ʻI HEʻENE kei siʻí, naʻe ʻi ai ʻa e kiʻi hoosi ʻa Antoine Skalecki ko hano kiʻi kaumeʻa lelei. Naʻá na ngāue fakataha holo ʻi ha kiʻi tānolo fakapōpōʻuli, ke fetuku holo ʻa e malalá ʻi ha keliʻanga malala fute ʻe 1,600 (mita ʻe 500) ki lolofonua. Naʻe lavea ʻa e tamai ʻa Antoine ʻi he holo ha keliʻanga malala, ʻo ʻikai ai ke toe ʻi ai ha fili ʻa e fāmilí ka ko hono ʻave ʻa Antoine ke ngāue ʻi he keliʻanga malalá ʻi he houa ʻe hiva he ʻaho. ʻI he taimi ʻe taha, naʻe meimei mole ʻa e moʻui ʻa Antoine ʻi he holo fakafokifā ʻa e keliʻanga malalá.

Ko Antoine ko e taha ia ʻi he fānau tokolahi naʻe fanauʻi ʻi Falanisē ʻe he ngaahi mātuʻa Pōlani ʻi he 1920 tupú mo e 1930 tupú. Ko e hā naʻe ʻalu ai ʻa e kau Pōlaní ki Falaniseé? ʻI he taimi naʻe toe tauʻatāina ai ʻa Pōlani hili ʻa e Tau I ʻa Māmaní, naʻe hoko ʻa e tokolahi ʻo e fuʻu kakaí ko ha palopalema lahi. ʻI he tafaʻaki ʻe tahá, naʻe mate ʻa e kau tangata Falanisē laka hake ʻi he taha milioná ʻi he taú pea naʻe fuʻu fiemaʻu ha kau keli malala. Ko ia ai, naʻe fakamoʻoni ʻa e puleʻanga Falanisē mo Pōlaní ʻi ha aleapau fefolauʻaki ʻi Sepitema 1919. ʻI he 1931 ko e tokolahi ʻo e kau Pōlani ʻi Falaniseé naʻe aʻu ki he toko 507,800, ʻo nofoʻi ai ʻe he kau Pōlani tokolahi ʻa e ngaahi feituʻu keliʻanga malala ʻi he tokelaú.

Ko e kau ngāue mālohi Pōlaní naʻa nau haʻu mo ʻenau anga fakafonua makehé, kau ai ʻenau ngaahi tui fakalotu mālohí. “Naʻe talanoa anga-fakaʻapaʻapa maʻu pē ʻeku kui-tangatá ʻa Joseph ʻo kau ki he Folofola Māʻoniʻoní ʻa ia naʻe uhuʻi ia ʻe heʻene tamaí tonu,” ko e manatu ia ʻa Antoine, ʻoku taʻu 90 he taimí ni. ʻI he Sāpate kotoa pē, naʻe tui ʻe he ngaahi fāmili keli malala Pōlaní honau teunga lelei tahá ki he lotú, ʻo hangē pē ko ʻenau fai ia ʻi honau fonuá, ʻo kehe ʻaupito ia mei he fakakaukau anga-maheni ʻa e kau Falanisē totonú.

ʻI Nord-Pas-de-Calais naʻe ʻuluaki fetuʻutaki ai ʻa e kau Pōlani tokolahi mo e Kau Ako Tohi Tapú, ʻa ia naʻa nau malanga faivelenga ʻi he feituʻú talu mei he 1904. ʻI he 1915, naʻe kamata ke pulusi ai ʻa e The Watch Tower ʻi he lea faka-Pōlaní ʻi he māhina taki taha, pea ʻi he 1925 naʻe ala maʻu ʻi he lea ko iá ʻa e The Golden Age (ko e ʻĀ Hake! ia he taimí ni). Naʻe mahuʻingaʻia ʻa e fāmili tokolahi ʻi he ngaahi fakamatala Fakatohitapu ʻi he ongo makasini ko ení, pea pehē ki he tohi The Harp of God ʻi he lea faka-Pōlaní.

Naʻe ʻiloʻi ʻe he fāmili ʻo Antoine ʻa e Kau Ako Tohi Tapú mei heʻene faʻētangatá, ʻa ia naʻá ne ʻuluaki ʻalu ki he fakatahá ʻi he 1924. ʻI he taʻu tatau pē, naʻe fai ai ʻe he Kau Ako Tohi Tapú ʻenau ʻuluaki ʻasemipilī ʻi he lea faka-Pōlaní ʻi Bruay-en-Artois. ʻI he māhina nai ʻe taha ki mui ai ʻi he kolo tatau, naʻe fai ai ʻe Joseph F. Rutherford, ko e fakafofonga ʻo e ʻuluʻi  ʻapitanga ʻi māmaní ha malanga maʻá e kakaí, ʻa ia naʻe haʻu ki ai ʻa e toko 2,000. ʻI hono ueʻi ia ʻe he fuʻu kakaí, ko e tokolahi tahá ko e kau Pōlani, naʻe tala ange ʻe Tokoua Rutherford kia kinautolu: “Naʻe ʻomai koe ʻe Sihova ki Falanisē ke ke ako ʻa e moʻoní. Ko koe eni mo hoʻo fānaú kuo pau ke mou tokoniʻi ʻa e kau Falaniseé! ʻOku kei toe lahi ʻa e ngāue fakamalanga ke faí, pea ʻe ʻomai ʻe Sihova ha kau malanga ke nau fai ʻa e ngāue ko iá.”

