1. Fakamatalaʻi ʻa e founga naʻe hoko ai ha ʻāngelo ko Sētane.

 ʻI HE taimi ʻe taha, naʻá ne maʻu ha vahaʻangatae lelei mo Sihova. Ka ki mui ai, naʻe loto ʻa e meʻamoʻui laumālie pe ʻāngelo ko ení ke lotu ange ʻa e faʻahinga ʻo e tangatá kiate ia. ʻI he ʻikai te ne talitekeʻi vave ʻa e holi fehālaaki ko ení, naʻá ne fakaʻatā ia ke tupu ʻo aʻu ki heʻene faiangahala. (Sēm. 1:14, 15) ʻOku ʻikai ke tau ʻilo hono muʻaki hingoá, ka ʻoku tau ui ia he taimí ni ko Sētane. “Naʻe ʻikai te ne tuʻu maʻu ʻi he moʻoní.” Naʻá ne angatuʻu kia Sihova pea hoko ai “ko e tamai ia ʻo e loí.”—Sione 8:44.

2, 3. Ko e hā ʻoku fakahaaʻi ʻe he foʻi lea “Sētane,” “Tēvolo,” “ngata,” mo e “talākoní” fekauʻaki mo e fili lahi taha ʻo Sihová?

² Talu ʻa e angatuʻu ʻa Sētané, kuó ne hoko ai ko e fili lahi taha ia ʻo Sihova mo e kotoa ʻo e faʻahinga ʻo e tangatá. ʻOku lava ke tau ʻiloʻi ʻa e anga-kovi moʻoni ʻa Sētané ʻi heʻetau sio ki he anga hono fakamatalaʻi ia ʻe he Tohi Tapú. ʻOku ʻuhinga ʻa e Sētané ki he “Tokotaha Fakafepaki,” ʻa ia ʻoku fakahaaʻi ai ʻa e fehiʻa ʻa e ʻāngelo fulikivanu ko ení ʻi he pule ʻa e ʻOtuá pea ʻokú ne fakafepakiʻi ia ʻaki hono  mālohí kotoa. Ko e meʻa ʻoku fiemaʻu moʻoni ʻe Sētané ke ngata ʻa e pule ʻa Sihová.

³ ʻI he Fakahā 12:9, ʻoku ui ai ʻa Sētane ko e Tēvolo, ʻa ia ʻoku ʻuhinga ki he “Tokotaha Lauʻikovi Loi.” Kuo taʻefakalāngilangiʻi ʻe Sētane ʻa e ʻOtuá ʻi heʻene ui ia ko e tokotaha loi. ʻOku fakamanatu mai kia kitautolu ʻe he kupuʻi lea “ngata ʻo onoʻahó” ʻa e founga naʻe ngāueʻaki ai ʻe Sētane ha ngata ke kākaaʻi ʻa ʻIví. Ko e kupuʻi lea “fuʻu talākoní” ko ha toe founga lelei ia ke fakamatalaʻiʻaki ʻa Sētane. ʻOkú ne anga-kakaha, anga-fakamamahi pea ʻokú ne anga-kovi. ʻOkú ne loto ke ʻoua ʻe fakahoko ʻa e taumuʻa ʻa Sihová pea ke fakaʻauha ʻa e kakai ʻa e ʻOtuá.

4. Ko e hā te tau lāulea ki ai ʻi he kupu ko ení?

⁴ ʻOku hā mahino, ko Sētane ʻoku fakamanamana lahi taha ki heʻetau anga-tonú. Ko e ʻuhinga ia ʻoku fakatokanga mai ai kia kitautolu ʻa e Tohi Tapú: “Tauhi maʻu hoʻomou fakakaukau leleí, faʻa leʻo. Ko homou filí, ʻa e Tēvoló, ʻokú ne ʻalu fano holo ʻo hangē ha laione ngungulú, ʻi he kumi ki ha taha ke ne folofua.” (1 Pita 5:8) Ko ia ai, ko e kupu ko ení ʻe lāulea ki he tōʻonga ʻe tolu ʻo Sētane ʻa ia ʻoku fakahaaʻi ai ʻa e ʻuhinga ʻoku fiemaʻu ai ke tau maluʻi kitautolu mei he fili fulikivanu ko eni ʻo Sihova mo ʻEne kakaí.

