NAʻE fanauʻi au ʻi he 1927 ʻi he kiʻi kolo ko Wakaw, Saskatchewan, Kānata. Naʻe maʻu ʻe he tangataʻeikí mo e fineʻeikí ʻa e fānau ʻe toko fitu, fā tangata mo e tolu fefine, ko ia naʻá ku ʻiloʻi ai mei heʻeku kei siʻi ʻa e anga ʻo e feohi mo e kakaí.

Naʻe mahinoʻi ʻe homau fāmilí ʻa e faingataʻa fakaʻekonōmika ʻo e 1930 tupú ʻa ia ʻoku ʻiloa ko e Fuʻu Tōlalo Fakaʻekonōmika. Naʻe ʻikai ke mau tuʻumālie, ka naʻe ʻi ai maʻu pē ʻemau meʻakai. Naʻe ʻi ai ʻemau fanga moa mo ha pulu, ko ia naʻe ʻi ai maʻu pē ʻa e fuaʻimoa, huʻakau, kilimi, siisi mo e pata. Hangē ko ia ʻoku lava ke ke sioloto atu ki aí, ko e kotoa ʻi homau fāmilí naʻe ʻi ai ʻemau ngāue.

ʻOku lahi ʻeku ngaahi manatu melie fekauʻaki mo e taimi ko iá, hangē ko e ʻalaha ʻo e ʻulu ʻāpelé ʻi he lokí. He ko ē, ʻi he taimi naʻe ʻalu ai ʻa e tangataʻeikí ki kolo ʻi he taimi fakatōlaú ke fakatau atu ai ʻa e ngaahi meʻa mei he fāmá, naʻá ne faʻa foki mai mo e puha ʻāpele toki toli. He foʻi kai ʻāpele ifo ē kia kimautolu ʻi he ʻaho kotoa!

Naʻá ku taʻu ono ʻi he taimi naʻe fanongo ai ʻeku ongo mātuʻá ʻi he moʻoní. Ko hona foha lahí, ʻa Johnny, naʻá ne mate taimi nounou pē mei hono fanauʻí. Naʻe loto-mamahi lahi ʻeku ongo mātuʻá ʻo na ʻeke ai ki heʻemau pātelé, “ʻOku ʻi fē ʻa Johnny?” Naʻe pehē ʻe he pātelé koeʻuhi ko e teʻeki ai ke papitaiso ʻa e pēpeé, heʻikai ke ʻi hēvani ia. Ka, naʻá ne ʻi Limipō. Naʻe toe pehē ʻe he pātelé kapau ʻe totongiʻi ia ʻe heʻeku ongo mātuʻá, te ne lotu maʻa Johnny ke ne ʻalu mei Limipō ki hēvani. Naʻá ke mei ongoʻi fēfē? Naʻe loto-mamahi lahi ʻa e tangataʻeikí mo e fineʻeikí ʻo ʻikai ai te na toe lea ki he pātele ko iá. Neongo ia, naʻá na kei fifili pē pe ko e hā naʻe hoko kia Johnny.

ʻI he ʻaho ʻe taha naʻe maʻu ʻe he fineʻeikí ha kiʻi tohi naʻe fakakaveinga ko e Where Are the Dead? naʻe pulusi ʻe he Kau Fakamoʻoni ʻa Sihová. Naʻá ne vēkeveke ke lau ia. ʻI he foki mai ʻa e tangataʻeikí ki ʻapí, naʻá ne tala ange fiefia kiate ia: “ʻOku ou ʻilo ʻa e feituʻu ʻoku ʻi ai ʻa Johnny! ʻOkú ne mohe he taimí ni, ka ʻe ʻi ai ʻa e ʻaho te ne toe ʻā hake ai.” ʻI he efiafi ko iá naʻe lau ʻe he tangataʻeikí ʻa e kiʻi tohí kotoa. Naʻe fiemālie ʻa e fineʻeikí mo e tangataʻeikí ke ʻiloʻi ʻa e lau ʻa e Tohi Tapú ʻoku mohe pē ʻa e kau maté pea ʻe ʻi ai ʻa e toetuʻu ʻi he kahaʻú.—Koh. 9:5, 10; Ngā. 24:15.

