ʻI HE kamataʻanga ʻo e faʻahitaʻu māfana ʻo e 1970, naʻá ku tokoto ai ʻi hoku mohengá ʻi he Falemahaki Valley Forge General, ʻi Phoenixville, Pennsylvania, ʻi ʻAmelika. Naʻe fua ʻe ha neesi tangata hoku totó ʻi he haafe houa kotoa pē. Ko ha sōtia taʻu 20 au pea naʻá ku puke lahi ʻi ha mahaki pipihi. Ko e nēsí ʻa ia naʻá ne kiʻi taʻumotuʻa ange ʻiate au, naʻá ne mataʻi hohaʻa. ʻI he hokohoko atu ke tōlalo hoku totó, naʻá ku pehē ange, “Kuo teʻeki ai ke ke sio ʻi ha mate ha taha, ʻikai ko ia?” Naʻe kula hono matá, peá ne tali mai, “Teʻeki ai.”

ʻI he taimi ko iá, naʻe hā ngali nenefu hoku kahaʻú. Ka naʻe anga-fēfē ʻeku iku mai ki he falemahakí? Sai, tuku ke u talanoa atu ki heʻeku moʻuí.

Naʻá ku hoko ʻo puke ʻi heʻeku ngāue ko ha tokotaha tokoni ʻi he loki tafá lolotonga ʻa e tau ko ia ʻi Vietinemí. Naʻá ku fiefia ʻi hono tokoniʻi ʻa e kau mahakí mo e kau laveá pea ko ʻeku taumuʻá ke hoko ko ha toketā faitafa. Naʻá ku tūʻuta ʻi Vietinemi ʻi Siulai 1969. Hangē ko e kau haʻu foʻou kotoa pē, naʻe fakaʻatā au ʻi he uike ʻe taha ke u fakaangaanga ai koeʻuhí ke u lava ʻo feʻunuʻaki ki he kehekehe ʻo e taimí mo e fuʻu velá.

Hili pē ʻeku aʻu ki he ngāue ʻi ha falemahaki faitafá ʻi he feituʻu Mekong Delta, ʻi Dong Tam, naʻe tau ange ha ngaahi helikopeta ʻoku fonu ʻi he kau lavelaveá. Naʻá ku mamahiʻi-fonua ʻaupito mo ʻofa he ngāué, ko ia naʻá ku loto ke tokoni he taimi pē ko iá. Naʻe teuteuʻi ʻa e kau laveá pea leleakiʻi leva ki ha kiʻi loki koniteina ʻea fakamokomoko ʻa ia naʻe ngāueʻaki ia ko e loki tafá. Naʻe ʻi ai ha toketā faitafa, toketā fakamohe, neesi tokoni, mo ha neesi fetongi naʻa nau feʻefiʻefihi ʻi ha kiʻi loki, ʻo fai honau lelei tahá ke fakahaofi ʻa e ngaahi moʻuí. Naʻá ku fakatokangaʻi atu ha ngaahi uta ko ha ngaahi tangai milemila ʻuliʻuli naʻe teʻeki ai fakahifo mai mei he ngaahi helikopetá. Naʻe tala mai kiate au ko e ngaahi tangai ko iá ko e ngaahi kongokonga ia ʻo e sino ʻo e kau sōtia ne nau mate ʻi he taú. Ko ʻeku kamata ia ʻi he taú.

ʻI heʻeku kei siʻí, naʻe ʻi ai ʻeku kiʻi ʻilo ki he moʻoni naʻe akoʻi ʻe he Kau Fakamoʻoni ʻa Sihová. Naʻe ako Tohi Tapu siʻeku fineʻeikí mo e Kau Fakamoʻoní ka  naʻe ʻikai te ne fakalakalaka ki he papitaisó. Naʻá ku fiefia ʻaupito ʻi he kau he ako ʻeku fineʻeikí. ʻI he taimi nai ko iá, naʻá ku fakalaka atu mo ʻeku tamai-uá ʻi ha Fale Fakatahaʻanga. Naʻá ku ʻeke ange kiate ia, “Ko e hā ē?” Naʻá ne pehē mai, “ʻOua ʻaupito naʻá ke fakaofiofi ki he kakai ko iá!” Koeʻuhí naʻá ku ʻofa mo falala ki heʻeku tamai-uá, naʻá ku fai ki heʻene faleʻí. Ko ia ai, naʻe ʻikai ke u toe fetuʻutaki mo e Kau Fakamoʻoni ʻa Sihová.