5, 6. (a) ʻOmai ha fakatātā ʻoku fakahaaʻi ai ko e kau ʻāngeló ʻoku ‘lahi honau malohí.’ (e) ʻI he founga fē ʻoku “malava ke fakatupunga ʻa e maté” ʻe Sētane?

⁵ Ko e kau ʻāngeló ʻoku ‘lahi honau malohí.’ (Saame 103:20, PM) ʻOku nau poto mo mālohi ange ʻi he faʻahinga ʻo e tangatá. Ko hono moʻoní, ʻoku ngāueleleiʻaki ʻe he kau ʻāngelo faitōnungá honau mālohí. Ko e fakatātaá, naʻe tāmateʻi ʻe he taha ʻo e kau ʻāngelo ʻa Sihová honau filí ʻa ia ko e kau sōtia ʻAsīlia ʻe toko 185,000. ʻE taʻemalava eni ke fai ʻe ha tangata ʻe taha pea aʻu ʻo faingataʻa ke fai ia ʻe ha fuʻu kau tau. (2 Tuʻi 19:35) ʻI he taimi ʻe taha, naʻe ngāueʻaki ʻe ha ʻāngelo hono potó mo e mālohí ke tukuange ʻa e kau ʻapositolo ʻa Sīsuú mei he pilīsoné. Neongo naʻe ʻi ai pē ʻa e kau kaʻaté, naʻe ʻikai te nau fakatokangaʻi hono fakaava ʻe he ʻāngeló ʻa e ngaahi matapaá, ʻo tukuange ʻa e kau ʻapositoló, pea toe lokaʻi ʻa e ngaahi matapaá!—Ngā. 5:18-23.

⁶ ʻOku ngāueleleiʻaki ʻe he kau ʻāngelo faitōnungá honau mālohí, ka ʻoku ngāuekoviʻaki ʻe Sētane hono mālohí. Pea ʻoku maʻu moʻoni ʻe Sētane ʻa e mālohi mo e faitākiekina lahi. ʻOku lave ʻa e Tohi Tapú kiate ia “ko e pule ʻo e māmani ko ení” mo e “ʻotua ʻo e fokotuʻutuʻu ko ʻení.” (Sione 12:31; 2 Kol. 4:4) ʻOku aʻu ʻo “malava ke fakatupunga ʻa e maté” ʻe Sētane. (Hep. 2:14) ʻOku ʻikai ʻuhinga eni ia ʻokú ne tāmateʻi fakahangatonu kotoa ʻa e kakaí. Ko ia, ʻoku ʻuhinga eni ki he hā? ʻUluakí, ʻoku fonu ʻa e māmani ko ení ʻi he fakakaukau tāufehiʻa mo e fakamālohi ʻa Sētané. Uá, koeʻuhi naʻe tui ʻa ʻIvi ki he loi ʻa Sētané pea talangataʻa ʻa ʻĀtama ki he ʻOtuá, kuo faiangahala mo mate ai ʻa e kotoa ʻo e faʻahinga ʻo e tangatá. (Loma 5:12) Ko Sētané “ko ha tāmate tangata,” hangē ko hono ui ia ʻe Sīsuú. (Sione 8:44) Ko e fili mālohi moʻoni ia.

