1. Ko e hā ʻa e ngaahi meʻa naʻe hoko ʻi he taʻu 66? (Sio ki he ʻuluaki fakatātā ʻi he kupú ni.)

 SIOLOTO ATU ko ha Kalisitiane koe naʻá ke nofo ʻi Selusalema ʻi he taʻu 66. Naʻe lahi ʻa e meʻa naʻe hoko aí. Ko ha ʻōfisa Loma ko Florus naʻá ne kaihaʻasi ʻa e talēniti ʻe 17 mei he tauhiʻanga paʻanga ʻa e temipalé. Naʻe ʻita leva ʻa e kau Siú. Naʻa nau tāmateʻi ʻa e kau sōtia Loma tokolahi pea talaki ʻenau tauʻatāina mei Lomá. Ka naʻe vave ʻa e ngāue atu ʻa Lomá. ʻI loto ʻi he māhina ʻe tolu, naʻe taki atu ʻe Sesitiuse Kaliuse ʻa e kau sōtia ʻe toko 30,000 ʻo nau ʻātakaiʻi ʻa Selusalema. Naʻe toitoi ʻa e kau angatuʻu Siú ʻi he temipalé, ka naʻe faifai pē ʻo hū atu ʻa e kau sōtia Lomá ʻi he ʻā ʻi tuʻa ʻo e temipalé pea feinga ke hū ki loto. Naʻe kamata ke manavahē ʻa e tokotaha kotoa ʻi he koló. Naʻe mei fēfē hoʻo ongoʻí ʻi hoʻo sio ki he ngaahi meʻa kotoa ko ení?

2. Ko e hā naʻe fiemaʻu ke fai ʻe he kau Kalisitiané ʻi heʻenau sio ki hono ʻātakaiʻi ʻe he kau sōtia Lomá honau koló, pea naʻe malava fēfē eni?

² ʻI he ngaahi taʻu ki muʻa aí, naʻe fakatokanga ʻa Sīsū ki heʻene kau ākongá fekauʻaki mo e meʻa ko ení pea fakahinohinoʻi kinautolu: “ʻI hoʻomou sio kuo ʻātakaiʻi ʻa Selusalema ʻe he kau taú, mou ʻilo leva kuo ofi hono fakaʻauhá. Tuku leva ki he faʻahinga ʻi Siuteá ke nau kamata hola ki he ngaahi moʻungá, tuku ki he faʻahinga  ʻi loto Selusalemá ke nau hiki mei ai, pea tuku ki he faʻahinga ʻi he ngaahi feituʻu ʻutá ke ʻoua te nau hū ki ai.” (Luke 21:20, 21) Naʻe malava fēfē ke nau talangofua ki he fakahinohino ʻa Sīsū ke mavahe mei Selusalema ʻi he taimi naʻe ʻātakaiʻi ai ʻe he kau sōtiá ʻa e koló? Naʻe hoko ha meʻa fakaofo. Naʻe mavahe fakafokifā ʻa e kau tau Lomá mei Selusalema! Hangē ko ia naʻe leaʻaki ʻe Sīsuú, naʻe “fakanounou” ʻa e ʻohofí. (Māt. 24:22) ʻI he mavahe pē ʻa e kau taú, ko e faingamālie eni ki he kau Kalisitiane faitōnungá ke nau talangofua kia Sīsū ʻaki ʻenau hola leva ki he ngaahi moʻungá. a Ki mui ai, ʻi he taʻu 70, naʻe toe foki ʻa e kau tau Loma foʻou ki Selusalema. ʻI he taimi ko ení, naʻa nau fakaʻauha ʻa e koló. Ka ko e tokotaha kotoa naʻe talangofua ki he fakahinohino ʻa Sīsuú naʻe hao.

3. Ko e hā ʻa e tuʻunga meimei tatau ʻe vavé ni ke hokosia ʻe he kau Kalisitiané, pea ko e hā te tau lāulea ki ai ʻi he kupu ko ení?