Hili ʻeku foki mai mei Vietinemí, naʻá ku ongoʻi ʻa e fiemaʻu ki heʻeku moʻuí ʻa e ʻOtuá. Naʻe hanga ʻe he ngaahi manatu tamakí ʻo lōmekina fakaeongo au. Naʻe hā ngali naʻe ʻikai mahinoʻi moʻoni ʻe ha taha ʻa e meʻa naʻe hoko ʻi Vietinemí. ʻOku ou manatu ai ki he laka fakahāhā ʻa ia naʻe ui ai ʻe he kau laká ʻa e kau sōtia ʻAmeliká ko e kau tāmate pēpē koeʻuhí ko e ngaahi lipooti fekauʻaki mo hono tamateʻi ʻo e fānau tonuhiá ʻi he taú.

Ke fakalato ʻeku fiekaia fakalaumālié, naʻe kamata ke u maʻu lotu ʻi he ngaahi siasi kehekehe. Naʻá ku ʻofa maʻu pē ki he ʻOtuá ka naʻe ʻikai maongo ia kiate au ʻi he ngaahi lotu kehé. Fakaʻosí, naʻe iku ʻou ʻalu ki ha Fale Fakatahaʻanga ʻo e Kau Fakamoʻoni ʻa Sihová ʻi Delray Beach, Fololita. Naʻe hoko eni ʻi he ʻaho Sāpate ʻo Fepueli 1971.

ʻI heʻeku hū atú, ko e meimei ʻosi ia ʻa e malanga maʻá e kakaí, ko ia naʻá ku nofo ai pē ki he ako Taua Leʻo. ʻOku ʻikai te u manatuʻi ʻa e kaveinga naʻe lāulea ki aí, ka ʻoku ou kei manatuʻi ʻa e fānau īkí ʻi heʻenau huke ʻa e Tohi Tapú ke kumi ʻa e ngaahi konga tohí. Naʻe maongo moʻoni ia kiate au! Naʻá ku fanongo mo mamata fakalongolongo pē. ʻI heʻeku mavahe mei he Fale Fakatahaʻangá, naʻe fakaofiofi mai ha tokoua ʻofeina ʻa ia naʻá ne taʻu 80 nai. Ko hono hingoá ko Jim Gardner. Naʻá ne ʻomai ha tohi naʻe fakakaveinga Ko e Moʻoni ʻa Ia ʻOku Fakatau ki he Moʻui Taʻengata peá ne ʻeke mai, “Kātaki te ke saiʻia ke maʻu eni?” Naʻá ma fokotuʻu ʻa e pongipongi Tuʻapulelulú ke fakahoko ai ʻema ʻuluaki ako Tohi Tapú.

Naʻe pau ke u ngāue ʻi he pō Sāpate ko iá. Naʻá ku ngāue ʻi ha falemahaki ʻi Boca Raton, Fololita, ʻa ia naʻá ku ngāue ai ʻi he loki ki he ngaahi meʻa fakavavevavé. Naʻá ku ngāue mei he 11:00 poʻulí ki he 7:00 pongipongí. Koeʻuhí naʻe ʻikai fuʻu lahi ʻa e ngāué, naʻe malava ai ke u lau ʻa e tohi Moʻoní. Naʻe fakaofiofi mai ha neesi māʻolunga ʻo ne hamusi ʻa e tohí mei hoku nimá ʻo sio ki he takafí peá ne kaila, “Te ke hoko ko ha taha ʻo kinautolu, ʻikai ko ia?” Naʻa ku hamusi mai ʻeku tohí peá u pehē ange, “Ko e vaeua pē eni ʻeku lau ʻa e tohí, ka ko e moʻoni ʻoku hangē ʻe peheé!” Naʻá ne mavahe leva, pea naʻá ku lau fakaʻosi ʻa e tohí ʻi he pō ko iá.