7. Kuo anga-fēfē hono fakahaaʻi ʻe he kau tēmenioó ʻoku nau mālohi?

⁷ ʻI he taimi ʻoku tau fakafepakiʻi ai ʻa Sētané, ʻoku tau toe fakafepakiʻi ai ʻa e faʻahinga kotoa ʻoku nau poupou kiate iá mo e faʻahinga ʻoku nau angatuʻu ki he pule ʻa e ʻOtuá. ʻOku kau ki ai ha kulupu tokolahi ʻo e kau ʻāngelo angatuʻu kehe, ʻa ia ʻoku ui ko e kau tēmeniō. (Fkh. 12:3, 4) Kuo nau fakahaaʻi ʻi he taimi lahi ʻenau mālohi ange ʻi he faʻahinga ʻo e tangatá, ʻo fakatupunga ʻa e faingataʻa lahi ki he tangatá. (Māt. 8:28-32; Mk. 5:1-5) ʻOua ʻaupito ʻe ngalo ʻa e fuʻu mālohi ʻo e kau tēmenioó mo honau tokotaha pulé. (Māt. 9:34) Ka ne taʻeʻoua ʻa e tokoni ʻa Sihová, heʻikai ʻaupito malava ke tau ikuna ʻi he faitau mo Sētané.

8. (a) Ko e hā ʻa e taumuʻa ʻa Sētané? (Sio ki he ʻuluaki fakatātā ʻi he kupú ni.) (e) ʻI he meʻa kuó ke sio ki aí, ʻoku anga-fēfē ʻa e anga-fakamamahi ʻa e māmani ko ení ʻo hangē ko Sētané?

⁸ ʻOku fakahoa ʻe he ʻapositolo ko Pitá ʻa Sētane  ki ha ‘laione ngungulu.’ ʻOku pehē ʻi he tohi maʻuʻanga fakamatala ʻe taha ko e ʻuhinga ʻo e foʻi lea faka-Kalisi ʻoku liliu ko e “ngungulú” ki he “tangi ʻa ha manu fekai ʻi haʻane fuʻu fiekaia.” He fakamatalaʻi lelei ē ʻo e tōʻonga anga-fakamamahi mo fulikivanu ʻo Sētané! ʻOkú ne ʻosi puleʻi ʻa e māmaní kotoa, ka ʻoku ʻikai fiemālie ia ai. ʻOku hangē ʻa Sētane ko ha laioné ʻo kei fiekaia ki ha kakai tokolahi ange. (1 Sio. 5:19) Ko ʻene tāketi tefitó ko e kau pani ʻoku kei ʻi he māmaní, ʻa ia ʻoku nau kau fakataha mo e “fanga sipi kehe.” (Sione 10:16; Fkh. 12:17) Ko e taumuʻa ʻa Sētané ke fakaʻauha ʻa e kakai ʻa Sihová. Ko hono fakatangaʻi ʻa e kau Kalisitiane moʻoní mei he ʻuluaki senitulí ʻo aʻu mai ki he taimí ni ʻoku fakamoʻoniʻi ai ʻa e anga-fakamamahi ʻa Sētané.

9, 10. (a) Naʻe anga-fēfē hono ʻohofi ʻe Sētane ʻa e puleʻanga ʻIsilelí? (ʻOmai ha fakatātā.) (e) Ko e hā ʻa e ʻuhinga makehe naʻe tāketiʻi ai ʻe Sētane ʻa ʻIsileli ʻo e kuonga muʻá? (f) Ko e hā hoʻo fakakaukau ki he ongoʻi ʻa e Tēvoló ʻi he taimi ʻoku fai ai ʻe ha taha ʻo e kau sevāniti ʻa Sihová ha angahala mamafa he ʻahó ni?

⁹ Kuo fakahaaʻi ʻe Sētane ʻene anga-fakamamahí ʻi ha toe founga ʻe taha. Ko ha laione ʻoku fuʻu fiekaia ʻoku ʻikai fakaʻofaʻia ia ʻi he manu ʻokú ne maʻú. ʻOku ʻikai haʻane ongoʻi manavaʻofa ki muʻa ke ne tāmateʻi iá, pea ʻoku ʻikai haʻane ongoʻi halaia ʻi he hili ʻene tāmateʻi iá. ʻI he founga meimei tatau, ʻoku ʻikai ha ongoʻi manavaʻofa ʻa Sētane ki he faʻahinga ʻokú ne ʻohofí. Ko e fakatātaá, ko e hā hoʻo fakakaukau ki he ongoʻi ʻa Sētane ʻi he taimi taki taha naʻá ne sio ai ki he fai ʻe he kau ʻIsilelí ʻa e ngaahi angahala hangē ko e fehokotaki fakasino taʻetāú mo e mānumanú? ʻE lava ke ke sioloto atu ki he ikuna fiefia ʻa Sētane ʻi heʻene sio ki he ngaahi nunuʻa fakamamahi ʻo e ʻulungaanga taʻetaau ʻa Similaí mo e mānumanu ʻa Kēhesí?—Nōm. 25:6-8, 14, 15; 2 Tuʻi 5:20-27.

