Tauhi Maʻu Hoʻo Faivelenga ʻi he Ngāue Fakafaifekaú
KO HONO malangaʻi ʻa e ongoongo leleí ko e ngāue mahuʻinga taha ia kuo fai he ʻahó ni ʻi he māmaní. Ko ha lāngilangi ia ke fakafofongaʻi ʻa Sihova ʻi he ngāue fakaeako ko ení. Kae kehe, ʻi he taimi ʻe niʻihi ʻe lava ke faingataʻa ki he kau tāimuʻá mo e kau malangá ke tauhi maʻu ʻenau faivelenga ʻi he ngāue fakafaifekaú. Ko e hā hono ʻuhingá?
Ko e hā ʻe lava ke ne tokoniʻi koe ke tauhi maʻu hoʻo faivelenga ʻi he ngāue fakafaifekaú?
ʻOku ʻiloʻi ʻe he kau malanga ʻe niʻihi ʻoku siʻi ʻaupito ke nau fai ha fetalanoaʻaki ʻi heʻenau malanga mei he fale ki he falé koeʻuhí ʻoku tokolahi ʻa e kakai ʻoku ʻikai ke nau ʻi ʻapi. Pea ʻi he taimi ʻoku ʻi ʻapi ai ʻa e kakaí, ʻoku ʻikai nai ke nau mahuʻingaʻia ʻi he pōpoaki ʻo e Puleʻangá pea aʻu nai ʻo nau ʻita ʻia kitautolu. Ko e kau malanga ʻe niʻihi ʻoku fuʻu lahi mo ola lelei honau feituʻu ngāué ka ʻoku nau manavasiʻi naʻa ʻikai ʻaupito lava ke nau malanga ki he tokotaha kotoa ʻi aí. Ka ko e niʻihi kuo nau malanga ʻi he ngaahi taʻu lahi kae hoko ʻo loto-siʻi koeʻuhí ko e teʻeki ke hoko mai ʻa e ngataʻangá.
ʻE ʻi ai ʻa e ngaahi pole ʻi heʻetau ngāue fakafaifekaú ʻa ia ʻe lava ke ne uesia ʻetau faivelengá. ʻOku tau moʻui ʻi ha māmani ʻa ia ʻoku puleʻi ʻe he “tokotaha fulikivanú,” ʻa Sētane ko e Tēvoló, ko ia ʻoku tau ʻamanekina ʻe faingataʻa kia kitautolu ke malangaʻi ʻa e ongoongo leleí.—1 Sio. 5:19.
Tatau ai pē pe ko e hā ʻa e ngaahi pole ʻokú ke fehangahangai fakafoʻituitui mo ia ʻi hoʻo ngāue fakafaifekaú, ʻe lava ke ke fakapapauʻi ʻe tokoniʻi koe ʻe Sihova ke ikuʻi ia. Ka ko e hā ʻe lava ke ke fai ke fakalahi hoʻo faivelenga ʻi he ngāue fakafaifekaú? Tau lāulea angé ki ha ngaahi fokotuʻu ʻe niʻihi.
TOKONIʻI ʻA E KAU MALANGA FOʻOÚ
ʻI he taʻu taki taha, ʻoku papitaiso ʻa e laui afe ko e Kau Fakamoʻoni ʻa Sihova. Kapau naʻá ke toki papitaiso, ʻe lava ke ke ako ʻa e meʻa lahi mei he faʻahinga kuo nau malanga ʻi he ngaahi taʻu lahi. Pea kapau kuó ke hoko ko ha tokotaha malanga ʻi ha ngaahi taʻu lahi, ʻe lava ke ke tokoni ke akoʻi ʻa e faʻahinga foʻoú? Ko e fai peheé ʻe lava ke ke fiefia lahi ai.
Luke 8:1) ʻI he ʻahó ni, ʻoku fiemaʻu ʻe he faʻahinga foʻoú ʻa e ako meimei tatau ke nau hoko ai ko ha kau faifekau ola lelei.
