1-3. Ko e hā naʻe ʻikai faingofua ai ki he kau ākonga ʻa Sīsuú ke malangaʻi ʻa e ongoongo leleí ʻi he “ngaahi puleʻanga kotoa pē”?

 NAʻE ʻoange ʻe Sīsū Kalaisi ki hono kau muimuí ʻa e ngāue lahi ke nau fai. Naʻá ne fekauʻi kinautolu ke “ngaohi ko e kau ākonga ʻa e kakai ʻo e ngaahi puleʻanga kotoa pē.” Naʻe fiemaʻu ke nau malangaʻi ʻa e ‘ongoongo lelei ʻo e Puleʻangá’ ki he kakai “ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.”—Māt. 24:14; 28:19.

² Naʻe ʻofa ʻa e kau ākongá ʻia Sīsū mo e ongoongo leleí. Ka naʻa nau fifili nai, ‘ʻE lava fēfē ke tau fai ʻa e meʻa naʻe fekauʻi mai ʻe Sīsuú?’ Ko e ʻuluaki meʻá, naʻa nau tokosiʻi pē. Pehē foki, naʻa nau akoʻi ʻa e kakaí ko Sīsuú ko e ʻAlo ʻo e ʻOtuá, ka naʻe ʻilo ʻe he kakaí kuo tāmateʻi ʻa Sīsū. ʻIkai ko ia pē, naʻe fakakaukau ʻa e kakai tokolahi ko e kau ākongá naʻa nau “taʻeako mo lāuvale.” (Ngā. 4:13) Ko e kau taki lotu Siú naʻa nau ako ʻi he ngaahi ʻapiako fakalotu, ka naʻe ʻikai ke pehē ʻa e kau ākongá. Pea ko e pōpoaki naʻa nau malangaʻí naʻe ʻikai ke fehoanaki ia mo e ngaahi talatukufakaholo faka-Siu naʻe akoʻi ʻe he kau taki lotú ʻi he ngaahi taʻu ʻe lauingeau. Koeʻuhí naʻe  ʻikai ke fakaʻapaʻapaʻi ʻa e kau ākongá ʻi ʻIsileli, naʻa nau fifili nai pe ʻe fanongo ange kia kinautolu ha taha ʻi he fuʻu ʻEmipaea Lomá.

³ Naʻe fakatokanga ʻa Sīsū ki heʻene kau ākongá ʻe fehiʻanekinaʻi mo fakatangaʻi kinautolu pea ko e niʻihi ʻo kinautolu ʻe tāmateʻi. (Luke 21:16, 17) ʻE lavakiʻi kinautolu ʻe honau ngaahi kaumeʻá mo e ngaahi fāmilí. Pehē foki, ko e kakai ʻe niʻihi ʻoku nau ui kinautolu ko e kau ākonga ʻa Kalaisí te nau akoʻi ʻa e ngaahi loi. Pea ʻe malanga ʻa e kau ākongá ʻi he ngaahi feituʻu ʻoku lahi ai ʻa e faihiá mo e fakamālohí. (Māt. 24:10-12) Ko ia ʻe anga-fēfē haʻanau malava ke malanga “ki he feituʻu taupotu taha ʻo e māmaní”? (Ngā. 1:8) Kuo pau pē naʻe fifili ʻa e kau ākongá pe ʻe malava fēfē ke nau fai ʻa e ngāue ko ení neongo ʻa e ngaahi faingataʻa kotoa ko ení.