Ko e ʻilo naʻá na maʻú naʻe liliu ai ʻemau moʻuí ki he lelei ange, ʻo mau maʻu ai ʻa e fiemālie mo e fiefia. Naʻe kamata ke na ako Tohi Tapu mo e Kau Fakamoʻoní pea maʻu ʻa e ngaahi fakatahá ʻi ha kiʻi fakatahaʻanga ʻi Wakaw, ʻa ia ko e tokolahi taha aí naʻa nau haʻu mei ʻIukalaine. Taimi nounou mei ai naʻe kau ʻa e fineʻeikí mo e tangataʻeikí ʻi he ngāue fakamalangá.

ʻIkai fuoloa mei ai, naʻa mau hiki ki British Columbia pea naʻe talitali māfana kimautolu ʻe he fakatahaʻangá. Naʻá ku manatu fiefia ki heʻemau teuteu fakafāmili ʻa e Taua Leʻo ki he fakataha ʻi he Sāpaté. Naʻe fakatupulekina ʻe he tokotaha kotoa  ʻo kimautolu ʻa e ʻofa lahi kia Sihova mo e moʻoni Fakatohitapú. ʻOku lava ke u sio ki hono fakakoloa ʻemau moʻuí mo hono tāpuakiʻi kimautolu ʻe Sihová.

Ko hono moʻoní, naʻe ʻikai ko e meʻa faingofua taha kia kimautolu fānaú ke lea ki he kakaí fekauʻaki mo ʻemau tuí. Neongo ia, naʻe tokoni moʻoni ʻa ʻeku faʻa teuteu mo hoku tehina ko Eva ʻa e tuʻuaki fakamāhina ki he ngāue fakamalangá pea fakahāhaaʻi ia ʻi he Fakataha Ngāué. Ko ha founga lelei ia kia kimaua, neongo ʻema mā ke ako ke lea ki he niʻihi kehé fekauʻaki mo e Tohi Tapú. ʻOku ou houngaʻia moʻoni ʻi he founga naʻe akoʻi ai kimaua ke malangá!

Ko e taha ʻo e ngaahi meʻa mahuʻinga ʻi heʻemau kei siʻí ko ʻemau nofo mo e kau sevāniti taimi-kakató. Ko e fakatātaá, ʻi he taimi naʻe ʻaʻahi mai ai ki heʻemau fakatahaʻangá ʻemau ʻovasia sēketí, ʻa Jack Nathan, naʻa mau fiefia ʻaupito ʻi heʻene nofo ʻi homau ʻapí. a Naʻe fakafiefia ʻene ngaahi talanoá, pea ko ʻene fakaongoongolelei loto-moʻoní naʻe ʻai ai ke mau loto ke tauhi faitōnunga kia Sihova.

ʻOku ou manatuʻi ʻeku fakakaukau, “ʻI he taimi te u fuʻu lahi aí, te u loto ke hangē ko Tokoua Nathan.” Naʻá ku toki ʻiloʻi ki mui ai ko ʻene faʻifaʻitakiʻangá naʻe tokoni ia ke teuʻi ai au ki he ngāue taimi-kakató. ʻI heʻeku taʻu 15, naʻá ku fakapapauʻi ke tauhi kia Sihova. ʻI he 1942, naʻá ku papitaiso mo Eva.