Naʻe ʻiloʻi ʻe Sīsū naʻe fiemaʻu ʻe heʻene kau ākongá ʻa e fakahinohino ke nau hoko ko ha kau faiako ola lelei, pea naʻá ne fakahaaʻi ange ʻa e founga ke malanga aí. (ʻOku totonu ke ʻoua te tau fakakaukau ko e ʻalu pē ha tokotaha malanga foʻou ʻi he ngāue fakafaifekaú, ʻokú ne ʻiloʻi moʻoni ʻa e founga ke faiako aí. ʻOkú ne fiemaʻu ʻa e fakahinohino fakafoʻituitui mei ha faiako anga-lelei mo anga-ʻofa. ʻOku fiemaʻu ki ha tokotaha malanga taukei ke ne akoʻi ia ki he founga ke (1) teuteu mo ʻahiʻahi ʻa e meʻa ke leaʻaki ki ha tokotaha-ʻapi, (2) fetalanoaʻaki mo e kakaí, (3) tuʻuaki ʻa e ʻū tohí, (4) toe foki ki he faʻahinga mahuʻingaʻiá, mo e (5) kamata ha ako Tohi Tapu. ʻE lava ke hoko ha tokotaha malanga foʻou ʻo ola lelei ʻi he ngāue fakafaifekaú ʻo kapau te ne siofi mo faʻifaʻitaki ki he founga faiako ha tokotaha malanga taukei. (Luke 6:40) Pea ʻe ongoʻi loto-maʻu ange ʻa e tokotaha malanga foʻoú ʻi hono ʻiloʻi ʻoku mateuteu ha tokotaha ke tokoni ʻi he taimi ʻoku fiemaʻu aí. Ko hono fai ha fakaongoongolelei pea ʻoatu ha ngaahi fokotuʻu ʻe lava ke toe tokoni ia ki he tokotaha malanga foʻoú.—Koh. 4:9, 10.
TALANOA MO HO HOA ʻI HE NGĀUE FAKAFAIFEKAÚ
Neongo hoʻo ngaahi feinga kotoa ke talanoa mo e faʻahinga ʻi he ʻapí, ko e ngaahi ʻaho ʻe niʻihi ko e fetalanoaʻaki lelei taha te ke fai ʻi he ngāue fakamalangá ko hoʻo talanoa mo ho hoa ngāué. Manatuʻi naʻe fekauʻi ʻe Sīsū ʻene kau ākongá ke malanga “tautau toko ua.” (Luke 10:1) ʻI heʻena ngāue fakatahá, ʻe lava ke na fefakalototoʻaʻaki mo felangahakeʻaki. ʻOku tau maʻu ʻa e faingamālie lelei ke “fefakalototoʻaʻaki” ʻi he taimi ʻoku tau ngāue ai mo hotau fanga tokouá mo e fanga tuofāfiné ʻi he ngāue fakafaifekaú.—Loma 1:12.
Ko e hā ha ngaahi meʻa ʻe lava ke ke talanoa ki ai? Kuo ʻi ai ha taha ʻo kimoua kuo ʻi ai haʻane hokosia fakalototoʻa ki muí ni? Kuó ke ako ha poini mahuʻinga ʻi hoʻo ako fakafoʻituituí pe ako fakafāmilí? Naʻe fakalototoʻaʻi koe ʻe ha meʻa naʻá ke fanongo ki ai ʻi he fakatahá? ʻI he taimi ʻe niʻihi te ke ngāue nai mo ha tokotaha malanga ʻa ia ʻoku ʻikai ke ke ʻiloʻi lelei. Mahalo ʻe lava ke ke ʻeke ange pe naʻe anga-fēfē ʻene haʻu ki he moʻoní. Ko e hā naʻá ne fakatuipauʻi ia ko e kautaha eni ʻa Sihová? Ko e hā ʻa e ngaahi monū pe ngaahi hokosia kuó ne maʻú? Mahalo ʻe lava ke ke vahevahe ʻa e niʻihi hoʻo ngaahi hokosiá tonu. Tatau ai pē pe ko e hā ʻa e tali mei he feituʻu ngāué, ʻi he taimi ʻokú ke ngāue ai mo ha taha ʻi he ngāue fakafaifekaú, ʻokú ke maʻu ai ʻa e faingamālie lelei ke hanganaki “felangahakeʻaki.”—1 Tes. 5:11.
