1. Ko e hā naʻe pehē ai ʻe Paula “ko Kalaisi ko e mālohi ia ʻo e ʻOtuá”?

 NAʻE fakahaaʻi ʻe Sihova hono mālohí fakafou ʻia Sīsū Kalaisi ʻi ha ngaahi founga fakaofo. ʻI he ʻi māmani ʻa Sīsuú, naʻá ne fakahoko ha ngaahi mana. ʻE lava ke tau lau ʻa e niʻihi ʻo kinautolu ʻi he Tohi Tapú, pea ʻe lava ke fakaivimālohiʻi ai ʻetau tuí. (Māt. 9:35; Luke 9:11) ʻIo, naʻe ʻoange ʻe Sihova kia Sīsū ʻa e mālohi lahi, ʻo lava ai ʻa e ʻapositolo ko Paulá ke ne pehē: “Ko Kalaisi ko e mālohi ia ʻo e ʻOtuá.” (1 Kol. 1:24) Ka ʻoku anga-fēfē ʻa e kaunga kia kitautolu ʻa e ngaahi mana ʻa Sīsuú?

2. Ko e hā ʻe lava ke tau ako mei he ngaahi mana ʻa Sīsuú?

² ʻOku pehē ʻe he ʻapositolo ko Pitá naʻe fakahoko ʻe Sīsū ʻa e “ngaahi meʻa fakaofo,” pe ngaahi mana. (Ngā. 2:22) Ko e hā ʻoku akoʻi mai ʻe he ngaahi mana ko ení? ʻOku nau akoʻi mai ʻa e meʻa ʻe fai ʻe Sīsū he lolotonga ʻene Pule Taʻu ʻe Afé. ʻI he taimi ko iá, te ne fakahoko ha ngaahi mana lahi ange ʻa ia ʻe ʻaonga ki he kotoa ʻo e faʻahinga ʻo e tangatá ʻi he māmaní. ʻOku toe tokoniʻi kitautolu ʻe heʻene ngaahi maná ke tau mahinoʻi lahi ʻa hono ngaahi ʻulungāngá mo e ngaahi ʻulungaanga ʻene Tamaí. ʻI he kupu ko ení, te tau lāulea ai ki ha mana ʻe tolu ʻa Sīsū, pea te tau ako ai ki he anga ʻo ʻene kaunga kia kitautolu he ʻaho ní pea ʻi he kahaʻú.

3. (a) Ko e hā naʻe fakahoko ai ʻe Sīsū ʻene ʻuluaki maná? (e) Naʻe fakahāhā fēfē ʻe Sīsū ʻa e nima-homó ʻi Kena?

³ Naʻe fakahoko ʻe Sīsū ʻene ʻuluaki maná ʻi ha mali ʻi Kena. ʻOku ʻikai ke tau ʻilo ʻa e ʻuhingá, ka naʻe ʻikai ke feʻunga ʻa e uainé ki he kotoa ʻo e kau fakaafe naʻe haʻú. Naʻe mei ngalivale ʻaupito eni ki he ongo meʻa mali foʻoú, koeʻuhí he ko hona fatongia ia ke talitali lelei ʻa e kakaí. Ko Mele, faʻē ʻa Sīsū, naʻe kau ʻi he kau fakaafé. Ko ʻene kole kia Sīsū ke tokoní koeʻuhí ko ʻene tui naʻe maʻu ʻe Sīsū ʻa e mālohi ke fai pehē? He ko ē, kuo pau pē naʻe fakakaukauloto ʻa Mele ki he kotoa ʻo e ngaahi kikite fekauʻaki mo hono fohá, pea naʻá ne ʻiloʻi ʻe ui ia ko e “ʻAlo ʻo e Fungani Māʻolungá.” (Luke 1:30-32; 2:52) Ko e meʻa ʻoku hā mahinó naʻe fakatou loto ʻa Mele mo Sīsū ke tokoni ki he ongo meʻa malí. Ko ia naʻe liliu fakaemana ʻe Sīsū ʻa e vai lita nai ʻe 380 (kālani ʻe 100) ki he “uaine leleí.” (Lau ʻa e Sione 2:3, 6-11.) Naʻe pau ke fakahoko ʻe Sīsū ʻa e mana ko ení? ʻIkai. Naʻá ne fai iá koeʻuhí naʻá ne tokanga ki he kakaí, pea naʻá ne faʻifaʻitaki ki heʻene Tamaí, ʻa ia ʻokú ne nima-homo.