4. Ko e hā ʻa e ola ʻo e ngāue fakamalangá?

⁴ Neongo naʻe ʻiloʻi ʻe he kau ākongá heʻikai ke faingofua ʻa e ngāué, naʻa nau talangofua ki he fekau ʻa Sīsuú pea malanga ʻi Selusalema, ʻi Samēlia, pea aʻu ki he ngaahi fonua kehé. Hili ʻa e taʻu nai ʻe 30, naʻa nau fononga ki he ngaahi feituʻu lahi ʻa ia naʻe malava ai ke pehē ʻe he ʻapositolo ko Paulá naʻa nau malanga ki he “meʻa fakatupu kotoa pē ʻoku ʻi he lalo langí.” Pea naʻe hoko ʻa e kakai mei he ngaahi puleʻanga kehekehe ko e kau ākonga. (Kol. 1:6, 23) Ko e fakatātaá, ʻi he taimi naʻe malanga ai ʻa Paula ʻi he motu ko Saipaló, naʻa mo e pule pe kōvana Lomá, naʻá ne hoko ko ha ākonga koeʻuhí “naʻá ne ofoofo ʻi he akonaki ʻa Sihová.”—Lau ʻa e Ngāue 13:6-12.

5. (a) Ko e hā naʻe talaʻofa ʻe Sīsū ki heʻene kau ākongá? (e) Ko e hā ʻoku leaʻaki ʻe ha tohi hisitōlia fekauʻaki mo e ʻuluaki senitulí?

⁵ Naʻe ʻiloʻi ʻe he kau ākongá heʻikai malava ke nau malanga ʻi he kotoa ʻo e māmaní ʻia kinautolu pē. Ka naʻa nau toe ʻiloʻi naʻe talaʻofa ʻe Sīsū te ne ʻiate kinautolu pea ʻe tokoniʻi kinautolu ʻe he laumālie māʻoniʻoní. (Māt. 28:20) Naʻe toe lava ke tokoniʻi nai ʻa e kau ākongá ʻe he ngaahi tuʻunga kehe ʻi he taimi ko iá. Ko hono moʻoní, ʻoku pehē ʻe he tohi hisitōlia ʻe taha ngalingali ko e ʻuluaki senitulí ko e taimi lelei taha ia ki he kau Kalisitiané ke kamata malangá pea naʻe ongoʻi ki mui ʻe he kau Kalisitiané naʻe teuteu ʻe he ʻOtuá ʻa e halá maʻa kinautolu.

6. (a) Ko e hā te tau lāulea ki ai ʻi he kupu ko ení? (e) Ko e hā te tau lāulea ki ai ʻi he kupu hoko maí?

⁶ Naʻe liliu ʻe Sihova ʻa e ngaahi meʻa naʻe hoko ʻi he māmaní ʻi he ʻuluaki senitulí koeʻuhi ke lava ʻa e kau Kalisitiané ke fai ʻa e ngāue fakamalangá? ʻOku ʻikai ke ʻi ai ha lau ia ʻa e Tohi Tapú ki ai. Ka ʻoku tau ʻiloʻi naʻe fiemaʻu ʻe Sihova ʻene kakaí ke nau malangaʻi ʻa e ongoongo leleí pea naʻe ʻikai malava ke taʻofi kinautolu ʻe Sētane. ʻI he kupu ko ení, te tau lāulea ai ki he niʻihi ʻo e ngaahi meʻa ʻi he ʻuluaki senitulí ʻa ia naʻe ʻai nai ai ke faingofua ange ki he kau ākongá ke nau malanga. ʻI he kupu hoko maí, te tau lāulea ai ki he niʻihi ʻo e ngaahi meʻa kuó ne tokoniʻi kitautolu he taimí ni ke tau malangaʻi ʻa e ongoongo leleí ʻi māmani lahi.