³ Ko e fakatokanga mo e fakahinohino ʻa Sīsuú ʻoku toe ngāueʻaki ia ki hotau ʻahó ni. ʻOku vavé ni ke tau hokosia ʻa e tuʻunga meimei tatau. Naʻe ngāueʻaki ʻe Sīsū ʻa e ngaahi meʻa ʻi he ʻuluaki senitulí ke fakamatalaʻi ʻa e meʻa ʻe hoko ʻi he taimi ʻe kamata fakafokifā ai ʻa e “fuʻu mamahi lahi.” (Māt. 24:3, 21, 29) Hangē pē ko e ʻi ai ʻa e kau Kalisitiane faitōnunga naʻe hao moʻui atu ʻi hono fakaʻauha ʻa Selusalemá, ʻe ʻi ai ha “fuʻu kakai lahi” te nau hao moʻui atu ʻi he hoko ʻa e fakatamaki ʻi māmani lahí. (Lau ʻa e Fakahā 7:9, 13, 14.) ʻOku mātuʻaki mahuʻinga ke tau mahinoʻi ʻa e meʻa ʻoku tala mai ʻe he Tohi Tapú fekauʻaki mo e ngaahi meʻa ko eni ʻe hoko ʻi he kahaʻú. Ko e hā hono ʻuhingá? Koeʻuhí ʻoku fakatuʻunga ai ʻetau moʻuí. Ko ia tau lāulea ki he founga ʻe kaunga ai ʻa e ngaahi meʻa ko ení kia kitautolu fakafoʻituitui.

4. ʻE anga-fēfē ʻa e kamata ʻa e fuʻu mamahi lahí?

⁴ ʻE anga-fēfē ʻa e kamata ʻa e fuʻu mamahi lahí? ʻAki hono fakaʻauha ʻa e lotu loi kotoa pē. ʻI he Tohi Tapú, ʻoku ui ʻa e lotu loí ko “Pāpilone ko e Lahi, ko e faʻē ʻa e kakai fefine paʻumutú.” (Fkh. 17:5-7) Ko e hā ʻoku ui ai ʻa e lotu loí ko ha paʻumutú? Koeʻuhí kuo taʻefaitōnunga ki he ʻOtuá hono kau haʻa faifekaú. ʻI he ʻikai ke nau poupou mateaki kia Sīsū mo hono Puleʻangá, kuo nau poupou ki he ngaahi puleʻanga fakaetangatá pea tukunoaʻi ʻa e ngaahi akonaki ʻa e Tohi Tapú koeʻuhí ke lahi ange ai ʻenau faitākiekiná. Ko ʻenau lotú ʻoku ʻikai maʻa ʻo hangē ko e lotu ʻa e kau paní. (2 Kol. 11:2; Sēm. 1:27; Fkh. 14:4) Ka ko hai te ne fakaʻauha ʻa Pāpilone ko e Lahí? ʻE ʻai ʻe Sihova ʻa e “meʻatui ʻe hongofulu” ʻo e “manu fekai lanu kula ʻahoʻaho” ke nau “fakahoko ʻa ʻene fakakaukaú.” ʻOku fakafofongaʻi ʻe he “manu fekai lanu kula ʻahoʻaho” ʻa e Ngaahi Puleʻanga Fakatahatahá, pea ʻoku fakafofongaʻi ʻe he “meʻatui ʻe hongofulu” ʻa e kotoa ʻo e ngaahi mafai fakapolitikale ʻoku nau poupouʻi iá.—Lau ʻa e Fakahā 17:3, 16-18.

5, 6. Ko e hā ʻoku tau pehē ai ko hono fakaʻauha ʻo Pāpilone ko e Lahí ʻoku ʻikai ʻuhinga ia ʻe mate ʻa e kotoa ʻo hono kau mēmipá?

