KO E kakai ʻi he taʻu ʻe 200 tupu kuohilí naʻe ʻikai malava ke nau falala ki he meʻa kotoa naʻe hiki ʻi he ngaahi nusipepá. ʻI he ʻahó ni ʻoku ʻikai malava ke tau tui ki he meʻa kotoa ʻoku tau lau pe sio ai ʻi he ʻInitanetí. ʻOku lahi ʻa e fakamatala ʻi he ʻinitanetí, pea ʻoku ʻai ʻe he tekinolosia ʻi onopōní ke faingofua ʻetau maʻu iá. Ko e fakamatala lahi ʻoku moʻoni, ʻaonga mo ʻikai fakatupu maumau, ka ko e lahi ai ʻoku loi, taʻeʻaonga mo fakatuʻutāmaki. Ko e ʻuhinga ia kuo pau ai ke tau filifili lelei ʻa e meʻa ʻoku tau laú. ʻI he kamata ke ngāueʻaki ʻe ha niʻihi ʻa e ʻInitanetí, te nau fakakaukau nai ʻoku pau pē ʻoku moʻoni ʻa e ongoongó koeʻuhí ʻoku ʻi he ʻinitanetí ia pe ko hano ʻoatu ʻe ha kaumeʻa ʻi he ʻīmeilí. ʻOku nau tui nai ki ha talanoa neongo kapau ʻoku ngalikehe ʻaupito ia. Ka ʻoku fakatokanga mai ʻa e Tohi Tapú: “Ko e hehemangofua ʻoku ne tui ki he lea kotoa: Ka ko e fakapotopoto ʻoku ne fakakaukau ʻene laka.”—Pal. 14:15.

Ko e fakapotopotó, ko e fehangahangai ia ʻo e hehemangofuá pe vale ʻo tui ki he meʻa kotoa ʻoku tau fanongo ki aí. ʻI he taimi ʻoku tau fakapotopoto aí, ʻoku tau tokanga pea tui pē ki meʻa ʻoku tau ʻilo ʻoku moʻoni. ʻE ʻikai ke kākaaʻi kitautolu pea tui ki ha talanoa loi ʻoku tau lau ʻi he ʻInitanetí, neongo ʻene manakoá. Ko e hā ʻe lava ke ne tokoniʻi koe ke ke fakapotopotó? ʻUluakí, ʻeke hifo kiate koe: ‘ʻOku haʻu ʻa e talanoá mei ha uepisaiti fakaʻofisiale falalaʻanga? Pe ʻoku haʻu ia mei ha uepisaiti ʻa ia ʻokú ne fakaʻatā ha taha pē ke tohi ai ʻene fakakaukaú, pe mei ha uepisaiti ʻoku ʻikai ʻiloʻi? Kuo ʻosi hā ʻi ha uepisaiti falalaʻanga ʻoku loi ʻa e talanoá?’ a Ngāueʻaki leva ʻa e “boto.” (Pal. 7:7, PM) Kapau ʻoku hā ngali taʻemoʻoni ʻa e ongoongó, ʻoku loi ia. Pehē foki, ʻi he taimi ʻokú ke lau ai ha talanoa ʻikai lelei fekauʻaki mo ha niʻihi, fakakaukau ki he faʻahinga te nau maʻu ʻaonga mei ai kapau ʻe mafola ʻa e talanoá mo e ʻuhinga ʻoku loto nai ai ha taha ke fakamafola iá.

ʻOku toe tuku atu ʻe he kakai ʻe niʻihi ʻa e ngaahi ongoongo ki he faʻahinga kotoa ʻoku nau fetuʻutakí ʻo ʻikai vakaiʻi pe ʻoku moʻoni ʻa e talanoá pe ʻikai fakakaukau ki he meʻa ʻe hoko hili ʻenau tuku atu iá. Mahalo koeʻuhí ʻoku nau loto maʻu pē ke maʻu ʻa e tokanga ʻa e kakaí pea loto ke hoko ko e ʻuluaki faʻahinga  ia ke fakamafola atu ʻa e ongoongó. (2 Sām. 13:28-33) Ka ko e tokotaha fakapotopotó ʻokú ne fakakaukau ki he maumau ʻe lava ke hoko aí. Ko e fakatātaá, ʻe lava ke maumau ai ʻa e ongoongo ʻo ha tokotaha pe ko ha kautaha.