7. Ko e hā ʻa e Melino Faka-Loma, pea ko e hā naʻe kehe ai ia mei he ngaahi taimi kehé?

⁷ ʻI he ʻuluaki senitulí, ko ha taimi melino ʻi he ʻEmipaea Lomá naʻe ʻai ai ke faingofua ange ki he kau ākongá ke nau malanga. Ko e vahaʻa taimi ko ení naʻe ui ia ko e Melino Faka-Loma, pe Pax Romana ʻi he lea faka-Latiná. Lolotonga ʻa e taimi ko iá, naʻe taʻofi ʻe he puleʻanga Lomá ha fanga kiʻi angatuʻu pē. Ko e moʻoni naʻe ʻi ai ʻa e fanga kiʻi tau, ʻo hangē ko ia naʻe kikiteʻi ʻe Sīsū ʻe hokó. (Māt. 24:6) Naʻe fakaʻauha ʻe he kau Lomá ʻa Selusalema ʻi he taʻu 70, pea naʻa nau fai mo e fanga kiʻi tau ofi ki he ngaahi kauʻāfonua ʻo e ʻemipaeá. Ka naʻe ʻi ai ʻa e melino ʻi he lahi taha ʻo e ʻemipaeá, pea naʻe faingofua ai ki he kau ākongá ke nau fononga holo mo malanga. Ko e vahaʻa taimi melino ko ení naʻe taʻu  nai ʻe 200. ʻOku pehē ʻe he tohi ʻe taha ʻi he hisitōlia kotoa ʻo e faʻahinga ʻo e tangatá, naʻe ʻikai ʻaupito ha toe vahaʻa taimi melino fuoloa pehē ʻe hokosia ʻe ha fuʻu kakai tokolahi.

8. Naʻe anga-fēfē hono tokoniʻi ʻe he Melino Faka-Lomá ʻa e kau ākongá?

⁸ ʻI he taʻu nai ʻe 250 hili ʻa Kalaisí, naʻe tohi ʻe ha mataotao ko ʻOliseni fekauʻaki mo e taimi melino ko ení. Naʻá ne pehē koeʻuhí ko hono puleʻi ʻe Loma ʻa e ngaahi fonua lahi, naʻe faingofua ange ki he kau ākongá ke malanga ʻi he ngaahi fonua kotoa ko iá. Naʻe ʻikai faitau ʻa e kakaí ke taukapoʻi honau fonuá tonu, ka naʻa nau nofo melino ʻi honau ngaahi koló. Ko ia naʻe ongoʻi ʻe ʻOliseni koeʻuhí ko e meʻá ni, naʻe maʻu ai ʻe he tokolahi ʻa e faingamālie ke fanongo ki he malanga ʻa e kau ākongá fekauʻaki mo e ʻofá mo e melinó. Neongo naʻe fakatangaʻi ʻa e kau ākongá, naʻa nau ngāueʻaki ʻa e taimi melino ko iá ʻi he founga lelei taha naʻa nau malavá ke malangaʻi ai ʻa e ongoongo leleí ʻi ha feituʻu pē.—Lau ʻa e Loma 12:18-21.

9, 10. Ko e hā ʻa e ngaahi meʻa naʻe ʻai ai ke faingofua ange ʻa e fonongá ki he kau ākongá?

⁹ Naʻe faʻu ʻe Loma ʻa e ngaahi hala naʻe laka hake ʻi he kilomita ʻe 80,000 (maile ʻe 50,000) ʻa ia naʻá ne fakafehokotaki ʻa e konga lahi taha ʻo e ʻemipaeá. Naʻe malava ʻa e kau sōtia ʻo e fuʻu kongakau Lomá ke fononga vave ki ha feituʻu pē ʻi he ngaahi hala ko ení ke maluʻi honau feituʻú pea hanganaki puleʻi ʻa e kakaí. Naʻe ngāueʻaki ʻe he kau Kalisitiané ʻa e ngaahi hala ko ení ke fononga atu ai ʻi he ngaahi vaotā, ʻo kolosi atu ʻi he ngaahi toafa, pea ʻi he ngaahi moʻunga koeʻuhí ke malanga ʻi he ngaahi feituʻu lahi.