Pea naʻe fakahoko tofu pē ia ʻe Sihova ko e ʻOtuá! Ko e kau Kalisitiane Pōlani ko ení naʻa nau ʻaufuatō ʻi he ngāue fakamalangá ʻo hangē ko ʻenau ngāue mālohi ʻi he keliʻanga malalá! Ko e moʻoni, naʻe foki ʻa e niʻihi ʻo kinautolu ki Pōlani ke vahevahe atu ai ʻa e ngaahi moʻoni mahuʻinga naʻa nau akó. Ko Teofil Piaskowski, Szczepan Kosiak, mo Jan Zabuda, naʻa nau kau ʻi he faʻahinga ko ia naʻa nau mavahe mei Falanisē ke fakamafola atu ʻa e ongoongo leleí ʻi he fuʻu fonua lahi ko Pōlaní.

Ka ko e tokolahi ʻo e kau ʻevangeliō lea faka-Pōlaní naʻa nau nofo pē ʻi Falanisē ʻo hokohoko atu ai ʻenau malanga faivelengá fakataha mo honau fanga tokoua mo e fanga tuofāfine Falaniseé. ʻI he ʻasemipilī fakakātoa ʻi he 1926 ʻi Sin-le-Noble, ko e toko 1,000 naʻa nau ʻi he konga lea faka-Pōlaní, mo e toko 300 ʻi he lea faka-Falaniseé. Naʻe līpooti ʻi he Yearbook 1929: “Lolotonga ʻa e taʻú naʻe fakahāhā ʻe he fanga tokoua Pōlani ʻe toko 332 ʻenau fakatapuí ʻaki ʻa e papitaiso.” Ki muʻa ke kamata ʻa e Tau II ʻa Māmaní, ko e fakatahaʻanga lea faka-Pōlani ʻe 32 ʻi he fakatahaʻanga ʻe 84 ʻi Falanisē.

ʻI he 1947 naʻe tali ai ʻe he tokolahi ʻo e Kau Fakamoʻoni ʻa Sihová ʻa e fakaafe mei he puleʻanga Pōlaní ke nau foki ange. Kae kehe, naʻa mo e hili ʻenau mavahé, naʻe lava ke mātā ʻa e fua ʻenau ngāué mo e ngāue ʻa honau kaungātui Falaniseé ʻi he tupu pēseti ʻe 10 ʻa e kau malanga ʻo e Puleʻangá ʻi he taʻu ko iá. Naʻe hokohoko atu heni ʻa e tupú ki he pēseti ʻe 20, 23, pea aʻu ki he pēseti ʻe 40 ʻi he taʻu 1948 ki he 1950! Ke tokoni ki hono akoʻi ʻa e kau malanga foʻou ko ení, naʻe fakanofo ʻe he vaʻa ʻi Falaniseé ʻa e fuofua kau ʻovasia sēketi ʻi he 1948. ʻI he toko nima ko eni naʻe filí, ko e toko fā ai ko e kau Pōlani, pea ko e taha ʻo kinautolu ko Antoine Skalecki.

ʻOku kei ngāueʻaki ʻe he tokolahi ʻo e Kau Fakamoʻoni ʻa Sihova ʻi Falaniseé ʻa e ngaahi hingoa fakafāmili faka-Pōlani ʻenau fanga kuí, ʻa ia naʻa nau ngāue mālohi ʻi he keliʻanga malalá pea ʻi he ngāue fakamalangá. ʻI he ʻahó ni foki, ko e tokolahi taha ʻo e kau hiki ki Falaniseé ʻoku nau ako ai ʻa e moʻoní. Tatau ai pē pe ʻoku foki ʻa e kau ʻevangelioó ki honau fonua tupuʻangá pe nofo ai pē ʻi Falanisē, ʻoku nau muimui faivelenga ki he ʻalunga ʻo e kau fanongonongo ʻo e Puleʻangá ʻo hangē ko e kau Pōlani naʻe muʻomuʻa ʻia kinautolú.—Mei hotau kuohilí ʻi Falanisē.