NAʻE fanauʻi au ʻi Kuinisilani, ʻAositelēlia, ʻi he 1955. Taimi nounou mei ai, naʻe kamata ako Tohi Tapu ʻeku fineʻeikí, ʻa Estelle mo e Kau Fakamoʻoni ʻa Sihová. Naʻá ne papitaiso ʻi he taʻu pē hoko hokó, pea ʻi he taʻu ʻe 13 ki mui ai, naʻe toki haʻu ki he moʻoní ʻeku tangataʻeikí, ʻa Ron. Naʻá ku papitaiso ʻi he tukuʻuta ʻo Kuinisilaní ʻi he 1968.

Talu pē mei heʻeku kei siʻí mo ʻeku saiʻia ʻaupito ʻi he lautohí pea kuó u manako ai pē ʻi he leá. ʻI he taimi naʻa mau fononga meʻalele ai ki ha feituʻu, kuo pau pē naʻe fakatupu ʻita ki heʻeku ongo mātuʻá ke sio mai ʻoku ou tangutu pē ʻi mui ʻo lau ha tohi kae ʻikai sio ki he fakaʻofoʻofa ʻo e feituʻú. Ka ko ʻeku saiʻia ʻi he lautohí naʻe tokoni ia kiate au ʻi he akó. ʻI he kolisí ʻi Glenorchy, ʻi he motu ko Tasimēniá, naʻá ku maʻu ai ʻa e ngaahi pale kehekehe ʻi he akó.

Kae kehe, naʻe hoko mai leva ʻa e taimi ke fai ha fili mafatukituki. Te u tali ha sikolasipi ke ʻalu ki he ʻunivēsití? Neongo ʻeku saiʻia ʻaupito ʻi he ngaahi tohí mo e akó, naʻá ku houngaʻia ʻi hono tokoniʻi au ʻe he fineʻeikí ke u maʻu ha ʻofa lahi ange—ʻa e ʻofa kia Sihová. (1 Kol. 3:18, 19) Ko ia ʻi he loto ki ai ʻeku ongo mātuʻá, naʻe ʻikai te u hoko atu ki he ako māʻolunga angé ka u kamata tāimuʻa ʻi Sanuali 1971 ʻi hoku taʻu 15, hili hono maʻu pē ha ako feʻunga.

 ʻI he taʻu ʻe valu hono hokó, naʻá ku maʻu ai ʻa e monū ke tāimuʻa ʻi Tasimēnia. Lolotonga ʻa e taimi ko iá, naʻá ku mali ai mo ha taʻahine Tasimēnia fakaʻofoʻofa, ko Jenny Alcock, pea naʻá ma ngāue fakataha ʻi he taʻu ʻe fā ko e ongo tāimuʻa makehe ʻi he ngaahi feituʻu tuʻu mavahe ʻi Smithton mo Queenstown.

ʻI he 1978 ko e ʻuluaki taimi eni naʻá ma folau ai ki ha fonua muli ke maʻu ha fakataha-lahi fakavahaʻapuleʻanga ʻi Port Moresby, Pāpua Niu Kini. ʻOku ou kei manatuʻi ʻa e fanongo ki hono fakahoko ʻe ha misinale ha malanga ʻi he lea Hili Motú. Neongo naʻe ʻikai malava ke u mahinoʻi ha foʻi lea ʻi he meʻa naʻá ne leaʻakí, naʻe ueʻi au ʻe heʻene malangá ke u hoko ko ha misinale, ke ako ha ngaahi lea kehe, pea fai ha malanga hangē ko iá. Faifai atu pē, naʻá ku maʻu ha founga ke fakatahaʻi ai ʻeku ʻofa kia Sihová mo ʻeku manako ʻi he leá.

