1. Ko e hā ʻa e vahaʻa taimi ʻoku tau moʻui aí?

 ʻOKU tau moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia.” Talu mei he 1914, ʻi he taimi naʻe kamata ai ʻa e “ngaahi ʻaho fakaʻosí,” kuo fakaʻaʻau ke kovi ange ʻa e ngaahi tuʻunga ʻo e māmaní ʻi ha toe taimi ki muʻa. (2 Tīm. 3:1-5) Pea ʻe lava ke tau fakapapauʻi ʻe hokohoko atu ke kovi ange ʻa e māmaní, koeʻuhí ʻoku pehē ʻi he kikite ʻa e Tohi Tapú “ko e kau tangata fulikivanú mo e kau kākaá te nau ʻalu mei he kovi ki he kovi ange.”—2 Tīm. 3:13.

2. Ko e hā ʻa e faʻahinga fakafiefia ʻoku saiʻia ai ʻa e kakai tokolahi? (Sio ki he ʻuluaki fakatātā ʻi he kupú ni.)

² ʻI he fakafiefiá, ʻoku mamata mo fai ʻe he kakai tokolahi he ʻahó ni ʻa e ngaahi meʻa ʻoku fakamālohi pe taʻetaau pe kau ʻi he ngaahi meʻa fakafaimana mo fakatēmeniō. Ko e fakatātaá, ko e ʻInitanetí, ngaahi polokalama televīsoné, faivá, ʻū tohí mo e ngaahi makasiní ʻoku faʻa ʻai ai ʻa e fakamālohí mo e ʻulungaanga taʻetāú ke hā fakamānako. Pea ko e tōʻonga naʻe faʻa fehiʻa ai ʻa e  kakaí kuo hoko ia ʻo fakamānako ange pea fakalaoʻi ia he taimí ni ʻi he ngaahi feituʻu ʻe niʻihi. Ka ʻoku ʻikai ʻuhinga ia aí ʻoku fakahōifua kia Sihova ʻa e tōʻonga ko iá.—Lau ʻa e Loma 1:28-32.

3. Ko e hā e fakakaukau ʻa e kakai tokolahi fekauʻaki mo e faʻahinga ʻoku nau moʻuiʻaki e ngaahi tuʻunga ʻa e ʻOtuá?

³ ʻI he ʻuluaki senitulí, naʻe toe fiefia ʻa e kakaí ʻi heʻenau mamata ʻi he ngaahi meʻa naʻe fakamālohi mo taʻetāú. Kae ʻikai pehē ʻa e kau muimui ʻo Sīsuú, koeʻuhí naʻa nau moʻuiʻaki ʻa e ngaahi tuʻunga ʻa e ʻOtuá. Naʻe “puputuʻu” heni ʻa e kakai takatakai ʻia kinautolú. Ko e hā ʻa e olá? Naʻe fakakataʻaki ʻe he kakaí ʻa e kau Kalisitiané pea fakatangaʻi kinautolu. (1 Pita 4:4) ʻI he ʻahó ni foki, ʻoku fakakaukau ʻa e kakai tokolahi ko e faʻahinga ʻoku nau moʻuiʻaki ʻa e ngaahi tuʻunga ʻa e ʻOtuá ʻoku nau ngalikehe. Ko e moʻoni, ʻoku fakatokanga mai ʻa e Tohi Tapú ko e faʻahinga ʻoku muimui ʻi he faʻifaʻitakiʻanga ʻa Kalaisi Sīsuú “ʻe fakatangaʻi foki mo kinautolu.”—2 Tīm. 3:12.