¹⁰ Naʻe ʻi ai ʻa e ʻuhinga makehe ʻa Sētane ʻi heʻene tāketi ki ʻIsileli ʻo e kuonga muʻá. Manatuʻi ko e Mīsaiá ʻe haʻu mei he puleʻanga ko iá, pea te ne hoko ko e tokotaha te ne laiki ʻa Sētane pea fakamoʻoniʻi ko Sihova ʻoku totonu ke pulé. (Sēn. 3:15) Naʻe ʻikai loto ʻa Sētane ke maʻu ʻe he kau ʻIsilelí ʻa e hōifua ʻa e ʻOtuá, ko ia naʻá ne fai ʻa e meʻa kotoa pē naʻá ne malavá ke ʻai kinautolu ke nau faiangahala. ʻOua ʻe fakakaukau naʻe ongoʻi fakaʻofaʻia ʻa Sētane ʻi he taimi naʻe tono  ai ʻa Tēvitá. ʻOua ʻe fakakaukau naʻá ne manavaʻofa kia Mōsese ʻi he taimi naʻe mole ai hono faingamālie ke hū ki he Fonua ʻo e Talaʻofá. Ko e moʻoni ʻoku fiefia ʻaupito ʻa Sētane ke sio ʻoku fai ʻe ha taha ʻo e kau sevāniti ʻa e ʻOtuá ha angahala mamafa. Ko hono moʻoní, ʻoku ngāueʻaki ʻe he Tēvoló ʻa e ngaahi ikuna peheé ke manukiʻi ʻa Sihova.—Pal. 27:11, PM.

11. Ko e hā naʻe tāketiʻi nai ai ʻe Sētane ʻa Selá?

¹¹ Naʻe fehiʻa ʻaupito ʻa Sētane ʻi he laine fakafāmili ʻe haʻu mei ai ʻa e Mīsaiá. Ko e fakatātaá, fakakaukau ki he meʻa naʻe hoko hili hono tala ange ʻe Sihova kia ʻĒpalahame te ne hoko “ko e puleʻanga lahi.” (Sēn. 12:1-3) Lolotonga ʻa e ʻi ʻIsipite ʻa ʻĒpalahame mo Selá, naʻe ʻomai ʻe Felo ʻa Sela ki hono ʻapí pea loto ke ne hoko ko hono uaifi. Kae kehe, naʻe maluʻi ʻe Sihova ʻa Sela mo fakahaofi ia mei he tuʻunga faingataʻa ko ení. (Lau ʻa e Sēnesi 12:14-20.) Naʻe hoko ha meʻa meimei tatau ʻi he kolo ko Kelá ki muʻa ke fanauʻi ʻa ʻAisaké. (Sēn. 20:1-7) ʻOku malava nai ke tukuakiʻi ʻa Sētane ki he ongo tuʻunga ko ení? Manatuʻi naʻe mavahe ʻa Sela mei he kolo tuʻumālie ko ʻUá ʻo nofo tēniti. Ko ia, naʻe ʻamanekina ʻe Sētane ke ʻahiʻahiʻi ia ʻaki ʻa e palasi tuʻumālie ʻo Felo mo ʻApimelekí? Naʻe fakakaukau nai ʻa Sētane te ne lavakiʻi hono husepānití mo Sihova ʻaki ʻene mali mo ha taha ʻo e ongo tuʻi ko iá? ʻOku ʻikai ke tala mai ia ʻe he Tohi Tapú, ka ʻoku mātuʻaki ngalingali naʻe mei fiefia lahi ʻa e Tēvoló kapau naʻe mole meia Sela ʻa e faingamālie ke hoko ko e konga ʻo e laine fakafāmili ʻo e Mīsaiá. Naʻe ʻikai ʻaupito ha ongoʻi halaia ʻa Sētane kapau naʻe maumau ʻa e nofo mali lelei ʻa e fefiné, ko hono ongoongó mo hono vahaʻangatae mo Sihová. He anga-fakamamahi mo fulikivanu ē ka ko Sētane!