⁵ ʻE mate ʻa e mēmipa kotoa ʻo e lotu loí ʻi hono fakaʻauha ʻa Pāpilone ko e Lahí? ʻIkai. Naʻe fakamānavaʻi ʻe Sihova ʻa e palōfita ko Sākalaiá ke ne tohi fekauʻaki mo e meʻa ʻe hokó. ʻI he taimi ko iá, ʻe pehē ʻe ha taha naʻe kau ki muʻa ʻi he lotu loí: “ʻOku ʻikai ko e palofita au: ko e motuʻa faʻa au; he naʻe fakatau au ʻe ha tangata ʻi heʻeku talavou, ʻo talu ai pe. Pea kapau ʻe pehe ʻe ha taha kiate ia, ko e ha tu ʻa e ngaahi lavea na ʻi he vahaʻa ʻo ho ongo nima, te ne tali, ko hoku taaʻi ia ʻi he fale ʻo hoku kau ʻofaʻanga.” (Sāk. 13:4-6) Ko ia naʻa mo e kau taki lotú te nau fakangalingali ʻoku ʻikai ko e kau lotu kinautolu pea te  nau fakaʻikaiʻi naʻe ʻikai ʻaupito ke nau kau ʻi he ngaahi lotu loi ko iá.

⁶ Ko e hā ʻe hoko ki he kakai ʻa e ʻOtuá ʻi he lolotonga ʻa e taimi ko iá? ʻOku fakamatala ʻa Sīsū: “Ko hono moʻoní, ka ne ʻikai fakanounou ʻa e ngaahi ʻaho ko iá, ʻe ʻikai ha kakano ʻe fakahaofi, ka koeʻuhi ko e faʻahinga kuo filí, ʻe fakanounou ai ʻa e ngaahi ʻaho ko iá.” (Māt. 24:22) ʻI he ʻuluaki senitulí, naʻe “fakanounou” ʻa e mamahi lahi ʻi Selusalemá. Naʻe fakaʻatā heni ke hola ʻa e “faʻahinga kuo filí,” ʻa e kau Kalisitiane paní. ʻI ha founga meimei tatau, ko e ʻuluaki konga ʻo e fuʻu mamahi lahí ʻe “fakanounou” koeʻuhí ko e “faʻahinga kuo filí.” Ko e ngaahi mafai fakapolitikalé, ʻa e “meʻatui ʻe hongofulu,” heʻikai fakaʻatā kinautolu ke nau fakaʻauha ʻa e kakai ʻa e ʻOtuá. Ka, ʻe ʻi ai ha kiʻi taimi nonga ʻi he hili pē ʻa e ʻuluaki ʻohó.

7, 8. Ko e hā ʻa e faingamālie ʻe ʻi ai ʻi he hili hono fakaʻauha ʻa e lotu loí, pea ʻe anga-fēfē ʻa e kehe ʻa e kakai ʻa e ʻOtuá mei ha taha pē ʻi he taimi ko iá?

⁷ Ko e hā ʻe hoko ʻi he hili hono fakaʻauha ʻa e lotu loí? Ko e taimi ia ke fakahaaʻi ai ʻa e meʻa moʻoni ʻi hotau lotó. ʻI he taimi ko iá, ʻe feinga ʻa e tokolahi taha ʻo e faʻahinga ʻo e tangatá ke kumi ki ha maluʻanga mo ha tokoni mei he ngaahi kautaha fakaetangatá, ʻa e “ngaahi fuʻu maka ʻo e ngaahi moʻungá.” (Fkh. 6:15-17) Ka ko e kakai ʻa Sihová te nau hanga kiate Ia ki ha maluʻanga. ʻI he taimi naʻe “fakanounou” ai ʻa e ʻohofí ʻi he ʻuluaki senitulí, naʻe ʻikai ko e taimi ia ki he kotoa ʻo e kau Siú ke nau liliu hake pē ʻo lotu faka-Kalisitiane. Ka, ko e taimi ia ki he faʻahinga kuo nau ʻosi Kalisitiané ke mavahe mei Selusalema ʻo hangē ko e fakahinohino ʻa Sīsuú. ʻI ha founga meimei tatau ʻi he kahaʻú, ʻi he taimi ʻe “fakanounou” ai hono ʻohofi ʻa Pāpilone ko e Lahí, heʻikai lava ke tau ʻamanekina ʻe liliu hake pē ʻa e kakai tokolahi ʻo lotu faka-Kalisitiane moʻoni. Ka, ko e faingamālie ia ki he kotoa ʻo e kau lotu moʻoní ke nau fakamoʻoniʻi ʻenau ʻofa kia Sihová mo ʻenau poupou ki he kau paní.—Māt. 25:34-40.