4. Ko e hā ʻoku totonu ai ke ʻoua te tau ʻofa ki he māmani ko ení?

⁴ Kapau ʻoku tau loto ke fai ʻa e finangalo ʻo e ʻOtuá, heʻikai lava ke tau “ʻofa ki he māmaní pe ko e ngaahi meʻa ʻi he māmaní.” (Lau ʻa e 1 Sione 2:15, 16.) ʻOku puleʻi ʻa e māmaní ʻe Sētane, ko e “ʻotua ʻo e fokotuʻutuʻu ko ʻení.” ʻOkú ne ngāueʻaki ʻa e ngaahi lotú, founga-pulé, kautaha fakakomēsialé mo e mītiá ke takihalaʻi ʻa e kakaí. (2 Kol. 4:4; 1 Sio. 5:19) ʻOku ʻikai ke tau loto ke tākiekina kitautolu ʻe he māmaní, ko ia kuo pau ke tau fakaʻehiʻehi mei he ngaahi feohi koví. ʻOku fakatokanga mahino mai ʻa e Tohi Tapú: “ʻOua naʻa takihalaʻi kimoutolu. Ko e ngaahi feohi koví ʻokú ne maumauʻi ʻa e ngaahi anga ʻoku leleí.”—1 Kol. 15:33.

5, 6. Ko hai ʻoku totonu ke ʻoua te tau feohi mo iá, pea ko e hā hono ʻuhingá?

⁵ Ke tauhi maʻu hotau vahaʻangatae lelei mo Sihová, heʻikai ke tau fili ke feohi mo ha taha ʻokú ne fai ʻa e ngaahi meʻa ʻoku koví. ʻOku kau heni ʻa e kakai ʻoku nau pehē ʻoku nau lotu kia Sihova ka ʻoku nau fili ke talangataʻa kiate ia. Kapau ʻe fai ʻe ha faʻahinga pehē ha angahala mamafa pea ʻikai fakatomala, ʻe taʻofi leva ʻetau feohi mo kinautolú.—Loma 16:17, 18.

⁶ ʻOku faʻa loto ʻa e kakaí ke fakahōhōʻiaʻi honau ngaahi kaungāmeʻá pea nau tali kinautolu. Ko ia kapau ʻoku tau feohi mo e faʻahinga ʻoku talangataʻa ki he ʻOtuá, ʻe fakataueleʻi nai kitautolu ke fai ʻa e meʻa ʻoku nau faí. Ko e fakatātaá, kapau ʻoku tau feohi vāofi mo e kakai ʻoku feʻauakí, te tau hoko ʻo hangē ko kinautolú. Kuo hoko ia ki he niʻihi hotau fanga tokouá mo e fanga tuofāfiné. Pea ko e faʻahinga naʻe ʻikai ke fakatomalá naʻe tuʻusi. (1 Kol. 5:11-13) Kapau heʻikai ke nau fakatomala, ʻe lava ke hoko honau tuʻungá ʻo hangē ko ia ʻoku fakamatalaʻi ʻe Pitá.—Lau ʻa e 2 Pita 2:20-22.

7. Ko hai ʻoku totonu ke tau fili ke hoko ko hotau ngaahi kaumeʻa ofí?

⁷ Neongo ʻoku tau loto ke anga-lelei ki he tokotaha kotoa, ʻoku totonu ke ʻoua ʻe hoko ʻo kaumeʻa vāofi mo e faʻahinga ʻoku nau talangataʻa ki he ʻOtuá. ʻOku hala ke faialea ha taha ʻo e Kau Fakamoʻoni ʻa Sihová mo ha taha ʻoku ʻikai ko ha sevāniti ʻosi papitaiso faitōnunga ʻa Sihova. ʻOku mahuʻinga ange ke maʻu ʻa e hōifua ʻa e ʻOtuá ʻi hano tali kita ʻe he kakai ʻoku ʻikai ke ʻofa kiate iá. ʻOku totonu ke tau kaumeʻa ofi pē mo e faʻahinga ʻoku nau fai ʻa e finangalo ʻo e ʻOtuá. Naʻe pehē ʻe Sīsū: “ʻIlonga ʻa ia ʻokú ne fai ʻa e finangalo ʻo e ʻOtuá, ko ia ia ʻa hoku tokouá mo hoku tuofefiné mo ʻeku faʻeé.”—Mk. 3:35.