4, 5. (a) Ko e hā ʻoku akoʻi mai ʻe he ʻuluaki mana ʻa Sīsuú? (e) Ko e hā ʻoku akoʻi mai ʻe he mana ʻi Kená fekauʻaki mo e kahaʻú?

⁴ Naʻe tokonaki fakaemana ʻe Sīsū ha uaine lelei lahi, ʻo feʻunga ki ha fuʻu tokolahi. ʻOkú ke sio ki he meʻa ʻoku akoʻi mai ʻe he mana ko ení? ʻOku ʻikai ke nima-maʻu ʻa Sihova mo Sīsū, ka ʻokú na nima-homo ʻaupito. ʻOku fakatuipauʻi kitautolu ʻe he mana ko ení ʻokú na tokanga ʻaupito ki he ngaahi ongoʻi ʻa e kakaí. ʻOku toe fakahaaʻi ai ʻe ngāueʻaki ʻe Sihova hono mālohí ke tokonaki mai ha meʻakai lahi ʻi he māmani foʻoú, ʻo tatau ai pē pe ko fē ʻa e feituʻu ʻoku tau nofo ai ʻi he māmaní.—Lau ʻa e ʻAisea 25:6.

⁵ Fakakaukau ki ai! ʻE vavé ni ke ʻomai ʻe Sihova ʻa e meʻa kotoa ʻoku tau fiemaʻu moʻoní. Ko e tokotaha taki taha ʻe ʻi ai hono ʻapi fakaʻofoʻofa mo e meʻakai lelei. ʻOku tau ongoʻi houngaʻia ʻaupito ʻi heʻetau fakakaukau atu ki he kotoa ʻo e ngaahi meʻa lelei ʻe foaki nima-homo mai ʻe Sihova ʻi he māmani Palataisí.

6. Naʻe anga-fēfē hono ngāueʻaki maʻu pē ʻe Sīsū hono mālohí, pea ʻe lava fēfē ke tau faʻifaʻitaki kiate ia?

⁶ Naʻe ʻikai ʻaupito ngāueʻaki ʻe Sīsū hono mālohí ʻi ha ngaahi ʻuhinga siokita. Fakakaukau ki he meʻa naʻe hoko ʻi he taimi naʻe ʻahiʻahiʻi ai ʻe he Tēvoló ʻa Sīsū ke liliu ʻa e ngaahi maká ko e ngaahi foʻi mā. Naʻe fakafisi ʻa Sīsū ke ngāueʻaki hono mālohí ke maʻu ai haʻane lelei. (Māt. 4:2-4) Ka naʻe loto-lelei ʻa Sīsū ke ngāueʻaki hono mālohí ke tokoniʻi ʻa e niʻihi kehé. ʻE lava fēfē ke tau faʻifaʻitaki ki heʻene tōʻonga taʻesiokitá? Naʻe pehē ʻe Sīsū ʻoku totonu ke tau “hanganaki foaki.” (Luke 6:38) ʻE lava ke tau fai eni ʻaki hono fakaafeʻi ʻa e niʻihi kehé ki hotau ʻapí ki ha houa kai. ʻE lava ke tau toe fakamoleki ʻa e  taimi hili ha fakataha ke tokoni ki ha taha, hangē ko e fanongo ki hano ʻahiʻahiʻi ʻe ha tokoua haʻane konga. Pe ko e malava ke tau ʻoatu ha tokoni ʻaonga mo akoʻi ʻa e niʻihi kehé ʻi he ngāue fakafaifekaú. ʻOku tau faʻifaʻitaki ki he nima-homo ʻa Sīsuú ʻi heʻetau vēkeveke ke tokoniʻi ʻa e niʻihi kehé ʻi ha taimi pē te tau malava aí.