Lolotonga ʻa e Tau II ʻa Māmaní ʻi he taimi naʻe mālohi ai ʻa e mamahiʻi-fonuá, naʻe tuli ai mei he akó ʻe ha faiako ʻiteʻita ko Miss Scott, ʻa hoku tehina ʻe ua mo e tuongaʻane ʻe taha. Ko e hā hono ʻuhingá? Koeʻuhí naʻa nau fakafisi ke salute ki he fuká. Naʻe fetuʻutaki leva ʻa Scott ki heʻeku faiakó ʻo fakaʻaiʻai ia ke ne tuli au. Ka naʻe pehē ʻe heʻeku faiakó, “ʻOku tau nofo ʻi ha fonua tauʻatāina, pea ʻoku tau maʻu ʻa e totonu ke ʻoua ʻe kau ki he ngaahi kātoanga mamahiʻi-fonuá.” Neongo ʻa e tenge lahi meia Miss Scott, naʻe tala ange papau ʻe heʻeku faiakó, “Ko ʻeku filí eni.”

Naʻe tali mai ʻe Miss Scott: “ʻIkai, ʻoku ʻikai ko hoʻo fili. Te u līpooti koe kapau heʻikai te ke tuli ʻa Melita.” Naʻe tala ange ʻe heʻeku faiakó ki heʻeku ongo mātuʻá ke kei hoko atu ʻene faiakó, naʻe ʻikai haʻane toe fili ka ko hono tuli au, neongo naʻá ne tui naʻe hala ke ne fai pehē. Kae kehe, naʻe lava ke mau maʻu ha ngaahi lēsoni ʻo ako ia ʻi ʻapi. Taimi nounou mei ai, naʻa mau hiki ki ha feituʻu ʻoku maile ʻe 20 (kilomita ʻe 32) hono mamaʻó, ʻa ia naʻe tali ai kimautolu ʻi ha ʻapiako ʻe taha.

ʻI he ngaahi taimi ʻo e taú naʻe tapui ai ʻetau ʻū tohí; neongo ia naʻa mau ʻalu mei he fale ki he fale mo e Tohi Tapú. Ko hono olá, naʻa mau pōtoʻi ʻi hono vahevahe hangatonu ʻa e ongoongo lelei ʻo e Puleʻangá mei he Folofolá. ʻIkai ko ia pē, naʻe tokoniʻi ai kimautolu ke tupulaki fakalaumālie pea hokosia ʻa e poupou ʻa Sihová.

ʻI he ʻosi pē ʻeku akó mo Eva, naʻá ma hū ki he ngāue tāimuʻá. Ko e ngāue fakamāmaní, naʻá ku ʻuluaki ngāue ʻi ha kiʻi falekoloa. Faifai atu pē, naʻá ku ako ʻi ha māhina ʻe ono ki he ngaahi ʻulú, ʻa e meʻa naʻá ku saiʻia hono fai ʻi ʻapí. Naʻá ku ngāue he ʻaho ʻe ua ʻi he uike ʻi ha fale ngaahi ʻulu, pea toe akoʻi ʻa e ngaahi ʻulú tuʻo ua he māhina. ʻI he founga ko iá naʻe tokoniʻi ai au ʻi heʻeku ngāue taimi-kakató.

ʻI he 1955, naʻá ku loto ke maʻu ʻa e ʻasemipilī “Puleʻanga Ikuna” ʻi Niu ʻIoke, ʻAmelika, mo  Nuremberg, Siamane. Ka, ki muʻa ke u ʻalu ki Niu ʻIoké, naʻá ku fetaulaki mo Tokoua Nathan Knorr mei he ʻuluʻi ʻapitanga ʻi māmaní. Ko ia mo hono uaifí naʻá na maʻu ʻa e fakataha-lahi ʻi Vancouver, Kānata. Lolotonga ʻena ʻaʻahí, naʻe kole mai ai ke u ngaahi ʻa e ʻulu ʻo Tuofefine Knorr. Naʻe saiʻia ai ʻa Tokoua Knorr peá ne loto ke feʻiloaki mo au. ʻI heʻemau talanoá, naʻá ku tala ange naʻá ku fokotuʻutuʻu ke ʻalu ki Niu ʻIoke ki muʻa ke u ʻalu ki Siamané. Naʻá ne fakaafeʻi au ke ngāue ʻi he Pēteli ʻi Brooklyn ʻi he ʻaho ʻe hiva.