Ko e tokotaha ʻokú ne tuku atu ʻa e ongoongó ʻoku ʻikai nai ke ne vakaiʻi pe ʻoku moʻoni koeʻuhí ko hono fai iá ʻoku fiemaʻu ki ai ʻa e taimi mo e feinga. ʻOkú ne fakakaukau nai ko e faʻahinga ʻoku nau maʻu ʻene pōpoakí ʻe lava ke nau fai ia. Ka ʻoku mahuʻinga foki honau taimí. (ʻEf. 5:15, 16) Ko ia ʻi he ʻikai tuku atu ha ngaahi meʻa ʻoku ʻikai ke tau fakapapauʻi, ʻe lelei ange ke tau fakakaukau, “Kapau ʻoku ou veiveiua ai, ʻoku totonu ke u fakaʻauha ia!”

ʻEke hifo kiate koe: ‘ʻOku ou tuku atu maʻu pē ha ʻīmeilí? Kuo faifai ange ʻo u kole fakamolemole ki he faʻahinga ʻoku ou fetuʻutaki mo ia ʻi hono ʻoatu ʻa e fakamatala hala pe aʻu ʻo loi? Kuo kole mai nai ʻe ha taha ke ʻoua te u toe ʻoange ha ʻīmeilí?’ Manatuʻi kapau ʻoku ʻi ai ha ʻīmeili ho ngaahi kaungāmeʻá, ʻe lava ke nau toe ngāueʻaki ʻa e ʻInitanetí pea ʻikai fiemaʻu ke ke tokoni ange ki hono kumi ʻa e ngaahi meʻa ʻoku nau mahuʻingaʻia aí. Heʻikai ke nau loto ke maʻu ha ngaahi ʻīmeili ʻoku kau ai ha ngaahi talanoa, vitiō pe ngaahi fakatātā fakaoli. ʻOku taʻefakapotopoto foki ke tuku atu ha ngaahi hiki-leʻo pe ngaahi fakamatala fakaikiiki fekauʻaki mo e ngaahi malanga Fakatohitapú. b Pea manatuʻi kapau ʻoku fai ʻe ha taha haʻane fekumi pē ʻaʻana, kumi ha ngaahi veesi Tohi Tapu, pe teuteu haʻane tali ki he ngaahi fakatahá, te ne maʻu ʻaonga lahi ange ai ʻi hoʻo ʻoange ʻa e niʻihi ʻo e fakamatala ko ení.

Ko e hā ʻoku totonu ke ke faí kapau ʻokú ke sio ʻi ha loi fakalilifu ʻi he ʻInitanetí fekauʻaki mo e kautaha ʻa Sihová? Talitekeʻi leva ʻa e ngaahi loi ko iá! ʻOua ʻe tui ki ai. Heʻikai fakapotopoto ke ke vahevahe mo e niʻihi kehé ʻa e meʻa ʻokú ke laú pea ʻeke ange pe ko e hā ʻenau fakakaukaú koeʻuhí ʻe toe mafola atu ai ʻa e fakamatala fakatupu maumaú. Kapau ʻoku fakahohaʻasi koe ʻe ha meʻa ʻokú ke sio ai ʻi he ʻInitanetí, kole kia Sihova ha poto pea talanoa mo e fanga tokoua matuʻotuʻá. (Sēm. 1:5, 6; Siu. 22, 23) ʻOku totonu ke ʻoua te tau ʻohovale ʻi hono tala ʻe he kakaí ha ngaahi loi fekauʻaki mo kitautolu. Naʻe tala ʻe he kakaí ha ngaahi loi fekauʻaki mo Sīsū, pea naʻe fakatokanga ʻa Sīsū ki heʻene kau ākongá ʻe fakatangaʻi kinautolu ʻe honau ngaahi filí mo “fai ha ngaahi loi kovi kehekehe” fekauʻaki mo kinautolu. (Māt. 5:11; 11:19; Sione 10:19-21) Ko ia kapau ʻokú ke fakapotopoto mo fakakaukau fakalelei, te ke malava ai ke ʻilo ʻa e taimi ʻoku tala ai ʻe ha taha ha  ngaahi loi mo feinga ke kākaaʻi ʻa e niʻihi kehé.—Pal. 2:10-16.