12, 13. (a) Naʻe anga-fēfē hono fakahaaʻi ʻe Sētane ʻene anga-fakamamahí hili hono ʻaloʻi ʻo Sīsuú? (e) Ko e hā hoʻo fakakaukau ki he ongoʻi ʻa Sētane fekauʻaki mo e fānau ʻoku nau ʻofa kia Sihová mo feinga ke tauhi kiate Ia he ʻaho ní?

¹² Naʻe ʻaloʻi ʻa Sīsū ʻi he taʻu ʻe lauingeau hili ʻa ʻĒpalahamé. ʻOua ʻe fakakaukau naʻe sio ʻa Sētane ʻoku fakaʻofoʻofa ʻa e kiʻi pēpē ko ení. Naʻe ʻiloʻi ʻe Sētane ʻe tupu hake ʻa e kiʻi pēpē ko ení ʻo hoko ko e Mīsaia naʻe talaʻofá. Ko Sīsū ʻa e konga tefito ʻo e hako ʻo ʻĒpalahamé, pea ki mui ai te ne “veteki ʻa e ngaahi ngāue ʻa e Tēvoló.” (1 Sio. 3:8) ʻE fakakaukau ʻa Sētane ko hono tāmateʻi ʻa e kiʻi tamá naʻe anga-fakamamahi ʻaupito? ʻIkai. ʻOku ʻikai ke ne tokanga ki he meʻa ʻoku tonú pe halá. Pea naʻe vave ʻene ngāue ke feinga ke tāmateʻi ʻa e kiʻi tama ko Sīsuú. Anga-fēfē?

¹³ ʻI he fanongo ʻa Tuʻi Hēlota mei he kau vavaló kuo ʻaloʻi ʻa e “tuʻi ʻo e kau Siú,” naʻá ne houhau lahi ʻaupito pea loto ke tāmateʻi ʻa e kiʻi pēpeé. (Māt. 2:1-3, 13) Ko ia naʻá ne tuʻutuʻuni ke fakapoongi ʻa e tamaiki tangata kotoa pē ʻi Pētelihema mo hono ngaahi vahefonuá mei he taʻu uá ʻo faai hifo. (Lau ʻa e Mātiu 2:13-18.) Naʻe hao ʻa Sīsū ʻi he tāmate fakalilifu ko iá, ka ko e hā ʻoku tala mai heni kia kitautolu fekauʻaki mo hotau fili ko Sētané? ʻOku ʻikai fakamahuʻingaʻi ʻe he Tēvoló ʻa e moʻui fakaetangatá. ʻOku aʻu ʻo ʻikai ke ne tokanga ki he fānaú. Ko e moʻoni ko Sētané ko ha ‘laione ngungulu.’ ʻOua ʻaupito ʻe ngalo ko e tokotaha anga-fakamamahi ia!

14, 15. Kuo anga-fēfē hono hanga ʻe Sētane ʻo ‘fakakuihi ʻa e ʻatamai ʻo e kau taʻetuí’?