Ko e fononga ko iá naʻá ne liliu ʻeku moʻuí. ʻI Niu ʻIoke, naʻá ku fetaulaki ai mo ha kiʻi talavou ko Theodore (Ted) Jaracz. Taimi nounou hili ʻeku fetaulaki mo iá, naʻá ku ʻohovale ʻi heʻene ʻeke mai, “Ko e tāimuʻa koe?” Naʻá ku tala ange, “ʻIkai.” Naʻe fanongo mai hoku kaumeʻa ko LaVonne peá ne pehē mai, “ʻIo, ko e tāimuʻa.” ʻI he puputuʻú, naʻe ʻeke ange ʻe Ted kia LaVonne, “Sai, ko hai ʻokú ne ʻiloʻi lelei angé, ko koe pe ko ia?” Naʻá ku tala ange naʻá ku tāimuʻa pea ʻoku ou taumuʻa ke toe kamata ʻi heʻeku foki mai pē mei he fakataha-lahí.

Naʻe fanauʻi ʻa Ted ʻi he 1925 ʻi Kentucky, ʻAmelika, naʻá ne fakahāhā ʻene fakatapui kia Sihová ʻi hono taʻu 15. Neongo naʻe ʻikai haʻu ki he moʻoni ha taha ʻi hono fāmilí, naʻá ne hoko ko ha tāimuʻa tuʻumaʻu ʻi he taʻu ʻe ua ki mui ai. Naʻe kamata mei ai ʻene ngāue ʻi he meimei taʻu ʻe 67 ʻi he ngāue taimi-kakató.

ʻI Siulai 1946, ʻi he taʻu 20 ʻa Ted, naʻá ne maʻu tohi fakamoʻoni ako ai mei he kalasi hono fitu ʻo e Akoʻanga Tohi Tapu Taua Leʻo ko Kiliatí. Hili iá, naʻá ne ngāue ko ha ʻovasia fefonongaʻaki ʻi Cleveland, Ohio. ʻI he taʻu nai ʻe fā ki mui ai, naʻe vaheʻi ia ke ne hoko ko ha sevāniti vaʻa ʻi ʻAositelēlia.

Naʻe ʻi he fakataha-lahi ʻi Nuremberg, Siamane ʻa Ted, pea naʻá ma fakamoleki fakataha ai ha taimi. Naʻe fakatupulekina ai ʻema feʻofaʻakí. Naʻá ku fiefia ʻi he fakatefito ʻene ngaahi taumuʻá ʻi he ngāue ʻaufuatō kia Sihová. Ko ha tokotaha faitōnunga moʻoni ia, ʻi heʻene līʻoa kakato kae anga-lelei mo anga-fakakaumeʻa. Naʻá ku ongoʻi naʻá ne fakamuʻomuʻa ʻa e lelei ʻa e niʻihi kehé ʻi heʻene leleí. Hili ʻa e fakataha-lahí, naʻe foki ʻa Ted ki ʻAositelēlia ka u foki au ki Vancouver, ka naʻá ma fetohiʻaki maʻu pē.

Hili ʻa e taʻu ʻe nima ʻi ʻAositelēliá, naʻe foki ʻa Ted ki ʻAmelika peá ne haʻu leva ʻo tāimuʻa ʻi Vancouver. Naʻá ku fiefia ʻi hono ʻiloʻi naʻe saiʻia lahi hoku fāmilí ʻiate ia. Ko hoku tuongaʻane lahí, ʻa Michael, naʻá ne feinga maʻu pē ke maluʻi au, pea naʻá ne tokanga fekauʻaki mo au kapau ʻe saiʻia ha kiʻi talavou ʻiate au. Kae kehe, naʻe vave ʻa e hoko ʻa Michael ʻo saiʻia ʻia Ted. Naʻá ne pehē, “Melita,” “kuó ke maʻu ha tangata lelei heni. ʻOku totonu ke ke tokangaʻi lelei ia pea ʻoku fakapotopoto ke ʻoua ʻe tukuange ia.”