Naʻe kamata ʻeku ʻuluaki ako Tohi Tapú mo Tokoua Gardner ʻaki ʻeku ʻeke ange, “Ko ia, ko e hā ʻa e meʻa te ta akó?” Naʻá ne tali mai, “Ko e tohi ko ia naʻá ku ʻoatú.” Naʻá ku pehē ange, “Kuo ʻosi ia heʻeku lau.” Naʻe tali anga-ʻofa mai ʻa Tokoua Gardner, “Sai, ta lāulea pē ʻi he vahe ʻuluakí.” Naʻá ku ʻohovale ʻi he lahi ʻo e ngaahi meʻa naʻe ʻikai ke u ʻiló. Naʻá ne ʻai ke u kumi ʻa e ngaahi konga Tohi Tapu lahi ʻi heʻeku Tohi Tapu lanu kulokula King James. Naʻe faai atu pē ʻou ako fekauʻaki mo e ʻOtua moʻoní, ʻa Sihova. Naʻá ku ako mo Tokoua Gardner ʻa ia naʻá ku ui anga-ʻofa ia ko Jim, ʻa e vahe ʻe tolu ʻo e tohi Moʻoní ʻi he pongipongi ko iá. Talu mei ai mo  ʻema ako ʻa e vahe ʻe tolu ʻi he pongipongi Tuʻapulelulu kotoa pē. Naʻá ku fiefia ʻaupito ʻi he ngaahi ako ko iá. Ko ha monū ia ke akoʻi au ʻe ha tokoua pani ʻa ia naʻá ne ʻiloʻi lelei ʻa Charles T. Russell!

Hili ha ngaahi uike siʻi, naʻe tali ke u hoko ko ha tokotaha malanga ʻo e ongoongo leleí. Naʻe tokoni mai ʻa Jim ki heʻeku ngaahi hohaʻá, ʻo kau ai ʻa e pole ʻo e ngāue fakafaifekau fale-ki-he-falé. (Ngā. 20:20) ʻI he taimi naʻá ku ngāue fakataha ai mo Jim, naʻe kamata ke u fiefia ʻi he ngāue fakamalangá. ʻOku ou kei vakai ki he ngāue fakafaifekaú ko hoku monū lahi tahá ia. He meʻa fakafiefia ē ke hoko ko e kaungāngāue ʻo e ʻOtuá!—1 Kol. 3:9.

Tuku ke u talanoa atu fekauʻaki mo ha meʻa mātuʻaki fakafoʻituitui—ko ʻeku ʻuluaki ʻofá kia Sihova. (Fkh. 2:4) Kuo tokoniʻi au ʻe he ʻofa ko ia kia Sihová ke fekuki ai mo e ngaahi manatu tamaki ki he taimi taú pea pehē ki he ngaahi ʻahiʻahi lahi kehe.—ʻAi. 65:17.

ʻOku ou manatuʻi ha ʻaho fakangalongataʻa ʻi he faʻahitaʻu failau ʻo e 1971. Naʻe toki tuli au mei he fale nofo totongi naʻe fakaʻatā heʻeku ongo mātuʻá ke u nofo aí. Naʻe ʻikai loto ʻeku tamai-uá ke nofo ha taha ʻo e Kau Fakamoʻoni ʻa Sihová ʻi hono ʻapí! Naʻe ʻikai lahi ʻeku paʻangá ʻi he taimi ko iá. Naʻá ku vahe fakauike ua mei he falemahaki naʻá ku ngāue aí, pea naʻá ku toki fakamole ʻa e meimei kotoa ʻeku vahé ʻi he fakatau mai hoku vala koeʻuhí ke u lava ʻo kau ʻi he ngāue fakafaifekaú mo fakafofongaʻi lelei ʻa Sihova. Naʻe ʻi ai pē ʻeku kiʻi paʻanga naʻe tātānaki, ka naʻe fakahū ia ʻi he pangikē ʻi Michigan, ʻa e siteiti naʻá ku tupu hake aí. Ko ia naʻe pau ai ke u nofo pē ʻi heʻeku meʻalelé ʻi ha ngaahi ʻaho siʻi. Naʻá ku tele kava mo teuteu ʻi he fale kaukau ʻi he pausá.