7. Ko e hā ʻe hoko maʻu pē ko ha palopalema ʻi he māmani ʻo Sētané?

⁷ Ko e masivá ʻoku ʻikai ko ha palopalema foʻou. Naʻe tala ʻe Sihova ki he kau ʻIsilelí “talaʻehai ʻe ʻosi ʻa e masiva mei he lotolotonga ʻo e fonua.” (Teu. 15:11) ʻI he taʻu ʻe lauingeau ki mui ai, naʻe pehē ʻe Sīsū: “ʻOku ʻiate kimoutolu maʻu pē ʻa e kau masivá.” (Māt. 26:11) Naʻe ʻuhinga ʻa Sīsuú ʻe ʻi ai maʻu pē ha kau masiva ʻi he māmaní? ʻIkai, naʻá ne ʻuhingá ʻe ʻi ai maʻu pē ʻa e masiva lolotonga ʻetau kei moʻui ʻi he māmani ʻo Sētané. He kehe ē ko e taimi te tau moʻui ai ʻi he māmani foʻoú! ʻI he taimi ko iá, ʻe ʻikai ʻaupito ke toe ʻi ai ha masiva. ʻE lahi fau ʻa e meʻakaí ki he tokotaha kotoa, pea ʻe mākona ʻa e tokotaha kotoa!

8, 9. (a) Ko e hā naʻe fafanga ai ʻe Sīsū ʻa e kakai ʻe laui afé? (e) ʻOku anga-fēfē hoʻo ongoʻi fekauʻaki mo e mana ko ení?

⁸ Naʻe pehē ʻe he tokotaha-tohi-sāmé fekauʻaki mo Sihova: “ʻOku ke folahi ho nima, pea ke fakamakona ʻa e holi ʻa e meʻa moʻui kotoa.” (Saame 145:16) ʻI he taimi naʻe ʻi māmani ai ʻa Sīsuú, naʻá ne faʻifaʻitaki haohaoa ki heʻene Tamaí pea tokanga maʻu pē ki he ngaahi fiemaʻu ʻa e niʻihi kehé. Naʻe ʻikai ke ne fai pē ení ke fakahaaʻi ai naʻá ne maʻu ʻa e mālohi. Naʻá ne tokanga moʻoni ki he kakaí. Tau lāulea angé ki he Mātiu 14:14-21. (Lau.) Naʻe fononga lalo ha fuʻu kakai mei he ngaahi koló ʻo muimui ʻia Sīsū. (Māt. 14:13) ʻI he efiafí, naʻe hohaʻa ʻa e kau ākongá naʻa kuo fiekaia mo tāvaivaia ʻa e kakaí. Ko ia naʻa nau kole ange kia Sīsū ke tukuange ʻa e fuʻu kakaí ke nau ʻalu ʻo fakatau mai haʻanau meʻakai. Ko e hā ʻe fai ʻe Sīsuú?

⁹ Naʻe fafangaʻaki ʻe Sīsū ʻa e foʻi mā pē ʻe nima mo e mataʻiika ʻe ua ʻa e kakai tangata ʻe toko 5,000 nai, tuku kehe ʻa e kakai fefiné mo e fānaú. Ko e hā naʻe fakahoko ai ʻe Sīsū ʻa e mana ko ení? Koeʻuhí naʻá ne ʻofa moʻoni ʻi he kakaí pea tokanga kia kinautolu. Pea kuo pau pē naʻe tokonaki ʻe Sīsū ha fuʻu meʻakai lahi, koeʻuhí ko e fuʻu kakaí naʻa nau “kai kotoa pē ʻo nau mākona.” Ko e meʻakai naʻa nau kaí naʻa nau maʻu ai ʻa e mālohi naʻa nau fiemaʻu ke faiʻaki ʻenau fononga mamaʻo ʻo foki ki ʻapí. (Luke 9:10-17) Pea ʻi he hili ʻa e mākona ʻa e tokotaha kotoa, naʻe fakafonu ʻe he kau ākongá ʻa e kato ʻe 12 ʻaki ʻa e ngaahi toetoengá!