ʻOku toe fiemaʻu ke tau tokanga fekauʻaki mo hono ʻoatu ha ongoongo fekauʻaki mo hotau fanga tokouá pe vahevahe ha hokosia kuo tau fanongo ai. ʻOku ʻi ai ʻa e ngaahi taimi ʻe ʻikai totonu pe anga-ʻofa ke fakamafola ha fakamatala neongo ʻoku moʻoni. (Māt. 7:12) Ko e fakatātaá, ʻoku ʻikai anga-ʻofa pe fakalototoʻa ke tuku atu ha fakamatala ʻikai lelei fekauʻaki mo ha niʻihi. (2 Tes. 3:11; 1 Tīm. 5:13) Pea ko e ongoongo ʻe niʻihi ʻoku fakapulipuli nai. ʻOku loto nai ʻa e kakaí ke fakaeʻa ʻa e fakamatala ko ení ʻamui ange pe ʻi ha founga pau. Ko ia ʻoku totonu ke tau fakaʻapaʻapaʻi ʻenau totonu ke fili ʻa e taimi mo e founga ke fakaeʻa ai iá. Ko e moʻoni, kapau ʻoku tau tomuʻa tala ʻa e fakamatala ko ení ki ha niʻihi kehe, ʻe lava ke hoko ai ha maumau lahi.

ʻI he ʻahó ni, ʻe lava ke mafola vave ʻaupito ʻa e ongoongó, ʻo tatau ai pē pe ʻoku moʻoni pe loi, ʻaonga pe taʻeʻaonga, ʻikai ha maumau pe fakatuʻutāmaki. Kapau ʻokú ke ʻave ha pōpoaki ki ha taha, ʻe lava ʻe he tokotaha ko iá ke tuku atu ia ki he kakai kotoa ʻi he māmaní ʻi ha laui sekoni pē. Ko ia fakaʻehiʻehi mei he fakatauele ke tuku atu vave ʻa e fakamatalá pea ki he tokotaha kotoa ʻokú ke ʻiloʻí. Neongo ko e ʻofá ʻoku “tui ʻi he ngaahi meʻa kotoa pē” pea ʻoku ʻikai huʻuhuʻu, ʻoku totonu ke ʻoua te tau hehemangofua mo tui ki he talanoa foʻou mo fakafiefia kotoa pē. (1 Kol. 13:7) Pea ʻe ʻikai ʻaupito ke tau tui ki he ngaahi loi pe ngaahi fakamatala tāufehiʻa fekauʻaki mo e kautaha ʻa Sihová mo hotau fanga tokouá, ʻa ia ʻoku tau ʻofa aí. Manatuʻi ko e faʻahinga ʻoku nau kamata pea fakamafola ʻa e ngaahi loi ko ení ʻoku nau fakahōhōʻiaʻi ʻa Sētane ko e Tēvoló, “ko e tamai ia ʻo e loí.” (Sione 8:44) Ko ia ʻofa ke tau hoko ʻo fakapotopoto pea fakakaukau lelei maʻu pē fekauʻaki mo e founga ʻoku tau ngāueʻaki ai ʻa e fakamatala lahi ʻoku tau ala maʻu ʻi he ʻaho kotoa pē. He ʻoku pehē ʻe he Tohi Tapú, “ko e hehemangofua ʻe to honau tofiʻa ko e vale: Ka ko e kau fakapotopoto ʻe ai honau kalauni ko e ʻilomeʻa.”—Pal. 14:18.