ʻI he ʻaho ʻe taha lolotonga ʻa e taimi naʻá ku nofo ai ʻi heʻeku meʻalelé, naʻá ku aʻu ai ki he Fale Fakatahaʻangá ʻi ha ngaahi houa ki muʻa ke fakataha ʻa e kulupú ki he ngāue fakamalangá. Naʻá ku toki  tuku ngāue mai mei he falemahakí. ʻI heʻeku tangutu ʻi mui ʻi he Fale Fakatahaʻangá ʻi he feituʻu naʻe ʻikai lava ke sio mai ha tahá, ko e ngaahi manatu fekauʻaki mo Vietinemí—ko e nanamu hono tutu ʻo e sino ʻo e tangatá pea mo e sioloto ki he totó mo e tāmaté—naʻe kamata ke ne lōmekina au. ʻI hoku ʻatamaí, naʻe lava ke u fanongo mo sio lelei ki he kōlenga mai ʻa e kau talavoú, “Te u moʻui? Te u moʻui?” Naʻá ku ʻiloʻi te nau mate, ka naʻá ku feinga ke fakafiemālieʻi kinautolu ʻi he lelei taha te u ala lavá mo feinga ke ʻoua ʻe hā atu ʻa e moʻoní mei hoku matá. ʻI heʻeku tangutu aí, naʻá ku loto-mamahi lahi.

Naʻá ku lotu ʻi he loʻimataʻia. (Saame 56:8) Naʻe kamata ke u fakakaukau lahi fekauʻaki mo e ʻamanaki ʻo e toetuʻú. Naʻe maongo leva ia ki hoku lotó: Fakafou ʻi he toetuʻú, ʻe toʻo atu ʻe Sihova ko e ʻOtuá ʻa e ngaahi tāmate tavale kotoa naʻá ku sio aí mo e loto-mamahi naʻá ku hokosia mo e niʻihi kehé. ʻE toe fokotuʻu hake ʻe he ʻOtuá ʻa e kau talavou ko ení, pea te nau maʻu ʻa e faingamālie ke ako ʻa e moʻoni fekauʻaki mo iá. (Ngā. 24:15) ʻI he taimi ko iá, naʻe fonu hoku lotó ʻi he ʻofa kia Sihová ʻa ia naʻe maongo moʻoni ia ki heʻeku moʻuí. ʻOku kei fakangalongataʻa pē ʻa e ʻaho ko iá kiate au. Talu mei ai, kuó u fai hoku lelei tahá, ke ʻoua ʻaupito ʻe mole ʻeku ʻuluaki ʻofa kia Sihová, tautefito ʻi he taimi ʻoku ou fehangahangai ai mo e ngaahi ʻahiʻahí mo e faingataʻá.

ʻI he taú, ʻoku fai ai ʻe he kakaí ʻa e ngaahi meʻa fakalilifu. Naʻe ʻikai te u hao mei ai. Ka kuo tokoniʻi au ʻi he fakalaulauloto ki he ongo konga Tohi Tapu ʻoku ou manako aí. ʻUluakí, ko e Fakahā 12:10, 11, ʻa ia ʻoku pehē ai ʻoku ikuʻi ʻa e Tēvoló ʻo ʻikai ko ʻetau faifakamoʻoní pē kae toe pehē ki he taʻataʻa ʻo e Lamí. Uá, ko e Kalētia 2:20. ʻI he veesi ko iá, ʻoku ou ʻiloʻi ai naʻe pekia ʻa Kalaisi koeʻuhi “ko au.” ʻOku vakai hifo ʻa Sihova kiate au fakafou ʻi he taʻataʻa ʻo Sīsuú, pea kuó Ne fakamolemoleʻi au ʻi he meʻa naʻá ku faí. Ko hono ʻiloʻi ʻa e moʻoniʻi meʻa ko iá kuó ne ʻai au ke u maʻu ha konisēnisi maʻa pea kuó ne ueʻi au ke u fai ʻa e meʻa kotoa te u malavá ke tokoniʻi ʻa e niʻihi kehé ke nau ʻilo ʻa e moʻoni fekauʻaki mo hotau ʻOtua meesi ko Sihová!—Hep. 9:14.

ʻI heʻeku fakakaukau atu ki heʻeku moʻuí, ʻoku ou houngaʻia loloto ʻi hono tokangaʻi maʻu pē au ʻe Sihova. Ko e fakatātaá, ko e ʻaho pē naʻe ʻiloʻi ai ʻe Jim naʻá ku nofo pē ʻi heʻeku meʻalelé, naʻá ne ʻai au ke u fetuʻutaki ki ha tuofefine naʻe ʻi ai hono fale nofo totongi. ʻOku ou tui moʻoni naʻe ngāueʻaki ʻe Sihova ʻa Jim pea mo e siʻi tuofefine ko iá ke tokonaki mai ha nofoʻanga lelei ke u nofo ai. ʻOku anga-lelei ʻaupito ʻa Sihova! ʻOkú ne tokangaʻi ʻene kau lotu faitōnungá.