¹⁰ Tānaki atu ki he ngaahi hala ko ení, naʻe toe fononga vaka ʻa e kau Lomá. Naʻa nau folau atu ʻi he ngaahi vaitafe mo e ngaahi mangaʻivai pe ʻi he tahí ki he ngaahi taulanga ʻe lauingeau ʻi he kotoa ʻo e ʻemipaeá. Ko hono moʻoní, naʻe ngāueʻaki ʻe he kau Lomá ʻa e ngaahi halanga folau tahi ʻe 900 tupu. Ko ia naʻe malava foki ʻa e kau Kalisitiané ke folau vaka ki he ngaahi feituʻu lahi. Naʻe ʻikai ke nau fiemaʻu ha ngaahi pepa fakalao, hangē ko e ngaahi paasipooti ke hū ʻaki ki he ngaahi fonua kehekehe. Pehē foki, naʻe ʻi ai ʻa e kau kaihaʻa tokosiʻi ʻi he ngaahi halá koeʻuhí naʻa nau ʻiloʻi ʻe tauteaʻi lahi ʻe he kau Lomá ʻa e kau faihiá. Pea koeʻuhí naʻe lahi ʻa e ngaahi vaka tau Loma naʻe folau tahi, naʻe ʻikai ke ilifia ʻa e kau folaú ʻi hano ʻohofi ʻe he kau kaihaʻa vaka fakamālohí. Neongo ʻoku pehē ʻe he Tohi Tapú naʻe tūkia ha vaka naʻe ʻi ai ʻa Paula peá ne ʻi he tuʻunga fakatuʻutāmaki ʻi tahi ʻi ha ngaahi taimi kehe, ʻoku ʻikai ke pehē ia ai naʻe ʻohofi ia ʻe he kau kaihaʻa vaka fakamālohí. Ko ia ko e fononga ʻi he ngaahi halá mo e fononga vaká naʻe faʻa malu pē ia.—2 Kol. 11:25, 26.

11. Ko e hā naʻe ngāueʻaki ai ʻe he kau ākongá ʻa e lea faka-Kalisí?

¹¹ Ko e ngaahi feituʻu lahi naʻe puleʻi ʻe he kau Lomá naʻe ikunaʻi ia ʻe he pule Kalisi ko ʻĀlekisānita ko e Lahi ʻi he ngaahi taʻu ki muʻá. Ko ia ko e kakai ʻi he ngaahi feituʻu ko iá naʻa nau ako ke lea ʻi ha lea faka-Kalisi ʻoku ʻiloa ko e lea faka-Kalisi Koine. Ko hono olá, naʻe malava ai ʻa e kau ākongá ke malanga kia kinautolu ʻi he lea ko iá. Pea naʻe aʻu ʻo nau malava ke toe ngāueʻaki ʻa e Ngaahi Konga Tohi Tapu Faka-Hepeluú koeʻuhí naʻe liliu eni ki he lea faka-Kalisí. Naʻe ʻiloʻi ʻe he kakai tokolahi ʻa e liliu ko ení, ʻoku ui ko e Septuagint, ʻa ia naʻe liliu ʻe he kau Siu naʻe nofo ʻi ʻIsipité. Naʻe toe ngāueʻaki ʻe he kau hiki Tohi Tapú ʻa e lea faka-Kalisí ke hiki ʻaki ʻa e toenga ʻo e Tohi Tapú. Ko e lea faka-Kalisí naʻe lahi hono ngaahi leá, ko ia ko ha lea lelei ia ke fakamatalaʻiʻaki ʻa e ngaahi moʻoni loloto Fakatohitapú. Pea ko e lea faka-Kalisí naʻá ne tokoniʻi ʻa e ngaahi fakatahaʻangá ʻi heʻenau fetuʻutakí pea hoko ʻo fāʻūtaha.

12. (a) Ko e hā ʻa e codex, pea ko e hā naʻe faingofua ange ai ke ngāueʻaki ia ʻi ha takainga tohi? (e) Ko fē ʻa e taimi naʻe kamata ngāueʻaki ai ʻe he tokolahi taha ʻo e kau Kalisitiané ʻa e ngaahi tohí?