⁸ ʻOku ʻikai ke tau ʻiloʻi ʻa e meʻa tofu pē ʻe hoko lolotonga ko ia ʻa e taimi ʻo e ʻahiʻahí. Kae kehe, ʻoku tau ʻamanekina ko e moʻuí ʻe ʻikai ke faingofua pea te tau fiemaʻu ke fai ha ngaahi feilaulau. ʻI he ʻuluaki senitulí, naʻe pau ke mavahe ʻa e kau Kalisitiané mei honau ngaahi ʻapí pea kātekina ʻa e ngaahi faingataʻa koeʻuhí ka nau hao. (Mk. 13:15-18) ʻOku totonu ke tau ʻeke hifo: ‘ʻOku ou mateuteu ke tukuange ʻa e ngaahi meʻa fakamatelié? ʻOku ou loto-lelei ke fai ha meʻa pē ʻoku fiemaʻú ke nofoʻaki mateaki ai kia Sihova?’ Fakakaukau ki ai! ʻI he taimi ko iá, ko kitautolu pē ʻa e faʻahinga ʻe lotu ki hotau ʻOtuá ʻo tatau ai pē pe ko e hā ʻe hokó, ʻo hangē ko e palōfita ko Tanielá.—Tan. 6:10, 11.

9, 10. (a) Ko e hā ʻa e pōpoaki ʻe talaki ʻe he kakai ʻa e ʻOtuá lolotonga ʻa e fuʻu mamahi lahí? (e) ʻE anga-fēfē ʻa e tali ki ai ʻa e ngaahi fili ʻo e kakai ʻa e ʻOtuá?

⁹ Ko e fuʻu mamahi lahí ʻe ʻikai ko e taimi ia ke malangaʻi ai ʻa e ‘ongoongo lelei ʻo e Puleʻangá.’ Ko e taimi ke malangaʻi ai ʻa e pōpoaki ko iá kuo ʻosi ia. Kuo hoko mai ʻa e taimi ia ʻo e “ngataʻangá”! (Māt. 24:14) ʻE talaki loto-toʻa ʻe he kakai ʻa e ʻOtuá ha pōpoaki mālohi ʻo e fakamaau ʻa ia ʻe kaunga ki he kakai kotoa. Ko e pōpoakí nai ko e ʻamanaki ko ia ke fakaʻauha ʻosi ʻa e māmani fulikivanu ʻo Sētané. ʻOku fakahoa ʻe he Tohi Tapú ʻa e pōpoaki ko ení ki he ngaahi ʻuha maka ʻi heʻene pehē: “Naʻe ʻi ai ha fuʻu ʻuha maka, ko e maka taki taha naʻe talēniti nai ʻe taha hono mamafá, naʻe tō mei hēvani ki he kakaí, pea naʻe laukovi ʻa e kakaí ki he ʻOtuá koeʻuhi ko e fakatamaki ʻo e ʻuha maká, he ko e fakatamakí naʻe fuʻu lahi anga-kehe.”—Fkh. 16:21.