Naʻá ma ʻohovale ʻi he foki atu ki ʻAositelēliá, naʻe fakaafeʻi kimaua ke hoko ko e misinale ʻi he motu ko Funafuti, ʻi Tuvalu, ʻa ia naʻe ui ki muʻa ko e Motu ko Ellice. Naʻá ma aʻu ki homa vāhenga-ngāue foʻoú ʻi Sanuali 1979. Naʻe toko tolu pē ʻa e kau malanga ʻosi papitaiso ʻi Tuvalú.

Ko e ako ki he lea faka-Tuvalú naʻe ʻikai ke faingofua. Ko e tohi pē naʻe ala maʻu ʻi he lea ko iá ko e “Fuakava Foʻoú.” Naʻe ʻikai ke ʻi ai ha ngaahi tikisinale pe ko ha kalasi ako lea, ko ia naʻá ma feinga ke ako ʻa e foʻi lea foʻou ʻe 10 ki he 20 ʻi he ʻaho taki taha. Ka naʻe vave ʻema ʻiloʻi naʻe ʻikai ke ma mahinoʻi ʻa e ʻuhinga totonu ʻa e lahi taha ʻo e ngaahi foʻi lea naʻá ma akó. ʻI he ʻikai tala ange ki he kakaí naʻe hala ʻa e vavaló, naʻá ma tala ange kia kinautolu ke fakaʻehiʻehi mei hono ngāueʻaki ʻa e meʻa fuá mo e tokotokó! Kae kehe, naʻe fiemaʻu ke ma ako ʻa e leá koeʻuhí ke fakahokoʻaki ʻa e ngaahi ako Tohi Tapu naʻá ma kamatá, ko ia naʻá ma hanganaki feinga. ʻI he ngaahi taʻu ki mui aí, ko e taha ʻi he faʻahinga naʻa mau ako ʻi he kamatá naʻá ne tala mai kia kimaua: “ʻOku mau fiefia ʻaupito ʻi he lava ke mo leaʻaki ʻemau leá he taimí ni. ʻI he kamatá, naʻe ʻikai ke mau teitei ʻilo ʻa e meʻa naʻá mo feinga ke leaʻakí!”

ʻI he tafaʻaki ʻe tahá, naʻá ma maʻu ʻa e meʻa ʻoku ui nai ʻe he niʻihi ko e foʻi fakakaukau lelei ki hono ako ha lea foʻou. Koeʻuhí naʻe ʻikai ala maʻu ha ʻapi nofo totongi, naʻe iku ʻo ma nofo mo ha fāmili Fakamoʻoni ʻi he kolomuʻá. Naʻe ʻuhinga eni ko e fanongo tonu ʻi he leá mo siotonu ʻi he founga moʻui ʻa e koló. ʻI he ʻikai ke ma toe leaʻaki ʻa e lea faka-Pilitāniá ʻi he ngaahi taʻu lahi, naʻe hoko ʻa e lea faka-Tuvalú ko ʻema lea tefitó.

ʻIkai fuoloa mei ai, naʻe kamata ke mahuʻingaʻia ʻa e tokolahi ʻi he moʻoní. Ka ko e hā te mau ngāueʻaki  ke ako mo kinautolú? Naʻe ʻikai ke mau maʻu ha ʻū tohi ʻi heʻenau leá. ʻE lava fēfē ke nau ako fakafoʻituitui? ʻI heʻenau kamata haʻu ki he ngaahi fakatahá, ko e hā ʻa e ngaahi hiva ʻe lava ke nau hivaʻí, ko e fakamatala ʻe lava ke nau ngāueʻakí mo e founga ʻe lava ke nau teuteu ai ki he ngaahi fakatahá? ʻE lava fēfē ke faifai ange ʻo nau fakalakalaka ke papitaiso? Naʻe fiemaʻu ki he kakai anga-fakatōkilalo ko ení ʻa e meʻakai fakalaumālié ʻi heʻenau leá tonu! (1 Kol. 14:9) Naʻa mau fifili, ‘ʻE faifai ange ʻo pulusi ʻa e ʻū tohí ʻi he lea faka-Tuvalú, ʻa e lea naʻe leaʻaki ʻe he kakai tokosiʻi ange ʻi he toko 15,000?’ Ko hono tali ʻe Sihova ʻa e ngaahi fehuʻi ko iá, ʻoku fakamoʻoniʻi mai ai ʻa e meʻa ʻe ua: (1) ʻokú ne loto ke talaki ʻene Folofolá “ʻi he ngaahi motu mamaʻo,” mo e (2) ʻokú ne loto ke hūfanga ki hono huafá ʻa e faʻahinga ʻoku vakai ki ai ʻa e māmaní ko e “kakai agavaivai mo majiva.”—Sel. 31:10; Sēf. 3:12, PM.