 ¹² Ko e hā naʻe ngāueʻaki ʻe he kau Kalisitiane ʻi he ʻuluaki senitulí ke akoʻi ʻa e Tohi Tapú? ʻUluakí, naʻa nau ngāueʻaki ʻa e ngaahi takainga tohi. Ka naʻe ʻikai faingofua ke ngāueʻaki pe ʻave holo ʻa e ngaahi takainga tohí. ʻI he taimi kotoa pē naʻe fiemaʻu ai ʻe he kau Kalisitiané ke kumi ha konga Tohi Tapu, naʻe pau ke nau fakaava ha takainga tohi pea toki takai leva ia. Ko e ngaahi takainga tohí naʻe angamaheniʻaki hono hiki ʻi he tafaʻaki pē ʻe taha. Ko e Kōsipeli ʻa Mātiú naʻe foʻi takainga tohi kakato pē ʻe taha. Pea naʻe kamata ngāueʻaki ʻe he kakaí ʻa e codex, ʻa ia ko e muʻaki faʻunga ʻo ha tohi. ʻE lava ʻe ha tokotaha lautohi ʻo fakaava ha tohi pea faingofua ke huke ʻa e ngaahi pēsí ke kumi ha konga Tohi Tapu. ʻOku pehē ʻe he kau faihisitōliá naʻe vave ʻa e kamata ngāueʻaki ʻe he kau Kalisitiané ʻa e ngaahi tohí pea ʻi he hili ʻa e taʻu 100 T.S., ko e tokolahi taha ʻo kinautolú naʻa nau ngāueʻaki ʻa e ngaahi tohi.

13, 14. (a) Ko e hā ʻa e maluʻi naʻe maʻu ʻe Paula koeʻuhí ko ha tangataʻifonua Loma ia? (e) Naʻe anga-fēfē maʻu ʻaonga ʻa e kau Kalisitiané mei he lao ʻa Lomá?

¹³ Naʻe maʻu ʻaonga ʻa e kau Kalisitiane ʻi he ʻuluaki senitulí mei he lao ʻa Lomá. Ko e fakatātaá, ko Paulá ko ha tangataʻifonua Loma, pea naʻe faʻa maluʻi ia ʻe he laó ʻi heʻene fonongá. ʻI he taimi naʻe puke ai ʻe he kau sōtia Lomá ʻa Paula ʻi Selusalemá pea ʻamanaki ke nau haha iá, naʻá ne tala ange ko ha tangataʻifonua Loma ia. Naʻá ne fakamanatu ki he ʻeikitaú ko ha tangataʻifonua Loma ʻoku ʻikai totonu ke haha ia taʻefai hano fakamāuʻi. Ko ia “ko e kau tangata ko ia naʻe teu ke nau fakaʻeke ia ʻaki hono fakamamahiʻí naʻa nau mavahe meiate ia; pea naʻe hoko ʻo ilifia ʻa e ʻeikitaú ʻi heʻene ʻiloʻi hake ko ha Loma [ʻa Paula] pea koeʻuhi kuó ne haʻi sēini iá.”—Ngā. 22:25-29.

¹⁴ Ko e moʻoniʻi meʻa ko ia ʻa e hoko ʻa Paula ko e tangataʻifonua Lomá naʻe kaunga ia ki he feangainga ki ai ʻi Filipaí. (Ngā. 16:35-40) Pea ʻi he taimi naʻe fiemaʻu ai ʻe ha fuʻu kakai ʻita ke ngaohikoviʻi ʻa e kau Kalisitiane ʻe niʻihi ʻi ʻEfesoó, naʻe fakanonga ʻe ha ʻōfisa fakapuleʻanga ʻa e fuʻu kakaí mo fakatokanga kia kinautolu naʻa nau maumauʻi ʻa e lao ʻa Lomá. (Ngā. 19:35-41) Ki mui ai, ʻi he taimi naʻá ne ʻi Sesalia aí, naʻe fiemaʻu ʻe Paula ke ngāueʻaki ʻene totonú ke hā ʻi he ʻao ʻo e ʻemipolá ʻi Loma. ʻI aí, naʻá ne taukapoʻi ʻa e ongoongo leleí. (Ngā. 25:8-12) Ko ia naʻe ngāueʻaki ʻe he kau Kalisitiané ʻa e lao ʻa Lomá ke “taukapoʻi mo fokotuʻu fakalao” ʻenau totonu ke malangá.—Fil. 1:7.