¹⁰ ʻE fanongo hotau ngaahi filí ki he pōpoaki mālohi ko ení. Naʻe fakamānavaʻi ʻe Sihova ʻa e palōfita ko ʻIsikelí ke ne fakamatala  ki he anga ʻo e tali ʻa ha kulupu ʻo e ngaahi puleʻanga ʻoku ui ʻi he Tohi Tapú ko Koki ʻo Mēkokí: “Ko e folofola ʻeni ʻa Atonai Sihova: ʻe hoko ʻi he ʻaho ko ia ʻa e ʻalu hake ʻa e ngaahi meʻa ʻi ho loto, pea te ke fakakaukauʻi ha fakakaukau kovi: ʻio, te ke pehe, Kau ʻalu hake ki he fonua tukuʻuta, ʻo aʻu ki he kakai nofo noa; ʻa kinautolu ʻoku nofo nonga honau kotoa: ʻoku nofo taʻe hanau ʻa, ʻo ʻikai hanau songo pe lau matapa; ke u maʻu ha vete ʻo faʻao meʻa—ko e toe ʻai ho nima ki he ngaahi potu maumau kuo nofoʻia, pea ki he kakai kuo tanaki mei he ngaahi puleʻanga, kuo nau maʻu monumanu mo e koloa, ʻoku nau nofo ʻi he pito ʻo mamani.” (ʻIsi. 38:10-12) Ko e kakai ʻa e ʻOtuá te nau tuʻu ʻo kehe mei ha taha pē, ʻo hangē ia “ʻoku nau nofo ʻi he pito ʻo mamani.” ʻE ʻikai kei malava ʻe he ngaahi puleʻangá ʻo mataʻofi kinautolu. Te nau vēkeveke ke ʻohofi ʻa e kau pani ʻa Sihová mo e faʻahinga ʻoku poupou kia kinautolú.

11. (a) Ko e hā ʻoku fiemaʻu ke tau manatuʻi fekauʻaki mo e hokohoko ʻo e ngaahi meʻa lolotonga ʻa e fuʻu mamahi lahí? (e) ʻE anga-fēfē ʻa e tali ʻa e kakaí ʻi heʻenau sio ki he ngaahi fakaʻilongá?

¹¹ Ko e hā leva ʻa e meʻa hono hokó? ʻOku ʻikai ke tala mai ʻe he Tohi Tapú ʻa e hokohoko tofu pē ʻo e ngaahi meʻá, ka ko e ngaahi meʻa ʻe niʻihi ʻe hoko nai ʻi he taimi tatau. ʻI heʻene kikite fekauʻaki mo e fakaʻosiʻosi ʻo e fokotuʻutuʻu lolotonga ko ení, naʻe pehē ʻe Sīsū: “ʻE ʻi ai ʻa e ngaahi fakaʻilonga ʻi he laʻaá, māhiná, mo e ngaahi fetuʻú pea ʻi he māmaní ʻe faingataʻaʻia ʻa e ngaahi puleʻangá, ʻo ʻikai ʻilo ha haoʻanga koeʻuhi ko e longoaʻa ʻa e tahí mo ʻene houtuʻú, lolotonga ia ʻa e pongia ʻa e kakaí koeʻuhi ko e manavaheé mo e ʻamanekina ʻo e ngaahi meʻa ʻe hoko mai ki he māmani kuo nofoʻí, he ko e ngaahi mālohi ʻo e langí ʻe ngalulululu. Pea te nau mamata leva ki he Foha ʻo e tangatá ʻokú ne haʻu ʻi ha konga ʻao fakataha mo e mālohi mo e lāngilangi lahi.” (Luke 21:25-27; lau ʻa e Maʻake 13:24-26.) ʻE kau ʻi hono fakahoko ʻo e kikite ko ení ha ngaahi fakaʻilonga mo ha ngaahi meʻa fakalilifu ʻi he langí? Kuo pau ke tau tatali ke ʻilo ki ai. Kae kehe, ʻoku ʻikai ke tau ʻilo ʻa e taimi ʻe sio ai ʻa e ngaahi fili ʻo e ʻOtuá ki he ngaahi fakaʻilongá, pea te nau ilifia mo manavahē.

12, 13. (a) Ko e hā ʻe hoko ʻi he taimi ʻe haʻu ai ʻa Sīsū ʻi he “mālohi mo e lāngilangi lahi”? (e) ʻE anga-fēfē ʻa e tali ʻa e kau sevāniti ʻa e ʻOtuá ʻi he taimi ko iá?