8. Naʻe anga-fēfē hono uesia ʻe he ngaahi feohi koví ʻa e kakai ʻIsileli ʻi he kuonga muʻá?

 ⁸ ʻOku iku ʻa e ngaahi feohi koví ki he fakatamaki. Ko e fakatātaá, ko e meʻa naʻe hoko ki he kau ʻIsilelí. Ki muʻa ke nau aʻu ki he Fonua ʻo e Talaʻofá, naʻe fakatokanga ʻa Sihova kia kinautolu fekauʻaki mo e kakai kuo nau ʻosi ʻi aí. Naʻá ne pehē: “ʻE ʻikai te ke lotu ki honau ngaahi ʻotua, pea ʻe ʻikai te ke tauhi ki ai, pea ʻe ʻikai te ke fai ki heʻenau ngaahi ngaue: ka te ke matuʻaki fakaʻauha kinautolu, pea te ke laiki ʻaupito ʻenau ngaahi pou tapu. Pea te mou tauhi ʻa Sihova ko homou ʻOtua.” (ʻEki. 23:24, 25) Ka ko e tokolahi taha ʻo e kau ʻIsilelí naʻa nau talangataʻa ki he ngaahi fakahinohino ʻa e ʻOtuá pea hoko ʻo taʻefaitōnunga kiate ia. (Saame 106:35-39) Ko e hā hono nunuʻá? Ki mui aí, naʻe talitekeʻi ʻe Sihova ʻa e puleʻanga ʻIsilelí ka ne fili ʻe ia ʻa e fakatahaʻanga Kalisitiané ko ʻene kakai.—Māt. 23:38; Ngā. 2:1-4.

9. Ko e hā ʻe lava ai ke fakatuʻutāmaki ʻa e ngaahi mītia ʻi he māmani ko ení?

⁹ Ko e lahi ʻo e ngaahi mītia ʻi he māmani ko ení, hangē ko e ngaahi polokalama televīsoné, uepisaití mo e ʻū tohí ʻe lava ke ne maumauʻi hotau vahaʻangatae mo Sihová. ʻOku ʻikai fakataumuʻa ʻa e faʻahinga fakamatala ko ení ke tokoniʻi ʻa e kau Kalisitiané ke tui kia Sihova mo ʻene ngaahi talaʻofá. ʻI hono kehé, ʻoku fakaʻaiʻai ai ʻa e kakaí ke falala ki he māmani kovi ʻo Sētané. Ko ia ʻoku fiemaʻu ke tau tokanga ʻaupito ke ʻoua te tau fili ke mamata, lau, pe fanongo ki ha meʻa ʻe lava ke ʻai ai kitautolu ke maʻu ʻa e “ngaahi holi fakamāmaní.”—Tai. 2:12.

10. Ko e hā ʻe hoko ki he ngaahi mītia ʻi he māmani ko ení?

¹⁰ ʻE vavé ni ke fakaʻauha ʻa e māmani ʻo Sētané mo hono ngaahi mītia fakatupu maumaú. ʻOku pehē ʻe he Tohi Tapú: “ʻOku fakaʻaʻau ke mole atu ʻa e māmaní pea pehē ki he holi ʻaʻaná, ka ko ia ʻokú ne fai ʻa e finangalo ʻo e ʻOtuá ʻokú ne nofo maʻu ʻo taʻengata.” (1 Sio. 2:17) ʻI he tuʻunga meimei tatau, naʻe hiva ʻa e tokotaha-tohi-sāmé: “Ko e kau taʻe fai totonu ʻe tuʻusi ia.” Naʻá ne tānaki mai leva: “Ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” Ko e hā hono fuoloá? “Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.”—Saame 37:9, 11, 29.

11. ʻOku anga-fēfē hono tokoniʻi kitautolu ʻe he ʻOtuá ke tau faitōnunga ai pē kiate iá?