¹⁴ Ko e founga pē taha ʻe lava ai ke fakatafokiʻi ʻe Sētane ʻa e kakaí mei hotau ʻOtua ʻofa ko Sihová, ko hono kākaaʻi kinautolu. (1 Sio. 4:8) ʻOku kākaaʻi ʻe Sētane ʻa e kakaí koeʻuhí ke ʻoua te nau “lāuʻilo ʻoku ʻi ai ʻenau fiemaʻu fakalaumālié,” ʻo ʻikai ai ke nau ʻiloʻi ʻoku fiemaʻu ke ʻi ai honau vahaʻangatae mo e ʻOtuá. (Māt. 5:3) ʻOku hanga ʻe he Tēvoló ʻo ‘fakakuihi ʻa e ʻatamai ʻo e kau taʻetuí’ koeʻuhí ke ʻoua te nau malava ʻo sio ki he moʻoni fekauʻaki mo Sihová.—2 Kol. 4:4.

¹⁵ Ko e taha ʻo e founga lahi taha ʻoku kākaaʻi ai ʻe Sētane ʻa e kakaí ʻoku fakafou ia ʻi he lotu  loí. ʻOkú ne ʻiloʻi ko e “ʻOtua fuaʻa” ʻa Sihova. (ʻEki. 20:5) Ko ia sioloto atu ki he fiefia ʻa Sētane ʻi he taimi ʻokú ne sio ai ʻoku lotu ʻa e kakaí ki heʻenau fanga kuí, pe ki natula, pe ki he fanga monumanu, ki ha taha pe ki ha meʻa pē kae ʻikai kia Sihova. ʻOku fakamamahí, naʻa mo e tokolahi ʻoku nau fakakaukau ʻoku tali ʻe he ʻOtuá ʻenau lotú ka ko hono moʻoní ʻoku puleʻi ia ʻe he ngaahi tui loi mo e ngaahi ouau taʻeʻaonga. Ko e kau ʻIsileli ʻi he ʻaho ʻo ʻAiseá naʻa nau ʻi ha tuʻunga meimei tatau. Naʻe ʻeke ange ʻe Sihova: “Koeʻumaʻa hoʻomou ʻatu paʻanga ki he ʻataʻi ma? Mo e fua ʻo hoʻomou ongosia ki he meʻa ʻoku ʻikai fakamakona? Fei mo fanongo kiate au, mo kai ʻa e meʻa ʻoku lelei, pea ke hakahaka homou laumalie ʻi he kai meʻa ngako.”—ʻAi. 55:2.

16, 17. (a) Ko e hā naʻe tala ange ai ʻe Sīsū kia Pita: “ʻAlu ki mui Sētane”? (e) ʻOku anga-fēfē nai hono kākaaʻi kitautolu ʻe Sētane koeʻuhí ke taʻofi ʻetau faʻa leʻó?

¹⁶ ʻE lava ʻe Sētane ke toe kākaaʻi mo e kau sevāniti faivelenga ʻa Sihová. Ko e fakatātaá, fakakaukau ki he meʻa naʻe hoko ʻi he taimi naʻe tala ange ai ʻe Sīsū ki heʻene kau ākongá ʻe vave hono tāmateʻí. Ko e ʻapositolo ko Pitá, ʻa ia naʻe ʻofa ai ʻa Sīsuú, naʻá ne pehē: “Anga-ʻofa muʻa kiate koe, ʻEiki; ʻe ʻikai teitei hoko ʻa e meʻá ni kiate koe.” Naʻe tala ange ʻe Sīsū kia Pita: “ʻAlu ki mui Sētane!” (Māt. 16:22, 23) Ko e hā naʻe ui ai ʻe Sīsū ʻa Pita ko “Sētane”? Koeʻuhí naʻe ʻiloʻi ʻe Sīsū ʻa e meʻa naʻe teu ke hokó. Naʻe teu ke pekia ʻa Sīsū ko ha feilaulau huhuʻi pea ʻe fakamoʻoniʻi ai ko e Tēvoló ko ha tokotaha loi. Ko ha taimi fakalilifu eni ʻi he hisitōlia ʻo e faʻahinga ʻo e tangatá pea naʻe ʻikai ko e taimi eni ke “anga-ʻofa” ai ʻa Sīsū kiate ia. Naʻe mei fiefia ʻa Sētane kapau naʻe ʻikai ke faʻa leʻo ʻa Sīsū.

