ʻOKU ʻiloʻi ʻe he kakai tokolahi naʻe ʻi ai ʻa e kau ʻapositolo ʻe toko 12 ʻa Sīsū. Ka naʻe ʻikai nai ke nau ʻiloʻi naʻe toe kau ʻi heʻene kau ākongá ʻa e kakai fefine naʻa nau feohi vāofi mo ia. Ko e taha ʻi he kakai fefine ko iá ko Sōana.—Māt. 27:55; Luke 8:3.

Ko e hā ʻa e ngafa naʻe fakahoko ʻe Sōana ʻi he ngāue fakafaifekau ʻa Sīsuú, pea ko e hā ʻe lava ke tau ako mei heʻene faʻifaʻitakiʻangá?

Ko Sōaná ‘ko e uaifi ʻo Kusa, ko e tangata pule ʻa Hēlotá.’ Kuo pau pē ko Kusá ko e tamaioʻeiki ʻi he lotoʻi fāmili ʻo Hēlota ʻAnitipasá. Ko Sōana ʻa e taha ʻi he kakai fefine ʻe niʻihi naʻe faitoʻo ʻe Sīsū honau puké. Fakataha mo e kakai fefine kehé, naʻe fononga fakataha ʻa Sōana mo Sīsū mo ʻene kau ʻapositoló.—Luke 8:1-3.

Naʻe akoʻi ʻe he kau lāpai Siú ʻo pehē naʻe ʻikai totonu ke feohi ʻa e kakai fefiné mo e kakai tangata naʻe ʻikai ko honau ngaahi kāingá, pea ʻoua ʻe fononga fakataha mo kinautolu. Ko e moʻoni, ko e kakai tangatá naʻe ʻikai ke nau fuʻu talanoa ki he kakai fefiné. ʻI hono tukunoaʻi ʻa e ngaahi talatukufakaholo ko iá, naʻe fakaʻatā ʻe Sīsū ʻa Sōana mo e kau fefine tui ʻe niʻihi ke nau fononga fakataha holo.

Naʻe ʻikai tokanga ʻa Sōana ia ki he manukí kae feohi pē ia mo Sīsū mo e kau ʻapositoló. Ko e faʻahinga kotoa naʻe fononga takai holo mo iá naʻe pau ke nau mateuteu ke fai ha ngaahi feʻunuʻaki ʻi heʻenau moʻui fakaʻahó. Kae kehe, ʻi he fekauʻaki mo e kau muimui ko iá, naʻe pehē ʻe Sīsū: “Ko ʻeku faʻeé mo hoku fanga tokouá ko kinautolú ni ia ʻoku nau fanongo ki he folofola ʻa e ʻOtuá mo fai ki aí.” (Luke 8:19-21; 18:28-30) ʻIkai ʻokú ke loto-toʻa ʻi hono ʻiloʻi ʻoku ongoʻi vāofi ʻaupito ʻa Sīsū mo e faʻahinga ʻoku nau fai ʻa e ngaahi feilaulau koeʻuhí ke muimui ʻiate iá?

Naʻe tokangaʻi ʻe Sōana mo e kakai fefine tokolahi ʻa Sīsū mo e toko hongofulu-mā-uá “ʻaki ʻenau ngaahi koloá.” (Luke 8:3) “Naʻe ʻikai tala ʻe Luke ki heʻene kau lautohí naʻe feimeʻakai, fufulu ipu pea monomono vala ʻa e kakai fefiné,” ko e lau ia ʻa e tokotaha-tohi ʻe taha. “Mahalo pē naʻa nau fai pehē . . . , ka naʻe ʻikai ko e meʻa ia naʻe leaʻaki ʻe Luké.” ʻOku ngalingali, naʻe ngāueʻaki ʻe he kakai fefiné ʻenau paʻangá, pe ko ʻenau ngaahi koloá ke poupouʻiʻaki honau ngaahi kaungāmeʻá.

Naʻe ʻikai ke ngāue fakamāmani ʻa Sīsū pe ko ʻene kau ʻapositoló lolotonga ʻenau fononga fakamalangá. Ko ia ai, ʻoku pau pē naʻe ʻikai ke nau maʻu ha paʻanga ke fakatauʻaki ha meʻakai mo e ngaahi meʻa kehe naʻa nau fiemaʻú ʻi he tuʻunga ko ha kakai ʻe toko 20 nai. Neongo naʻe talitali anga-talitali kakai nai kinautolu,  ko e moʻoniʻi meʻa ko ia hono ʻave holo ʻe Kalaisi mo ʻene kau ʻapositoló ha “puha paʻangá” naʻe fakahaaʻi ai naʻe ʻikai ke nau fakafalala maʻu pē ki he anga-talitali kakaí. (Sione 12:6; 13:28, 29) Ko Sōana mo e kakai fefine kehé kuo pau pē naʻa nau fai ha tokoni ke feau ʻa e ngaahi fakamole ko iá.