¹¹ ʻI he ʻikai hangē ko e māmani ʻo Sētané, ʻoku tokoniʻi kitautolu ʻe he kautaha ʻa Sihová ke moʻui ʻi ha founga ʻoku taki atu ai ki he moʻui taʻengatá. Naʻe lotu ʻa Sīsū kia Sihova: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.” (Sione 17:3) ʻOku ngāueʻaki ʻe Sihova ʻene kautahá ke tokonaki mai ʻa e meʻa kotoa ʻoku fiemaʻu ke tau hoko ai ʻo ʻiloʻi iá. Ko e fakatātaá, kuo tau maʻu ʻa e ngaahi makasini, polosiua, tohi, vitiō mo e Uepisaiti ke tokoniʻi kitautolu ke hanganaki tauhi ki he ʻOtuá. ʻOku toe fokotuʻutuʻu ʻe heʻene kautahá ha ngaahi fakataha tuʻumaʻu ʻi he fakatahaʻanga ʻe 110,000 tupu ʻi he kotoa ʻo e māmaní. Ko e meʻa ʻoku tau ako mei he Tohi Tapú ʻi he ngaahi fakataha ko iá pea ʻi he ngaahi ʻasemipilī lalahí ʻoku fakaivimālohiʻi ai ʻetau tui kia Sihova mo ʻene ngaahi talaʻofá.—Hep. 10:24, 25.

12. Fakamatalaʻi ʻa e fekau Fakatohitapu ke mali “ʻi he ʻEikí pē.”

¹² Ko e kau Kalisitiane ʻoku loto ke malí ʻoku fiemaʻu ke nau tokanga ʻaupito fekauʻaki mo e faʻahinga ʻoku nau fili ke feohi mo iá. ʻOku fakatokanga mai ʻa e Folofola ʻa e ʻOtuá: “ʻOua te mou hoko ʻo haʻi hōhoatamaki fakataha mo e kau taʻetuí. He ʻe  anga-fēfē ha feohi ʻa e māʻoniʻoní mo e maumau-laó? Pe, ʻe anga-fēfē ha ʻinasi taha ʻa e māmá mo e poʻulí?” (2 Kol. 6:14) ʻOku tala ʻe he Tohi Tapú ki he kau sevāniti ʻa e ʻOtuá ke nau mali “ʻi he ʻEikí pē,” ʻa ia ko e mali pē mo ha taha kuo ʻosi fakatapui mo papitaiso pea ʻokú ne moʻuiʻaki ʻa e ngaahi tuʻunga ʻa Sihová. (1 Kol. 7:39) ʻI hoʻo mali mo ha taha pehē, ha taha ʻoku ʻofa kia Sihova, te ke maʻu ai ha hoa te ne tokoniʻi koe ke faitōnunga ai pē ki he ʻOtuá.

13. Ko e hā ʻa e fekau fekauʻaki mo e malí naʻe ʻoange ʻe he ʻOtuá ki he kau ʻIsilelí?

¹³ ʻOku ʻiloʻi ʻe Sihova ʻa e meʻa ʻoku lelei taha kia kitautolú, pea ko ʻene fekau ke mali “ʻi he ʻEikí pē” ʻoku ʻikai ko ha meʻa foʻou ia. Ko e fakatātaá, fakakaukau ki he meʻa naʻe tala ʻe Sihova ki he kau ʻIsilelí fekauʻaki mo e kakai naʻe ʻikai ke tauhi kiate iá. Fakafou ʻia Mōsese, naʻá ne fekau: “Pea ʻe ʻikai te ke femaliʻaki mo kinautolu; ʻe ʻikai te ke ʻatu ho ʻofefine ki hoʻona foha, pea ʻe ʻikai te ke toʻo hano ʻofefine maʻa ho foha. He te ne fakaafe ho foha mei he muimui kiate au ke nau tauhi ʻotua kehe: pea ʻe langaʻi ai ʻa e houhau ʻa Sihova kiate kimoutolu, ʻo ke ʻauha vave ai.”—Teu. 7:3, 4.