Naʻá ku hoko mo au foki ʻo ʻofa lahi ʻia Ted. Naʻá ma mali ʻi Tīsema 10, 1956. Naʻá ma tāimuʻa fakataha ʻi Vancouver, pea ʻi Kalefōnia, pea naʻe vaheʻi leva kimaua ki he ngāue sēketí ʻi Missouri mo Arkansas. ʻI he taʻu nai ʻe 18, naʻá ma ʻi he ʻapi kehekehe ʻi he uike taki taha ʻi heʻema ngāue fefonongaʻakí ʻi he ngaahi kolo lalahi ʻo ʻAmeliká. Naʻá ma maʻu ha ngaahi hokosia fakaofo ʻi he ngāue fakafaifekaú, pea pehē ki he feohi fiefia mo e fanga tokouá mo e fanga tuofāfiné. Neongo naʻe ʻikai faingofua ʻa e ʻalu mei he feituʻu ki he feituʻu ʻi he uike taki taha, ka naʻá ma fiefia ʻi he ngāue fefonongaʻakí.

Ko e meʻa ʻe taha naʻe tautefito ai ʻeku fakaʻapaʻapaʻi ʻa Ted naʻe ʻikai ke ne fakamaʻamaʻaʻi hono vahaʻangatae mo Sihová. Naʻá ne koloaʻaki ʻene ngāue toputapu ki he Tokotaha lahi taha ʻi he ʻunivēsí. Naʻá ma saiʻia ʻi he lau mo ako fakataha ʻa e  Tohi Tapú. ʻI he poʻulí, ki muʻa ke ma mohé, naʻá ma tūʻulutui ʻi he veʻe mohengá, ʻo ne lotu maʻa kimaua. Peá ma taki taha fai leva ʻema lotu. Naʻá ku ʻiloʻi maʻu pē ʻa e taimi ʻoku hohaʻa ai ʻa Ted ki ha meʻa. Naʻá ne tuʻu hake mei he mohengá ʻo toe tūʻulutui, pea lotu fakalongolongo fuoloa. Naʻá ku houngaʻia ʻaupito ʻi heʻene loto ke lotu kia Sihova fekauʻaki mo ha meʻa lahi mo siʻisiʻi.

Hili atu ha ngaahi taʻu mei heʻema malí, naʻe fakamatalaʻi mai ʻe Ted te ne kamata ke kai ʻa e mā mo inu ʻa e uaine ʻi he Fakamanatú. “Kuó u lotu fakamātoato fekauʻaki mo e meʻá ni ke fakapapauʻi ʻoku ou fai ʻa e meʻa ʻoku loto ʻa Sihova ke u faí,” ko ʻene leá ia. Naʻe ʻikai ʻaupito ke u ʻohovale ʻi he faifai atu ʻo pani ia ʻe he laumālie ʻo e ʻOtuá ke ne ngāue ʻi hēvaní. ʻOku ou vakai ki ai ko ha monū ia ke u poupou ki ha taha ʻo e fanga tokoua ʻo Kalaisí.—Māt. 25:35-40.

ʻI he 1974, naʻá ma ʻohovale lahi, ʻi hono fakaafeʻi ʻa Ted ke hoko ko ha mēmipa ʻo e Kulupu Pule ʻo e Kau Fakamoʻoni ʻa Sihová. ʻI he taimi ko iá, naʻe fiemaʻu ke ma ngāue ʻi he Pēteli ʻi Brooklyn. Lolotonga hono tokangaʻi ʻe Ted hono ngaahi fatongia ʻi he Kulupu Pulé, naʻá ku ngāue ko ha tokotaha fakamaʻa ʻapi pe ʻi he fale ngaahi ʻulú.

