ʻI HONO fakahoa atu ki ha fuʻu sita fakaʻofoʻofa ʻo Lepanoni, ko ha fuʻu ʻōlive pikopiko mo mamio heʻikai nai ke fuʻu hā fakaʻofoʻofa. Ka ko e ʻulu ʻōlivé ʻoku nau maʻu ʻa e malava fakaofo ke moʻui ʻi he ngaahi tuʻunga faingataʻá. Ko e niʻihi ʻoku taʻu nai ʻe 1,000. Ko ha fuʻu ʻōlive ʻoku aka loloto ia ki he kelekelé, pea ʻe lava ke toe moʻui hake naʻa mo e maumau ʻa e sinó. Kapau ʻe kei moʻui pē ʻa e aká, ʻe toe tupu hake ia.

Ko e tangata faitōnunga ko Siopé naʻá ne tuipau kapau te ne mate, te ne toe moʻui mai. (Siope 14:13-15) Naʻá ne ngāueʻaki ʻa e fakatātā ʻo ha fuʻu ʻakau, mahalo ko ha fuʻu ʻōlive, ke fakahaaʻi ʻaki ʻene tuipau ki he malava ʻa e ʻOtuá ke fokotuʻu hake iá. Naʻe pehē ʻe Siope: “ʻOku ai ha ʻamanaki ki he ʻakau, kapau ʻe ta, ʻe toe huli hake.” ʻI he tō ha ʻuha hili ha laʻalaʻā, ʻe lava ke toe moʻui ʻa e tefito ʻo ha fuʻu ʻōlive mōmoa pea “toʻulu hange ha ʻakau mui.”—Siope 14:7-9.

Hangē pē ko e vēkeveke ha tokotaha ngoue ke sio ki ha fuʻu ʻōlive naʻe tā ʻoku toe moʻui mai, ko Sihova ko e ʻOtuá ʻokú ne vēkeveke ke fokotuʻu mai ʻene kau sevānití mo e niʻihi kehe tokolahi. (Māt. 22:31, 32; Sione 5:28, 29; Ngā. 24:15) Sioloto atu ki heʻetau fiefiá ʻi heʻetau talitali lelei mai ʻa e kau maté pea sio ki heʻenau toe moʻui maí!