ʻI he 1980 naʻe vaheʻi ai kimaua ʻe he ʻōfisi vaʻá ke ma ngāue ko e ongo liliu-lea—ko ha ngāue naʻe ʻikai ʻaupito ke ma poto ai. (1 Kol. 1:28, 29) ʻI he kamatá, naʻe malava ke ma fakatau ha mīsini paaki motuʻa mei he puleʻangá, pea naʻá ma ngāueʻaki ia ke pulusi ʻa e fakamatala ki heʻemau ngaahi fakatahá. Naʻe aʻu ʻo ma liliu ʻa e tohi Ko e Moʻoni ʻa ia ʻoku fakatau ki he Moʻui Taʻengata ʻi he lea faka-Tuvalú pea pulusi ia ʻi he mīsini ko ení. ʻOku ou kei manatuʻi ʻa e namu mālohi ʻo e vaitohí mo e feinga mālohi ke pulusi ʻa e ʻū tohi kotoa ko ení ʻi he fuʻu vela ʻa e ʻeá. ʻI he taimi ko iá, naʻe ʻikai ke ʻi ai ha ʻuhila!

Naʻe hoko ko e pole ʻa e liliu ki he lea faka-Tuvalú koeʻuhi naʻe siʻisiʻi ʻa e ngaahi maʻuʻanga fakamatala ke tokoni kia kimautolú. Ka ʻi he taimi ʻe niʻihi naʻa mau maʻu taʻeʻamanekina ha tokoni. ʻI he pongipongi ʻe taha naʻe fehālaaki ʻeku ʻaʻahí ʻo u ʻaʻahi ai ki ha ʻapi ʻo ha taha naʻá ne fakafepaki ki he moʻoní. Ko e tokotaha-ʻapí, ko ha tangataʻeiki naʻe faiako ki muʻa, naʻe vave ʻene tala mai ʻoku totonu ke ʻoua te ma toe ʻaʻahi ange ki hono ʻapí. Naʻá ne pehē mai leva: “ʻOku ou loto ke tala atu ha meʻa. ʻI hoʻomou liliú, ʻoku fuʻu lahi hoʻomou  ngāueʻaki ʻa e passive form. ʻOku ʻikai ke faʻa ngāueʻaki ia ʻi he lea faka-Tuvalú.” Naʻá ku ʻeke ki ha niʻihi, pea naʻe moʻoni ʻa e tangataʻeikí. Ko ia naʻa mau fai ʻa e ngaahi fakatonutonu naʻe fiemaʻú. Kae kehe, naʻá ku ʻohovale ʻi hono ʻomai ʻe Sihova ʻa e tokoni ko ení ʻo fakafou ʻi ha tokotaha fakafepaki ʻa ia ʻokú ne lau moʻoni ʻetau ʻū tohí!