¹² Ko e hā ʻe hoko ʻi he taimi ʻe haʻu ai ʻa Sīsū ʻi he “mālohi mo e lāngilangi lahi”? Te ne fakapaleʻi ʻa e faʻahinga faitōnungá pea tautea ʻa e faʻahinga taʻefaitōnungá. (Māt. 24:46, 47, 50, 51; 25:19, 28-30) Naʻe ngāueʻaki ʻe Sīsū ha talanoa fakatātā ke fakamatalaʻi eni ʻo toe fakaikiiki ange. Naʻá ne pehē: “ʻI he aʻu mai ʻa e Foha ʻo e tangatá ʻi hono lāngilangí pea haʻu mo ia ʻa e kau ʻāngeló kotoa, te ne nofo hifo leva ʻi hono taloni lāngilangiʻiá. Pea ʻe fakatahataha mai ʻa e ngaahi puleʻanga kotoa pē ki hono ʻaó, pea te ne fakamavaheʻi ʻa e kakai ko ē mei hē, ʻo hangē tofu pē ko hono fakamavaheʻi ʻe ha tauhi-sipi ʻa e fanga sipí mei he fanga kosí. Pea te ne tuku ʻa e fanga sipí ʻi hono nima toʻomataʻú ka ko e fanga kosí ʻi hono toʻohemá.” (Māt. 25:31-33) Ko e hā ʻe hoko ki he fanga sipí mo e fanga kosí? ʻE fakamāuʻi kinautolu. Ko e fanga kosí, pe ko e faʻahinga taʻefaitōnungá, “te nau ʻalu atu ki he tuʻusi taʻengata.” Ka ko e fanga sipí, pe faʻahinga faitōnungá, te nau maʻu ʻa e moʻui taʻengatá.—Māt. 25:46.

¹³ ʻE anga-fēfē ʻa e tali ʻa e fanga kosí ʻi heʻenau ʻilo ʻe fakaʻauha kinautolú? “Te nau tuki honau fatafatá ʻi he mamahi.” (Māt. 24:30) Ka ʻe anga-fēfē ʻa e tali ʻa e kau paní mo e faʻahinga ʻoku poupou kia kinautolú? Te nau fai ʻa e meʻa naʻe leaʻaki ʻe Sīsuú: “ʻI he kamata ke hoko ʻa e ngaahi meʻá ni, mou tuʻu hangatonu hake pea hiki hake homou ʻulú koeʻuhí kuo ofi homou fakahaofí.”—Luke 21:28.

14, 15. Ko e hā ʻa e ngāue fakatahatahaʻi ʻe hoko hili ʻa e kamata ke ʻoho ʻa Koki ʻo Mēkokí, pea ʻe anga-fēfē ʻene hoko ení?

¹⁴ Ko e hā ʻe hoko hili ʻa e kamata ke ʻohofi ʻe Koki ʻo Mēkokí ʻa e kakai ʻa e ʻOtuá? ʻOku pehē ʻe he Tohi Tapú ko e Foha ʻo e tangatá “te ne fekauʻi atu ʻa e kau ʻāngeló pea ʻe tānaki fakataha ʻa ʻene faʻahinga kuo filí mei he ngaahi matangi ʻe faá, mei he ngataʻanga ʻo e māmaní ki he ngataʻanga ʻo e langí.” (Mk. 13:27; Māt. 24:31) Ko e ngāue fakatahatahaʻi ko ení ʻoku ʻikai ʻuhinga ia ki he taimi ʻoku ʻuluaki fili ai ʻa e kau Kalisitiane paní. Pea ʻoku ʻikai ʻuhinga ia ki he silaʻi fakaʻosi ʻo e kau pani ʻoku kei toe ʻi he māmaní. (Māt. 13:37, 38) Ko e silaʻi ko iá ʻe hoko ia ki muʻa pē ʻi he kamata ʻa e fuʻu mamahi lahí. (Fkh. 7:1-4) Ko ia, ko e hā ʻa e ngāue fakatahatahaʻi ko ení? Ko e taimi ia ʻe maʻu ai ʻe he kau pani ʻoku kei toe ʻi he māmaní honau palé pea ʻalu ki hēvani. (1 Tes. 4:15-17; Fkh. 14:1) Ko e meʻa ko ení ʻe hoko ia ʻi he vahaʻa taimi hili ʻa e kamata ke ʻoho ʻa Koki ʻo Mēkokí. (ʻIsi. 38:11) Pea hangē pē ko ia naʻe leaʻaki ʻe Sīsuú, “ko e kau māʻoniʻoní te nau ulo ʻo ngingila ʻo hangē ko e laʻaá ʻi he Puleʻanga ʻo ʻenau Tamaí.”—Māt. 13:43. b