14, 15. Ko e hā naʻe hoko kia Solomone koeʻuhí ko ʻene tukunoaʻi ʻa e fekau ʻa Sihová?

¹⁴ ʻI he hili pē ʻa e hoko ʻa Solomone ko e tuʻi ʻo ʻIsilelí, naʻá ne lotu ki ha poto, pea naʻe tali ʻe Sihova ʻene lotú. Ko ia naʻe hoko ʻa Solomone ʻo ʻiloa ko e pule fakapotopoto ʻo ha puleʻanga lavameʻa. Ko hono moʻoní, naʻe maongo moʻoni ki he kuini ʻo Sipá ʻa e poto ʻo Solomoné ʻo ne pehē ai kiate ia: “ʻOku hulu atu hoʻo poto mo ho monuʻia ʻi he ongoongo naʻa ku maʻu.” (1 Tuʻi 10:7) Ka ko e faʻifaʻitakiʻanga ʻa Solomoné ʻoku toe akoʻi mai ai ʻa e meʻa ʻe lava ke hoko ki ha taha ʻokú ne tukunoaʻi ʻa e fekau ʻa e ʻOtuá pea mali mo ha taha ʻoku ʻikai ke tauhi kia Sihova.—Koh. 4:13.

¹⁵ Neongo naʻe tāpuakiʻi ʻe Sihova ʻa Solomone, naʻá ne talangataʻa ki he fekau māʻalaʻala ʻa e ʻOtuá. ‘Naʻe ʻofa ʻa Solomone ki he kau fefine muli tokolahi’ ʻa ia naʻe ʻikai ke nau tauhi kia Sihova, pea naʻe faifai atu ʻo ne maʻu ha uaifi ʻe 700 mo e sinifu ʻe 300. Ko e hā hono nunuʻá? ʻI he motuʻa ange ʻa Solomoné “naʻe fakaafe ʻe hono ngaahi uaifi hono loto ke muimui ki he ngaahi ʻotua kehe: . . . Pea fai ʻe Solomone ʻa e meʻa naʻe tau kovi ki he finangalo ʻo Sihova.” (1 Tuʻi 11:1-6) Naʻe uesia ia ʻe he ngaahi feohi koví pea naʻe ʻikai ke ne faitōnunga ai pē kia Sihova. Kapau naʻe lava ke hoko eni kia Solomone, ʻe lava ke hoko ki ha taha pē. Ko e ʻuhinga ia heʻikai ke tau teitei fakakaukau ai ke mali mo ha taha ʻoku ʻikai ke ʻofa kia Sihova!

16. Ko e hā ʻa e faleʻi ʻoku ʻoange ʻe he Tohi Tapú ki ha tokotaha kuó ne mali mo ha taha taʻetui?

¹⁶ Fēfē kapau ʻoku hoko ha taha ko ha tokotaha lotu kia Sihova neongo kuó ne mali mo ha taha taʻetui? ʻOku pehē ʻe he Tohi Tapú: “Ko kimoutolu ngaahi uaifi, mou anganofo ki homou ngaahi husepānití tonu, koeʻuhí, kapau ʻoku ʻi ai ha faʻahinga ʻoku ʻikai te nau talangofua ki he folofolá, ʻe lava ke ikunaʻi mai kinautolu ʻo ʻikai ʻaki ha lea kae fakafou ʻi he ʻulungaanga ʻa honau ngaahi uaifí.” (1 Pita 3:1) Ko e moʻoni, ʻoku toe ngāueʻaki eni ki ha husepāniti kapau ko hono uaifí ʻoku ʻikai lotu kia Sihova. ʻOku māʻalaʻala ʻa e Folofola ʻa e ʻOtuá: Hoko ko ha husepāniti pe uaifi lelei, pea ngāueʻaki ʻa e ngaahi tuʻunga ʻa e ʻOtuá ʻi he nofo malí. Pea ʻi hono fakatokangaʻi ʻe ho hoá kuó ke liliu ʻo lelei angé, te ne loto foki ke tauhi kia Sihova. Kuo hokosia eni ʻe he ngaahi hoa mali tokolahi.