FAKALELEIʻI HOʻO AKO FAKAFOʻITUITUÍ
Ke tauhi maʻu ʻetau faivelenga ʻi he ngāue fakafaifekaú, ʻoku fiemaʻu ke tau fakaleleiʻi ʻetau ako fakafoʻituituí. ʻOku pulusi ʻe he “tamaioʻeiki anga-tonu mo potó” ʻa e fakamatala ʻo e ngaahi kaveinga kehekehe ʻa ia ʻe lava ke tau ako. (Māt. 24:45) Tau lāulea angé ki he fakatātā ʻe taha ʻo ha kaveinga lelei ki he ako fakafoʻituituí: Ko e hā ʻoku mātuʻaki mahuʻinga ai ʻa e ngāue fakamalangá? Ko e puha “Ko e Hā ke Tauhi Maʻu Ai Hoʻo Faivelenga ʻi he Ngāue Fakafaifekaú?” ʻoku ʻomai ai ʻa e ngaahi ʻuhinga ʻe niʻihi.
Ko hono sivisiviʻi ʻa e ngaahi poini ʻoku lisi ʻi he puhá ʻe lava ke ueʻi ai koe ke hokohoko atu hoʻo malanga faivelengá. ʻI hoʻo akó, feinga ke lisi ha ngaahi ʻuhinga Fakatohitapu kehe ke malanga faivelenga ai. Pea fakalaulauloto leva ki he ngaahi ʻuhinga ko iá. ʻI hoʻo fai peheé, ʻe mālohi ange ai hoʻo faivelenga ʻi he ngāue fakafaifekaú.
LOTO-LELEI KE ʻAHIʻAHIʻI HA FOUNGA FOʻOU
ʻOku fokotuʻu mai ʻe he kautaha ʻa Sihová ʻi he taimi ki he taimi ʻa e ngaahi founga ke tokoni ki hono fakaleleiʻi ʻetau ngāue fakafaifekaú. Ko e fakatātaá, tānaki mai ki heʻetau ngāue fale-ki-he-falé, ʻe lava ke tau toe feinga ke faitohi, faifakamoʻoni ʻi he telefoní, malanga ʻi he halá pe ʻi he ngaahi feituʻu kakaí, pea faifakamoʻoni ki he kakaí ʻi he founga ʻikai anga-mahení pe ʻi honau ʻapi ngāué. Mahalo ʻe lava ke tau toe fai ha ngaahi palani ke malanga ʻi he ngaahi feituʻu ʻoku tokosiʻi pe ʻikai ai ha Kau Fakamoʻoní.
ʻOkú ke loto-lelei ke ʻahiʻahiʻi ha founga foʻou? Ko e tokolahi kuo nau ʻahiʻahiʻi ʻa e ngaahi fokotuʻu ko ení kuo nau hoko ʻo lavameʻa. Fakakaukau ki he fakatātā ʻe tolu.
Ko ha tuofefine ko April naʻá ne fili ke ʻahiʻahiʻi ha fokotuʻu mei he taha ʻo e ngaahi kupu ʻi he Ngāue Fakafaifekau ki he founga ke kamata ha ako
Tohi Tapú. Naʻá ne tuʻuaki ha ako ki he kakai ʻe toko tolu naʻá ne ngāue fakataha mo ia. Naʻe ʻohovale pea fiefia ʻa April ʻi hono tali kotoa ʻe he toko tolú ʻa e akó pea nau kamata foki ke maʻu ʻa e ngaahi fakataha ʻa e fakatahaʻangá.ʻOku toe fakalototoʻaʻi kitautolu ke kumi ki he kakai ʻoku nau mahuʻingaʻia nai ʻi ha ngaahi kupu pau ʻi heʻetau ʻū makasiní. Ko ha ʻovasia sēketi ʻi he ʻIunaite Seteté naʻá ne fili ke tuʻuaki ha kupu ʻi he Awake! fekauʻaki mo e vaʻe meʻalelé ki he kau pule ʻo e ngaahi fale vaʻe kotoa ʻi he feituʻú. Naʻá ne toe tufa foki mo hono uaifí ha kupu hokohoko fekauʻaki mo e “Mahinoʻi Hoʻo Toketaá” ki he ʻōfisi ʻo e kau toketā laka hake he 100. ʻOkú ne pehē ko e ngaahi ʻaʻahi ko ení kuó ne tokoniʻi ʻa e kakaí ke nau hoko ʻo maheni mo ʻetau ngāue fakamalangá mo ʻetau ʻū tohí. Hili hono ʻiloʻi lelei ange ʻa e kakai ʻi he feituʻu ngāué, naʻe malava ke fai ʻe he ʻovasia sēketí mo hono uaifí ha ngaahi toe ʻaʻahi lahi ange.