Ko e konga ʻo e ngaahi fatongia ʻo Ted, ko hono vaheʻi ia ke ʻaʻahi ki he ngaahi vaʻa kehekehe. Naʻá ne mahuʻingaʻia tefito ʻi he ngāue fakamalanga ʻi he ngaahi fonua kominiusi ʻi ʻIulope Hahaké. Lolotonga ha mālōlō ʻeveʻeva ʻi Suēteni, naʻe pehē mai ai ʻe Ted: “Melita, ʻoku tapui ʻa e ngāue fakamalanga ʻi Pōlaní, pea te u saiʻia ke tokoni ki he fanga tokoua ʻi aí.” Ko ia naʻá ma maʻu ha visa ʻo ma ʻalu ai ki Pōlani. Naʻe fakataha ʻa Ted mo e niʻihi ʻo e fanga tokoua ʻoku nau tokangaʻi ʻetau ngāué, pea naʻa nau lue mamaʻo koeʻuhí ke ʻoua ʻe fanongo atu ha taha ki heʻenau talanoá. Naʻe fai ʻe he fanga tokouá ha fakataha mātuʻaki mahuʻinga ʻi he ʻaho ʻe fā, ka naʻá ku fiefia ʻi he sio ki he fiefia ʻa Ted ʻi he tokoniʻi hono fāmili fakalaumālié.

Ko e taimi hono hoko naʻá ma ʻaʻahi ai ki Pōlaní ko Nōvema 1977. Ko F. W. Franz, Daniel Sydlik, mo Ted naʻa nau fai ʻa e ʻuluaki ʻaʻahi fakaʻofisiale ko e mēmipa ʻo e Kulupu Pulé. Naʻe kei tapui pē ʻetau ngāué, ka naʻe malava ʻa e toko tolu ʻo e Kulupu Pulé ke talanoa ki he kau ʻovasia, tāimuʻa mo e Kau Fakamoʻoni ngāue fuoloa ʻi he ngaahi kolo lalahi kehekehe.

ʻI he taʻu hokó, ʻi he taimi naʻe ʻaʻahi ai ʻa Milton Henschel mo Ted ki Pōlaní, naʻá na fakataha ai mo e kau ʻōfisa naʻa nau fakaʻatā lahi ange kitautolu mo ʻetau ngaahi ngāué. ʻI he 1982 naʻe fakaʻatā ai ʻe he puleʻanga Pōlaní hotau fanga tokouá ke nau fai ʻa e ʻasemipilī ʻaho tahá. ʻI he taʻu hokó, naʻe fai ai ʻa e ngaahi fakataha-lahi lalahi angé, ʻo meimei fai pē ʻi he ngaahi holo totongi. Neongo ʻa e kei hoko atu ʻa e tapuí ʻi he 1985, naʻe fakaʻatā ai ke mau fai ʻa e fakataha-lahi ʻaho ʻe fā ʻi he ngaahi sitētiume lalahí. ʻI Mē 1989 leva, lolotonga hono fai ʻa e ngaahi palani ki he toe ngaahi fakataha-lahi lalahi angé, naʻe tali ʻe he puleʻanga Pōlani ke fakalao ʻa e Kau Fakamoʻoni ʻa Sihová. Ko e niʻihi ʻo e  ngaahi meʻa naʻe hokó naʻá ne ʻai ai ʻa Ted ke toe fiefia ange.

ʻI he 2007 naʻá ma folau ai ke kau ʻi hono fakatapui ʻa e vaʻa ʻi ʻAfilika Tongá. ʻI ʻIngilani, naʻe hokosia ai ʻe Ted ha palopalema ʻi he māʻolunga hono totó, pea naʻe faleʻi ange ʻe ha toketā ke toloi ʻene folaú. Hili ʻa e toe sai ʻa Ted, naʻá ma foki ki ʻAmelika. Ka ʻi he ngaahi uike siʻi ki mui ai, naʻá ne pā-kālava lahi ʻo mate ai hono tafaʻaki toʻomataʻú.