Ko e ʻuluaki tohi naʻe pulusi ʻi he lea faka-Tuvalú ke tufaki ki he kakaí ko e tohi fakaafe ki he Fakamanatú. Naʻe hoko atu ai ʻa e Ongoongo ʻo e Puleʻangá Fika 30, ʻa ia naʻe tukuange taimi taha mo e faka-Pilitāniá. He meʻa fakafiefia ē ke ʻoatu ha meʻa ki he kakaí ʻi heʻenau leá tonu! Faifai atu pē, naʻe ala maʻu ʻa e ngaahi polosiua mo e ʻū tohi ʻe niʻihi ʻi he lea faka-Tuvalú. ʻI he 1983 naʻe kamata ke pulusi fakakuata ʻe he vaʻa ʻi ʻAositelēliá ʻa e Watchtower peesi ʻe 24, ʻa ia naʻe fakaʻavalisi ai ʻa e palakalafi ʻe fitu ke mau ako ʻi he uike taki taha. Ko e hā ʻa e tali ʻa e kakaí? Koeʻuhí naʻe saiʻia ʻa e kakai Tuvalú ʻi he lautohí, naʻe manakoa ʻaupito ʻetau ʻū tohí. Ko e aʻu mai ʻa e ʻū tohi foʻou kotoa pē naʻe fanongonongo ia ʻi he letiō ʻa e puleʻangá, ʻi he taimi ʻe niʻihi naʻe hoko ia ko e ʻuluʻi ongoongó! a

Naʻe kamataʻaki e liliu-leá ʻa e peni mo e pepa. Ki mui ai, naʻe taipeʻi mo toe taipeʻi tuʻo lahi ʻa e ngaahi maniusikilipí ki muʻa ke ʻave ʻo pulusi ʻi he vaʻa ʻi ʻAositelēliá. ʻI he taimi ʻe taha, naʻe ʻi ai ʻa e tuofefine ʻe toko ua ʻi he vaʻá naʻá na fakahū ʻa e maniusikilipí ki he komipiutá, neongo naʻe ʻikai ke na mahinoʻi ʻa e lea faka-Tuvalú. Ko e founga ko eni ʻo hono fakahū tuʻo ua ʻa e fakamatalá pea toki fakahoa ʻa e ngaahi faikehekehé ʻi he komipiutá naʻe tātātaha ke ʻi ai ha fehālaaki. Naʻe fakafoki mai kia kimautolu ʻi he meilí ʻa e ngaahi peesi kuo faʻú ke vakaiʻi pea toe fakafoki pē ki he vaʻá ke pulusi.

He liliu ē ko e ngaahi meʻá! ʻI he taimi ní ʻoku fakahū fakahangatonu ʻe he ngaahi timi liliú ʻa e fakamatalá ki he komipiutá. ʻI he ngaahi tuʻunga lahi tahá, ko e fakamatala kuo ʻosi fakatonutonú, ʻoku faʻu fakalotofonua pē, ʻo maʻu ai ʻa e ngaahi faile ʻe lava ke ʻave ke pulusi ʻi he ngaahi vaʻá fakafou ʻi he ʻInitanetí. ʻOku ʻikai ʻaupito ke toe ʻi ai ha fakavavevave ki he pōsiti ʻōfisí ke ʻave ʻi he meilí ʻa e ngaahi maniusikilipí.

ʻI he faai mai ʻa e ngaahi taʻú, naʻá ku maʻu mo Jenny ha vāhenga-ngāue kehekehe ʻi he Pasifikí. Naʻe vaheʻi kimaua mei Tuvalu ki he vaʻa ʻi Haʻamoá ʻi he 1985. Naʻá ma tokoni ai ki he liliu-leá ʻi he faka-Haʻamoá, faka-Tongá mo e faka-Tokelaú ʻo tānaki atu ki he ngāue naʻá ma kei fai ʻi Tuvalú. b ʻI he 1996 leva naʻe ʻomai kia kimaua ha ngāue meimei tatau ʻi he vaʻa ʻi Fisí, ʻa ia naʻe malava ai ke ma tokoni ki he ngāue liliu-lea ʻi he lea faka-Fisi, Kilipati, Naulu, Lotuma mo e faka-Tuvalu.