10. ʻI he kahaʻú, ko e hā ʻe hoko ki he masivá?

¹⁰ Koeʻuhí ko e kau pule mānumanu mo taʻefaitotonú, ʻoku moʻui masiva ai ʻa e kakai ʻe laui teau miliona. Naʻa mo e niʻihi hotau fanga tokouá ʻoku ʻikai ke nau maʻu ha meʻakai feʻunga ke kai. Ka ʻoku vavé ni, ke moʻui ʻa e kakai ʻoku talangofua kia Sihová ʻi ha māmani ʻoku ʻikai ke ʻi ai ha taʻefaitotonu pe masiva. Ko Sihova ʻa e ʻOtua māfimafi-aoniú, pea ʻokú ne maʻu ʻa e mālohi mo e holi ke fakapapauʻi ʻoku fakalato ʻa e ngaahi fiemaʻu ʻa e tokotaha kotoa. ʻOkú ne talaʻofa ke fakangata ʻa e faingataʻá ʻi he vave tahá!—Lau ʻa e Saame 72:16.

11. Ko e hā ʻokú ke fakapapauʻi ai ʻe vavé ni ke ngāueʻaki ʻe Kalaisi hono mālohí ki he māmaní kotoa, pea ʻi he hoko iá, ko e hā ʻokú ke loto ke faí?

¹¹ ʻI he taimi naʻe ʻi māmani ai ʻa Sīsuú, naʻá ne fakahoko ʻa e ngaahi mana ʻi ha feituʻu siʻisiʻi he taʻu pē ʻe tolu mo e konga. (Māt. 15:24) Ka ʻi he tuʻunga ko e Tuʻí, ʻe tokoniʻi ʻe Sīsū ʻa e kotoa ʻo e faʻahinga ʻo e tangatá lolotonga ʻene Pule Taʻu ʻe Afé. (Saame 72:8) ʻOku fakapapauʻi mai ʻe he ngaahi  mana ʻa Sīsuú ʻokú ne loto ke ngāueʻaki hono mālohí ki ha lelei maʻa kitautolu. ʻOku ʻikai ke tau maʻu ʻa e mālohi ke fakahoko ha ngaahi mana, ka ko e hā ʻe lava ke tau faí? ʻE lava ke tau ngāueʻaki hotau taimí mo e iví ke tala ki he niʻihi kehé ʻa e kahaʻu fakaofo ʻoku talaʻofa mai ʻe he Tohi Tapú. Ko hotau fatongia ia ʻi he tuʻunga ko e Kau Fakamoʻoni ʻa Sihová. (Loma 1:14, 15) ʻI heʻetau fakalaulauloto ki he meʻa ʻe vavé ni ke fai ʻe Kalaisí, te tau hoko ai ʻo vēkeveke ange ke tala ki he niʻihi kehé ʻa e meʻa ko iá.—Saame 45:1; 49:3.

12. Ko e hā ʻoku lava ai ke tau fakapapauʻi ʻoku mahinoʻi lelei ʻe Sīsū ʻa e ʻātakai ʻo e māmaní?

¹² ʻI he taimi naʻe fakatupu ai ʻe he ʻOtuá ʻa e māmaní mo e meʻa kotoa ʻi aí, ko Sīsuú naʻe “ʻi hono tafaʻaki, ko e tufunga lahi.” (Pal. 8:22, 30, 31; Kol. 1:15-17) Ko ia naʻe mahinoʻi lelei ʻe Sīsū ʻa e ʻātakai ʻo e māmaní. ʻOkú ne ʻiloʻi ʻa e founga ke ngāueʻaki ai mo puleʻi ʻa e kotoa ʻo e ngaahi ʻelemēniti ʻo natulá.

13, 14. ʻOmai ha fakatātā ʻo e founga ʻe lava ke puleʻi ai ʻe Kalaisi ʻa e ngaahi mālohi ʻo natulá?