17, 18. Ko e hā naʻá ne tokoniʻi ʻa Noa ke hao ʻi he Lōmakí, pea ko e hā naʻá ne tokoniʻi ʻa e kau Kalisitiane ʻi he ʻuluaki senitulí ke nau hao ʻi hono fakaʻauha ʻo Selusalemá?

¹⁷ ʻE lava ke tākiekina koe ʻe he ngaahi feohi koví ke ke talangataʻa kia Sihova, ka  ʻe lava ʻe he ngaahi feohi leleí ke ne tokoniʻi koe ke ke faitōnunga kiate ia. Ko Noa ko ha faʻifaʻitakiʻanga lelei kia kitautolu. Naʻá ne moʻui ʻi he lolotonga ʻo e taimi naʻe “fakautuutu ʻa e kovi ʻa e tangata ʻi mamani” pea naʻe “kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.” (Sēn. 6:5) Naʻe kovi ʻaupito ʻa e kakaí ʻo fili ai ʻa Sihova ke fakaʻauha ʻa e māmani fulikivanu ko iá. Ka naʻe kehe ʻa Noa ia. ʻOku ui ia ʻe he Tohi Tapú ko ha “tangata angatonu” ʻa ia ‘naʻe takaua mo e ʻOtuá.’—Sēn. 6:7-9.

¹⁸ Naʻe feohi pē ʻa Noa mo e kakai naʻe ʻofa kia Sihová. Ko ia mo hono fāmilí naʻa nau hanganaki femoʻuekina ʻi hono langa ʻa e ʻaʻaké, pea toe hoko ko ha “tokotaha malangaʻi ʻo e māʻoniʻoní.” (2 Pita 2:5) Ko Noa, uaifi ʻo Noá, ko hono foha ʻe toko tolú mo honau ngaahi uaifí naʻa nau feohi lelei pē ʻiate kinautolu. Naʻa nau hanganaki femoʻuekina ʻi hono fai ʻa e ngaahi meʻa naʻe hōifua ai ʻa e ʻOtuá, pea ko hono olá, naʻa nau hao ʻi he Lōmakí. Ko honau hako ʻa kitautolu kotoa he ʻaho ní, ko ia ʻoku totonu ke tau houngaʻia ʻi he talangofua ʻa Noa mo hono fāmilí kia Sihova pea fakaʻehiʻehi mei he ngaahi feohi koví. ʻI he founga meimei tatau, ko e kau Kalisitiane ʻi he ʻuluaki senitulí naʻe ʻikai ke nau feohi mo e kakai naʻe ʻikai ke nau ʻofa kia Sihová. Naʻa nau talangofua kiate ia pea hao ʻi hono fakaʻauha ʻo Selusalema ʻi he 70 T.S.—Luke 21:20-22.

19. Ko e hā te ne tokoniʻi kitautolu ke faitōnunga ai pē kia Sihová?

¹⁹ Hangē ko Noá mo hono fāmilí, mo e kau Kalisitiane ʻi he ʻuluaki senitulí, ʻoku ʻikai ke tau feohi mo ha taha ʻoku ʻikai ke ʻofa kia Sihova. ʻOku tau maʻu ʻa e fanga tokoua mo e fanga tuofāfine faitōnunga ʻe laui miliona ʻa ia ʻe lava ke tau fili ko hotau ngaahi kaumeʻa. Te nau tokoniʻi kitautolu ke “tuʻu maʻu ʻi he tuí” lolotonga ʻa e fuʻu taimi faingataʻa ko ení. (1 Kol. 16:13; Pal. 13:20) Fakakaukau ki he fakaofo ʻo e hao atu ʻi he ngataʻanga ʻo e māmani fulikivanu ko ení pea moʻui ʻi he māmani foʻou ʻa Sihová! He mahuʻinga ē ke fakaʻehiʻehi he taimí ni mei he ngaahi feohi koví!