¹⁷ ʻOku ofi ke ngata ʻa e fokotuʻutuʻu ko ení, ko ia ʻoku tau moʻui foki ʻi ha taimi fakalilifu. ʻOku loto ʻa Sētane ke tau “anga-ʻofa” kiate kitautolu ʻaki hono ʻai ke tau tokangataha ki he hoko ʻo lavameʻa ʻi he māmani ko ení. ʻOkú ne loto ke ngalo ʻia kitautolu ʻoku tau moʻui ʻi he ngaahi ʻaho fakaʻosí pea taʻofi ʻetau faʻa leʻó. ʻOua ʻe ʻai ia ke hoko kiate koé! ʻI hono kehé, “hanganaki leʻo.” (Māt. 24:42) ʻOua ʻaupito ʻe tui ki he loi ʻa Sētane ʻoku fuʻu mamaʻo ʻa e ngataʻangá pe ʻe ʻikai ʻaupito ke hoko mai ia.

18, 19. (a) ʻOku anga-fēfē nai ʻa e feinga ʻa Sētane ke kākaaʻi kitautolu pea ʻai ke tau fakakaukau ʻoku ʻikai ke tau tuha mo e ʻofa ʻa Sihová? (e) ʻOku anga-fēfē hono tokoniʻi kitautolu ʻe Sihova ke hanganaki faʻa leʻó?

¹⁸ ʻOku feinga ʻa Sētane ke kākaaʻi kitautolu ʻi ha toe founga ʻe taha. ʻOkú ne loto ke tau tui ʻoku ʻikai ke tau tuha mo e ʻofa ʻa Sihová pea ʻe ʻikai ʻaupito fakamolemoleʻi ʻe he ʻOtuá ʻetau ngaahi angahalá. Ka ko e ngaahi loi eni meia Sētane. Fakakaukau ki ai, ko hai moʻoni ʻoku ʻikai tuha mo e ʻofa ʻa Sihová? Ko Sētane. Ko hai ʻe ʻikai ʻaupito fakamolemoleʻi ʻe he ʻOtuá? Ko Sētane. Ka kia kitautolu, ʻoku pehē ʻe he Tohi Tapú: “ʻOku ʻikai ke taʻemāʻoniʻoni ʻa e ʻOtuá ke ne fakangaloʻi hoʻomou ngāué pea mo e ʻofa ne mou fakahaaʻi maʻa hono huafá.” (Hep. 6:10) ʻOku houngaʻia ʻa Sihova ʻi he meʻa kotoa pē ʻoku tau fai ke fakahōifuaʻi iá, pea ʻoku ʻikai ʻaupito taʻeʻaonga ʻetau ngāue kiate iá. (Lau ʻa e 1 Kolinitō 15:58.) Ko ia ʻoua ʻe kākaaʻi koe ʻe he ngaahi loi ʻa Sētané.

¹⁹ Hangē ko ia kuo tau sio ki aí, ko Sētané ʻoku mālohi, anga-fakamamahi mo kākā. ʻE lava fēfē ke tau ikuna ʻi he faitau mo e fili ko ení? ʻOku ʻomai ʻe Sihova ʻa e tokoní. ʻOku akoʻi mai kia kitautolu ʻe heʻene Folofolá ʻa e ngaahi founga ʻa Sētané ʻo “ʻikai ke tau taʻeʻilo ki heʻene ngaahi fāliungá.” (2 Kol. 2:11) ʻI heʻetau mahinoʻi ʻa e ngaahi founga kehekehe ʻoku ʻohofi ai kitautolu ʻe Sētané, ʻoku faingofua ange ai ke tau hanganaki faʻa leʻo. Ka ʻoku ʻikai feʻunga pē hono ʻiloʻi ʻa e ngaahi founga ʻa Sētané. ʻOku pehē ʻe he Tohi Tapú: “Talitekeʻi ʻa e Tēvoló, pea te ne hola meiate kimoutolu.” (Sēm. 4:7) Ko e kupu hoko maí ʻe lāulea ki he tafaʻaki ʻe tolu ʻe lava ai ke tau faitau mo Sētane pea ikuná.