Naʻá ku ofoofo maʻu pē ʻi he faivelenga kuo fakahāhā ʻe he faʻahinga ʻoku nau liliu ʻetau ʻū tohí. ʻE lava ke hoko ʻa e ngāué ʻo fakapipiko mo fakaongosia ʻaupito. Kae kehe, ko e faʻahinga faitōnunga ko ení ʻoku nau feinga ke tapua atu ʻa e finangalo ʻo Sihová ke malangaʻi ʻa e ongoongo leleí “ki he puleʻanga mo e matakali mo e lea mo e kakai kotoa pē.” (Fkh. 14:6) Ko e fakatātaá, ʻi he taimi naʻe fokotuʻutuʻu ai ke liliu ʻa e makasini Taua Leʻo ki he lea faka-Tongá, naʻá ku fakataha mo e kotoa ʻo e  kau mātuʻa ʻi Tongá pea ʻeke ange pe ʻe malava ke akoʻi ha taha ko ha tokotaha liliu-lea. Ko e taha ʻo e kau mātuʻá, naʻe ʻi ai ʻene ngāue lelei ko ha ʻenisinia, naʻá ne pehē te ne fakafisi ʻi he ʻaho hokó pea kamata leva ko ha tokotaha liliu. Naʻe fakalotomāfana moʻoni eni, koeʻuhí naʻe ʻi ai hono fāmili pea naʻe ʻikai ʻilo pe ʻe maʻu mei fē ʻene paʻanga hū maí. Ka naʻe tokangaʻi ia mo hono fāmilí ʻe Sihova, pea ngāue ai pē ʻi he liliu-leá ʻi he ngaahi taʻu lahi.

ʻOku tapua atu ʻe he kau liliu-lea līʻoa peheé ʻa e anga ʻo e vakai ʻa e kau mēmipa ʻo e Kulupu Pulé, ʻa ia ʻoku nau tokanga lahi ki he ngaahi fiemaʻu fakalaumālie ʻa e fanga kiʻi kulupu lea iiki angé. Ko e fakatātaá, ʻi he taimi ʻe taha naʻe malanga hake ai ha fehuʻi pe naʻe tuha ʻa e feinga kotoa ke tokonaki ha ʻū tohi ʻi he lea faka-Tuvalú. Naʻá ku loto-toʻa ʻaupito ke lau ʻa e tali ko eni mei he Kulupu Pulé: “ʻOku mau sio ʻoku ʻikai ʻaupito ha ʻuhinga ke ke taʻofi ai ʻa e ngāue liliu-leá ʻi he lea faka-Tuvalú. Neongo ʻoku siʻisiʻi ʻa e malaʻe ngāue Tuvalú ʻi hono fakahoa atu nai ki he ngaahi kulupu lea kehé, ʻoku kei fiemaʻu ʻe he kakaí ke aʻu ange ʻa e ongoongo leleí ʻi heʻenau leá tonu.”

ʻI he 2003, naʻe ʻave ai au mo Jenny mei he Potungāue Liliu-Lea ʻi he vaʻa ʻi Fisí ki he Potungāue Liliu-Lea ʻi Patterson, Niu ʻIoké. Naʻe hangē ia ʻoku hoko ha misi ʻo moʻoní! Naʻá ma kau ʻi ha timi ʻoku tokoni ki he fakalakalaka hono liliu ʻetau ʻū tohí ki he ngaahi lea lahi ange. ʻI he taʻu ʻe ua nai hono hokó, naʻá ma maʻu ha monū ʻo e ʻaʻahi ki he ngaahi fonua kehekehe ke tokoni ki hono akoʻi ʻa e ngaahi timi liliu-leá.

Sai tuku ke u foki ki he fakamatala naʻá ku lave ki ai ʻi he kamatá. ʻI he taʻu 2000, naʻe sio ai ʻa e Kulupu Pulé ki he fiemaʻu ke fakaivimālohiʻi ʻa e ngaahi timi liliu-lea ʻi māmani lahí. ʻI he aʻu mai ki he tuʻunga ko iá, ko e tokolahi taha ʻo e kau liliu-leá naʻe ʻikai ke fuʻu akoʻi lelei kinautolu. Hili ʻemau ʻave ko ia ʻa e fakamatalá ki he Kōmiti Hiki-Tohí, naʻe tali ʻe he Kulupu Pulé ha polokalama ako ʻi māmani lahi ki he kotoa ʻo e kau liliu-leá. Naʻe kau ʻi he polokalama akó ʻa e ako ki he lea faka-Pilitāniá, ngaahi founga liliú, mo e ngāue fakataha ʻa e timí.