15. Ko fē ʻa e feituʻu naʻe nofo ai ʻa e kau Siu tokolahi ʻi he ʻuluaki senitulí?

¹⁵ Naʻe tokoniʻi ʻa e kau Kalisitiane ʻi he ʻuluaki senitulí ʻe ha toe meʻa ke nau malanga ʻi he kotoa ʻo e māmaní. ʻI he taimi ko iá, naʻe ʻi ai ʻa e kau Siu ʻi he ngaahi fonua lahi, ʻo ʻikai ʻi ʻIsileli pē. Ko e hā hono ʻuhingá? ʻI he taʻu ʻe lauingeau ki muʻa ai, naʻe taki pōpula ʻa e kau Siú ki ʻAsīlia, pea ʻi he ngaahi taʻu ki mui ai, naʻe ʻave ʻa e niʻihi ki Pāpilone. Ki mui ai ʻi he taimi naʻe puleʻi ʻe he kau Pēsiá ʻa Pāpiloné, naʻe ʻi ai ʻa e kau Siu naʻa nau nofo ʻi he kotoa ʻo e ʻEmipaea Pēsiá. (ʻĒseta 9:30) ʻI he ʻuluaki senitulí, ʻi he taimi naʻe ʻi māmani ai ʻa Sīsuú, naʻe ʻi ai ʻa e kau Siu naʻe nofo ʻi he kotoa ʻo e ʻEmipaea Lomá, hangē ko ia ʻi ʻIsipite mo e ngaahi feituʻu ʻo ʻAfilika Tokelau, hangē ko ia ko Kalisi, ʻĒsia Maina (Toake) pea mo Mesopotēmia (ʻIulaki). ʻOku ʻi ai ʻa e fakakaukau ko e kakai ʻe toko 60 miliona naʻe nofo ʻi he ʻemipaeá, ko e 4 miliona tupu ai ko e kau Siu. Neongo ʻenau movete holo ʻi he ngaahi feituʻu lahi, naʻe tauhi ʻe he kau Siú ʻenau lotú.—Māt. 23:15.

16, 17. (a) Koeʻuhí naʻe ʻi ai ʻa e kau Siu ʻi he ngaahi fonua lahi, naʻe anga-fēfē maʻu ʻaonga ʻa e kakai naʻe ʻikai ko e kau Siú? (e) ʻI he ngaahi founga fē naʻe muimui ai ʻa e kau Kalisitiané ki he faʻifaʻitakiʻanga ʻa e kau Siú?