ʻI Mē 1971, naʻe fiemaʻu ai ke u ʻalu ki Michigan ke tokangaʻi ha meʻa fakapisinisi. Ki muʻa ke u mavahe mei he Fakatahaʻanga Delray Beach ʻi Fololitá, naʻá ku fakafonu ʻa e puti ʻeku meʻalelé ʻi he ʻū tohí peá u fononga fakatokelau leva ʻi he hala lahí. Naʻe ʻosi pē ʻa e ʻū tohí ʻoku teʻeki ai ke vaeua ʻeku fonongá. Naʻá ku malangaʻi faivelenga ʻa e ongoongo lelei ʻo e Puleʻangá ʻi ha faʻahinga feituʻu pē. Naʻá ku afe ʻi he ngaahi pilīsoné pea aʻu ʻou tufa ʻa e ngaahi tuleki ki he kau tangata ʻi he ngaahi feituʻu mālōlōʻangá. ʻI he aʻu mai ki he ʻaho ní, ʻoku ou fifili pe naʻe tupu nai ʻa e ngaahi tenga ko ia naʻe toó.—1 Kol. 3:6, 7.

Kae kehe, te u tala moʻoni atu, ko e taimi ko ia naʻá ku fuofua ako ai ʻa e moʻoní, naʻe ʻikai te u fuʻu fakapotopoto, tautefito ʻi he taimi naʻá ku talanoa ai ki hoku fāmilí tonu. Koeʻuhí ko e fuʻu mālohi fau ʻeku ʻuluaki ʻofa kia Sihová, naʻá ku malanga loto-toʻa kae fuʻu hangatonu kia kinautolu. Naʻá ku ʻofa moʻoni ʻi hoku ongo tokouá, ʻa John mo Ron, pea naʻá ku fakamālohiʻi ʻa e moʻoní kia kinaua. Naʻe pau ke u kole fakamolemole ki mui ai koeʻuhi ko ʻeku anga-fefeká. Kae kehe, ʻoku ʻikai ʻaupito tuku ʻeku lotu te na tali ʻa e moʻoní. Talu mei ai, kuo akoʻi au ʻe Sihova, pea kuó u hoko ʻo fakapotopoto ange ʻi he taimi ʻoku ou malanga mo faiako aí.—Kol. 4:6.

Neongo ʻeku manatuʻi lelei ʻeku ʻofa kia Sihová, heʻikai ngalo ʻiate au ʻa e ngaahi ʻofa kehe ʻi heʻeku moʻuí. Ko ʻeku ʻofa hokó ko hoku uaifi ʻofaʻangá, ʻa Susan. Naʻá ku ʻiloʻi ʻoku ou fiemaʻu ha hoa te ne tokoniʻi au ʻi hono fakahoko ʻa e ngāue ʻo e Puleʻangá. Ko ha fefine mālohi fakalaumālie ʻa Susan. ʻOku ou manatuʻi lelei ʻeku ʻaʻahi kiate ia ʻi he taimi naʻá ma kaumeʻa aí. Naʻe tangutu mai ʻa Susan ʻi he fakafaletolo ʻi muʻa he ʻapi ʻene ongo mātuʻá ʻi Cranston, Rhode Island. Naʻá ne lau ʻa e Taua Leʻo fakataha mo ʻene Tohi Tapú. Ko e meʻa naʻe maongo kiate aú ko ʻene lau ʻa e taha ʻo e ngaahi kupu kehé mo kumi ʻa e ngaahi konga Tohi Tapú. Naʻá ku tui, ‘Ko e fefine fakalaumālie eni!’ Naʻá ma mali ʻi Tīsema 1971, pea ʻoku ou houngaʻia he talu mei aí, kuó ne kei ʻi hoku tafaʻakí ʻo poupouʻi au. Ko e meʻa ʻoku ou houngaʻia moʻoni ai ʻiate iá neongo ʻene ʻofa ʻiate aú, ʻokú ne ʻofa lahi ange kia Sihova.