Naʻe fakaakeake māmālie ʻa Ted, pea ʻi he taimi ko iá naʻe ʻikai malava ke ne ngāue ʻi he ʻōfisí. Neongo ia, naʻá ma fakamālō ʻi he kei lelei pē ʻene leá. Neongo hono ngaahi ngātangá, naʻá ne feinga ke tauhi maʻu ʻene founga-tuʻumaʻú, ʻo aʻu ki heʻene kau ʻi he ngaahi fakataha fakauike ʻa e Kulupu Pulé fakafou ʻi he telefoni mei homa lokí.

Naʻe houngaʻia lahi ʻa Ted ʻi he faitoʻo lelei ʻaupito naʻe fai kiate ia ʻi he falemahaki he Pētelí. Faifai atu pē, naʻá ne toe lava ke ʻalu. Naʻe malava ke ne fakahoko ʻa e niʻihi ʻo ʻene ngāue fakateokalatí, pea naʻá ne feinga maʻu pē ke fiefia.

ʻI he taʻu ʻe tolu ki mui ai, naʻá ne toe pā-kālava ʻo ne mate fiemālie ʻi he Pulelulu, Sune 9, 2010. Neongo naʻá ku ʻiloʻi maʻu pē ʻe ngata ʻa e ʻalunga moʻui ʻo Ted he māmaní, ʻoku ʻikai lava ke fakamatalaʻi ʻeku loto-mamahi lahi ʻi heʻene mole atú mo ʻeku ʻofa lahi ʻiate iá. ʻOku ou kei fakamālō kia Sihova ʻi he ʻaho kotoa ʻi he meʻa naʻe malava ke u fai ke tokoni kia Ted. Naʻá ma fiefia fakataha ʻi he ngāue taimi-kakató ʻo laka hake ʻi he taʻu ʻe 53. ʻOku ou fakamālō kia Sihova koeʻuhí ko e founga naʻe tokoniʻi ai au ʻe Ted ke u toe ʻunuʻunu ofi ange ki heʻeku Tamai hēvaní. Ko ia, kuo ʻikai haʻaku veiveiua ʻokú ne maʻu ʻa e fiefia mo e fiemālie lahi ʻi heʻene ngāue foʻoú.

Hili ha ngaahi taʻu femoʻuekina mo fakafiefia lahi mo hoku husepānití, ko e feʻunuʻaki ki he ngaahi pole he taimi ní kuo ʻikai faingofua. Naʻá ku saiʻia mo Ted ʻi he feʻiloaki mo e kau ʻaʻahi mai ki Pētelí pea ki homau Fale Fakatahaʻangá. ʻI he ʻikai kei ʻi heni he taimí ni ʻa hoku ʻofaʻanga ko Ted pea ʻoku ʻikai ke u kei mālohi ʻo hangē ko ia naʻá ku anga ki aí, ʻoku toe fakangatangata ange ʻeku feohí. Neongo ia, ʻoku ou kei fiefia pē ʻi he feohi mo siʻoku fanga tokoua mo e fanga tuofāfine ʻi Pētelí pea ʻi he fakatahaʻangá. ʻOku ʻikai faingofua kiate au ʻa e founga-tuʻumaʻu ʻa e Pētelí, ka ko ha matavai ia ʻo e fiefia ke u malava ʻo tauhi ai ki he ʻOtuá ʻi he founga ko iá. Pea ko ʻeku ʻofa ʻi he ngāue fakamalangá kuo ʻikai ʻaupito ke hōloa. Neongo ʻoku ou helaʻia mo ʻikai malava ke tuʻu fuoloa, ʻoku ou maʻu ʻa e fiemālie lahi ʻi he kau ki he faifakamoʻoni ʻi he halá mo fai ʻa e ngaahi ako Tohi Tapu.

ʻI he taimi ʻoku ou sio ai ki he ngaahi meʻa fakalilifu kotoa ʻoku hoko ʻi he māmaní, he fiefia ē ko au ʻi heʻeku kau he ngāue ʻa Sihová fakataha mo hoku hoa mali fakaʻofoʻofá! Ko e tāpuaki ʻa Sihová kuó ne fakakoloa moʻoni ʻeku moʻuí.—Pal. 10:22.