¹⁶ Koeʻuhi naʻe ʻi ai ʻa e kau Siu ʻi he ngaahi fonua lahi, ko e kakai tokolahi naʻe ʻikai ko e kau Siú naʻa nau ʻilo ki he Ngaahi Konga Tohi Tapu Faka-Hepeluú pea ako ʻa e meʻa naʻe tui ki ai ʻa e kau Siú. Ko e fakatātaá, naʻa nau ako ʻoku ʻi ai ʻa e ʻOtua moʻoni pē taha pea ko e faʻahinga ʻoku tauhi kiate iá kuo pau ke nau talangofua ki heʻene ngaahi laó. Naʻa nau ʻilo ko e Ngaahi Konga Tohi Tapu Faka-Hepeluú naʻe ʻomai mei he ʻOtuá pea ʻoku ʻi ai ʻa e ngaahi kikite lahi fekauʻaki mo e Mīsaiá. (Luke 24:44) Ko ia ʻi he taimi naʻe malangaʻi ai ʻe he kau Kalisitiané ʻa e ongoongo leleí, ko e kau Siú mo e faʻahinga naʻe ʻikai ko e kau Siú naʻa nau ʻosi ʻilo ki he niʻihi ʻo e ngaahi meʻa naʻe malangaʻi ʻe he kau Kalisitiané. Naʻe loto ʻa Paula ke kumi ki he kakai te nau fanongo ki he ongoongo leleí. Naʻá ne faʻa ʻalu ki he ngaahi sinakoké, ʻa ia naʻe lotu ai ʻa e kau Siú, pea ngāueʻaki ʻa e Folofolá ke fakaʻuhinga mo kinautolu.—Lau ʻa e Ngāue 17:1, 2.

¹⁷ Naʻe fakatahataha maʻu pē ʻa e kau Siú ke lotu ʻi he ngaahi sinakoké pe ʻi tuʻa. Naʻa nau hivaʻi ʻa e ngaahi hiva, lotu, pea lāulea ki he Folofolá. Naʻe muimui ʻa e kau Kalisitiané ki heʻenau faʻifaʻitakiʻangá, pea ʻi he ʻahó ni ʻoku tau fai ʻa e meʻa tatau ʻi heʻetau ngaahi fakatahaʻangá.

18, 19. (a) Ko e hā ʻa e ngaahi tuʻunga ʻi he ʻuluaki senitulí naʻá ne tokoniʻi ʻa e kau Kalisitiané ke nau faí? (e) ʻOku anga-fēfē hono ʻai koe ʻe he kupu ko ení ke ke ongoʻi fekauʻaki mo Sihová?

¹⁸ Ko e ʻuluaki senitulí ko ha taimi makehe ia ʻi he hisitōliá. ʻI he ʻEmipaea Lomá, naʻe ʻi ai ʻa e melino, ko e kakai tokolahi naʻe malava ke nau lea ʻi he lea tatau, pea naʻe maluʻi ʻe he laó ʻa e kakaí. Naʻe faingofua ange ʻa e fefonongaʻakí, pea ko e kakai ʻi he ngaahi fonua lahi naʻa nau ʻilo ʻa e kau Siú mo e Ngaahi Konga Tohi Tapu Faka-Hepeluú. Ko e ngaahi meʻá ni kotoa naʻe tokoni ia ki he kau Kalisitiané ke hokohoko atu hono fai ʻa e ngāue naʻe ʻoange ʻe he ʻOtuá.

¹⁹ ʻI he taʻu nai ʻe 400 ki muʻa ʻi he haʻu ʻa Sīsū ki he māmaní, naʻe tohi ʻe he filōsefa Kalisi ko Palato ʻo pehē ʻoku mātuʻaki faingataʻa ki he kakaí ke ʻiloʻi ʻa e Tokotaha-Fakatupú pea ʻoku taʻemalava ke nau tala ki he tokotaha kotoa ʻi he māmaní fekauʻaki mo ia. Ka naʻe pehē ʻe Sīsū: “Ko e ngaahi meʻa ʻoku taʻemalava ki he tangatá ʻoku malava ia ki he ʻOtuá.” (Luke 18:27) ʻOku hā mahino ko e ngāue fakamalangá kuo malava iá koeʻuhí ko e tokoni ʻa Sihová. ʻOkú ne loto ke fanongo “ʻa e kakai ʻo e ngaahi puleʻanga kotoa pē” ki he ongoongo leleí pea ʻiloʻi ia. (Māt. 28:19) ʻE fakamatalaʻi ʻe he kupu hoko maí ʻa e anga hono malangaʻi ʻa e ongoongo leleí ʻi māmani lahi ʻi he ʻahó ni.