¹³ ʻI he taimi naʻe ʻi māmani ai ʻa Sīsuú, naʻá ne fakahaaʻi naʻá ne maʻu ʻa e mālohi ʻo e ʻOtuá ʻi heʻene puleʻi ʻa e ngaahi mālohi ʻo natulá. Ko e fakatātaá, fakakaukau ki he anga hono puleʻi ʻe Sīsū ha matangi mālohi. (Lau ʻa e Maʻake 4:37-39.) ʻOku fakamatalaʻi ʻe ha mataotao Tohi Tapu ʻe taha ʻo pehē ko e foʻi lea faka-Kalisi ki he “matangi mālohi” ʻi he tohi Maʻaké ʻoku ngāueʻaki ia ke fakamatalaʻi ha fuʻu matangi mālohi pe afā. ʻOku ʻuhinga ia ki ha matangi ʻoku haʻu fakataha mo e fakapōpōʻuli, taufa mālohi, mana mo e lōvai. ʻI heʻene ʻosí, ʻoku hoko ai ʻa e maumau lahi. ʻOku fakamatalaʻi ʻe he ʻapositolo ko Mātiú ʻa e matangi mālohi ko ení ko ha “fuʻu” matangi.—Māt. 8:24.

¹⁴ Sioloto atu ki he tuʻungá: ʻI he faʻafaʻaki ʻa e peaú ʻi he vaká, ʻoku toutou hake ʻa e vaí ki he vaká. Neongo ʻa e longoaʻa ʻa e matangí pea fepālekina holo ʻa e vaká, naʻe mohe pē ʻa Sīsū koeʻuhí naʻá ne helaʻia. Ka naʻe manavahē ʻa e kau ākongá, ko ia naʻa nau fafangu ʻa Sīsū ʻo pehē: “Te tau mate!” (Māt. 8:25) Naʻe anga-fēfē ʻa e tali ʻa Sīsuú? Naʻá ne mālanga hake ʻo pehē ki he matangí mo e tahí: “ʻEi! Fakalongolongo!” (Mk. 4:39) Naʻe tuʻu ʻa e fuʻu matangí, pea “naʻe hoko ha fuʻu tofukī.” He fakatātā fakaofo ē ʻo e mālohi ʻo Sīsū ke puleʻi ʻa e ngaahi mālohi ʻo natulá!

15. Kuo fakamoʻoniʻi fēfē ʻe Sihova ʻene malava ke puleʻi ʻa e ngaahi mālohi ʻo natulá?

¹⁵ ʻOku haʻu meia Sihova ʻa e mālohi ʻo Kalaisí, ko ia ʻoku tau ʻiloʻi ʻe lava ʻe he ʻOtua Māfimafi-Aoniú ke puleʻi ʻa e ngaahi mālohi ʻo natulá. Ko e fakatātaá, ki muʻa ʻi he Lōmakí, naʻe pehē ʻe Sihova: “ʻOku toe pe ʻa e ʻaho ʻe fitu, pea u fakaʻuha ki he fonua ʻo ʻaho fangofulu mo po fangofulu.” (Sēn. 7:4) Pehē foki, ʻi he ʻEkisoto 14:21, ʻoku tau lau ai: “Naʻe fakatafe atu ʻe Sihova ʻa e tahi ʻaki ʻa e matangi malohi mei hahake.” Pea ʻoku tau lau ʻi he Siona 1:4: “Ka ka tuku atu ʻe Sihova ha matangi lahi ki he tahi, pea naʻe hoko ha fuʻu hou ʻi he tahi, pea naʻe hange ka maumau ʻa e vaka.” ʻOku lelei ʻaupito ke ʻiloʻi ʻi he māmani foʻoú, ʻe puleʻi maʻu pē ʻe Sihova ʻa e ngaahi ʻelemēnití.

16. Ko e hā ʻoku fakafiemālie ai ke ʻiloʻi ʻoku maʻu ʻe Sihova mo Sīsū ʻa e mālohi ke puleʻi ʻa e ngaahi mālohi ʻo natulá?