¹⁵ ʻOku ʻuhinga iá ʻe “punakaki” pe hamusi hake ʻa e kau paní? ʻOku tui ʻa e kakai tokolahi ʻi he Puleʻanga-Haʻa-Kalisitiané ʻe ʻave ʻa e kau Kalisitiané ki hēvani ʻi ha sino fakaetangata. ʻOku nau toe fakakaukau te nau sio tonu kia Sīsū ʻi heʻene toe foki mai ke puleʻi ʻa e māmaní. Kae kehe, ʻoku fakahaaʻi mahino ʻe he Tohi Tapú ko e toe foki mai ʻa Sīsuú ʻoku taʻehāmai ʻi heʻene pehē: “ʻE toki hā leva ʻa e fakaʻilonga ʻo e Foha ʻo e tangatá ʻi langi,” pea ʻe haʻu ʻa Sīsū “ʻi he ngaahi ʻao ʻo e langí.” (Māt. 24:30) ʻOku toe pehē ʻe he Tohi Tapú “heʻikai lava ʻe he kakanó mo e totó ke na maʻu ʻa e Puleʻanga ʻo e ʻOtuá.”  Ko ia ko e faʻahinga ʻe ʻave ki hēvaní ʻe ʻuluaki fiemaʻu ke nau “liliu kotoa pē, ʻi ha foʻi mōmeniti, ʻi ha foʻi kemo pē ʻa e matá, ʻi he lolotonga ʻa e ifi ʻa e talupite fakaʻosí.” c (Lau ʻa e 1 Kolinitō 15:50-53.) ʻOku ʻikai ke tau ngāueʻaki heni ʻa e foʻi lea “punakaki” ke fakamatalaʻiʻaki ʻa e meʻá ni koeʻuhí ko ʻene fekauʻaki mo e akonaki hala ʻa e Puleʻanga-Haʻa-Kalisitiané. Kae kehe, ko e kau pani faitōnunga ʻoku kei toe ʻi he māmaní te nau fakatahataha fakataha leva ki ai.

16, 17. Ko e hā kuo pau ke hoko ki muʻa ʻi he mali ʻa e Lamí?

¹⁶ ʻI he ʻi hēvani pē ʻa e kotoa ʻo e kau pani ʻe toko 144,000, ʻe lava ke kamata ʻa e teuteu fakaʻosi ki he mali ʻa e Lamí. (Fkh. 19:9) Ka kuo pau ke hoko ha toe meʻa kehe ki muʻa ʻi he meʻa fakafiefia ko iá. Manatuʻi ʻe ʻohofi ʻe Koki ʻa e kakai ʻa e ʻOtuá lolotonga ʻa e kei ʻi māmani ʻa e toenga ʻo e kau paní. (ʻIsi. 38:16) ʻE anga-fēfē ʻa e tali ki ai ʻa e kakai ʻa e ʻOtuá? Te nau talangofua ki he fakahinohino ko ení: “ʻE ʻikai ʻamoutolu ke fai ha tau ʻi he potu ko ia; ka mou fakate pe ʻo tuʻu, ʻo mamata ki he fakamoʻui ʻa Sihova kuo ō mo kimoutolu, . . . ʻoua naʻa mou manavahe, pea ʻoua naʻa mou tailiili.” (2 Kal. 20:17) ʻI ha taimi hili ʻa e kamata ke ʻoho ʻa Kokí, ʻe ʻave ki hēvani ʻa e kotoa ʻo e toenga ʻo e kau pani ʻi he māmaní. Pea ʻoku tala mai leva ʻe he Fakahā 17:14 ʻa e tali ʻi hēvani ki he ʻoho ʻa Kokí. Ko e ngaahi fili ʻo e kakai ʻa e ʻOtuá “te nau faitau mo e Lamí, ka, koeʻuhí ko e ʻEiki ia ʻo e ngaahi ʻeiki mo e Tuʻi ʻo e ngaahi tuʻi, ʻe ikunaʻi kinautolu ʻe he Lamí. Pehē foki, ko e faʻahinga ʻoku ʻiate ia ʻa ia kuo ui pea kuo fili mo faitōnungá te nau ikuna.” Ko ia ai, ko Sīsū fakataha mo ʻene kau tuʻi kuo pani ʻe toko 144,000 ʻi hēvaní, te nau fakahaofi ʻa e kakai ʻa e ʻOtuá ʻi he māmaní.

