngaahi tōʻonga manavaʻofá. ʻE ueʻi kitautolu ʻe he manavaʻofá ke tau tokoniʻi ʻa e niʻihi kehé, tautautefito ki he faʻahinga ʻoku mamahí pe faingataʻaʻiá. ʻE lava fēfē ke tau tokoniʻi kinautolu? ʻOku pehē ʻi he Loma 12:15: “Tangi mo e faʻahinga ko ia ʻoku tangí.” ʻI he taimi lahi, ʻoku fiemaʻu ʻe he kakaí ʻa e fakafiemālié ʻo lahi ange ia ʻi he ngaahi fakaleleiʻangá. ʻOku nau fiemaʻu ha kaumeʻa ʻoku mahuʻingaʻia ʻia kinautolu pea ʻokú ne fanongo kia kinautolu. Ko e tuofefine ʻe taha naʻá ne ongoʻi hono fakafiemālieʻi ia ʻe he fanga tokouá mo e fanga tuofāfiné hili ʻa e mate ʻene taʻahiné, ʻokú ne pehē, “Naʻá ku houngaʻia ʻi he taimi naʻe haʻu ai ʻa e ngaahi kaumeʻá ʻo tangi fakataha pē mo au.” ʻE lava ke tau toe fakahāhā ʻa e manavaʻofá ʻaki hono fai ʻa e ngaahi meʻa ʻaonga ke tokoni ki he niʻihi kehé. Mahalo ʻoku ʻi ai ha uitou ʻokú ne fiemaʻu tokoni ke fakaleleiʻi hono ʻapí. Pe mahalo ko ha Kalisitiane taʻumotuʻa ʻokú ne fiemaʻu tokoni ke maʻu ʻa e ngaahi fakatahá, ʻalu ʻo malanga, pe ʻave ki he toketaá. Naʻa mo ha kiʻi tōʻonga anga-ʻofa ʻe lava ke liliu ai ha moʻui ʻa ha taha. (1 Sio. 3:17, 18) Ko e mahuʻinga tahá, ʻe lava ke tau fakahāhā ʻa e manavaʻofa ki he niʻihi kehé ʻaki hono fai ʻa e lahi taha te tau malavá ke malangaʻi ʻa e ongoongo leleí. Ko e founga lelei taha eni ke liliu ai ʻa e moʻui ʻa e kakai loto-moʻoní!
ʻOkú ke tokanga moʻoni ki ho fanga tokouá mo e fanga tuofāfiné? (Sio ki he palakalafi 15)
16. Ko e hā ʻe lava ke tau leaʻaki ke fakalototoʻaʻi ʻa e faʻahinga ʻoku loto-mafasiá?
16 Ko ʻetau ngaahi lea manavaʻofá. Ko ʻetau ngaahi ongoʻi manavaʻofá, ʻe ueʻi ai kitautolu ke tau “lea fakanonga ki he faʻahinga ʻoku loto-mafasiá.” (1 Tes. 5:14) Ko e hā ʻe lava ke tau leaʻaki ke fakalototoʻaʻi ai kinautolú? ʻE lava ke tau fakahaaʻi ange ʻa e lahi ʻo ʻetau tokanga kia kinautolú. ʻE lava ke tau fakaongoongoleleiʻi pea tokoniʻi kinautolu ke nau sio ki heʻenau ngaahi malava mo e ngaahi ʻulungaanga leleí. ʻE lava ke tau fakamanatu ange naʻe tokoniʻi kinautolu ʻe Sihova ke nau maʻu ʻa e moʻoní, ko ia kuo pau ʻoku nau mahuʻinga kiate ia. (Sione 6:44) ʻE lava ke tau toe fakapapauʻi kia kinautolu ʻoku tokanga lahi mai ʻa Sihova ki heʻene kau sevāniti ʻoku nau “loto lavea” pe “laumalie mafesi.” (Saame 34:18) Ko ʻetau ngaahi lea manavaʻofá ʻe lava ke fakaivifoʻou moʻoni ki he faʻahinga ʻoku nau fiemaʻu ʻa e fakafiemālié.—Pal. 16:24.
17, 18. (a) ʻOku ʻamanekina mai ʻe Sihova ke fakafeangai fēfē ʻa e kau mātuʻá ki heʻene fanga sipí? (e) Ko e hā te tau lāulea ki ai ʻi he kupu hoko maí?
17 Kau mātuʻa, ʻoku ʻamanekina mai ʻe Sihova ke mou fakafeangai ki heʻene fanga sipí ʻi he manavaʻofa. (Ngā. 20:28, 29) Manatuʻi, ko homou fatongiá ke faiako, fakalototoʻa mo fakaivifoʻou ʻene fanga sipí. (ʻAi. 32:1, 2; 1 Pita 5:2-4) Ko ia ko ha mātuʻa ʻoku manavaʻofa kaungāongoʻi heʻikai ke ne feinga ke puleʻi hono fanga tokouá, ʻa ia ke ʻai ha ngaahi lao pe ngāueʻaki ʻa e ongoʻi halaiá ke tenge ʻaki kinautolu ke nau fai ʻa e meʻa lahi ange ʻi heʻenau malavá. ʻI hono kehé, ʻoku loto ha mātuʻa ke fiefia moʻoni hono fanga tokouá mo e fanga tuofāfiné, pea ʻokú ne falala ko ʻenau ʻofa kia Sihová ʻe ueʻi ai kinautolu ke ʻoatu honau lelei tahá ki he ʻOtuá.—Māt. 22:37.
18 ʻI heʻetau fakalaulauloto ki he anga-fakatōkilalo mo e manavaʻofa ʻa Sīsuú, ʻe ueʻi ai kitautolu ke faʻifaʻitaki kiate ia. ʻI he kupu hoko maí, te tau lāulea ai ki he founga ʻe lava ke tau faʻifaʻitaki ai ki he loto-toʻa mo e ʻiloʻilo ʻa Sīsuú.