Ko e hā ʻa e ola kotoa ko eni ʻo e fakamamafa ki he liliu-leá? Ko e ola ʻe taha, kuo lelei ange ai ʻa e tuʻunga ʻo e liliú. Kuo toe ʻi ai ha tupu lahi fakaʻulia ʻi he lahi ʻo e ngaahi lea kuo liliu ai he taimí ni ʻetau ʻū tohí. ʻI he aʻu ki heʻema ʻuluaki vāhenga-ngāue fakamisinale ʻi he 1979, naʻe ala maʻu pē ʻi he lea ʻe 82 ʻa e makasini Taua Leʻo. Ko e lahi taha ʻo e pulusinga ʻi he ngaahi lea kehé naʻe toki haʻu ia hili ha ngaahi māhina mei he pulusinga faka-Pilitāniá. Kae kehe, ʻi he taimí ni ʻoku tufaki ʻa e Taua Leʻo ʻi he lea ʻe 240 tupu, ʻa ia ko e lahi tahá ʻoku haʻu taimi taha ia mo e faka-Pilitāniá. ʻOku ala maʻu he taimí ni ʻa e meʻakai fakalaumālié ʻi he founga kehekehe ʻi he lea ʻe 700 tupu. Ko e meʻa ko ení naʻá ma misi pē ki ai ʻi ha ngaahi taʻu ki muʻa.

ʻI he 2004, naʻe fai ʻe he Kulupu Pulé ha toe fili mātuʻaki mahuʻinga—ʻa ia ko hono fakavaveʻi ʻa e liliu ʻo e Tohi Tapú. ʻI ha ngaahi māhina siʻi mei heni, naʻe hoko ʻa hono liliu ʻo e Tohi Tapú ko ha  konga ia ʻo e ngāue liliu anga-mahení, ʻo maʻu ai ʻa e faingamālie ke ala maʻu ʻa e New World Translation ʻi he ngaahi lea lahi ange. ʻI he 2014, kuo pulusi kakato pe ko hano konga ai ʻa e Tohi Tapu ko ení ʻi he lea ʻe 128—kau ai ha ngaahi lea ʻoku leaʻaki ʻi he Pasifiki Tongá.

Ko e taha ʻo e ngaahi meʻa mahuʻinga ʻi heʻeku moʻuí ko e monū ʻo e vaheʻi au ke u maʻu ʻa e fakataha-lahi ʻi Tuvalú ʻi he 2011. Naʻe uesia ʻa e fonuá kotoa ʻe ha laʻalaʻā lahi ʻi ha ngaahi māhina, pea naʻe hā ngali ʻe kaniseli ʻa e fakataha-lahí. Kae kehe, ʻi he efiafi naʻa mau tūʻuta atu aí, naʻe fakangata ʻa e laʻalaʻaá ʻe ha ʻuha lahi, pea naʻe fai pē ʻa e fakataha-lahí! Naʻá ku maʻu ʻa e monū taʻealafakatataua ko hono tukuange ʻa e Liliu Tohi Tapu ʻo e Māmani Foʻoú ʻo e Ngaahi Konga Tohi Tapu Faka-Kalisi Kalisitiané ʻi he lea faka-Tuvalú—ʻa e kiʻi kulupu siʻisiʻi taha ke nau maʻu ʻa e meʻaʻofa fakaʻofoʻofa ko ení. ʻI he ngataʻanga ʻo e fakataha-lahí, naʻe toe tō ha ʻuha lahi. Hili ʻa e polokalamá, naʻe maʻu ai ʻe he tokotaha kotoa ʻa e vai fakalaumālie mo e vai fakamatelie lahi!

