KO HONO tātaaʻi atu pē hono umá, ʻoku kamata leva ʻe Kingsley ʻene lau Tohi Tapú—ʻa ʻene ʻuluaki konga ʻi he Ako Fakafaifekau Fakateokalatí ʻi he fakatahaʻangá. Naʻá ne puʻaki lelei ʻa e foʻi lea taki taha, ʻo ʻikai liʻaki ha foʻi lea. Kae ʻoleva angé! Ko e hā ʻoku ʻikai ke ne sio ai ki heʻene Tohi Tapú?

Ko Kingsley, ʻoku nofo ʻi Suli Langikā, ʻokú ne kui. ʻOku kovi foki ʻene fanongó pea ʻokú ne fiemaʻu ha saliote ke ʻalu holo ai. Naʻe anga-fēfē ʻa e ako ʻa e tangatá ni fekauʻaki mo Sihová pea taau ke kau ʻi he Ako Fakafaifekau Fakateokalatí? Tuku ke u fakamatalaʻi atu.

ʻI heʻeku ʻuluaki fetaulaki mo Kingsley, naʻe maongo kiate au ʻa e anga ʻo ʻene fieinua ki he moʻoni Fakatohitapú. Naʻá ne ʻosi ako Tohi Tapu mo e Kau Fakamoʻoni ʻa Sihová, pea ko ʻene tohi maʻá e kau kuí ko e tohi ʻIlo ʻA Ia ʻOku Taki Atu ki he Moʻui Taʻengatá kuo motuʻa ʻaupito. a Naʻá ne tali ʻeku fakaafe ke toe hoko atu ʻene akó, ka naʻá ma fehangahangai mo ha pole ʻe ua.

ʻUluakí, naʻe nofo ʻa Kingsley mo e niʻihi kehe ʻi ha ʻapi tauhiʻanga vaivai pea ʻoku ʻi ai mo e kau faingataʻaʻia fakaesino. Koeʻuhi ko e longoaʻa ʻa e ʻātakaí mo e ʻikai lelei ʻa e fanongo ʻa Kingsley, naʻe pau ke u lea leʻo-lahi ange. Ko hono moʻoní, ko e tokotaha kotoa ʻi he ʻapí naʻe malava ke nau fanongo ki heʻema ako fakauiké!

 Uá, naʻe malava ʻa Kingsley ke lautohi mo mahinoʻi pē ʻa e fakamatala foʻou siʻisiʻi lolotonga ʻa e ako taki taha. Ke ʻai ʻema akó ke ola lelei angé, naʻe teuteu lelei ʻa Kingsley. Ki muʻa ʻi he akó, naʻá ne lau mo toutou lau ʻa e fakamatala ki he akó, kumi ʻa e ngaahi konga Tohi Tapú ʻi heʻene Tohi Tapu maʻá e kau kuí, pea faʻu leva ʻi hono ʻatamaí ʻa e tali ki he ngaahi fehuʻí. Ko e founga ko ení naʻe fakamoʻoniʻi ʻoku mātuʻaki ola lelei. Lolotonga ʻema akó, naʻá ne tangutu fakataʻane ʻo toutou tātaaʻi fiefia ʻa e falikí lolotonga ʻene fakamatalaʻi leʻo-lahi ʻaupito ʻa e meʻa naʻá ne akó. ʻIkai fuoloa, naʻá ma ako tuʻo ua he uike, pea ko e ako taki taha naʻe houa ʻe ua!

Naʻe vēkeveke ʻa Kingsley ke maʻu ʻa e ngaahi fakataha ʻi he Fale Fakatahaʻangá, ka naʻe ʻikai ke faingofua eni. Naʻá ne fiemaʻu ʻa e tokoni ke heka mo hifo mei heʻene salioté, kaá, mo hū ki he Fale Fakatahaʻangá. Ka ko e tokolahi ʻi he fakatahaʻangá naʻa nau taufetongi ʻi he tokoni kiate iá, ʻo lau ia ko ha monū ke fai pehē. Lolotonga ʻa e ngaahi fakatahá, naʻe pukepuke ʻe Kingsley ha meʻa fakaleʻolahi ʻo ofi ki hono telingá, ke ne fanongo lelei mo fai ha tali!

Hili ʻene ako ʻi ha kiʻi taimi, naʻe fili ʻa Kingsley ke kau ʻi he Ako Fakafaifekau Fakateokalatí. ʻI he uike ʻe ua ki muʻa ʻi heʻene ʻuluaki lau Tohi Tapú, naʻá ku ʻeke ange pe kuó ne ʻosi ʻahiʻahiʻi ia. Naʻá ne fakapapauʻi mai, “ʻIo, Tokoua, kuó u ʻosi ʻahiʻahiʻi tuʻo 30 nai ia.” Naʻá ku fakaongoongoleleiʻi ia ʻi heʻene ngaahi feingá pea kole ange ke u fanongo ki ai. Naʻá ne fakaava ʻene Tohi Tapú, hili hono nimá ʻi he tohi maʻá e kau kuí, pea kamata lau ia. Kae kehe, naʻá ku fakatokangaʻi naʻe ʻikai ngaue hono nimá ʻo hangē ko ia ko e anga-mahení. Kuó ne maʻuloto kotoa ʻa e veesi te ne laú!

ʻI he lele hifo hoku loʻimatá ʻi hoku kouʻahé, naʻe ʻikai ke u tui ki he meʻa naʻá ku sio ki aí. Naʻá ku ʻeke ange kia Kingsley ʻa e founga naʻe malava ai ke ne manatuʻi lelei ia hili ʻene ʻahiʻahiʻi tuʻo 30 pē. Naʻá ne pehē: “ʻIkai, naʻá ku ʻahiʻahiʻi tuʻo 30 nai ia ʻi he ʻaho taki taha.” Laka hake ʻi he māhina ʻe taha, naʻe tangutu ʻa Kingsley ʻi he falikí, ʻo lau mo toe lau ʻa e konga tohí kae ʻoua kuó ne maʻuloto ia.

Naʻe aʻu mai eni ki he ʻaho ke fai ai ʻene kongá ʻi he Fale Fakatahaʻangá. ʻI he ʻosi ʻa e konga ʻa Kingsley, naʻe pasipasi fiefia ʻa e fakatahaʻangá, pea tangi mo e tokolahi ʻi he loto-toʻa ʻa e tokotaha ako foʻou ko ení. Ko e tokotaha malanga ʻe taha, kuo ʻikai te ne kei kau ʻi he akó koeʻuhí ko e manavasiʻí, naʻá ke kole ke ne toe kau ki he akó. Ko e hā hono ʻuhingá? Naʻá ne pehē, “Kapau ʻoku lava ia ʻe Kingsley, te u lava mo au!”

ʻI Sepitema 6, 2008, hili ʻene ako ʻa e Tohi Tapú ʻi he taʻu ʻe tolu, naʻe fakahāhā ʻe Kingsley ʻene fakatapui kia Sihová ʻaki ʻene papitaiso. Ko ha Fakamoʻoni mateaki ia ʻo aʻu ki heʻene mate ʻi Mē 13, 2014, ʻi he māmani Palataisí naʻe falala-pau ʻa Kingsley te ne hokohoko atu ʻene ngāue faitōnungá ʻi he mālohi fakaʻaufuli mo e moʻui haohaoa. (ʻAi. 35:5, 6)—Fakamatala fai ʻe Paul McManus.