¹⁶ ʻOku fakafiemālie ke ʻiloʻi ʻoku maʻu ʻe Sihova mo Sīsū ʻa e mālohi ke puleʻi ʻa e ngaahi mālohi ʻo natulá. Lolotonga ʻa e Pule Taʻu ʻe Afe ʻa Kalaisí, ʻe malu ʻa e tokotaha kotoa ʻe moʻui ʻi he māmaní. ʻE ʻikai ha taha ʻe lavea pe tāmateʻi ʻe he ngaahi fakatamaki fakanatulá hangē ko e ngaahi ʻahiohio, sūnami, moʻunga-afi, pe mofuike. ʻE ʻikai ke tau ilifia ki ha ngaahi fakatamaki koeʻuhí “ko e tēniti ʻo e ʻOtuá” ʻe ʻi he faʻahinga ʻo e  tangatá! (Fkh. 21:3, 4) ʻE lava ke tau falala-pau ʻe ʻoange ʻe Sihova kia Sīsū ʻa e mālohi ke puleʻi ʻa e ngaahi mālohi ʻo natulá ʻi he lolotonga ʻene Pule Taʻu ʻe Afé.

17. Ko e hā ʻa e founga ʻe taha ʻe lava ai ke tau faʻifaʻitaki he taimí ni ki he ʻOtuá mo Kalaisi?

¹⁷ Ko e moʻoni, heʻikai lava ke tau taʻofi ʻa e ngaahi fakatamaki fakanatulá. Ko Sihova pē mo Sīsū ʻe lava ke na fai peheé. Ka ʻoku ʻi ai ʻa e meʻa ʻe lava ke tau fai. ʻE lava ke tau ngāueʻaki ʻa e Palōveepi 3:27. (Lau.) ʻI he taimi ʻoku faingataʻaʻia ai hotau fanga tokouá, ʻe lava ke tau tokoni ki hono tokangaʻi ʻenau ngaahi fiemaʻu fakamatelié mo fakaeongó, pea ʻe lava ke tau fakafiemālieʻi kinautolu. (Pal. 17:17) Ko e fakatātaá, te tau tokoni nai kia kinautolu hili ha fakatamaki fakanatula. Naʻe pehē ʻe ha uitou ʻe taha naʻe maumau hono ʻapí hili ha afā: “ʻOku ou houngaʻia moʻoni ke ʻi he kautaha ʻa Sihová, ʻo ʻikai koeʻuhí pē ko e tokoni fakamatelié kae toe pehē foki ki he tokoni fakalaumālié.” Naʻe mole ʻa e ʻamanaki ʻa ha tuofefine teʻeki mali ʻe taha ʻi hono maumauʻi ʻe ha matangi hono ʻapí. Hili hono tokoniʻi ia ʻe he fanga tokouá ke monomono hono ʻapí, naʻá ne pehē: “ʻOku taʻealafakamatalaʻi ia! ʻOku ʻikai malava ke u fakamatalaʻi kakato ʻa e anga ʻeku ongoʻí.” ʻOkú ne tānaki mai: “Mālō Sihova!” ʻOku tau houngaʻia ʻi he tokanga moʻoni ʻa hotau fanga tokouá mo e fanga tuofāfiné ki he ngaahi fiemaʻu ʻa e niʻihi kehé. Mahulu hake ʻi he meʻa ko iá, ʻoku tau houngaʻia ʻi he tokanga moʻoni mai ʻa Sihova mo Sīsū Kalaisi kia kitautolú.

18. Ko e hā ʻoku maongo kiate koe fekauʻaki mo e ʻuhinga naʻe fakahoko ai ʻe Sīsū ʻa e ngaahi maná?

¹⁸ Lolotonga ʻene ngāue fakafaifekaú, naʻe fakamoʻoniʻi ʻe Sīsū “ko e mālohi ia ʻo e ʻOtuá.” Ka naʻe ʻikai ʻaupito ke ne ngāueʻaki hono mālohí ke fiehā ai ki he niʻihi kehé pe ke maʻu ai haʻane lelei. Ka, naʻe ngāueʻaki ʻe Sīsū hono mālohí ke fakahoko ha ngaahi mana koeʻuhí naʻá ne ʻofa moʻoni ʻi he kakaí. Te tau ako lahi ange ki heʻene ʻofá ʻi he kupu hoko maí.