Naʻe tapuakiʻi au mo Susan ʻaki ʻa e foha ʻe toko ua, ko Jesse mo Paul. ʻI heʻena tupu haké naʻe ʻiate kinaua ʻa Sihova. (1 Sām. 3:19) Koeʻuhí naʻá na ʻai ʻa e moʻoní ko ʻena meʻa, naʻá na ʻai au mo Susan ke ma fiefia. Kuo hokohoko atu ʻena tauhi kia Sihová koeʻuhí ko ʻena manatua ʻena ʻuluaki ʻofa kiate iá. Ko kinaua fakatouʻosi kuó na ngāue taimi-kakato ʻo laka hake eni ʻi he taʻu ʻe 20. Pehē foki, ʻoku ou laukauʻaki hoku ongo ʻofefine fakaʻofoʻofa ʻi he fonó, ʻa Stephanie mo Racquel, ʻa ia ʻoku ou vakai  kia kinaua ʻo hangē pē haku ongo ʻofefiné. ʻOku fakatou mali hoku ongo fohá ki he ongo fefine fakalaumālie ʻa ia ʻokú na ʻofa kia Sihova ko e ʻOtuá ʻaki hona lotó mo e moʻuí kotoa.—ʻEf. 6:6.

Hili ʻeku papitaisó, naʻá ku ngāue ʻi he taʻu nai ʻe 16 ʻi Rhode Island, ʻa ia ko e feituʻu eni ne u fakatupulekina ai ha ngaahi kaumeʻa mahuʻinga. Kuó u maʻu ha ngaahi manatu melie fekauʻaki mo e kau mātuʻa lelei ʻaupito naʻa mau ngāue fakataha. Tānaki atu ki aí, ʻoku ou houngaʻia ʻi he kau ʻovasia fefonongaʻaki taʻefaʻalaua kuo nau hoko ko e tākiekina lelei kiate au. Ko ha monū lahi ē ke ngāue fakataha mo e kau tangata kuo nau tauhi maʻu ʻenau ʻuluaki ʻofá kia Sihova! ʻI he 1987 naʻá ma hiki ki North Carolina ke ngāue ʻi he feituʻu ʻoku lahi ange ai ʻa e fiemaʻú, pea naʻá ma toe fakatupulekina ai ha ngaahi vahaʻangatae mahuʻinga. *

ʻI ʻAokosi 2002, naʻá ku tali ai mo Susan ʻa e fakaafe ke hoko ko e konga ʻo e fāmili Pēteli ʻi Patterson ʻi ʻAmeliká. Naʻá ku ngāue ʻi he Potungāue Ngāué pea ko Susan ʻi he fale foó. Naʻá ne saiʻia ʻaupito he ngāue aí! ʻI ʻAokosi 2005 leva, naʻá ku maʻu ʻa e monū ʻo e hoko ko ha mēmipa ʻi he Kulupu Pulé. Naʻá ku ongoʻi ko e ngāue ko ení ko ha fuʻu monū lahi ia kiate au. Naʻe ongoʻi taulōfuʻu siʻoku hoku uaifí ʻi he fakakaukau atu ki he meʻa ʻoku kau ki he fatongia ko ení, ʻa e ngāué mo e fefolauʻakí. Kuo ʻikai ʻaupito fiemālie ʻa Susan ʻi he puna vakapuná, ka ʻoku lahi ʻema fepunaʻakí! ʻOku pehē ʻe Susan ko e ngaahi fakaongoongolelei anga-ʻofa mei he ngaahi uaifi kehe ʻo e kau mēmipa ʻo e Kulupu Pulé, kuó ne tokoniʻi ai ia ke ne fakapapauʻi ke poupouʻi au ʻi he lahi taha ʻe ala lavá. Kuó ne fakahoko moʻoni ia pea ʻoku ou ʻofa ʻiate ia ʻi heʻene fai peheé.

ʻI hoku ʻofisí ʻoku tuku takatakai ai ʻa e ʻū tā ʻoku mātuʻaki mahuʻinga kiate au! ʻOku nau fakamanatu mai kiate au ʻa e fiefia lahi kuó u maʻu ʻi he moʻuí. Kuó u ʻosi maʻu ʻa e tāpuaki fakaofo lahi ʻi hono fai hoku lelei tahá ke manatua ʻeku ʻuluaki ʻofá kia Sihova!