Ko e meʻa fakamamahí, ko Jenny, ʻa hoku hoa faitōnunga ʻo laka hake ʻi he taʻu ʻe 35, naʻe ʻikai ke ne moʻui ke siotonu ʻi he meʻa fakangalongataʻa ko iá. Naʻá ne mate ʻi he 2009 hili haʻane fāinga he taʻu ʻe hongofulu mo e kanisā huhú. ʻI heʻene toetuʻu maí, ʻe ʻikai ha veiveiua te ne fiefia lahi ke fanongo ki he ongoongo fekauʻaki mo hono tukuange ʻa e Tohi Tapú ʻi he lea faka-Tuvalú.

Talu mei he taimi ko iá, kuo tāpuakiʻi au ʻe Sihova ʻaki ha toe hoa fakaʻofoʻofa ʻe taha, ko Loraini Sikivou. Naʻe ngāue fakataha ʻa Loraini mo Jenny ʻi he Pēteli ʻi Fisí, pea naʻe ngāue foki ʻa Loraini ko ha tokotaha liliu-lea ʻi he lea faka-Fisí. Ko ia kuó u toe maʻu he taimí ni ha uaifi faitōnunga, pea ʻokú ma ngāue fakataha kia Sihova peá ma toe ʻofa ʻi he leá!

ʻI heʻeku sio atu ki he ngaahi taʻu ko iá, ʻoku ou loto-toʻa ʻaupito ke sio ki he hokohoko atu ʻe heʻetau Tamai fakahēvani anga-ʻofá, ʻa Sihova, ke tokangaʻi ʻa e fiemaʻu ʻa e ngaahi kulupu leá, fakatouʻosi ʻa e iiki mo e lalahi. (Saame 49:1-3) Kuó u mātā ʻene ʻofá ʻi hono tapua mai mei he fofonga fiefia ʻo e kakaí ʻi heʻenau fuofua sio ʻi he niʻihi ʻo e ʻū tohi ʻi heʻenau leá pe hiva fakahīkihiki kia Sihova ʻi heʻenau leá tonu. (Ngā. 2:8, 11) ʻOku lava ke u kei fanongo ki he ngaahi lea ʻa Saulo Teasi, ko ha tokoua taʻumotuʻa Tuvalu. Hili ʻene hivaʻi ʻa e hiva ʻo e Puleʻangá ʻi he ʻuluaki taimí ʻi heʻene leá, naʻá ne pehē: “ʻOku ou tui ʻoku totonu ke ke tala ange ki he Kulupu Pulé ko e ngaahi hiva ko ení ʻoku ongo mālie ange ia ʻi he lea faka-Tuvalú ʻi he lea faka-Pilitāniá.”

Talu mei Sepitema 2005, kuó u maʻu ʻa e monū taʻeʻamanekina ʻo e hoko ko ha mēmipa ʻo e Kulupu Pule ʻa e Kau Fakamoʻoni ʻa Sihová. Neongo ʻoku ʻikai te u kei hoko ko ha tokotaha liliu-lea, ʻoku ou fakamālō kia Sihova ʻi heʻene fakaʻatā au ke u kau ai pē ʻi hono poupouʻi ʻa e ngāue liliu-leá ʻi māmani lahi. He fiefia ē ke ʻiloʻi ʻoku tokangaʻi ʻe Sihova ʻa e ngaahi fiemaʻu fakalaumālie ʻa ʻene kakaí kotoa—naʻa mo e faʻahinga ʻi he ʻotu motu tuʻu mavahe ʻi he uhouhonga ʻo e Tahi Pasifikí! ʻIo, hangē ko ia ʻoku leaʻaki ʻe he tokotaha-tohi-sāmé, “Oku behe a Jihova; tuku ke fiefia a mamani; bea nekeneka ae gaahi otu motu.”—Saame 97:1, PM.