Naʻe tohi ʻe ha tuofefine ko Judy ki he ʻuluʻi ʻapitanga ʻi māmaní naʻá ne houngaʻia ʻi he fakalototoʻa ke fai ʻa e faifakamoʻoni ʻi he telefoní. Naʻá ne pehē ko ʻene fineʻeikí, ʻa ia naʻe taʻu 86 pea mahamahaki, naʻá ne malanga maʻu pē ki he kakaí ʻi he telefoní. Ko hono olá, naʻá ne kamata ke ako Tohi Tapu mo ha fefine taʻu 92!
Ko e ngaahi fokotuʻu ʻi heʻetau ʻū tohí ʻoku ʻaonga moʻoni. ʻAhiʻahiʻi kinautolu! ʻE lava ke tokoniʻi ai koe ke tauhi maʻu hoʻo fiefia mo e faivelenga ʻi he ngāue fakafaifekaú.
FOKOTUʻU HA NGAAHI TAUMUʻA ʻAONGA
Ko e hā ʻokú ne ʻai ke lavameʻa ʻetau ngāue fakamalangá? ʻOku ʻikai fakatuʻunga ia ʻi he lahi ʻo e ʻū tohi ʻoku tau tufá, tokolahi ʻo e ngaahi ako Tohi Tapu ʻoku tau faí, pe ko e tokolahi ʻo e kakai kuo tau tokoniʻi ke nau hoko ko e Kau Fakamoʻoni ʻa Sihová. Fakakaukau fekauʻaki mo Noa. Ko e toko fiha tuku kehe hono fāmilí naʻe tokoniʻi ʻe Noa ke nau hoko ko e kau lotu ʻa Sihová? Ka, naʻá ne hoko moʻoni ko ha tokotaha malanga lavameʻa. Ko e meʻa mahuʻingá ko ʻetau tauhi faitōnunga kia Sihová.—1 Kol. 4:2.
ʻOku ʻiloʻi ʻe he kau malanga tokolahi ke fiefia ʻi he ngāue fakamalangá, ʻoku fiemaʻu ke nau fokotuʻu ha ngaahi taumuʻa ʻaonga. Ko e hā ʻa e niʻihi ʻo e ngaahi taumuʻa ko ení? Ko ha ngaahi fokotuʻu ʻe niʻihi ʻoku lisi ʻi he puha “Fokotuʻu ha Ngaahi Taumuʻa ʻAonga.”
Kole kia Sihova ke ne tokoniʻi koe ke ʻai hoʻo ngāue fakafaifekaú ke fakakoloa mo mohu ʻuhinga. ʻI hoʻo aʻusia hoʻo ngaahi taumuʻá, te ke ongoʻi fiefia ʻi hoʻo ʻilo ʻokú ke fai ʻa e kotoa hoʻo malavá ke malangaʻi ʻa e ongoongo leleí.
Ko e moʻoni ko hono malangaʻi ʻa e ongoongo leleí ʻe lava ke hoko ia ko ha pole. Ka ʻoku ʻi ai ʻa e ngaahi meʻa ʻe lava ke ke fai ke hoko ai ʻo faivelenga ʻi hoʻo ngāue fakafaifekaú. Fai ha fetalanoaʻaki fakalototoʻa mo ho hoa malangá, fai tuʻumaʻu hoʻo ako fakafoʻituituí pea mohu ʻuhinga, ʻahiʻahiʻi ʻa e ngaahi fokotuʻu ʻa e tamaioʻeiki anga-tonu mo potó, pea fokotuʻu ha ngaahi taumuʻa ʻaonga. Ko e mahuʻinga tahá, manatuʻi kuo ʻoatu ʻe Sihova ko e ʻOtuá kiate koe ʻa e lāngilangi ʻo hono malangaʻi ʻa e ongoongo leleí ko e taha ʻo ʻene Kau Fakamoʻoní. (ʻAi. 43:10) ʻIo, te ke hokosia ʻa e fiefia lahi ʻi hoʻo hokohoko atu ke tauhi maʻu hoʻo faivelenga ʻi he ngāue fakafaifekaú!