Naʻe fakahalaʻi ʻe he niʻihi ke maʻu ʻe ha fefine Siu ha paʻanga. Kae kehe, ʻoku fakahaaʻi ʻe he fakamatala ʻi onopooni ʻi he lotolotonga ʻo e kau Siú, naʻe maʻu nai ʻe ha fefine ha koloa ʻi he founga kehekehe: (1) ko ha koloa tukufakaholo kapau naʻe mate ʻene tamaí ʻo ʻikai hano ngaahi foha, (2) ko ha kelekele kuo foaki kiate ia, (3) ko ha paʻanga te ne maʻu ʻi ha alea mali kapau ʻe vete, (4) ko ha paʻanga mei he kelekele ʻo e husepāniti kuo maté, pe (5) ko ha paʻanga naʻá ne ngāueʻi.

ʻOku ʻikai ha veiveiua, naʻe foaki ʻe he kau muimui ʻo Sīsuú ha meʻa pē te nau malavá. Ko hono kau muimuí kuo pau pē naʻe kau ai ʻa e kakai fefine tuʻumālie. Koeʻuhí ko Sōana ko e uaifi ia ʻo e tamaioʻeiki ʻa Hēlotá, ʻoku fakaʻosiʻaki ʻe he niʻihi naʻá ne tuʻumālie. Ko ha taha hangē ko iá kuo pau pē nai naʻá ne ʻoange ʻa e kofu tuitui molefua totongi mamafa naʻe tui ʻe Sīsuú. ʻOku pehē ʻe he tokotaha-tohi ʻe taha ko e ngaahi meʻa eni naʻe “ʻikai malava ke tokonaki ʻe he ngaahi uaifi ʻo e kau toutaí.”—Sione 19:23, 24.

ʻOku ʻikai leaʻaki mahino ʻe he Folofolá naʻe fai ʻe Sōana ha ngaahi tokoni fakapaʻanga. Kae kehe, naʻá ne fai ʻa e meʻa naʻá ne malavá, pea ʻe lava ke tau ako ha lēsoni mei he meʻá ni. Ko e meʻa ʻoku tau foaki ke pouaki ʻa e ngaahi meʻa ʻo e Puleʻangá—pe ko e meʻa ʻoku tau fili ke foakí—ʻoku fakatuʻunga pē ʻia kitautolu. Ko e meʻa ʻoku mahuʻinga ki he ʻOtuá ko ʻetau fiefia ke fai ʻa e meʻa te tau malavá.—Māt. 6:33; Mk. 14:8; 2 Kol. 9:7.

ʻOku ngalingali, naʻe ʻi ai ʻa Sōana ʻi hono fakapoongi ʻo Sīsuú, fakataha mo e kau fefine kehe “ʻa ia naʻa nau faʻa ō fakataha mo ia mo tauhi ia ʻi heʻene ʻi Kālelí, pea mo e kau fefine tokolahi kehe ʻa ia naʻa nau ō hake fakataha mo ia ki Selusalema.” (Mk. 15:41) ʻI he taimi naʻe tuku hifo ai mei he ʻakaú ʻa e sino ʻo Sīsuú ke tanú, “ko e kau fefine ʻa ia naʻa nau haʻu fakataha mo ia mei Kālelí, naʻa nau muimui mai ʻo nau vakai ki he fonualotó pea nau sio ki he anga hono fakatokoto ʻo hono sinó, pea naʻa nau foki ke teuteu mai ha ngaahi sipaisi mo e ngaahi lolo namu kakala.” Ko e kau fefine ko ení—ʻa ia naʻe lave ki ai ʻa Luké “ko Mele Makitala, Sōana, mo Mele ko e faʻē ʻa Sēmisí”—naʻa nau foki ki ai hili ʻa e sāpaté ʻo sio ki he ongo ʻāngelo naʻá na tala ange kia kinautolu kuo toetuʻu ʻa Sīsū.—Luke 23:55–24:10.

ʻOku pau pē naʻe ʻi he haʻohaʻonga ʻo e kau ākongá ʻa Sōana, kau ai ʻa e faʻē mo e fanga tokoua ʻo Sīsuú, ʻa ia naʻa nau fakatahataha fakataha ʻi Selusalema ʻi he Penitekosi 33 T.S. (Ngā. 1:12-14) Koeʻuhí ko ʻene ʻilo ki he lotoʻā fakatuʻí, kuo pau pē ko Sōana ʻa e tokotaha naʻe pehē ʻe he niʻihi ko e maʻuʻanga fakamatala ia ʻa Luke fekauʻaki mo Hēlota ʻAnitipasá, koeʻuhí ko Luke pē ʻa e tokotaha-tohi Kōsipeli ʻoku lave kia Sōaná.—Luke 8:3; 9:7-9; 23:8-12; 24:10.

Ko e talanoa fekauʻaki mo Sōaná ʻoku ʻomai ai ʻa e ngaahi lēsoni fakaueʻiloto kia kitautolu. Naʻá ne tauhi kia Sīsū ʻi he founga lelei taha naʻá ne malavá. Kuo pau pē naʻá ne fiefia ʻi hono tokoniʻi fakapaʻanga ʻa Sīsuú, ko e toko hongofulu-mā-uá mo e kau ākonga kehé ke nau fononga holo mo malanga fakataha. Naʻe tokangaʻi ʻe Sōana ʻa Sīsū pea mateaki kiate ia lolotonga ʻa e ngaahi ʻahiʻahí. ʻOku lelei ke faʻifaʻitaki ʻa e kau fefine Kalisitiané ki heʻene anga-līʻoa fakaʻotuá.