¹⁷ Ko e fakahaofi ko iá ʻe iku atu ia ki he tau ʻi ʻĀmaketoné, ʻa ia ʻe fakalāngilangiʻi ai ʻa e huafa māʻoniʻoni ʻo Sihová. (Fkh. 16:16) ʻE fakaʻauha ʻa e faʻahinga kotoa ʻe fakamāuʻi ko e fanga kosí, pe taʻefaitōnungá. ʻE ʻikai ke toe ʻi ai ha fulikivanu ʻi he māmaní, pea ʻe hao moʻui atu ʻa e “fuʻu kakai lahi” ʻi ʻĀmaketone. Fakaʻosí, ko e ikuʻanga fakafiefia ʻi he tohi Fakahaá ʻe fakahoko, ʻa ia ko e mali ʻa e Lamí! (Fkh. 21:1-4) d Ko e faʻahinga kotoa ʻe moʻui ʻi māmaní te nau maʻu ʻa e hōifua ʻa e ʻOtuá pea hokosia ʻene ʻofa lahi mo e nima-homó. ʻOku tau fakatuʻotuʻa vēkeveke atu ki he taimi ko iá. Ko ha kātoanga mali lahi ē ka hokó!—Lau ʻa e 2 Pita 3:13.

18. ʻI he vave ke hoko mai ʻa e ngaahi meʻa fakafiefia naʻe tomuʻa talá, ko e hā ʻoku totonu ke tau fakapapauʻi ke faí?

¹⁸ ʻI he vave ke hoko ʻa e ngaahi meʻa fakafiefia ko ení, ko e hā ʻoku totonu ke fai he taimí ni ʻe kitautolu taki taha? Naʻe fakamānavaʻi ʻe Sihova ʻa e ʻapositolo ko Pitá ke ne tohi: “Koeʻuhí ko e pau ko ia ke vaia peheni ʻa e ngaahi meʻá ni kotoa peé, fakakaukau atu ki he faʻahinga kakai ʻoku totonu ke mou hoko ki aí ʻo taka ʻi he ngaahi tōʻonga māʻoniʻoni mo e ngaahi ngāue ʻo e anga-līʻoa fakaʻotuá, ʻi hoʻomou nofoʻaki tali mo hanganaki tauhi maʻu ʻi he ʻatamaí ʻa e hoko mai ʻa e ʻaho ʻo Sihová . . . Ko ia ai, siʻi faʻahinga ʻofeina, koeʻuhí ko hoʻomou nofoʻaki tali ki he ngaahi meʻá ni, fai homou tūkuingatá ke ʻosi angé pea ʻilo kimoutolu ʻe ia ʻoku mou taʻehaʻila mo taʻehamele pea ʻoku mou ʻi he melino.” (2 Pita 3:11, 12, 14) Tau fakapapauʻi leva ke tauhi ke maʻa ʻetau lotú mo ʻikai kaunga ki he lotu loí, pea poupou ki he Tuʻi ʻo e Melinó, ʻa Sīsū Kalaisi.